رواية شيخ الشباب(بنت المؤمن) الفصل الثاني والعشرون 22 - بقلم زهراء العراقيه

اشلون اوصفك وانت كهرب ..

وانه كمرة عيني دمعة ليل ظلمة

اشلون اوصفك وانت دفتر

وانه جلمة ..

يلي ما جاسك فكر بالليل 

ماجاسك سهر

يلي بين حواجبك غفوة نهر

يلي جرت سمه بعينك

خاف افززها من اكلك 

انا احبك ، انه احبك

-مظفر النواب
اغنية البنفسج لياس خضر ...
مرتضى لشهد

•ياسر
وصلت للبيت لكيتها تتألم لو
جانت اي مرة غيرها ما جان گلبي ينعصر ندم و تأنيب اعليها ..
تلگتني
شهد- خابرت ماما تجي
كالت راح اجي واجيب القابلة وياي لا تتحركون

اتقربت اعليها على چرباية (سرير )شهد مطروحه وتتگلب من البارحة شفتها متغير لون وجها حسيتها بيها شي

كوثر  - گوميها منا

شهد - ليش

كوثر- فرشت الها فراش وحطيت عليه نايلون تولدها اهناك ...

شهد- خليها اهنا خطيه ما تكدر تگوم

-دولي انت جاهلة متأثرة بالافلام ينعدم السرير و هم ما انريدج اشوفين شي

رقية
-مااااا اكوم وجع وجع قوي ماااا

شلتها و ايديا ترجف خوف اعليها

نيمتها على فراش ...
-شهد اتصلي  بأهلها بلغيهم ..

-خابرتهم وامها استغربت عبالها تخلص شهرها ...

بعد نص ساعة الم واستغاثة رقية بشهد !
كعدت يمها دايره وجها

على شهد
وتقرة سورة مريم !

شهد-زين والله حافظتها

جاوبتها اني
-رقية حافظة ٨ اجزاء لحد الان من القرأن الكريم وحافظة ترقيم الآيات  !

سكتت فجأة رقية و عضت ايد شهد الي لازمتها تقويها
شهد- اااااااااااه ماما الحكيني
توجع توجع كافي كافي اااااي ايدييييي
هديها حمووووت الحك عليه ياسر

هدتها رقية وسكتت صافنه على شهد الي وكفت اطف وتنفخ بكفها 

شه
-تعالي كوثر اني معليه...اي اي ايدي

شردت شهد واجت كوثر ...
رقية-شهد شهد لا تعوفيني ايييي

كوثر - لا تخافين الله وياج
ادعيلي خية وانت تتألمين
شاورت رقية كوثر
رقية - يااااارب تتزوجين
سدت كوثر حلك رقية
- لا تدعين خية فضيحة انت

راحت كوثر وكعدت اني بمكانها
- حبيبتي لا تخافين تعدي واشيلين علاوي

- اااي

- بيه ولا بيج بس شبيدي انه

- انت انت منك منك
ضربتني و خل خليتني اجيب ااااااي

- انه !
جا انه شنهو ضربتج على بطنج
يا مرة صارلي كومة من ضربتج توج حسيتي وطلكتي

- اييي بابا تعال الي

- اطلبي من الله العون

-اريد شهد ....شهد

- جا بعدج ما ترديني

- اي

-وجعيه

بست ايدها وظليت لازمها و اقرا الها أدعية....

وصلت امي والقابلة ...طلعت و طلعت القابلة كوثر وشهد الي دخلن وياها

ظلت بس هي وامي وياها .

ما كان صوتها عالي بس تون ...
كاعد على الدرج ومتوضي واقرا الها دعاء

شهد وكفت يمي
- شو هاي القابلة شكلها يخوف حيل
سمينه و جنطتها  مريبة

سديت الكتيب

-غير بيها العدة

اجت كوثر جرت شهد من علباتها
-تعالي عاونيني ولج بس اسختين

-ما ما  معليه بالطبخ مو كنست الج الصبح

-كنستي الي !؟
القابلة وامج غداهم اهنا
-يووه زوديه عود خل اسمع صوتهن شجاي يسون الها شو سكوت

احنه كدام الغرفة وانه على الدرج كاعد

كوثر- گبر لفج عيالج هم على وصول تعالي ساعديني

-هااا صدوك نسيت
يعني يتغدون اهنا

- اي

راحت كوثر
وشهد ركضت وراها و عثرت التفتت عليها وكلت
- ثول والله

سمعت صوت امي
- هانت طلع يمة طلع.....

