رواية شيخ الشباب(بنت المؤمن) الفصل الثالث والعشرون 23 - بقلم زهراء العراقيه

مساء المسك
شيخ الشباب
من كتابات زهراء العراقية

تذكر جتوفي بلعب عمرك عليهن
سنة وكفوفك وردتين على رأسي
وبيك أناغي كل فرح عمري لنسيته
يا اللي شوفك يبعث الماي الزلال بعودي وأحيا وأنا ميتة
أبيض عيونك لبن صدري
وسواد عيونك الليل اللي عد مهدك بجيته
يا اوليدي

-مظفر النواب

•ياسر

اخذته مني كوثر حلت گماطة(قماطة)
وظلت تضغط على صدره ...

رقية - الو الو علي علي اختنك اختنك بابا تعالي تعالي

اسمعها تبچي (تبكي)وتخابر واني گاعد على ركبي يم كوثر واباوع اله صرت اشوفنه جثة.....تبخرت حياتي من بين ادية ماتت حياتي واسودت بوجهي

انطت التليفون لشهد الي تبجي

فتحت سبيكر شهد وحطت التليفون يم كوثر الي تضغط على صدرة

شهد- ابوها يريد يعلمج شسوين

ابو علي- شنو هاي الصياح خل افهم
هو يتنفس شوفو نبضه
يمكن الحليب نازل على جهازة التنفسي

كوثر جاوبته وهي تبجي
-ماكو نفس ماكو و من خشمة طالع الحليب
- بس اسكتو واهدو و اسمعي
لا اضغطين لا صدرة لا اضغطين الو اسمعيني

كوثر- شسوي عمي

- اطيه لياسر الطفل
ياسر يمكم
اخذه منها

- اي اخذته

- افتح اصابيعك وحط اثنين جوة فكة
من الجهتين
حطيت ؟

-اي اي شسوي هسة

-اثني رجل و ازحف على الثانية بكعدتك والطفل على ايدك لا تهد فكه
وراسة جوة ركبته حطه بشكل مائل
يلا ابني بلكت نلحكه ..
-حطيته
- افتح رجليه على جوانب ايدك

- فتحت وماكو نفس

- ابني براحة كفك اضرب بين لوحين الكتف بس لا تخلي اصابعك تلوح راسه براحة كفك اضربه كم ضربة
( بين اكتافة يضرب براحه ايده والطفل حاطه على رجلة وعلى بطنة ويضربة بالراحة الكف )
ما اهون اضرب ابني ولا ايدي تنطيني
غمضت و ضربته ...

ابو علي - اربع مرات اضربه لو خمسة لا تكثر

صحت واني رافع راسي عليهن
-اسكتتتتتن واطلعن برة برة
كلي ارجف و الخوف والقلق واليأس كلهن سوة بيه و حولي نسوان تبجي

-ابني اقلبه على ظهرة و هم على ركبتك راسه ينزل
و اضغط بين حلماته بأطراف اصابيعك خمس ضغطات
( انعكست العملية بين حلمات صدر الطفل الضغط حتى يطلع الحليب )
دموعي اختلطت ويه العرك النازل من كصتي(جبيني)
واضغط
اسمع الشيخ حسن يدعي
واني كمت امسح دموعي بكتفي بالضغطة الثالثة
طلع من حلكة سائل ابيض زروگ طلع
(يعني دفعة وحده ذبة )

- طلع عمي طلع الحليب

حسن- رجعه على بطنة واضغط على ظهرة
رجعت و ظل يذب من حلكه السائل اتحول لونه لأصفر الزج

رجعت حطيته على ظهرة واضغط بين حلمات صدرة بضربات مثل ما كال عمي حسن ...
صدرة صعد لفوك حسيت بقفصة الصدري و هو يصعد لفوك ينزل بقوة
جوة رجلي ...

- اتنفس اتنفس
ههههههه اتنفس رحمتك يارب رحمتك

بعدين ازركت شفته حيل وحاص(اتحرك) (حاس يحوس البعض يلفظها صاد واني منهم مو سحكة)
- عمي شسوي شسوي

- مدام بيه نفس اخذه هسة اركض بيه للطوارئ ابسرعه ابني الحك عليه ...

