رواية شيخ الشباب(بنت المؤمن) الفصل الثامن والخمسون 58 - بقلم زهراء العراقيه

مساء الورد
عدت نشرة ما يظهر لهواي بنات
#بنت_المؤمن
شيخ الشباب²
من كتابات زهراء العراقية
الفصل 23

كاعدين بالهول واشكي لأمي

-ماما راح اموت والله ليش هيج بس عليه حاقدين دمروني

- زين من كلتي لرجلج هاي السالفة حتى باجر عكبة اذا عادها عماد تخليه هو يصرف

-بس يمة اذاني ايام واني وماجد بينا مشاكل بسببه

- انت وشهد خوثات

-ماما!؟

-اي لعد يصير هي ترسلج  صور لواحد مزوج
ما يصير غلط
ويصير انت تهاجميها  بأبن خالها هم ما يصير خوثة

-مو شكيت بيه هو لان عماد جبان و مو بحالي باعني برخص

-  منو يكول هو يجوز ذني بنات عمج زهراء واختها 
رادن يخربن

-ها ؟
ما تفرق بكل الاحوال واحد منهم
بس دوم اسأل ليش هذا الكره يمة شمسوية الهم اني

- ما ادري من يوم ما اخذت ابوج و ام كرار شادة وياي
عشت ايام حنضل  مرة وتعب بسببهم قبل العزال 
تنهدت وتعب السنين بان على وجها

-ما اعرف يا يمة شمسوية الهم
الغيرة مني يكلك ضرتها عرك ونفاق
ودوم جانت تكلي ما تستاهلين حسن  عينها بعيني و ما تخجل
جنت اكول مرة صغير عقلها لان انجح من اخوته وهو والوحيد الي واصل بيهم علمياً ودينياً يمكن تغار لان احلى من رجلها واحن منه وياي
تحاربني محارب قلة عقل
ظلت تنغط عليه لحد ما ماتلي علي
و انچوى گلبي عليه

عمامج ماكو فطرة ترة يمشون ورة المرة
وهي دوم عينها على الي عند غيرها
بسببها تبهذلت و طلعت بالايجارات وكرهت عمتي بيه
ظلت لحد هذا اليوم تنغط عليه
و تتنغص عليه النعمة ما اتريدها  الي

لو اعرف شمسوية الها كاتله اهلها
وشعندي تحسدني عليه

- بهذلني ماما اكثر وحده تأذت اني
ليش ؟

-جانت اتريد مرتضى لوحده من بناتها تخبلت من ما اخذ زهراء

-خل تولي مو هو جان يريد دنيا بس هي ما قبلت لان ما كان عنده تعيين

ومن توفق رجعن يردنا لزهراء
همزين ما سحرنا

- اخذن عماد يمة خل يشبعن بيه هذا مثل ابوه وعمه يمشي وراهن

-خل يولن بس حسبي الله عليهم كلهم ،والحمدلله لا صرت لكرار ولا لعماد عفاني الله منهم ...

- هي هاي ام كرار تلكاها تتحركن من اخذتي واحد بيه كل الخير
لا وبعد بهذلناهم و شيلناهم من بيتهم
خليناهم يبتعدون عن منطقتهم
شالتها النا ام كرار واذتني بيج الماتخاف الله

-خايفة على حملي ماما التابعة مدا تعوفني بحالي

-مو حماج جابلج حرز واني خليت ابوج يجيب الج كطع هاي شنو من تابعة قوية

-هو قبل حمل اشلوني مو عاد هسة
،

بيومها صعدت لشهد لغرفتها و سولفت وياها على موضوع الصور ظلت تلوم بروحها ،
- لا اني هم ثولة لا اباوع للصور الي عندي ولا ادري شكو بجهازي
وخوش انصاديت
بس والله تعجبت ليش كاعده ويفتش بجهازي؟

- مرات مرتضى هم يسويها والكفة يفتش....سولة والله مو بيدهم...بس زوجج شعرفه بخليل

- ادري بيه هو يعرفه من خلال وكفاته ويه ياسر بالفرع او مصادفته الهم بالشارع
كايلي مرة شافه وسلم عليه

-اي هاي المرة سولفها الي خليل
نسيتها اني ذكرتيني

- صدك شكال عني ؟

-كال الله يوفقها  خطيبها مبين رجال معدل

-اها والله يوفقه هو هم
بس شغلة مفهمتها اشلون يعرف متقدم الي ثلاث مرات  ومركز وياه طلع

- اخوه يمكن كايل اله

-اووف محمد

-ها اشبيه مشيبج بتدخله بحياتكم
شو احسه حباب 

-هو  شو دا احسة طيب حيل
مدري  جنت اظنه يحب يتهيمن ويتسلط على غيره
بس احسة رجال بحاله بالعكس صار يكسر خاطري بحنيته الطيبة يذكرني بابا كل ما شفته

