رواية شيخ الشباب(بنت المؤمن) الفصل الرابع والعشرون 24 - بقلم زهراء العراقيه

السلام عليكم ورحمة الله وبركاته

ردد معي
لَبَّيْكَ اللَّهُمَّ لَبَّيْكَ، لَبَّيْكَ لاَ شَرِيكَ لَكَ لَبَّيْكَ، إِنَّ الْحَمْدَ، وَالنِّعْمَةَ، لَكَ وَالْمُلْكَ، لاَ شَرِيكَ لَكَ ٠٠
كل عام وانتم بالف خير ينعاد عليكم بالصحة والعافية والستر ...
عيد مبارك
رغم مشاغل  اليوم وتحضيراتي للعيد ورغم تعبي ونعاسي لكن ما انطاني قلبي انام ...
كتبت كلمات البارت ان شاء الله تنال رضاكم واحب ابلغكم اني بالعيد راح اسافر خارج المحافظة  .. انتم هم اتمنى الكم اوقات طيبة بالعيد استغنوا عن الواتباد واحتفلو بالواقع مع الاولاد  والاسرة ونلتقي بعد العيد الا يرجع النشر ❤
زهرتكم
ماكو اليوم مظفر تعبانه حيل مبيه ادور مقتبس ملائم ارتاحن سارة ونورة ..

•زينب
اباوع للسماء الصافية .... بس الغيوم البيض تشع منها و خيوط الشمس بدت تلمس بشرتي واجففها بقساوتها ...
احتر جسمي يواسي بحرارته الگلب النص حي ، هذا التاريخ المفروض احنه نزوج بيه بعد دورة سنة اخوه اني مرته
ذبلت زهرة شبابي واني انتظرة.....
خطب زهراء لمس كفها !؟
دلل خدها ببوسة خجلانة لو بعد؟، غنى الها الحب وصورة  اله بصورة تضحية مثل  الي اني قدمتها اله
نزلت من السطح..سمعت صوت علي يبجي

دخلت شفترقية تبجي

- وين عفتيني وين دتعالي تعالي شوفيه ما اعرف اسكته ما اعرف ما اعرف اشبيه يبجي
اخذته منها
-رضعتيه؟

-هو من خلص ظل يبجي

حطيت راسه على كتفي اول ما ربتت على ظهرة..حسيت بحرارة على ظهري ذب من حلكه الزايد وارتاح وهو يتريع ...

-ماما كم مرة كالت الج حطيه هيج بعد الرضاعة

-خفت خفت يدمر ملابسه

-الملابس تتبدل المهم يرتاح

هزيته بحضني ببال شار بالهموم ونام
ورقية مطروحه على بطنها ورافعه عنگها (عنقها)بأديها الي ساندتهم على الفراش
وكفوفها جوة وجها وتباوع لعلي وتتأملة
،

العصر دخل بابا لغرفتنا
كعد يم رقية الي كاعده تناغي لابنها 
واني اقرأ كتاب

ابو علي
- رقية اتعرفين شنو الطلاك

- ماما ماما كالت ابوج ابوج يطلكج
يعني يعني ما ما يصير ياسر  زوجي

- ياسر اليوم طلكج !

ظلت صافنه على وجهة

ودنكت تباوع لابنها

اني نغزني گلبي واني اباوع لهل ولد
اختنكت حيل

ابتسمت رقية
-اريد يمك يمك
يعني بعد بعد ما ارجع ما ارجع

فتحت عيوني على وسعها كارهه الي اتكوله ومستنكرة كل كلمة منها

ابو علي- يعني ما ضايجه مني لان طلكتج

- انت انت كلت كلت الي البارحة
وحدج تتأذين
اني اني يمهم اتعب اتعب محد محد يفهم عليه
و و ياسر يضربني اذا اذا يصير عصبي
اخاف اخاف وحدي اريد يمك بابا يمك انت انت اساعدني من اذي علي بالرضاعة !
وزينب وزينب تداريه  وتعرفله هي هي وماما ،كوثر كوثر اتصيح عليه