ركضت بيه للسيارة و كوثر تركض ورايه

حطت عباية على راسها واخذته مني و رحت الطريق كله دموعي ما فاركت جفني مغوشة عليه طريق هاي الدنيا الگشرة
كلساع اتلفت اعليه
نفسة ياخذة بالكوة و اكو شي يخرخش من صدرة

بياضة الطري اتحول لطبقة لصفار وزراك
اتحمل يبعد ابوك لا تذبح ابوك ماعون(ماصدق) يشوفك فرحة تضوي رويحته
لا تفرفحني اعليك

الطريق بعده ٥٢ دقيقة صارت عليه يوم كامل ، وكفتني سيطرة ، لطفا بحالي طلعوني ابسرعة

وصلنا خذيته منها وركضت بيه ..
اجاني طبيب الخفر
اخذة مني والي سويته اله عاده هم طلع منه مادة صفرة
ابسرعة حطوه على جهاز تنفس صناعي
واكف اعلى الراس
- اللهم لا أسأل رد القضاء ولكن أسألك اللطف فيه
يا ربي احفظلي اوليدي رده ليه روحي تعلكت بيه
يا موسى الكاظم ما ترد سائل اريده من الله يرجعلي يالحسين اوكفلي احلفك بمحبتك لجدك ...

• شهد
رقية مفرفحة
واصيح مات ابني مات ما بچى (بکی) اخذوه ميت .....

اني خابرت مرت خالي ام يوسف تجينا..وبيبي صار عدها علم اجت وياها
يحاولن يهدأنها ما تسكت مأيسة اتكول مات ابني

دخلت ام احمد و بتها وراها

رسلان- اني كعدت امي من سمعت خالة ام يوسف اتكعد بيبي واتكول ابن ياسر يمكن مات

كلت الها-روحي نامي رسلان
احنه بعدين نوافيكم بالجديد

- اني منايمة كنت سهرانة بيه ارق وهسة فدنوب طار النوم من عيني ...

ام احمد هم ظلت اتريد نعيد الها المقتل وبيبي بدت اسولف الها...
اهنا رقية على صدري كمت احس برطوبة دموعها نزلت على ثوبي

مدري اسكت عيوني لو عيونها ...
رن تليفونها بحضنها حاطتة و خلفية الشاشة صورة علي نايم المتصل اختي زينب مكتوب
فتحت خط
- شوفي اختج تخابرج احجي وياها

ما تحجي بس تبجي فتحت مايك
زينب-رقية حبيبتي
روحي توضي وادعيله انت دعوتج ما يردها ربج روحي
لا تبجين

اهنا بيبي اسولف ويه ام احمد المقتل.

رسلان- يا يعني رقية كتلت الولد
شجاكم اتخلوه بيدها
كتلته

زينب- منو يحجي منو

ام يوسف - اسكتي الله يهديج دسكتي

ام احمد- عزة العزاني اشتسكت كتلت ضناها عبنها مو مال خلفة كله من ام ياسر زوجته هاي الزواجه...اشبيهن بنات خوالة
موتت الولد

رقية ما تسمع لندائي ولا لاختها ..تباوع الهن من غير ما ترمش ودموعها تجري مثل نهر من غير انقطاع ... صعدت لفوك اعيونها وغمضتهن

صحت - رقيييية
بحضني مالها حركة
- رقية اصحي
زينب- شصار شهد اختي اشبيها

-رقيه اصحي

جرتها عني ام احمد وضربت خدها
مالها اي حركة ...

زينب- لج رقية ردي عليه اني بالطريق ويه ابوج جايتج رقية رديه عليه

سديت الخط ..
و رشو عليها ما صحت !
من حرگة گلبي
هزيتها حيل
- اكعدي يا امي تعالي الي
اكعدي رقية ردي عليه
ماكو حركة

انهاريت وخرتني بيبي
- بسج فرفحتي لا گلبج يوكف شهوده ...

