رواية شيخ الشباب(بنت المؤمن) الفصل العشرون 20 - بقلم زهراء العراقيه

مساء الريحان
من كتابات زهراء العراقية

ياحلو يابوسة سهر
ياحلو ياجرة كحل
ياترف ياييزي قهر
شيضرك بكل الشتا الولهان
لو صحوة مطر ؟

-مظفر النواب
اهداء لشهد
•رقية

اليوم طبيت بشهر الثامن وما اعرف شنو ضامه ببطني ولد لو بنية حلوة
ياسر ما يقبل يكول بشهرج الا نعرف ،
ياسر  بطل من الحشد بس خليل بعده
،اني روحي تعلكت بالمزرعة وكل يوم الصبح اروح اكعد بيها مرات بيبي جدة ياسر تاخذني وهي هم اشوف حلالها ومرات ما بيها حيل الضحى تجي عاملة عدهم تنظف اني حدي لل١٠ وارجع للبيت كلشي ما اسوي بيه فاضوج لأن طابقي الفوك انترك ما اكدر اصعدلة وانتقلنا لغرفة خالة جبنا اثاثنا بيها و كوثر شايلة البيت واني احس بضوجه حيل قوية هليام لأن ياسر ما يسولف وياي ولا اني اكدر اروح دوم يم اهلي حتى بابا يسولف وياي مثل قبل بس هو  يتحملني ياسر ينام واني اسولف وياه!  ، و بس ما افهمة ينطني ضهرة ويسكتني دومه تعبان من الشغل
وهليام ينام جوة مو يمي ياريت يرجع يجيه هذا الي يسميه  جرثوم (جيثوم) كان يخليه يمي ينام ! ، بس هو حباب وياي وابد ما يصيح عليه ولا يقلد مثل كوثر و مرات يسمعني بس مرات مو اهواي لان دومه تعبان بس اني احبه حيل حيل لأنه مثل بابا يحبني وما يقلد عليه...وشهد بس تقرة  ، الروحة للمزرعة وحدها احبها

شهد طلعت مكملة ب٢ مواد ما اعرفهن شنو بس فهمت اثنين مواد ، من رحت لهلي اخر مرة مرتضى يلح يكمل خطبته من شهد وامي قلقانه ،وما ترضى
بس بابا بعد العشا  كال اقنعها  ، ثاني يوم الصبح كالت موافقة !،

رجع بابا كلم ياسر من اجه ياخذني ، و ياسر ما طلب مشية ثانية لأن تاخرنا عن ذيج ،
رحنا سوة اني وشهد وامها  وياسر للامام علي ع واهناك تلاكينا مع اهلي
و بالحضرة وداخلها والناس تباوع عليهم كاعدين مرتضى على يمين بابا وشهد على يسارة وعقد الهم  و ياسر كاعد  كدامهم مبتسم وشهد خجلانه مدنكة وامها تبجي...
زينب ما اجت وياهم وشافت الاجواء الحلوة ما ادري ليش
•شهد
رجعت للبيت ابجي وطالعة الدنيا من عيني كله مقبول بعد ما كانت درجاتي جيد جدا و اكمال بأثنين منهن امتحنت بفترة صعبة بسبب رسلان

ما طلعت تغديت ولا گلت لاحد على النتيجة وبس ابجي واني اشوف صديقاتي تخرجن الا اني 
الخنكة لزمتني...العصر ياسر اجاني
يدخل بلا اذن مثلي ويحجي عليه ،

- ها ولج كالو رجعت تعوي(تبكي)
راسبة ولج

-  لولا مو راسبة

- ثولة كولي لعد  شنهو اكمال ام الفواين هههههه

- اي مكملة

ظليت ابجي و انطرحت غاطه راسي بين المخاد
اجتني ضربة على علابيتي (رقبتي)

-ايي ياسر مابيه اقرة وادرس

- عادي هي هاي النهاية اتعبي وبعدين اتكضيها نوم واكل ماكو تعين ضامن مستقبلج اتبيعين عتيك وية سلام

ضحكني واني كارهه الدنيا
-ما لكيت غير سلام

- جا انه اجيت ابارك الكاج اتلطمين

- اوووف كله من رسلان

-ختولي نالت اقل من جزاتها من جدي حرمها التعليم وهاي باقية الها بس سنة وبطلها ظلت بحسرتها

- اووف تعال هم اقرة والله مبية

- مبروك

-على اكمالي!

