الفصل السادس

سرح مسافة وقال لي٠٠٠ أسمع يا يوسف ٠٠انت إنسان كويس شديد ولي حكمة ربنا جمعني بيك وأنا صح ما عندي اولاد لكن اقسم بالله بناتي ديل يسدو الدنيا ومافيها وانا مُفتخر بيهم شديد وطاير بيهم السماء انت م بتتخيل مدي حبي الكبير ليهم ٠٠والحمدلله انا ماخايف من مرضي دا ومعروف المرض م بيقتل والأجل اذا جا تاني مافي كلام بس لو جا يوم من الأيام وربنا شال أمانتو بناتي ديل أمانة ف رقبتك يا يوسف وانا عارف انو مفروض م أحملك مسؤولية كبيرة زي دي ولا انت مُلزم إنو تنفزها وح تقول لي قرايبك وين اهلك اعمامهم خيلانهم ٠٠للاسف ي ولدي انا واحد عند امي وابوي الله يرحمهم وعمي كبير بالحيل شايل نفسو الحمدلله هي تفاصيل كتيرة وانا ماعايز اتعمق فيها أكتر من كدا والحمدلله انا ي ولدي عندي مشروع ف عطبرة هناك وحاليا مؤمنو للعُمال الشغالين فيو وح اديك كُل التفاصيل حقتو ان شاءالله و إذا حصلت لي اي حاجة ياريت تديرو انت ومنو تعيش بيو بناتي ديل ٠٠كُنت بسمع ف كلامو بس واستنيتو لين ما خلص كُل حروفو ٠٠مسكت يدو وطبطبت عليها برفق وقلت ليو شوف ي عم بلال زي م انت قلت المرض م بيقتل وان شاءالله ربنا يحفظك ويخليك لي بناتك وانا واثق انو ح تلقي العافية ان شاءالله قال لي الدنيا م معروفه ياولدي قلت ليو عم بلال شوف بناتك بيبكو حاليا ٠؟اتلفت عليهم وفعلا كانو بيبكو نسبة ل كلامو الاخير دا ٠٠قال ليهم ما تبكو يحبيباتي انتو ٠٠ايه مسحت دمعتها وقالت ليو ي ابوي ياريت تتفاعل بالخير وانا عندي إحساس كبير ح تلقى العافيه ابتسم وقال ليها ان شاءالله وبتمني من الله يطول ف عمري بس عشانكم انتو لحدي م أدخل كل وحدة بيت حلالها ٠٠٠واتلفت علي كُنت حاسي إنو عم بلال ف حاجة تانيه عايز يحكيها لي بس ماقادر ويمكن شبه فهمتو او لا واحتمال فهمي دا يكون قابل للصواب او الخطأ ٠٠هزيت راسي ووجهت نظري ناحية عم بلال عايز اتكلم معاو كدا جا الدكتور ٠٠٠قال لينا ح نخرجو هسي ومافي داعي يرقد بس حتكون عندو مُقابله كُل نهاية اسبوع وح نستخدم معاو حاليا العلاج العادي وإذا م استجاب ح نستخدم الكيماوي ٠٠اية إتلفتت عليو بذعر وقال ليو بإذن الله وحده ح يستجيب وفضلت تردد فيها ٠٠حسيت انو الدكتور لسه عندو كلام تاني قلت لي عم بلال ممكن أشرف علي الموضوع دا انا وكل نهاية اسبوع بجيبك هنا وحاليا طالع ح اناقش مع الدكتور الحاجات المطلوبه كُلها ؟قال لي طيب يا ولدي وربنا يبارك فيك ٠٠مشيت للدكتور وطلعنا برا الغرفه ٠٠قال لي ف علاجات ح اكتبها ليك وفي اكلات كتيرة مالازم يأكلها تاني قلت ليو طيب ٠٠شلت الرويشته ودخلت جوا قلت ليهم اجهزو ح نطلع ٠٠٠ مرت عم بلال قالت لي بجد ماعارفين نشكرك كيف ٠٠وايه برضو اتكلمت بصوت واطي وقال ليك ربنا يجازيك بالخير ٠٠ قلت ليهم يجماعه الناس بالناس والكل ل رب العالمين وزي ماقال عم بلال لي حكمة ربنا جمعنا سوا المهم أسي ارح اطلعو سندت عم بلال وايه شالت العلاجات وطلعنا ٠٠وقفنا ف الظلط لحدي م جات العربية ركبنا واتحركنا بعد نص ساعة وصلنا وبتاع العربية وصلنا لي جمب الباب حاسبتو وفات ونحنا دخلنا جواا دخلت عم بلال ف الديوان وونست معاو شويه جات مرتو او خاله نعمات قالت لي استني الغدا قلت ليها والله ما بقدر عندي موضوع ماشي اخلصوا قالت لي تمام ٠٠عاينت ل عم بلال لقيتو نام ٠٠طلعت ومشيت البيت ٠٠لقيت مافيو زول اكيد كلهم طلعو ل اشغالهم اتصلت لي إبراهيم