رسلان -گلبها يدك كلشي مابيها

ام يوسف - وخري عنها
دفعت رسلان بحرگة ورجعت كالت ام يوسف بأعصاب تلفانه
- حية محد سالم من سمج
انت وامج وكعتن البنية ما كفاكم الي اسوه بيه
كبت رسلان بوجه ام يوسف
ام احمد خلت وطلعت ...
ورسلان مشت وراها وهي تعد واصف منا من طلعت على ام يوسف الي سكتت محتارة برقية ...

من طلعت كالت
- محد سالم منهن ياربي ما تخلصنا شيخلص العمر وياهن

سألتها
-خالة ليش رقية ما تصحى ..
ظلت نايمة مدري مغمى عليها بس تتنفس بقوة اني بالهول حاطه راسها على حضني
شبه طفلة مضيعة ابوها ما اعرف الي بحضني اشبيها ولا خبر عن ياسر والولد ما يرد عليه تايه بالحزن ، كنت بعز نومي اصحى على شي مفجع مخيف طفل ازرك جثة وبچي(بکاء) ، بچي ياسر !
شصار وياك طلعت من البيت مفجوع
گذلتي(غرة) لازگه على الخدي بسبب رطوبة الدموع وبس بيبي يمي
تسبح وتدعي وحاطه ايدها على وجه رقية
جدي اجانه ...
سأل
- اشبيها ام الولد

بيبي كالت
-انخضت وبعد ما صحت . كله من هاي رسلان اريد اچسر عظامها هي وامها وهاي امها رجعت مثل گبل من جوة لجوة اريدك اچسر سلسولهن (تكسر عمودهن الفقري تعبير مجازي بمعنى
تكسر قوتهن الخبيثة )
اتقرب لرقية حط اصابعة على رگبتها

جدي-هسة اتصحى مابيها شي
ياسر ما يرد علينا ما عرفنا شصار بالولد

اندكت الباب
راح جدي اله
و دخل علينا
- اتفضل ابو علي ..

دخلت زينب
ركضت بلا سلام بعدت راس رقية عني ولزمته باثنين اديها

- رقية يكبدي اكعدي ليش ما اتردين عليه ...
بيبي- ما نعرف نايمة لو شنو

اتقدم ابوها كان لابس فقط دشداشه بيضة وأول مرة اشوف شعره فما عرفته بالبداية هذا عمي هم من كثر الغواش الي بعيوني من اثر الدمع ...

حط راسها بحجرة
-كومي بوية شهد جيبي عطر ..

رحت جبته اله واني ارفع بكذلتي عن اعيوني وكعدت يمه
قرب العطر من خشمها
بدأ راسها يتحرك وبعدت راسها عن ايد ابوها المعطرة اختنكت

فتحت ورجعت سدتهن..وطلعت منها دمعة

- رقية فتحي شوفيني اني بابا يا بابا
فتحت و اديها اشبثت بيه

- علاوي علاوي كتلت علاوي

- لا بابا لا ما مات علاوي هسة بالمستشفى وصار بخير

- مات كتلته

طلع تليفونه ..
وخابر

- مرتضى وصلت الهم

زين اشلونه علي

سكت عمي يسمع مرتضى
- هاك مرتضى احجي ويه اختك كول الها ابنها بخير

ظلت تسمع مرتضى..وتبجي

- كول كول والله
اريد اريد اشوفه

سدت الاتصال ورة اشوية رسل لابوه صورة علي اني اتقربت شفتها وية رقية على اجهزة التنفس سودة عليه
ومنزعيه فقط بحفاظة
و خشمة مدري اشبيه صوندات مدري شنو

ابو علي- الحمدلله الي كعد ابوه وشافه
صاير عنده انسداد كلي بالتنفس ما يظل للصبح

جدي- الحمد لله

،،

راد ياخذ بنته عمي ويطلع ،لكن جدي حلف ماله طلعه

خطية بالاستقبال خله بنته ابصفه ونام كأنها طفلة نامت بحضنه
اما زينب ظلت كاعده بالهول وكالت اريد قرأن..ظلت تقرأ واني فرشت يمها و نمت حيل تعبت بعد نص ساعة على الاذان ...جدي وبيبي راحو ....

