رواية شيخ الشباب(بنت المؤمن) الفصل الثامن عشر 18 - بقلم زهراء العراقيه

مساء الخير
شيخ الشباب
من كتابات زهراء العراقية

يامعودين اهلنه !
الگاع ضيجه من عگبکم 
ماتسع حچام
تنام العين  ،  چي تعبانه مني
ومن نفسها
تنام
ولک ردوا ....
حنيني ايگعد  الميت
وحشتي  اتطلع بليل الشته
شمس الربيع أيام
عين الماتشوف احبابها الحلوين
ما هي  عين
ولاهي تشوف .. ولاهي بعميه
ولاهي تنام

-مظفر النواب

• زينب

-جيبيها فاطمة رجعيها

- ابوية  كال نذبها عليهم ما يقبل تظل عندج......شعندج لابستها

-لا عفية رجعيها  الي

- بعد الخطبة انفسخت شسوين بيها يا امي
حطتها جوة باطن ايدها فاطمة
كأنها قطعة من جسمي مو حلقة

- كومي زينب اهنا حشرات تكرصج نملة لو نحلة
كمت وياها ورحت لغرفتي....

رحت لكنتوري لخانه حاطه بيها غراضي

دورت على بوكس هدية من عماد
ماهو
على وردة حمرة كبيرة هم ماهي ..

ظليت اهبد عليهن ودموعي اتسرسبت ..
فتحت الخانه الثانية الجبة ماهي

- وينهن وينهن
ليش اخذوهن ، كان عافوهن الي والله اريدهن بعدني عندي أمل قوي  بلكت يتندم ويرجع ادري بيه راح يرجع !
ظليت ابجي عليهن وحدي الى ان تعبت و سكتت وحدي ..ضميت الملابس وانطرحت بسريري ..
،
اليوم اعتقد بيت فاطمة يتعشون يمنا  وبعدين ياخذ محمد اولاده الكبار  ويروح للبيت يعوف فاطمة و الصغار
يمنا باقين  ،هي مالية علية الغرفة
ما تخليني وحدي تاخذني افكاري للجحيم ..

رن تليفونها ...
اجت من المطبخ وردت عليه

- الو
هلا ام لرقية

سكتت اشوية فاطمة تسمع الطرف الثاني
بعدين كالت
- ام رقية على سواية اختج ناس غيرنا يسون كعدة بيها وغير كلام ، بس احنه لخاطر رقية ولخاطر ندري بأخلاق ياسر وخلينا اله اعتبار والا السالفة كبيرة كبيرة حيل ترة

واحنه متانين البنية تتحسن والنا كلام ثاني وياكم

ما اعرف شنو تحجي كوثر بس فاطمة اسمع

- اتحلفين يا ام رقية!! عندج أطفال
خافي....
سكتت اعتقد ذيج قاطعتها

- وصلت بتنا للموت ثقي بالله بابا ترك رقية يمكم حتى بس لا يثبت التهمة على زينب وياسر
والا سواية شهد ترة....
خليني اكمل ام رقية

ام رقية لا تحلفين خليني اكمل.....

اختي لا تحلفين ترة الگلب شايل ومليان منكم  و خاصة انت من وقت سالفة ترجيع ياسر لرقية بيوم السابع
ونكرانج لكلام امي

سوء فهم ؟
ام رقية

بس اسمعي

زين يلا اتفضلي احجي انت

يا رقم

شنو
اي اي
ميخالف راح اسأل مرتضى

ميخالف راح أساله واذا عنده اجيبه الج

خلصت المكالمة

-شنو فاطمة شتريد منج هاي

- تحلف شهد كلشي ما مسوية  ما خلتني احجي بحلفانها
بس لو اعرف شنو استفادت شهد

-اعتقد لأن ضربت رسلان ما ادري يمكن شايلة علية

- شو هسة هاي كوثر هم جابت طاري رسلان تحلف مو شهد الي هيج سوت
رسلان

- اعتقد اثنينهم
بس والله لو مشوهاتني مو ضاربتني ما الوث واشوه هيج سمعتهن
شسويت الهن اني
ما اعرف اريد شي يستحق هيج يدمرن حياة بشر

- ما اعرف من يجي مرتضى ذكريني اسألة

-على شنو

- اتريد الرقم الي رسل لمرتضى  اول رسالة

صاحت الها امي وراحت تكمل العشا وياها ...

