رواية شيخ الشباب(بنت المؤمن) الفصل السابع عشر 17 - بقلم زهراء العراقيه

صباح الورد

لقد سافر الحلم قاطرة
والشبابيك لا تنتهي
والوداع استمر
سيدتي جميع الشرفاء في هذه الأمة أغراب

-مظفر النواب

•مرتضى

بمكتبي بنهاية الدوام كاعد ، واجتني رسالة على الخط

فتحتها لأنها من رقم غريب
- افتح مراسلة الماسنجر مالتك ، شهد

شهد اخت ياسر؟ تطلب تحجي وياي بس شعجب بادرت
ماعجبني التصرف لكن دخلت فتحت المراسلات وشفت رسائل من شهد
تسجيل صوتي
-  اشلونك عيوني شسوي ما اسوي!

و بعدها رسالة مكتوبة ......

- اشلونك مرتضى رد

وراها
عندي موضوع مهم رد
هاي من البارحة واليوم دزت من رقم افتح الرسائل الا شفتهم

رديت كتابة
-  اهلا

- اريد اكولك موضوع مهم حيل

- اتفضلي ، امر خدمة...

-ديربالك على اختك زينب

- !!

- اختك اشوية بعدها صغيرة بس والله من خوفي عليها وعلى اخوية راسلتك..

ما رديت.....مدة دقايق وهي رجعت راسلت
- راح اسولف الك واراويك بعينك بس الله عليك اوعدني ما تأذي اختك ..

هم ما رديت ..

هي رسلت صور محادثات
انتبهت للراسل والمرسل صورة ماسنجر اختي فاطمة و حساب زينب الي اتهكر

ملتقطة صور للمحادثة ودزتها الي

{زينب  - فاطمة بعدني مختنكة من خطبتي من عماد اخاف صدك كلامج واظل اقارن بين عماد وياسر
فاطمة
- هاي نتيجة تصرفاتج الصبيانية
ظليتي تراسلين ياسر منا من استغفر الله 
انسي زينب الرجال صار خطيبج واخوج خوش شرط عليه اليوم }

ظلت ترسل الي محادثات ، تاريخهم قديم مبين  ، كله يدل زينب اختي عدها علاقة وية ياسر

- شنو هذا الكلام
شهد هاي المحادثات حقيقية وشجابها الج

-كنت شاكة بيهم و هكرت حساب اختك
طلع اخوية ماله علاقة بس هي تراسلة ولازكه اله لساها وبعدها بس حذفت المحادثات الي بينهم

طلعت من الدوام لبيت فاطمة لكيت رجلها نايم استوة

فاطمة
-اكعد محمد واجيك

- لا اكعدي

-طلعي الاطفال عندي وياج كلام ..
طلعتهم من الصالة لغرفهم  ورجعت الي

- شكو مرتضى وكعت گلبي

طلعت تليفون وشوفتها كل رسائل شهد الي...

سولفت الي السالفة فاطمة لأن اني ما مستوعب كلام شهد

سألتها- اااخ الغبرة اشلون هيج اسوي
وياسر ما حس بتغير بعد الزواج

- حس ورجعها و زعل ابوك بيوم سابعها

- وبعدين

- خابرته توسلت اله يرجعها لا يفضح ابوية يكولون عليه الناس خدع ياسر ..رجعها ولهذا يومك قبل بيها ورضى بنصيبة

- وزينب

- احلف الك بضلع الزهراء ما بنيتها او بگلبها شي ناحية رجل أختها ..هي اشوية بس بأول ايام خطوبتها من خلف عماد كلمته ضاجت منه وظلت تقارن ضعفة و احباطة برجل اختها  وهذا شي عادي  اي وحده تقارن
وية الرجال الي حولها اذا ما مقتنعة بخطيبها
وهاي المحادثات مقصوصة مو كل الكلام مبين منها هذي شهد حقيرة حيل شنو من وساخة دماغ عليها،  اصلا زينب مكانت تحجي  بهذا الموضوع اني الي فتحته بس هي باترة المحادثة
وهذا الكلام قديم حيل

لزمت ايدي تترجاني
.- والله هذا الكلام قديم
البنية صارت هسة اتموت على خطيبها و اصفت نيتها اتجاه اختيارها

وخرت ايدها وطلعت للبيت.....مغلول
كل هاي الامورة اصير واني مالي علم
ياسر يدري يا صغر وجهي كدامة

