رواية شيخ الشباب(بنت المؤمن) الفصل الخامس والثلاثون 35 - بقلم زهراء العراقيه

مساء الورد

بنت المؤمن
شيخ الشباب2

أحبيني .. بلا عقد
وضيعي في خطوط يدي
أحبيني .. لأسبوع .. لأيام .. لساعات..
فلست أنا الذي يهتم بالأبد..
أنا تشرين .. شهر الريح،
والأمطار .. والبرد..
أنا تشرين فانسحقي
كصاعقة على جسدي..
أحبيني ..

-نزار قباني

- علي علي راسة مفشوخ مفشووخ

-دخيلك يا ربي خرعتيني اشوكت كعدتي وشفتيه يحظي

-من خابرتج الضحى وما ما ما رديتي رديتي

- اي ما كالت الج امي واكع

- ليش ليش وكعته وكعته ياسمين

- هههه اكلج هسة اني اريد اكلي شي واروح عندي محاضرة ابنج مابيه شي

-ما احب ياسر ما احبه ما ما داير باله عليه ما ما اودي بعد ترى ترى مااا

-هلا عيني تعال اسمع يلماتسمع رقية خانم صارت صارمة هههه

- ما ما ما

- دروحي روحي اليوم ما تحبيه باجر تبجين عليه يمي بالليل زينب اريد بابا يرجعني

سديته واني اضحك هاي بلوة اول ما كاعده شايفته ومخترعه وخرعتني وياها عبالي صاير شي جديد .. نايمة للضحى هي واني طلعت للدوام من وكت اليوم عندي استفسار من الدوام الصباحي .
،

العصر رجعت تعبانة حيل تقريبا الساعة ب٤

دخلت للغرفة ذبيت عباتي وحجابي

رقية تلعب بتليفونها

- رقرق صبيلي غده عفية حموت جوع

اخذت غيارات وطلعت اسبح ..

واني اتغده امي عجلتني ، لابسة واتريد اتروح للفاتحة

- اي بس يمة اكمل ...

-همزين سوو فاتحته اهنا مو بالمشخاب شوديني اني ورجليه
ما اتحمل كعدة السيارة

رحت على سريع غيرت اسود و طلعت
تفاجأت ببابا يوصلنا

ممم اكيد لخاطر امي ما تمشي هالخطوتين

(بابا راح بس اخر يوم ، واحنه رحنا اول يوم و ثالث يوم الاخير ... وعرفنا مرته ما قابلة يسوها بالمشخاب وحتى صايرة بينهم خلافات بسيطه بين امه ومرته ...
اما شهد بس اول يوم الايام البقية اختفت ماخذها ياسر لبيته متخربطة وكوثر يمها . وما يقبل ترجع يم امه اساسا لو عليه ما يخليه ابد يم الغريب مثل ما يحسبة هو ، بس هي كانت بحكم مرتضى اما هسة اعلن سلطته المتسلطة و اخذها يمة مأخذ اذن من مرتضى

خابرتها اطمن على صحتها كان صوتها واضح عليه خليط التعب والحزن والانكسار حتى حسيت اوتارها الصوتيه مبحوحة

-حبيبتي شدي حيلج هذا حال الدنيا
وهو كان مريض ارتاح

- الله يرحمه

-الله يرحمه

- منو يوصلج هليام

- والله رجعت لشلاع القلب يتأخرون عليه بالرجعة و الظهر اضاعف الطريق على بابا
هو اشلونه سمعت والده توفى زعلان عليه اكيد هذا الشي مأثر على نفسة الضعف

- حيل متأثر
انت اشمدريج اتوفى زعلان ؟

- سمعت والدته كالت بليلة الوفاة

- لا عادي كان بينهم نقاش و اختلاف يعني زعل أحبة
هو اشمدريه يتوفى بهذي الليلة خالي كان مريض مخطور

- الله يصبرهم

- شكرا حبيبتي على السؤال

-ولو واجبي هذا
يلا حبيبتي اخذي راحتج ..

-سلمي على عمة ورقية وبوسيلي علاوي ....

*

بعد اسبوع من وفاة والد خليل حضرنا نفسنا اني وامي وكاعدين ننتظر مقتدى

اجه من برة وامي لامته على تأخيره

- وينك راح يأذن المغرب وانت رحت بعد ما رجعت

مقتدى
-يمة يا اذان الساعة بالأربعة
حتى المحلات توها مفتحة كولي غيرها

كلت
-لا ترادد امك روح خلي الكارتونه بسيارة مرتضى..