مالي وجه اطلع اتعشة وياهم....
جابو الي العشة للغرفة وامي وفاطمة وياي ...

بعدها كالت فاطمة هذا اخيج محتفظ برقمين لشهد هاي شهيدان متصلة بيه مرة ومرة رسالة

دزيت الهن الرقمين ..

- ها مرتضى اهنا بالبيت

-اي واتعشة وياهم
اكلج يلا اطلعي سلمي على محمد فشلة من صحيتي لليوم ما متحمد الج على السلامة رغم هو كل يوم اهنا يجي

درت وجهي
-لا ما اطلع
حبابة

-ليش

- مالي وجه اشوف احد وخاصة زوجج
اهه هو من زمان ما طايقني

-لج غبية محمد يعتبرج طفلة ويدري بأخلاقج والله
اطلعي خل يتحمد الج عيب منه هو وكف وياج من وكعتي عبالج كدرنا نطلع الج تصريح بسهولة من ردنا نحولج لغير مستشفى ؟

كمت مترددة مالي عين اواجه احد بعد الصار......
وكفت يم باب الهول و فاطمة لزمت ايدي وابتسمت
وهمست
- أدخلي ..
اخذت نفس قوي مجمعة اقوى قدر من الهوى داخل ريتي عساه ينطيني الشجاعة.....

- الس السلام عليكم

فاطمة-محد سمع ترة

صدك ما زالو يحجون بابا والسيد ما حسو بوجودي ولا حتى مرتضى الي منطرح ويلعب بفونه
فاطمة
- يلا هههههه
باوعو النا من سمعو ضحك فاطمة
اتحول وجهي لأصفر و نطقت بصعوبة

-السلام عليكم

وكفلي السيد

- وعليكم السلام والرحمة
حمدلله على السلامة يابة ، خطاك السوء

- رحم رحم الله والديك
كعدتني فاطمه على القنفة اني اريد اطفر ..
اجت امي و بيدها صحن فواكه ..
كلامهم سياسي السيد وبابا
ومرتضى بعالم ثاني..على نفس نومته و لحيته شو ثخنانه اشعجب ما محددها و عايفها هيج ثخينة ولا باوع الي  ، كمت من يمهم اجتني فاطمة
-ها ليش كمتي
ما تعبتي من الوحده

- اشبيه مرتضى ؟
- ما بيه
،
يومين فاطمة يمنا ...بعدين راحت لبيتها اطفالها عدهم أمتحانات

بعد كم يوم
و سمعت  كلام امي وية بابا بالصالة الصبح
ماخذ اجازة و ما يطلع من البيت ومتعارك اول البارحة وية عماد و ضارب كرار !
واني اكول اشبيه اكيد بسببي ،
رجعت لغرفتي والحرگة بصدري بدت تسعر...وضيق قوي صرت اهفي بأيدي كدام خشمي ، فتحت سحاب ثوبي وظليت افرك بصدري ورقبتي وطلعت  للمغسلة...اغسل واعيد بوجهي ،توضيت و وتوجهت كدام القبلة،مكدرت انطق دعاء ولا اصلي دموعي غلبتني سجدت واتعثرت بواچيي (بكائي)بالشهكات

- أللهم إني لا أسألك رد القضاء ولكن أسألك اللطف فيه
تعرف بيه مظلومة ابعد عني الاذى ،
ربِ أني مسني الضر وانت ارحم الراحمين.....

انتكات على الحايط واني اعاتب عماد
هي هاي  جزاء وكفاتي وياك ليش
هـِٰاي تالية المحنهَّ ونسهَر ونبچي ونباري تالي مِحد يوگِف النهُ
وكفت وياك بشداتك وانت وينك هسة؟

•مرتضى
ما اعرف شنو يريد مني ياسر يتصل مالي طاقة احجي وياه ، لو ما رقية مرته كان النا وياهم غير تصرف ، الي صار كبير حيل كبير لو ناس غيرنا مكان سدوها بهذا الشكل ،
سمعتنا انمست مساس قوي وتأثرنا كلنا بيه ،

شهد وعماد كأنما اتفقو يرشون  علينا
حقارة ...

