رواية شيخ الشباب(بنت المؤمن) الفصل التاسع عشر 19 - بقلم زهراء العراقيه

مساء الفل
يا ريل طلعو دغش
والعشق جذابي
دك بيّه كلّ العمر
ما يطفه عطابي
نتوالف ويه الدرب
وترابك ترابي
وهودر هواهم ولك
حدر السنابل كَطه
يمثل حب عماد لزينب واكيد الشعر ل
-مظفر النواب

•رقية
- خوش خوش
راح راح البس عباتي عباتي واطلع واطلع لبيت جدي جدي واعوفك تدخل تدخل تشتغل تشتغل

رحت وعفت الباب مردود عيب اسدة بوجه و اخذت عباتي رجعتها على راسي و صعدت لغرفتي الهثت ...جبت البوشية اني ما البسها داخل بستانهم بس من نطلع للشارع واني انزل سمعت صوت رسلان بالهول يمكن

- رقية خانم شكلت الج وزعلتي وطلعتي
انزلي ارجعي وياي بيبي دزتني انزلي يلا
يمة انت منو

يمة انت شدخلك اهنا

سمعت صوت رجال خفت رسلان مخترعة

اني انزل على كيفي ما بيه انزل سريع ، راح ادخل بشهر السابع و من امشي سريع مدري ليش الهث واتعب بسرعة ، من سمعت صوت رسلان خايفة وكفت خفت اتحرك

بعدين سمعت صوتها طلع لبرة للحديقة ابتعدت عن اذني كعدت على الدرج مابيه انزل ...

ورة اشوية سمعت صوت عمتي ام ياسر
نزلت على صوت صراخها
شفتها حاطه رسلان وتضرب بيها ورسلان تبجي

-والله عمة ما اعرفة لكيته بنص البيت داخل اجيت اصرخ طلعت للحديقة شاردة
اااخ
والله ما اعرفة

اي عمة

والله طلعت لبرة حتى اصرخ واطلعة
ما مدخلته

- ساقطة طلعتي فد نوب

شسوالج بالحديقة احجي

دخلت كوثر ذبت اكياسها
-شكو يمة
وخري عن البنية
وخرت كوثر امها وصارت بين عمتي الي واكفه و رسلان الي مطروحه على القنفة تبجي ولزمت متنها عمتي اهواي ضربتها وكرصتها عليه

باوعت الي رسلان وصاحت
-هاي مدخلته مو اني

كوثر -شنو السالفة
عمتي اتريد تهد وكوثر ما تخليها
- الفاجرة مدخلة شاكر المطيرجي شفته وياها بالحديقة

-عزة العزاني

اندارت كوثر على رسلان وهم ضربتها واثنينهن يضربن ، وعمتي صاحت بيه
- روحي رقية جيبي امها ابسرعة
روووحي
رحت خايفة من صياح عمتي طلعت راسي من الباب بس النخل كدامي
ركضت لبيت جدي دخلت
شفت ام احمد بالمطبخ

- ها حبوبة ليش زعلتي وطلعتي

- خالة خالة تعالي تعالي عمتي عمتي اصيحج

- منو عمتج ام ياسر اهنا

-اي اي
جاية

عدلت شيلتها وطلعت بلاية عباية لان احنه مو بشارع ببستان

شافتهن موتنها كتل

-شكو يا ستار
عمتي بصياح كالت الها بتج شفتها ويه واحد ولازمها من ايدها

لطمت على خدها عزة العزاني و يتولاني
وخرن عنها خل افهم منها

ظلت تبجي وتناشغ خطية انكسر خاطري عليها

رسلان- والله ما اعرفه اصلا منو
والله دخلت اصيح رقية لكيته بالهول
هي مدخلته

كوثر- هاي من اهل الله
الا انت ساقطة تتبلين على بنات العالم وانت غطاج مكشوف

ام ياسر- شفتي ام احمد المصيبة ااخ يا حيلي انهد
كعدن كلهن مصدومات ومهدود حيلهن
بينما هي تدافع تكول رقية مو اني محد يصدكها