كأنه الفرج الي واني الي اتوجع

حل سكوت مرة ثانية

ورة نص ساعة الا سمعت صوت صلوات امي...
وبعدها صريخ طفل صغير يبجي

وكفت متوتر من اللحظة ابني داخل هاي الغرفة وانولدت حياة جديدة

طلعت امي تركض ما شافتني كدامها جابت علاليك ودخلت ..
وطلعت بعد فتر القابلة
-ها يمة بشري شنو السالفه ما سامع حس لرقية

- كوثر يا كوثر جيبي طشت و حضري ماي ننظف بيه الطفل

ولا جني احجي وياها والقابلة تضحك راحت تغسل .
كعدت بالهول انتظر ما خلوني ادخل
ورة  مدة كصيرة رقية مبدلة ملابسها ومسنوده على امي و على كوثر نيمنها بالغرفة  وطلعن ...

-حمد لله على سلامتج

جاوبتني وشفتها بيضه بنيتي
بس حركت شفتها ما حجت
وغمضت ترتاح واضح اعليها التعب
بستها من جبينها وخذيت ايدها ابوس بيها .. دخلت شهد هديتها
-رقية حبيبتي حمدلله على السلامة
ما جاوبت نامت

سمعت صوت سلام وية كوثر ، عرفت اهلها اجو ..
دخلت امها
- سودة علية جبتي واني بعيده عنج

فتحت رقية بتعب
فاطمة
- تأخرو بسببي عنج على ما اجيتهم وخليت جهالي يمهم
اشلونج حبيبتي حمد لله على السلامة

رقية
- ز ز زينب
اتباوع للباب

فاطمه-ما جبناها يم الجهال ظلت

ام رقية- حمدلله على السلامة
ظلن يبوسن بيها

دخلت امي وبيدها لفة بيضة
-السلام عليكم عيني ام رقية ...

- وعليكم السلام
اتوجهت الانظار على اللفة الي بايدها

انطته لام رقية
-سمي ام علي نظفناه  وكملنا

-بسم الله  اللهم صل على محمد وال محمد
شوفي فاطمة قطعة حمرة نازل

انه ما ادري شجابني گريب يمهن وماد عنگي اعليه ...
شهد ادفع بيه ودخلت بالهوسة الي صارت
امها وامي و كوثر وشهد وجهال كوثر كلها تريد اشوف الطفل....

ام علي- ذكرني بجهالي اول ما اجيبهم دم هيج حمر

فاطمة- اللهم صل على محمد وآل محمد 
يتربى بعزك عيني ابو فلان و جعله الله من الصالحين البارين خوية

انه جانت اعيوني تلمع اريد ادمع
- الله يخليج ..ابو علي مثل ما اتريد امه

امها هم باركت وهلت التبريكات اعليه

ام علي- يا سودة عليه نسيت ابني بالسيارة ما سويت اله طريق

- صدك اني هم ما سألتكم منهو جابكم
صدك جذب شتلنا الرجال
رحت اله دخلته واتعذرت منه
سويت اله طريق بالغرفة دخل وكوثر طلعت ...
سلم على رقية الي تفتح وتغمض تعبانه ..

ام علي
-تعال يمي يمة ياسر
اذن للولد

رحت يمها
- خرب عمة هذا جنه جيس رطب (تمر رطب) لا امرده بيدي

مرتضى - شنهاي يخوف مثل الشايب وجه هههههههههه
خزرته
-منهو شايب هسة امك كالت طالع اشبه مكرمش معكمش (متجعد)

- يلا اخذه امي تعبت ايدها لو ما تعرف تشيل طفل

شلته وتورطت

أذنت اله
ومرتضى مدلي اديه ياخذه مني حطيته على صدري و رجعته لعمتي

- انت بعدك ما تعرف اشيل جاهل
كعد على طرف السرير ابصف امه واخذه

-اطفال فاطمة كلهم اني شايلهم شتحجي انت

شهد - خل اشيله اني

اجت يمه و خزرتها هاي الغبرة لابسة بجامة ،وماخذه ميانه وتتگرب ليه كدامي

-عوفي ابني انت كتاب ما اتعرفين اشيلين دومه واكع من ايدج

رجع الطفل لامه وكال
- يتربى بعزك ابو نسب

- الله يعزك ..يوم الك

ورحت اوصل القابلة لبيتها ما قبلت تظل على الغدة
تفاهمت وياها على البيان اطلعة النا