الوالد حتى ما خلاني اروح اعاتب ، مهر زينب من حقها تاخذه ما قبل يطالبهم بشي ،بالتالي  ما ردت غير عتاب لهذا الي معتبرة اخ اشلون غدر بيه و لا اهتم النا ولا لسمعتنا وطعن بشرفنا من ترك بت عمة
تركه الها اقوى من الاشاعة نفسها لأنه اثبتها وبكل جدارة

خابرته ما رد
صارلي ايام ما طالع للمقهى التجمع مالتنا،

اليوم طلعت ، لكيت ياسر بنص الطريق جاي من الساحة واني رايح الها ..

فتحت الجامة وهو هم
- ها خويي اشلونك

- اهلا ياسر الحمدللة ..

-اتصل اعليك  ماكو

- والله اشوية مشغول

باوعت لحظني واسترسلت الكلام بغصة
-والسالفة  مو صغيرة احتارينا بالبنية انضرت اهواي

هو هم دنك
-ما اعرف شكلك خيي والله صعبة وحكك
وشاكر والله جميلكم قدرتوني وما وصلوتها لجدي

- ما انريد الك  الضرر ولا لرقية حتى لا تنشر عليكم السالفة يم اقربائك كافي الي صا ....
ياسر الوالد بالبيت تلكاه اني اترخص

-انه جاي اعليك

- اني راجع الك...بس عندي مشوار ،

تراجع هو للخلف موسع الي الطريق فتت ورحت للساحة
سألت عن عماد ببيتهم كالو طالع ..

رحت اله للمقهى ..

لكيته كاعد وطالب طلبات وينرگل هو وكرار وقيصر اخو كرار ..

وكفت يمهم

-السلام عليكم ...

ردو السلام
واني اعيوني على عماد رد و وجه اسمر واصغر وما يباوع لعيوني يتهرب

- عماد كوم وياي عندي راس كلمة وياك

كرار- اتفضل مرتضى اكعد مكانك هذا

قيصر تفضل خويي

- عماد يلا

سكتو من اتجاهلتهم وكام عماد

مديت ايدي اله
-كدامي اتفضل ولو

مشى كدامي ويتلفت عليه

وصلنا يم سيارتي وين ما راكنها ..

- مرتضى اني اريد اجنبك واجنب هاي المواقف ،

- العشرة الي بينا تحتم علينا نوكف هاي الوكفة ...وكفة العتاب
ليش يا أبن عمي واخوية ليش

دنك ما جاوب

- مو كد الحمل لا اشيل من البداية

-مرتضى متأكد لو انت بمكاني هم تنسحب ، ترة صعبة

- عماد مقتنع بنفسك انت لا عليك الله مقتنع....البنية رابية على ايدك انت شهدت على تربيتها مثل خواتك تشك بخواتك انت؟

صارت نظراته حادة واجو كرار وقيصر وكفوا يمنا ...

-  المفروض تكتل كلام الناس
واشيل ويانه انت مو غريب وادير وجهك ، حملنا حملك و حملك حملنا....
لا والله اذا اصير مكانك ما ادير الكم الوجه

كرار- لا تقارن مو شغلة اشاعة غير هو شاف بيعنه وسكتنا وعلي قالع خبير لو اني اخوها الا انحرها على القبلة شفت الرسائل انت ؟

- انت اسكت بالله عليك ..

كرار- لا حول ولا قوة الا باله

-سلاماً عليكم
التفتت للقائل لانه ياسر ...
يمشي على رجليه مو سيارة  جاي وراية

عماد احتقن وجه وهو يشوف ياسر واكف يمي

عماد- عدك شي اتكوله اريده اروح

كالها بزمخ

- لا ما عندي .... خلص العتب وياك انرفع، و لا عتب عليه بقطع صلتي بيك يا حيف الخوة الي نداست

ياسر- والله يا حيف على الزلم الي مخطوط جوة خشومها شوارب وسلام ما ترد

همست اله
-ياسر!