-اني عندي نظرة بالناس من زمان عرفته هيج شخصية حلوة
جان ببالي شي بس حريمة بوقتها خفت منج ومن امج لا تزعلون عليه

-شنو ؟

لا عفية الفضول فول

-جنت اريده لكوثر الصراحه حطيته براسي اكول لمرتضى يحجي وياه عليها
بس هونت 

- اختج مرة اجه هيج موضوع مشابه واحد كالت خطبها و رفضت لان عنده أطفال

-اي هم هذا الشي وقفني

-لا ما يتوالمون  تعاني مثل ما دا يصير وياه مع العلوية

اشوية حسيت برتياح من رجعت حجيت ويه شهد و رجعنا سولفنا

فطرت يم اهلي وبعد الفطور اجه ماجد اخذني للبيت لفيت راسي ونمت

الصبح حسيت بدوخه قوية بالكوة اتحرك،من اجه ماجد من الدوام لفيت راسي ونمت حتى لا يلاحظ عليه وهو هم نام كعدت العصر بالكوة طبخت اهوع و دايخه ..

من فطرت تخربطت اكثر معدتي والدوخه زادت ، ثاني يوم دا اريد اسوي غده لعبود ،و دخت وكعت
بالمطبخ وجهي انضرب حيل بحافة الميز قبل لا اوكع ،سال منه دم
كمت متألمه للمراية شفت خدي مجروح .
لعنت الساعة الي جبت بيها ميز طعام
للمطبخ ، قبل جية ماجد اني بالصلوات الا خليت عبود ينام واغفى وياه ..

حسيته بگرگعته بالكنتور

رفعت راسي
-ماجد اشوكت اجيت

ظليت امط بأديه و هو يبدل

-هاي اشبيه وجهج

تذكرت اللصقة الي بيه

-ها هيج عثرت وتعورت
-غير تنتبهين
راح يغس،ل  اني كمت للمطبخ وفتحت الثلاجة و شربت عصير حاسه بعطش قوي
-هاي شنو فاطرة

التفتت عليه خرعني بدخلته فجأة

-اي فطرت

-مو حجينا وكلنا

- اي الصراحه دخت مو عثرت و ما كدرت اتحملت الدوخه و العطش .

ثاني يوم هم اتخربطت بدوخه قوية
وخابرته يجيني،
اتصلت بيه ورة وقت كال
-مراح اجي محمد بطريقة الج ياخذج لبيته لا اظلين وحدج

-لا خل يوديني لاهلي  وليش هو مو انت

-ما انطوني زمنية
روحي لبيته افضل
لا تكلفين مرت اخوج بعبدلله واني اجي اخذج للطبيبة خوش حضري نفسج

سد الخط ،ما كدرت اجادله
،
بس ندكت الباب طلعت وكدامي عبودي سابقني رافع اديه لأخوه صوفي

- يلا خالة قفلي خل نطلع .

طلعت للسيارة سلمت على السيد محمد  وكعدت خلفة بوجه شابح

سألني
-صايمة ؟

-لا فطرت البارحه تخربطت

- اعتقد هبوط عندج

وصلنا لبيتة دخلت خلف مصطفى
تقي و صديق وبتول
-هيييي اجت خالة
تراكضو سو ترحيب وركص

مصطفى- ولكم تعبانه ولو عنها

- اريد انطرح مابيه اكعد

ما ادري السيد كان خلفي وصاح للعلوية

دخلت

السلام عليكم
ردت السلام عليه و اتصافحنا .

-حبيبتي تعبانه حيل على الحمل متغيره حيل

هي ما شايفتني صارلها اهواي

رحبت واخذتني لغرفتها حطيت راسي تعبانه بس اريد انام ..

انفتح الباب ودخل صديق يتخنس عباله نايمه ما يدري شفته ورجعت غمضت انطرح ابصفي و خمط تليفوني ولعب بيه

دخل عبودي وهو يصيح
-ماما ايعا ايعا

كمت واني لازمه راسي دايخه لبست حجابي

-تعال اغسل الك

طلعت وياه للحمام كلت لبتول اجيب الي خاولي

واني بالحمام انزع الطفل الحفوظه  واغسل اله سمعت السيد يحجي على مرته
-البنية تعبانه
لو ماخذه الطفل مغسلة اله انت

-ما ادري والله سودة عليه

يمي بالمرر فسمعتهم وهي ظلت واكفه من طلعت اخذته مني

-جيبي ثكيل عليج لا اشيلين
ظل  يبجي يريدني اظل اني شايلته

عفتهم ما درت بال من تعبي اله لبكائه
و رجعت لغرفتها انطرحت وغفيت ..
حسيت باحد يهمس يكعد بيه

لانها هي
لميت ثوبي عليه

-ها علوية

-سويت الج كبده اكلي لكمة وصلي وارجعي ارتاحي ..

- لا تغديت اني

-ميخالف شكلج شاحب

-اني تلعب نفسي من اللحم

-اشوية اشوية

راحت للجهال برة تعاركو ..

