رواية شيخ الشباب(بنت المؤمن) الفصل الحادي والعشرون 21 - بقلم زهراء العراقيه

مساء الريحان

شيخ الشباب

من كتابات زهراء العراقية

وقنعت يكون نصيبي في الدنيا.. كنصيب الطير
ولكن سبحانك حتى الطير لها أوطان.. وتعود إليها
وأنا ما زلت أطير..

لصاحب الصورة

•رقية
رهبتني اعيونه حمر و خازرني هدني من حضنه و دفعني مكعدني على السرير ، ولزمني من رقبتي ،

اعيوني انفتحت خايفه منه ، هدها

ظل يمسح بشعره ويفتر يمي واني ارجف خوف منه واعض بأطراف أصابيعي راح يموتني اليوم

كعد يمي وانفاسة صوتها يوصلني يخوفني اكثر

-زين
يا الله يعني
شنو سوة الج ؟
مو كلتي لأمي كلشي ما سوة اجه عادل لحكج يو لا

بس اباوع الي وابجي بدون صوت خايفة منه وحاطه ايدي على وجهي احمي روحي منه
وهو يسأل بيه الساني شكل ما بيه انطق بعد...مدري اشبيه ظل يصيح
-احجي احجي ..

خفت حيل كمت وركضت للباب فتحتها وطلعت اركض اني وبطني تنهز وياي لغرفة شهد دخلت عليها امها مطروحه على سريرها وهي على الارض تقرأ
من شافني شهد وكفت وعمتي كعدت
شمرت نفسي على حضن عمتي ودخل ياسر يخوف

- تعالي
لا تكتليني ببرودج
اتقرب يو لا

- يمة اهدأ اشبيك مو كلت الك ما گايسها( لامسها)

- يمة هاي ما تعرف
المنظر الي شفتها بيه مو مال لاحكها عادل

ختلت ورة ضهرها وهي ماد اديها حاجزة عني ياسر

- يمة اطلع هسة لا تموتها خوف

ما زال يحاول يطلعني ووشهد تتوسل بيه يطلع واجرجر بيه
وعمتي حاجبتني عنه
واني ضامه وجهي بضهر عمتي

تاليها صرخت حيل عمتي
-يبوووو وخر عنا لا تموتني اطلع اطلع
برة ولي

طلع و ركع الباب حيل ونسمع صوت تكسير

اني احس گلبي راح يوكف و الهث وابجي وصرت بس اتخيل وجه بابا گدامي يجيني

اريد ابوية ياخذني منا
ياسر يخوف طلع اذاني اكثر من شاكر و ضربني
ما اريده ما اريده

- اريد بابا

ابجي و عمتي اسكت

خلني يمهن

اشوية ورادت عمتي تطلع

لزمت ثوبها

- لا تعوفيني حبابه
- بس اروح اشوف الولد اتخبل علينا

- لا لا تعوفيني
ظليت اشاهك وابجي لا تخليني

- يجي ياسر يضربني لا تعوفيني

شهد- رقاوي حبيبتي ياسر ما يأذيج بس هو هسة فاقد وخايف عليج

-ما ما يكرهني ضربني ضربني
واجه يكتلني

شهد- لا حول ولا قوة الا بالله

جابت كوثر اكل حطت الصينية على الارض
اني جوعانه حيل من الريوك لهسة العصر صار وما ماكلة

بس ما اكدر اديه ترجف واكو غصة ببلعومي تمنع عني الاكل

شهد كعدت يمي سوت لفة دجاج

- اكلي حبيبتي

عمتي كعدت ما طلعت ما خليتها

ام ياسر- كوثر صبي الي جوعانه حيل

جابت الها كوثر صحن تمن وعليه فخذ دجاجه وطاسة سوب
اكلت اشوية
حسيت بلعبان نفس
اشرت على حلكي واني اتلفت
..ركضت شهد جابت الي سطل النفاية الصغير كله اوراقها و قط قلم ..
ذبيت من معدتي الاكل .
وظليت بذيال عمتي امشي غسلت الي

كالو ياسر طالع ، رحت ركضت على غرفتي سحبت تليفوني وخابرت بابا

اول ما فتح خط واجاني صوته الحنين
-بركتي السلام عليكم
- بابا تعال تعال اخذني اخذني منا منا
اشهك والعبرات تقاطع بواجيي

- شصاير بابا احد مأذيج

- شاكر وكعني بالكاع بالكاع بالكاع بالكاع

سكتت ما كدرت احجي شكل لساني

- بوية جايج اني شصاير
وين ياسر

- ياسر ياسر
ضربني و لزمني من من رگبتي اجه اجه يكتلني يكتلني

- جاي اني ....