رسلان- يمة انت مو دزيتيني اطيب خاطر رقية اشبيج اذكري

-اي والله
اني دزيتها

- عمة والقران دخلت للهول لكيته يمشي بيه ويتلفت داخل
هاي مدخلته البلوة مرت ابنج

ام ياسر- هاي لا حول ولا قوة
شدخله
حرام عليكم يابة قذف المحصنات لا عبالج ما ادري بسالفتج الي بليتي بيها بتي

كوثر- اي والله يمة كشفناها خل يجي ياسر وهو يعرف شغلة هو كشفهن

رسلان- يا محصنات ....جيبو الي قرأن احلف عليه اني ما مدخلته ولا عندي علاقة بيه

ام احمد- بسجن البنية مظلومة مبينة

اتقربت من بتها تتفحص وجه المزورك

ام احمد باوعت الي وكالت
- احجي رقية الرجال شدخلة للبيت

- اني اني اني ما ادري ما ادري
صعدت صعدت لغرفتي ونزلت ونزلت سمعت سمعت صوته صوته ويه ويه رسلان خفت خفت وبقيت على الدرج

ام ياسر- شفتي سمعتي ام احمد لج انفضحنا فضحتنا بتج بمكسورتها

كوثر- ابتلاء والله بلانه بيها هاي بس النوايب منها

ظلت تبجي وامها جرتها واخذنها عمتي وامها لبيت الشيخ

اني وكوثر بقينا

- لا تبجين روحي غسلي وتعالي

غسلت وكوثر سوت النا شوربة سيريلاك
اني والجهال وراحت اندارت اشوف الاخبار..

رجعت شهد اول ما دخلت ذب عباتها و انطرحت على القنفة تبجي

- اشبيج اشبيج

- ما جاوبت ما جاوبت
يربي مراح اتخرج السنة....حتى بحثي مو تمام

همست
-يارب تنجح و تنكشف تنكشف رسلان و يزوجها مرتضى!

صعدت لغرفتي واني كلشي ما فاهمة
رسلان ليش دخلت شاكر
وهسة شراح يسون الها !
وليش عمتي تلطم هي مو طلعته كلشي ما فهمت

•شهد
سمعت بالقصة من كوثر ركضت لرقية افهم منها
وسولفت الي الموقف .. هذا الحقير حاط عينه على رقية مبين اني سولفت الي كوثر وكالت شايفها بالمزرعة و سألها منو هي، كايلة اله مرت ياسر والكل يعرف من الجيران ببركة رسلان وخواتها رقية بنص عقل مرت ياسر هبلة شافها حلوة و فطيرة ظال مترصدها واكيد يعرف بياسر مو ببيته من احمد لان احمد يمشي وياه و احمد راح ويه خوالي لياسر للفاتحة بال**** فظال مترصدها منا من جايها اليوم الضحى
رايد يضحك عليها يدخل وهي صاعده تلبس بوشيتها وتنزل جاية رسلان الي كلشي ما تعرف و تورطت من عمتي شافتها بالحديقة وشاكر لازم ايدها الظاهر رادت تصرخ وما مخليها.

وكعت براس رسلان !

فوك أستيعابي كل الي صار ، شاكر
رقية رسلان كلها احسها تصاريف رباني حتى الله يحمي رقية ، و يواسي قلبي المظلوم ، هاي انظلمت رسلان و هسة اكيد تحلف مثل ما حلفت اني هي بريئة ومحد يصدك ويمكن بنات الشيخ حصنهن قوي ما صبرت حوبتهن وقت اطول طلعت خلال ايام !، ما ادري بس مجاي أستوعب ولو شاكر ما مخلي وحده ما زاحف عليها حتى اني زحفلي
وحتى رسلان زحف عليها بس هي مسوية نفسها ما تعرفة
بنات الجيران تشكي منه ومن وكفاته بس اه منك يا احمد متعب جدي ومتعبنا

،

كوثر الضهرية الا فرغت من فضولها ورجعت للبيت اسوي النا غده وكفت وياها بالمطبخ

-كوثر اشلونها رسلان

- شبعت مدكة وبيبي صار عدها علم اتريد اجيب نجيبة ام صفار القابلة تكشف عليها ما يرضن يصدكنها

- وراح يجيبن

- لا حلفت بالقران ما لامسها ولا عدها علاقة وحلفت دخلت لكته ..