بس تلفونو كان مشغول وهو زول فارقه جد ٠٠٠اكيد بتكلم ليو مع بت الله يهدي ويبطل حركاتو دي ٠٠دخلت غرفتي طلعت لي غيار مشيت استحميت ودخلت المطبخ لقيت حالتو ميئوس منها ٠٠ اكيد دا مصطفي قلبو ذي دا الإنسان دا شويه راسو م كويس ولا مالو ما عارف المهم انا وهو م بنتفق نهائي بس رُغم دا كلو بحب ونستو الكلها احلام وطموحات ٠٠اتذكرت عبدالعزيز الدنيا دي مسخت لي اكتر انسان ملتزم وهو البصحيني ل صلاة الفجر دعيت ليو ربنا يسهل طريقو وين مكان٠٠٠ فجأة جا علي بالي عيوشه ٠٠اتذكرت انو ح تمشي لي ناس اسراء وفجأة لقيت نفسي ببتسم لا اراديآ٠٠٠٠البت دي ملكت قلبي بطريقه ما طبيعيه وماكُنت شايف غيرها نهائي بصيرتي كانت معميه بيها وبسببها جيت هنا وخوفي الأكبر انو اخسرها كنت متعلق بيها ل درجة بعيده شديد لأنو شايفها هي البت الممكن اكمل معاها باقي حياتي وهي الزوجه الصالحه الإتكلم عنها الاسلا٥م وح اطمن علي انو اولادي يعيشو علي المنهج الصحيح ودين التوحيد ٠٠سرحت مسافه وقلت ف سري اكيد عيوشه لسه م جات منهم فتحت تلفوني ودخلت الواتس شفت اسراء رافعه حاله طبعا انا م بتكلم معاها نهائي بس محتفظ بي رقمها وهي كذلك لانو عارف لو اتكلمت معاها الشيطان ح يدخل بيناتنا كُنت خايف عليها حتي من نفسي ٠٠٠عايز افتح الحالة كدا سمعت صوت زول بيضرب ف الباب ٠٠مشيت وفتحتو وكانت دي ايه ٠٠اتخلعت شديد لمن شفتها وقلت ليها عم بلال كويس ؟٠٠كالعادة ردت لي بصوت هادئ وواطي جدا وهي منزله راسها ف الارض قالت لي اي كويس كانت خجوله شديد البت دي قلت ليها الحمدلله ٠٠مدت لي قروش وقالت لي هاك دي القروش الصرفتها من إجراءات المستشفي ل ركوب العربات ٠٠٠ابتسمت وقلت ليها رجعيهم ٠٠قالت لي لالا ٠٠٠رديت ليها بنبرة حادة لمن خافت وقلت ليها أيه رجعيهم وانا قبيل ف المستشفي قلت ليكم شنو ؟٠٠قالت لي طيب بصوت كلو خوف وجرت مشت ٠٠ماعارف بس حسيت بيها خافت مني وقربت ادي نفسي كف ٠٠ البت رقيقه شديد المفروض اتعامل معاها بلطف٠٠ لحظات بس ولمحت إبراهيم بالموتر من بعيد وكل لوحات السعادة مرسومه ف وشو جا ووقف الموتر جمبي قال لي شنو ي صحبي البيت م شالك ولا شنو صابيها هنا ف الشارع ٠٠٠عاينت ليو من فوق لي تحت وقلت ليو شنو ي اخوي انت لابس ملابسي صح ٠٠ردا لي بضحكة وقال لي انت عارف اخوك هدومو كُلها جلاليب وبتاع وملابسك دي كسارة عديل ي صحبي والله هناي من شافتني بقت تتبسم ساي ٠٠٠ضحكت وقلت ليو انت اسي بدل مضيع حياتك دي كلها طلعات مع البنات كدا فتش ليك موضوع ينفعك ياخ وربي انت مضيع زمنك ساي و خاف ربك ي إنسان ٠٠قال لي الله يهديني بس قلت ليو اها هناي دي انشاءالله ح تعرسها بس ؟قال لي وين ياصحبي انا امي

خطبت لي بت أختها وحاليا هي ف الأساس بس حارسها تكبر شويه ٠٠رديت ليو بجديه وقلت ليو انت جادي ؟قال لي اي قلت ليو طيب انتظر عدالة ربنا والتسوي ف بنات الناس ح يرجع ليك أضعاف ي صحبي البنوت ديل شرفنا وعرضنا والرسول وصانا بيهن ٠٠كدي انت راجع نفسك بس ٠٠ ومشيت منو طوالي وقفت العربية واتحركت على السوق طلعت تلفوني عشان اشوف الحاله المُنزلاها اسراء ونسبة ل الشبكة كانت ضعيفه لسه م وضحت لي الصوره ٠٠شويه شويه بدت توضح جا الكمساري عشان الحساب طوالي رفعت راسي من التلفون طلعت القروش وحاسبتو ورجعت وجهت نظري للتلفون تاني ٠٠٠٠هنا الصورة وضحت خلاص وكانت فاجعه بنسبه لي متصورة ليها مع واحد كدا. ولابسه خاتم وهو كذلك وكاتبه اليوم تمت خِطبتي علي من إختاره قلبي ؟ دقيقه دقيقه دا شنو لا دي شنو المهزلة دي الكلام دا جد معقوله دي اسراء دي البت الكسرت الحجر عشانها ؟دي البت الكُنت خايف عليها اكتر من ضُلي معقوله دي البنيت كُل أحلامي وامالي معاها ٠٠٠كانت صدمه بنسبه لي دخلت التلفون ف جيبي ومسكت رأسي بقوة ووجهت نظري تحت وانا بحاول افهم في الشي الحصل دا
