رواية شيخ الشباب(بنت المؤمن) الفصل السابع والخمسون 57 - بقلم زهراء العراقيه

صباح الهيل

للتذكير النشر  غير مصحح منا وجاي
عذرا النت كان فاصل عندي انتظرته لفوق ال١
#بنت_المؤمن
شيخ الشباب²
من كتابات زهراء العراقية
الفصل 22

ما كدرت يغمضلي جفن ولا انام
انقهرت من زينب حيل كايله لكل اهلها واني لا ليش؟
من مرتضى عرفت حزت بنفسي حيل شنو معنى هذا التصرف واني المفروض من المقربين الها تخاف مني؟ لو خايفة على مشاعري بالحالتين ماخذة بخاطري منها الاولى تجرح والثانية تجرح اكثر لأن المفروض تعرفني والله افرح الها ولا اتأثر سلبا
مرتضى طفى جهازة و اندار عليه

سحبني لحضنه

- شهودة نامي
عبالج ما حس بيج دمعتج كل يوم بعينج

- بس لو مخليني اشوفه ليش هيج

- ابوية ما قبل صدكي اني ما خلاني اشوفه اخذه

-زين لو بس مسوين اله قبر

-ما يصير.....مو كلنا نرجع....لنفس السالفة.....حبيبي من الله العوض...

باس شعري و ظل يمشط بيه بأصابعة ..

- ليش مات ما صبر شهرين

-كافي
حبيبتي لا توجعين نفسج حرام الاعتراض
دك تليفوني

- منو يتصل بيج هيج وقت

- اشوفه
عفته وكعدت على حافة السرير
زينب ضحكت من وسط دموعي
اكيد اتصلت تعتذر

-الو زنوبة اشعندج داكه هسة
شاقيتها ،حاولت اخفي نبرات صوتي الباكية لا اعكر عليها صفوة فرحتها
-شهودة اشلونج

-تمام وانت شخبار النونو

-حبيبتي بخير اذا يم مرتضى ابتعدي عنه

-اووه
كمت لبست روب وشال شمرته على راسي وطلعت طلعت للصالة ..

- شكو زوزي

- شهد خليل راسلني

-خليل؟

همست بصوت اكثر ناصي

-شنو هذا الكلام خليل شجابه عليج؟

-ما ادري راسلني حرسلج شيكول

وصلتني صورة منها ، ظليت اباوع الها مختصرة
رجعت حطيت التليفون على اذني

- ما كايل اسمه اشمدريج خليل

-اكو غيره يعني بعده روحه بيه ؟

-اشمدريج روحه بيج زينب
ابن خالي مو ساقط حتى يراسل وحده متزوجه

- ما ادري اني اعرف منو

-اشمعنا ظنيتيه هو ما يمكن غيره

- ما اعرف هو ابو بنات جان و

-دقيقة دقيقة مستحيل خليل اخذيها
كلمة مني

سكتت مردت عليه لان زرجتها بعصبية

- ما حبيتها ابد منج اطعنين بأخلاق اقاربي  ولا بعد تكولين الي جان كلتي عيب

- والله ما ادري شهد لا تعصبين
لعد منو

-اشمدريني منو اني

-اعرف لان ابن خالج ما ترضين عليه بس اني واثقه هو ، لأن عماد صحيح نذل بس ما يسويها

- اي ابن خالي وما ارضى عليه وروحي شوفي ياهو راجعي

قاطعتني بعصبية
-شنو قصدج بأراجع هاا
شنو شايفتني اعرف ولد ؟حتى اراجع نفسي

-زينب مو ابن خالي وكلمه وحده ما تقبل منج بعد

- شكر رحم الله والديج

- ونصيحة دخلي الرقم بالماسنجر وابحثيه باي

-باي

سدته هي ، كعدت معصبة بالصالة

- شنو زينب تتهم خليل يراسلها؟
التفتت مخترعة وراية مرتضى واكف واديه بجيوب سروالة ..

ظليت لا اعرف اجيب و اودي
حتى معرفت امتمت ظليت ساكته ملصومة ...

هزلي راسه وهو يصدني بنظرات افتراسية

-ما ادري واحد مرا
جر التليفون من ايدي

-وين الصورة الي رسلتها

دخل على المحادثة وشاف الصورة الي رسلتها رسالة من رقم مجهول...