خابرت مرتضى
كال اني رجعت لبيتنا طلعونا ما يقبلون اكثر من مرافق ..
حتى ياسر وكوثر طلعوهم ظلت بس امي يمة تعتني بيه وياسر بالطريق راح يرجع اختج و يجبب غراض للطفل و يرجع

وية اذان الفجر ...

سمعت صوت سيارة تدخل للكراج ...
دخل علينا ياسر وكوثر تمشي وراه
دخل ياسر
ببجامة سودة و فانيلة ربع ردن مارونية وشعره مشعث وقلة النوم بعيونه حمر و بنعال حمام (مداس)

زينب صعدت عباتها من متنها الى راسها ؛ و وكفت
كوثر - السلام ...

ياسر-انتي زينب ؟

زينب- الحمدلله على سلامة علاوي طمنونا اشلون صار استقر تنفسة

كوثر - عف....

ياسر- نايم ويه الموت عفته واجيت

وضرب جوانبه بكفوفه ..

-ذنب منهو......برگبة منهو ذنبة
باختي.....الي غدرتني بحقد مريض
عاقبتني چيفن (لأن)جنت طفل وعفتها تتعذب !
لو لان ما خليتها تاخذ واحد ما يسوة خر..... بسوك الزلم ؟
لو عبني مو شقيقها؟

كوثر گامت تبجي وكعدت ايدها على حلكها
وزينب تباوع للارض من غير رد

-زين هي عدها الحقد اعليه عاميها
انتي شنهو عذرج ؟
ليش هيجي سويتي بيه !؟
خليتني ما اصدك احد انه عشكت الي چا ......

سكت عض شفته

اني نظري بيهنم يفتر وشفت ابوها واكف يم باب الاستقبال ...

ياسر- ذنب منهو اني اتعلل واعلل اختج وياي ...

ما ساعدتيها ذبحتيني علقتيني بشخص مو الي

مسح مدمعة قبل لا نشوف احنه شي نزل من عينه ...

و زينب غمضت عاصرة اعيونها والدمعة تدعبلت يم حلكها .

جاوب نفسة
-الذنب ذنبي..انه من المغضوب اعليهم ما چان(كان) لازم ما افكر اسوي عائلة
الذنب ذنبي ..
اتمشى محني الراس وعمي اختفى ماهو يم الباب ...

وصعد ببطئ ياسر واني وامشي وراه ..

دخل لغرفته ..
وكعد على السرير ..
اتقربت عليه و كعدت حاطه راسة بحضني .. وامسح على راسه
اشوية و وخر عني راسه
- ما چنت اريد اخلف منها...جبت الها حبوب يوم تاخذ يوم تنسى وانسى وياها
انه الغلط مني جان لازم اصير كلب ابن كلب واخليها من يوم السابع يم اهلها

- لو لو مخليها يمك فترة اشهر ومرجعها حتى لو تنام يمي... لان هي هسة اكثر ضحية تأذت

- جا انه موش ملاك رجال ما شفت الزواج بعمري و..
اجه يحجي شي وسكت

-خليني وحدي شو بالله اطلعي

•زينب
كل لحظة تمر عليه اكول هاي اصعب لحظات حياتي..من سمعت كلام عني
من تركني عماد من خسرت صحتي
واليوم من وكفت هذي الوكفة كدام ياسر ، مكانت لحظة وحدة، لحظات مميتة ببطئ و تفنن شعوري بأحسيس اهواي ندم خجل عار تأنيب ، الشعور بالعار قاتل لصاحبة تعرف نفسك اذيت الشخص الي يعاتبك ما تكدر تدافع او تبرر ، تبرير رخيص ما يسوى حجم المأساة يا مساعدة هذي الي خلتني اشوف ياسر مكسور متألم بسببي ،
وراح بعد ما لبسني العار و الخجل من نفسي ومن الي حولي..
شهد راح وراه ويا ريت ما رجعت
تسألني
- زينب
يعني صدوك سالفة المراسلة
شنو فهميني ..