كومت امي و رحنا وية مرتضى لبيت ياسر نشوف شهد البارحه طلعت من المستشفى دخلت يوم متخربطه...

ظلت امي توصي بمقتدى
- ظل يم اختك لا تعوفها وحدها

رقية بالغرفة واعرفها مهظومة اتريد اتروح ويانه اشوف شهد بس ما نكدر ناخذها...بابا بالزيارة طالع وبس مقتدى خلينا يمها واخذنا علي ويانه اكيد حاشر نفسة وياي ..
اول ما وصلنا عرفت السيارة الي واكفة ببابهم سيارة {خليل}
تجدد الحزن على اخر موقف شفته بيه والي غير فكري بيتهم الجديد احلى من ذاك ، جديد تصميمة و واجهتة حلوة من دخلت
استقبلتنا كوثر بالتهلي ...
دخلونا گبل لغرفة بيها شهد نايمة على فراش وبيدها كانونة و مرت ابوها يمها من دخلنا وكفت النا وسلمت...
حسيت بخربطة بالكعدة خالة زوجة ياسر وامي ام طليقته متقابلات
على كال هي واجب والظروف ما تخلق منا عدائين ، المرة ما ثكلت وجه علينا وامي من النوع الي صوته هادئ و حتى تعبيرات وجها ، محجبة مثلي مو شيلة و بوشية خلعتها من دخلنا للغرفة حطتها ابصفها
مرت ابوهم اكبر من امي مشيلة و سوالفها كثيرة مو مثل امي بس تصغى الها مع مشاركات مؤيدة بسيطة
و شهد مطروحة وصافنه وجهة شاحب واصفر

همست الها
- شنو ما تاكلين

هزيت راسها

- مرتضى برة يم الولد

-ادري بيه اكلج اشلونها رقية

-زينة

-خليل يمكم جاي اليوم
شفت سيارته برة ؟

- اي اصلا يمنا يبات عايف البيت ميكدر يشوف ابوه بيه

-خطية

همست وراسها يم راسي الي محني عليه يسمعها

-اشوفج مهتمة ؟

-ولو اشلون ما اهتم شخص اعرفه و مر بأزمة كبيرة ....
منظرة بليلة الوفاة فطرلي گلبي تدرين بليلتها رحت اشوف بابا يتنفس لو لا
كعدته مخترع

شبه ابتسامة حزينة خطفت بشفتها وكالت
-اني ما اذكر بابا ما عشت وياه
توفى من كان عمري ١٤

-الله يرحمة

-خالي ابو خليل كنت عايشة يمهم وهو رباني ما فرق بيني و بين اولادة

ابتسمت بأسى من جديد وأسترسلت بالكلام الهادئ الحزين....

-كان بالليل يلمنا ويسولف النا سوالف ليل عن مغامراته بالجيش وقصص رعب ههه ما نعرف من تأليفه لو حقيقة

-شهودة حزنج مأثر على حملج المهدد

- الله الحافظ

مرت ابوها - توحشتي جنتكم ..

لأنه الكلام موجه الي شلت راسي عنها
وابتسمت

علاوي ما زال كاعد بحضني
ضايفونا و ما يقبل يكوم و كعدت اوكله شاي و فطائر حلوة بالسمسم

ياسمين
-تعال علاوي اوكلك اني

علاوي- ما
و حرك اديه طخ ايدي الي بيها صحن الشاي اسكب اله بيه وابرد حتى يشربه تبدى على عباتي و انوب بيه بزاز جرك (فطائر ) وسميم من حلكة

ام ياسر او مرت ابوه-كومي خاله غسلي شسويت بخالتك علاوي الوكح

امي-وكح ما تهدأ بكعدتك

شهد
- كومي غسلي زنوبة

ياسمين وكفتلي و كمت وياها للمغسلة بنهاية الممر

طلعنا من الغرفة للهول وكفت اغسل ادية

ياسر - تعالو اخذو مني

سمعت صوته بالحديقة
راحتله مرته اني ظليت اغسل بجزء من عباتي ..
سرعان ما سمعت صوته بالهول

ارتبكت اشلون اعبر وحدي وين راحت مرته اوووف

مو خوش سالفة اطلع للحديقة واعبر من ممر للمطبخ
يوه عيب افتر ببيتهم بالله شافوني
وهسة اشلون