•ياسر

شفت كرار رفع الي تك حاجب ما عاجبه اول ما وكفت وهذا عماد الحرمة
ال......  واكف شكلة استفز اعصابي

عماد - امشو

كرار - شنو انت مو بعينك احنه و ما انرد السلام على العارات

-منهو عارات ..
هاي انه عار

اتقدمت خطوة وايدي انلزمت

مرتضى همزلي وهزلي راسه بمعنى اهدأ

صكيت اسنوني حيل وانه عارف ما يصير ادخل بين اولاد العم
بس حيل غاثني هالعماد وظالة حسرة بگلبي چلمات اكولهن اله

كرار هم حاول يتقدم الي بس لزموه عماد والي وياه

-مرتضى لخاطرك
وخاطرك غالي ، بس كلمة وحدة وحاشرة بزردومي ايام

-انت أمك حليبها ما بيها نخوة ماصخ
الي يكشف عن عرضة ويخلي الوادم ينهش بيه

رخت ايد مرتضى عني
التفتت اله وكلت مصحح كلامي.
-عرضك محشوم يا مرتضى بس عتبي على ابن عمك المشورب

كرار
-لهنا وكافي ابن الشوراع طايح الحظ محد لعب على اخته غيرك

شفت مرتضى بسرعة ضوئية ضارب كرار موكعة على الارض
و صاعد اعليه انه وكفت حذر موش ابن عشيرتهم انحگ ، بس همه ولد عايلة وحدة خل ياخذ حگة منهم
عماد بس ياحاول يوخرة عن كرار الي نام مثل المرة جوة مرتضى مسيطر اعليه
و قيصر هم يحاول يجرة وانه اتعجبت على تحولة  لشعلة هيج قوية محد يطفيها واثنين ما كدروا يسحلوه عن كرار بس للامانه همه ما يحاولون يضربوه

قيصر-مرتضى وخر ما انريد نأذيك تقدير حالتك ترة
من شافه خنك اخوه و كم رجال وكفوا الي يسال اشبيهم و الي بس يباوع وثالث يصور
انه
شفت عماد ضرب مرتضى على خاصرته حتى بس يوخر ايده عن خوانيك كرار
جريته عبالهم الناس افاكك

-اي فكهم ابني

انه جريت عماد وسطرته كلة
الزلم الواكفة الظاهر كبيرة بالعمر اصحاب المحلات .  اجو شباب  من الگهوة  الا فكونا وخرو مرتضى و انه رحت اعليه

سألته -خو ما اذاك هذا
واضحك  واباوع لكرار المخنوك
دفعني عنه مرتضى وراح من كدامي
-وخر عني

عماد يصيح لحد يبلغ
-عمي لحد يبلغ احنه اهل رحم الله واليدكم انحلت انحلت

مرتضى صعد سيارته انه ركضت وراه وصعدت
والله شكيت رايح الهم من لاكيته رايح للساحة . ركنت سيارتي يم باب بيتهم ورجعت مشي ، اشوفنه يمهم لو لا ، شفته رجع لسيارته وطلع كبل للشارع ..
كلت اروح للكهوة خاف رايح الهم بلچن اشوفن هذا عماد المرة ..
،
هسة عصبي ما شايف الي كدامة وطلع بينا لبيتهم نزل ونزلت وياه بكراج بيتهم ،
دخلني لديوانهم و عافني وراح ، اجاني ابوه يسألني وين كنت شايف سيارتي يم بيتهم واستغرب
كلت اله رحت ويه مرتضى .. ندكت الباب و سكتتني ، دخل علينا عم مرتضى وراه مقتدى الي فتح الباب

يسلم بقلق وكعد

-يرضيك الي سوه ابنك ونسيبك
هيج فضايح بالشارع واذية لولدي

-خير يا الله شنو صاير

يحجي ابو رقية ويباوع الي بعيونه الي تشبه عيون بنته حيل

انه ما حجيت ظل يتعاتب و يشكي من مرتضى الي ضارب ابنه

- خلى خاطر الك وما كتلوه
ولو ضاربيه جان انه خلصت عليهم

ابو علي- استهدي بالرحمن نتبين القصة شنو وبعدين نتعاتب مرتضى راكز وانت تعرفة ما يأذي احد ولا يتعدى على احد الا لسبب قوي