دخت وراسي راح ينفجر من تصرف اختي الغبي و شهد الي طلعت غير شي

اسلوبها مال وحده استغفر ما مخلية احد ما مصاحبته بحيث اجتني اسولف وياي مثل واحد تعرفة و صاحبها سهلة المختصر...واسلوبها خبيث

دخلت لمطعم شعبي ، تغديت رحت زرت حيل مختنك

رجعت للبيت و ضربتها

- حالف ما اضربج من ذاك اليوم  ورجعتي تغابيتي

شدخلج بينهم هااا
شوفي الكلام الي راح اطلعة اخته عليج

- يا كلام شنو صاير مرتضى والله ما فاهمة شي
وهاي المحادثة شنو والله قديمة وفاطمة مسولفه الك يعني تدري  بيه والله مو هيج ..

انطيتها التليفون اتكلب بمحادثتي ويه شهد وتبجي....

- عزة والله هاي المحادثات جايتك بأسلوب اني وحده مو زينة بس مو هيج هاي مكصوصة مو كامل الكلام
خمس سكرينات الي احجي عن غلطتي وفاطمه تلوم بيه هاي ببداية الخطبة والله جنت ضايجة من عماد واحجي علية هسة تغير كلشي

واكو كومه كلام بعدها مبين السالفه مو احب ياسر ومبين القصة كلها بس ما راسلة شهد غير ذني هاي حقيرة  ..

طردتها من غرفتي ..

•زينب

نزلت وايدي على خدي....خجلانه من نفسي وزعلانه من نفسي على نفسي كلام خاص اخوية شافه.....اه بس والله ببداية خطوبتي اول ايام كان عماد مزعلني و فاطمة الي فتحت سالفة ياسر مو اني....حوار خوات.... اااه شهد
شنو من بشر انت تدخلين على خصوصيتي وتهكرين حسابي  وهيج اسوين بيه...
قضيتها ليلتها حزن و ضوجة والحسرة نايمة على صدري مكدرت انام لوجه الفجر،   
الصبح اجيت اتصل بشهد وهونت هاي طلعت وحدة تخوف لا تروح تأذي رقية يمها
خفت وما اتصلت لخاطر رقية
يومين ..
كالت ماما اجه عماد كال اصيح الج

طبعا ماما درت بسالفة شهد ولامتنا بگولها:- كلت الكم ما مرتاحه الها هاي شفتو شنو سوت
يومين مرتضى وما اراويه وجهي ولا اظن طايقني

غسلت وجهي ومشطت شعري وطلعت لعماد
امي اشوية وكامت عنا
اني اتقربت كعدت يمه
- وينك ليش ما تجينا هليام

- مشغول

- واتصالاتي ؟ما اجتك فرصة خمس دقايق ترد عليها
زين رسائلي !؟

- شسوين تحجين وياي اخاف احبطج بسلبيتي ؟

- شنو

اشبيك حبيبي احس اكو شي صاير
انت بلب انشغالك تتواصل وياي ما بيوم كدرت تغفى الا على صوت انفاسي !

طلع تليفونه وحط كدامي نفس المحادثات وبعد اكثر ..
انوب اكو مرات اشاقه وية فاطمه
شقة خوات هي اصنف على سوالف زوجها واني هم مصفنة على سوالفه
بس ما مرسول اله غير كلامي عليه
- شنو هاي شنو هاي

- رسائلك وكلامك عني

- عماد منين اجاك هذا الكلام من يا مخربة شهد مو ؟

- زهراء

-بت عمي ابو كرار؟

- اي زميلة لشهد بغير قسم زهراء لو نسيتي

-بس هي ما عدها معرفة بيها حتى قبل الخطبة ماتدري بيها بت عمي وكلش مو هلكد وياهن اشجابها عليها !

- زينب عوفج من هذا الكلام.... اذا مستصغرتني ليش قبلتي بيه ؟

-  يمعود والله هذا الكلام قديم والله
ببداية خطبتنا من غيرت رأيك

- وهذا جديد باوعي

حط كدام عيوني كلامي عنه لفاطمه
مال اثكل وهاي السوالف

مثلا خل يولي
خليه يتصل ومار اني اتعزز عليه

الزلم دواها الثكل !