=لمن. قال الشّاعر ٠٠٠٠٠♡
سافرت عشان أجمع لي مَال
سافرت شايل حُبنا
يوم عدتّ لأقاني المُحال
لاقتني بِنيه مُحننه
بكت دموعي بدون شعور
والصورة قاسيه ومُحزنه
من فتا بحسب في الشهور
والثانية بتعادل سنة
إن شاء الله بيتك بالسرور
يامنية تفرحي بالجنا
وريني ليه البينا هان ؟
وريني يا منية الحصل؟
الريده عندك إلتزام
وماكُنت لي آمل ٠٠
وين ووعودك والعهود يا جاهله غشوك بالقروش ٠٠💔
ف جانب آخر٠٠٠٠
وصلها نهاية الشارع ٠٠قالت ليو طيب بتصل ليك بعدين قال ليها اهم شي لأنو مُكالمتك دي هي البتعدل لي مزاجي ٠٠٠ردت ليو بفرح وقالت ليو أوكي حبيبي ٠٠غمز ليها ودور عربيتو وفات وهي شالت تلفونها وكُل مرة تعاين ليو برضي ٠٠لقت امها واقفه في وشها ٠٠وكُل لوحات الغضب مسيطرة عليها قالت ليها دا منو يا صايعه ٠٠٠عاينت ليها بشفقه وقالت ليها يُمه اصبري أشرح ليك قالت ليها اها اشرحي لي قالت ليها دا عمر ي امي قالت ليها عمر ولا وزفتي ٠٠اتأفأفت وقالت ليها يُمه ياخ عمر صاحب وليد ٠٠هدئت شويه وقالت ليها صاحب وليد ؟قالت ليها اي انتي مابتعرفيو بس وهو يا امي كان جاي ل ابوي بس انا حميتو ..ردت ليها ب إستفهام كيف يعني حمتيو وأسي عاجبك كدا نازلة وطالعه معاو قالت ليها لا بس حبيت افهمو شويه وانا اقتعنت بيو خلاص ٠٠ردت ليها برضي وقالت ليها تمام الاسبوع الجاي دا يجي البيت لانو ابوكي لو عرف خ يضبحك وسفيان ح يقطعك ووليد ح يدفنك ٠٠٠ردت ليها بخوف وقالت ليها م ح يحصل كدا ان شاءالله قالت ليها لو انتي استمريتي كدا بطمنك ح يحصل واسي ارح البيت مسكت يدها ومشو وفوق دا كلو للاسف م اتكلمت معاها ف طريقة لبسها ٠٠وصلو البيت ودقو الباب ٠٠٠
ف جانب آخر٠٠٠٠
وصلو منطقه كدا إسمها ود شريفي ٠٠
نزلو من الموتر ودا بعد ما وصلو بيت صاحبهم عثمان كان لافي ب سيفو هو والوزير من شافهم استقبلهم ب تلاته تبشيرات جا وسلم عليهم ٠٠٠اوووو سيفو اخبارك شنو يا إنسان قال ليو والله زي ما شايفني لسه عايش ٠٠وانت كيف حالك ي عريس قال ليو مبسوط شديد قال ليو ليك الحق تكون مبسوط لأنو خلاص طلعت من صف العزوبية وعقبالنا نحنا المساكين ديل ٠٠٠ضحك وقال ليو انت ي سفيان لو داير تعرس كان عرست زمان ٠٠قال ليو الموضوع م كدا ياخ بس لسه م لقيت الانسانه الممكن تفهمني ٠٠٠٠هو و باقي الشباب ضحكو بصوت عالي وقال ليو انت المفروض تعرس ليك وحده عندها توحد لانو ب عصبيتك دي ماف بت بتقعد معاك٠٠٠ضحك وقال ليهم لو جات ح اكون معاها حنين بس هي كيف تجي ٠٠٠ قال ليو الله يجيبها طيب ورجع سلم صحبو التاني اوهاج وفضلهم جوا مكان تواجد باقي الشباب ٠٠ دخلوا وسلمو عليهم وجابو ليهم كراسي وقعدو ٠٠شويه كدا وجا شافع جاب ليهم الموية ٠٠لحظات بس وسمعو صوت آذان المغرب ٠٠٠عثمان قال ليهم طيب نصلي عشان بعد شويه يجو ناس الحنة ٠٠سفيان قال ليو يعني عندها ناس ؟ضحك وقال ليو انت جاي من المريخ ولا شنو اي بيجو الاهل الكبار يختو لي حنة العادة وبعدين يجو البنات يختو لي باقي الشباب ٠٠٠