-ليش عبالها ابن خالج

-لان خطبها اهواي و اني كايبة الها رايدها سالفه قديمه
ما اعرف ليش ماخذه نظرة عنه هيج مثل ابوك

لكيتها فرصة اخلصها واخلص روحي بهذا العذر

-هذا عماد النذل يمكن اعرفه اعرفه بسيطه ...

-مرتضى لا ما علينا اصير اني كايله الك وتخرب علاقتنا اكثر ما خربانه طلعني منها عدها زوج وهي تتصرف

مكدرت انام .
كدرتني حيل ، دخلت للمحادثة ورسلت الها صور خليل وية مرته بمشهد قبل عشرة ايام و واغلب الصور مبتسم لو ضاحك وشايل ابنه ابراهيم الي باللفة

بالخمس صور او اكثر  رسلت الها ..يوصل وتشوف تمت الرؤيا

كتبت الها " قبل فترة ماخذها ومسافر.
و عزل الها ويموت عليها صاير خليل عايش حياته و رجال ملتزم ببيته و عينه على عائلته بس شافها مشاكل ويه امه عزل و كلها ملاحظه تغيره اتجاها بعد ما جابت اله طفل جان راسلج وانت انسة مو وانت مزوجه
قسم بالله واثقة بيه مثل ما واثقه بروحي مستحيل ينزل كرامته و من قدر نفسه  ويراسل هو بس انرفض راح تزوج مو انوب مزوجه "

كتبت جريده ما اطتني هي مجال اكولها ريحت گلبي خليل اخ ثاني الي مهاجمتها اله مثل مهاجمتها لياسر ما افرق بينهم . 

كعدت الصبح ندمانه لو ما معصبة اووف لو الواحد بيده اعصابة يلزمها اني اعرفها عصبية اتانيها مثل كل مرة تهدأ وارزلها ما اتصير هيج بينا صدامات اووف
فتحت تليفوني ما لكيت رد منها ضجت اكثر ، اتصل ؟
لا خاف ينحسب اعتذار  اااوف لو لازمه نفسي
نزلت اسوي ريوك لعمي و مرتضى وبالي يمها عفتهم ياكلون ورحت لعمتي لكيتها كاعده ساعدتها تغسل وجه من اثار النوم وكملت من الحمام حطيتها يمهم و عمي صب الها جاي حطيت كدامها الريوك وكعدت اكل
بلكت اليوم هي تتصل حتى لا اكظي اليوم كله هيج ملامه بروحي
مزعجة بدال ما تعتذر لان ما بشرتني بحملها دخلتني بموضوع تافه ...

الصبح خلصت شغل الصبح  وهاي كويثران متصله بمرتضى وماخذه منه اذن من شورها واتريدني اطلع وياها اجهز اطفالها ملابس رمضان مدري ايش واتريد اسوي براسي ركن رمضاني .

دزتلي رقية اظل يم امها و لبست رحت الها

- كوثر يعني الا اليوم ناوي اسوي حملة ع الثلاجه والطباخ
يوه والسيراميك باجر قبل لا يداهمني رمضان

- الله يرحم قبل بالتواسيل تكلين بيضه تبقبق زيت
بعدين بعد اكثر من عشرة ايام على رمضان 

-كولي لنفسج مستعجلة على الركن ومدري أيش اكلج جديات كوثر لا نتأخر للظهر خاف رقية ما تخلص الغده

اخذنا عبرية كية ورحنا للاسواق

امشي واتكرظم مبيه حيل بس شفت كوزمتك عفتها وانطلقت اله

طلعتني سحل وبيدي اكياس

- لج ما خليتيني اخذ معطر لرضاوي

- امشي عيني ما اريد اتأخر
بعدين تعالي شنهاي عايزة انت مكياج واني ما اشتري غير باودر تاج و حمرة سحرية 

- اي بس انت مطلعة فرق بالملابس

-يا امنين الي اكلج صدك كالت توبة باخر الشارع محل يبيع كلبيات بيض  وحداري
شو ما جاي اشوف واحد

صدك ما سمعتي بالخبر مو رسلان اجت زعلانه

-يا ههههه

-ولج يكولون رجلها داكه دكه غسل ولبس اتمرعد لا واللع مرعدها تمرعد هيج مخلها تملخ شفى كلبي والله
تضحك واسولف واني هم مبتسمه بس شو سكتت وانخلست
حتى  علاكه  الفوانيس وكعت من ايدها

كلت الها

-دنكي اخذيها اني ما دنك
كوثر؟

ظلت صافنه لكدامها ودراجه خلفنا اطوط باوعت لوين ما تباوع ومخلوسه
على سيارة شرطة سيطرة ترتيب المرور على. صفحه صافة والسايق ينادي للسيارات الي بالشارع الي كدامنا ...

