رواية شيخ الشباب(بنت المؤمن) الفصل السادس والخمسون 56 - بقلم زهراء العراقيه

#بنت_المؤمن
شيخ الشباب²
من كتابات زهراء العراقية
بارت ٢١
مساء الخير
نظرا لقلة الوقت و النت الغير مستقر منا وجاي كله بلا تصحيح ينزل البارت لان ياخذ وقت

.............................................

اعصر بخاولي صغير و احطه على جبينه ، و اشيلة

وخر ايدي وشال الخاولي عن صدره من خليته جوة فانيلته

ونتر بيه
- وخري عني
ارتابيت من نترته. بيه واني الي الخوف ماكلني عليه ، كام متثاقل ..
من وكف لزم الحايط لأشوية كأن الارض لفت بيه و راح للحمام اسمع صوت الماي دا يسبح ،

كعدت انتظرة وانتظر تأخر
-لا وكع بالحمام ، بس دا اسمع صوت ماي

كمت فتحت باب الحمام و شفته واكف جو الماي ومغمض و حاضن صدره بادية

-ماجد اشلون انروح وانت هيج تعبان

طلع من جوة الماي سدة و اخذ خاولي لفة على جوة خصرة وهو يلوح الي ابتعد عن الباب

طلع واني وراه محتارة بأمره

- اشلون تسوق

- خليه اشوية ارتاح للعصر

لبس وكال اروح اضرب ابرة واخذ علاج

-امنين

- ما ادري ..

طلع وهو تعبان ظليت قلقانه عليه كلساع اتصل بيه اشوفه خاف وكع

رجعلي بعد ساعة وجايب وياه صمون وقيمر اكل وياي اشوية وانطرح ...

راسي محني على راسه وهو دا يغفي

- هذا مفعول السحر هيج خلاك

-وخري عن راسي زينب

- ليش مدا اصدك

- مستبرد مريض

- لا صدكني انت

-زينب اسكتي لخاطر ربج ولا تحجين بهذا الموضوع مرة ثانية
صاح
-خوش

-ما ملاحظ انت كل اشوية و صايح بيه ؟

كال بسخرية مستهزأ
-اي هو هذا تاثير السحر

-اكيد

صاح
-لا حول ولا قوة الا بالله
عوفيني انطمر

-اسم الله

-زينب لخاطر ربج كافي هاي السوالف
شي و طلعتي منه لا تعيشين بيه واذكريه

سكتت اني ما مسولفه اله قبل ايام العرس شصار بيه

عفته يرتاح للعصر طلعنا راجعين
الطريق كله حاطه تليفوني واقرا ادعية
لا يتخربط عليه وهو يسوق

هو اشوفه زين بس بعده مجهد وجه متعكر مرض بس ماعنده حرارة زين ع العلاج ، بس اعرفه بعده متعلعل حتى ع الغدة شفته اشوية اكل مو عادته...

من وصلنا لف راسه ونام لثاني يوم الصبح كعد يحجي عليه اشلون ما اكعده ع الصلوات واخليه هيج نايم وهم وجه متعكر والاكل مر بحلكه

،
اتصلت بامي وسألتها عن رقاوي وشهودة ولو اريد اخابرهن بعدها

- يمة البارحه صدك دكيت عليج ليش ما رديتيه

-ما سمعته يمة

-اكلج رقاوي وشهد اشلونهم التهيت اتصل بيهم من رجعت
اشوية ماجد لهاني بمرضه
- اسم الله اشبيه رجلج

-مابيه بس اشوية استبراد

-الدنيا حارة ليش استبرد

-مو اهناك غير الجو ماما اتغير عليه
ما كلتي الي شهد اشلونها

- اشلونج مرتاحة ببيتج الجديد

- اي يعني دا اتعود

- يلا يمة اجتي رقية اريد اسبح

سديته من يمها واتصلت بشهد ..
جهازها مغلق ..