ابو كرار- ابني ما يعيل

دخل مرتضى من غير سلام
بنتر على عمه
- عمي خل ابنك الناقص يلزم لسانه عنا ويكف شره كدامي ويحجي عن عرضي لعد وراية شسوي
والحجي ترة طلع منكم من بيتكم واني رايح هسة لجدي شاكي عائلتك بناتكم وولدك
خلى  وطلع مرتضى،بينما الاب ساكت .
ابو كرار- شنو هذا الكلام ابو علي
كرار هيج مسوي

انه كلت - اي عمي وجدامي هذا الحجي ضربة بعد ما جاب طاري المستورة
وانه ضربت عماد بس لأجل ابعده عن مرتضى چي (لأن) ضربه والا اعرف انه غريب بينكم ما يصير ، بس ما كدرت اعوفه بينهم جا انه هم عندي غيرة على خال ابني

كام عمي ابو علي كاسر سكوتة
-واني هم رايح لعمي عمامنا يحلوها يا اخي مدام ما كادر على اولادك همه الي بينا حكم
اني سكتت وحطيت على الجرح ملح وسكتت كلت اخوتي واقرب الناس الي
اذوني ما أذيهم

وانت روح ويانه تحلف كدام عمامي
اشر عليه
ما فهمت شحلف

ابو كرار-مو هيج تنحل الامور

-وانت يا ابو كرار جيب ولدك وعماد وابوه وتعالو لبيت عمي الحاج ابو حسين
اخذني وياه ورحنا وهو طريق كله يتصل لو يستفسر مني

هسة انه شورطني بهاي المعمعة انه جاي اليوم لمرتضى لطيب خاطرة من الي بدر منا اخ يا شهد طفلة ولعبتي على شوارب زلم

وصلنا لقصر اثاري هذا شيخ عشيرتهم يمكن ..

كلها معممة ما شاء الله
لازم اوكف واعرف عن نسبي وشنو اكرب لعمي ابو علي على كل فرد منهم ...
بعد السلام ...
دخل والجد وياه مرتضى طلع عمهم الكبير  عم ابو علي
بعد دقايق وصل ابو كرار و ولده و ابو عماد وياه هو وعماد.واخ ثاني لبو علي هم اجه
بگلبي نغزة جبيرة اه يا شهد راح ينجاب طاريج ليش خليتيني بهذا الموقف لو ما الله زارع بذرة حب جبيرة الج عندي جان والله موتج على هاي سوايتج.....

سمعو من ابو علي ...
ابو علي متكلم غطى عليهم ما عرف ابو كرار يحجي بعد ...
انه اباوع لكرار الي وجه بيه ضربات زركات وهو الملام!

طلع هو المحكوك هو وخواته انجاب طاريهن ...
مرتضى يكول عن طريق محادثات مفبركة بنات عمي نشرن شي عن بت عمهن   ما معترف بالمحادثات حقيقية
واللوم كله وكع على ابو كرار

عمي ابو علي - وهذا نسيبي الشاهد كدامة ابن اخوية الي معتبرة مثل ابني يطعن بشرف بت عمة واخته
والثاني فسخ العقد بعد ما اضرع ودك صدره الي يتوسل انطي مرة

مصدر الاشاعة وحده اسمها زهراء بس يحجون بيها ما عرفتها منهي الظاهر اخت هالمصكوع كرار

وفهمت من خلال الكلام كرار كان رايدها من قبل للمستورة  ...

