رواية شيخ الشباب(بنت المؤمن) الفصل السادس والثلاثون 36 - بقلم زهراء العراقيه

مساء العافية

بنت المؤمن
شيخ الشباب 2
من كتابات زهراء العراقية
قولي لي كيف سأنقذ نفسي من أشواقي وأحزاني؟!
قولي لي ماذا أفعل فيكِ؟!.. أنا في حالة إدمانِ
قولي ما الحل؟! .. فأشواقي وصلت لحدود الهذيان

-نزار قباني

-شنو

- لا يابة هاي وحده لزكه وحاجيلي عنها وخاف عبالج محاولة اسقط بيج كدامه

وكايلة اله على مشروع خطوبة قديم الج من اخو زميلة الج تذكرين هذا الي
كلتي الهم مريضة و راحو بس هي مجايبة سالفة مرضج متدري يمكن

-اشلون كايله اله همه بس مرة وحدها وصلها اخر وحده بينا

-لا عيني داخلة عليه بالفيس ولازكة هو وافق مكيف عباله من طرفج وهي طلعت نيتها غير شي ومن عرف نواياها التقرب منه غلس عنها ما يرد وطنش هذا الكلام كايلة الي قبل وفاة خالي قابل اني اعرفها ليش يكذب عليه
وجاب طاريها
ترة خليل شبه الي عايش يمنة واني كلشي اعرف عنه زهد هذا النوع من العلاقات ...

الو شو سكتي

زينب لا تظنين خليل حياته سهلة ومدلل اهلة
هو الكبير وترة شاف اهواي صعوبات بحياته ومر بهواي تجارب ..
من صدك انت حبج واحساسه انت الي يرتاح وياج

شو سكتي ؟

-اسمعج
اني متقلبة من هيج نوع من الزواج

-ما فهمت

- يعني شخص يريدني شخصيا ومتلهف وبعدين تروح اللهفة ويعوف من اول عثرة

- تعبتيني اذا اظلين مترددة راح يمل خليل ويروح ترة اذا حس كرامتَه تنمس ينسحب

- لا تكولين اله شي

- تصبحين على خير اروح لرضاوي هههه

سديت من يمها وما كدرت اعبر الها صح عن مخاوفي الحقيقية
خايفة خليل يسمع بالسالفة القديمة والاشاعات مجرد هاي الفكرة ترعبني لا يسمع بيها وتضطر شهد اتبرر واسولف اله الحقيقة هي مصغرة مجرد رسائل
بس هم أنزل من نظرة واني وين هو يشوفني ما بخاطري ابد نظرة احترامة الي تتشوب اعوفه ولا هذا الشي يصير
لهذا كلش مترددة و برأي متذبذب لو لا تعلقة و قوة مشاعرة كان تهربت اني حاولت اطلع خارج هذي العائلة ردت انسان بعيد عن اقاربي ومعارفي ابدي وياه من جديد، ففضلت الغريب!

،
ثاني يوم الي وصلني اخوه بسيارة ثانية سوناتا مدري شسمها نور اول ما صعدتها كالت اسمها و استنكرت التغيير مراهق بدال خليل هالمرة يوصلنا !

،

بهاي الفترة احداث بسيطة مثل مرض ابن فاطمة و عملية فتق اله و رحت يمهم بدال امهم طلعة و ية ماما مراجعات طبية ، زيارات اهل البيت
دراسة ...

و مرن شهرين وبليلة تأخر مرتضى واتصل عليه ما يرد

الصبح رسل الي هو ببيت ياسر بات

خابرته صوته متكسر حزين

- رضاوي شكو ليش بتت واشبيه صوتك

- الطفل مات

-طفلك !
ليش واشلون عمره ٤ اشهر الحمل

- ما اعرف صاير عدها اسقاط و اليوم ناخذها تسوي كورتاج ...

البارحة تأخرنا بالعياده لنص الليل وبتت يمها ...