اكلت لكمتين حسيت نفسي اريد بعد

مممم حيل طيبة ليش من اسويها اني ما اكلها ؟

خلصتها كلها
-يوه عود كلت الها ما اكلها و نسفتها

رجعت نمت ...

هم احد يكعد بيه

-هاا ماجد

-دكعدي راح يصير الغروب

فتحت اعيوني الساعة ب ٤ ونص

-يا هاي شنو

-اشوكت اجيت

-من الثلاثة بس عفتج نايمه

-ممم مرتاحه ماكو بزازين ولا نسوان تخزر بيه
دخلت العلوية
-مكان السيد هاي الصفحة الي يحب ينام عليها، التابعة ما تتكرب الج

كالتها بشقة بس اني صدكت شو لان هو الوحيد الي كان يطرد عني الاشياء الي اشوفها اووف لو ينطوني غرفتهم اكمل بيها حياتي

-وين صفنتي كومي اخذج يلا حاجز الج اتصال اني 

بس  وكفت دخت لزمني هو و مشيت لبرة .. واني افكر لو اليوم ينيموني بهاي الغرفة  لا القطع فاد ولا الحروزة الي عندي ..
رجعنا من الطبيبة وكت الفطور
واني صافنه ضاربة دالغة بكلام الطبيبة واكول كله مني  عاندت وصمت وصار عندي فقر دم حاد حكيت مكان الكانونه يبووو هاي اشلون انام بيها

مدري من وين اجاني فيضان لبن
قطع اكلهم
واني كشيت من البرودة والثلج الي بحضني

ماجد

-ولك غبي شسويت

-اشششاااا
كمت واني اكول مصار شي

ونغص عليه العشا صديق و كامت المرة من فطورها وياي وانطتني ثوب لبسته

وطلعت شفت صديق يبجي ويباوع لأبوه الي مبين مزعله
ما انطاني كلبي اكل وهو ما ياكل

ماجد-اكل لا تزعل يلا ما سوينا الك شي ...
-صديق تعالي حبيبي

باوعلي صفح

-اذا اكلت انيمك يمي
طفر من مكانه ودحس نفسه من جديد يمي وصار ياكل وياي

رجعت نمت بالغرفة الي ذيج الايام خصصوها النا ورجعت اتعلل بنومتي

امي احتارت شجيب الي حتى اكدر انام مرتاحه و اخرها جاب الي ابوية ماي مقري عليه وأسبح بيه و غسولات و جامع دعاء حفظ الجنين  لأن صرت اتوجع من خواصري و اثار ضعف وضحت عليه
و ما رجعت لبيتي ظلينا يم السيد يم عائلة ، ماجد ما يأمن يتركني وحدي واني ما لحيت اروح لهلي ، بسبب وضع امي الصحي الخاص شهد شايلة البيت واهلي وامي و اني اجي حمل عليها
واصلا ماجد ما يقبل اروح يم اهلي
يضوج من وحده يظل صاير تعود
اهنا مكضيها يم محمد ومرات تلتم السبحه  ويجي اخوهم اسمة يحيى وعدنان مرات ينظم الهم

خلال اسبوع انكسر خاطري على العلوية حسيتها مرة حبابة بس اتريد رضاه بحيث احسها مو على سجيتها ودومها بقلق بتصرفاتها ومتعبة نفسها بس حتى اشوفه هي كدها .

من اشوية تحسنت رجعنا لبيتنا مع عبود و بتول رقيب يمي ..
بالليل

سألته من راد يطلع من الغرفة

- وين طالع ؟

- مشتهي حليب
طلع وترك اعيوني على الكنتور والمفتاح  معلك بيها منسي ، لكيت تعب ركبي زال وطفرت للكنتور فتحتها و فكي يرجف ضحك مدري ليش و گلبي يخفگ خفگ
" واذا شافني هم بصلافة ارد  عليه لا تخافين شريد يسوي يعني

مممم اشلون مرتبة بيها ثلاث خانات 
كلها غراض ما بيها ملابس
اول وحدها كلها  غراض ، عطور و دهونات شعر وجلات و جداديح و قلاقيل ..
هذا تليفونه القديم مكسورة شاشته
وهذا سويج دراجته الي ما شفته مستخدمها
الثانية لا بيها سجل و كتب 
"ممم هذا شنو الجزدلان الرجالي
شحاط بيه فتحته ولكيت بيه افلوس
"هذا الراتب اعتقد اشكد حريص مرتضى افلوسة بكل مكان ناسيها

"شبيه هذا الجيب الخارجي ..