-اني ادري بالحقيقة وراح اروح اكول الهن لا يجيبن احد لا تطلع السالفة وينضر جدي

رحت لامي ببيت جدي وسولفت الهن الي كالته رقية
وكلهم يعرفون رقية على البركة بيبي كالت سدو السالفة والله حابها جاب عمتج الهن ما نعرف جان شسوة هالابن الحرام

امي ما قبلت تنسد وكالت اظل بقلق على البنيات ..

بيبي- راح اخلي جدج يكطع رجله عن حلالنا و ما خليه احمد يدخلة

امي-بعد احسن يمة لا يأذي البنات

ام احمد- اي والله خاف يأذي رسلان

- قصدت بنياتي و جنتي
بتج اخذت جزاتها

ام احمد- ليش هيج ويه البنية مو هاي حبيبتج جانت

- اتبلت على بتي تبلي جبير وراح تنكشف انشالله بس يجي ابنا

ما رضت امي اسولف الهن شسوت رسلان وياي تنتظر ياسر يجي ..
طلعنا من يمهم لكينا كوثر مجهزة الغده وصابه لرقية والجهال

كوثر مشمتة حيل بيهن
السالفة انسدت امي سدتها لان بيها طاري رقية و همه هم خافو رسلان وامها ما عونن تنسد

ورجع ياسر برفقة خوالي و اولادهم بعد يومين غياب وثالث طريق
اجه العصر

اسمع صوته وما اطلع حتى اسلم عليه صارلي اهواي ما شايفته بس هو تغير عليه اهواي وصدك عليه شي ما مسويته وضربني ضرب قوي
تسرسبت دمعة مهظومة مني فتحت تليفوني ،وطلعت صورة كاعد بين الحرمين بكربلاء و اشعة الشمس ضاربة على وجه بارزة بياضة
حتى أنت يا مرتضى زعلتني منك اهواي

•ياسر
رجعت للبيت ولكيت رقية جوة تنتظرني بالهول انه معلمها انه اعلى جية

ركضت عليه
-على كيفج لا توكعين انه جايج وصلت يمي وظلت تشاهك
- لا تعوفني لا تعوفني وحدي وحدي بعد

طلعت وجها عن صدري

-صاير شي ؟

- اخاف اخاف اريدك اريدك يمي ما اخاف اخاف

كوثر - حمدلله على السلامة ياسر

-الله يسلمج
جا وين شهد

- بغرفتها

-بعدها ادوخ

- لا زينة من سمعت صوتك جاي شردت لغرفتها !

-اها....يصير خير

تعالي نصعد ..

وصلنا للصالة كدام غرفتنا
وكفت رقية وجرت كفي ما خلتني اروح للغرفة
ونزلت علية تحبني بكل مكان بوجهي صفنتني اعليها

-شدهاج !

ظلت شفتها نايمة على خدي

- اشمالج اتحبين بيه جني جاي من موت
رقية !

حضنتني عاصرتني لازكه اديه على جوانبي

وخرت اديها ورحت طلعت غيارات هلكان من السفر ورقية ومحاوطه خصري وراسها على ضهري افتر وتفتر وياي لازكة نفسها بيه

- رقية ميت حر اسبح واطلع الج

- ما ما
ما
دخلني وياك ..

طلعت من الحمام وما زالت رقية لازكة بضهري ..
- تراج اليوم مو طبيعية صاير شي بغيابي ؟

فرتلي بعيونها
- ما ما اريد ابقى يمك
اريد اريدك دومك دومك يمي

ابتسمت
وجريتها حاط ايدي على متنها
- انه ماعفتج دهر هو واجب سويته واجيت

دمعت
- اتروح للحرب
- هههههه حرب العالمية الثالثة هههههه لا
بعد ما اروح
خليل التحق وحده البارحة انه ما راح اروح بعد

- صكد ااا صدك صدك
-اي صكد ما اروح عمامي خلوني اقسم ما اروح چيفن (لأن) ابوي ماعنده نسل غيري ، ابقى احامي على اختي بتهم