تعمدت اكذب عليه اكله تعبانه مالي خلك ههههه

- شقة والله مو جد هيج اهنبل
والله شقة خوات

- مو مهم كله عندي مو مهم

- اذا مو مهم عندك ليش صارلك ايام مختفي عني

- سمعتج الي احاول افهم شي عنها ...
سمعتج طشت بعشريتنا كلها تحجي بيها الا انتو!

رفعتلة تك حاجب أسال
- اسم الله اشبيها سمعتي

-سمعتج واشاعات عنج انج مصادقة رجل اختج

بلعت قسوة كلامه وسألت بصوت متحشرج
-وانت صدكت

- ما صدكت ا الا  من شفت كلامج عليه..
وكلام اخته عنج 

- لا لا قديم والله والسالفه مو هيج والله

- سالفه كلامج عليه اذا قديمة اسامحج عليها
بس قصتج ويه رجل اختج شسامح ؟

- لا والله ما بينا شي
مجرد اساعد رقية يعني هي تحجي وياه واني بس ا

رفع تليفونه كدامي وحط سكرين الي
فاطمة كايلة
- وكحة محمد من نهد ما اخذتي رسالة من ياسر اخذمنج موقف جريئة ورعنه

تذكرت هاي المحادثة عاتبتها ليش يكرهني محمد كالت من وقت سالفة الرسالة مال ياسر بيوم قلع السن مالته عنده اني مو صغيره
وكحة و رعنة  ...
الكلام هذا كله عند عماد و قصة اخذي لرسائل ياسر

شهكت وظليت ابجي شدافع وشنو احجي

كلام خاص انفضحت بيه كدام بنات عمي الي يتخبلن مني

سحب تليفونه
-كلامي ويه عمي

لزمته من ايده

- لا عفية ابوية لا يدري
سالفه الرسايل والله جنت طفلة وهو مراهق ولعبة لا أكثر

اندار عليه وضربني كف
- واتكوليها
واني عبالي بنية ماعندج سوالف تعبانه
ويه منو رجل اختج واشلون اخذ اختج وهو عنده ماضي وياج

عافني ابجي بحرگتي ...

و اكول مو صدك هذا حلم شنو هاي السوالف قديمه ومنسية شذكره بيها الزمن دارها عليه

قفلت على نفسي غرفتي

لا هسة زعلان منج زينب يوم ويرجع طبيعي
اه
ضربني.....ضربني

بس حقة اي ولج الرسايل تخبل الواحد
اني هم خفت ما نطقت الرسايل لاختي

كلبة منج لله انشالله حوبتي ما تتعداج
لليل اسمع كلام بابا وعصبي ومرتضى

وامي تبجي ......

اني حبست نفسي مجنت ادري شصيرر

بعدين الا عرفت من طالع عماد امي طالعه وراه شايفته عصبي
وراها امه ماخبرة امي تجيها

راحت الها واتكول الها ماكو قسمة خل نفسخ الخطبة ابني راح يتخبل صارلة ايام ما نعرف اشبيه
تاليها من طشت سالفة بتج بلسون  العشيرة
اني كلته يفسخ ويرتاح

امي كلشي ما تدري ...مرت عمي كالت الها الاشاعة الي طاشة بلسون النسوان و واصلة  الرجال
بت الشيخ عدها علاقه سابقة ويه رجل اختها من ورة اهلها واثاري السكرينات انتشرت بالتليفونات بين الاقارب و تحت شعار اكلج شفتي بت المومن شسوت اكلج وعليج الله لا تكولين
والحلفان عدنا مثل خوط الشكر بالجاي ماكو اسهل من تذويبة ونسيانه

انتشرت بين عشيرتنا اشاعات عني
بابا احتار بامي وما يدري عن الاشاعات
شي
كانت من اقسى ايام حياتي تمنيت
الله يلطف بيه وما يخسرني امي الي شكل السكر وياها صعد لل٦٠٠ مرة وحده

ضربناها الأنسولين  نزلناه

حتى جهة امي صار عدها علم عن الاشاعة ..
اخوية يدري بحقيقة الامر بس شنو بيده يسوي الي ، ابد ما بالغ بأي كلمة دا اكتبة هسة اذا اكول الكم صار تهويل للأمر لدرجة سوني ادخل ياسر للبيت بغايب الاهل....و ضربني بوري حب أختي الي من اهل الله واخذها. وعافني وحماتي كشفتني

اني بهاي الاحداث مثل الطفل الصغير الي ماتت امه وما مستوعب الامر

بالضبط....