ديكت ع رقية
- زينب زينب مشتاقه الج اهواي اهواي

-اني هم حبيبتي اشلونج
-زينه زينه
-علاوي حبيبي اشلونه

- زين زين يجي يجي كل يوم وياي ويركض ويركض يدور عليج يضوج

-يا حبيبي هليام بلكت اكدر اجي

-اي مشتاقين الج الج

- شخبار شهد

- شهد
هااا
ماما اكول الها الها لو بعد

-ولج عوفج امج واحجي خرعتيني اشبيها؟

- اسمع امي تحجي عليها

-رقية
الو

-زينه زينه

- هاا خوش يلا روحي سبحي امي

سديته من يمها واتصلت بمرتضى

- مرحبا اشلونك رضاوي

- هلا ومرحبتين

-اشلونك

- اشلونج انت تمام ؟
-اي الحمدلله

-اشلونه ماجد وياج

-تمام الحمدلله
شهدوة شخبارها ليش جهازها مغلق...

- ها مغلق ليش غالقته
ما اعرف

- اشلون صحتها امي تكول مو تمام

- هو بعدنا اليوم نسوي بعد سونار ملون بلكت اكو غلط بالموضوع

- هااا هو يا موضوع
مرتضى
-شنو ما تدرين امي شكالت الج

-الصراحه كلشي مكالت واني قلقلة على شهد حاسة بيها شي وطلع صدك

-اها اظن ما تريد تقلقج

-اي هسة كولي اشبيها شهد

- الطفل ما بيه نبض وجاي نراجع نتأكد اليوم ناخذ سونار ملون
وعلى ضوء نصرف

-يارب يطلع ما ميت

-لا ميت متأكدين بس هي ما تقبل تقتنع

-خطية اشلون حالتها هسة ما عونا يثبت ليش توقف نبضه خرب

حيل تكأبت بهذا الخبر بعد شهرين ويكمل حملها ليش هيج ماعدهم حظ
ياربي يطلع ما بيه شي وتفرحهم بيه

رحت اسوي غده

سلكت لحم و حمسته دركب تمن ، دخل عليه ماجد كان كاشخ على سنكة عشرة

-ها اشلون صار راسك هسة حبيبي

-زين راح الوجع

-ممممم وين طالع بهاي الكشخه
ابتسم وهو يعدل بلحيته المعتدلة

-طالع اشوف بنتي

-اها مممم
صدوك مجودي ما بيها مجال نجيب عبودي

- اشوف امي العصر واردلج خبر

-مممم هو ليش يم امك هالمرة مو يم ابوه؟

تنهد واختفت الابتسامة

-اوف السيد ومرته بينهم خلاف وهي ببيت اهلها

-اهااا هاي من شوكت؟

-قبل عرسنا بيوم مدري يومين

-حيل هاي صارلهم فوك ال١٦ يوم ليش شنو السبب هي صغيرة وتطلع من بيتها

-ما اعرف خلافات بينهم محمد ما يسولف التفاصيل عن اسرارة داخل غرفته

-معقولة ما كال ع الاقل السبب الرئيسي

-ما كال غير خلافات بينهم

-اها والاطفال خطية هسة رجعو تبهذلو

-كبار همه مو صغار ...

-ما اتغده اهنا نسيت اكلج

-شنو لعد تعوفني وحدي

التفتت وبانت عليه الحيرة

-مو اروح مناك لهلي اخذ البنية لامي اشوفها و ارجعها لبيبتها

ويمكن اكل يم اهلي

رحت جريت من ايده ثكيل ما ينجر

-تعال اكعد عيني انتظرني ابزل التمن و اطفي عنه و رجلي على رجلك اروح وياك لاهلك وديني و انت روح لاهل بنتك
اخذلة صفنه
-هااا اكعد

-خل افكر

-يبووو منك اكعد

-بس خل افكر باللفة الي راح الفه واني رايح راجع لهلي

-مكشلتك يا حبيبي ما عايش وحدك تفرفر بكيفك

رحت خلعت ثوبي و بستعجال طلعت فستان صيفي محتشم وطلعت ركض اله لكيته كاعد ثارد بالتشريب و ياكل

-خرب هاي شنو؟

يضحك ومصرفن ردنه وياكل

كعدت انتظرة ....