ردت اروح يم عمتي وبيدي تليفوني ..
وسمعت شهد
-ماما مجاي نفهم منها شي يكول ما ينوخذ منها حق لو باطل ومتخبل
هذا ياسر يا ماما ياسر مو غيرة هسة الافكار تارسة عقلة....وحقة ترة مو سهلة عليه

اني دخلت
شهد
- اااخ يا رقية حبابة من يجي وقبل لا يسألج كولي ما اتقرب يمي بس دفعني وعادل لحكني حبابه
جاوبي بثبات مو كلساع كايله شي

ام ياسر- اوف يا ياسر بعد شنو يتحمل خطية البنية برگبة امها والله لو بتي ولا ازوجها احفظها يمي هالبنية
ما اخلي احد يلوح ظفرها وتتلوع وتلوع الرجال الي ياخذها

اجيت يمها وكالت
- انطرحي يمه انت بشهرج اذا حسيتي بوجع قوي لا تخافين كولي هاي ولاده

حطيت راسي على حضنها خاف اتكوم واتعوفني ويجي ياسر يضربني

دخلت البيبية و ياها نسوان
فاطمه اخت رسلان الكبيرة و ام احمد ومرت خالهم الثانية حبابة كالت عمي ليش كبرتو السالفه البنية مصاير عليها شي عادل سولف النا
بس اخ من ياسر ولا يكعد

كاعدات على الزولية كدامنا واني على سرير شهد مطروحه وراسي على حضن عمه ما خلتني عمة اكوم ..

جدة ياسر- حبوبة جينا انشوفها اشلونها

عمتي-يمة بشريني شصار ويه جدي

-ما عرف مكانهم ولا عرف شنو سوو بشاكر

ظلن يحجن كلام ما فهمته
ياسر واحمد ومدري ياهو حابسين شاكر يكتلوه
كلشي مافهمت وخفت حيل من طاري ياسر والقتل !

فاطمة
- اكلج شمعنا هي هيج حاط عينه عليها من دونا

ام احمد-اسكتي انت

كوثر- عبنها حلوة !

فاطمه وكوثر ظلن وحده تباوع للثانية
وكوثر فرت ايدها
بدت وحده تشمر كلام على الثانية

فاطمه-يمه شسكت ما اسمعيها

بيبي- روحي للبيت فاطمه
-رايحه يمة منكم
الظاهر الكلوب بعدها مليانه
ونفسها علينا

كوثر-شتقصدين عيني اني عيني متروسة المرحوم يسوى رجلج الي عفته لا ظنج ما افهم تشمير كلامج عليه
ظلن وحده تحجي ع الثانية وامهاتهن يسكتن بيهن ...

شهد- فاطمه منكم ما تجي بس المصايب روحي لبيتج ما انريد الواجب مالتج انت وخواتج دمار شامل
البنية بيا حال وانت تتعاركين يمها

واشرت عليه شهد

فاطمه - طالعة والله يستر منكم ومن جنتكم بس المصايب منكم هاي كلنا نطلع ما تقرب لظفر النا شاكر

كوثر - بسبب اخوج المشمت بياسر مثل النسوان يمشي ويبرذع عليه ما يخجل
ومنكم هم طيشتو سالفة مرة ياسر
هبل....استغفر الله يحجن الصخر

فاطمة- اللهم الستر
اهنا امها تدفع بيها اطلع و بيبي اتعض الها اصبع

شهد من طلعن من الغرفة فاطمه وامها كالت
-بعدهن حاقدات و هاي ما جاية الا حتى تشمت و اتشوف الاخبار بيبي شوفي شغلج وياهن لا يفضحنا

بيبي - اي والله راح احرك بيتهن اذا جابن طاري الموضوع
ذيج الكلبة رنا ما عونا نرجعها لرجلها

سمعنا صوت ام احمد

رجعت النا كوثر تضحك

-والله انت يا رقية الي يندك بيج
الله اله بالمرصاد

تضحك بصوت واصفك بديها ما فهمت
شهد راحت ومرت خالهم يشوفن شكو

لانها فاطمه واكعه بالممر و رجلها اتصيح منها
اخذوها وطلعت تبجي من الالم
اني طلعت بالهول وياهم اشوفها