- على خطبتج ام اعيون زمرد
الخطابة طلبوج من جديد

- يا خطابة لا تكول عادل رجع اتكلم عليه

- مرتضى المهندس اخو رقية اتعرفيه

كالها وغمز والله دخلت بوسط ملابسي
شيقصد هالياسر
خله وجهي ينحني خجل بس الضحكة شقت وجهي و گلبي رفرف فرحان مثل جنح طير توه تلعم يعلى ويرفرف

طلع ياسر واني حضنت المخدة

-يعني صدك بيه اني مالي دخل بعده رايدني

دمعت اعيوني وضحكت بصوت واني حاضنه المخده على بطني ومطروحه على ضهري و اضحك
-رجعلي رجعلي

انمد راس ياسر

- سكتي حسج كلبة

شكهت وحطيت المخده على وجهي

ركع الباب
فزيت ....كمت اطفر على سريري

- ورجع الي ورجع الي طلع رايدني حيل

واضحك من اعماق قاع روحي رجعلي الحياة بأكملها هذا الخبر

انطرحت هلكانه من ضحكاتي و حركتي

هي يومين و اتحدد يوم العقد اخذني ياسر اني وماما...كان بنفسي اسوي حفلة مهر و قاعة لكن الظروف قوية ابن عمي مصارلة فترة طالع أربعينه

شال زهري بورد ابيض ناعم بالاطراف
لفة انيقة و مكياج بناتي خفيف ، و ما اهتميت للملابس لأن اني بعباتي سديت سحابها الي من جهاته مطرزة العباء وردنها بوري بيه نقش نازك ،

وصلنا للحضرة  قبلهم...وشفناهم من اجو علينا ، مرتضى
بلبسة الانيق بنطلون التشينو  قطني يصير هادئ الحركات لونه  (خاكي ) فاتح  مع قميص رصاصي بكم موديلها يصعد يم الكوع ومطبوگ والطبگة لونها خاكي والياخة كذلك خاكية اللون...

كنت مركزة حيل بطريقة  لبسة مشيته تسريحة شعرة بيها موجة امامية كثيفة و محدد من جانب مع لحية معتدلة الكثافة سودة بلون شعرة ، حواجبة مقوسة بصورة عامة بالعراق حواجب الرجال اكثف من النساء!
انبتهت لروحي اني صافنة بخطيبي من اول ما لمحته عيني لحد ما وصلو يمنا الا دنكت بعدها انعدمت الرؤيا من الخجل
كعد والده بوسطنا و الحلوة الناس المارة تباوع النا واحنه فاتحين ادينا مثل الي يدعي والشيخ ابو علي يقرة نذور العقد ...

الي كاعد يمه(مرتضى) ساكت حيل روحي فرحانه لأن راح اسمع كلامه وهو يوافق على العقد ...

تم الاتفاق على اساس مهر  قدره سبعة مليون حاضر و عشرين الغايب

طلعت امي الحلقة الي اشتريتها البارحه انطتها اله ..
امه طلعت من جنطتها علبة حلقته
اخذهن الابو .. ولبسني حلقتي ظل لازم ايدي ولبس ابنه و حط كف مرتضى على كفي و قرأ دعاء
- بسم الله الرحمن الرحيم ،  اللهم جنبنا الشيطان وجنب الشيطان ما رزقتنا فإنه إن يقدر بينهما ولد في ذلك لم يضره شيطان 
اللهم بارك فيهما وبارك لهما في بنائهما.
اللهم أمين
مبارك لكم

وخر ايده عني مرتضى وباس كف والده وراسه و وكفنا يباركون النا ،
اجواء غير متوقعة و طريقة خطوبة خاصة صارت حجم الابتهاجة مالها اتساع بداخلنا الاطمئنان كان حليفنا
ضاعف فرحتي بثوب وغناني عن لمة صديقاتي حولي

