الفصل العاشر

قال ليها كيف يعني البينا إنتهي يا عائشة إنتي واعيه ف نفسك بتقولي ف شنو ؟ دا م لعب عشان تنهي اي حاجه بكيفك ؟

٠٠٠ شالت نفس عميق وقالت ليو يمكن الليلة اكتر يوم اكون فيو واعية وعارفة نفسي بقول ف شنو وانا عايزة أقول ليك ٠الحب م كافي جدا إنو ينشأ علاقة مُتماسكة وانت ي محمود فيك ذرة من الشك وعدم الثقه والحاجة دي لا يُمكن تخلينا نتفق ٠٠٠ وهو الزواج كُلو مبني علي الثقه والتفاهم والإحترام و والثقه. بذات تعتبر بند اساسي ف كل علاقة ٠٠٠ وانا م بقدر اتحمل دا كلو وانت م قادر تفهمني والوقت كلو عايز تفرُض سيطرتك وتمشي كلمتك علي ٠٠ وانا

شايفه الكلام دا مُمكن يكون عقبة كبيره ٠٠٠ولو إستمرينا علي المنوال دا لقدام ما حنكون أسرة مُترابطة دا لو اتزوجنا طبعآ ف انا بشوف من أسي ننهي اي شي وقبل ما الموضوع دا يتطور. ويمشي بعيد وربنا يديك الاحسن مني ٠٠سكت مسافة حتي ردا ليها وقال ليها عائشة انا ما عايز الأحسن منك ولا عايز غيرك ويمكن كلامك صح الثقه تعُتبر بند اساسي ف كل شي وانا وحات الله واثق فيكي ثقه عمياء ومستحيل يجي يوم واشك فيكي بس انتي مُطلعة عيني بعنادك دا

٠٠قالت ليو أبدا ي محمود انت م واثق فيني لو واثق فيني م كان كُل مرة تسألني كنتي وين وبتعملي فشنو ٠٠قال ليها طيب آسف دي حاجة لا إراديآ بتجي مني ونهائي ماليها علاقة بالشك أو غيرو وبعدين انتي فاكره إنو ح اخليك مثلآ او أشوف وحدة غيرك بعد كلامك دا كلو ؟

غبيه إنتي ي بت ؟ اخليك لواحد غيري ؟

دي حاجة مستحيل تحصل وخليكي عارفه النقطه دي ٠٠٠ إبتسمت وقالت ليو اصلاا الكلام دا قلتو ليك ساي وحبيت أرجع ليك عقلك ٠٠ وياريت ي محمود م تصعبا علينا أكتر من ماهي صعبه وخليك فاهم ياخ٠٠٠ قال ليها حاضر ي قلبي من عيوني يلا اقطعي وشك عايز أنوم وتاني م تورجغي ساي لأنو بجيك هناك ف البيت وبكسر ليك راسك الكبير دا٠٠ردت ليو بضحكة وقالت ليو راسي دا شكه وبكا منك ٠٠٠قال ليها اي علشان م بيسمع الكلام ٠٠قالت ليو طيب طيب تاني ح يسمع. الكلام ويلا. نوم ووووانت من اهل الخير ٠٠قفلت الخط وجدعت التلفون ف السرير ورجعت قعدت ف الكُرسي وابتدت تشرب ف القهوة ٠٠٠

ف الخرطوم ٠٠٠ ف صباح اليوم التاني ٠٠٠

صحيت أول واحد طبعآ من سهر امس ما سمعت آذان الفجر وصحيت مُتأخر شويه والموضوع دا ماكل معاي جمبه ٠٠ حليل عبدالعزيز كان هو بصحيني لو شالتني نومه فقدتو بالجد الإنسان دا ٠٠ طلعت من البيت مباشر دا بعد م صليت واستحميت ٠٠وسبحان الله بقت مافي حاجة فارقه معاي و مشاعري كُلها اتلاشت وقلبي اتحجر يمكن الضغوطات والحاجات المريت بيها دي كُلها طلعت مني نُسخة قاسيه ٠٠٠ مشيت بيت عم بلال دقيت الباب بعد دقيقه حتي فتحو لي وكان دا هو زاتو