شهد - اللهم صل على محمد وال محمد لج حجت عليج منا وكعت منا
لا لا مو طبيعية انت الي يأذيج بالمكان ما اطول

ام ياسر- اللهم صل على محمد وال محمد
يمة مبروكه هاي البنية والله زرع محبتها بگلوب خلقه بس الي غضبان عليهم و ماخذهم ابليس يوزهم ما يحبوها
اني مرة دفعتها من كالت على زواجي .. والله ايدي اسبوع من متني توجعني وحسيت هاي خطيتها ظلمتها
وهي بت اخرة

يحجن وما افهم كلامهن وكوثر كاعده وبس تضحك و اتكول الي بركاتج بعد ما اندك بيج!

شهد- الحمدلله ياسر ما صارلة شي من ضربها

ام ياسر- ياسر ما أذاها بدافع الكره
من حبه وخوفه عليها اله فقد اعصابة
وهي الله يسلمها هو نار وتقابله بفهاوة
شتردين منه
يجي واني كدامه استجوبها واريحه

خابرها رجلها يمنا كالت اظل ببيت ابني كم يوم ، اسمعها تحجي وياه وصوته قريب لاني لازكه بيها
يكول الها
-شدعوة كم يوم
باتي اليوم وباجر العصر تعالي

- ما اكدر عيني ابو غفران

-صاير شي حبيبتي!

- اي والله سالفة بين اولادي انحلها وارجع

-ها اذا هيج على راحتج....بس حاولي اتحلوها انشاء الله على خير البيت بلاياج ما يندخل
ردي النا

-انشاء الله

-محتاجه شي

-عساك سالم في امان الله

-الله وياج ...

•ياسر
راجع للبيت اخذ اوراقي عندي معاملة
سألت كوثر عن رقية كالت طالعه ويه بيبي

دخلت عليه البنية مگلوبة أحوالها
فقدت حشوة عقلي وطلعت من بيتنا مسلح و عادل وراية ..
كسرنا باباهم اكسر و فتحت امه مخروعه دفعتها ودخلت بيتهم فارغ
امه تبجي
- تهجم عليه عبن مالي احد
عفتها و فرينا السلف كله ماله اثر هالكلب .

خابرني جدي نرجع للبيت يحجي وياي

جايته ام شاكر تشكي كايل الها ابنها اتعدى علينا وراجعه تلطم لبيتها
قبل لا اتروح جدي كال الها تستر على السالفه واتكول للجيران خلاف بينهم شاكر بايكه ...
اما اني نار بداخلي تفور ما كعد ببيت جدي...طلعت ادورة للعصر تعبت وما لكيته...رجعت الها و ما تجاوب خوفها سببلي فقدان اعصابه خلاني اظن الظنون الشوم .. وما اتجاوبني

طلعت لكاعي ...كعدت جوة النخلة
وافكاري منحدرة لصوب ثاني

ما كدرت يا ياسر تصون عرضك
واحد سكط اتعدى اعليه
اااااخ يا وسفة

عادل اجاني ويحلف لحكها وامي حالفه الهم ما مسوي شي متأكده من البنية ..
اجاني من بعيد شفت احمد و سلام ...
كمت انه ليه و خونكته
- كلة منك يا سكط تحويه يمك

سلام وعادل خلصوه مني

-عاذرك
ما جنت اظن هيج نذل وخسيس وعد عينك احنه
اني وسلام نعرف مكاناته وصدناه و حطينا مثل الشوال بالسيارة وربطنا هسة بمخازن جدك القديمه المتروكه
تعال ناخذ حكنا
-احلف احمد

- وعلي قالع خيبر شاكر مربط مثل الكلب
تعال

عادل - جاي وراكم اني ...

رحنا للمخزن
شفته مربط و يباوع الي بخوف سلاحي موش بيدي

-افتح رباطه سلام

سلام-يشرد النذل

- لا انه ما اطك احد مربط
انه حر موش نذل

فك ربطة و كف

يحلف ما جاي صوبنا

ضربته كلة خرسته
حط اديه يحمي نفسه
دفرته ببطنه..بالثالثه صدني

لزموه الي سلام و احمد
- هدوووه
ابتعدو عنه و حاول يقاومني بس حركة دمي و حسرتي صغرت ضخامته كدامي
وانه موش انه

عنفته ... واكع مدمي جدامي مديت ايدي اريد اقلع عينه الي عاينت اعليها

صوت جدي مثل نتلة الكهرباء صحتني هزيت راسي اكثر من مرة وكمت من على صدره وجدي بعكالة وهيبته واكف هو وخوالي ثلاثة وعادل وياهم ...