ابو علي- يلا عريسنا اخذ مرتك زورها

باوعت لياسر الي مبتسم مبشرني بالقبول

اجه مرتضى يمي وكف ومدلي ايده بنية السلام
- مبارك النا

-الل الله يبارك بيك
ابوه أمره
- اخذ مرتك زورها و بعد
العشا ردها لأهلها
أستغربت من امر وياسر ما اتكلم!
- امرك بوية
نبرته ضاحكة وكلهم ضحكو مفهمت شي مدنگة وخجلانه
واخذني ورحنا..بالفطرة غصبا عني بدرت مني التفاته لياسر
التفتت لمصدر اماني اخوية معرف اتركه ورة ظهري دائما ايده بأيدي
ايد التفت حول كفي واحتضنته حضن
الحمام لصغارها ،
باوعت للأيد ولصاحبها  مرتضى
و رجعت باوعت للخلف لياسر مكان يباوع الي يحجي و يه عمي و راحو  منطينا ظهرهم
زرت مرة ثانية بعد عقد القران واني اطلع من الضريح المقدس للامام علي عليه السلام سمعت بنات
-هاي البنية الي عقدت قبل اشوية
-والله حلوة

ابتسمت و طلعت لكيت مرتضى مخلص و واكف ينتظرني

اتقربت منه برتياب متعوده هاي الوكفة ياسر يوكفها

- تقبل الله يلا انروح؟

-بكيفك هه

مشيت خطوتين وهمين ايدة احتضنت ايدي ،،كانت ايدي هي الثانية مستغربة
الوضع الجديد كانه خيال او حلم يقظة
لكن هي ابتسامته الي أشرقت شمس الامل بعد الظلام بعد اليأس من الخروج من المشخاب ومجاورة من لا احب خلتني ابتسامتة احسة واقع  حقيقي !،  وابتسم يوم  على الدنيا جديد و فسرت أبتهاجاتي كلام عيونه وابتدى صمت الكلام ينحل مع فهمنا لبعض هو الثاني متملكته مثل  أحاسيسي عرفته من  نظراته المتيمة الي كانت تسرق الكلمات من نبض وريده  ويهديها الي
همست بگلبي
{  احبك قبل لا يبتدي الكلام بينا  ،احبك قبل لا تلمس ايدك ايدي احبك اول ما انخلقت من ضلعك }
تحركت اطرافي اصابيعي عانقت ايده
وطلعنا نضحك للحياة و كأن العالم ملكنا و الموجود حولنا عدم ،

اضطرينا نمشي مسافة كون ماكو سيارة هنا تركن...انطلقنا بعدها بسيارته  لوين ما ادري  

اني ساكته واباوع للحقلة برتياح ..
بينما هو  مدري شنو يسوي بتلفونه ويسوق ...

وكفنا عبالي وصلنا للمكان المطلوب
بس شو المكان غريب مو مال نوكف بيه

- شنو وين وصلنا ؟

همس بنبرة اخذتلي روحي

- ما وصلنا بعدنا
ظليت العب بسير جنطتي
وابلع بلعابي

- اطراف اصابيعة حركت ذقني و دارت وجهي عليه..وما زالت اطراف اصابيعة جوة ذقني و شفتي بدأت بالارتباك والتهريج برجفتها القوية

- همم ليش وكفنا

- حتى اشبع نظر من خطيبتي
مصارلنا ساعتين من تزوجنا وانقرن اسمك جنب اسمي مدى العمر انشاء الله

-انشاء الله

ظل يباوع الي ولعيوني كسرلي جرأتي المعهودة خلاني البس ثوب الخجل واتهرب من نظراته المتيمة الشغوفة دخلت لأعماق اعيوني واكتشفت خبايا انجذابي اله فخفت و اتهربت منهن

اتقرب مني سببلي ارتجافة قوية بعضلات القلب
اقتربت شفايفة مني وباس جبيني  سببلي  خدر بحواسي  ملامسة شفايفة لجلدي عصفت بيه المشاعر المستجدة
خفت يبان عليه خاصة حسيت عاقد حواجبة
همست من بين امواج الخجل
- لا تباوع الي

درت وجهي على الجامة و كلي انتفض نفض وايدي حطيتها على صدري

سمعت صوت ضحكة طفيفة
اه حس بيه يحظي اني اشبية هيج انتفض وكمت اتنفس بصوت .

مشت السيارة اوف واخيرا رجع يسوق ويفكني من نظراته الي كنت اتمناها سابقا بس طلعت جبانه كدام سحرهم يرهق ويلوع ويثير خجلي

وداني لمطعم سياحي بالحقيقة يصير على شارع نجف كربلاء ..