- كوثر؟

الربكة الي خلفها خلتها تمشي وتهب بسرعة الريح لكدام اني اخذت العلاكة و رحت وراها اريد الحك بيها  ما الحك كمت انهج
-ام رقية ؟

كلت بصوت مسموع ما وكفت ..
لحكت بيها واني نفسي مكطوع
-اشبيج ما تكليلي اشبيج؟
وين رايحين

-راجعة للبيت
-ما اشتريتي كلبية لابنج؟
- بعدين

صوتها بيه نبرة بكاء
- تعبت خل ناخذ تكسي

-ليش تكسي ياسر ما يقبل واذا عرف مرتضى شخلصني منه نتمشى للكيات
اوكفي كدامي واشري على تكسي

صعدت وراها وصلنا دخلت وياها للبيت
-شهد من ترجعين لبيتج دزي جهالي خل يجون

راحت لعرفتها

رحت وراها وحاسه بيها شي

-كوثر اول تالي هيج ترجعين بسرعة و تعوفيني  الطلعة حتى ما كمنا مشتريات الركن

- باجر العصر اكل لياسر شريد ما بيه اطلع بعد

- كوثر شنو صار منو شفتي وهيج انقلب كيانج ؟

- شفت حازم

-يا حازم
بعدين رجعت ذاكرتي للخلف وتذكرت
ها هذا اخو انعام الي بينهم صارت مشاعر عن طريقها تواصلو هاتفيا وما صارت القسمة ياسر رفضها

- حازم اي اذكرت سالفته
وين شفتيه من وكفنا

- واحد من ألشرطة لكيته يباوع عليه واحنه نشمي وتدودهت يا شهد
ما اعرف رافگتني الحسرة والشوگ لسوالفه و تفرفحت روحي ما شفت دربي ردت بس الطريق يخلص واوصل للبيت

تعجبت من مشاعرها ما ظنيتها هيج بعدها تحبه او كوثر من هذا النوع الي يحب و يستمر ويعاني

-كوثر بعد قسمه وما صارت

- شحلاته بالبدلة مرتب طالع لا وبعد كبران ومزداد رجولة لايكله عمر الثلاثين محلاه

-كوثر!

-اااه
شمسويه والله حطه بطريقي
حتى تلوع واتعذب

كامت تبجي و فرفحت كسرتلي كلبي حيل ما اعرف اشلون اواسيها

- كوثر خليج فري انت أمراة  لا تقهر شسوين بالتقيد بعد جارتج منو الهن

- لو بيته متهناية اكعد واسكت واستقر حالي حالكم  ياريت لو ياسر موافق

-كوثر !

ضجت عليها اكثر لو ما مشاقيتها افضل

خابرت مرتضى ابقى يم كوثر وخابرت رقية تكمل الغده وتظل يم امها منا للعصر ..

حاولت اطلعها من حزنها  بس ظلت متكأبه وما تغدت للعصر مليت من هالة الكأبة الي تحيطنا اني و كوثر اني لهسة اتحسر واحسب ايام حملي لو ظال كان اني هسة بنهاية لثامن الله
كان هسة ابدي اجهز اله اوليدي

دمعتي طلعت واني كاعده بالهول وحدي حتى ما انتبهت اشوكت ياسر دخل الي الا اتكلم و كال من غير ما يلحن

-منهو حبيبي انه ردي اعلية وكولي

مسحت بطرف اصبعي دمعتي وكلت

-نسوانك قابل اني؟

-لاااه انت مجانج غرفة بالگليب مقفول ما يدخلة احد

كعد ابصفي
-ترى مرتضى سولف الي على هاي الدمعات

-شكى مني؟

-لا خايف اعليج
وانه هم اعاين الج كل ما اشوفج ذبلانه اكثر ليش هيجي

- مو بيدي
ليش ابني مات من غير سبب وكف نبضة
جان هسة اتحضر لشهر الولاده

كمت ابجي بصوت وهو يسكت بيه

-ياسر وديني لامي
التفتنا اثنينا لكوثر ولأطفالها ملبستهم وهي هم لابسة

ياسر- اشعندج هيج فجأة صاير شي عند امج

-اسمها امنا

ياسر-اشبيج ولج

- ويدني لامك!
ضايج خلكي

-مو على مزاجج انه اشتغل عندج روحي خليها غير وكت ما بيه حيل اسوق

- هو اني مالي احد يباوع الي

كامت تبجي وتتكرظم على حالها وراحت
خلت ياسر ضارب دالغه

-هاي اشبيها الثانية ؟

-  وديها ياسر

-شصاير

- من تنكد عليك وتريد امها يعني هايجه عدها الحالة مثلي اني من تجيني  الحالة اجيك
كل وحده بينا عدها هم من تتذكرة تتعب نفسيا فجأة