•شهد

طلعت احضر اكل وية كوثر
وظلينا بالمطبخ  و همه يصلون
و بعد ما رجع ياسر رحت للديوان فرشت سفرة سفري وزينتها بالمقبلات
حطيت سلات الخضرة ، طخيت بواحد التفتت لانه مرتضى
- ها خلصت صلاة تقبل الله

- منا ومنج
كرص خدي
-اليوم طالعة سنفورة ههههههه
كأنك بعمر ال١٦
- شنو ؟
واكف كدامي ويباوع لعيوني بينما اني ماده عنگي (العنق) حتى بس اشوف وجه ..
لمس جفني خلاني اتراجع للخلف
- اعيونج ما بيهن كحل
وجهج برئي وطفولي
وهاي شنو عش عصفور ؟

اشر على الكباية مالتي
حطيت اصبعي كدامه

- شوف عيني مو لان دوم اطلع الك بشعر  مسرح ومتأنقة عبالك العادي مالتي
ترة اكو اتعس من هاي الطلة من ازعل
اوك

اتخوصرت اله

ضربني على ضهري وهو يضحك

-حرام احجي ويه مراهقة اني
اثاري المكياج ساتر عليج مكبرج
طفلة ههههههههه

عقدت حواجبي

- اي شي حلو انت اصير شايب واني اظل بهذا شكلي الطفولي ما اكبر

- ياخذ الروح هالشكل

-هااااا !

ظليت ارمش بعيوني مفاهمة  واني فاهمة و انسطرت

وهو يحط كذلتي خلف اذني

-انت نموذج من البراءة والانوثة والاغراء ....

ضهرت تعابير  الابتسامة وانغرزت بوجهي ضاهرة غمازة صغيرة جوة زاوية شفتي

سمعنا صوت ياسر
كعد هو على النفقة واني طلعت حاضنه
صينيتي والضحكه ما فاركت وجهي .وياسر دخل يمة

كملت نقل الصحون وفاطمه ساعدتني وهي كاعده بحطهم ...
هذا اول غدة عائلي بينا
وهالثكيل مرتضى ولا يباوع الي بس من تختفي الناس يبين لهفته ، لكن اني مفضوحة...
كوثر واطفالها مو ويانه بس جهاله كاعدين على القنفات يلعبون متغدين
ورقية قبلنا غدتها امها ونامت  والطفل شو شرب ماي وشكر ونام

امي كالت
-هاي الزلاطة حيل مالحة

ام علي-اي والله عندي ضغط ما كلت منها بس اشوية 

امي-شجاها كوثر عادمتها ...

خنست اني
بس رقية الصغيره الي كاعده على القنفة تلعب بتليفون ياسر كالت
-هاي خالة شهد سوتها مو ماما

شفت ابتسامة عريضة  على وجه مرتضى
وفاطمه هم

بس سكتو
ياسر- مو كلش مالحة
طيبة حيل 

وكام ياكل منها وهو اصلا ما يحب المقبلات ..
حبيبي ما ينطي بيه

استغل مرتضى فرحة ياسر بأبنه ولهوة بيه ورسلي اجيه للاستقبال كاعد وحده
ياسر يم مرته وابنه وامي والنسوان بالهول ...

غلست جنت محزمة و شعري اتخربط و سيتي غركته ماي ، لان اغسل مواعين و اغرك نفسي والعرك يصب
عزلت المطبخ ، ورحت بالضهرية الحمرة اغسل الكراج  اكيد بيبي و نسوان خوالي يجن العصر لو بعد اشوية
خلصت واني ادخل بمنظر لا يحسد عليه وافكر ادخل اخذ حمام و اتعدل واروح اله لكيته هو طالع من الباب الثاني للديوان اديه بجيوبة  واخذ نظرة الي من اخمص رجلي لأعلى راسي

اني لازمه المساحة ارجعها بالخلفي و الشعر منكوش ناعم واكف  مثل الوحده المنتولة و السيت الماي نشف عليه وصار مثل الدسم بيه هذا غير العرك الي نازل من ركبتي

كلت
- ا احم
هذا الشكل هم تعود عليه .