بالسيارة من طلعنا

-زنوبة ليش اظل رايح راجع لهلي ..

-خل نروح سوة لبيت اجداد فاطمة

- ممم يلا انتظرك بالسيارة

صدوك توني انتبهت بتك اسمها فاطمة

- اي سميتها حبا بفاطمة اختج حيل كانت مقربة الي اخت و صديقة طيبة و واعية
-ممممم اكول ليش ضاجت بوقتها مني لأن رفضتك

- الله يرحمها

وكف السيارة
-ما تنزلين وياي شسوين هنا ظالة

-لا خاف ازعجها بحضوري

-دنزلي انزلي خل تتعرف عليج

-لا عفية ما اريد اتعرف على احد

-على راحتج
نزل وطبك الباب بصوت ونزل
خليت ونزلت و وكفت خلفه وهو يدك الباب

- نزلت نزلت لا تعصب

فتحت الباب النا مرة من عمر والدتي
رحبت بماجد ودخل واني وراه

-هاي مرتك

-اي هذي زينب

- يا ميت هلا بيكم

اشلونك يمة

صافحتها و دخلتنا للداخل ،مشتمل بسيط يدل على تعفف اصحابة
حتى سقف الهول الي كعدنا بيه مفطر

-خطية شنو كاعده وحدها شو سنطة بيتهم

- اي بيتها مقسوم مشتملات لأولادها
وهي الها هذا الهول وغرفة

-خطية ليش عازلين

قبل لا يجاوب دخلت وبيدها ماي قدمته النا ودخلت بت ماجد وحلكها لهو

من شافت ابوها ضحك ووكع لهوها بالارض
حضنها و بوسها

وبقت بحضنه

كعدت المرة يمنا لابسة اسود بأسود و لاحظت توني صوره متوسطة الحجم خلف التلفزيون ، لأبنية عدها شامة
همست لماجد

-هذي المرحومة ام فاطمة
هز راسه باي من غير ما يحجي

- خطية صغيرة الله يرحمها ..
بنتك بيها شبه الها قوي

نص ساعة وترخصنا من يمها ماخذين الطفلة الي حتى من كعدنا بالسيارة
هي بحضنه

-زنوبة شرأيج نخليها يومين يمنا

كنت اباوع للطريق

- ليش بتك ترضع لهو وخرة عن حلكها شكله مزعج عمرها سنتين ما لايك الها

-ليش تحجين بعصبيه؟

-مو عصبية عادية

وصلنا لأهلة و لكيت اهناك اطفال فاطمة كلهم هناك ..

و ام ماجد معصبة و كالت مريضة

ابنها العصر يريد ياخذها لطبيب مفاصل
ضجت على وضعهم حيل بس مكدرت اطلب من ماجد ناخذهم كلهم ما ردت اثقل عليه
كمت اساعد عمتي بس كنة وحده عدها بالبيت مرت حماية الكبيرة ما طالعة و اولادها شباب مزوجتهم ببيوتهم و بنات متزوجات ..
اجت بتها ام مسلم بيتها مقابيلهم اسمها اخلاص ما ارتاحيت الها بس تحجي عن مرت عدنان ،محبيت أسلوبها تحذرت منها

عمتي كالت اصلا احنه ناوين نعزمكم بس اشوية اصحى تعبانه

اشوفها حيل حنينة على كل احفادها اشوية صححت عندي النظرة الي اخذتها عنها من خطبتني لمحمد،

العصرية كمت ادور على ماجد واني شايلة عبودي لكيته بالحديقة مكعد بنته بمرجوحة ويهز بيها على كيفه ..

-ماجد جنت ادور عليك

اشوكت انروح؟

- اشوية بس اوصل فطومه

-مو على اساس تبات يم امك

-امي تعبانه وتطلع بعد اشوية للطبيب

-جان زين نكدر ناخذها ويانه بس انت باجر تباشر وخاف ما ماخذه عليه لوحدنا

ما رد وظل يسولف وياها ويلاعبها

واني واكفه يمه ..