الفتحو لي عم بلال ٠٠ فرحت شديد لمن شفتو واقف على حيلوا وصحتو كويسه وسبحان الله فيو قبول كدا عجيب ودايما بشوفو مُبتسم ٠٠ سلمت عليه وسألتو من صحتو قال لي الحمدلله اتحسنت بكتير قلت ليو بعد يومين حتكون المُقابله ٠٠٠قال لي ان شاءالله أسي اتفضل م تقيف ف الباب كدا قلت ليو والله مُستعجل ماشي الشغل وتاني ماشي اشتري تلفون قال لي وين تلفونك قلت ليو اتكسر والله قال لي ربنا يعوضك قلت ليو امين قال لي بس أدخل اشرب الشاي قلت ليو

بشرب قدام ٠٠٠ قال لي تمام ٠٠ ودعتو وطلعت طوالي وعلي حظي لقيت مواصلات وقفتها وركبت طوالي بعد نص ساعة وصلت السوق خشت مكان التلفونات اول شي اشتريت لي تلفون ومشيت أقرب مركز ل ناس زين والحمدلله كُنت شايل معاي رقمي الوطني اشتريت شريحة جديده وبعدو خشيت الصالون خففت شعري شويه لأنو بقي كتير وقبيل لاحظت ل عم بلال يعاين ليو ساي وكأنو عايز يقول لي خففو ي ولدي المهم مشيت البوتيك ولقيت حسن قاعد سلمت عليه ٠٠ و طوالي طلع وانا استلمت

منو وتاني جا مُبشر واستلمنا الوردية سوا وصادف زمن الفطور خلاص جا مبشر طلع يجيب لينا أكل وانا طلعت تلفوني ودخلت الشريحة الجديده حبشت جيوبي عشان اطلع الرقم الاداني ليو امس الشاب بس إتذكرت إنو انا بدلت ملابسي لكن حفظتو ف راسي لانو أمس بالليل الوقت كلو كُنت بعاين فيو ٠٠٠طوالي سجلتو وحولت رصيد من اقرب كُشك واتصلت ليو طبعآ م كنت عارف اسمو ٠٠طوالي فتح الخط قال لي والله ود حلال و حاليا انا قاعد مع صحبي وقلت ليو امس ف شاب من

كسلا اتعرفت عليو ٠٠٠قلت ليو اسمي يوسف قال لي بس ظابط ي يوسف المهم اتصالك دا جا ف زمنو وكُنت متمني تتصل لي الليلة قبل بكرة ٠ رديت ليو ب إستفهام وقلت ليو شكلو ف تطورات حاصله؟

٠٠قال لي اي والله انت عارف ي يوسف امس ب ليل بعد رجعت منك جاني اتصال من صحبي ال ح نسافر معاو وقال لي بكرة ح نطلع قلت ليو كيف يعني موش كانو اسبوعين؟

قال لي اسي بقو يوم واحد و لو لسه عندك نية اجهز تب قلت ليو ابشر ي صحبي جاهز ف اي زمن انا البلد دي قلبي أباها ياخ قال لي قدام ي زول اسي المطلوب منك. 500الف بس عشان مُتطلبات السفر قلت ليو تمام ٠٠قال لي عديله ح اجيك ف السوق قلت ليو طيب قفلت الخط وصادف مبشر جاا قال لي معقوله ي يوسف مسافر ولا شنو قلت ليو اي قال لي وين قُلت ليو ليبيا هزا راسو بمعني فهمت من ليبيا ح تركب السمبك ٠٠٠قال لي اها اهلك عارفين؟

قلت ليو م عارفين وما ح يعرفو قال لي حاسي سفرك دا ليو علاقه بيهم قلت ليو م علينا لانو م عايز أوجع راسي قال لي تمام ختينا الأكل واكلنا وبعدو مشيت عملت شاي بالسخان