فتحته وظليت اباوع بستغراب تليفون ؟
- شنو هذا يربگ(يبرق)برگ
فتحته و ظليت انتظر يشتغل وعيني بتوتر على الباب اول ما انفتح انغلق مابيه شحن

-اوووه يا الهي ..
طفرت للشاحنة يم السرير وحطيته ما صارت يووه هذاشاحنته مثل مال ماجد ..
فتحت المجر برتباك وطلعت شاحنة ماجد وحطيتها اله
فتحته وهو الشحن وانتظر يشتغل

ظليت اعض بأناملي بتوتر
"يلا يلا افتح افتح فضها يوه هسة يطلع على البصمة

فتح
"ياي ما بيه رمز او بصمة فتح اشعجب!

احتاريت على شنو ادخل وكنك اول ما فتحته
سمعت خوط استكان او كوب

شهكت و صرت بخفة الريح ناسية الآم  الحمل  ركضت بيه وجريت الشاحنه وياي نسيت املصة وخرتها و طفيته
و اني بيدي الجزدلان شمرته بيها وكلبي كل دكة بيه ترجف رجف
دخل ماجد

وعينه ظلت تخزر بيه واكفه كدام كنتورة  المفتوح
رفعلي حاجبه المقوس بطريقة ربكتني
خوف

- ما اتوبين شسوين بغراضي

-م م م مثل ما ما انت

راح الحجي مني بعد ضاعت الحروف

- زينب لخاطر ربج
وخرني عنها وقفلها

- روحي نامي

طفرت للسرير
-شاحنتي شطلعها اهنا واكعة

غلست وغطيت راسي كعد هو اسمع رشفة الحليب

الصبح كعدت لكيته حتى باب ملابسة الي بيها وياه ملابسي للطلعة مقفولة

-لا والقسمة زين ما قفل الغرفة كلها وشمعها بالاحمر

اف اشكد غامض هالرجال ، ما جاي افهمه هو عصبي لو هادي ، أجاوز سالفة الصور لو لا ؟، لان من ذاك اليوم الي اصالحنا بيه لليوم هو رجع عادي بس مائل للبرود مهتم لصحتي وحملي بس احس اكو فتور وياي بالكلام التصرفات
،
بس اطلب منه يوديني لأهلي وهذا اجمل شي بيه ،وداني وهو يروح للدوام الصبح يمهم وبعد العشا يجي ياخذني ، امي ما قبلت خابرته هي وكالت يجي يتعشا يمنا .

اجت خالتي من عرفت من امي اني اهنا حتى اشوفني خالتي الي ماخذه ابن عم ابوية وتعرف اخبار ذني نسوان عمامي ..
وامي سولفت الها على رسالة عماد سبته وكالت مرته  وزعلانه  كانت قبل اكثر من شهر وطلعت حامل ورجعها قبل فترة
-يعني رجعت زينه

-من زمان تخربطت على ابنها صحيح بس رجعت زينه وهاي  امها تبلتج ام السحورة

امي سألتها
-اشلون مات ابن عماد

- فجاة سكت وهمد و كطع النفس

امي
-يا ستار ما عرفو سبب الوفاة

- اهلة  الغبران......ابنها قبل ما يتوفاة بأسبوع وكع من الدرج وكعة قوية وما نزف من راسه غير تخاف وتاخذه اسوي اله اشعة شي....لا عايفته عبالها مابيه شي  مضرر من الداخل نازف وميت خلال اسبوع الولد بلحظة صاح ما اشوف وسكت بعدها مات

كزبر جسمي واني اتخيل علاوي مدري ليش لان من عمرة

خابرت رقية وكلت الها اني يم اهلي خل تدز علاوي ..
اجه بطل الساحة حبيبي وظل يلاعب عبودي ..

ورة اشوية اجت امه وعمته وراه
شهد لنص النهار بعد الغدة سدت باب غرفتها وماتقبل احد يوصل الها بس خلصت شغل والله شنو تدرس داخلة حوزة و عدها امتحان واتريد اصير مبلغة ودرس دين اخر تقلبات شهد ولا بعد امي سولفت الي ابوية يقريها ام كفشة اخذت ابوية مني

رحت الها دكيت الباب

فتحته
-شكو خير

-ولج عابت اجيكم هيج تسدين غرفتج عليج وتعوفيني

-كل يوم ولافة عباتج وجاية النا ما تكعدين اشوية بيتج
اشلون نسوان

كعدت واخذت كتابها الصغير وتقرة

- هههههه ما يلوك الج هذا الدور شهد طالبة حوزوية ههههههه
بعدين تعالي شنو هاي جاية ببيتج اني هذا بيت البابا الي ماخذته الج

-عندج مانع

- اي عندي......حبابة وخري الكتاب وتعالي اكعدي يمنا

-لج عندي امتحان الصبح والله واريد اخذ علامة متفوقة ارفع راسي كدام ابوج بس يسألني

-مممم يلا اقري
اكلج اذا لكيتي رجلج ضام تليفون جديد و بيه خط وحتى مكنك بيه على الشبكة
شنو معناها

- يقرة بيه قرأن !
يحظي اكيد يخوني واسود عيشته لأخوج

- صدوك !
هو عنده تليفون مهمل ومكسر شامرة بالكنتور بس هذا الجديد ضامه بعناية بجزدلان

سدت الكتاب وبهتمام كالت
-يحظي رجلج هذا !
يا الله بعدكم توكم شهرين مزوجين

-شهرين و ١٩ يوم 

- اووف هاي هيج سالفة تخوف

- شسوي

- لا تواجهين تأكدي بالاول التليفون لازم تفتحيه بس اشلون اكيد بيه رمز

-لا فتحته مابيه..