سمعت صوت بابا

- يا الله ..

سو اله طريق توضا وصلى بينما اني ما كدرت اواجه ربي ولا اتحرك من مكاني كعدت متألمة من صدري ....
صاح الي والدي ..
- كولي لشهد تحضر ملابس رقية وجيبي شي تلبسة راح انروح ..

طلعت للهول ما بيه اصيح الها ولا الي صوت يسترجي يطلع انتظرتها هي تجي وكلت الها ...

صعدت لفوك .
ونزل وراها ياسر دخل للاستقبال ..

وشهد ورقية كعدت و صعدن فوك ونزلن رقية متحضرة ...

رغم جد ياسر محلفة ما يطلع الا بعد ما يسوي الواجب وياه بس قبل ما يطلع الضوة احنه بسيارتنه طالعين .....

رقية نايمة على صدري وراسها ثكيل على انفاسي ..

اه يا رقية ياريت تبعدين راسج عني مكافي ذنبج شايلته على صدري
مكافي حياتج الي خربتها
دفعت الها الثمن حياتي وياها بس الظاهر حياتي رخيصة ما سدت

فتحت الجامة ..اجانه هوى الصبحية هوى السما النيلية..بدا السواد يقل من اللون النيلي للازرك(الازرق) الغامق وطلعت الشمس و تحولت للون السمائي واني الهوى ما زال يجرح ريتي ...
وكف بابا سيارته وصفها . ونزلنا كدام مطعم .. كعدنا على الطاولات النايلون خارج المطعم .. اغلب الي بيه عمال او موظفين ..
ماكو كلام بينا غير بابا يقنع برقية تاكل لفة هو مسويها ... مثل ما يقنع الطفل
وهي تلح انروح يم علي ..

اكلت من وعدها اذا طلعوه اليوم نجيبه يمنا ...

رحنا للبيت

التهيت بالتعزيل والطبخ بواهس مكسور ،و رقية نايمة ..

واخذت الي ركن بغرفتي شريكة احزاني ...
راسي تعب من التفكير بعد مابيه اتحمل وبعد شنو اسوي كل ما أحزن أبتعد ،و كل ما تتأذى نفسي أسكت ، وصل الأمر بيه احس الحزن ورم خبيث تملك من روحي صرت مريضة إلى أسوء حد ، صارت تتسرب الدموع مني كالهيب المحترگ ، قطرات قاتله تنزف وياها اهواي من الأوجاع ، تملك مني الصمت تملك كامل ، صارت حتى الفرحة باهته ومادمت صامدة الهيئة والنفس أشلاء ما يعلم بيها إلا الله

ايام و رقية تلج على علي وفاطمة بالمستشفى ترعاه واطفالها يمي ...

ايام ورقية تنام دمعتها بعينها والدي هادئ و متماسك !

گالو تحسن ونظف صدرة والالتهاب الرئوي الي صابة طاب منه ..

كنا نتغدا من نزل مرتضى من غرفته
وكعد يمنا

مرتضى- بوية اروح اليوم اوصل رقية لأن مو مال طلعة كلساع الطفل كبل لبيتهم كال ياسر ياخذة

ابو علي- اكل هسة

خلصنا غدة وابوية ما خلى مرتضى يروح لغرفتة

- مرتضى خابر ياسر بلغة يوصل فاطمة والطفل لهنا ... وانت روح لخطيبتك تلم كل غراض الطفل وامه حتى سرير الطفل ...
كعد مرتضى يمه
-ليش؟
اجت امي بيدها صينية الجاي واني على كعدتي يم رقية الي كاعده يم بابا

رقية-ليش بابا ليش ليش

- رقية بوية كومي لغرفتج

-حاضر حاضر

راحت لغرفتنا ..