حط عكازته على صدر احمد
-حسابك بعدين انت
تعال ويانه ياسر ...
- وانتم اخذوه هذا داوه لا يموت
قاصد سلام وعادل اشر عليهم

انه مشيت وياه بالكوة اسحب انفاسي ..

رحنا بديوان خالي ..

-السالفة انساها لهنا وخلصت
ابن الحرام هذا ما مسوي شي
واخذها كلمة من شيخ
ودكلي على صدره

-حتى لو جدي
بس حاط عينه عليها الكلب
و مخوفها و هي حامل لو ما جاي عادل جان ااخ لو مخليني اقلع عينه

- ما قصرت وياه
واحمد ربك مكطم ماله اهل بس امه الارملة
انه راح اشيلها
(بيتها اجار و ملك خالي راح يشيلهم منا ) اساسا تعاطفا ويه الام مخليهم ابنها عال عليها وماعدها غيره ولد والبنات مزوجتهن

- اذا تردونه يظل حي لا تخلوني اشوفنه

دخل احمد
كام اله جدي
-تعال احمد
وكف جدام جدي
ضربة راشدي (كف)
جدامنا

- ماكو غيره تمشي ويه هاي الشكول
والله الي يعلم شتلم هاي كعداتكم

خالي- انت ابن شيوخ شلك بهاي الشكول

احمد- حكك عليه جدي باس راسه

كمت من يمهم اتمشيت لبيتنا ..

سيارة عمي ابو علي جدام بيتنا دخلت
ولكيتهم بالاستقبال وخالي كاعد يمهم هو وامي ..

و رقية كاعده يم ابوها بعباتها ...
خالي اترخص وراح من اجيت انه سلمت اعليهم وكان السلام مشحون ...

امي مسولفة الهم

انه بديت اسال نفسي شجابهم بس لا رقية اتصلت بيهم

-عمي السالفة سديناها
وجدي تولاها

- مدام هيج وخلصت السالفة بعد ما اسألك عنها وعن الي حاول يعتدي بس
بعد اذنك اخذ البنية يمنا

-عمي الي صار غصب عني خليك بمكاني

- اني بمكانك واقرب!
رقية بنتي وبذرتي الصالحة
مكان لازم ترهبها

- صعبة عليه اتحمل سكوتها

ام رقية-امك من كالت الك المفروض تصدك وما تتقرب الها

ابو رقية- مو مال عتب هسة
خل تهدأ النفوس ولكل حادث حديث

جاوبته - الي اشوفه

راحت رقية اتحضر نفسها وانه بقيت ساكت
وعمي صار يسأل بيه
شسويت بشاكر
الظاهر كايله اله امي انه حاصرة

-اخذ هالقاسمه الله وجدي فكه من ايدي وراح ننفيهم منا نكسحهم كسح منا ..

حل السكوت
ودخلت رقية

ام رقية - يمة اخذي جنطه الطفل وياج

شهد-بعدها خالة على اساس باجر ياخذنا ياسر تسوي سونار نعرف الجنس و نشتري الها

ام رقية-ها لعد اني باجر اخذها وعلينا جهازها
..
اخذوها اهلها وما مانعت.....جنت تعبان دخلت للحمام وفتحت الماي البارد ودخلت بنصه اعيد شريط الي صار..

ثاني يوم خابرتني فاطمة اختها

-اشلون صرت هسة خوية

- الحمد لله على كل حال

- حقك و يلوم الي يلومك
بس كلها مسألة وقت وتعددون هاي السالفه انشاءالله

-رحم الله والديج

-خابرتك واريد منك بشارة

- امري انت بس شنو البشارة

- طلع جايكم اوليد

-ها يا الله ، الحمد لله اهم شي صحتهم اشلونها

-بخير .... توها داخله بالتاسع هي
اعتقد تخلص شهرها كوله ماعدها اعراض ولادة

- ليش دوم تلهث ؟گلبها بيه شي

- طبيعي من الثقل لكل حامل وهي بكرية لا تخاف...