-منية منية عدهم بنية منية

-هههههه شهد بتهم

-يعني يعني كلهم خلفوها

-هههههههههههه ههههههه
يلعن ابليسج ولج دحدوحه ابوي اخوهم مخلفها وانه ابتليت

-ليش ليش

-البنات هم ما بعده هم حتى من ازوجها ما راح يرتاح بالي اعليها

- واني واني هم هم

- انت اكبر هم وابتليت بيه

برطمت
- جا النسوان كلكم هم

- يعني يعني امي همات هم

-اي وابوج مشلوع گلبه بيها

-ليش ليش ازوجها ليش

-ها هههههههههههههه
حتى يخلفج النا

- ليش هو بابا خلفني !
ماما جابتني اني

-بمساعدة السيد الوالد

-يعني بابا بابا هم يسوي لماما مثلنا

-ههههههههه جا ربه وحد

غطت وجه
-عيب عيب ما
ما يسوي بابا ما

- شسويتي بغيابي ؟

- ما ما سويت بس اخاف بعد لا تعوفني

-انشالله
ما لحكت اوديج لهلج لذلك ما وديتج خو كوثر ما اذتج

- لا لا تبات يمي حبابة حبابة
مثلك

- انت الي ملاك ماكو مثلج ابد

- يعني يعني تحبني

- اي احبنج دحدوحة(مربربة)

تعالي
شميت شعرها

- هاي ولج غاسلة بشامبو مالتي

-هههه اي ههههه وانام على جهتك ومخدتك هههههه و و اشرب جاي بكوبك ههههههه و و البارحه البارحه لبست فانيلتك ونمت نمت

- لا يا الله احتلال كامل مسوية

تعالي ولج شو حليانه بغيابي هاااا غيابي يخليج هيجي

ضحكت هي...، و لمعت خفكات الگلب وعزف لحن الملگة قصايدة الي تحث طراف كلام الجسد يتحرك يبحث عن بصماته السابقة ويعيدها....رادت تنطق وانه وجهي على وجها رافع خصري وبطني عن بطنها
حطيت ايدي على شفتها مسكتها ما اريدها تنطق اي شي مو لايگ مو وكته اريدنها مرة كاملة بفراشي ولو

،
نمت ساعتين و كعدت الغروب اذن رحت للجامع صليت
لاگاني شاكر المطيرجي وياه سلام العربنجي سابقا (عنده عربانه وحمار يشيل عتيك ، هسة اطور الى صاحب ستوته )
سلم سلام رديت لكن شاكر طلع كبل ! ومسرع
رحت راجع للبستان ... دخلت لبيت
-شهد
شهد
طلعت مدنكه وتمشي على كيفها واديها بجيوب بجامتها
تمضغ علج(علكة ، لبان)

- تعالي وياي لبيت جدج

- ما اعتب بيتهم

- روحي حطي شي على راسج وتعالي ابسرعة بلا مداهر

ما اتحركت
صحت
-شهد
انهز متنها وراحت لبست عباتها
اتقربت عليها دخلت خصلتين لشالها
وبكلنسة فركت عينها

-اي اي

-اعيونج حلوة بلا هاي الكحلة تبرزهن
وتراني اشلع هالدعابل الخضر واعميج
حاطة للخلفوني كحل

سألت-وين رايحه

بفهاوة
-رايحة امسحها بكلنس مائي
وراحت وظليت انتظر غصبا ما اعليه متحمل دلالها هاي اذا اعترفت ببرأتها شخلصني منها راح اظل اشهر تدلل

طلعت ورحنا لبيت جدي انه متصل بيه حاجزة يفرغ الي نفسة

كاعد بالهول

وايده منتجية على ركبه رجله

- ها ياسر اشعندك اليوم
مو جنت وياك اليوم ما حجيت واحنه بالطريق

-يا عمي انه احكك كعده زلم واريد فصل منكم

كعدت اضحك وشهد باست ايده وكعدت
تعلج خزرتها
شهد-شنو اشبيك

اشرت على حلكها
-ها نسيت والله
طلعته

اجت بيبي كعدت يمها ..