دائما كنا نروح اله بس هاي الدخلة غير لأنها وية واحد   مو عائلية

كعدنا ناكل اني أتباوع للاكل وتذكرت هواجسي وخوفي
يا ترى اكدر اكون اسرة و انطيها
حقها
خايفة من الفشل وحده حبي لمرتضى الي أنطاني شجاعة اوافق على فكرة الزواج .  

كنت قليلة الكلام مثل الطالبة امام مدرسها عجيب وين رحت اني واختفت شخصيتي كدامه احس ماعندي حضور هو طاغي عليه بكلامه الهادئ بنظراته الي كل اشوية يكرم عليه بيهن
بصعوبة كدر يطلع مواضيع  بسيطه وياي كنت غير متجاوبة و حس عليه لهذا تقديرا الي ما  ضغط عليه ..
وصلني لبيتنا
-اتفضل انزل

- لا ما يصير اخوج مو بالبيت

-ها وينه لعد

- بعده ما اعتقد وصل لأن ابوية عزمه يمنا هو و الوالدة اعتقد بالطريق

-اها خوش....تصبح على خير

ما رد
نزل وياي
فتحت الباب
اشرالي ادخل

دخلت و دخل
- اوصلج للحديقة حتى يطمأن قلبي

ابتسمت
- واو شكرا
طلعت ما تفرق عن ياسر ومخاوفه بشي هههههه

-انت حلوة حيل وحقة اخوج يخاف عليج

- تسلم عيونك الحلوة

من وصلت لبيتنا الا رجعت الي شخصيتي  الي هربت مني قبل اشوية

لكن تلاشت واختفت من اتقرب  ومن غير فهم مني
رفع وجهي  و دنت نفسة على شفايفي
سكنت حواسي و جفلت انفاسي و غمضت اعيوني كأن روح ثانية دخلت وية روحي تشاركني بدني الذايب..خشونه تلامس نعومتي دغدغت مشاعري و داعبت ثائرتي الانوثية...ابتعدت شفته لكن وجه ما زال امام وجهي
- هذا ردي على تصبح على الخير
وانت من اهلة غمز الي
و تركني مسطولة امشي للداخل كأني راجعة من حانة ليلية اطوطح
وكعدت بالصالة

اتلمس شفايفي !

دخلت كوثر بس سمعت حس احد اجه

-ها واخيرا اجيتي
اتقربت مني بوستني واني مستنكرة لا تحذف اثار بوس مرتضى

- الف مبروك حبيبتي

-الله الله يبارك بيج

كعدت يمي
- عيني اهلج عزموهم بيت الشيخ  ما رجعو للبيت اوف حريمة ما حضرت وياكم

-خيرها بغيرها

-خاف هم ما يقبلون على ابو اني جذبت امهم

-لا شنو انت اختي اذا بعرسي ما اتحضرين منو يحضر لعد

كوثر ما خلاها ياسر اتروح ويانه يدري امهم تتحسس منها لأن جذبتها بسالفة خطوبة ياسر

رحت لغرفتي ذاكرتي اتعيد عليه شكل مرتضى والضحكة شاكه وجهي .

وصلتني رسالة ، بدلت و من اجيت اتصفح الا شفتها فتحتها

- ياريت كل يوم اكدر اتمنى الج الخير قبل النوم !

هذا مرتضى وهذا رقمة حتى بعده ما اظن واصل بيته بالطريق وراسلني
اكيد محضر نفسة وماخذ رقمي من زينب سابقا

رديت
- غريب تتصرف وكأنك ماخذ علية وتعرفني من دهر!

- ماكو شي غريب والدي يكول تدخل لنفس العروسين مودة من الله عزة وجل وبلحظة عقد القران تنعقد ارواحهم سوية من غير احساس ملموس اتصير علاقتهم عميقة

- عمي مبين كلامه حلو

رسل
-وابنه هم

ضحكت

وكتبت
-  انت   كلامك قليل

- لكن افعالي اكثر واجمل!