اخذت ماسحتي واريد اشرد من يمه
لزمني من ساعدي ودخلني لجوة

-وي وي مرتضى
حباب اخوية بغرفته ..
حطني كدامه واديه على متوني عصرني و حطني على صدرة

-  كل ما اجي خل اشوف هذا الشكل
وخرته عني

- شعبالك لعد اني اعجبك بكل احوالي
ملكة الجاذبية

طلعت اضحك على شكلي ...

ما اجه احد من بيت جدي و اهل رقية
راحو واخذوها وياهم العصر

بقت يمهم شهر واستمرت

اني علاقتي بدت تاخذ مساحة كبيرة
كأن مدتها سنوات مو اشهر ...

بينما ياسر ذب نفسة بالشغل احلامة حيل كبيرة
و ابنه ومرته يروح الهم بين فترات متفاوته وما اعرف اشوكت ناوي يرجعها يكول ما اهون اخذها من امها تعتني بيها وبالطفل
مرات اروح ادلع عليه اريد احجي وياه
الكاه كاعد ويه اوراق حساباته
ويصرفني ...
كوثر ماخذه زاوية ثانية بالبيت مبتعدة عنه بس اتسوي متطلباتنا
ومتكترة صارن عدها صديقات وتطلع
صارت نسخة من امي  سابقا

تواعدت وية مرتضى اروح ابات ببيت خالي ابو خليل...حتى يعزمني يمهم ..

رحت الهم و شفت علاوي حبيبي بيه ريحة اخوية ..

ورقية متغيرة نوعا ما  لاحظتها ما مشنجة بالتصرفاتها مثل ما يمنا

اما زينب !

زينب ما طلعت الي غير سلمت و دخلت غرفتها ما طلعت !

سألت رقية عنها

- بالغرفة بالغرفة 

،،
اشوية خجلت من والدهم على الغده ...
طلعت زينب شفتها ساعدت امها الحلوة مرتضى ومقتدى ساعدوهن بالنقل

نغص عليه الاكل شي بداخلي شعور بالذنب قوي ما اعرف مصادرة وليش
لكن كعدتها كدامي بلا لون و لا طعم كأن انعدمت بيها الحياة ... هذا غير ما تباوع لوجهي

كعد علاوي سمعنا صوته جاي من الغرفة الي مفتوحه .

زينب كالت لأختها
-ظلي اكلي اني اشوفه

رقية كامت تركض اله وراها

ام علي- خطية زينب شايله عنه حمل الطفل حيل نحس ما ينام لا ليل ولا نهار
تسهر عليه بالليل وبالنهار تنام

ماعرفت شرد عليها ورطو البنية وياسر هم ورطها بحمل  وطفل

كعدتهم حلوة وبيها نوعما ألفة حتى امه كنت احسها ما مرتاحه الي ، اليوم كانت اكثر ود الي
فقط زينب ما فهمتها  اعتقد بعدها محملتني ذنب 

العصر الا يرجعني مرتضى ... و امه طول الوقت كاعده يمي هي ورقية ..

شفت زبنب مرت من الهول وطلعت

استأذنت من عمتي

-عمة عادي اروح لزينب ؟

-البيت بيتج روحي وذبي العباية عمج طلع وحماج وياه  ..

نزعتها ظهر التونك و البنطرون التسعين

رحت للحديقة شفتها على المرجوحة تقرأ بكتاب كبير قصص الانبياء .

- اووه تقرين قصص الانبياء اشعجب مذكورة بالقران
خلكج طويل مبين اني متحمل اقرا روايات

- افادة للذات زيادة معلومات...

- بس قصص الانبياء معروفة من القرأن الكريم اني مبيه اقرأ هالكتاب و بهذا الحجم
سدت الكتاب
والتفتت عليه اني كاعده يمها

- كم اخ ليوسف عليه السلام

- ١١ !