لحد ما قرر مرتضى يروح لياسر ويخلي حد لشهد الي شوهت سمعتي صارت بالوحل والحقيره حتى سمعة اخوها لوثتها ليش هيج سوت ما فهمت امي اتكول اتريد تخرب زواج رقية

راح مرتضى ورجع وكال اتكلمت ويه ياسر وسولفت  اله سوالفه اخته

بيوم اني سويت عشة الهم ورحت لغرفتي ما اشتهي الهوى ما اشتهي شي
غير الستر ...بكل لحظه يدخل واحد من اهلي احسة راح يكتلني ...

سمعت صوت بابا بالهول يصيح الي وعلى صوته نزل مرتضى و امي ومقتدى

-ها بابا
ارجف كدامه

- ابن عمج طلكج !

حطيت ايدي على گلبي حسيته راح ينفجر بين اضلوعي وفركت صدري
اخفف صعوبة دكاته

- بتي اني يطلع عليها حجي
تدرون وين كنت
اني !

امي- طلكها الاغم
ما بيه حظ

ابوية- اي طلكها و تدرين وين كنت اني

مرتضى- وين بوية

- اخوتي التمو وحجولي عن الاشاعات الي طلعت عن بتي
يباوع عليه بقهر  ويحجي

اتقرب مني

- ابو كرار و ابو عماد توسلو من طاحو على صفحة حتى عماد يكمل الزواج
ما رضى .... رضى ياخذج

- ش شنو بابا والله اني اني ممسوية شي غير انت الي تدري بيه

والله بابا
نزع عمامته وذبها على القنفة

بابا- الناس اتكول ماكو دخان من غير نار

منو نشر هذا الكلام عنج ...

- شهد الكلبة شهد والله وصلتها لبنات عمي

كل دموع الي بجيتها بحياتي ما تضاهي دموعي الليلة.....بيها حيل يوكع وياها

اخابر و اتصل بيه ما يرد.
رسلت اله

- لا تأكد كلام الناس خرسهم انت بيدك تسترني
احلفك بحبك الي ارجع ..... مو دوم انت اتكول ابن عمج شيال همج .... كلشي ما اريد منك والله كل احلامي انت......انت صرت اقرب الي من انفاسي لا تموتني الله عليك ..

..
ابوية راح لياسر وانطاه كلام بالعظم اله حتى يكف  شر اخته عنه ويوصل اله لوين وصلنا كلامها

بس ما رجع رقية لا يثبت الكلام علينا

رحت اله بغرفته ...

هذا الكلام بعد ايام من طلاكي ايام واني اترس برامج تواصل عماد رسائل

شفته كاعد كدام سجادته..

- بابا  انت تدري بيه مظلومة

باوع الي بنظرات خفيفة ونزل راسه يسبح

- بوية راح اموت والله
ابوس ايدك ارضى عني

انحنيت عليها بستها ...ربت على راسي وابعده عن ايده

- بوية اني مفرفحة
دموعي خلصت  والحركة والخنكة الي بصدري تكبت انفاسي..
همست بتعب
تعبت بوية واحس گلبي يوجعني
يوجعني حيل....!

فتحت عيوني لكيت نفسي بغرفة امي على سريرها ... وما افهم كلامهم .
لمحت مرتضى بملامح مبهمة مو واضحة الي رفعني  عن السرير
كدرت اميز صوت امي بس من بين كل الاصوات

بعدها رجعت غفيت
فتحت  على سكف ابيض حسيت شي على خشمي محطوط بس دا ينطيني نفس . ايدي ثكيلة

والساني اثكل ...

بعدها فحصني طبيب ، حسيت بيهم نقلوني من هاي الغرفة الي كلها أجهزة الى ثانية بيني وبين المريض الثاني بردة و كانونة مشكلة بأيدي وصلت بيها  الي  مغذي
وشفت امي اجتني مكانت مبوشة وفاطمه وياها

نزعني ملابس المستشفى ولبسني ثوب و حجاب وغطني وامي كعدت يمي على السرير. وراسي وعلى صدرها