-الله يعوضك ... اني جاية اروح وياكم

-لا وين رايحه

- اروح خلي مقتدى يجيبني يمك ما اداوم اليوم

اخذت اذن من بابا ورفض فهمت ما حاب اروح وحدي لبيتهم وهم اكيد مو بحاجتي
اني من حبي لمرتضى نسيت نفسي وع بالي العلاقات عادية صارت
لأن رحت بالسابق لبيت خليل و مع ماما لبيت ياسر
على ما يبدو الا واحد كبير وياي اتحسست من هذا الشي
،

ما رحنا الها ماما تعبانه بس اني اخابرها منهارة ..
واحتاجت ايام الا كدرت تطلع من حالة الانهيار و دخلت بالاكتأب
رجعت لبيتنا بس قليل تطلع من غرفتها و بنيتها ضعيفه صاحبها فقر دم .
امي وهي مرضى اشوية امر متعب نفسياً فترة صعبة ومرت ....

بعد شهر
اني محجوزة من غير ما احد يعرف
الاحلى الاستاذ كلشي يعرف مخلي مخبرين اخوه السايق و بت عمته شهد

كنت كاعده اسمع قصيدة قديمة رثاء اهل البيت ملا مهدي العبادي قديم تراثي ..
و علي ضوجه البيت من دونه يم ابوه و رقية مخلصتها نوم لحد
العصرية ..

دخلت شهد

حطتلي كيس اخضر صغير بحضني على كتابي ...سألت

-ما هذا يا هذا

-ممم كل عام وانت بخير زوزو صرتي ٢٤ رسمي وبديتي بالمشي بال٢٥ هههههه

-يييه عيد ميلادي عود صدوك

فتحت التليفون شفت الشهر واليوم يوه صدك باجر عيد ميلادي ال٢٤

-اي Happy Birthday to you

- شكرا هههههه أخر عيد ميلاد الي وحصلت هدايا بيه من كان عمري خمس سنوات

- ممم شفتي اني اشلون حبابة تذكرت عيد ميلادج
يلا عاد افتحي الهدية

-اووه صدكي من فرحتي احد ذكرني حتى نسيت الهدية

فتحتها

-حجاب نقش لبناني واو شنو هذا اللون الغريب

نقش جوزي على خلفية وردي سادة

كمت من مكاني وحطيته على راسي

-واو خامتها تجنن شو رهمت بسرعة كأنها احسن من العندي

-اي خامة اصلي حبيبي

- لا تكولين سعرها هبل من امهات العشرينات

ضحكت
-نعم

-يا خطية رضاوي كلفتيه

-ياي هاي الهدية مني مو منه

- ماكو فرق نفس الوارد

-هههههه بالعافية ما ظنيتها هيج تعجبج

- مممم هاي جنت اكول بس البطران يشتري هيج اسعار ربطة (حجاب)
لكن بالبس مريحة عجبتني رغم بيها فواتح

-اي بس شرط باجر اتلبسيها اوووك

-ميخالف هههه

ثاني يوم خمطت من رقية حذاء اسود بيه سنسال وردي و صعدت اخذتلي جنطة من شهد وردية عاد الواحد مغير مغير خل ارهم الواني كلها غوامق وعجبني التغيير مدري من فرحتي بالحجاب انو شخص هاداني خلة نفسيتي تنفتح على الدنيا

طلعت من بابنا ، وصارت سيارة خليل كدامي انصدمت

انفتحت نافذة السيارة

-مساء الخير اليوم نظوري(اخوه) مستبرد يلا اتفضلي

همست
- مساء النور

كعدت مستغربة ظهورة بعد اشهر خل بالاتفاق ...!

كل ما عيني اصير على المراية الكاه يباوع الي بعيون مبتسمة

الى ان وصلنا ل ام محمود ونور .

ام محمود

-واو اليوم نيولوك جديد فتحت بشرتج الفواتح

نور- حلو هالحجاب حيل شنو خامايته

- شكرا هدية عيد ميلادي من مرت اخي
حيل حلو وعجبني

نور -واو ذوقها يخبل

هي تطرب بذوق شهد بين ما اني مستغربة منها ما كعدت يمه و اول ما صعدت و ضاجت كأنها من وجودة

باوعت اله وهم لاكتني اعيونه المتلهفة بعطش خلاني اغض نظري عنه

من نزلنا ام محمود كالت

- سمنان خليل صاير وسيم اكثر جان محلو هلكد ما ضعيف

نور- صاير محلو باللحية وابد شكلة مو مريح

ابتسمت ام محمود وما عقبت شكلها فهمت مثلي صادها لهذا كارهته وما ارتاحت اليوم بوجوده ، لكن صدوك اخوه مريض وظهر هو ؟