ابو كرار- ابو علي  حقك عليه انت اني
كلت الك حقك مني تاخذة
ليش هاي الكعدة ونشغل الناس

عم ابو علي الكبير كال - ابو علي بعمره ما شكى الا و فعلا متأذي والكلام الصراحة وصل لبيتي وقطعته وحلفت الي يجيب طاريه مستورات الحجي ابو علي اطرده من بيتي
مدام وصلت حدها حقه علينا كلنا

ابو علي- صحيح عمي اني سكتت اهواي و بسبب سكوتي أنهانيت
اني اريد احاسب اول من نشر السالفه الي هو اهل اخوية
وجبت الولد وياي ... لأن

گلبي وكع بالكاع راح ينجاب طاريج يا شهد
غمضت متألم كافح  انفاسي بنقباضة
قوية

-لأن ضرب عماد مدافع عن ابني وهو شاهد ابني كان بس يريد يعاتب

اصلا محد ركز بضربنا الهم ، السالفة الأكبر ظلو يحجون بيها وعم ابو علي حرم ام كرار وبناتها من دخلة بيته وراح ينشر الخبر من قبل نسوانه البنية مظلومة والكل يعرف استرجاع لكرامة الشيخ

محد جاب طاري شهد الحمدلله

وفهمت الشيخ عم ابو علي مو شيخ العشيرة وانما كبير العائلة فقط

رجعت ويه عمي بسيارته لبيتهم واخذت سيارتي ورحت لبيتنا ..
ويه ما دخلت رن تليفوني هذا علي فايز
- ها ابو حسن
بشر

-ابشر
طلعت الك البيانات
صديقي دبرها

- عفية عليك وعليه ونعم منكم
بأسم منهو الخط

- بأسم نعمان ناظم عباس

- نعمان !

سديت الخط منه وصحت
-كوثر كوثر

اجتني شايلة خاشوكة

-شنو تعشيتو

-لا جاي اگلي توني تأخرت عبن اليوم اخذت شهد للمضمدة وتأخرنا

-اشلون صارت

- تدريها متاكل هليام امتحانات  ومناك هاي السالفة نامت وما قبلت تنتظر العشى ظلت ع هالمغذي الماي والملح الي شكلته بوريدها

- من تخلصين كعديها تاكل

- خوش
من تصعد صيح مرتك انزلو اتعشو

- طلعت بيانات الرقم الي رسل لمرتضى

-صدك باسم منو رسلان مو

-لا زوج رنا !

-شنو
ايا كلبات لعد ذني سوة مشتغلات السالفه

-اي واضح مو من ارقامهن المستخدمة حتى يضيعن السالفه ..
بس انه الهن

خل يحل الصبح احجي لجدج اخلي يجسر اجعاب رجليهن واحرمها الحياة هاي رسلان انه الها

تعشينا وصعدت و رقية
لفت راسها ونامت وانه كاعد ادخن وحدي بالصالة لا اخنكها ...
الساعة توها ١٠
افكر باالي صار لزينب
اكيد تكرهنا شعبالها بس لا تظن انه مسولف لشهد مخليها تهكر حسابها

تلكاها تكرهني كره العمة ، هالبنية انظلمت اهواي ،
حريمة مجانت خالية  جانت مليانه طراوة افكارها  لولا ابوها مبينة
الله يشفيها ويستر اعليها
دك تليفوني

- وعليكم السلام عمي
اشوكت ..؟

لا حول ولا قوة الا بالله الله يرحمة.

نزلت لجوة
شفت كوثر كاعده تباوع تلفزيون

- كوثر انه لازم اروح لل**

-خير ليش
بس لا ابن عمك المصوب اتوفى

-اي

- الى رحمة الله ، عظم الله اجرك ..

.
صعدت بدلت وحطيت قطعتين الي
هاي اخذها لو لا
بس وينها وين السفر و الفواتح لا ياسر لا تاخذها تتعب وشهد عدها أمتحانات

نزلت
موصي كوثر بيها يومين انه وارجع

نمت كم ساعة ..الفجر صليت وكعدت رقية اصلي

وكلت الها .. ورحت لل***

•رقية
راح ياسر واني لهسة خايفة من هذا الرجال اليخوف ، كون يرجع ابسرعة

قبل يومين لحيت على شهد انروح للمزرعة اخذ ورد ما قبلت كالت عندي دراسة روحي وحدج بس الصبح لا ترحين العصر ذني يجمعن اهناك  ،

الصبح ما اشتغلت الطابق مالتي نظيف
والجو كوثر ما تقبل اشتغل بيه بس طابقي وهي تطبخ وناكل وياها
ورحت للمزرعة ورة بيتنا اندليتها بكثر ما حبيتها  شلعت تلاث وردات ورديات احب هذا اللون حيل