-وانه الي خلك لحالاتجن
عمي وين مريتي ماكو مثلها الضحكه مت تفارك وجه يرد العافية

هاي الفختة رايحه يم ابوها وعايفتني يم هالنسوان

كالها هو رايح لغرفته

ورة اشوية طلع صاح لكوثر

-كوثر يلا اخذج للمشخاب

اني طلعت بعدها لبيتي   وعفته قفل البيت واخذ كوثر لبيت امي
شفت سيارة ماجد كدام بيتنا دخلت ورحت من ممر المطبخ للدرج وصعدت لغرفتي بدلت و نزلت اسوي عشا واشوف عمتي شتريد اسوي اذا زينب ورجلها  تتعشى يمنا

رحت لغرفة عمتي لكيت زينب يمها كاعده

وكفتلي من دخلت محتاره بالسلام .
سلمنا عادي شفتها عادية .
اني هم سالت عمتي ع العشا وكالت لا اسوين شي اخلي عمج يجيب كباب مشتهية

-شهد اريدج اشوية

طلعت زينب وطلعت وراها لغرفتها السابقة...

سدت الباب وكالت

- شهد رجائا انسي الي صار البارحة
ما جان قصدي بس بعد ساعة عصبية وخوف
اعتذر منج

- اني هم اشوية احتديت عليج ، كلشي ولا خليل زينب  مو قصدي التجريح ابد

حسيت اكو شي بينا صار و ثغرة ما بينا حتى بعد الاعتذار ..

ظلت يمنا لليل وراحت هي واطفال فاطمة يمها ..

ورة يومين كالي مرتضى الرقم مال عماد متأكد من ابن عمته احد ارقام عماد و رسلت رسالة لزينب

خابرتني مخترعة اشمدريه مرتضى وسولفت الها بختصار اخوها سمع محادثتنا بس اني اتلاحكت الموقف .

من بعد هاي المكالمة اشوية تراجعت علاقتي بزينب ...

خابرتني كوثر بليلة وهي صوتها مستبشر

- اكلج شي شهد اريد اخذ رأيج بيه

- اي كولي

- حازم محاجي اخته يريدني من جديد وهلمرة يكللها بس اخذي منها موافقه تقبل بيه مزوج وعندي اطفال اعزل بيها بيت وحدها  واعدل ما اخليه عليها قصور  واروح لعمامها اخطبها منهم مو من اخوها

-اها مو جنتي اتكولين ما اخذ مزوج بعدين هذا وين كان هواه من شافج الا اتذكر؟

- بس هذا حازم

-وان كان حازم ما احب هجمان البيوت كوثر

-بس ترة كل الي يجون متزوجين
والي ما عنده مرة عنده كومة جهال يريد من تبتلي بيه 

-بكيفج كوثر ...
الصبح خابرت كالت رفضت الظاهر فكرت عدل ..

اووف لو بيدي الا أزوجها سيد محمد
بس حرامات لا هو الي مزوج ولا هو لا لهسة مرته ما مرجعها لبيتهم وسمعت اخذ اطفاله كلهم لمهم ببيته ورافض تدخل احد........

▪︎زينب

حضرت رقم عماد النذل ، خسرني صديقتي الكلب التافه ماعنده غيره

الصبح شفت مفتاح خانة ماجد معلك
مممم ناسيه خل انتهز الفرصة واشوف
اشبيها هاي الي دوم مفتاحها بجيبة

فتحتها و احتاريت بيمن ابدي. 
ايدي راحت على جنطة عمل سودة
جريتها وفتحت احد سحابتها

شنو هاي ظروف الرسائل ؟

لزمتهن طلعتهم

-شسوين بغراضي
نزيت وكعتهن من ايدي اجه لمهن بعصبيه و ضمهن وقفل الخانة
-لا تلعبين بغراضي

-شنو القصية
واذا شفت اشبيها؟...