نزل عبودي وكعد يمها يمرجحه عمه

رجعت للبيت ويه عبودي وهو راح يودي بنته ...

للمغرب الا سمعت صوت سيارته دخلت الكراج ..
تلكيته بضحكة تلكاني بحضن

- حبيبي جوعان حمي الي تشريب بعد الصلاة

-عزة هم اتريد تثرد بالليل واني كلت اقلي بتيته

-كلي اكرزها الج

- ههههه لا انت ابد مو طبيعي هههههه

اكلك شخبار راسك

- زين اجواء اربيل ما والمتني أستبراد وراح
لا عبالج الي بالج

دخلنا لغرفتنا بيها عبودي يلعب بتليفوني

- راحله باسه

- ممم والاحلام الي تزعجك

-راحت ماكو جانت بسبب ضغط نفسي بيوم عرسي اخوية تعارك

-هههههه تدري حبيته لعدنان حيل يستاهل جاركم ابنه قاهرني

- رجلج اجه يدخل مركز شرطة بيوم عرسة وانت تأيديه

-اشلون فال هههههه

- طلع للصالة يخابر ... رحت خلفه
حضنته من خلف

- حبيبي عادي نروح باجر لهلي

- واني كيفت طلعتي رايده شي

-اي نروح ليش لا

-مممم احسك ضايج مني ؟
-لا

-ممم شو دكلي احبج

-اذن
كبر وية المؤذن و بعد ايدي عن خصرة
-هاج تليفوني ..خل اتوضا

خلصنا عشا الباب ندك روحي فرفحت بلكت واحد من اهلي ..
راح يفتح ماجد ..
دخل قاسم مصدر التوم واخته

-ها ولكم
استقبلتهم بضحك العصر ودعتهم

-خالة ترة بابا ويانه راح يدخل

هرولت للغرفة ..
و ظلو يمنا مسيرين اليوم يباتون ببيت ابوهم بعد ما يرحون منا ..

سويت الجاي ودخلت بيه عليهم ماكو ماجد
-اتفضل ابو مصطفى ..
كعدت ويمي التوم و صوفي مطروح كدامي

-اشلون احوالج بعد الزواج

-الحمدلله

- نومج مريح لو متعلعل

-هليام زينه الحمدلله

- ماجد اشلونه وياج

استهجنت سؤاله ما أستسيغته
- تمام

اجيت أسالة عن مرته بس تراجعت بس باوعت لوجه
كان مدنك يشرب شاي

سألت
-تأخر وينه ماجد برد جايه

مصطفى-راح للتواليت

- عبد الله شنو تغربين يظل يمج
-اي سيد خو ما عندك مانع عفية ما اكدر بدونه

- مم ما ادري هو اهنا بيت عمه بس يبقى القرار لماجد

- ادري بيه موافق

- ليش ؟

-ها لأن متعلقة حيل بيه واحبه مثل ابني ترة عبودي

-مثل ابنج الله يخليه وهو هم اكيد يحبه مثل ما يحب ومتعلق ببنته فاطمة من عمر عبدالله اشلونها اعتقد اليوم رحتو شفتوها سمعت من امي
على اساس تظل يمكم اليوم؟

-اي شفناها واخذناها ويانه لبيت الاهل بس ما باتت وداها ماجد

دخل ماجد
كلت
-جايك برد ماجد

-يلا عادي احبه بارد

لفترة كاعدين سوة على سوالف الاطفال وسوالف الاخوين مسلية اني..
تذكرت شهد اووه التهيت عنها وما عرفت اخبارها ...

ماجد- اليوم العلوية خابرتني
ترة خطية حتى بخواتك اتصلت
رجعها محمد ..

-مو وقته هذا الكلام
واشر على الاطفال ..