ظليت واكفه بمكاني متورطة وخجلي الزايد عن حده حنطني بمكاني

اصيح مرتضى؟

باب الاستقبال يمي بس والله عيب خليل اكيد جوة انتظر ياسر بلكي يطلع من الهول

ياسر-تعالو خليل مرتضى شباب بالهول

خليل - جبتلي العلاج

-اي تعالو اهنا ادفئ

يلا انتظرهم يرحون للهول واني ادخل للاستقبال واطلع من بابه الثاني وادخل للغرفة هاي الثولة نستني

سمعت صوتهم بالهول ودخلت للأستقبال شفت ملابس على القنفات مشمرة و نفاضة متروسة جكاير اكول ياسر ليش طلعهم الظاهر خليل كاعد بيه و ظال محد منضفه بسببه

واني امشي و استنتج دخل خليل واستقبالهم شكبرة واصلة لنصفه
صرنا مقابيل بعض ،لزمت خيوط خجلي بالقوة
وطلع صوتي مرتج مني
-السلام عليكم

رفعت عيني المتوترة والمترددة

شفته يباوع الي بذبول
عيونه شمس مغيم ضواها شاحب
عكس السابق
-وعليكم

-! البقية بحياتك وعظم الله اجرك
صوتي شبه هامس
- سعيك مشكور

انحنى واخذ باكيت جكايرة وتليفونه واني رجلية انشلت كان لابس سيت بيتي و شعرة شادة للخلف و شبه ظلال لحية وشوارب مخيمة على وجه

رفع راسه وكانه استغرب انظاري عليه
بسرعة الطيف اختفى طالع !

الغريب توني تذكرت انفاسي ليش كابتتهم بدخلته ؟ جريت انفاسي مثل الغريق الي انهار على بر الامان بعد ما ارتطم بأمواج ....

كعدت يم امي واني حاسة بغلالة حزن عليه كنت متوقعته اقوة او اقل احساس، مشاعرة هوائية انفعالي تخف بمرور الموقف غالبا الرجال الي يتضح عليها الحزن بهذا الشكل المزري بحيث هرب مني كاره نظرات عطفي ما أستغله ! يكون اصدق واعمق عواطفه من غيره

-يلا احنه نرفع الزحمة
جملة امي قطعت حديث افكاري و طلعتنا من بيتهم

بعد أيام ..
طلعت مع والدي بسيارته ادية بجيوب ترواكتي الحياكة الي مدفيه بيه جسدي

مرينا بأم محمود ومناك لنور ...

من نزلنا فاتحتني ام محمود

-خجلانين من والدج اكلج صارلنا ١٤ يوم يوصلنا صحيح ما نرجع وياه بس هم جاي يوصلنا ويتعب

ابتسمت
- لا يمعوده بكل الاحوال هو يوصلني

نور
-ميخالف احنه نخجل هيج كلافة

- ماكو كلافة انتم لو مو على طريقنا اني ما اكوله صحيح يتعب بس احنه ما تعبانين بكل الاحوال

نور- اشوكت خليل يرجع ؟
- ما ادري
اختصرت الحديث ورحت للمغاسل رتبت حجابي وعدلت عباتي و رحت لروتيني المعتاد

بيومها بين المحاضرات فاتحتني ام محمود جايها طالب من المرحلة الثالثة وياي
يريد يخطب ويشوف اموري من خلال ام محمود ...

رحت كلت لامي كالت عادي بس يرسل نسوانهم ونشوفهم ونسأل عنهم بس كون عنده دخل مو طالب
حسب معلوماتي من ام محمود هو موظف اغلب الرجال الي ويانه بالمسائي رفع من مستوى الشهادة لأجل الراتب

اما اني شايفته شكله مريح للنفس ما نافية موضوع الزواج عمري ٢٤ سنة والبعيد عن القلب بعيد عن العين يمكن مشاعري كانت متفاعل ويه خليل
اول مرة احد يتلهف لقلبي وهذا شي طبيعي اعتقد أنعجب بيه بداخلي حتى لو واضحة رفضي ...