كلام  مبهذل ماله معنى ولا مبرر من عقل محدود ما اعرف ليش حرك الي گلبي وهي مرتاحة كأن ياسر اداة استخدمتها وخلص وكتها  وين الحب!
حتى البركة تدور مصلحتها بالفطرة
همة يسولفون واني نظري حاد عليها وهي ما منتبهة فرحانه بعلي و بأديه الي يحركهن ...
و والدي استمر يقنع بيها وهي اساسا ما محتاجة مواساة ولا فاهمة شي  اهم شي عدها تظل يمي او يمنا

الرجال تبهذل وهو يريد ياخذهم وهي ما تدري بناره
وابنه عمرة اربع اشهر
بعيد عنه اعيونه متعلقة بأبوية اكثر منه اذا شالة يستغرب منه !
جاب ناس يابو ناس  جاب عمامة   واخرها شيوخ و جدة واعتقد كبيرة حيل جيته النا وابوية ردة ، وراها بيومين طلك ياسر بعد ما جان معند لان بابا قطع اخر ود بين الطرفين ..

،

اخاف احجي واكول تعبانه امي من غير شي تكعد  من النوم سكرها بال٤٠٠
صاعد  ، رجعت الامور تمام بينها وبين والدي رجع ينام بغرفتة كان موضوع رقية قالقة هسة احسة مرتاح من شاف ردة فعلها ...لكن اني تعبانه والذبحة بصدري تسعر والتعب هد حيلي بيت كبير وطفل و ام مريضة اكل خاص وعلية مع الضغوط النفسية عماد وخطبته طلاق ياسر  اذا نسيت الطفل الي بحضني يذكرني باالي سويته بكل غباء اخ بس لو يرجع الزمن لا والله ولا اخليه يتم هذا الزواج ولا احرم اب من ابنه
ما كدرت اخفي غضبي اريد مبرر منها

وسألتها  بعد يومين من سماع خبر طلاقها...
العصرية كانت بالمطبخ تاكل حلويات لأجل الحليب ، علي نحس ردت افطمه عن صدرها ما يرضع ممة ولا يخذها اهواي حاولت وفشلت لأن دوم بالليل اتعذب تغفي و اكعد بيها ونومها ثكيل

- زينب زينب ماي ماي

انطيتها

- رقية

- ها ها
- شو ما اشوفج تشتاقين لياسر

-حرام حرام بابا بابا كال انجيب انجيب طاريه مو مو زوجي

-  رقية مو جنتي تحبيه ومتعلقة بيه مثل بابا

- بابا بابا مو مثله.....ياسر ياسر مو مو مثل بابا
اني اني اريد يم بابا اذا اذا خنكت علاوي يساعده واذا واذا ضوجته ما ما يضربني  وبابا وبابا كال من اموت الا الا اترجعين لياسر اني اني ما اريد بابا يموت

هيج اذن بابا مسوي الها غسيل مخ وهي اشلون تتأثر بيه من اشوكت بابا يستخدم هيج اسلوب ! اتعجبت واستغربت ما يكرها هيج بشي ولا يستخدم التحايل قبل ....يمكن حقة يستخدم كل الوسائل للحماية مدام حس بخطر اتجاها ...

-ليش ليش ليش صفنتي صفنتي ...

اني كنت كاعده على الارض بصفها وهي كدامها صحن الحلويات وكلاص الماي ما تحب على الكرسي تكعد

- ما بيه

- بعدج بعدج ضايجه ضايجه لان عافج عافج  عماد

انهز كياني هزة قوية ما حست عليه رقية الي تاكل فستق من البقلاوة ما تدري شسوت بيه كلمتها
عافج عماد!
عافني عماد حقيقة بس اذا واجهتها تكسر العمود كسر يحني الظهر ....