ما رديت اتهربت خجل
،
و دخلت لعالم جديد مع دراستي  كان مرتضى نافذة راحه الي و ملاذ مؤنس للروح هادئ صوته بيه نبرة تخليك تحس تحادث شخصية تاريخية جايه من غير زمن
واحلى شي بيه ما يستخدم الفاظ الشباب الدراجة حيل لبق بغزلة بمدحي
اجاني مرتين لحد الان وبالمرتين هم يودعني بطريقته الخاصة ..
ويسرق من شفايفي البوسة سرقة لأن ياسر خانق أنفاسه ..
،
بيوم ياسر كربنا اني وكوثر خلانا نطلع جلسة قديمة من المخزن و نحطها بالحديقة و حضرنا كعدة اله عازم أصدقائة بالليل يوصلون ..
اكيد يترأسها خليل بيك مشتاقة اله حيل ،

للساعة تسعة نسمع ضحكهم وسوالفهم
اني راسلت مرتضى وما رد عليه ، وين مشغول ياترى ..

اشوية وسمعت صوت عزف ...اني معرفت بآلات العزف ما ميزتها شنية لكن اللحن عجبني بس شو مو كأنه تسجيل يعني كأنه احد دا يعزف !

و سمعت اغنية
هيثم يوسف
- أضعف كدامك بس انت
و اتمالك نفسي بهالسكتة
نظراتك تحرجني و انسى
وين اتدويني ليا مرسى
ضايع عمري القبلك عشتة
كل عمري ضايع انة عشتة
حبك خلة العالم وردي
غير عيونك انة شعندي

هذي الاغنية الله يحبها مرتضى مرة گال الي احبها حيل تمثلني قبل الخطوبة من التقي بيج
واني كمت اسمعها واحبها

الصوت الي يغنيها عذب بس اعرفه واميزة
لا لا مو هو ما معقولة ابن الشيخ كاعد يغني ! وياسر ما كال جاي

بس دقيقة هذا صوته سامعته بمواليد لأهل البيت او ذكر
لا لازم اتأكد بس اشلون .. حطيت شال ابيض على راسي وصعدت فوك للطابق الثاني و فتحت الرازونة تطل على الشارع الكدامنه والحديقة...واشوفلك الاضوية مفتوحة  عليهم وكاعدين كعدة أنس و الحبيب مضوي يشع وحاط عود ويعزف ويغني . 
هاي الي الاغنية ومرتضى الي  يغنيها
گلبي صار يعزف  وياه ضرباته اعلى  من العود ويركص وياه

مطلعة راسي وصاعده على تخته حمام ياسر السابق واباوع اله....وكان تلتقي عينه بعيني كأن قلبه حسني ورفع نظرة
اني بس راسي طالع ..دنك و غير اللحن

-غاب الگمر وثريتة كلمن نام وية مريته
وانه المكابل عمي بلكن ينطيني  ابنيته

واشوفلك خليل يصفك ويهز بصدره و صديقهم الثالث علي يكول الله عليك
والجو مؤنس عدهم الجماعة
احنه اهنا ماعدنا جار غريب قريب علينا كله بيوت  خوالي وجدي
يمنا ..  

نزلت لجوة ورة بردة الممر واكفه اسنط عليهم
خلص مرتضى الاغنية الحلوة وهو صوته حيل يشبه صوت ماجد المهندس

ياسر
-حبيت حبيت هاي الاغنية اكثر ذيج اجيت انام اعليها

خليل -اتنام ها هههههههههاي

علي- الا تسحب مشفر انت

مفهمت ضحكهم على شنو

بس حتى ياسر حب غنائة ...
ياسر عملي اكثر من مرتضى ومو هلكد يسمع اغاني او يتابع شي وبعد زواجه شو زادت حالته اعتقد يهرب من حياته الي ما مقتنع بيها وما مرتاح ..وحاليا  يريد يدخل بمناقصة  بعملة  الي ما افهم شي منه و ماخذ كل وقته ..

تاخر الوقت و اتفاجأة اليوم يباتون كلهم يمنا...بالاستقبال

خابرني
- ها حبي عرفتي صوتي
وصعدتي
ههههه كنت ادري بيج راح تباوعين لهذا اترصد شبابيك بيتكم