- غلط كان عنده اخت وياهم 
القرأن الكريم بعض الانبياء ما ذاكرهم
والتفاصيل والتعمق بقصصهم يحسسك بعظمة الله عز وجل

وكفت حضنت الكتاب

- مرتضى قاريه كله وقاري المكتبة كلها الي شفتيها بالاستقبال

الكتب اتضيف للشخصية صبر و حلم طويل
اني توني بديت بهذا الكتاب رغم بابا جابه! الي ياريت من زمان بديت بكتب بابا

كنت ساكته مستنكرة كلامها اباوع الها بملامح مشفقة

- ليش هيج اتباوعين الي....اتكوليني بطرانه اضيع وقتها بقراية كتاب شكبره
مو ؟
بينما اني دوم اصفن هم مرات على الناس اشلون الهم طاقة يضيعون وقتهم على اشياء  ما تسوة

- شنو تقصدين زينب ما جاي افهم

ظلت تتلفت اكانها اتريد اتكول شي بس متعرف تعبر عنه او مترددة

- لا تخسرين مرتضى بيوم
اذا خيرتي بين خيارين اختاريه بلا تردد

- انشاء الله ما يصير شي

أبتسمت

- من يسكت ما يحجي هو بقمة غضبه،و من يبتعد  معناها جاي يعيد حساباته اني اكثر شخص بهذا البيت فاهمة...

سكتت

وظلت مركزة على كفي

-حلو لون صبغ اظافرج

- شكرا
اذا حبيتي بيوم اسوين أكريليك
انطيج اسم الصالون

- انشاء الله
شهد

-ها

-لا تخلين شي سطحي يخسرج گلب طيب....

راحت واتركتني

الافكار تاخذني واجيبني ..قبل ايام ملهوف يعزمني واليوم كان ساكت اكثر الوقت وبعد الغدة اختفى لهسة ما بين
شنو قصدها دا يعيد حساباته ؟
لا يكون لان عاندته بلبسي و مكياجي
-اووه
ظليت افرك بجبيني بحيرة

تلميحات زينب كله تكول هو زعلان حاليا
زين ليش ما كالي اليوم ليش
هو نبه قبل فترة بس ببرود ما ركز بالسالفة
هف مثل ياسر متقيده وياه من اطلع لبيت خالي الا اخذ راحتي حالي حال بناتنا بعد
وين اكو هيج مثلهم جايه من الزمن الحجري ذرة مبيض او  خافي عيوب ما حاطة بتهم و جها الخيط ما يعرفله طريق(الحفافة )

اني لمحته اله  بيوم ما اصير مثل زينب
هسة اني عادية لا عدسات لا رموش
بس اساس و باودر و كحل مسكارة
عدهم ذني قويات لو يشوفون بنات القسم مالتي
لو من صبغ اظافري !
هي ركزت بيه كانت تلمح اي والله تلمح

شنو الي بيه ما عجبة هالمرة مرتضى وضاج  معقولة منه هيج سبب تافه؟

تذكرت اني كاعده وحدي بحديقتهم اروح يم امه واشوية واراسلة يرجعني للمشخاب ...
شفته اجه و بيده ورقة كبيرة

- سألت عنج كالو اهنا الگمر

اها بيها السالفة گمر بلكي ظنوني مو بمحلها

- شنو بيها هاي الورقة

عرضها عليه و حطها كدامي ظليت صافنه عليها ...
اني وياه وابوه .... بيوم العقد
الرسم التلوين التعبيرات
خلتني اشهك  المكان خلفنا ارض مليانه عشب وثيل

- ياربي هاي شنو هههههه
دمعت واني حاطه ادية على حلكي ومنحنية واضحك

- لا تكولها لا تكول انت راسمها

ابتسم بهدوئة الي يتعب الاعصاب كثر ما تهواه الروح

هز راسه بأي
- نسيتي اختصاصي هندسة

- انت فنان....تعرف شنو فنان .

اخذتها من ايده وكعدت على المرجوحة
- زين زين شذكره بلون شالي
و و الاسوار ياربي
-شكو شي اتلبسيه احلم بيج بالليل بيه كاعده يمي 

- يا الله مدري اعبر الك عن جمالها لو عن جمال كلامك ...

لمس خدي من زلفي لحد نهاية ذقني بطرف اصبعه

- اشوكت رسمتها
اليوم ؟

- صارلي شهرين بيها
اليوم خلصت رتوش بيها 

- حبيبي هاي ما ترجع الك صارت ملكي

-هو اني وقلمي وتلويني كلي ملك تصرفج

خجلني ..

- مرتضى

- نعمات

- اليوم ضجت من شي .. ليش مو هلكد كعدت وياي ؟

سكت و ظل اصبعه يتحرك على خدي

- راح اشيل الاكريليك

- تلبسين جواريب حتى لو المسافة قريبة

باستغراب
-اي تم

اي يعني كلام زينب صحيح و مو قصة رتوش بالرسمة كان يراجع حساباته بيه
لو مضايق مني

- مرتضى اريد ارجع

- شو اختفى الحماس

- لا الرسمة صدوك فاجأتني بيها وبموهبتك
بس تعبت ولا تنسى ورانه طريق...