انتأكت براسي على الحايط ميلته

-لا لا اضوجين لا اضوجين راح راح تاخذين واحد واحد احسن منه منه منه
بهواي بهواي

- باين  كلش العرسان تتهافت

- تتزوجين احسن احسن منه منه

-شمدريج ولج

بكل ثقة كالت
-بابا كال  الله يعوضها احسن منه

-اها واترفعين بحاجبج بكل ثقة

اجه مرتضى وكمنا نسلم على بيبي الي راح واجه يجيبها ...

شفت امي اسلم عليها وكعدتها على القنفة

بيبي-  همزين عمية ما اشوف وجهج المكلوب نسرين

امي- عمة فرحت بشوفتج ليش وجهي ينكلب

- الله يعلم بالگلوب ...

بيبي ام بابا ، كفيفة  مشيلة و بعكازة خشب ...
كاعده

اتقربت عليها اسلم وانحنيت

- اشلونج بيبي

- زنيبة انت 
ضربتني بعكازتها وسلمت عليها
وجاوبت
-اي بيبي

- عرفتج عبنج ما اتحبين چفي(اتبوسين كفي) مثل رگية

اجتها رقية باست ايدها و كعدت يمها ...

اخذت ايدها بستها

ضربتني على ضهري

-اي

-وجع جنتي اداهريني اتكولين ما اخلي  احفادي يحبون ايدي ولا اريد احب ايد احد
صايرة مطيعة ؟

بيبي ما يعجبها شي ابد

لسانها عكس گلبها گلب واسع محب

حضنها  مثل خبزة اهلنا العرب ينشم قبل لا تحط راسك عليه ...

بعد العشا...بحضينها والا تفلي راسي ! وهي وما اشوف ، اني مطية راسي ومغمضة اجتني رغبة ارجع طفلة

- بسج اتحسرين بنفسج يا بعد حبوبتج
هذا هو مو ابن ابني هو بس والله طردته من بيتي وما رايده سلامه من اموت  الا يوكف على جنازتي ...طول ما انه عايشة ما اريدنه للباع بت عمة و عرضة هو زهيرة تربية طايحة حضها

دموعي تتسابق ....

- تاخذين الاحسن منه

- بيبي حاجي بابا حبابة التسجيل بدأ
بيبي اريد ارجع ادرس
ما اريد رجل
- جبح  شسوين بالقراية

- وشسوي بالرجل ؟

- يكفخ بيج غير

- عايزة تكفخ اني

- ثول جا المن صايرة مرة غير تنجلين وتكبرين لخيالج
انه اكلج يجيج الاحسن منه انت حايرة بالمدرسة
بعدج طفلة

- بيبي يا مدرسة اريد كلية وما اريد خيال  ابن ابنج كرهني بالفرسان كلهم
بنص الطريق ويوكع من الفرسة

-جا هذا الفاشل لحك ما لحك
قبل لا يلزم اللجام هدا (تركه)

- بيبي بعد كل الي صار ذكراه تأذيني

- تنسيه بس يجي غيره

- بيبي انت ما اتحبيه

- اااه جنت احبن ايمن الله يرحمه

-الله يرحمة

- عماد  جنت اخاف عليه امه الحية مسيطرة عليه ، وجان يضوجني لان هيجي ماله كلمة ....
صدكي من خطبج كلت خسارة هاي النسرة الوكحه تاخذ اهواي عليه هذا

- بيبي اني وكحة

-عبالي بيج حظ طلعتي ثولة مثل امج رچيچة (ركيكة من الركة ، ركيك)

صيرة مفتحة للدنيا اضربج كوميلها واتعاركي ويا الهوى......
بدال ما توصين بيه اذكر ابيج(ابوكِ) روحي انت اله و ذكريه اطلبي منه مثل قبل

-مراح يسمعني مثل قبل

- غبية مثل اميمتج
ابوجن يحبجن جرجرني من بيبتي حتى اشوفنج  ويخاف عليج من النسمة
يوافق مو مثل گبل

شلت راسي اباوع الها
-صدك

- اي عبنه گلبه ياكله عليج يشوفج ذبلانه
وهاي المدرسة يريد يقدملج بيها بس يريدج زينه

ابتسمت

- وينج ام عطوب

رجعت راسي بحضنها
-جا ما تكوين شعرج ما عدكم اوتي(مكوى) جنه جلافة وصخه

- شنو مكوى

- جا حطيله طين خاوة سرحيه ام رولات

نمت بيومها مرتاحة جزئيا مو كليا  عاد اكو جديد راح يصير بحياتي بطيئة التقدم ....