-اتصلت جدي برنا ورجلها يجون !؟

- اي المرة تعزب ببيت عيالها وتجي

-خوش جا اندهم يصبون النا عشا جوعان انه

تعشينا وبيت احمد اندارو اعلينا بس سمعوا بينا اهنا ، واني اعيوني كل لحظة اصد رسلان وابتسم
وهي تردها بخوف

،
انه احط بماعون الاستكان واشرب الجاي
وجدي مل
صاح لرسلان كعدت ....
ورنا ورجلها كاعدين احمد و عائلته
و عادل وامهن و جدتي وخالي ومرته اولاده وبناته
ما اعرف يمكن كعدو كلهم من باب الفضول شعنده ياسر !

اشوية صعبت الشغلة اعليه العيون كلها اصد ليه

سألت- جدي شتعرف عني

- ياسر شغلتك مو خاليه

-جدي جاوبني وراح اريحك بس كلي شتعرف عني وعن اخلاقي

- رجال معدل بالمختصر حامي الحما

- طول كعدتي يمك جبتلك حجايه

-حشى

هو كاعد يمي همست اله مشاورة
-حتى الي ردتها خذيتها
ما سويت العيب

جدي- ياسر سامع شي عنك احد جايب سمعتك بشي

-اي يا جدي
عليت صوتي وباوعت لرنا ورجلها

زوجها- والله انت اخلاقك ينحلف بيها منو الي غاثك

- مع الاسف مني وبيه الي طعن بشرفي

جدي شافها السالفه جاده
-جنها چايده (کايدة)سالفتك

- اي والله يجدي ايام وانه ما انام ليلي ..
بنات ابنك واشرت اعليهن وحده وحده
طعنن بشرفي و بشرف وحدة مستورة يا جدي
الي طعنو بيها وصلت للموت وخربن بيتها وانه صغرني جدام اهلها

رنا- شنو هالكلام
صاحت

جدي صاح بيها تسكت ورجلها خزرها
سكتت تبجي
شفت بعيوني رجفة رسلان

- يجدي طلعو عني كلام انه عندي شي ويه اخت مرتي ترضاها يا جدي

- شنهو هذا الكلام
صاح جدي وظل يستغفر

-الله اكبر عليكم ليش توك جاي اتكول

-ما جنت اعرف يا جدي منهو الي وصلها لأهل البنية

- اشلون عرفت
سولفت كدامهم..... كلت مثل ما كال مرتضى محادثات مفبركة حفاظا على سمعتها

وسالفة الرقم الي اتصل باخو البنية واتضح رقم قديم لرنا رجلها اعترف و جان هو نفسة مذهول مصدوم بمرته

انه تعمدت اجيبه الشرف غالي يا بنات خالي مثل ما هجمتن بيتها حلفت اخذ حيفها منكم ...
امهن كامت تلطم انه كلمتي دليل عند جدي ينوخذ بيها
كام منهار على رسلان جرها لغرفته
وبس نسمع صوت اهاتها واستغاثة صوت الضرب قوي الظاهر مو عكال
سياط لو حزام

و رنا عادل ضربها برجله دفرها ورجلها
كاله لا تضربها هي بحمايتي هسة
راح اطلع من بيتكم وهي اختكم
تستاهل السحاب
خله وعافها ماخذ ابنها منها
وظلت، احمد هم ضربها جدامي

انه اخذت شهد وطلعت من بيتهم ..

شهد -رسلان جدي راح يموتها

- تستاهل الي سوته مو اشوية اكبر منها
انه رجال اشكبرني ما اسويه اخاف ربي ما تدرين شكد يغضب رب السما قذف المحصنات ...