-طريقنا طويل ما يخلص

ابتسمت ببرود

تاليها خابرت مرت خالي وما قبلت ارجع محضرين عشا
فرحت الهم ما رجعت للمشخاب

•مرتضى
كالت شهد اروح لبيت خالي وشفت بالمبيت عدهم عدها مسألةعادية
وهمه عدهم شباب لمحت الها
خاف ما تاخذين راحتج عدهم شباب
ردت ببساطة اخوتي اعتبرهم
بسيطة تجي يمي و اصير بعض التعديلات
رحت اليوم اجيبها من عدهم ...
ما قبلت ادخل لبيتهم وكفت بالحديقة وخليل يمي ، اجت هي لازمه العباية بأيدها وكدام خليل عادي بقميص طويل وبنطرون حسيته شي ما يليق بيه
- يلا شهد نروح
- اوك
خليل مو تنسى الشغلة الي طلبتها منك

- ديلا امشي جنج بسمار مجعوص

-وانت فرشة حلاق بشعرك هذا

ميانه قوية  وياهم !؟

حيل معدتي مغصتني ، 

وصلنا لبيتنا
كلامي كان محدود لأن العتاب على اطراف اللسان خوفا لا يطلع بغير وقته وصيغة مغلوطة
فكرت بكلام امي وانعادت  علية ذكرى ذاك الموقف وياها...
اول ما تبرأت شهد كدامي ريح عاصفة بداخلي و هدأت وارتاح گلبي ، حسيت برغبة قوية اقربها مني....صوتها بكائها بيوم اتصالها بيه تعاتبني وتبكي قطع گلبي
هادئ بعنف حزين بعتب ضئيل بقوة !
كأني شخص معني الها و خذلتها...نبرتها نبرة شخص مذبوح و ذبحتني وياها ،.. كمل علية منظرها من وصلت رقية لبيتها بيوم ودخلت عليه وتبجي بوجه طفولي بريئ مخذول
بعد برأتها ما كدرت اخمد انجذابي الها
حسيت اجرم بحق نفسي اذا ما اسمع صوتها مرة ثانية !
فاتحت والدي بالاحاح بموضوعها
وافق على مضض
و والدتي الي قابلتني برفض قوي
وما قبلت والدي كال بعدين اقنعها أن شاء الله تقبل ..

ما نمت ونزلت للمطبخ سويت جاي نص الليل وطفيت الضوة كعدت اشربه بالظلام ..
حسيت بحركة وانفتح الضوة عليه

ام علي- يمة مرتضى شعندك كاعد لهسة

راحت تشرب ماي
واني اصبعي يدور حول دائرة الكوب .

سحبت كرسي وكعدت كدامي
- ليش ماما مصر عليها

ما جاوبت

- لا تكون هاويها

- يمكن !

- هاي البنيات من ثوبنا ليش اتروح لوحدة اتعبك

- شهد مو لبنانية يمة مثلنا

- صارت محل شبهة بسبب سالفة اختك
و احنه وياها بعد ما نرهم
وانت نفسك راح تتعذب هاي متطلعة و وكحة تعب

- اشلون عرفتيها

- لو اعرف ليش مصر اتعبني

-ما عاش الي يتعبك يوم
صار مراح ينفتح موضوعها بعد

- لا عمي اخذها

باوعت الها اشوفها تقلد لو جادة

-اخذها يمه

- ليش غيرتي

-ما شفت وجهك وانت اتكلي اعوف موضوعها انگلب گلاب واظلم
اني شريد غير راحتك

سكتت
وهي كملت كلامها
-هاويها من صدك لأن مالك رغبة بالزواج من دونها
كون اطلع اني غلطانة

اتهربت منها اعيوني ...

- هاي هي باجر الصبح اكول لأبوك موافقة
بس هي كلمتين يمة
راحت تتعب بهاي رادتك

كامت و رجعت الكرسي

تركت الكوب وصعدت انام بوقتها ارتاحيت ...

ومصر اعيش الحب مع الشخص الي انجذبت اله بهالة مغناطيسية وقفل گلبي عليها...