فاطمة
- حمدلله على السلامة

-هيج يمة اتفرفحين روحي عليج

فاطمة- يمة لا تبجين كدامها هاي هي مثل الورد

- يمة بس كومي النا والله ياخذ حقج من الي اسبب

نمت خاوية حيل ...
اثاريني بهذا العمر بدل بدلة العرس لبست الموت ما اتحملت

ايام كنت احس بألم بگلبي وضيق تنفس  ودوخة و تعرق ملحوظ اثاري هذي ذبحة صدرية ...رحت لابوية و نمت على ايده وما صحيت الا اليوم كالو ما فتحتي عينج ابد بالبيت اثاري روحي الي حست بيهم من طلعوني وشالني مرتضى اني مالي عين انفتحت
اصلا ودخلت بنوبة قلبية
طلعت اضعف بهواي من ما أتخيلت ولو الي انقذفت بيه اغلى شي يملكه الشخص ما اعتقد الانسان الشريف يتحمل....سمعتة تتلوث
،
حتى بعد ما طلعت خوف اهلي ما كدر يسد فتحات الحزن بداخلي...حبي لعماد وصدمتي بتركه الي اثرهم قوي
حبيته بأشهر خطوبتي حب قلع روحي من فشل وراح
،
بغرفتي مطروحة وامي راحت للمطبخ بعد ما وكلتني العشا كم لكمة غصبا عني ..

دخل والدي
- اشلون صرتي بوية

وكف يمي
حاولت اعدل من نومتي

-ظلي مرتاحة لا تكومين
بعدج صغيره على النوبات والوكعات ..

لكن لله الحمد على كل حال ركزي بصلاتج ودعائج
حتى اطلعين من هاي الشدة بخير وسلامة....
الي عافج  قسمة ربج واحسن الج....المواقف تبين معدن الناس....والرجال الي يوكف بوجه الريح لخاطر عائلته  مو هذا من اول هزة يعوفج ويشرد.....لو طالعه هاي الاشاعة بعد الزواج وبيدج طفل جان تعذبتي اكثر الحمدلله من بعدنا على البر
حتى القريب ما معروف اصل عملة
المواقف هي الوحيدة الي اتبين الناس

- والسالفة بابا الي طشت عني بين الناس
اذيتكم اني ياريت من صدك ميتة ومخلصتكم

سكت للحظات الا جاوب

- ايام وتحتار بحدث ثاني.. طول عمري مبتعد عنهم وباعد امج عن التجمعات اعرف العشائر ما تجي منها غير القالات والاثم
اني اعرف بكلشي واعرف رباتي
هي سالفة مراسلتج بفترة الخطوبة تهولت لشي اكبر
هاي الغلطة ما اكدر طول العمر احطها خيط اخنج بيه
الله يهدي الناس و يهدينا احنه ناس لا النا طبة او طلعة يمكن كنتي اتلوميني من باعدكم بس هي والله اسلم طريقة
ما بينا غير صلة الرحم سلام وسؤال

كنت مدنكة ما اباوع اله حاسة بالذنب والخجل حتى مصاريف المستشفى الاهلي حاسة بالذنب وسهرهم وقلقهم

انحنى عليه و باسني من خدي لاحت لحيتة خدي ريحة ،ريحة تنبع حنية و حب،  اتمنيت احظنه بس استحي منه

•شهد
كاعدة بغرفتي و اللابتوب  كدامي مطلعة مصادر و اقرأ ..  باب غرفتي اندفر لدرجة خرعتني
حطيت ايدي على صدري...

بعدني ما ناطقة ومعبرة عن استغرابي من دخلته عليه هيج ...
جرني من شعري

- اييي ياسر شنو
اشبيك ....

لزم وجهي حسيت فكي بيه براغي وراح تنفتح بأدية عفصني عفص و شمرني على الارض
ودفرني برجلة على خاصرتي ...
- اي ياسر ..
كلتها واني ابجي ميتة خوف

-  ليش هيج سويتي كلبة
شبعني راشديات بحيث حسيت أسناني راح تتكسر من قوتها ...
دخلت رقية على قوة بجيي

- عوفها عوفها ...