شهد - بس ما فهمت المحادثات صدك مفبركات

-اي أكيد والاشاعات كلها تشهد لأنها جذب
لو مصدكه انه اروح لدارهم بغياب اهلها

- لا لا ابد
خلت وراحت شهد لغرفتها انه كعدت بالصالة واسمع اصوات بيت جدي اعتقد شعلت بيه نار اسمع دعاوي اعليه
رحت لشهد مديت راسي لكيتها مطروحه واديها جوة راسها وتباوع للسكف بس شافتني دارت وجه

- منهو حبيبي انة (مين حبيبي انا)

شهد- مادري

- ردي اعلية وگولي

-خربت الاغنية كافي

-جا راح اظل اغني منا لباجر
سديت الباب ودخلت كعدت جدامها

-ذكرتك والسمة مغيمة وأعليك الروح محتارة
مدري الدمع من العين مدري الدنية مطارة

- كافي صوتك يخرع ترة

- جا اظل اغني للصبح منا من يختفي هذا البوز

-اني ما مبوزة

-جنه (كانه)وجهج بسطال جندي من ازعلين

- ياسر!

- اعيونه

- اني مو بسطال

- يلا بيرية

- ههههه ما اضحك

كرصت اخدودها
-اي اي

ضربتها علابية

- روح ياسر روح هيج صلح ما اريد

- باجر العصر اخذكم للزيارة

- مممم ميخالف اروح وتشتري الي كشخة و اريد كم حاجية و تعشيني و تفرفرني بالسيارة

- ميخالف بعد

- و تغير جهازي

-اشطلعت هاي انطيتج عين زياده دولي
ربع دينار ماكو
،
الصبح مريت بجدي لكيته متكدر كاعد بالحديقة مستظل جوة عريشة سيباطات العنب ويشرب كهوة

- اصباح الخير جدي
كعدت يمه على كرسي خشبي

-شايفني بمنامك

- خو ما غضبان اعليه جدي

- لا حكك تبرأ اختك بس لو ما كدام رجل رنا

- حقك يمكن اسرعت ، كلشي ولا هجمان البيوت

- عافها الرجال البارحة من سمع عنها هيجي

- جدي الي سونه هم خراب البنية توها طلعت من نوبة قلبية لأجل منتشرة اعليها بالعشيرة سالفة باطلة
واتطلكت

حط ايده على راسه جنه محتار

جدي
- ليش هيج سون اريد سبب ماجاي الكه الهن

-جدي قبل مدة صارت عركة بينهن وبين اخت مرتي ومرتي
وهنه الي بدنها رادن يضربن رقية ورقية من اهل الله
اختها دافعت عنها وطكت رسلان
واشوية وكحه لسان البنية طردتهن من غرفة رقية

ذني ردنها الها اشر رد رمنها بشي يغضب الملايكة وربهن

و ذبنها براس اختي چيفن(لان) اكو بينهن غيرة منها وخربن اعليها الزواجه
(زواجها من مرتضى)
تفكيرهن شيطاني يا جدي لا تلومني لاني خربت بيت رنا
وهاي رسلان ربيها يا بوي لا اجيب الك شي چايد هاي موش سهلة وتخوف .
الي تفكر هيجي ينخاف منها
الفكرة فكرتها اعترفت رنا البارحة

- صدكت يبن ابوك
انه هم گلبي بعد ما ارتاح الها
خلفها ابوها وراح تارك حملها عليه
راح ابطلها من هاي الكلية واكعدها اهنا يجي اول نصيب الها انطيها واخلص من همهما

-جدي وشهد

-اشبيها شهد

-جدي شهد خربت زواجتها

- انه راح احلها

-شنهو تدلل على اختي
انه صح راغب لهاي الزواجه بس

- بعدك صغير يا ياسر
موعيب الي يطلب سترة لبته
و الناس منطين كلمه اعليها يردوها

- بس بعد الصار ابوها كال من اجاني
اختك خليها بعيده عنا
المعنى حتى الخطبة رجعو بيها
جدي اريد ابري شهد كدامهم بعد اذنك حتى لو ما صارت الزواجه بس لا تنظلم اختي

سكت محتار وضايج

- ما ادري شكلك سوي الي اشوفه صح ..

،

العصر شهد عبالها رايحين للزيارة سوالف تعلوم امي والكليات ما سوتها
تخاف المفتشات بالحضرة ..

و رقية جهزت نفسها ،كوثر ما اتروح ويانه تبقى بالبيت

شهد - اول شي وين انروح ها

ما جاوبتها ...وصلت لبيت امي رنيت اعليها طلعت الي محضرة نفسها كعدت يم شهد ،

رقية نامت بالطريق ..