بالرجعة العصر ...
بعد نزول نور وام محمود

التفتت عليه

- كل عام وانت بخير
رديت بهز راسي فقط

- لايگ الج حيل اليوم اعذريني كسرت كلمتي بس حتى اشوفج بيه
اتخيلته عليج وطلعتي احلى

حركت حواجبي مستغربة

-نعم
ممم مفهمت

- يلوگ الج الفاتح وغمز الي
قسم بالله حركته نغزت گلبي وطاحت بيه صريع وهو أبتسم حتى تغضنت زوايا عيونه

نزلت من سيارته امشي واتلفت بالبيت ادور شهد
صعدت بعباتي فتحت الباب لكيتها كاعده كدام التلفزيون تاكل من الكعك الي خبزته البارحه
- حياج الله !

- شهد

-اووه مامي
رجعت شهد على المخده بطريقة درامية
واتفرلي بعيونها الدائرية الخضر

-هو انت عرفتي اكيد
اووه ماي الله سوري جذبة بيضة

سديت الباب

-لا زينب هاي النظرات تخوف والنبي

-هذا الحجاب من خليل مو؟

-اسمها هدية والنبي قبل بالهدية

-واني مو نبي

اضحكين علية واصرين البسة حتى هو يشوفني بيه !

-اهووو يالتعقيد شكو بيها حبيبج وهداج

نترت
- لا تكولين حبيبج

-لا حبيبي اني اوك

-مدا اشاقة

- عفية زينب لا تغثيني
انتم مو بينكم كيميا طبيعي يتقرب اشوية وهو شايفته من يلح والله غصبني بس اريد اخلص منه

زوزي
لا تكلبين وجهج

كنت اتنفس بقوة واباوع صفح للحايط و متخصرة من فوك عباتي

- اكول اشبيه يباوع ويضحك ومكيف روحه رادة اثاريه هو مشتريه واني مغترة بيه كدام نور وام محمود كدامة
لو ادري هو جايبه مكان مدحته اصلا مكان لبسته

نصبتو الي فخ

ردت اطلع تذكرت وكلت
-وها كولي ما اقبل يظهر منا من يخطب

- تمامو

نترت
-شنو

-تمام تمام اقصد

-بسيطة اني اعلمج يا شهد

-اووه

- اليوم العشا عليج

-لا فدوا

- والممواعين هم وباجر عليج الغدة اني جمعة اكعد اعلمج واذا اشتكيتي افتن عليج انت كسرتي البلم التراثي(صحن بلمي الشكل) لأمي وذبيتيها براسي و اكلت رزالة معدلة

-لا حبابا لا اصيرين شريرة

-أستلمي بعد
صرت وخلص الامر ام الفخوخ انت وابو شعر

طلعت لازمه طرف الحجاب مبتسمة

،

رصيته يم الحجابات بعد الغسل والكوي ضوة بلونه الفاتح بينهم نشاز

ابتسمت
وسديت الكنتور و أنتكيت عليها اسحب بنفاسي برتياح ومشاعر ناعمة ادغدغ گلبي
اجه ببالي اسمع يا عاشقة الورد

واخذتني الذكريات اله بوسط النغم الي بداخلي انرسل الي مقطع من شهد
فتحته

خليل وياسر

بقاعة كأنهم بعرس قديم خليل ضعيف بيه و شعرة قصير جوة اذنه و لابس مناظر طبية و كاعد يم ياسر الي نافخ نفسة وثكيل حيل كأنهم معزومين
بينما خليل مثله هادئ وكاعد و صوت المعزوفة فجأة يعلى و خليل حمى هز صدرة هزة سريعة على الدكة و رجع ربط اديه على صدرة هادئ ضحكني المقطع مرات اهواي انعاد ونفس الضحكة على كعدته المهذبة وتحولها لهزة سريعة

شهد رسلت ايموجات تضحك وبادلتها الضحك
كتبت
"ضحكت متت ترة الهزة مالته غير متوقعة بس يلوك اله الثكل هههههههه"

رسلت الي

"صورت اله ضحكج عليه وكلامج اتخبل راح يجي يكتلني لأن شوفتج ماضيه ههههههاي"