-حلو صوتك حبيبي
كولك على بعضك حلو حتى الخجل بعيونك

- يلا روحي روحي راح اطلع من تواليتكم

- يا ههههه

-شسوي اخوج يكلك حارس عليه
اريد اخابر  ما اكدر

-ههههه العين بالعين انتم هم هيج سويتم بيه

- هههه يلا اروح

-تصبح على خير

- ها هيج صارت يعني مو كايل الج لا تودعيني بالكلام واني ببيتكم

-ههههههه
ضحكت بدلع

- اطلعي للحديقة الخلفية
وسد الخط

ياي والله مشتاقه اله حيل اتعمدت استفزة !طلعت اتخنس واتخيل اعيون ياسر تلكفني ...
طلعت اتمشى اله شفته واكف ومنطي ضهرة
اندار من حس احد وراه
- اج.....
قبل لا اكمل
باسني بقوة مبتعد عن الهدوء جنن مشاعري وياه بتجددة حتى عضيته و سويت طبع برگبته من أظافري ...
وخرنا عن بعض نتنفس

- هسة تصبحين على خير

روحي
ركضت للداخل ارجف يكلك صاحبي مو رجلي اووف من ارهاب ياسر

وظليت اضحك  على الاثر ما كلت اله عليه ههههههاي

• رقية

رحت الصبح للمزرعة شفت بيبي جاية قبلي مطلعة البيض مال الدجاج بطاسة
بيبي- يمة لا تتاخرين اهنا الشمس تقوة بعد اشوية مو زين عليج اني راجعه للبيت اجيت من السبعة اهنا

اخذت البيض وراحت اني  رحت اوكل الدجاج اشكد احب اشوفه ياكل
ويركض وراية واني احط خبز وماي او تمن بايت
طلعت من الكن (بيت الدجاج)

واني نازعه عباتي حاطتها على الكرسي الخوص بس شالي لافته لفة معدلة ..
واشوفلك شاكر طفر السياج ودخلي
وهو يتلفت
فزعني بدخلته هذا مو مو شهد كالت جدي  طرده ونهى احمد يدخله لحلالهم! و  ما يدخل احد الا باذن

- شسوي شسوي اهنا

صحت عليه

- مشتاق الج
افيش اشكد حلوة

ويباوع الي
خوفني ، رحت جريت عباتي وهو اجه سحلها من ايدي 

-جيبها جيبها حرام حرام حرام عليك

- دخلتي اهنا بعد وعشعشتي
ما اكدر اطلعج منا
ويأشر على راسه

- شتريد

-أريد  اكعد وياج فد ربع ساعه واخليج اتروحين لهلج ما اذيج صدكي شغلة ربع ساعة
واخلص ترحين لبيتكم

- روح منا منا
ما اكعد ما اكعد وياك

- لا اكعدين بس نخلص وروحي

اتقرب مني رجعت لورة وصحت
-بابا الحكني ..
ركضت شارده منه شكله يخوف
و وكعت على وجهي وبطني انهزت هز

حسيت نفسي دا اكوم وانسحل
هو وكفني وشميت ريحه عفن قوية
وايده اجت اتشكك زندي
دموعي تجري وثوبي مترب وبطني توجعني و الطفل يضرب بيه !
- ياسر ياسر الحكني
صحت بصوت

سدت حلكي و ذبني على ضهري بالكاع

و بطني وجعتني
صحت خاف ما نزل عليه واني  مطروحه ابجي  وهو راد مدري شسوي ببنطرونه

انضرب براسة بشي باوعت لان حذاء رجالي
واجه عادل و صعد فوكه ملخه وذاك اتلاوة وياه و صعد فوك عادل ضربه اضخم من عادل ضعيف  وكام شرد وعادل كام وراه بس متألم
اني كعدت بمكاني ابجي

رجعلي عادل
- سوالج شي
سوالج شي

كمت ابجي
- اريد ياسر جيبلي ياسر
اريد بابا اريد بابا
زينب وينج !

كومني للبيت مشاني واني بس ابجي واتوجع من بطني دخلني  للحديقة وصاح
-يا اهل البيت وينكم ...
اهنا اجت كوثر ظلت صافنه عليه
متربة ونص كذلتي طالعه ومتروسه دموع  وخوف

سألت-شصاير ..

دخلت للهول واشوف ياسر كدامي بيده كلاص يشرب ماي وفايل كبير

ظل صافن عليه وعلى عادل الي دخل ورايه وكوثر تساله

ركضت عليه و حضنته هو وكع الكلاص من ايده  وما تحرك !