-ممم سهلة لعد

-لا صعبة دومه قافل بابه واخر مرة شافني فاتحه كنتور صار حذر
لا وبعد صرت اشك بيه من انام يكوم
ذاك اليوم كعدت ما لكيته دخل عليه وسألته يكلي بالتواليت

- عود هذا ابن الشيخ وسيد

- شسوي شهودة

-وهو نايم بوكي المفتاح وطلعي شوفي اشبيه التليفون و واذا لكيتي شي اخذيه كدليل لجهازج و رجعيه

-يعني ما اواجه

-هسة شوفي اشبيه بالاول

دخلت رقية

-حبابة شهد خل ادخل

-؛ولج شهيدة شمسوية بيهم بغيابي ما تخلين رقاوي تدخل غرفة اخوها

-اي اي ما تخليني من اجيهم بس تقرة تقرة ههههه اني هم اريد اقرة اقره ههههه
بس بابا خلاني بس احفظ احفظ ههه حفظت جزء ال ١١

-مبارك عيني

شهد طلعت وعافتنا اني ورقية  نسولف

رحنا الها لغرفة قداوي وهم كعدنا نسولف اخر شي عافت الكتاب وكعدت تدك سوالف وياي

كالو اجه بابا
كامت تتلكاه لان ما يدخل بايد فارغة

نزلنا اني ورقية وشافنا ابتسم

-السلام عليكم ،هاي اليوم الحلوات يمنا

سبقتني رقية
حضنته
-اي اي  البارحة يمك جنت واليوم اليوم

باس خدي ورقية محتضنته ما هدته
-اشلونج بوية

-زينه
-اكلي بوية اكلي ليش هيج صايرة

رقية- وحامها قوي قوي حتى من ماجد يحضنها تلعب نفسها نفسها

غصيت من الاحراج و فلتت من الصالة للهول يم امي كعدت
اجت رقية وهم كعدت يمي
عضيتها من زندها

-اي اي

-حرجتيني ما عندج ستوب

-ما ما قصدي والله والله هههه
تضحك بفهاوة
- عابت رقية عيب هذا الكلام

- ما قصدت من اسون شغلات شغلات عيب عيب

خلت امي و خالتي يكطعن سوالفهن ويباوعن النا

ضربتها على مكان عضتي الها

-اسكتي احسن

،
تالي الليل
مطروحة يمه واباوع اله
"يا ترى اشبيه هذا الراس

انطاني ظهرة ونام يا ترى نام صدك لو يكعد بس انام اني ؟.
هليام مرتاح مني ما ازعجة لان تحسنت على اخر التحصينات الي سواها بابا الي

ظليت كاعده ما اخذت عيني نوم ، كعدت يمه و قربت ايدي على جيب اتلمسته من خارج فارغ
رجعت انطرحت  انتظرته يلقب على بطنه ورحتله من الاتجاه الثاني هم اتلمست جيبه الثاني هم فارغ
وخرت ايدي وهو لزمها

شهكت انفاسي  برتباك مغمض و سحبني و حط ايدي على صدرة طالب اتلمسة و فهم قربي منه غلط 
بس فرصة بعد ما رجع نام من غير ملابس كمت اني فتشت بجامته زين مابيه شي رحت للمجرات افتح بيهن بخفه واباوع اله بحذر ..
رحت للتعلاكة لكيته بجيب بنطرون .
فتحتها وابسرعة اخذت الجزدلان وطلعت لحمام ختلت بيه وفتحت التليفون بيه شحن
"اووه قليل على شحنتي اعتقد ،
ما بيه برامج تواصل ؟

دخلت على الرسائل فارغة
-معقولة عارف بيه وماخذ حذره

دخلت على الارقام
اريام
امي
ايات
بان
بنين

شنهاي اسماء نسوان ؟

طفى الجهاز الشحن بس درجة وحده

رجعته واني النار تشب بيه ما عرفت شي هم ...