اشوية واترخصو كال لأطفاله يرحون للسيارة برة ..
ووكف من وصل للحديقة وكال لماجد

- العلوية غض النظر عن الخلافات
المسببات اكبر من الخلاف
والسبب الرئيسي عدم قدرتها على التكيف وجاب نتيجة سلبية لتربية الاولاد تحولو الى عنيفين اللسان هجومين
ترة الفعل هو سبب ردة الفعل الخاطئة

باوعلي بنظرة جانبية

-المرة الي ما تعرف تقود بيتها ولا تفهم زوجها ما تصلح ترجعها الا ما تصلح من نفسها
كملت عبارته وطلعو ..
اشوية ودخل ماجد
كنت انيم بعبودي بحضني
انطرح يمي من غط بالنوم عبود حطيته بفراشة بالارض ورجعت صعدت لماجد كان مطروح على صفحته ويلقب بتليفونه فاتح فيس و يشوف مقاطع بيه

حطيت ايدي على صدره و راسي على ظهرة دفنته من خلف
-حبيبي باجر اريدك اجيبلي سرير عبودي من بيتهم

ما رد

بسته من ظهرة
- وتشتري الي سرير ثاني تعرف لو تاخذني وياك اني اختارة اريده مو خشب معدن و نوعية حلوة بلون وردي
يناسب فطومة

-اشمعنا

- نحط الها سرير اهنا بالغرفة الي ابصفنا هي وعبود حتى من تبات يمنا عدها غرفة .
بعدين صدك الهول ليش مابيه شي نكعد عليه اثثة و اريدك هم اريدك تغير الجام تحطلي شباك ينفتح ليش كله مغلق

اندار عليه قاطع كلامي

- وتخليها تتعود عليج لو شنو زينب؟

- قصدك فاطمه

ظل يباوع الي و يلعب بزلفي

-اي ان شاء الله بس كون طبعها مو صعب مثل بتول تشك معدتي

ابتسم و ظل يمسح بشفايفي ببطئ ناعم ...
بصوت مليان عاطفة قوية واضحة من النظرات الحانية
- دائما احس بيج طاقة جمال غير محسوسة ملموسة بس ما اميزها وين

-ما عرفت وين

كفت اديه عن مداعبة وجهي ..

واتقربت شفايفة تزور ثغري العاطش مثل نهر جاف و امطرني بحرارة تروي ضمأن وجسدة ظل خيم على اضلعي
رازقني الدفو الحميم ،رفع راسه ظل يلعب بشعراتي
-هيج احلى لا تخلين اوستيجة

- هههههه قصدك اكستيشن
لا وخرته ما اخلي بس على مود العرس وايامه منا وجاي اجننك بجمالي الخلاب و تسريحات شعري الصباحية

ضحك وهو ما زال معتليني
- عندج خفة دم حيل تعجبني بس ليش بعيونج كأبه

- ها هاي اثار ال

مات ضحك

-اشبيك ههههه

-لا تخليني اروح افلش بيت مرت عمج الشاكين بيها هههههههههه
واني هم ضحكت وياه لان اجيت اكول اثار الخذلان والنكبات ضيعت ضحكتي

-ترة والله جنت حشاشة درجة اولى لا عبالك نكدية

-منو كال نكدية

-مممم
رجع احنى راسه عليه
- اصلا هو جمال روحج هو الي جاي اتلمسة
شكرا حبيبتي
نامت شفته على شفافي طوقته بأديه

-احبك حبيبي
كلتها واني مغمضة واباده قبل على عنقة
- واني هم

-احبك حيل
احضني ماجد اعصرني ..

جنت مو وياه جنت ويه روحي اكول حبيت نصيبي و عصرت بدنه عصر اريد احس بيها باقصى طاقة عندي
وطلبت منه المثل ..

.
خلصت صلاة الفجر هو كدامي كان ساجد ..
ظليت اسبح ..
التفتت عليه
-حرما ان شاء الله

-هههه جمعا حبيبي

طوة سجادتي وظل بس الجزء الي كاعده عليه

-حبيبتي

-هااا

- كومي يلا .