مرتضى - شنو الي بالك ليش اجيب كل متعلقاتهم ؟

- اكلك شي عوف سالفة غراضها هسة واني اخابره يجي اهنا بحجة امك واختك يراقبن حالة الطفل ...
وبعدين من يرتاح ياسر لكل حادث حديث ...
امي تدخلت
-ليش ما اتريد اترجع البنية
ابوية مثل المشحون او المتروس كلام من امي
وكف وگوف وكال بعصبية
- يوم واحد يا مرة يا مسلمة يوم واحد
ما كدرت بتج تراعي طفل يوم بس يوم
اشلون تردين ارجعها للضيم
بتي ما ترجع
وهذا اخر كلام
فاهمين ما ترجع
لحد ما اموت ويترس وجهي التراب
وصيتي لابنج يخليها يمة
ما تطلع من بيتي

كلنا سكتنا كدام صياحة على امي

- گلتي زوجها حسن لا تظلمها
مثل اختي حالتها
وخلفت وازوجت وربت
زن زن زن الحاح وضغط علية منا من خطيت وزوجتها
زواج بتج غلطة عمري

نكث ثوبة وراح للاستقبال وهم بس يحجي ما سكت وصياح كلامه ..

،

رجعت فاطمة ودخلت ياسر للاستقبال يم بابا ، وبيدها علي ملفلف بقطعة قماش بيضة وركضت رقية عليه

فاطمة- خل اكعد رقية خل اكعد

رقية اخذته تبوس بيه وتبجي
-حبيبي ماما خنكتك خنكتك حبيبي

امي- اشبعي منه حبيبتي ومن ريحته صارلج ايام تلجين بأسمة وتبجين
قرة عينج يا يمة ...

كعدت يمها اشوفه صدرة لحد الان بيه وشة او خرخشة (صوت)
و فاتح عيونه الخضر علينا ويتمطى باديه الحلوات .. ضعفان و حتى بجيته ضعيفه .. طول هاي الايام كنا ناخذ اله حليب بالممة من صدر امه للمشفى تعب والده وتعبنا وقلقنا هالولد عوائل مشردة بسببة (فاطمة و اولادها)
وابوه وامه

امي اخذته تقمطة

فاطمة-الطبيب حذر منه يوم خليه بس لفيه لا اتربطيه مو زين على صدرة ..

مرت الايام وعلي ونيس العائلة بس يكول اه كلنا نركض اله مثل الماي بالصينية تعاملنا وياه ورقية بس وقت الرضاعة و من اتريد اتحطه بحضنها تلاعبة واحنه يمها اني السهر اخذ من صحتي جزء...لأن اكعد وياه ما ينام وحتى من ترضعه امه يمها ينام اثناء الرضاعة ويكعد صاير نحس ..
وبالنهار البيت عليه امي صحتها ما ساعد مدهورة وهم علي ومتطلباته. وامي احس بينها وبين ابوية شي حتى بعد هاي السنين ينام بالاستقبال !

ورة ايام خابرتني شهد همه اجوي ثاني يوم من طلع الولد شافوه وراحو
شهد وامها ..

-اهلا شهد

- مرحبا

-مراحب

-اكلج ليش هيج ياسر ناقص
خطية بس يريد ابنه يمة يفاجأة ابوج بهاي السالفة

-يا سالفة

- ما تدرين

- اريد اعرف منج

- ابوج اليوم اجانه للبيت وملتقي بياسر وجدي.....طالب منهم ياسر يطلك رقية مالها رجعة

- لا ما ادري .....ادري ما يريدها ترجع بعد بس ما ادري اليوم راح الهم

- ياسر هسة صاير اعصاب وخابر مرتضى يحجي ويه ابوج ما يريد يطلك

- بس الطلاق افضل

-والطفل !
يا عيني بلكي تأثرون على امج وابوج
لخاطر الطفل

-الله كريم ..

سديت الخط
،

بالليل كبت ببيتنا الصيحة .
طلعت اشوف شكو ومن الكلام فهمت مرتضى وامي جاي يحاولون يحجون ويه ابوية .

