الفصل التاسع

دخلت أول دُكان صادف طريقي بس م كان عندهم لبن٠٠٠ ف اضطريت أمشي ل قدام ٠٠ مشيت أكتر من محل ونُص المِحلات قفلت يمكن أكتر من نص ساعة وأنا بفتش٠٠ وف النهايه إتذكرت مكان قريب للسوق ف اضطريت إنو أمشي هناك والعربات كانت مُكرشه كُلها وماشغاله ونسبة ل إنو الجوو كان بارد شديد ف كانو نادرآ م يشتغلو بالليل ٠٠٠مسكت الظلط وبقيت ماشي وأنا مُدخل يديني ف جيوب البنطلون لأنو كُنت بردان شديد ٠٠٠٠قطعت نص المسافه جاا واحد ب الموتر وقف وسلم

علي وقال لي ماشي وين قُلت ليو السوق قال لي تمام أركب بوصلك ف طريقي قُلت ليو تسلم ي ابو الشباب ركبت معاو واتحركنا وأثناء م نحنا ماشين٠٠٠ بقينا نتونس قال لي والله م عارف بس فيك شبه من ناس كسلا٠٠٠ضحكت وقلت ليو هو الناس بقت تشبه ولاياتهم ولا ايه٠٠ردا لي بضحكة وقال لي والله م عارف بس ف حاجة غريبه سبحان بتميز الناس من بعض وبتخليك تعرف إنو الزول دا جاي من الولايه الفلانيه ٠٠ قلت ليو والله كلامك صح قال لي يعني انت من كسلا

قلت ليو اي ٠٠٠إبتسم وقال لي ولاية ظابطه شديد وناسها طيبين قُلت ليو يعني زُرتها قبل كدا قال لي اي كُنت ماشي ارتريا وجيت ماري بيها وقعدت فيها شهر قُلت ليو ايو لالا كويس قال لي وحاليا جيت الخرطوم عشان عندي موضوع كدا عايز اخلصوا وبعدو ماشي ليبيا ومع كلمتو دي وصلنا السوق نزلت من الموتر وقلت ليو ثواني ي ابو الشباب انت ماشي ليبيا يعني؟

قال لي اي و انت عارف انا لو ماسافرت م برتاح خمسه سنة ياخ و لافي ساي٠٠٠ قُلت ليو و ح تتحرك متين؟ قال لي اسبوعين بالكتير ؟ قلت ليو ماشي براك ولا معاك زول؟ قال لي عندي اصحابي تلاته ح نتحرك مع بعض قلت ليو شكلكم مُفكرين ف السمبك؟

٠٠ردا لي بضحكة وهو بمرر يدو ف عمود انفو وقال لي السمبك فكرة والفكرة لا تموت ٠٠ابتسمت وقلت ليو قدام ي صحبي بيناتنا تلفون انا زاتي مُكبرا قال لي ابشر ياخ حبابك الف يمكن زاتو ل خير اتقابلنا قلت ليو اها طيب أديني رقمك عايز اطلع تلفوني بس إتذكرت إنو كسرتو ٠٠٠ وهو طلع تلفونو وقال لي اها سجل قلت ليو معليش ياخ حاليا ما معاي تلفون قال لي مامشكلة طلع دفتر صغير وقلم من جيب القميص اللابسو وكتب لي رقمو واداني ليو قُلت تسلم يا

اخوي وان شاءالله ح اتصل ليك ف اقرب فرصه ٠٠قال لي تمام دور موترو وفات وانا دخلت السوق الحمدلله كان ف محلات كتيرة شغاله ٠٠اول حاجة مشيت البوتيك لقيت حسن شغال ودا بتاع البوتيك الشغالين معاو قال لي شنو ي زول من قبيل حارسك ما جيت قلت ليو ظروف منعتني قال لي ان شاءالله خير؟

قلت ليو خير وحاليا م جيت عشان استلم منك ح انزل بكرة ان شاءالله قال لي م مشكلة قلت ليو شكرا علي تفهُمك٠٠ واثناء حديثنا ضرب راسو بيدو ضربه خفيفه وكأنو كان ناسي حاجة واتذكرها قلت ليو ف شنو قال لي طبعا قبيل النور جا وما لقاك ضحكت وقلت ليو النور الحرامي ولا غيرو؟ قال لي هو زاتو وشكلو الدنيا اتقفلت ف وشو ٠٠قلت ليو كيف م تتقفل ليو و هو شغلو كلو نصب واحتيال وياكل ف حق المساكين ٠٠قال لي طبعا جاب ليك قروشك ؟

قُلت ليو لحظة لحظة انت جادي ؟

قال لي سُبحان الله شكلو ضميرو أنبو ٠٠المهم دي مليار ونص حقت تلاته شهر قُلت ليو بس هي كانت مليار قال لي الباقي قال ك إعتذار علي الشي العملوا ونسبة لي إنو آخرها ليك سنة كاملة قال هدية منو ساي قلت ليو طبعا انت عارف ي حسن اول جيه لي من كسلا انا اشتغلت معاو وكرهني اي شي قال لي لي خير ي صحبي قلت ليو المهم خليها معاك حاليآ م محتاج ليها لأنو معاي قروش قال لي تمام ح اجيب بيها بُضاعة عشان م تقعد ساي قلت ليو ظابط ٠٠خلصت حديثي