اخذني بحضنه بمعني الكلمة هو متربع واني راسي وصدري متوسد على حضنه والباقي على السرير طالع مامكفي

-من صدك حبيبتي لو جان تأثير مشاعر النشوة وراحت لحالها

-حبيبي من اتكول المرة شي يعني صدك هي حاسته
خليها ببالك المرة يمكن تكذب او تكول اشياء تحت اي تأثير الخوف او غيرة
بس بأمور العاطفة ما تكول الا الي حاسته ..

-دكومي لعد كسرتي رجليه مكافي اديه نايمه عليهن للفجر اداور براسج يمنه ويسرة

-مممم مشكلتك ليش تتزوج ظل عزابي
بس انطرح هم حطيت راسي على صدره

- كسرتي اطرافي اجيتي على كلبي

- ما اوخر تعود هو هذا الزواج شعبالك

-بعد يومين تملين واشمريني

-هههه ما امل وداعتك
ارتاح من انام يمك

باس راسي وحسيت كيف من ابتسامته
ما يدري مولاي بحضنه انام رغد مو مثل قبل لا كوابيس ولا غيرها بس يلا ما اكله السبب تنحبط معنوياته هههه
-زوز ممتعود هيج انام حبيبي اريد انكلب على بطني
عفته وانكلب
وهم حطيت راسي على ظهرة وانكلبت وياه

-لا هاي جديده علية بس خليج لا ترحين

-نام ولا تتحرك
انكلب رجع على ظهرة و حطني على ايده حاضني
-حبيبتي هيج تعلقتي بيه
ظل يغدقني بالقبل وبعظها غمض

شنو القضية ليش ما متعود على اللزكه مالتي قابل مجانت المرحومه تنام بحضنه

وقتت دماغي ع السبعة الصبح
كعدت طيرة سلكت بيض وحطيت جبن و عسل و حطيت بالمايكرويف خبز حميت و نصبت الريوك بالصالة على الارض ماعنده ميز طعام .

رحتله كعدته

وكف بالصالة يفرك بعيونه

-هاي شوكت كعدتي وسويتيه

-غسل وتعالي راح اصب جاي.
،
تريك وراح يبدل

طلع من الغرفة لازم القميص والبنطرون الي محضرتهن ومنسقتهن اله

-هاي شنو حبيبي شمحضر الي ترة اتعود على هذا الدلال لا تبديها هيج وياي
-عادي تعود ما بطل هاي عادتي اكعد من الصبح اكعد ابوية واخوتي و اريكهم

-شنهاي متطورين انتم

راح يبدل بالغرفة

طلع وصلته للباب وكالي
-حبيبي لا تتعبين نفسج الصبح وتكعدين من نومتج اني متعود اسوي لنفسي جاي واطلع اتريك برة

-لا يعيني شنو تاكل برة
اني ممتعوده هيج كل الوجبات يمي

- على مودج
-ليش المرحومه مجانت تكعد الصبح هاي كل النسوان هيج تكعد عادي ترة

وجه انكلب وصعد سيارته اشرلي افتح اله الباب خله وطلع .

خابرت مرتضى

-ها مرتضى بشر شخبار الطفل

- اااه
طلع متوفي

-لا حول ولا قوة الا بالله

-طلع ولد

صوته ضايج حيل ومقهور

-وشهد اشلونها

- هاي دا يهيؤها لولادة مبكرة وحالتها ما تسر

-اووف خطية من تولد خبرني

ضجت وكلش تكابت بجيت عليهم
سودة عليه ما لحكو يفرحون بيه

مرت الايام وشهد رجعت للبيت بعد عشرين يوم من ولادتها المتعبة حيل
ونفسيتها تعبانه كلش حتى ما تتحاجى تاركيها على راحتها ..
اما رقية مطورة عيني كل اسبوع ورايحه لبيت ياسر الثاني يتعازمن هي وضرتها .

امي بخير وزينه وتأكدت حسب اقتناعها ان الي مسويلي عمل مرة ما مثلي عند صابئي والمرة ما تقربلي بالدم بالنسب حسب كلام ام الفلام الي مطيتها اثري ...وامي اتكول هاي ام كرار ...حتى جارتنا ام زيد اذا ذكروها
طلعت رايدتني لأبنها ، بس تكول ما ادري ليش هونت لا ابوها ما ينطيها !؟
حسب كلام كوثر الي صارت تعرف نسوان الفرع من خلال المجالس الحسينية وطلعاتها ...