ما اهتم ونزل بيه ضرب بعمري ما توقعت بيوم انضربة ..
- اتفضحين ببت الواد كلبة

بصياح

اني اتكومت بمكاني نايمة و حاضنه ركبي وارعش .....
هو توقف عن الضرب وبس يصيح

- اشلون اجتج جرئة ادخلين ادكين سوالف وية الرجال
لزمني من شعري
- طيحتي حظي وكسرتي عيني كدامة...
ولج شنو اني مربي حية .....هاااا حياية

كوثر واكفه يم الباب وتكوله عوفها تخاف توصله

كوثر - يعني شسوت  واشبيه هذا اخو مرتك شكالك وهيج اجيت عليها

-كال الي سواد وجه ...داخله للرجال مشوفتة كلام على اخته وموصله اله اشياء عنها ياريت على هيج وبس داخلة لرجل المرة و مشهرة بالبنية  راح تطلك بسببها

طلع من الغرفة بس يغلط ...
اجتني رقية تكومني صيحت
- عووووفيني عوفيني
ولن منا
ولن

كمت ابجي بهستريا

- الكلب الحقير اكرهك مرتضى اموت منك

اكرهك ياسر اكرهكم كلكم ولن منا

ولللن
كمت اضرب برجليه ما مخليه وحده منهن تتقرب مني ....
كمت ودفعت كوثر تطلع ورقية خافت طلعت ..
سديت الباب و جهي عليها وحاضنتها وابجي

خابرت زينب ..ما ردت

الصبح ..

جعت وعندي امتحان
طلعت تريكت ورحت للدوام
من رجعت لكيتني رقية

رقية- شهودة اشلونج

ما جاوبتها ورحت لكوثر لكيتها بغرفتها
ويه اطفالها

- كوثر هذا مرتضى شكال البارحه لياسر وشنو القصة

سولفت الي ..
وظلت اتلوم بيه

- هيي انت شتلومين بيه
منو مراسل هذا مرتضى  ومنو داخلة خاص لج اني؟

- اي لعد اني

انصدمت بنفسي

رحت صعدت لغرفة رقية سحبت فونها ما بيه رمز لان صعب عليها  فتحه ما بيه ارقام فقط اخوتها واحنه
اخذت رقم  زينب مكان عندي بس ماسنجرها كان
دكيت هم ما ردت
دكيت على مرتضى ..

رد واجاني صوته

-الو الو منو وياي
الو

- وياك الو وياك

-شهد!

-  شنو هذا الكلام الي كايله عني هاااا
اني يمتى واصل الك وحاجية وياك ليش هيج اتكول

- شهد شنو اني  يعني اتبلى عليج
انت دمرتي مستقبل البنية مو شغلة صغيرة ونسكت عنها ما توقعت توصليها لخطيبها

- يا بنية لا اجنني اني ما حاجيه على اختك والكلام الي طلع عنها والله ما ادري بيه غير من ياسر من ضربني

-ضربج!

اجرم بيه وبسببك كلتها بگلبي

بكيت
- اني شسويت الك !
كولي شسويت والله ما حاجيه وياك

سد الاتصال
واجتني رسائل على الماسنجر .منه وكانما حاجيه وياه كبل طلعت رسائلة
دزلي مقطع صوتي
فتحته وشهكت هذا صوتي اني
وسكرن كلام وياه ومن صفحتي
وكع التليفون من ايدي

ممستوعبة الي يصير وياي

،
يومين اتهرب من ياسر وما فاهمة شي
واجانه ابوها وسمعت حديثة عليه لان شهرت على بنته السالفة كبيرة ياربي
مو شغلة تبلي من زينب عليه
البنية انفسخت خطبتها
شصاير ..اني ما مراسلة احد والله ما مراسلة وبت عمها زهراء اني وياها مابينا كلام اشلون اراسلها

شجيب باجر ياربي

صارلي يومين اريد التقي بيها ما اصير الي فرصة وتليفوني دز كوثر ياسر انوخذ مني ما اعرف عرف شي عن اتصالي ويه مرتضى لو من وحده

رحت للكافتريا متعمده وشفتها لبت عمها لرقية واخيرا...
رحت عليها صبحت و استأذنت منها كلمتين

وسالتها اني يمتى حاجيه وياها وشنو قضية زينب
ضحكت وكالت
هذا كلامج وياي
راوتني
واخر شي اني كايله الها حبابه اخوية عرف لا تتواصلين بعد وياي كل محادثاتي وياها الوقت نص الليل
اني بهذا الوقت غركانه بالنوم من ساعات !

جنيت اريد اندل دربي بعد ما اشوف الي كدامي مدري اشلون اخذت تكسي ورجعت للبيت ..
ايام واني افكر وافكر عقلي راح ينشال من مكانه حتى شكيت بنفسي..