وشهد وراية تقرة دعاء بكتيب صغير
هاي من انروح للزيارة تكعد تدعي ومن طلعة ونسة اتحط سماعات وتسمع طربكة

وصلنا لحيهم
شهد- ليش اجينا لأهل رقية !

ما جاوبتها وصلنا بيتهم ونزلت
دكيت جرسهم ،وطلع الي مرتضى انه منطيهم علم
رحب بيه و اشرت لهلي يجون
امي سدت الباب و نزلت وشهد كعدت رقية ونزلت رقية وعثرت وشهد لزمتها

لاحظت شهد تغير لونها دخلنا مرتضى ..
كعدنا بالاستقبال ما خليتهن ينفصلن عني

مرتضى رجع وكال
-اتفضلو اهنا اخذو راحتكم ويه الاهل

قاصد نسواني

انه كلت
- من رخصتك خوية مرتضى
مو هسة ، بس انه عندي حجي ويه الوالد و الوالدة

كعد جدامنا وكال خير انشالله
عينة زاهدة هالمرتضى احب بيه تدينة ما يرفع عينه اذا حرمة بالمكان .
دخلو والده وامه هم بعد السلام دخل علينا مقتدى سلم و ضيفنا ماي وراح

سولفت لعمي امي بتها مالها علاقة

وانه حطيت ايدي على صدري وحلفت
-والي خلق هالروح وراح اقسم بيها اختي مالها علاقة لا من ابعيد ولامن قريب بالي صار كل ما هنالك نفوس ضعيفة رادت الخراب
والصوت الي سمعة واشرت على مرتضى
هذا الي راسلته اختي وهنه بيدهن الحساب ولاعبت لعب

امي كالت
- هم بعدنا مستحين منكم و ابوية بنفسة باجر يجي الك ابو علي

-ما يحتاج ورايتكم بيضة والنفوس طابت مدام حلف ياسر اخيته مالها ذنب يعني مالها ذنب صدكنا ،وهي هم انضرت البنية وانظلمت

•شهد
اني دمعتي التافهة ليش طلعت ؟
هسة برأتي طلعت وكدامهم اي ليش بعد راح اصيح و ابجي كدامهم
يربي عديها
مريد مرتضى هالقاسي يشوفني ابجي

مديت ايدي مسحتها ، وجرت غيرها و وجهي انكلب ...

اشوية وامي كالت انريد انشوف البنية
كمنا اني وامي نشوف زينب
دخلونا للهول شفناها كاعدة و رقية حاضنتها
كامت النا الظاهر سمعت كلشي امي باست راسها
- حقج عليه وحوبتج مراح تتخطاهن

امي ظلت بس تتعذر و موقف لا تحسد علية بسبب بنات اخوها ..
لو لا الناس متفهمين كان حست بذل قوي ..

سلمت عليها وكعدت يمها
- احلف الج بعد لو صدكتي زينب ؟
اني مالي ذنب

- اساسا كان اكو شك
لان ماكو بينا شي وحتى اخر مرة نظفنا سوة بيتكم ،حبيتج وارتاحيت الج بس بعد شي وصار

امي وامها ببداية الصالة كعدن يسولفن
ورقية راحت اسوي ضيافة

- ظليت ايام احس بتأنيب ضمير رغم اني مالي علاقة لأن من خلال حسابي صار الي صار
وياسر ما يصدك بيه

- اشلونج انت...خو ياسر ما اذاج
او ضربج بسببي

- لا ابد ابد

دخلت رقية و امها كأنها سمعت اطراف حديثنا ورجعت عادت السؤال عليه
-خو اخوج ما أذاج شهد من ظلمنج بنات خالج

رقية-اي اي شبعها شبعها كتل كتل دمه شفتها
العصير الي قدمته الي وهي تحجي صار ينهز
بأيدي
زينب سكتت غلست و امها ظلت تتكاوت عليه واستخطتني
وامي ما قصرت انطتهم تقرير عن حالتي الصحية بالسابق وبشرتهم برسوبي المتوقع

•زينب
ما تأخرو بيت ياسر يمنا
اني رجعت لغرفتي معتزلة هليام ع الوجبات اكعد اكل وبس

افكر بشهد ومرتضى يا ترى يكمل موضوعهم لو لا بالنسبة الي ما فرقت عندي جيتهم ما حلت شي الي نفس النتيجة
ندكت بابي دكة خفيفة

- منو اتفضل
عدلت كعدتي على السرير
دخل بابا
- شو دومج اهنا ما اطلعين

- ها ليش اطلع بس بس هسة

همست
-تعبانه
- دائما بلغي النفس ورددي لا تكرهِ شيئًا اختاره الله لكِ !