همس
-شصاير

وخرني عنه
وصاح
-عادل شصاير
منو هيجي مسوي بيها

دنك عادل
-انت ولك
وراحله ياسر لزمه من ياخته

عادل- شاكر شاكر السكط طافر على حلالنا  واتعدى علينا و لكيته حاصرها مخوفها

-شنو شنووووووووو

عادل- اني الحظ جابني اشوف برج الحمام

دفع عادل ركعة بالحايط وصعد فوك  ونزل يركض و سوة حركة بالسلاح مالته طلع منها صوت (سحب اقسام)
وطلع وعادل وراه يركضون ....

كوثر مدري اشبيها كامت تلطم
-عزة عزة ولكم انخرب بيتنا
راح ياسر

ولج رقية سوالج شي شاكر

- اي اي

-يبووووووو راح شرفك يا ياسر انداس عليه جدي جدي  اروح عليه

كوثر لبست عباتي وطلعت لبرة اني ما ادري شنو جاي يصير اشبيهم

رجعت وبيبي وراها وهم تلطم
و ام احمد دخلت ورسلان !
جرتني بيبي
- ولج مو كلت الج ارجعي ورايه لا تتاخرين
شسوه الج المعزة

خفت احجي خفت حيل ظليت بس ابجي .
كوثر- عوفيها بيبي

اخذتني من يمها وبيبي كامت جرت ايدي
- احجي لا تخافين **** وياج

- ما نام يمي ما نام يمي

جرتني كوثر
- اروح اغسل الها يمه لا تموت الطفله

جرتني ودخلتني للحمام سبحتني و مدري اشبيها اتباوع لجسمي وادور بيه

من طلعت سمعتها اتكول
-ماكو اثار جنه(كأن) ما صاير شي هاي ما تعرف

بيبي- ولج ما اشوفين حالها اول ما دخلت متربة والشعر طالع

- راح سترك يا ياسر

صارت هوسة وشهد اجتي جانت ببيت امها هي وعمه اجني 

صعدلي لفوك .. 
اني بحضن شهد
عمتي سالتني

-رفع ثوبج
دخلت ام احمد و بيبي

ام احمد-خية مبين مسوي الناقصة
كولو لاهلها .. وبلكي عمي يلحك على ياسر كلنا اله يلحكه لا يكتله

عمتي- ام احمد يمة اشبيجن بس خل نفهم لخاطر الله

احجي يمة  رفع ثوبج
- لا لا ما رفع ما رفع

شاورتني  شي عيب
- لا لا بس ياسر بس ياسر

حطت ايدها على صدرها وكالت
- الحمدلله

ام احمد-خاف اجذب لان خايفه
لا تخافين كولي

كوثر-ما اجذب ابد اني عاشرتها وعرفتها وسالفه دخلة شاكر لبيتنا ذيج المرة الف مرة ظلينا نوصي ما اجيب طاريها ولازمين كلوبنا الا ما كالت
هاي هي مصاير شي الها الحمدلله

عمتي-شهد نزليها لغرفتها ترتاح مخروعه
وانشالله تعدي على خير
وانت ضربت كوثر على متنها
-ليش اتخلوها تطلع

-ااخ شعليه بيها اني
ياسر قابل وبيبي هي تشجعها تطلع
اني شدخلني  هو امان ورة بيتنا وحلالنا كل بناتنا يطلعن بقت عليها بس هذا الكلب ابن الكلب عارف حالتها من المفضوح احمد و حاط عينه عليها

نزلت ونمت تعبانه حيل ...

فتحت على صوت الباب
شفت ياسر داخل

- ياسر ياسر حبيبي
كمت اله وحضنته
لازمه خواصرة

دفعني عنه
- اتقرب منج شاكر

-اي اي اتقرب اتقرب شرير شرير

ضربني ياسر راشدي وكعني
كومني لازمني من امتوني

-مو كلتي الهن ما اتقرب
طلع متقرب متقرب
ظل يضرب بيه واحد ثاني مكلوب شرير مثل شاكر
لزكت بالحايط
ياسر- طلع متقرب متقرب

-اريد بابا
بابا وديني لبابا !

سكت وبطل يضربني واني اكول وديني لبابا
لزمني من متني و حضني
ويبوس باذني و راسي
- شقربه شجابه عليج شجابه اهههه

حضني حيل على صدرة واسمعه
ينتفس قوي يمكن يبجي مثلي ...

يتبع
يمثل ياسر و رقية