▪︎ياسر
انه بيت عمي بديرتي كاعدين جماعة بمضيف ابن عمي
انه بس اصفن على ابن عم ابوي يصير
رجال معدل و موجب انه سامع عنه ارمل ، نشدت عنه اهواي وعيني اعليه من زمان لحد ما عجبني حيل بس اشلون ازوجه اختي هيجي ما اعرف

لتالي الليل من راحو الجماعة جاب فراشة ابن عمي و كعد يمي

- منور ابن العم

- حبيبي سرمد
اكلك  هذا فرات ليش ما يزوج

- دوم تنشدني عنه واكلك ما صارلة اهواي مترمل

-هو عنده بس ويلاد اثنين

- اي كبار واحدهم بالمتوسطة

-هااا
جا ما يفكر يزوج

- ياسر ليش دوم تسأل هيجي
جن بالك حسبة

- لا ما بالي شي

-عندك مرة اله ؟

- اذا يطلب ياخذ ويأمر

انطيت ضوة اخضر لابن عمي ونمت ليلتها حاسب حسابي اطلع من الصبح للنجف ..
مريت على ياسمين ومرت ابوي اخذتهن من بيت خال المرة  و طلعت  ، وصلتهن ورحت يم رقية مشتاگ الها صارلي اربع تيام خارج المحافظة ،

لكيتها تلعب وية رقية الصغيره

- ياسر
اجيت

ضحكت وتلكتني

-رقيتي تعالي حبيبتي

اخذتها لغرفتنا

-جا وين اعلويي  اخيي بناتي

- طلع ويه ويه عمته كوثر

-هاي ما تكعد بالبيت

- لاهي اتضوج  اتضوج خطية خطية
راحت للدرس ويه ويه شهد

هو اني شنو الي خلاني أحتار بيها حتى لا اشيل ذنبها على كاهلي طول العمر وهي صغيرة استرها وخليها تستقر بيت هم يتيمة هاي

نسيت السالفة الي لمحت بيها لأبن عمي واجه رمضان و كضى و جابت الي ياسمين بنية سمتها امها يارا
انه اصيحها يروة ، وعلاوي حولها جروة

خابرني ابن عمي وكال جايكم خطار انه باجر

-يا هلا بالضيف و يا ميت هلا

عبالي هو واخوه ، بس طلع وياهم نسوانهم و ابن عم ابوي اجوني خطار

اني جبتهم لبيتي الي بيه مرت بوي لان اكبر وهم مرت ابوي وياسمين يكومن بالواجب

ارتاحو يمي وتغدو  راحو يزورون وبعدين يردون مبيتهم يمي
مرت ابوي كالت الي النسوان شكالن الها
الارمل جاي وياهم لأجل يشوف رضيعتي
تندمت ما خذيتهم لذاك البيت بس بسيطة  ،رحت  طاير لبيتي ذاك
خليتهن يلمن نفسهن ابسرعة و خذيتهن على عماهن ما كلت لكوثر

نزلت من السيارة من وصلنا وهي تحجي اعليه

- هسة شجاك عيني شعدنه اهنا كلت الك اخذنا لامي كلت ما فارغ

-ادخلي ادخلي

ما تحب تجي لهنا كوثر ما تحب مرت ابوي ...
،
مرت ابوي كالت الها
ما حجت شي يم مرت ابوي واخذتني على صفحة  بغرفتي
كوثر- ياسر اني ما اخذ مناك محافظات

-ولج خوش رجال وتاجر جبير عده بدل البيت اثنين
- هااا زنكيل لعد ليش جاي لهنا

-رايد نسبي والا اكيد النسوان تسفط اله تسفيط من ربعة واهلة
بس هو عاجبة ياخذ نجفية ويناسبني

-لعد ليش عمامك مو زناكيل مثلهم

-هذا هو سوة نفسة بنفسة رجال ذكي وشاطر

- شكد عمرة كلت

- ٤٠ سنة هاي هي عليج

-يا شنهي هذا خاف يريد صغيره انه ٣٨ سنة ما افيده خاف يريد وحده بالباكيت

-انجبي شنهي هذا الحجي جدامي
اتحشمي

- عنده كلت فرخين واني هم خاف ما يهتم بجهالي ويشمرهم

- شنو همه فروخ دجاج جا انه المن موجود
انطيج هيجي غير نشرط و نفصل وهمه يخيطون هم

بس هسة خل يشوف جهرتج واشوفيه
والله كريم

- بس عفية محافظات بعيده عنكم

- جا هاي قسمة زينه انه ضامنها اشوية تنازلان لاجل عيشة مرتبة

-خاف يلبس دشداشة و يحجي مثلك

-وانه اشبيه ولج

-لا لا ما بيك شي تخبل هيج هيج انسى
كدرت اقنعها و بالليل من رجعو الرجال فاتحوني وهو حجى وياي .

الصبح مثل ما اتفقنا طلعتها اشوفه. 

كعدو وشافها

راحو العصر
من ناحيتنا    كوثر اقتنعت بس باقي همة يردون خبر ...

رقية ما تقبل تروح تريد تظل يم الطفلة الصغيرة عفتهن يمنا اسبوع

▪︎زينب

هو بالحمام واني بايكة المفتاح ومطلعة الفون ولكيته مشحون كعدت على حافة السرير ..
ما دخلت ذيج المرة على الصور هسة دخلت ..
لكيت صور
عاد زين ناسي يحذفهن لان كلشي محذوف بهذا الجهاز ..