واجانه خبر ان زينب بالمستشفى واكعة بنوبة قلبية !

ياربي الشغلة كبيرة كبيرة بيها حياة انسانة  اشكد صعبين عائلتها وهي نفسها صعبة وهيج تطلع عليها اشاعة عمي حقها ،
ليش هي كبروها هي مجرد تساعد اختها وسالفة وراحت هاي شي حقير من ناس ما تخاف ربها

،
بيوم الي طلعت زينب من المستشفى ياسر اخذ رقية الهم  من الصبح..

اجتني كوثر لغرفتي

- اكلج هاي ياسر راح الهم اشلون راح يراويهم وجه

-ليش هو شنو مسوي ..
مو سولف الج كلشي ما مسوي مجرد زينب اساعد اختها بكتابة رسايل يعني شغله تافهه وفاكسة وهو ماله ذنب بيها

- شهد اكو لعبة جاي تحاك ما دري شاكه بشي اني

- لعبتيش اني كلشي ما فاهمة

- ما ادري بس اليوم من كلت لرسلان اخر الاخبار

-ليش رحتي الهن ذني

- اشوف بيبي شنو عيني بيت جدنا ترة
مو بيتهم
وهاي رسلان من كلت الهم خبر زينب

شهكت قاطعتها
-شهرتي بالبنية عزة

-لا والله ما كلت شي عنها هذا الشي يضر ياسر اشبيه خوثه
بس كلت الها البنية واصلة للموت
شو ضربت صدرها وجه انكلب الوان ما ادري يا شهد حاسة هي ورة اللعبة

- شنو رسلان

رسلان
رسلان وين جانت عن بالي
بس هي شعرفها !
وهم هاي سالفة اعراض كبيرة ما توصل بيها هيج اسوي

-ما ادري والله

-بس اوكفي اوكفي
رسلان هي الي سوت حسابي
وتدري بيه حاطه مواليدي رمزي

اي والله وتكدر تدخله بكل سهولة عادي احنه كنا الروح بالروح وتخاربنا وهاي السالفة ما طلعت الا بعد ما تحاربنا

-لج كوثر هاي رسلان الي داخله لمرتضى ولبنات  عم زينب

حتى المقطع الصوتي سمعته اهواي  اعتقد  هذا راسلته اني  صح لو لخليل او لياسر بس ما اذكر اشوكت

اي اني اشكد غبية هنه هي واختها
استغلت فترة أمتحاناتي وبنص الليالي تدخل تخرب
هنه مهكرات حساب زينب....رسلان اكبر هكر تعرف بهاي السوالف هكرت صديقتها مرة

واكيد اخذت رقم مرتضى واي شي تريده من حساب زينب ولعبت لعبتها عليه
ايا كلبة حقيره
لازم اكول لياسر ، عنها

كوثر- لا ولج اذا كلتي لياسر يذبحها لج ياسر متحلف بيج يريد يكتلج خلاص باليوم الي اتخربطت زينب والله هد عليج بالسكين واني بالكوة وخرتها عنه
لحد هسة ممصدك وعنده شك انت صادقه وكلشي ما مسوية صح بس من جاي على اخره  ماعندج مبرر او دليل

-اكله واقطع شكه بالقين لعد اظل اني بنظرة الحقيره

- لج ذني يخوفن لا يبلنا بشي
ما ينكدر عليهن

- كوثر ويعني شنو اسكت

-مؤقتا يا عيني نفهم السالفة ونتأكد منها

سمعنا صوت خطوات وكلام ياسر ويه رقية بت كوثر
طلعت وكوثر ورايه
كوثر-لج شهد شكلنا اسكتي

- ياسر

دار وجه وراد يروح

- انتظر ترة اني ممسوية شي و روح بابا
ما مسوية شي ، هاي رسلان داخلة لحسابي.....اني وين اعرف اهكر وحساب ما اعرف اسوي......هي سوت الي حسابي  وهي هكرت حساب  زينب

صدكني ياسر

لازم المحجر ويباوع عليه
- ورقم مرتضى ! شسوي يمج؟

- ها !!

- شهد ما اثق بيج ولا بأختج ولا باي وحده منكم......كل يوم سالفة منكم جديدة

- و الله مو اني ياسر
صدكني مو اني

عافني وصعد لفوك

- كوثر ما صدكني ..