•ياسر

طلكت وانتهينا واتركت يمها ناتج ذكرياتنا
علي شبيه شهد محد كسر ظهري غيره يكبر جوة سكف غير بيتي ..
راد من الشغل وصادفني احمد بسيارته فتح بابه ونزل الي فتحت اله الجامة

- مساك الله بالخير
رديت اعليه و طلب مني احضر وحده من سهراتهم

- لا ما فارغ

- يا ما فارغ انت احسن واحد بينا حر طليق  شعندك وحدك
لا فرخ يبجي ولا مرة تتشكى

- تأخرت ...في امان الله

ما عايز تكاثف علاقات انة
،

صبت شهد العشا وكعدت كدامي
انه وياها والجهال
-جا امهم وين

-تكول راسي يوجعني. 

- ها خير انشاء الله

- باركلي تخرجت

-طلعت النتيجة مبروك

- ممم شنو هديتي

- خير عودك تردين مني هدية انه اريدن من يهاديني ...

- صاير حيل نفسية
رن تليفونها

-شنهو هذا التليفون ؟

- هذا هديتي اليوم حصلته و وصلني من مرتضى

حطيت راس الفجل بعصبية
- اشوكت شافج اليوم

-اشبيك ياسر اني كلت الك من البارحه اليوم يجي مرتضى ياخذني ..

- نسيت
خو ما انتي طالبة منه

- لاء ياسر ما طالبة منه شي وما اطلب غير منك هو الي بالصدفة عارف ضايجة من جهازي وضامها الي من انجح هداني

-واشبيج طفرتي بيه

وجه انكلب و ضاجت ما كملت اكلها

..

رحت ليها للمطبخ تغسل اماعين
انتجيت (أنتكات)على الكاونتر
- شتردين هدية

وكفت الماي والتفتت

- ياسر
هو
توء
ياربي
اريد أعرف منك شي

- اشبيج يبت  ابوي حايرة

-طلاكك من رقية مراح يأثر
يعني
اقصد
يعني عادي يتم ال اووف اقصد

- رجال معدل مرتضى
ما يتخير عني

ابتسمت

-شنهو رايده ما ظنتي محتاجة شي
مرتضى مكفي و موفي وانه انعلست علس

شهكت واتقربت مني تلعب بلحيتي بللتها و بصوت طفولي
- اني مالي غنى عنك
مرتضى يتعوض بس انت لو الف الدنيا على كعوب اقدامي مراح الكه غيرك

لعبت بشعرها هوسته وطلعت لجدي من العصر كال الي اروح اله ورة العشا .

،،

- شنهو جدي ليش هيج اخرب  على اختي

- كلت الك ما اروح لأبوها النتائج اذا سلبية ترد عليك ما سمعت مني ...

-جدي امانة الله لا تدخل شهد البنية كم شهر وتروح ببيت رجلها خليني امن عليها تعبت

- ما يصير ننطيهم افهم هاي العادات الي جرت نصغر بين الوادم من انرد جدك معناها انطرد ما مرغوب بيه مااله اعتبار جدك عدهم والمجان الي انطردت منه  ما انطيه يا ياسر

- جدي  رحمة لموتاك لا تدخل الامور
موضوعي ابعادة مختفلة مو لان بيه شي اخذو المرة مني ...