- لكفتج حرامية ورد

اخترعت وانداريت لانه رجال ضخم يخوف
- والله مو حرامية مو حرامية
عمو

-عمو!
فدوة طالعة من السانج عسل
- ش شكرا
ردت اروح

-وين غير ادفعين افلوسهن الي

-ماعندي ماعندي
هاك ما اريدهن

راد ياخذهن  مني
ووشو ايده رادت تلزم ايدي خفت ووكع الورد بالكاع

ردت اروح
-هاي اشبيها ههههه انت منو وشجابج اهنا

- ها اني مرت ياسر ياسر

- اها هاي الي كالت عنها امي ه..
ها انت زوجة ياسر ابن خال احمد

-اي اي

-ياسر مثل اخوي

- شكرا شكرا ههههه
ردت اشرد وجه يخوف واسنونه من ضحك طلعت صفر وسودة وجه اسمر ويمة اعيونه سواد قوي

-انه شاكر مثل اخوه لياسر

شال الورد وكال هاج

ردت اخذه هم اجه يلزم ايدي وخرتها و
عفته ورحت امشي سريع
يخوف  وهو وراية

-اوصلج لبيتكم لا تخافين

اني لو ادري اكو زلم جان لبست بوشيتي
لحد ما وصلت لبابنا التفتت ولكيته واكف وراية ويضحك ..
ردت ادخل سمعت واحد يكله

-شاكر ليش اجيت ورايه ما ظليت بالمزرعة كلت الك دقيقتين وجاي

التفتت هذا احمد اخو رسلان خليت ودخلت ومن ذاك اليوم خفت اطلع وحرامات الورد داس عليه الرجال من مشى وراية
كلت لكوثر عليه كالت ولج ماكو غيره هذا شاكر صديق احمد المطيرجي لا تكولين لياسر شافج وبعد لا اطلعين وحدج ما يصير

من يومها كمت احلم بيه احلام تخوف
واخاف اوصل يم الباب ، واليوم عافني ياسر اني من يجيني حلم بهذا شاكر الزك نفسي يمة اليوم وين اروح ؟
استحي اكول لشهد تعالي يمي وهي دوم بغرفتها ما تطلع ،

دا نتعشة واريد اكول خل ابقى يمكم واستحي اشلون بيه
اجيت احجي سكتت من ابن كوثر بچى وضربته دوخها يزعل .
كوثر-اني الي خلك الك ولي دوختني

سكتت ما حجيت وشهد اكلت اشوية وكامت

صعدت للطابق يخوف يمة

اشوية وصعدت كوثر وجهالها وياها
-ولكم لا اكسرون شي
يموتكم خالكم
ليش ما اصعد اهنا ذولة قرودة
اليوم ننام يمج خاف تستاحشين

كيفت
- اي اي هلا هلا بيكم

ورة اشوية صعدت شهد شمرت كتابها الكبير على سريري وكالت
-ادري كلكم صعدتو اني اخاف وحدي..

خابرت امها وكالت الها تجيهم

طلعت كوثر على قناة فلم اسود وابيض وتباوع وتكرز وشهد بالصالة اصيح اريد
اقرة نصيه و الجهال تلعب وتضحك راحت الخوفة .
بالليل اني وشهد على السرير و كوثر واطفالها جوانه بالفراشات

الصبح كوثر كالت اريد اروح اسوك اني
تعالي اخليج انت والجهال ببيت جدي ما امن اخليكم وحدكم شهد بالدوام

-رسلان رسلان خاف تضربني

- رسلان بالدوام ومحد بالبيت هيج وقت بس النسوان الكبار

رحت يمهم واوزع ضحكاتي
الهم
البيبية - هذا الطفل خطية يعمة
بس تضحك وتصفن ما تدري الدنيا وين صفت

ام احمد وهي تثرم بتيتة
-  الله يسهلها عمة

- افكر ازوجنه ..
بيبي رقية اذا زوجت ياسر مو اضوجين تجيج وحده تساعدج بطلبات زوجج وابنج واتعينج

- منو منو زوجيه

البيبية-ياسر

- بس اني اني زوجته

-يصير ياخذ اربعة

-وين وين  يخليهن !