ليش هاي الخانه دون عن خانة ملابسك مخصصها بس للغراض و قافلها؟

- زينب  خانات ملابسج اني لا افتحهم ولا ادقق بيهم تليفونج ما الزمه
لا دققين وياي

راح بعدها للدوام

محمد ماخذ اولاده لبيته و اني ماعندي غير عبودي بالغرفة يمي يباوع افلاك كارتون واني غفيت تعبانه من الحمل .

كعدت مضايقة من حلم كله بزازين تخرمش بيه ..

ايام روتينية و متعبة مع الحمل والوحام و متعبة حتى بالنوم
يكولون تابعة سوتلي خالتي حروزة وكطع....ماجد من احضنه ارتاح ما تجيني بس هو صار يعوفني بعدين اعترف الي الكوابيس تجيه من يحضني

،،
بعصرية
كنت اكوي بملابس ماجد رن تليفوني كان هو المتصل

- ها حبيبي

-زنوبة حضري نفسج اليوم نروح لبيت محمد

-اوك

- احسبي حسابج نبات

-اشعجب؟

- التوم مرضى

-يا اشبيهم

- ما اعرف من يرجع ابوهم نشوف شبيهم ماخذهم يم الطبيب هسة

رحنا الهم بس صوفي وبتول بالبيت

البقية ماخذهم ابوهم وقاسم يساعده بيهم ..

للمغرب الا رجع مع كومه ادوية وابر صاير بيهم جفاف خطية . عدهم جرثومة بالامعاء

ظلينا ليلتها يمهم بالاستقبال
همست

-ماجد

ماجد

ماكو رد

-ماجد

بصوت متروس نوم
-هااا

- مكدر انام   وبطني كامت توجعني ..

دارني عليه

-تعالي يمي
غفيت وسلمتها لوجه الفجر صحينا على تكبير السيد

صلينا وهم نمت بأحضانه بس الصبح ضميري أنبني من صحيت وشفته ما كام بس ظل يثني ويمد بأيده مكسرة

كمت سويت ريوك  وهمه راحو كلمن لدوامه وبقيت اني يم الاطفال ..
وهيج ظلينا يمهم لمدة اسبوع لخاطر الاطفال .. 

شفت بهاي الفترة حنان وتعب ابوهم وياهم لأن حيل متمردين التوم اقصد حتى وهمه مرضى

،،

اووف ماجد شنو اليوم راح يبات بالهول يم محمد ويعوفني مدا يجيني نوم اكوم اشوفهم شنو يسولفون .
دخلت للهول السيد ملتفت لماجد وماجد شافني بس ما انتبه الي

السيد محمد
- ما كدر ارجعها ما اكدر اعاشرها بالمعروف
الفرق بينها وبين المرحومة ما يتقارن يا اخي
لا ثقافة ولا معرفة اجتماعية
اطفالي اختلفت تربيتهم بوجودها مجرد اطفال ايتام اتحولو الى شي ما يسر

سكت من لاحظني دخلت وسويت نفسي اخذ ستكاين جاي وفلتت للمطبخ ..

اجاني ماجد ورة ساعة وانطرح يمي بالفراش

-ماجد اشوفني اني مثل العلوية وية فاطمة لو افضل

-ليش هذا السؤال

-ما اعرف اني حيل اتحسس من هاي السالفة اخاف من تجي يمنا فاطمة حيل و احرص لا اسوي شي لعبدلله ما اسوي الها ..

-لا فاطمة ما عايشه يمنا ماخذه الحب من جدتها
واني لخاطرها متحمل بعدها ولو تجي يمنا ما اعتقد انت تقصرين

-ماجد

-نعست و مشتاق الج ترة مو عيشة هاي ليش اهنا هاجرتني

-هههههه والله استحي اذا صديق هذا جوة روسنا جاب سفنجه ونام اخاف لا يصحى

سكت و ظل يحضن و يقبل بيه .

-ماجد

-هممم

- هم تقارني بمرتك الاولى مثل

اعتلاني

-ااه ماجد وزنك
اه اني حامل اشبيك اي

زجرني
و ما ابتعد عني حسيت بقساوة غير معهودة بلمساته الي و ما يسمع لتوسلي
،،

لكن  بعدها ما نسى وتركني ظل حاضني الى أن نمت

كعدت على اصوات تقليب تليفون زعجتني ...
فتحت لكيت الضوة طالع يعني الصبح رفعت راسي شفت ماجد يمي كاعد ومدد رجليه و دا يقلب لاحظت كفر تليفوني هذا مو مالته

- شسوي  بجهازي
كلتها واني اتثاوب شمرة على وجهي عور خشمي

-ايي .