انتبهت اله بابا كلامة ما يثمن غالي
خاصة من يحاضر
ابتسم لعيوني وحط ايده على متني

-فـ على البلاءِ تؤجر ، وعلى المرض تؤجر ، وعلى الفقدِ تؤجر ، وعلى الصبرِ تؤجر ، فرب الخير لايأتي إلا بخير

همهمت مأيدة لكلامة الطيب ..
-ونعمْ بالله
-يلا كومي يا بَنتي ساعدي امج بالعشا
-حاضر تأمر

اتواصلت فيما بعد وياي شهد وتناقشنا بالسالفة وسالتني اذا كنت بيوم راسلة لاحد من اهلي رقم مرتضى
اتريد تعرف اشلون وصل لرسلان حيل مهتمة بهاي السالفة

-ما ادري شهد اني ما احذف رسايل مكانت السالفة بالي فاكيد من مراسلاتي ويه الاهل يجوز راسلته
الهم وهي اخذته

حسستها هاي السالفه تضوجني حتى بعد ما تفتحها وياي حتى كنت حادة ومقتضبة بردودي وياها
لا اريد ابني صداقات ولا علاقات حتى اهلي انعزلو عن الاقارب خاصة من جهة والدي والاخوان انقطعت علاقتهم بأخوهم بابا ظل بس عمي الكبير ع تواصل ويه بابا واني هم اريد انسى عندي بنات عم حتى خوات عماد
اه يا عماد جرحة مراح يندمل ابدا
اذا ما كل ليلة اتذكر كلامه السابق و وده الي كان يظهرة الي وبين قسوته هسة تركني بطريقة قبيحة حيل خلف وراه كسرة گلب وحسرة واه ما تنمحي
،
صفيت على علاج فقط للذبحة الي بصدري وبديت اتحسن جسديا كنت
اقرا بكتاب بابا قصص الانبياء كنت هاملته
دخلت ماما كالت بدلي ابوج يريد ياخذج يطك الج صور

-ليش

- مال معاملة

طلعت ملحكت أسالها لشنو يجوز يجدد جنسيتي (البطاقة الشخصية)
لبست حجاب وعدلت نفسي ورحت وياه بلا مجادلة او استفسار طكيت الصورة ورجعت

بالليل
كاعده اكرز حب واصفح بالتليفون
دخل مرتضى
صارله كومه ما داخل عليه من اشهر
و الكلام بينا شبه معدوم وان وجد مجرد سؤال وجواب عادي ومرات من يصبح ارد او من اصبح يرد بينما بالسابق كنا أصدقاء
حط فايل على الميز

-هاي وثيقتج اليوم جبتها الج من المدرسة

- ها شسوي بيها

كعد يمي
- ابوية طلب مني
باجر ياخذج يقدم الج على المسائي

-شيقدم ؟

- على كلية تربية مسائية
وانت اختاري التخصص معدلج ينقبل الي ترديه

- بابا يعني بابا
الله عليك صدوك تحجي

- اي ابوج وهالمرة من وحده لا اتوسطت الج ولا توسلت هو وحده من عرف وقت القبولات راد يقدم الج

حطيت ايدي على حلكي و اشهك ودموعي طلعت غصبا عني
هديت حلكي وحضنت مرتضى !
-احبك احبك حيل
وانت وبابا اموت عليكم
بسته من خده خليته صافن عليه ما بينا هيج بس اني فرحتي خلتني ودي احضن الحياطين وابشر الكون بيها

يتبع
هالمرة قفلتها بفرحة انكسر خاطري عليكم ههههه

زهرتكم المحبة🥀