▪︎ياسر

جدي مشتاق الي وطالب يشوفني غصبا على اولاد ابنه رسل الي خبر اروح اله بالمشخاب واجيب وياي شهد ..
خابرت مرتضى واتفهم دزها الي الصبح ..
و خليل من سمع الخبر هليام دومه يمي بعد شغلة يجي يمي، كال افاتحه بموضوعي فد مرة ابوي صارلة اشهر من توفاه الأجل اريد احجز البنية بخطبة و بعد السنة الا ازوجها
العصر رحنا وية خليل للمشخاب

وصلنا ودخلنا لغرفة جدي مريض بفراشة نايم
سلمنا عليه ومن شافنا عدل من نومته انتچى على المخده و كعدت يم راسة
- ها جدي شكلك هرمت وشخت من وكت

- انه خنجر صلبِ لا يگلك ولا ينعوج

شهد
- اشتقينا الك

- اشلونج شهد اشلونه ابن المومن وياج

-الحمدللة جدو

- لا تخافون عليه اني نومتي أستبراد و يروح لحاله
بس ردت ارجع ادخلكم للبيت غصبا على اكبر راس والي ما عاجبة اطردة من بيتي

ربتت على متنه ممتن

جدي
-وانت خليل اشوكت تاخذ رسلان

-يهووو هم هذا الموضوع

-بت عمك

-جدي رحمة لروح ابوي انه مات زعلان علية بسبب هذا الموضوع ما اخذها بعد سوايتها
واني رايد رايدة ثانية

- ادري ابوك هو مريض ومات بس انه لا تموتوني قهر عليكم

-جدي مو جنتو تردوني ازوج هاي اجيت اكلك اني اريد ازوج بس مو منا

- منهو هاي رادتك
تعرفها الها لو على معرفة اهلها

سكت خليل باوع لشهد طالب عون

شهد-احم بت عمي اقصد اخت مرتضى

حل سكوت بعده كال جدي

-بت المومن
بت الشيخ حسن

شهد- اي

-هاي ياسر زوجت اختك من وراية لأبن المؤمن

-جدي اني معلية ولا ترجعنا للي فات
اني معلية بالموضوع هالمرة

شهد- جدو اني الي كلت لخليل عليها خوش بنية

خليل-جدي انه ما علية بغلاط غيري هي غلطت تتحمل على شنو اني اخذها وحده وكحه و كسرت عين اخوتها

يقصد خليل رسلان احنه المقربون نعرف بأخر شي سوته ويه ابن الجيران علاقة كشفوها اخوتها وكسروها ...و جدي حاير بيها يريد يستر عليها ابن الجيران نكر يعرفها وشرد خاف و ما عدنا مقريبن يعني اولاد اعمامها ما مزوجين ويصلحون لعمرها مو صغار غير تلاثة واحد حاجز بنية ويريد يخطب و واحد حالف يكتل نفسه ولا ياخذها والثالث خليل الي ابوه اترجاه ياخذ رسلان ويستر عليها لا اسوي فعل اكبر وتفضحنا وكحه وخليل اتخبل رفض وهذا سبب الزعل الي بين خليل و ابوه الله يرحمه

-جدي انه الابن الجبير لامي واريد ابقى وياها اريد الها مرة لكبرتها
وانت تعرف ولا وحده من بنات عمامي تتوفق وياها بسبب الخلافات الي بين امي ونسوان عمامي
اني سابقا وخطبت منا وشفت انت الي صار .

- وهاي منو يستر عليها و يصونها مو راح تنزل عگلنا ياما نسوان سونها وكحه و ينخاف منها بطلتها من كليتها
وما نفع
اخذها و شيل حمل عمك وصون عرضة
هي وكحة بس تتروض وتكبر وتعگل

-لا يجدي خلي غيري عمي نفسة أذى امي هو ومرته انوب اجيب بته لامي
امي تمرمرت واريد اريحها وارتاح اني هم بوحده تصوني وامن على عرضي وياها مو اظل متخوف من رعونتها

سكت جدي ما جادل مجرد الفكرة خليل يزوج خلته لين وياه لان خليل كبر وما صدكنا فكر بالزواج ماعدنا واحد يوصل لعمره ٣٤ سنة عمرة وما يزوج لهسة خوالي ١٨ و ١٧ يزوجون

-ها جدي تخطبلي بت المومن

ما رد جدي

خليل
- صدكني ما اخليك تخطي بيتهم اذا ما اضمن الموافقه من ابوها
وها عمامي كلش كافي اذا ما اتريد اتروح همه هم كبار وشيوخ اولاد شيوخ

تنهد جدي
-الله كريم ...