-بس انت رايدها وطلكتها عديم حيلة
وانه مو هذا موضوعي هيج جرت العادة وبعدنا على البر هالعقد ينفسخ
مالهم عدنا مرة

-جدي انه ما راضي

-وانت منو حتى تكسر كلامي

- انه ياسر ال** اعذرني لا انت عمها ولا ابوها انه اخوها واريد انطيها

- وانه الي ربيتها من طلعت من بطن امها ليومك هذا .. 
انه الي متكفلك مع الاسف عليك والله بعد كل الي سويته الك واعتبرتك ولد من صلبي .... هيج يطلع منك هالكلام

-اعتذر جدي و هذا متنك احبة
(ابوسة)
-  جدك بكفة و زواج هالرجال من اختك بكفة

ظليت محتار و النار تسعر بيه وانه اتخيل دموع شهد

- جدي انه ...

- بسك
هذا زواج الكصة بكصة
اختك ما الها دخلة لبيتهم
اتريد الناس تحجي عنه
الناس الي اخذتهم وتعنو الك يم الشيخ

ظليت امسح بكصتي واتلفت للباب اباوع للفراغ وبالي مليان مليان صيحة مخنوكة ...
حاصرني جدي ،

خابر انه ما طخت عندي يخابر الشيخ ابو رقية الا من ذكر اسمه .. وذكر موضوع مرتضى ...
وضرب مثل ! و كال كلمة ! ودخل بالموضوع وصرح بنهي الخطبة ..

•مرتضى
بعد ما حولته رام خايف عليها اجاني الشوك اشوفها مرة عشرين لا اعتقد دخلت بالعشرة الثالثة لشوفة فيديو حفلة بغرفتها بثوب اصفر مغرور وهو على جسمها كاعد ظاهرة جمالة  بقوامها الرشيق وتمايلها وية الاغنية
اخر شي عيبت عليه
اخر شي تختم التصوير بغمزة واطفي الكاميرا

رسلته وبسرعة نقلته لرام و احتفظت بيه بوسط صندوك متعلقاتي الثمينة ..

واني اعيد وازيد بيه و صارت مخيالاتي تتمناها يمي اتصل والدي

رديت كال انزلي بوية

نزلت اشوفة شنو يريد

صدمني لا اعتقد ذبل روحي من سولف الي  مخابرة جدها

-هو ماله حكم عليها ياسر موجود

-ما دام جدها خابرني يعني متفقين

-بس بس

سكتت ما كادر انطق هي لحد قبل اشوية كالت ياسر كايل الها ما راح يأثر بشي طلاك رقية ....

- باجر اروح لياسر واتفاهم وياه
كلت جملتي وصعدت لغرفتي

خابرتها
- شهد دريتي

اجاني صوت بكيها

- فدوة كولي شسوي

- لا تبجين شهودة حبيبي اسمعي ..

بس صوت بكاء يقطع الانفاس و يأذي روحي ..

-جاي تأذيني بدموعج شهد

- شهد اسمعي ، مراح اعوفج لو تكطعت انفاسي
اخذيها مني كلمة ...
غير العراق يسكت

سكتت بصوت نشغات يوصل

- مراح يحتلك غيري عراقي

- عفية احجي ويه ياسر يقنع جدي
مرتضى حلها ..

-احلها يروحي احلها
غسلي وجهج واشربي ماي
وتعالي .

سديت الخط اني ردت مساندة لكيتها هي الثانية مدمرة مثلي ...

شجيب الصبح واروح لاخوها ...

،

رحت اله  من الصبح للبيت الحك عليه قبل لا يطلع ...

دخل علية بصينة ريوك

-اخي اني ما جاي اكل.....اريد اعرف
شنو داعي مخابرة جدك لابويا.....قابل احنه تشراطنا من اخذت منا واخذت منكم......المرة مرتي وماكو مشاكل توقف زواجنا ...

اخذ نفسة  بصوت مسموع
وظل ساكت
- اكلك لگمة

حلف الا اتريك وياه ...

...

غسلت ورجعت كعدت انتظرة ..