لكن اليوم حتى ما الي واهس اكعد وياهم من عزمتها كنت افكر هذا الزواج راح ينجح لو اختبرتها هسة تغير من نفسها تتقبل لكن مع الاسف ما تقبلت شي بسيط مني

خلتني افكر بفكرة ليش اغيرها اخذ وحده تشبهنا واتركها للي يشبها ما مجبورة تتغير ...

رجعت العصر من بيت ابو خليل مقبوض الگلب على تغيرها وتعاستها من بس طلبت منها شي بسيط ...
لكيت ابوية راجع وصاحلي ..

استغربت من تغيره القوي
ابوية يغير فكرة براسة !
اني من فترة احسه متغير اتجاهي الي كلمة ما يظهر تأثيرها بالكلام او النقاش وياي لكن من خلال تصرفاته ...
وهسة زينب وافق لا وبعد طلب مني ابشرها من هسة هو بعد وكت على التقديم  حتى بس يفرح گلبها..

رحت الها شايل وثيقتها بيدي واني ناسي وما اعرف الاجرات للتسجيل المسائي بس والدي بكل الاحوال ساحبها حتى بس يفرحها من هسة .
هليام حابة العزلة ومبتعدة عن الكل
كلنا خايفين عليها وعلى وضعها الصحي لا يتحول عليها مرض مزمن
لحد الان وضعها جيد
اشكد جنت ضايج وتعبان نفسيا فرحتها وتلألاء عيونها بالدمع فرحني 
تركتني وراحت لأبوية  بغرفته ويمه رقية وابنها وامي..
باست ايده و حضنته تبجي
مرات اشياء من وجهة نظرك ما تعني
بس لغيرك فرج

لحد الليل الا اتصلت شهد

- اهلا شهد

- باجر انت رجعني للمشخاب

- عندي دوام

- ما علية اخذ اجازة

استغربت الحاحها اعتقد عدها شي اتكوله ..
رحت الها على الموعد اتصلت بيها تطلع الي ...

طلعت من بيت خالها .. وكعدت يمي
شكلها شكل مراهقة وكاعده ماكو اي تعديلات ..

-شنو صاير شي عدكم

- لا بس عندي خطيب يغار عليه وما يكول شايل خشمة

غمزت ودنكت اباوع لجوة ..انتبهت لرجليها

- لبستي جوراب أسود ههههههه

-على فكرة كنت البس بس قصير ههههه وشفاف

- والبيتة

-يا بيتة

- ببيت خالج وعدهم شباب

فتحت حلكها
-اهااااا هيج يعني كول لهذا السبب ضارب بوز عليه
واني احتاريت عبالي بس الجواريب
عادي ما بات شنو يعني بس اكيد اجيهم عادي

-اي عادي وجبة  كدامهم

-هييلاوي
شنو هاي عيني
بس هم صار بس على شرط

-امري

- ممممممم مممممم ما اعرف شريد منك
ها
غني الي

-هههههههه

سقت ...

وغنيت
لهيثم يوسف عيونك حلوة

•رقية
ظليت شهرين يم اهلي ،واجه اليوم ياخذني ياسر للبيت
خايفة لا ما اكدر ارعى وحدي علي

ياسر من وصلنا ظل يوصي بكوثر بعلي ..
صعدنا مرجع كلشي لطابقنا فوك
بالليل كعد يمي ياسر على السرير

اتلمس شعري ...
وخرت راسي عنه و رحت اباوع لعلي نايم بسريره

-اريد علاوي يمي يمي

-خليه اخاف اعليه يمنا ،

وتعالي يمي اشتاگيت الج

- ما ما اريد تعبانه

-بس نامي على ايدي

اتقربت بحذر وحطيت راسي   ونمت وهو يلعب بشعري ..
كعدت على صوت علي ..
وياسر نايم

حطيت علي على ايدي و طلعت صدري ارضعه  حبيبي جوعان .  
هو ما خلص، غفيت ونمت !

كعدت على صوت ياسر

-رقية
الولد الولد
فزيت مخروعه واشوف علي بيد ياسر مدري شسوي بيه كالبه على ضهرة

-شنو شنو

صاح بعلو صوته وهو طالع من الغرفة كالب عليه ويدلك ظهرة
-كوووثر كوووثر
دخلت مخروعة من صياحه واني گلبي وكف
ياسر-مختنك شوفيه شوفيه
ابني مات مات ماكو نفس

يتبع ....

زهرتكم