وافقت وصارت كعدة النسوان وارتاحن الي واحنه بالمقابل هم . شغلة مرضي ما جبت طاريها لاني شفيت بعد سنتين ..
مرتضى كال نسأل عنهم ونشوف
وظلو تلاث ايام يسألون ما اكتفو ابو مصطفى هم اشتغل وياهم تحري عن الولد واهلة

الصوبة النفطية مشتغلة و عليها جدر لبلبي و اني لابسة حفايات (جواريب شتوية صوفية)
و حاطة رجلية يم الصوبة والهول اراجع بعد العشا و الولد بغرفهم و بابا بغرفته وصاح لأمي راحت يمه قبل اشوية

رقية يمي و تلاعب بعلاوي( الي فات ثلاث اسابيع ما ودته لأبوه و بابا بنفسة اتصل اعتذر لياسر وشرح اله حالتها ومخاوفها عليه اخذه بس نص يوم ورجعة مراعي وضع امه و افكارها )

اجت ماما يمنا
- اووه اليوم حيل باردة

تدفي اديها

كلت بغباء- اكو واحد يسبح هسة

ضربتني رقية على متني
-شع شعليج شعليج انت ها ها عيب

خدودي صارت وردية مكنت قاصدة شي نسيت

ماما كعدت اخذت علاوي تلاعبة وشعرها ما زال رطب

رن تليفوني
-همم شهودة اشلونج حبيبتي

-لج زينب انخطبتي
كالتها بصوت مرعوب يكلك سامعه خبر مرعب دا تتأكد منه

-احجي خليل اتصل گالب الجو عليه

-الله يبارك بيج
ابتسمت بغباء مريد اهلي يحسون و رحت لغرفتي اهرول

كلت واني اسد الباب

-اشبيج ليش كلتي لخليل صدك تحجين شهد هو اصلا شنو علاقته

- ما كلت شي وما دخلت ولا شلت ايدي بعد اصلا
هو الي اتصل عارف كلشي ويعيط عليه لان ما كلت اله

سكتت حايرة بيه

-زينب اني معليه لا كولت اله ومعلية بباجر ولا ب الي راح يصير

-شنو الي يصير شهد اشبيج

- هو راح يرجع يباشر وياكم واني معليه حتى كالي اكول لمرتضى جاوبته "معليه بيه وما راضية عن تدخلة بيج"
بس هو كال هو يتصل بمرتضى ويرجع

-لا عفية اصرفي شهد

-زينب ليش خليتنا بهذا الموقف

-يا موقف شهد

-من كلت اله البنية ما تريدك وعوفها

كال "هي انطتني كلمة و موافقه ليش غيرت "

-اني!؟

-شنو لعد

-ما انطيته اي شي او امل شهد صدكيني وهو اتوفى ابوه واختفى بعد ع بالي راح

-اووف باجر يجيج اشلون ورطه هاي انوب معصب

-لا عفية اتصلي بيه فهمية وهدية لا يجي عفيه

سديت الاتصال وية شهد وركبي ساحت

اجتني رسالة ماسنجر بعدني ما كاعده على سريري

مرتضى" زنوبة باجر يرجع خليل بلغي صديقاتج "

حطيت ايدي على حلكي ارجف
-يا ربي
شسوي
شسوي

ظليت افتر بالغرفة وحايرة شسوي

فاطمة اي فاطمة

اتصلت بيها ما ردت
يوووه
ردت رسالة
-محمد يمي

-عفية رسايل

-مفارغه زنوبة هسة

اووه ياربي ...

اشلون بيه
دخلت امي

من خوفي ع بالي تعرف كلشي وراح تضربني ..

-حبيبتي انت كبرتي وعلى وجه زواج ما اريدج اظلين غشيمة هيج

دخلت و سدت الباب
اتعلمني امور بعد الزواج وهاي السوالف
وفسرت نظراني خجل منها واني الخوف من مواجهة خليل ينهش عظامي ..

طلعت امي وكله من رقية وضحكها عليه خلت امي تعلمني

وكفت امام المراية

-زنوبة انت قوية بنت الشيخ الي تخوفين
كلها تكول شكلج هيبة و الج حضور لا تخافين منه
انت ما وعدتيه ولا عندج علاقه بيه ولا انطيتيه مجال بعد شكو لا مذنبة اني ولا هاي
اتقدم ورفضت ماله شي يمي وباجر هيج خليج وياه جدية ماكو خوف ولا توتر ولا تنطيه مجال اوكي

رفعت تك حاجب وكلت لنفسي
واجهي ولاتخافي عزيزتي
صوته الخشن مجرد اختلاف جينات لا اكثر انت اقوى من هيج موقف بسيط

رحت لفراشي انطرحت وانعفص وجهي

-يمة شيخلصني من باجر
اااخ يا ربي انوب ملهوفة عليه!