اما اني مر اكثر من شهر على زواجي وبديت احس بعياء واني ادري حاسبة لنفسي شاكة بحمل فبعصرية كلت لماجد واخذني لمختبر احلل
عبودي و فطومة كدامي يلعبون واني كاعده انتظر ويه نسوان بصفي ..
وماجد واكف برة ماكو مجال ازدحام
ظليت انتظر نص ساعة صاحو اسمي

زبنب حسن طفرت و مجرجرة الاطفال وياي ..
-ادخلو
دخلتهم وكلت للمحللة
- عزيزتي صحتو اسمي اني زينب حسن

-هذي النتيجة

هزيت راسي متسألة
-مبروك حامل

ظليت حاطه ايدي على حلكي اكتم لهاث ضحكي
الله ذب عليه الضحك والتدمع ..
اخذتها منها وطلعت

-حبيبتي نسيتي الدفع
درت وجهي عليها وخجلت

يوه وين ماجد

طلعت من جنطتي هي خمسة وحيده مدري شسوي مندسة بيها ما حاطه افلوس اني معتمده
انطيتها وطلعت شفت ماجد منتكأ على سيارته وصافن وظهرة عليه

من سمع صوت الاطفال

التفت

فاطمه- بابا اشريري (اشتري الي)

-ها شنو طلعت

-اي هههه
طلعت

-شنو ها

-ايجابي

ابتسم
-عليج الله

-اي ههه افتح السيارة دكعد

-والله
-اي والله اشبيك

- يا نصر الله
كعدنا
والاطفال بحضونا

- مبروك كابتن

- ههههه طلعت مو هين بشهر زمان حبلتج

وردت اخدودي

-عيب عاد اسكت شنهاي

وداني لبيت اهله تعشينا اهناك و طش خبر حملي اني بس كلت لعمتي وجانت بتها اخلاص واكفه وهي الي نشرته عبر الاقمار الصناعية ...

هالمرة من رجعنا اخذت اطفال فاطمة وياي كلهم بأمر من ماجد لان بيبتهم تعبانه ... وبنته نجيبها جمعة وسبت بالأسبوع وترجع لبيبتها مو هلكد ماخذه عليه يم ابوها واني اقوم بالعناية بيها فقط وهم اشوية مستغربة مني .

خابرت امي وبشرتها . و كلت لرقية همين ..

انطرحت ابصف ماجد بعد ما فرشت للاطفال بالغرفة الي ابصفنا ونيمتهم

شفت رسالة من شهد

-مبروك !

ليش حاطه علامه تعجب وشنو بس كلمه وحده يااا بس لا زعلت لا ياربي والله احتاريت اشلون اكول الها وهي نفسيتها تعبانه كلت تعرف من امي عادي
هسة شسوي اخابر اشوفها زعلانه لو لا ؟

لا انوب يصير بخاطرها اكثر خل اصرف بطبيعية
رديت عليها
الله يبارك بيج حبيبتي ...

اجتني رسالة

""مرتاحة بالزواج لو هم عليلة مثلي""

كلبي فز من محتوى الرسالة والرقم غريب
طفيت الجهاز وطبيت جوة غطاي ...

يتبع

بنات حقيقة البارت حتى ما قريته ولا راجعته ولا شفت حرف منه بعد ما كتبته فياريت لا تخجلوني على جفصاتي المثيرة😁🤣
واتغالب مغالب ويه الحكومة السياسية وحكومة بيتي ،وكدرت اقنع حكومة بيتي افعل بس حكومتنا السياسية شيقنعها تتنحى المهم مسية العافية عليكم،،، كظومات الي تكول البارت قصيرة احرمها من حصة العدس ورمضان گرب ترة

شكلي من قنعته

انا أمراة لا اقاوم 🤣💪