طلع هذا اشبيه ؟

فتحت الجهاز الي انغلق ..لكيته على صورة خليل وعائلته هاي شنوطلعت من مكانها لكيتها بالاستديو !

يا هاي اني مسوية حفظ تلقائي للصور ومخزونه عندي من رسلتها شهد واني حتى ما قلب بالصور ولا انشر حتى اشوف الاستوديو
عزة ماجد شنو يعرف خليل
حتى هيج يصرف وياي ؟

رجعلي واني بعدني ما صاحية من اثار الصدمة ...

-هذا شعندج خازنه اله صور ؟

- ما خازنه حفظ تلقائي من الماسنجر الى الجهاز
مرة دزت صورة شهد وانحفظن

- وين عرفج وخطبج

-شنو هذا الكلام
وين عرفني ؟
على صيت اهلي خطبني و ما صارت

-اها وخطب مرة واثنين وثلاثة حسب ما يقال من محمد!

سكتت معرفت شكول

سحب مني الجهاز

-هذا بعد ماكو
اني اعرف اشلون اصرف وياج

-شنو هذا الاسلوب وليش اصلا تفتش تليفوني وين الثقة

-ضيعيتها بغبائج
لا حول ولا قوة الا بالله ليش هيج يصير بيه

كلت ساعة عصبية ويرجع الي تليفوني بس ماكو ما رجعه الي ايام ولا رجعنا لبيتنا ظلينا يم السيد .

وطلب من ابو مصطفى  يفرغ النا غرفة

وظلينا يمهم بيها ولا يتحاجى و منطيني وجه عكر صرت اخاف اجادله لا يعصب واخجل من السيد محمد فكاتمه وضامه بگلبي

اتعدلت بالغرفة الي ما بيها افراشاتنه اني وماجد و كنتور التوم و لبست ثوب خفيفي وكعدت انتظرة تخلص سهرة الانس وية اخوه ويجيني ..
ساعة اباوع لعبود وهو نايم وساعة للسكف ...
دخل واخيرا وفتح الضوة شفته ديغير ملابسه

-حبيبي اشوكت نرجع لبيتنا

ماكو رد
يوه هم بعده كالب عليه..

- الووو حبيبي 
كمت و حضنته ، بعدني وانطرح

اتخوصرت
-هاي فوك ما ماخذ جهازي

-ترة زودتها وعليه راح اسولف الك
الحقيقة

ظل منطيني ظهرة وسولفت اله سالفة الرسالة و توسلت يطلع تليفوني حتى اطلع اله الدليل ، وشوفته رسالة شهد الطويله الي اتبرر لابن خالها
ورسالتي المصورة الها السكرين الي اخذته للي رسلي هالكلمتين

بس ساكت ويسمع ويباوع  للمحادثة
بعدين كال...

- ابن عمج عار

هزيت راسي بأي

- هسة اسولفين الي ليش ما كمل زواجكم.

ظليت محتارة اني ياما ردت اسولف اله وبأخر لحظة اجبن لا تهتز صورتي كدامه ...

- ما اكدر هسة

- اخذ مخدة وراد يطلع

بجيت متحملت قسوته

- كافي عاد ماجد
لخاطر حملي ارحمني دا ادمر نفسيتي

- لا تحاولين اجذبين تعاطفي بحجة الحمل تعبت منج اني لو اسولفين لو اشوفلي صرفة وياج

وكفت  وبراسي دكت كلماته المهينة

- لا اجذبك ولا تحذبني روح نام ولا تراويني وجهك بعد ما واكفة عليك

-لا اصرخين

- روحي اطلع

احجي وابجي واشاهك

-اطلع شنو انت صارلي ايام اتوسل بيك
وما اسولف الك شي

كعدت بفراشي وكل ظني طلع سمعت الباب انفتح

-معقد
ظليت ابجي واحجي عليه

جرني وكفني اخترعت عبالي ماهو

- مو معقد بس محتار وياج

اصابعة احسها نابته برسغي

- ليش اجذبين عليه

صحت ما مجذبة

-اييي

ندك الباب وصوت مصطفى
-عمو كافي عوفها
وعبودي كعد يبجي ..
وسمعت صوت السيد
-مصطفى روح لغرفتك

-بابا صارلنا ساعة نسمعها تبجي كله يطلع

ظل صافن عليه ماجد عبالهم دا يضربني من اصياحتنا ...