مممم هاي شنو صور كأنهم بكلية ..
ممم هذا منو الشاب الي بكل الصور متركزه عليه لو وحده ..
واكو صورة بنية وياه ، وين شايفتها اني؟
شايفتها بس وين مدا اذكر ..قربت الصورة عليها وظليت مركزة وياها
وين شايفتها وين وين .
قربت على الشاب الي وياها
انسحب الجهاز من ايدي
التفتت شفته واكف
خلفي واني ما حاسة بيه والخاولي على راسة بس اعيونه ما ينقرن

ظل يباوع للجهاز على شنو داخلة وصاح بيه صيحة هزتني هز ارتطم گلبي بسگف قفصي الصدري

ظل يباوع للصورة  وهو فاتح حلكة و وايده لاحظتها ترجف لا هو كله يرجف عصبية وتحول لونه احمر عاكس النار الي بيه كال
-مقربتها عليه؟!

وكفت امتمت
واجاني كف طيرلي خدي وكعني على حافة السرير

ووظل يصيح

- كلبة غراضي لا تلعبين بيها لا تلزميها

وشمر الجهاز وظل يدوس عليه برجلة كسر تكسر  أتقرب  الي و
همس همسة خشنة نابعة من داخل حمم بركانية، متضاربة بتضارب صدره
الي  طاخ بيه
- شتردين تعرفين
ليش تأذيني

صاح بكلمة تأذيني

-ها شتردين اتعرفين

اجفلني السؤال فاختلت نظراتي
وهو يتربص بيهن بس كأنه مو هو فاقد اعصابة وادراكة خفت ارد حرف و يتفاقم الضرب عليه
عفته يقفل بكنتورة ورحت للهول اخذ انفاسي

شفته طلع منها وراح للاستقبال دخلت بيها و نمت بليلتها تحت تأثير تعب البچي
الصبح كعدت من وقت سويت ريوك و حضرته على الميز و رحت بدلت وحطيت كم قطعة الي ولعبود الي نايم بالغرفة الي خصصتها اله وثثتها ..

وانتظرته يكعد . حسيت بحركته من كعد واكيد شاف ترمز الجاي والبيض الي حضرته اله بالمطبخ

دخل واكيد هم شافني لابسة عباتي وكاعدة ..

- راح توصليها لأهلج؟

جنت كارهه حتى صوته و ودي ما احجي وياه دهر على الكف الي ضربنياه

- وديني يم اولاد اختي
اذا متاخذني اخابر مصطفى يجيني

ظل يغير ملابسة و رحت بهدوء كعدت بالسيارة انتظرة وهم شغلتها

اخذني لبيت اخوه وفسرت جيتي للعلوية مشتاقه للاطفال وهم اضوج وحدي اغلب الوقت ماجد طالع

بينما اني اريد اعاقبة وازعل منه ما عديها اله بس ما اريد اوصلها لأهلي

من راح للدوام رسلت اله
"اذا تبات  ببيت اخوك يمي اني اطلع منه واوصلها لأهلي !"

واجه الظهر سوتله العلوية غدة
والعصر طلع وما بات كايل لمحمد بحجة البيت خاف ينباك بيه افلوس

بليل حسيت السيد حاس بينا مدري يتهيأ الي المهم اني تعبانه جنت نفسيا وبالكوة اصرف وافكر اصلا حيل اثر وحز بنفسي ضربة الي ما اعتقد انساه بيوم ويا خوفي يطلع ايده والضرب
ظليت افكر اهواي قبل لا انام هاي منو شكلها مو غريب عليه بس الصور تخص شاب مو تخصها هي بس صورة وحده
الها وياه شسالفه هذا الجهاز

ليش هيج تخبل عليه هذا ماجد الراكز الهادي ليش مرات يختل توازن اعصابة
ثاني يوم الضحى
اسمع اصياحات الاطفال و ضجيج لعبهم بغرفتي الي مخصصيها الي وما خلصانه من الهوسة...

سمعت العلوية تطلب منهم يكعدون
طلعت اغنية وعجبني اسمع اغاني

خلصت الاغنية وشو سمعت صوت كانما عركة
بتول
-والله اكول لابوية عليج واخليه يطردج
تقي
-معليج بينا

تنرفزت شلت الشرشف وكمت
طلعت شفتهم بالصالة وهي تسمح الارض بالسفنجة عن شي لزج
اعتقد بيض
لزمت بتول من اذنها وهي تعد وتصف
اخترعت

-عوفيني عوفيني
تتعقد من احد يلزمها

جريتها من اذنها مقربتها الي

-شنو هذا الزفر الي يطلع من السانج ولج
ضربتها راشدي
ظلت تباوعلي خايفة واني مخنزرة عليها
- صلفة ما مرباية يلا ولي منا
شردت خايفة  مني