كام خليل حب (باس) راسة

جدي- بس مو هسة ابوك بعده ترابة ما ناشف

-لا جدي بعد شهر اخطبها بس احجزها الي على الاقل

- اني ما اعتب بيتهم عمامك الي يرحون
وكبار من عشريتنا اخذ وياك
وما اتروح الا متأكد منهم ينطوك

-خوش جدي

طلعو شهد وخليل من غرفة جدي اني رحت حبيت راسة ممتن ما اخذ نظرة على البنية بسبب السالفة الي طلعنها عليها بت عمها و رسلان وكبر بعيني من وافق وحسيت موت اولادة بنفس السنة غير من اهواي

- جدي حيل فرحت ما جبت طاري الكلام الي طلع على البنية وانت تعرف ماعدهم بنية غيرها

- اني اثق بيك وبتربيتك والكلام طلع عنك وعنها ومن بت ابليس يجدي ما اقذف بت مصونة ولا هاي شيمي

انه بس ابوها ذلني و انه جبير عشيرتي هاي حزت بنفسي من انطيته منه وهو ردنا ما خلى حساب لا لأبنه و لا الك ....

- هم حگک
الي صار غباء مني انه الي عرضتك لهيج موقف .
اعذرني يجدي

-وهذا خليل خاف ارفض و يبطل يزوج جبير الي بكده بزر بزرهم بطولهم
خل ياخذ وحده تلمة

دخلت عليه ام احمد مرت خالي الي ضربت ابنها سابقاً

-انت واختك شدخلكم بيتنا
كوم اطلع برة
خزرتها كارها ، صاح بيها جدي

-روحي احتاري ببتج وربيها واطلعي برة غرفتي لا اطردج برة بيتي متحملج بالكوة ترة

-عمي هذا ضرب ابني اشعنده داس عتبة بيتنا

-بيتي وهذا ابن بتي الوحيده ولي برة لا تلغين لغوة زايده

دخل خليل
-شكو عمة روحي بلا هالفضايح

جدي
- روحي لبتج روحي

ام احمد

-هاي بس تعيرون بيه اني شعليه هي بتكم ما ربيتوها

كح جدي وتعب

ياسر-اطلعي برة خالة كافي قهر لجدي .

دخلت جدتي وياها شهد واصيح على ام احمد

جدتي
-اشبيج فلفلتي ام احميد لان خليل رايد بت المومن وما قبل ببتج سويتي لغوة على ابن بتي واصياح جا ما ربيتي اولادج واحد يشرب و حشاش والثانية ... ما كملت الكلمة بس كالت
-اااخ جبتو الي السكر الله يهد حيلج على هاي الخلفة الطايح حظها ...

ام احمد- ها بت المومن نفسها هاي الي جانت تحجي ويه ياسر
هاي الي كشفتها رسلان عدها علاقة ويه الشفية
أشرت عليه
-يعرف اخت مرته على مرته وابوها كشفهن وطلك بته

بصياح كلامها و بيبي اضرب على ايدها اتريدها تسكت وهي تعلي . انه حاير بجدي نوبة الكحه ما هدأت و بيبي شالت عوجيتها (عكازها) و ضربت بيه ام احمد واجت رسلان ادافع عن امها

خليل
-كافي عاد هاي شنو

وانت روحي حطي شي على راسج

قاصد رسلان

- عوفو امي

تبجي وتحجي ام احمد
-خليل ابشرك هاي الي اتريد تاخذها ياسر ****** ( كالت كلمة معيبة) بمعنى عنده علاقة كبيرة بزينب

رسلان- بس لا هاي زينب الي يريد ياخذها
تحجون عليه وشوفو الله اشلون بلاكم
عدها علاقة وية ياسر صديقك و جانت تحجي وياه لنصاص الليالي وخطيبها ابن عمها تعرف شنو ابن عمها كشفها وطلك

اني بهتت مصدوم منهن عايف جدي و واكف على صفحة

خليل شال رجلة وضرب رسلان بيها(جلاق) ضربة قوية وكعها على الارض و ضربها مرة ثانية برجلة ..
وامها اصيح اني جريت شهد

-يلا امشي نطلع منا عفت خليل يضرب ببت عمه منهار على كلامهن وطالع من بيتهم ومن وصاخه البشر الي بيه

-عزة ياسر خليل راح يكتل رسلان
الكلبة

-بت عمة ومحد يكدر يحاجيه خلي يسوي الي ما سويته انه غريب عنها
هي وامها حرق جدي اذا خلاها ببيته فلا ادخلة ..