- عمي ، اقصد عمي خو ما بعده ماخذ بخاطرة مني

- لا. ابوي ما يزعل منك يكول من جهة حقه و جهة هي مريضة المفروض ما يرهبها
بس عاذرك و لا تنسى هي بته واكيد يخاف عليها من الهوى الهاب

،

نمت على السرير واباوع للسكف وافكر
-اني ظلمتها للبنية حيل ظلمتها من تزوجتها ااااخ لو يرجع الزمن
مو مال زواج ظلمتها وظلمت نفسي

هسة ظال لا اكدر اتراجع ولا اكدر اكمل
من خذيتها وعرفت حالتها لو مرجعها
بس خفت اكسرها حيل لأن متعلقه بيه وانه هم !

ظلمتها يا ياسر ظلمتها و حملتها فوك طاقتها

ظليت اتذكر خوفها مني و هروبها وانكسر گلبي اعليها توني تذكرت انه جنت حامي ما اعرف شصرف
ااااخ طكيتها
واذيتها نفسيا بس لا يصير بيها شي

اخذت سويج السيارة .. صارلها يوم غايبه عني وانه اتأكل من تأنيب الضمير
رحت لبيتهم
دخلني مرتضى وچان طبيعي چن (كأن) كلشي ما صاير ،و اجتني امها قدمت الضيافه

سالت عنها جاوبت
- هسة تجي

راحت امها وكعد يمي مرتضى و مقتدى
وانتظرت وانتظرت !
وهي ماكو

ساعة مرت ....

- وين رقية مرتضى شوفها الي جيتها
انه اطمن على صحتها

- بصراحة الاهل جاي يقنعوها تطلع ما تقبل تخاف!

-تخاف مني؟

- لا حول ولا قوة الا بالله
اكلك هذا الي حاول يعتدي عليها
لو مخلص عليه

- ما خلاني جدي

- الله يكرفه
العار

طلعت فاطمه النا ... ضامه نصف وجه بعباتها
سلمت واتعذرت
-سوتها مناحه صارلنا ساعة نتوسل بيها
ما تقبل تطلع تبجي
.
لهلدرجة تخاف مني اني شسويت الها
كل الي اذكرة ضربتها راشدي مدري اثنين والله ما اذكر !

وابوها هم ما طلع الي يمكن بعد ما يرجعها الي وكارهني وما مقدر الساعة الي جنت بيها فاقد اعصابي

رجعت للبيت وامي و خواتي من البارحة يلومن بيه
جا بيش احلف الهن مو كاصد(قاصد) اطكها انه حتى ما اذكر التفاصيل

اجتني شهد تسألني وسولفت الها
-ما قبلت تطلع الي
ما قبلت اشوفني اصلا

نمت على بطني وحطيت المخده على راسي

-طفي الضوة اريدن انام بلكن ما اصحى بعد

- اسم الله حبيبي
بس ليش ما طلعت رقية گلبها ابيض ما تحقد

- ما ادري خايفه مني ...وحتى ابوها ما طلع الي ...

- المفروض يقدرون

-روحي هسة اريد انام ...

•شهد
رحت وياسر كاسر خاطري فدنوب ماعنده حظ لا والله مكتوب عليه العناء من صغره
بالليل خابرني مرتضى
-مرحبا

-مرحبتين

- شسوين ما اسوين

- كولشي ما اسوي ولا حتى درست اليوم الكأبة فدنوب مسيطرة

- ليش حبيبتي

- على ياسر ماعنده حظ

- الله كريم

- ليش رقية اليوم ما طلعت اله

-خايفه منه الله يسلمه مخوفها معيشها برعب

- مو بيده واحد شاف مرته بحالة تخوف و اسم شاكر بالقصة

- مهما كان هي مو طبيعية مد ايده عليها اكبر غلط اني ما عاتبته لأن القصة كبيرة

- بعد فقد اعصابه

-كان لازم يلزم اعصابه ومو يذب حركته بيها

- اي بس شنو سوة الها....ضربها
بس ما دماها ولا شال سلاح عليها عادي اصير بين المتزوجين

-ليش تحجين بعصبية

- ضجت حيل كأنكم شايلين عليه
حتى ابوك ما طلع اله اليوم
ترة الي صار مو شوية

سكت

-الو وينك

وينك

مرتضى

-يمج

-ليش ساكت ؟

-منتظرج تهدأين

- مو حيل انغثيت
كأنك ما مقدر وضعه ترى مكان بباله اصلا يضربها لو تسأله شسويت يكلك ناسي

- اعرفه الله يسلمه يفقد عقلة من يصير شي ويكبر الموضوع
لو ما ضربها ...و مكتفي بسؤالكم الها
ومبتعد عنها مايض...