وانت
-تعال تعال
شرد تقي
راحو الاطفال وصار البيت هدوء

وكفت يمها

-هاي منو موكع البيض هيج

- جهال شسويلهم

- ليش هيج ساكته الهم ربيهم ليش يعلون اصواتهم عليج

هزت متنها وراحت دخلت وراها للمطبخ

- ليش هيج يحجون وياج
اشوفج ما مقصرة وياهم

- يا عيني اني مرت ابو مو ام اذا احجي اطلع ظالمة

عفتها رجعت تنظف بالمكان ورحت لبتول
لكيتها تبجي
انطتني ظهرها زعلانه
-ما جاية اراضيج
بس هسة ماما زعلانه حيل زعلانه
منج ترة هي اشوفج
هي هاي ترباية ماما الج
نصيح ونجاوز  على مرة اكبر منا
فوك ما تخدمكم
اذا عافتكم تضيعون

عفتها تفكر بغلطها والتانيب مالتي

الظهر خلص و ماجد ما اجه
اجه محمد و دخل نام  وماجد ما اجه تغده

لثاني يوم عطلته الجمعة .

طبخت اني بيومها لان العلوية راحت لأهلها نهار ،وابوهم تأخر بصلاة الجمعة

ضوجة شو تأخر السيد للوحده
رحت يم صوفي وكعدت العب وياه كيم طوبة
و الاطفال التمو بس بتول تكعد على صفحه وتباوع تريدني اراضيها اعرفها
بس اني مغلسة عنها وما احجي وياها
ادري بيها تكعد تبجي اخوانها يفتنون عليها بس هم مغلسة
سجل عليه اثنين واني تعادلت وياه
وخايفه لا يجيب الفوز
-خالة شنهاي صايرة قوية

-ولك ما اخليك اجيب الفوز

قاسم-خالة شوتيها اخذيها باصات احسن

مصطفى-ها ولك دومي غاسلك جاي اتريد تفوزها عليه.

كلهم صارو وياي يردوني افوز وتقي يروح يركص كدام اخوه حتى يخسره وحمينا كلنا

مصطفى- والكم كلكم عليه بسيطة

- كول كول كوووووول
صحت وكلها صاحت وياي

-الثالث غسلته غسلته

كلها اصايح وياي وتغني

ظليت اهز ركبة وبصدري لمصطفى الي ماخذها جد ويباوع صفح وده يكتلني

-زينب  شنهاي
صوت ماجد
باوعت ماجد وخلفة السيد محمد ويضحكون

همست عكس صياحي قبل اشوية
-مو جبت كول عليه

عدلت شالي ورجعت لأرتكازي اضحك بصمت

بلگلبي ادردم عليهم ليش ما حسينا  بيهم من اجو ولو صوت اصياحنا عالي ..
ما كمت  كلت اكمل الكيم وعفتهم ينتظرون من   مصطفى  جاب التعادل
كمت
-يلا يلا كومو غسلو اديكم رح اصب غده

مصطفى -لوتية كملي لو شفتي نفسج راح تنغسلين
- لا عيني لا يابة اني غسلتك بس استخطيتك ترة
،،

اشلون ورطةالتوم وقاسم ياكلون بحماس لان وعدتهم العب وياهم
مثل مصطفى بعد الغدة

-قاسم نسيت اجيب ماي روح جيب

-يووه

-روح حتى العب وياك اول واحد
راح ركض ..

و استغليت الموقف واحد ينظف الي المواعين من البقايا والثاني لم السفرة و اني ع السنك واكفة اجلف وقاسم يشطفلي الماعون و صديق على الارض يحك بالجدرية

دخل ابوهم
ظليت بالكوة لازمه نفسي عن الضحك لكفني مشغلتهم 

اخذ ماي من البراد  وكال
- قاسم صرفن ردنك

- روح قاسم اني اشطف

-لا خليهم خوش طريقة لأستغلال طاقاتهم

عافني اضحك  واتلهست خليتهم يكنسون الي المطبخ ..

وبعد الجاي كعدنا نلعب يم ماجد واخوه والجهال دوخوهم بالصياح كلهم غسلتهم واخر واحد صديق كام يبجي ويحجي
- والله بعد ما اساعدج بالمطبخ ... باوعت لبتول الي كاعده على صفحة

- اذا تردين تعالي نلعب

-ما احب الطوبة

طلعت
قرص مصارعة وحطيته واختاريت نسوان للنزال

اجت متردده كعدت وخليتها تفوز
عرفت اني رضيت عليها

بالليل طلعت لكيت ماجد بعده ما رايح
ومحمد يمه
كعدت وكلت
-عندي موضوع سيد اريد احجي وياك بيه

ماجد- اي كولي

-سيد ابو مصطفى مو انت !!
كلتها بخشونه هادية!

-عندي  يمك شكوى
باوع السيد محمد لأخوه و ظل ماجد يباوع الي ما يردني اكمل من نظراته

يتبع ...

شكلي من خلصت البارت