ظل يصيح عليهم وهم نفس الكلام عاده من يترس التراب وجهي وصيتي اختك ما تطلع من البيت

ثاني يوم الصبح اجت فاطمة يمكن امي مخابرتها تجي تقنع ابوية .
الرجال ماكو بالبيت الصبح

فاطمة
- خلي محمد يحجي وياه يمة؟

- لا تخليه يحجي وياه
وانت هم لا تحجين وياه الي يريده خل يصير

-شنو الي غير رأيج يمة

- الي غير رأي البارحة نص الليل رحت افهم منه وية صلاة الليل اشوية هادي اعرفة

- اي وشو هو الي قنعج مو انتِ؟

- سولف الي شي ما يسولف ..
ياسر لهسه يذكر كلام هالمصيوبة اختج
وعاشك الي تحجي وياه
ويعاني وية رقية والرجال ادمر وياها
عبالي مرتاح على طيبة گلبها مثل خالتج رجلها يشوفها بالدنيا كلها ..
هذا ما اتحمل ما تقبلها.
ناخذ بتنا وهي بعد صارت ام يا يمة ولا اذكرة بالها كله يم علي ابنها ...
ولا أساليني الطفل شنو ذنبة
ما اعرف بعد الصح من الغلط

فاطمة ظلت تباوع الي واني انخلست ابوية سامع كلام ياسر

ولهيج سبب هو متغير وابد ما يناقش احد ياخذهم بصياحة..
اجه ياسر بدل المرة عشرة بالاسبوع الواحد خلال شهر ...
دز خوالة دز اهواي ناس تتوسط اله عند ابوية
وبابا يكول الولد ما عندي شي وياه حتى يوسط احد والقصة خلل ببتي تعبت من الزواج وتدهورت حالتها ما ارجعها واشيل ذنبها
وابنه مصيرة يكبر و مرجوعة اله .

شهرين بالتمام والكمال مرن وياسر ما يأس ولا ابوية قانع ....
اني ضجت لان محد جاب طاري الدراسة بعد

وبيوم كاعدة اقلب بالفيس بملل..شفت منشور معلقة عليه بت عمتي فطالع الي ..
مباركة وحده من بنات عمامي ناشرته لزهراء بت عمي ما بينا صداقة بسبب تعليق بت عمتي ظهر الي ..
{الف مبروك عقد القرآن يا بت
العم زهورة تستاهلين كل الخير انت وعماد ابن العم !! أن شاء الله زواج الدهر!

•ياسر

شلع گلبي ولوبني هالشيخ حسن وهاي صارلي ايام اتوسل بجدي يردها الي

ما يقبل يروح يكول اذا ردني تكبر

لحد ما مل مني وقبل ....
رحنا للشيخ واجهة اخذت اله تلاث شيوخ جدي و اثنين معارفة شيوخ دواوين يقنعون قبيلة

بعد ساعتين..طلع جدي من مضيف الشيخ وطول الطريق ساكت
من وصلنا كال تعال وراية ...
دخلنا لمضيفة
صاح على الكهوجي
-روح منا بوية

طلع
هو و واكف ما كعد ...
كال
-هي كلمتين ياسر
طلك بتة

-جدي شطلك اني اريد ابني

-تاخذة منهم غصبا ما عليهم امه فاقده الاهلية
واني اجيبة الك بايدي

- جدي ما اريده بلا امه حرام اعلية

- انه جدك يا ياسر اطلع من مضيفة ويردني كدام الشيوخ
ويطلعنا من بيته هيجي
هذا بايع يا ياسر ومراح يرجعها الك بيوم
واني اذا الي كلمة عليك طلكها باجر

-جدي لا

- لا تطلك ... واني مالي دخل بيك ولا باختك و اعاملك كالغريب لا بكعده اتعنى الك بعد ولا لخواتك
روح لعشيرتك يالصغرتني

اخذت ايده احبها(ابوسها)جرها مني غضبان

- تطلك اني راضي عنك ما تطلك
ابوها راح يدخلك محاكم تتعب واتطلك
بس ساعتها مالك يمي گرابة يا ابن ابوك

صعد الدم لراسي واني انطق مكتوف الايدي

-صار جدي
اطلك

يتبع