قاطعته
- شنو يفقد عقلة ؟ تحجي صدك!؟
وكلامك مال شخص هادئ بعيد عن السالفة مو بنصها الواحد وين تجيه الحكمه وهو بقمة عصبيته وكلها صارت تحجي بطاري مرته خوالي و بيت جدي
خليك بمكانه ومتأكده مراح تظل بهذا الهدوء

- اني اخوها و ....
قاطعته

- اي ما عرفت بالسالفه الا بعد ما ياسر حلها و كتل المعتدي وارتاحيت
وهو احترك حرك الا تأكد ما مسوي الها
شي
ترة ما ضربها شاك بيها
يدري بيها لا حول ولا قوة
كان خايف و يموت الف موته من شافها كدامه ما اجاوب

الو شو سكتت

- اتخلين الواحد ينطق ؟
ما عبالي هيج محرگانية

- الا ياسر لا تغلطه واطلعه صفر

- افهمي قصدي بالاول
او اكلج الاحسن ما نحجي بهذا الموضوع

- لا نحجي حتى لا اظلون شايلين على ياسر

-محد شايل وابوية ترة كان طالع من اجه اخوج مكان بالبيت
و رجع وياه كاروك للطفل !
وكال هدؤها ترجع لبيت رجلها

بس انطونا مهلة انتم

سكتت واشوية هدأت من ناري

-طلعتِ هجومية حيل

- لا مو هجومية

-وانفعالية هم

ببرودقاتل يحجي

سديت الخط من ظل يحجي هيج

-اي انفعاليه انت مزعج اجيب اخري بكلامك القوي البارد

لثاني يوم انقطعت المراسلات والاتصالات بينا اظن زعل من سدتي للخط
للضهر الا رسل الي
-العصر جايكم

خفت من سكوته و جيته المفاجأة

كلت لياسر يجي مرتضى
شو العصر طلع مدري اشبيه صاير ما مركز نسى اني كايله الها خطيبي يجي اليوم كل مرة يكعد يمنا محاصر النا...هالمرة كال هلا بيه بعدم تركيز والعصر طلع ناسي !

لبست سيت تركي بيبتي زيتوني ببدي داخلي ابيض فاتحه نصف السترة ظاهر منها البدي ..

و البجامة برمودا...وحجل ذهب برجلي ..
ومكياج خفيفي بكحل طوخ ...وحليت الشعر
وحضرت صايه من يجي ياسر اشمرها على نفسي وكعدت امضغ علكة وانتظره
،

رحت ابسرعه افتح الباب من ندكت ..
رقية كدامي صارت
فتحت الها ودخلت وسلمت عليها و مرتضى يدخل بكارتونه من شكلها عرفتها مال كاروك ..
و قطع كراتين البسة بيبي .

حطهن فوك الكاروك.

دخلته للاستقبال .
ورقية كعدت يمنا

مرتضى - روحي رقاوي بدلي و سوي الي جاي

-حاضر حاضر

بس راحت سألته
-اشلون رجعت ؟

- ابويا قنعها و خافت على زعلة وهم هدأت يمنا

- ها تمام ياسر يدري

- لا ، بس يدري بيه جاي؟

- اي

- وينه ؟

-ما ادري نسى وطلع
اساسا هليام مضيع

-اها يعني ياسر مو بالبيت

- اي
مممم شلونك
ليش ما تخابر

- وليش ما انت تخابرين ؟

-على بالي زعلان

- وليش ازعل
كالها مع تنهيدة

- لان لان اخر مكالمة صارت بينا شحنات عصبية

-صارت بيج مو بيه

هم نفس البرود
هالمرة ضحكني

-ليش الضحك
ترة صدك زعلان حيل
اسدين الخط بوجهي

-مو قصدي ...
بس انت استفزيتني وتدري بيه كنت معصبة

- شهد

- نعم

-شهد

- ها

- لا ادخلينا بمشاكل الاخوة

اخذت نفسي وكلت ببتسامة هادئة
- ما ادري غصبا عني

- اكلج ياسر ماكو مو

- نعم

-وليش هالثكل فوك ما مزعلتني ؟
اتقرب مني كعد على نفس القنفة و جرني على صدرة

و ضربني على كف ايدي الي احاول بيه ابعده عني

-مرتضى ماخذ ميانه زايدة
ايييي هههههه كافي
حباب هدني مو هيج

- صار النا اكثر من شهر مخطوبين شهر انت وياي ليلي ونهاري وبالبيت وبالدوام لازكه ما تردين اصير ميانه