سوها صدك هالخليل وخلاني انشغل خوف وافكر بيه وسهرني ليلي

انوب عندي امتحان لا اكدر اتغيب و الهروب ما يفيد وراية وراية

معدتي متقلصة وتوجعني وگلبي يدك بخوف وقلق وعاصفة مخفية بداخلي نفس ما كعدت كمت ما حطيت لگمة بحلكي وامي ظلت تحجي عليه لان ما متريكه وعلى الغده هم ما اكلت

مع هذا ظليت كاعدة بالهول وهو مرمش على مرتضى واتصل بيه مرتضى بلغني
انتظرت وقت ومرتضى رسلي

-ما اكومين صالبة الولد كومي فاهية
جاي يرمش عليه
كمت رجلية اطكطك وية بعض وايدي ما شايلة السجل وكع مني
من كثر ما ترجف ، شلته واخذت جنطتي وطلعت لبرة شفت السيارة كدامي
ظليت انفخ انفاسي واني اباوع لنهاية الفرع بس اوصلها وياه يبدي العتاب والهجوم منه...

باوعت اله شفته كاعد ويباوع لكدام

فتحت الباب و كعدت .اعدل بعباتي اجيبها منا و اوديها منها وهو مشى بيه

تنفست براحة واعتدلت روحي من التقلص من قربنا نوصل لام محمود وما تكلمنا .

اشو اتغير مسارة عن الشارع العام و دخل بفرع !

ما فهمت بيت ام محمود على الشارع وطلع بيه على شارع خدمي و وكف
اهنا سكبت عبراتي ، ظليت ابلعم
و اتفاهت روحي

نزل من مكانه واني اترقب لكل حركة منه نزل واتوضح الي شكله من خلف كنت متوترة اباوع اله من كاعد كدامي

قميص اسود و شعرة شادة بلاستيكه و لحيته خفيفة طالعة .

خلص جكارته كلت بس يرجع يدخل اكله ليش جابنا منا وارجعه للطريق راح اتأخر

التاف من اندار وما كعد بمكانه وفتح الباب الي يمي وكعد
انخلست بمكاني من جاورني

- مبروك ...

باوعتله بستفسار لهجته تخوف

-خلي...

- سمعنا انخطبت

- بعد مو رسمي

- هااا ترديها اصير رسمي !؟

ليش جذبتي عليه

- نعم !
خليل لا ..

- اني بس غبت جم يوم الكاج مخطوبة لو غايب شهرين الكاج مزوجه بيت رجلج
شنو هذا الحظ

- خليل كلشي قسمة ونصيب وانت ظروفك ما تناسبني

- ما تحملتي فترة وتعدي

- ما اريد اطوخها بالكلام وياك ولا اتعمق لأن من صدوك ماكو شي بينا
لا تحسسني اني وياك بعل...

سكتت لازمه جبيني بتوتر

-بعلاقة قصدج .. احنه مو بعلاقة وادري بيج اشرف من الشرف وما اجيتج من هذا الباب التعبان
اني رايدج زواج
ليش هالعجل احجي ردي
بس هالمرة وبعد لا تحجين وياي

- ظروفك صعبة والدك توفى و والدي وجدك مستحيل اصير بينهم كعدة
وانت تعرف ومو بعيد زعل ابوك منك بسببي

- شنو ؟
لا لا ابد ما الج علاقة

واني مدنكه احجي وياه وادري راح اندم اني مو من هذا النوع ما احب اتكلم ويه واحد بس غصبا عني

- بنفس اليوم الي كلت الك الله كريم وانت تفألت اتوفى والدك

سكت ما اتكلم

- اني تعبانه بحياتي وحالي حال اي بنت تقدملي شخص واهلى دا يسألون عنه طلع زين خيرا على خير لا الله يعوض
لا كذبت عليك ولا لعبت بيك اني اصلا رافضة العلاقة ..

-شحلاتج من اسولفين ادهريني ما اكدر اناقشج لكن
ظروفي تتحسن وجدي مو وصي عليه اني رجال واعرف اصرف حتى اجيبه الكم بس وقت اني هسة توني طالع من شدة

سكتت ما جاوبت

مرت لحظات الا كال

-ها فهمت
فهمت ما رايدة لا الانتظار ولا المجازفة يمكن مرايدتني ويمكن اصلا اني حتى اعجاب من ناحيتج ما محصل فليش التعب والعريس جاهز والقسمة زينة
الله يوفقج وان شاء ما اصير !