واثناء م انا بعمل فيو كان الشاب داك بيتصل لي ٠٠طبعا للأن م عرفت إسمو ٠٠فتحت الخط وقال لي انا ف السوق انت وين وصفت ليو مكان البوتيك ف اقل من عشرة دقيقه شفتو واقف قدامي سلمت عليه وجبت ليو كُرسي قعد وجبت طربيزة وجبت ل نفسي كرسي وقعدنا قُصاد بعض والطربيزة ف نصنا وفيها الشاي ٠٠قلت ليو انت إسمك منو قال أيوب قلت ليو تمام ي أيوب اها بكره بالضبط ح نتحرك ؟ قال لي ان شاءالله قلت ليو تمام قال لي

قروشك جاهزة قلت ليو اي قمت من مكاني ومشيت دخلت جوا البوتيك حسبت. 500الف وجيت اديتوا ليها قال لي بيناتنا تلفون قلت ليو عديله شال القروش وفات ٠٠ ف جانب اخر بلسان عائشة ٠٠

يمكن اصعب فترة تمر علي الانسان انو يكون ماف زول حاسي بيك ماف زول حاسي بتعبك وجهدك والحاجه البتعملها ٠٠٠٠طلعت من غرفتي بعد لليلة عصيبه من البكاء الكتير ويمكن اصعب لليله مرت علي وقد تكون أسوأ ليله ٠٠٠مشيت المطبخ وبديت اجهز ف الشاي كانو كلهم نايمين والغريبه إنو امي بتصحي بدري بس الليله م صحت حسيت بيها اتأثرت شديد بموضوع يوسف ٠٠٠٠هزيت راسي بيئس وطلعت حاجات الشاي من الدولاب سرحت مسافه وانا ماسكة الكبابي ف يدي وبفكر يارب

حاليا يوسف بيعمل ف شنو رجعت ختيتهم ف الدُرج وشلت الجك عشان أجيب موية لقيت سفيان طالع صبحت عليو وقلت ليو اصبر اشرب الشاي قال لي مستعجل قلت ليو اليشوفك يقول مستشار ف حقوق الإنسان ٠٠ ردا لي بضحكة وقال لي انا زاتي م بتشرف اشتغل شغل زي دا ٠٠ضحكت وقلت ليو هو انت لاقي لكن ٠٠٠حمر لي وقال لي عيوش بطلي ٠٠٠ سرحت مسافة في كلمة عيوش دي ٠٠ طقطق اصابعينو وقال لي سرحتي وين قلت ليو الليله جبت اسم عيوش دا من وين قال لي يعني انتي

مُفتكرة يوسف براو بدلعك كدا ٠٠إبتسمت وقلت ليو بس متعودة أسمعها منو اكتر شي ٠٠قال لي ف تفرقه شديد حاصله انتي لي بتحبي يوسف اكتر مني ٠٠ضحكت وقلت ليو عشان هو حنين شديد ٠٠ عاين لي بطرف عينو وقال لي وانا شرير صح ٠٠٠ ضربتو ف كتفو وقلت ليو انت زاتك بحبك ي اخوي انتو مكانتكم وين ياخ ربنا يحفظكم لي ٠٠ ردا لي بضحكة وقال لي ويحفظك لينا ي غلا ويلا سلام فتح الباب وطلع وانا شلت الموية ورجعت المطبخ بعد نص ساعة صحو كُلهم امي كانت شبه

عيانه قلت ليها مالك قالت لي موضوع يوسف دا م نومني نهائي حسيت ف اللحظة دي لازم اطمنها قلت ليها امس اتصل انتو كنتو نايمين وسلم عليكم كلكم فرحت شديد وقالت لي الحمدلله الله يسلمو وصادف ابوي واقف وقال لينا انا م قلت ليكم ح يرجع قلت ليو اي اي الحمدلله ٠٠٠ اتلمينا كُلنا ف نقطة وحده وشربنا الشاي لحظات بس وسمعنا صوت زول بيضرب ف الباب مشيت فتحتو وكانت دي أُخت إسراء الصغيرة فضلتها جوا دخلت وسلمت عليهم كُلهم وعاينت لي امي وقالت

ليها خالتو فاطمه امي قالت ليكم الجمعة الجاية عرس إسراء ٠٠امي عاينت ليها بيئس وقالت ليها الله يحيينا و البت طلعت ٠٠ وانا طوالي قمت من نصهم ودخلت جوا لقيت هديل بتبكي ٠٠٠