-هاي اني الي لازكة
ياهو الي كان يكول حاطج ببالي من زمان هااا
ياهو الي كال من اول ما شفتج كبرانه و عشعشتي بداخلي

-هههههههههههههه
اي شفتي اشلون لزكه حتى قبل لا اخطبج

ليش البارحه نمتي من وكت

- اشمدريك

- ابتسم

-هااا تراقب حسابي هههههاي
نمت لان تعبانه

- خاف حتى ما اضعفين واتراسليني ها اعترفي

-لا اصلا مو بالي
كرصني

ايييي

-اعترفي من الساعة ٨ نايمة

- صاير تقهر هدني لا يجي ياسر

ما يقبل يهدني حضني على صدره
اكثر
- ليش البارحة نمتي من وكت اعترفي

- ههههههه ليش ما اصدكني

- لا يكون زعلانه

-لاء

-هو اني الي ماخذ بخاطري منج
بس شايفة واحد زعلان هو جاي حتى اصالحيه

رفعت رأسي
- يتدلل عليه و ما تغلى عليه العين
بس حباب خليني ابتعد لا يدخل علينا ياسر

-مرتي
ماعنده يمي شي

-لا تعاند
حباب

حاولت اكوم ما كدرت ضربته على صدره
- اووه مرتضى
كافي عاد عناد
ممتعوده على هيج

-كوليها انت ممتعوده
خل اعودج من هسة افضل

لزم فكي وظل يتلمس شفايفي ....
حط اصبعى بين اسنوني الصاكتهن

-ها !
بس فتحت حلكي مد اصبعة
طلع العلج

شمرة على الطاولة

-ايا خبيث

-خبيث مو؟
دفعني موكعني على القنفة و هو فوكي صار بس ما طاخ بيه مسنود على اديه جنب جوانبي
وجه فوك وجهي كأنه شمس تشع بلهيبها علية واني بركة ماي بدت تتبر ذراتها الحرارة تطلع من وجهي ونبضي فقد توازنه
همست
- كوم حباب

-ما لازمج كومي

كأنه يلعب بيه ويكلي انت ضعيفة كدامي

كذلته بدت تتهدل على جبينه و شفته صارت انظاري تتلوع عليها نداهة غاوية ذبلت حواسي وما نطقت
صدري يعلى وينزل احس في طبول تدك داخل صدري

-وخر

بدأ يلعب بگذلتي

غمضت اطرد ضعفي لكن من اختفت ملامحه عن وجهي بدات مشامي تنسحر بعطره
لحظة اريد! ولا اريد!
حسيت بطراوة نزلت على شفتي وبخشونه شعر على خدي
هدت اديه القنفة و نزل جسده انطبق عليه فتحت بذبول وتضائلت اهمية الابتعاد عنه وكسر التحدي و ظليت بحضرة عيونه صاغرة
ظل يداعب خدي الطري بفكة الملتحي اعتقد حس على خجلي من خدي الحار ...بدأنا نتغيب عن الواقع ونسكر بثمالة مشاعرنا
ماكو شي يقطع الصمت المهيب الي بالديوان غير همهمت تؤهاتي و زمجرته بينما الشوگ بينا يستعر كل لحظة تمر بينا واحنه بعالم غير العالم
حسيت بدينا ننجرف لكن كنا اضعف من ان نقاوم احتلال اجسدانا لبعض ..
وكعت الصينية وصوت الزجاج وحده الي ابعده عني
واني على انطراحي اباوع لرقية بذعر

كمت
عدلت نفسي و هو هم يعدل بشعرة

رقية بمكانها ... والصينية والاكواب اطشرن كدامها ..

كمت اني وكلت اله بهمس
-الحمرة
وطلعت خجلانه من الموقف لان رقية ظلت واكفه ما راحت وعفته يمسح بوجهه ...