بث كلمات مثل فحيح الحية وكعن على سمعي

-خليل ويشتغل عندج سايق واتكولين ما شايفته
وكلت اني مو الله واحاسب  و ادقق
هسة محتفظتلي بصورة   وتتهمين مرت اخوج هو
شنو معناه وشتتوقعين مني

كعدت
-شسويلك حتى تصدك ما محتفظه والله

وابجي بصوت و عبودي صعد على ظهري يبجي وياي ،شالة وطلع من
يمي ..
دخلي مصطفى

- خالة ضربج؟

خالة

رفعت راسي اريد اشوف منو الي ذب نفسه عليه
شفته تقي ذولة شكعدهم الصغار

وصديق يبجي واسمع برة صوت عبود فاحط ويصيح ماما

بالكوة من بين شهكاتي كلت

-مصطفى جيبه يمي

راح ورجع

-اخذه بابا سكت عنده

..
الصبح اعيوني تحركني من البجي والسهر وراسي طبل ..
وخرت رجلين صديق عني وانتبهت اني بطرك ثوب نوم
تذكرت مصطفى البارحه دخل عليه وسكتني يوووه شجاي يصير بيه ياربي
كمت من بين صديق وتقي وبتول و
لبست

شسوي اروح لبيت اهلي واحفظ ماي وجهي والله عيب من السيد لو اكعد احجي ويه ماجد
شحجي هذا ما يتحاجى لا يصير مثل البارحه وهالمرة من صدك يضربني
كمت حطيت هالكم غيار بجنطتي و لبست حجابي و طلعت اسوي ريوك
هو بالاستقبال دزيت اله بيد قاسم
عزلت البيت و رحت اله للأستقبال

- وصلني لأهلي

ما شال راسه عن تليفونه

بتوتر مسيطر عليه لحيت
-ماجد وصلني لأهلي

-ارجعي لغرفتج

بصوت على خافة الانهيار البكاء
-لا  وديني وريحني

-راحتج بطلعتج منا

بجيت

-وديني

- اني طالع ظلي اهنا

ما قبل وصدك طلع وراها وبعد ما اجه تركني ببيت اخوه يم اطفاله ..

جنت كاعده على. العشا بس ما اكل مالي نفس وبس الاطفال يمي السيد لهسة ما رجع ..

مصطفى
-واخيرا انطاها المرجع باجر اول يوم رمضان

كمت من يمهم تقيأت شكو شي ماكلته ..
ورحت خفيفة معده لفراشي ..

اكو مرة لابسة ربطة سودة تخوزر بيه

مدتلي ايدها اظافرها وصخه وطويلة

صرخت بيها اتريد تلزمني ..

كمت مفزوعه و احد يمسح على صدري

- وخري وخري.
دفعته عني

-ماجد؟
حضن خدودي

-زينب وعيتي !؟

- اي اي

كابوس يخوف

-تعالي نامي
حط راسي على ايده

-انت ما مبدل كلتها واني الهث

-نامي معليج بيه
اسمعة يقرأ اية الكرسي ورجعت غفيت .
كعدني  صوته

-تاكلين لو ما اصومين

-لا اصوم

كمت عود اسوي الهم سحور لكيته متحضر وبسفرة بالهول
قاسم ومصطفى وابوهم كاعدين

همست لماجد
-منو حضر السحور

جاوب مصطفى الي كاعد يمي
-اني وعمي

انطاني خبزة السيد اكلت لكمتين جبن بس ريحة البيض مكدرت اتحملها كمت من يمهم واكيد حسو رحت للمطبخ لعبانه روحي تقيأت الاكو والماكو ..

رحت لغرفتي طلعت قرأني وكعدت ابدي بالختمه ...

اجاني قاسم

-هاج خاله
صفنت على صحن البطيخ

-هاي منو سواه؟
-بابا يكول اكليه خفيف على المعده

اكلته بالكوة اكو حموضه بريكي ...

عزمنا بابا  اول يوم و اشوية  غيرت جو باللمة
رقية هناك وعازم ياسر همين
والسيد والاطفال ..