التفتت عليه مستنكرة

اشر على عيوني
- وداعت هاي النظرة كون تخرب

نزل ورجع لمكانه ، ما ساق ظل كاعد بمكانة

مثل الضغط وانزاح عني بكومته

التفت علية

-الكعدة يمج تسوة العمر وينج من زمان ياريت من زمان عرفتج يمكن لحكنا وما انبنت العثرات هاي كدامي

زارتني ابتسامة ضايعة بوقت خطئ

رحنا . لام محمود و بعدها نور سلمت وعزته و كعدت يمه

- ما كلت تجي شنو من مفجأة زينب كالت البارحه نص الليل

انعقدت افكاري وابسرعة باوعت لقفاه !

يكول الها ؟
بينهم كلام وين يكول!؟

بالرجعة ماكو كلام بينا بعد

لكن من ردت انزل

- زينب الله وياج

مجاوبت و رحت لبيتنا

وهكذا يومين مرن و هو يوصل ويرجع من ساكت واني من جهتي مستحيل احجي او ابوح بشي بس عيشني بضياع فكري و اختلال ، لكن ما خليت هذا الشي يضهر عليه بتأثير منه

كنت احضر عشا وية رقية من اجتي امي وكالت
-خربت شغلتج يمة

-قصدك العريس

-اي يمة العريس طلع مطلق وما كالو النا

-يا اشلون هيج

-ما ادري مزوج انوب مو غريبة بت خالته وشهرين ومطلك وما نعرف الاسباب يخوف رفضنا ليش كذبو علينا وضمو

حطيت كبة برغل بالطاوة وكلت
-هو اني ماعندي حظ هي كوة

الصبح كعدت متكدرة حيل من حظي
عود فكرت بعقلي وكلت مثقف واعي
مع هذا هم كنت ميتة قلق اذا طلع زين
و تم القبول حيل تخوفني فكرة الثقة بشخص ما اعرفة ؟ يلا بعد خربت خل ارتاح ليش متكدرة ؟!
اهوو وراية خليل اذا عرف اني خربت شغلتي راح مدري شنو اتكون ردة فعلة ارتياح لو شماتة اني شعرفني بالناس وبردود فعلهم

احسن شي اخابر شهد اوصيها لا تكوله خابرتها من الصبح تحجي وتتثاوب
استغربت من مخابرتي ومن عرفت كالت ميخالف اني معليه اصلا ..

طلعت من صار الوقت ولكيته ينتظرني

-السلام عليكم
كالعادة السلام همسي ..
بس طلع من الفرع التفت وكال

- الله يعوضج بالي احسن منه
بس اصبري عليه !

رجع يباوع لطريقة

- شنو ؟ شهد كالت

- لا اكيد ههههههه شتكول وياسر الي كال الي

اخوج كايل لياسر على العريس وطلع يعرف واحد من عشيرتهم كال لاخوج راح أسالة هم عليهم بلكت يعرفهم

و طلع رجل خالتها الي المحروس ماخذ بته و مطلكها هو الواحد

انذهلت على انشدهت

سكتت وانخطف لوني واني اتلمس بصوته الفرح مدري الانتصار

- زينب ...

زينب

زينب

ظل يعيد بأسمي واني اباوع للطريق ببال يمة! لكن ما انطق واريحه !

- شنو رأيج بيه ؟

الج رغبة اصيرين زوجتي ؟

ريحيني بهاي الاجابة !

حتى اخف ضغطي عليج صدكي اشوفلج سايق ثقة اخوي الصغير

و اني ابطل احاصرج
بس كولي اي حتى تعرفين ما العب وياج اكطع عيوني من شوفتج منا من يمر وكت يتعدل بيه الحال و حتى تثقين بنيتي

لح بالاجابة واني ساكنة ساكته اباوع للشارع وبداخلي صراعات رغبة بالنطق هيكلت قوتي واني احاربها
ما اريد اخضع لأي قرار تحت ضغط هذي المشاعر
وصلنا لأم محمود و ما نطقت
واني اتلوع على تلوعه

،
بعد المغرب
كانت رقية تصلي واني يمها خلصت قبلها
من خلصت طلبت منها
-رقرق اخذيلي خيرة بالقرأن

-اي اي ...