كوثر كالت عوفيها عليه السالفة
اني اكشفها.

،
مرن يومين وهي كلشي مسوت.....من سمعت من كوثر ياسر كايل الها قبل لا يروح للشغل، رقية يرجعها اخوها اليوم
الدم فار بعروقي ورحت
طلعت لبيت جدي متحلفة برسلان اريد اكشف  الحقيقة بأسرع وقت ،سألت عنها كالن فوك بغرفتها صعدت الها
ودخلت كانت مطروحة ومكنكة

- ها شهودة يمنا زين وتنازل القمر ينزل لمستوانا

- صرت اشوفج شيطان مو بشر....انت الي مهكرة حساب زينب وانت ورة كل هاي الخرايب

- يا زينب ؟

- حقيره و نذلة

وكفتلي

-كافي عاد زودتيها ترة منو يمها زينب
واشبيها

- اذا ما اكشفج واخلي ياسر يدمرج ما اسمى شهد

دفعتها عني لان اتقربت حيل مني...رجعت للخلف ورجعت عليه ضربتني كف
-اه
ولزمتني من شعري

- دلوعة ماما السانج ابترة اذا تجرأتي عليه مرة ثانية
ويلا برة
دفعتني مطلعتني من غرفتها وسدت الباب بوجهي

رجعت للبيت متروسة دموع دخلت
وشفت رقية بنص الحديقة و مرتضى حط الها جنطتها و التفت يريد يرجع
يطلع
شافوني
خدي كان حامي
من شفته وياها رحت كدامه وكفت

مثل الي يهمش بادية بنص البحر وما يعرف يسبح
ماعندي دليل على كلامي وكلت ببجي ضعيف
- والله مو اني هاي رسلان ماخذه حسابي
مو اني مو اني

شفته من بين غواش عيوني بسبب الدموع مدنك وساكت
دخلت للهول  كعدت ،حسيت باليتم القوي

اكو ادين تمسح بضهري رفعت راسي لانها رقية

- رقية والله مو اني مو اني

-اي اي مصدكة مصدكه

لا تبجين لا تبجين
ترى اني اني هم هم ابجي ابجي

- اييي رقية محد يرضى يصدكني محد

- اني اني مصدكة مصدكة

- والله رسلان مو اني

- ال الله يهديها

- كولي الله ياخذها الله يدمرها مثل ما دمرتنا

-ها

-ادعي عليها رقية ادعي عليها بلكت تنهد

- حرام بابا كال

ظليت ابجي ورقية تواسيني ببوساتها
الي ...

حسيت العالم كلة اضعف من انه يتحمل شعوري ومرارة قهري

•زينب
صليت و رحت لعلاجي اخذته....وطلعت للحديقة اتنفس

افرك حرگة صدري

اجتني امي

-شسوين يمة اهنا

- مليت من الغرفة
-هاج هذا تليفونج

اخذته منها ...
وراحت امي ...اقلب بيه ..دخلت للفيس متغير بأسمي وجديد بأسم زينب حسن !

-زنوبة شسوين اهنا

- فاطمة هذا شنو مغيرين حسابي ليش

- غير مرتضى الحساب
و غير خطج
هاي هي زنوبة صفحة وانطوت

- فاطمة ليش هيج....كلها فترة ويرجعلي عماد

- الي يسمع كلام نسوان ويمشي وراهن لا تصدكين يرضى بيه ابوية بعد

-فاطمة ما يصير لازم ارجع اله

كعدت يمي على الصبة وجوانه الزرع والثيل بين رجلينا صار

- ليش انخلقتي اله قابل!

مو اول ولا اخر وحده تفسخ واصير وياها مشاكل زينب ...اعرفج اقوى من هيج
دمعت

-حبيته
فاطمة حبيته حيل

- دكومي لا تحركين بكلبج ولا تبجين هيج مو زين عليج عفية هسة اجت بسيطة بس الجايات اخطر عندج ذبحة
باي وقت تتحول نوبة علينا ،
جرت كفي على كيفها ونزعتني الحلقة الي بايدي
عديتهن كلهن سوة
ضيمي
وتـعبي
وكسرت واهسي
وكسرت الجنحان
وكل ذني لعيونك مــضن
وصدكني ولن و أنـــــسن
يلشوفتك ظحكت وطــن
صورة انت بس تختـلف
ما ترهم على الحـــيطان

يتبع