رسل الي
-وصي رقية لا تحجي شي
اني رايح

راح مرتضى و رقية ظلت تكنس الكزاز اني انقل الكراتين لجوة
اجت كوثر كانت ببيت جدي تعرف اخر اخبار فاطمة

-هاي شنو رقية اجت

سلمت عليها
-هاي شنو الكزاز شجاكم

رقية- ما ادري ما ادري

- شصاير ،

اني مديت راسي و جاوبت
-كلشي مصاير
واخذت الكراتين دخلتها للداخل ..

طلعت من غرفة رقية

لكيت كوثر تضحك
بس شافتني كالت

- لا تفضحونا اصبرو للزواج ههههههههههه

-عزة رقية شكولتي الها

جريتها لغرفتها وظليت اعلم بيها عيب وما يصير يطلع هذا الكلام

وعدتني ما اتكول بعد ..

ردت اطلع

-حبابة حبابة ظلي يمي يمي اخاف اخاف من ياسر

-ياسر يحبج حبيبتي لا تخافين
ومن يشوفج راح يفرح

-وين عمة عمة

-رجعت امي لبيتها ..

رحت لغرفتي افكر بجرأته كل يوم دا ياخذ عليه اكثر واني هم غريب الالفة الي بينا اشلون تطورت بسرعة
خلاني امن بتلاقي الارواح قبل الاجساد .... كنت خايفة حيل لا علاقة ياسر ورقية تتقلص و يصير بينهم نفور قوي و ماكو عودة بينهم ..

بالليل اجتني رقية .
-اريد يمج يمج...!

-ليش ؟
-اخاف اخاف

دخلتها ..
•ياسر
رجعت للبيت .. واني افكر بباجر لو احصل المحلات لو لا ..
دخلت لغرفة شفت كارتونه و رقية مطروحه على السرير

- يا هلا تو ما نور الدار

رفعت نفسها اول ما شافتني كامت
مديت ادية متاني حضنها الي مثل قبل اتعدتني و طلعت من الغرفة رحت وراها شفتها تكول لشهد خايفة خايفة منه !
نيمني يمج !

اتقصلت عضلات صدري و انبقض گلبي وانه اشوفنها تحولت لوحده تخافني !
نافرة مني ما تريدني !

نامت يم شهد ..

للصبح كعدت انتظرها تطلع ..

طلعت شهد تريكت وكالت ما تقبل تطلع اتكول تعبانه

كوثر-خاف لان ياسر اهنا

غمزت شهد الها وفهمت
يعني صدك

رحت الها
لكيتها كاعده وتتلمس ببطنها

- اشلونج!
لمت نفسها ولزمت ركبها

-مسويت شي...عوفني عوفني

اتقربت اعليها انحنيت

-ماااا والله مسويت شي لا تضربني !

همست مصدوم
-هيج انه مأذيج وما دريت بروحي!

كامت تبجي وشهد دخلت توسلت الي اطلع ...

طلعت واني متكدر ما عارف شسوي الها ظلت ايام تتهرب مني وتنام يم شهد ! واخاف اتگرب لا تخابر اهلها وترجع تتغيب عن البيت
،
ربحت المحلات و دفعت حقهن مدة العقد ٢٠ سنة و ترجعلي افلوسي وتخلص مدة العقد

واحمد كان من ضمن المنافسين هو وخالي هم ..

اريد افتحهن مواد غذائية موقعهن استراتيجي كدام السوك ...الي اجرتهن من قبل خسرت بيهن ومكانهن بعيد

بعد خسارة احمد احسه حاول يصلح ما بينا ..
انه بس شلت اله جميل واحد من جابلي شاكر ..بس علاقتي بيه خليتها حذرة ..

واكف على الصباغ وصانعه بالمحلات ..
و افهمهم على الصبغ الي اريده
دكت عليه شهد
- ياسر تعال للبيت رقية تولد...

يتبع

فرحوني بالفين صوت(تصويت) افرحكم ببارت باجر ❤
خل الشيخ مالتكم ياخذ مركز خطية نازل😁
وعد اذا التزمتو وياي التزم وياكم بنشر يومي
التشجيع مثمر ..
و
تحية حب وتقدير للمتابعة الي تتابع بشغف وحب وتعلق على الفقرات بدون ملل توصل فكرة للكاتب انها عاشقة لكل حرف يكتب MmmmMmmm066