كعد يمي .
- شوف مرتضى انت عيني خوش رجال و مرتك هي
بس جدي طلع من بيتك ايده فارغة
وهاي جبيرة عدهم......وانه الي انحطيت هسة بينكم ...

- والصح برأيك شنو

-انه راح أسالك سؤال والي يملي اعليه ضميرك كولة

- انه جدي هو ابوي الموش والد
اذا بيوم خيرت بين ابوك و مرتك شتختار ...
غضبه لو غضب المرة ؟

سكتت تدفقت انفاسي ما كدرت اسحبها خنكني من غير حبل بكلامه الصريح ..

-ما تكدر تقنع جدك

-حاولت وداعتك
وهسة هم راح احاول
بس انه ما شاري غضبه هذا ابوي
الي رباني وحماني انه بلاياه صفر هسة
هو الي ربى البنية

طلعت من بيتهم ...

ايام وهدوء والقلق  والترقب مميت ، اثنينا عايشين على كلمة من ياسر ...

الساعة بعد  نص الليل

خابرتني شهد جنت  افكر بيها عبالي  نايمة ...

- الحك عليه مرتضى ياسر باجر يريد يخابرك تجي تطلك الحك عليه ياسر اتخلى عنا 
الحكني حتى عمامي ضدي  ...

سولفي الي شصار

هي من العصر مختفية وهسة عرفت من العصر ياسر كايل راح ننهي كلشي .
ومخابرة عمامها وطلعو عدهم علم وموافقين ....

..

انطونا خبر ثاني لازم اروح انهي العقد ..

ما رحت وابوية ادية مربطة ...

اخذ كبير عائلتنا و ابو مصطفى وسادة ..
و رجعوا من غير قبول همه يكولون لأبوية خل ابنك يطلك ...

والدي ظل محتار ما بين رغبتي وما بين رفضهم وحطو طلاك رقية من ياسر بنفس الكفة ...

بعد ايام و الضغط  مستمر اروح اطلك واني معاند ودزيت الهم كلمة بلسان خليل ما اطلك واريد البنية ...

مر شهر و ظال الموضوع شاغل المحيط الي يكلك ريح راسك وطلك والي يكولك مالهم حق ..والي الى .....الخ
وصلو الموضوع حتى لأصدقائي دازين ناس الهم حتى  يحجون وياي اطلك

شهد كل مخابرتنا بجي وخوف واني لازم عليه انطيها امان نفسي ما عايشة

كنت بمكتبي واجاني
موظف

- أستاذ مرتضى اكو بنية تريدك

- شنو؟ منو

-وحده تسأل عليك دخلت لل***

-وحده !!

- دليها بمكتبي .. 

كنت اشرب قهوة و ما اهتميت لحد ما دخلت شهد بجنطة ملابس

ظليت صافن مذهول والموظف يباوع النا

-اتفضل انت ..

طلع واني كمت جريتها .. طلعنا من **
لسيارتي .  دخلتها

-انت جاي اسوين شنو هاي ؟

- لميت الي اكدر عليه من ملابسي واجيتك

-للدوام للدوام كدام الموظفين
شنو هذا التصرف

-لا اصيح عليه ما بيدي شي
اليوم يجبروك تطلك اني سمعتهم

- شنو هاي الجنطة ؟؟ ليش لامة ملابسج

- نزوج مرتضى والي يصير يصير !

-قصدج اخذج غصب عن اهلج وانت طالعة شاردة من اهلج

-ما خلو النا حل ثاني
شكلك ما عجبك

انزل احسن

-انتظري
لزمت ايدها ..

- راح انروح سوة

ابتسمت من بين دموعها

جريت راسها على صدري
وبسته ...

و رحنا لبيتنا  هي مرتي ومحد يجبرني اعوفها !

يتبع

اعرف البارت قصير لكن كتبته بوقت قياسي بجسد منهك تعب ونعساااااااااااااان والله العيون وحدهت تنسد اتحملوني اخر بارتات هاي .....