شهد-خل انروح لا يجي عادل ويتعارك وياك

- شحده جدي كايل الهم بجيتي وطالعين من البيت بوكت دخلتي

صعدنا السيارة و رحنا بعدنا ما طالعين عن حلال جدي اتصل خليل

-ها خليل

-وين عفتني اني ما جاي بسيارتي تعال اخذني مو جاي وياك اني اشلون تعوفني
يصيح واسمع ، اصوات نسائية وياه اصيح وادعي عليه

شهد
- بس لا يصدك كلامهن

-لا مستحيل ..

رجعنا اخذناه كعد بس يلهث وعركان وجه يضخ عرك و دمه يغلي

كعد وراية لان شهد يمي

خليل
- ساقطة

فتح شعره وفتح اول ازرار قميصة وظل يحجي و يغلط وحده

بنص الطريق صاح
-شنو هذا الحجي وهنه يمتى عدهن معرفة بزينب حتى هيج يطلعن عنها كلام بكل صلافة وانت اشلون تسكت عنه هااا

احجي

- بعدين اسولف الك خل نوصل بالسلامة
ظل يحلف ويتوعد بيهن

وصلنا و اخذته بالاستقبال وسولفت اله
عن تأويلاتهن القديمة عني و موقف اهل البنية ومدى تأثيرة على حياتها

-خليل اتريدني احلف الك اخذني لكربلاء واحلف الك بضريح ابو فاضل انه لا مباوع لوجها بشين والبنية شريفة
واصلا السالفة مثل ما كلت الك ما اثرت على زواجي جذابات واستمر لكن بسبب رقية و عدم قدرتها على مسؤولية الزواج
من اختنك علي خلت ابوها ياخذها

- انت صدك تحجي ولك ما تكول الي هااا ليش اني ما اعرف صايرة كعده زلم وحك و محكوك

واحنه ما ندري

- اي شنو اتريد انشرها بين اقاربنا احنه هاي الكلبة رسلان بالكتل والتهديد سكتناها وهسة رجعت ما فاد بيها

- ااااخ يعني مريضة بالقلب زينب !

- لا ما ادري شنو هسة صحتها بس سمعت بوقتها صارت عدها ازمة صحية نسيت ذبحة مدري نوبة

-شهد ليش ضمت

- خليل هذا الشي حساس مو نمشي ونحجي بيه
اني يمك وتعرفني اذا اني ابن حرام واسويها لو لا التهمة الي لفقنها وياي
مو ويه شاب غيري حتى تشك

-لا ما شاك هي المو خوش وجدي تورط بيها هالكلبة(رسلان)
اتوقع منها كلشي
قابل ما اعرفها اني الابنية اشرف من الشرف نفسة
بس شوف الذنب الي راح يشيلنا بنات ابليس الي طعننها بشرفها و مرضنها واني اكول ليش تتحججت و بالكوة الا وافقت عليه

- خليل جنت واثق منك رجال وراح تعوضها
حتى سعيت الك اهواي تاخذها
قاصد سؤال عن الناس الي خطبوها و اصراري يطلع بيهم عيب حتى يبتعدون عنها .كله لاجل احساسي بالذنب أتجاها ،بسبب بنات خالي هي حياتها ادمرت
شفتك تعويض الها وارتاحيت هسة حيل من عرف كلشي و ما زلت متمسك بيها ...

بعد السكوت كال

-بس اني خايف
لا عدها قلب
اني اريد اصير أب

-شهد شهد
صحت لشهد تاخرت الا اجت
وهي تعدل بشالها

-ها ياسر
-تعالي اكعدي يمي بس سدي الباب

اجت يمي

- زينب شنو وضعها الصحي

-تمام الحمدلله

خليل-هي عدها قلب؟

-لا يابة شنو قلبها لا ضعيف ولا شي بس بفترة قبل سنتين تعارضت بسبب ال احم يعني

كلت
-سولفت اله شهد يدري

-ها يدري
احم اي بسبب الي صار
بس ترة هي تحسس يعني اذا ردت تسحب نفسك حباب مراح اكول الها هذا السبب ادمرها ....