معاو وطلعت طوالي مشيت اشتريت اللبن وكان ف مطعم فاتح مشيت واتعشيت عندو بعدو مسكت شارعي عديل وفضلت ماشي ف الظلط٠٠ الجوو زاد برودة أكتر وكان ف هواء شديد ٠٠ كُنت سرحان ف الماضي وف الأحداث الحصلت دي كُلها كُنت بس مفكر ف السفر ومافي اي حاجة شاغلة بالي غيرو هو ٠٠٠

=الحياة قد تكون قاسية معاك شديد وربنا عايز يشوفك ح تصبر أو لا ويمكن حياتك تجوط عشان تترتب ودي كُلها حاجات لا يعلمها إلا الله يمكن انت تفقد حاجة بتحبها شديد وربنا كاتب ليك الاحسن منها دايما العوض ح يكون مُعجزة ٠٠٠ بس دا لمن انت تصبر وتتوكل علي الله وترضي بالحاجة القسمها ليك

لحظات بكون عندك هدف وحلم =يمكن انت تستخدم كُل الأساليب عشان تحقق أهدافك بس م بتتحق ويمكن ل خير بيعلموا ربنا برضو ودا ما بيعني انو انت لازم تستسلم لا بالعكس انت لازم تحاول لازم تغير وجهتك تغير هدفك حلمك طموحك غير الطريق كلو ابدا وجهة جديده حلم جديد طموح جديد أهداف جديده ٠٠٠ ٠٠♡ وخلي ربنا الوجهه الاولي ف كُل شي ٠٠٠

= رياح شديده لليله مُظلمة طريق خالي من الماره صوت الرياح وهي تعصف ب أوراق الشجر ٠٠٠أحلام لا تتحق واقع مرير أرض جرفاء اليأس ف كل مكان لا شئ يتحقق لا أحد يعبث أو يكترس لأمر احد الجميع يقول نفسي نفسي ٠٠٠٠٠ هو فقط يسير وحدهُ حاملآ معه نفسه ٠٠٠ ونفسه لم تعُّد أن تقوي أن تحملهُ ٠٠هو فقط يطلب الإعانة من ربه ٠٠ يقف لحظة يعود إلى الحاضر يرفع رأسهُ آناء السماء ثم يُخاطب نفسه قائلآ٠٠٠٠

يوسف أوع تستسلم انت اقوي من الظروف انت اقوي من اي حاجة. ودي كلها اختبارات وانت قدرها ها يوسف اصحي علي نفسك يا زول غير طريقك غير ألف وِجها مانفعت معاك انت م يوسف حق أمس كل يوم حتكون يوسف جديد لحدي م تصل ل يوسف الأنت عايزو ٠٠٠ ثم يعود ليكمل طريقه بعد انا أفرغ كل غضبهُ ٠٠ ♡ ومن ثم يتحدث بلسانه ٠٠٠

=بعد م خاطبت نفسي ارتحت شديد مرات م ينفع انو نحكي لي اي زول وما اي زول بكون مستعد يسمعك أو يساعدك ٠٠٠٠نفسك دي هي زاتها ال ح تسمعك ربنا ح يسمعك بس البشر م ح يسمعوك ولا ح ينفعوك الا من رحم ربي ٠٠٠ لقيت نفسي وصلت بيت عم بلال خلاص دقيت الباب بس ماف زول فتح لي ويمكن نامو نسبة ل إنو انا

اتأخرت شديد لفيت وعايز ارجع البيت سمعت حركة ف الباب رجعت ووقفت تاني لحظات بس والباب اتفتح كانت دي أيه وهي بتحاول تفتح ف عيونها ٠٠ردت لي بصوت نعسان وقالت لي اتأخرت قلت ليها بعتذر اضطريت انو امشي السوق لانو هنا مافي قالت لي عذبناك معانا قلت ليها مافي اي عذاب وياريت م تحاولي تاني تطلعي بليل قالت لي طيب مديت ليها اللبن شالتو مني وقلت ليها عم بلال هو كيف أسي قالت لي لسه نايم قلت ليها تمام ح اجي الصباح اشوفو قالت لي طيب

دخلت جوا وقفلت الباب وانا إتجهت علي البيت العايش فيو وصلت ولقيت الباب مفتوح دخلت جوا لقيت مصطفى مٌفرش فرشة ف نص الحوش وعامل جَبنه جات ف وقتها والله جيت وقعدت معاو لحظات بس وجا عبدالله ودا برضو عايش معانا سلم علينا ودخل جواا بدل ملابسو وجا قعد ٠٠٠مصطفي كب لي فٌنجان جَبنه شلتو منو وبقينا نتونس وهو بهناك يهبب ف النار لانو الجو بارد شديد دخلت جوا لبست سيوتري وجيت راجع قعدت تاني ٠٠وبقينا نحكي عن أهدافنا واحلامنا قلت ليهم