اخذت على نيتي

-هااا رقرق

- افعل افعل ولا تتردد

-اووه

كمت من يمها واني اساسا بداخلي قرار واتقوت ارادتي بالخيرة وخابرت شهد

شهد- ها زوزي

- اخوج ياسر طلع كايل اله الزلم هم ما اضم شي

-صدوك

-اي وياسر اول من عارف بسالفة العريس وطلاقة

-لعد ياسر يدري بمشاعر خليل ترة صديقه الروح بالروح ومدام هيج
كايل اله ومبشرة يعني متعمد ياسر مكلف نفسة ويسأل حتى بس يخربوها

-صدك تحجين يعني يعني هسة اني بنظر ياسر وحده يعرفها خليل لا ياربي ليش هيج

- لا انت الثانية معقده يعرف مشاعر صديقه بس انت شنو علاقتج بيه بعدين يدري بخليل لزكه اذا راد شي واكيد يدري بيه متعمد يشتغل الكم بخط

يعني انت ما الج علاقة ولو ما يعرف نيته لخليل كان كسر راسه وما خلااه يتقرب منج

زوز
كافي تعقيد وخوف

- كلش اخاف شهد هاي سمعة كفاني الي صار

-لا تخافين
اليوم شكالج خليل

-اكلج صدك اني خابرت حتى اريدج تبلغيه يوفي بوعده وباجر يخلي اخوه يوصلني وخل يبلغ مرتضى هاا خوش

-شنو هم راح اتعبيه واترفضين اووف

-شهد لا ما اتعبه كولي اله هيج وهو راح يطير فرح

-شنو يعني دا اتبعديه ولا بعد شارطة عليه يجيب اخوه اشكد متسلط قلبج عليه لعد

- ههههههه ويني وين التسلط ابن خالج الي عنيد هو رادني واني وافقت بوعدة يبتعد ما اريد الموضوع يتحول لعلاقة و يرسل اخوه بمكانه منا من الوضع يتغير ويتقدم موافقة عليه اعتقد يستاهل أنطيه الثقة

-صدوك

فرحتيني

- شكرا شهد
- اكلج ممكن اكلج شي

-كولي شهودة

- انت عنيدة ام راس يابس و متحجر و تقهرين بس حلوة هيج والله وربيتيه النا ههههههههه

-اعجبج ترة بس كون واثق يتخطى العقبات

-لا تخافين يتخطاها

-شهد اني ما وافقت الا ما التمست عاطفتة بصدق اني كنت قاطعة عهد على نفسي ما امشي على احاسيسي غالبا ما مغلوطة واتعبني

-ثقي بنفسج زنوبة لا تخلين الي صار يتمكن منج

- خل نشوف هذي المرة ياريت تصدق وما يكسر اخر امل الي بالثقة بروحي

-زينب اني فرحانه حيل

-لخليل

-لاء
الي حسيتج اليوم قريبة عليه
و شاركتيني مخاوفج حسيت نفسي واخيرا كسبت ثقتج

- انت طيبة

شهد
-اهواي انغدرت من قريبات هم خذلو ثقتي وحسيت طيبتي غباء و برائتي هبل كدامهن

-ههههه مثلي

سديته منها

،
بنص الليل الا فتحت محادثات

ام محمود
اتكلمت بالمحادثة الي بينا بنات

كالت ابني مريض ادعوله
خطية هي ارملة وعدها اثنين ولد وعايشة على راتب زوجها شهيد و دا تكمل دراسة لخاطر مستقبل اطفالها

نور دعت الها ومن صار اسم نور كدامي تذكرت شي غافلة عنه وهو علاقتها بخليل

دخلت لصفحة شهد لكيتها نشط
اتصلت بيها مشغولة يمكن تخابر مرتضى

انتظرت نص ساعة ما خلصت واني اشلون انام وانطيته موافقة لا يربي

اتصلت بيها من الرقم وردت

-ها زينب

-اولا اعتذر ازعجتك عن مخابرات نص الليل

- اووه زنوب شنو صاير لا تكولين غيرتي رأيك ترة بلغته بعد ماكو تراجع

- حبيبتي بطلت وعن جد تذكرت توني علاقته ويه نور الي ويانه بالخط الي يكعدها بالصدر يمه والي بينهم تواصل

اني اندفعت و وافقت هسة بلغيه بطلت

يتبع