رجعنا لبيتنا وتفاجات حتى الغيارات الي اخذتها بعدها ببيت ابو مصطفى

-اشعجب ماجد

- الليلة يرجع مرته السيد هاي هي

وصلنا لبيتنا بعد ما تعودت على الاطفال كلهم رجعت بس بعبودي ..
تغاضيت عن التراب لباجر الصبح الا انضف البيت وماجد ظل بالغرفة يدري بأحلامي المزعجة بس مثكل واني هم مثكلة واحد منطي ظهرة للثاني
كعدني اسوي سحور ورجع نام سويت وكعدته طلع يغسل ..
صار كدامي مفتاح كنتورة

اخذته وفحتها وظليت اقلب بالغراض ادور على الجنطة شفتها صايرة بأخر
خانه دنكت اخذها

- شسوين هيي

التفتت عليه

-لا تكلي هيي
مثل ما فتشت  بتليفوني  افتش اهنا

وخرني

- يمك اتعب باجر توديني للاهلي اظل يومين ارتاح

بقى على الاذان نص ساعة واني اكلت ومعدتي هايجة عليه
ما بيه اقرأ شي من القران انطرحت ابصفه هو يلعب بتليفونه ..
ما تحملت وهم ذبيت من معدتي ورجعت

انطرحت حط ايده على خصري و مررها لزم بطني

- لا ترحين ما اوديج

- ما اروح زعلانه بس تعبانه ارتاح وانت هم ترتاح نفسيتك
دا تأذيني

-انسي السالفة لا تفتحين ذاك الموضوع

-بس انت عبالك اني على علا

-اشش
سكتني

- خلينا نتجاوز هذا الشي بينا

- يعني اتريد تتجاوزة لعد ليش هذا الوجه مكلوب عليه
دمعياتي طلعن وانهضمت

- هشش وين تبجين وانت ماكو شي معدتج

ظليت ابجي حسيته بيه مجال يرضا
بس ما كدرت اسكت مذكرة صياحه عليه ببيت اخوه واجه من جانبي  هذا الهضم خلاه يحن و يعطف وهو الي عتذر بس مو بالكلامة بحضنه الي و بوساته الي على  راسي  ولاحت اذني

- اتصير مثل قبل ما افكر اروح يم اهلي

ندسته

-ماجد

-هشش هسة لا تبجين

كافي اذيتيني ترة

اذن واني كنت خانسة واغفي بحضنه

همس هو
-زينب كومي صلي ..
بالكوة صليت ..
كعدت الصبح على صوته يكعد بيه

-كومي اشربي

-شنو اذن؟
- اشربي افطري البارحه ماكو شي دخل معدتج

-ما ما افطر والله

-حرام والله تأذين نفسج

-لا اتحمل ما افطر.
شو ما رحت للدوام

-اخذت اجازة يومين

حط الماي على الميز

-اليوم ماكو صيام زينب تعبانه اسمعي كلامي ...

بعد الفطور صرت جنازة بس مكدر اكول لماجد يخبصني لان عاندته ..

•ماجد
جنت بالدوام وخابرني محمد

- ها

-تعال مرتك ماتت
شو بسرعة وصلت و بييت اهلي القديم
رحت و لكيت امي كاعده بالحديقة ومفرعة راسها

-يمة وين زينب

-جثتها بالهول

دخلت لكيت تابوت بنص الهول ما مغطى ظاهرة منه جثة  مكفنه
شلت الكفن و جانت زينب تخوف فاتحه اعيونها و شافيها زرك .
فزيت من نومي وراسها على ايدي
اني ما تفاركني هاي الاحلام من هي بقربي لكن اكثر حلم فزعني وكأنه حقيقة مفجع رجعت راسها على صدري و بستها من كل كتر الوحه

-حبيبتي ما عليج شر يارب

-ما ماجد عوفني
كالتها وهمهمت وغفت

-فتحي حبيبتي
كولي انت يمي
-امممم وخر نعسانه

عصرت شفتها بحلكي الا كعدت

همست بأسمي عرفتها صحت
حضنت ركبتي
-حبيبي رجعت الي

هو اني عايفها؟ هي بحضني جايه وما اعرف اشوكت حطيتها على ايدي

لكيت الي بالي اتفه من ان اعيشها بقلق و ازعلها  رغم صعوبته  عليه وكبر حجم اثرة بيه  بس هي مكانها اكبر بهواي صار يمها تافه ولو باللحظة الي خفت خسارتها

لكيت نفسي  مايل  الى ان اصدكها واثق بيها غصبا عني رغم الي مريت بيه سابقا..

يتبع
اليوم خميس ... السبت نشر الجزء المقبل اذا للعمر بقية ..

مبارك على الشعب العراقي فوز منتخبنا في ساحة اللعب عقبال متظاهرينا الكرام ونفرح فرحة مالها مثيل .

شكلي من شفت هدف فوزنا و شمتت بالنظير مالتنا 🤣🤣