- الخير اهواي.....ولأجلج انت لا اتعبين انجيب الج وحده تعينج

-ما ما اريد وحده وحده اني اني اعرف اعرف اكمط اكمط والبس والبس جهال فاطمة اختي اختي

ام احمد- عمة خطية لا تكولين الها هيج

-ليش خطية .... هي حبابة تقبل مو بيبي من اريدن ازوجه ما راح اتكولين لا
جا ازعل منج

-لا لا ازعلين حبابه حبابة

- رسلان حبابة وخوش ابنية

دمعت من كالت ازوجه رسلان

وسكتت
-ها اتقبلين
خفت تزعل مني هزيت راسي

- لا لا رسلان تضربني ما ما تحبني

-تحبج من تتزوج ياسر واداريج وتباريج 

ام احمد- عمة اني ما انطي بتي لمزوج على ضرة
عوفي البت انهضمت
لا تخافين محد تزوج ياسر
لا تخافين .. 

الساعة عشرة وما اجت كوثر ..
ظليت كاعده بالهول وام احمد راحت تخبز و البيبية بغرفتها و مرت خالهم الثانية تشتغل بالمطبخ
دخلت رسلان
- هلا منو يمنا اليوم

شو اسلم عليه ومبتسمة !
- هلا هلا
كلتها واني خايفة منها حيل

رسلان -همزين اليوم خلصت اختبار من وكت
كعدت يمي ..
- اكلج شخبار زينب صارت زينة انشالله

-زينة

- الحمدلله طمنتي بالي
اكلج خو ما صار عدها شي مزمن مو
فترة وتتحسن احسن من الاول مو ؟

- انشاء الله انشاءالله اني دعيت دعيت الها اهواي اهواي

رادت اتروح وكفت يم الباب
وكالت
- ياسر اشلونه !

ماجاوبت ما اريد انطيها ياسر وما اريدها تساعدني

- بعده بدوام لو بطل ... ؟

-ما ما ادري

- اشلونه هليام ما يجينا

- زين زين وما وما يريد يريد يزو يزوجج

-شنو ؟؟

- ما ما اريد ما اريد اساعديني بيه اني اني اداريه هو هو وابني حبابه كولي هههه كولي لبيبي كولي لبيبي حبابة حبابة

- شجاي اتهذرين انت كلشي ما فهمت

- بيبي اتريد  اتريد  ازوجج ياسر

-هههههههههههههههه

ظلت تضحك وكالت
-هالله يا الله اني اخذ واخد مزوج وعلى ضرة ليش عيني خو اخذه منج

وفتحت اعيونها خوفتني وضحكت

رسلان-جذب جذب صدكتي والله اشاقة ههههههه

راحت واني كمت ابجي ما اريد ابقى اهنا كمت اخذت ابن كوثر عافته يمي و اخذت بس رقية وياها وطلعت من بيتهم

ما كلت الهم ..
اريد ادخل لبيتنا
- يا بنية
يا بنية
انداريت
يمة  هذا شاكر شعنده واكف كدام باب بيتنا

دخلت ركض للبيت

اندكت الباب كيفت هاي كوثر رحت الها اركض فتحته وصار هو بوجهي سديته و بعده واكف واني وراه

- يبنية

-روح روح حباب انت انت شت شتريد محد بالبيت  محد

- ادري شفت حماتج طلعت

-روح روح شنو اتريد

- اريد اشوف الزرع مالتكم اني فلاح واني الي اعتني بزرعكم وزرع بيت جدج ....

ثواني واطلع

- والله اشبيج ما اصدكين الزرع اذا ما شفته و اعتنيت بيه يموت وترة ياسر كال الي وصاني قبل لا يروح للفاتحه

- اي هو بالفاتحة بالفاتحة

-شفتي عبن هو موصيني ادري بيه وين راح لان كالي
لازم ادخل هسة ادخليني لو اروح ويموت الزرع وانت وياسر تتجازين انه معليه

- لا لا  ما اريده يموت يموت

- هسة ادخل دقايق واطلع خوية وكفتي اهنا تعبتني .....

- خوش خوش

يتبع ....