انا مسافر ليبيا ٠٠عبدالله قال لي ي زول ليبيا شنو ؟

انت موش ناوي تعرس والشهر الجاي ترجع كسلا ؟ قلت ليو ما كل حاجة بتمشي علي كيف الزول ٠٠٠ قال لي والله ي يوسف م بنصحك قلت ليو والله حاليآ الفكرة دي شاغله كُل عقلي وانا نويت خلاص دعواتكم بس ٠٠مصطفي قال لي ارمي قدام ي صبحي ويمكن بلحقكم فيما بعد قلت ليو ربنا يسهل بس ٠٠وفضلنا نتونس للساعة وحده ونص منتصف الليل٠٠٠ علي بُعدٍ آخر ٠٠٠

كُل زول فات غرفتو بعد م إنتهت اللمه العائلية ٠٠سفيان و وليد وعم كمال فاتو الديوان وعم كمال نام طوالي ووليد وسفيان كانو بيتونسو بخصوص يوسف ٠٠٠ خالة فاطمة دخلت غُرفتها وقعدت ف طرف السرير كانت متوتره شديد واتذكرت آخر كلمة قال ليها يوسف ٠٠امي ادعي لي بقولو دعوة الوالد م بتخطئ وخليك عارفه ي امي انا بحبك شديد ومستحيل يجي يوم واخليكي تزعلي انتي بس كيف تكوني راضيه مني٠٠٠ واعفي لي ي غاليه وإن شاءالله اول بت لي ح اسميها فاطمة ٠٠٠رجعت للحاضر وقشت دمعتها واتذكرت ابتسامتو وهو طالع من البيت٠٠ ٠٠قامت من مكانها وفتحت الدُرج طلعت ليها مسكن وبلعت رقدت ف السريع وحاولت تنوم ٠٠٠٠

ف الغُرفه ألمُجاورة٠٠٠ كل مرة تعاين ل تلفونها ٠٠ وتمشي وتجي يا الله ي عمر ح تتصل متين الساعه وحدة جات قبل تتم كلامها التلفون رنّ جرت بلهفة وشالتو وفتحت الخط ٠٠ وفاجأتو بكم هائل من الاسئلة انت وين ؟ وتلفونك كان مشغول مع منو بتخوني صح ؟ لي ساعة بتصل ليك بقول لي مشغول؟ قال ليها خلاص خلصتي ؟

قالت ليو لا لسه ٠٠قال ليها اها أرقي طيب ٠٠زعلت وقالت ليو قصدك انا كلامي كتير ي عمر ٠٠ قال ليها م هو انتي من قبيل بتتكلمي م اديتيني مجال زاتو عشان أشرح ليك ٠٠قالت ليو اها اشرح لي قال ليها كُنت بتكلم مع صحبي وعندنا موضوع ضروري كدا بنحاول نخلصوا واحتمال اسافر الخرطوم الاسبوع الجاي ٠٠قالت ليو شنو شنو علفكرة انا اتصلت ليك عشان تجي تقابل اهلي قال ليها انا حاليا م مُستعد ولا جاهز اصبري علي شوية قالت ليو بس انت تعال وري وشك ساي وامشي وعلفكرة قبيل امي شافتك قال ليها اي عارف شفتها من بعيد بمراية العربية ٠٠قالت ليو شفتها وعملت نايم ؟

طوالي قفلت الخط حاول يرجع ليها بس أبت ترفع ٠٠٠ جانب تاني ٠٠٠

كانت قاعدة ف الكُرسي وهي بتعاين ف الفراغ نسبة لي حُزنها الشديد علي يوسف كان إحساس إنو ما ح تشوفو تاني م عايز يفارقها هزت راسها بعدم تصديق وحاولت تستخدم كُل الأساليب الممكن تخليها تطرد الأفكار الما كويسه دي. من راسها قامت من الكُرسي وطلعت من الغرفة بخطوات هادئه إتجهت علي المطبخ فتحت الخِزانة وطلعت بُن وسكر وعملت ليها قهوة علي أمل ترتاح شوية من ضجيج أفكارها ٠٠٠شالت القهوة ورجعت الغرفة سمعت تلفونها بيرن جرت بلهفة وشوق

وقالت اكيد دا يوسف بس كان دا محمود فتحت الخط وسلم عليها ٠٠كان منفعل شديد وقال ليها كُنتي وين المفروض من الجرس الأول تردي قالت ليو مُتصل لي رئيس الأمم المتحدة مثلآ وبعدين انا كُنت بعيده من التلفون قال ليها بس انا مية مرة قلت ليك م تجدعي ف اي مكان خليك قريب منو لأنو ف اي لحظه ممكن بتصل ليكي ٠٠شالت نفس عميق وبنبرة صوت باهته قالت ليو محمود البينا إنتهي ٠٠٠