-لا ما يعوفها بس حگة يعرف وضعها الصحي زواج هذا مو لعبة اذا اكو شي كولي

-لا والله ما بيها شي حالياً عال العال
قابل اخدع خليل

طلعت شهد وهو
طلع باكيت جكايرة وهو يزيل كذلته عن وجهه بدأ يدخن بقهر
خليل
-بس هذا الطنطل اشلون يثبت الحجي على بت عمه ويعوفها

- ما اعرف المفروض يعرفها هي شنو و يكتل الكلام بزواجه منها
مو يروح ياخذ الي شيعت الكلام عنها ما اشوفة ناقص مثل احمد ؟.

- كلب من الله جنت اكرهه مو من فراغ جيران الشوم مو زلم نسوان همه وابن عمهم كرار

- ناس تعبانه اشلون عمهم شيخ وخلوق هيج

-لا بيت المومن غير عنهم من زمان اني اعرفة من اجر فترة يمنا وجاورنا ..
من جانت زينب طفلة!

-تذكرها وهي طفلة !

سكت و كعد يدخن اعرفة من هيج ينگلب وجه يعني بقمة غضبة وضوجته

وضح عليه تأثير الكلام الي كالنه عنها مرت خالي وبتها

▪︎شهد

اليوم ابات اهنا ببيت ياسر ..

شفت خليل وتغير حاله و زوال بهجتة بموافقة جدي بسبب
كلامهن البذيئ الي يسم البدن

طبعا ياسر ما مسولف اله عن محادثاتها واني اتوقعها عبط منها و عادي عندي غلطة وراحت مو قصدها شي البنية ومع هذا ما كال اله

رحت اله
سألته عن ياسر كال ما ادري وينه

-يمكن بغرفته اكولك خليل اشوفك ضايج

كعدت مقابلته على القنفة.

عدل من كعدته والجكارة ما وكعت من ايده ..

- ترة زينب والله ماعد.....

-اش انت الثانية ما مصدك شي
بس مو بيدي اسمع عنها هيج كلام

طفى الجكارة

-ضايج من نفسي اجيت اكتل بت عمي
اليوم و ضايج من الموقف كله

-و زينب ؟
ما تأثرت بشي اتجاها

سكت ..

- زينب بدت تحبك و ترة تنتظرك

باوعلي بحزن استرسلت كلامي
مشجعة
-هي صريحة و ما تعرف الجذب صريحة وحادة اتكول لك الي يزعجها بيك بدون اي مراوغة وجذب هي انسانة عفوية و بسيطة گلبها طيب و حنون ومرات تدوس بالبطن صحيح بس
ٱذا اتعودت على عصبيتها راح اصير خبالاتها مضحكة بالنسبة الك
تكسر الروتين بعلاقتها وياك مو مملة ابد و لا نكدية سريعة الروقان بكلمة حلوة و نظرة منك ترضيها
اني اتعمقت وياها بعلاقتي حنونة بشكل مو طبيعي وطبيعية كلش مو مصطنعة ابد اريحي

ابتسمت وكلت اله

-هديتك معطرة و بكنتورها ما تلبس على كد ما تثمنها وتعز صاحبها ..

تركته يفكر وياخذ قرار و ببالي منتظرة قرار منه ...

الصبح لكيت ياسمين محضرة ريوك الهم اخذته بصينية و رحت للاستقبال لكيته لابس ويريد يطلع لشغلة

- اتريك

صحت لياسر اجه يمة ..

قبل لا يطلع بالحديقة صاحلي خليل .

-ها صحتلي

-تعالي

وكفت يمة

-شهد لا تكولين الها عرفت شي ..!
وبلغيها جدي وافق بس يمر اشوية وكت خل تمر اربع اشهر على الاقل على وفاة ابوية واتقدم الها بس هي خل تكول لامها وانت لمحي لمرتضى

بس بالاول شوفيها موافقة راح اصير صدك ترة لا تفشلني ...

يتبع