رواية شيخ الشباب(بنت المؤمن) الفصل السابع والثلاثون 37 - بقلم زهراء العراقيه

السلام على القلوب الطيبة
يسعدلي اوقاتكم
بنت المؤمن
شيخ الشباب²
من كتابات زهراء العراقية

حزن يغتالني

وهم يقتلني

وظلم حبيب يعذّبني

آه! ما هذه الحياة

التي كلّها آلام لا تنتهي

وجروح لا تنبري

ودموع من العيون تجري

جرحت خدّي

أرّقت مضجعي

-نزار قباني

اباوع  للملزمة وبالي مو يمها ، مبتسمة
وسارحة
-زينب.   
فزيت  من سرحاني على صوت رقية

- تعالي تعالي شوفي شوفي شسويت

جانت هي واكفة كدام طاولة المكوى
وكفت يمها وصفنت

- احترك احترك والله مدري مدري

-اهوووو كلت الج لا تلحين على الملابس وهذا الحجاب بيه نسبة حرير ما اتحمل

شفتها غيمت بسبب شعورها بالذنب اجت تبجي

-مو مشكلة اصلا عتيك

-صدك

-اي جنت اريد اذبه

ما لابسته غير كم مرة جديد

كلت بگلبي همزين مو حجاب خليل عاد

رجعت على سريري احاول اركز بالقراءة  ما كدرت

خابرت فاطمة ...

- ام صوفي اشلونج

- هلا بزوبة

شخبارج

-تمام فطومة اريد اخذ رأيج  بشغلة

- اسمعج جاي عريس؟

- نعم هههه اشمين ظهر ايدج

- لا بس غالبا هاي مواضيع الآنسة

زميل؟  اخو زميلة ؟ عرف ؟

- الاخيرة ،عرف

-عن طريقماً

- شهد

- مرت مرتضى ؟!

-اي ابن خالها الي يوصلنا اقصد الي كان يوصلنا
هو شايفني ومقتنع بيه و كايل لشهد عني

- اسمة عمرة ولو ما تفائلت سايق ما ارتاح لأهل الخطوط

- لا هو مو سايق
اقصد يعني هو ما يشتغل خط فترة جامل مرتضى وبس خطنا اخذه و بعدين بطل عنده التزامات محلات مواد غذائية وعنده اسواق هو واخوته
تدرين بيهم اصحاب خير خوال ياسر

-ها نسيت ...
زين هو خوش رجال

-كل خير سمعت عنه من شهد بعد ما ادري

- عمرة اسمة  تحصيلة الدراسي

- خليل عمرة ٣٤ ما مخلص الإعدادية

-هااا يعني تحصيلة الدراسي متوسطة!

- اي بس مو سوقي
جدا انيق و

-ها هههههههههه

-ليش اضحكين

- الظاهر اكو قبول منج

عضيت شفتي بتوتر سألت
-هيج شي  عيب مو!؟

-هههههه لا مو عيب مدام الحجي بينا

هو يعني داز خبر بلسان شهد ابلغ امي نسوانهم يجون بس اشوية وقت لأن ابوهم مصارلة اهواي ميت

-هاااا هذا نفسة الي ابو صوفي راح عزاهم وية مرتضى

-اي

- شوفي الشغلة اشوية اصعب من كل خطيب  بسبب السوالف بين جدهم و ابوج ...ابوج ماخذ موقف قوي من جدهم ....

-مدري بس هو ترة اشوفه مريح جيرانه ما ابتعد عن اهلي و مبلغ شهد موافق على اني طالبه وهم هي تمدح بأخلاقه وتعرفة
وماديا موفق ...

- ما ادري نكول لأمي والحجية اشوف شغلها ...

صار علم عند امي استقبلت الطلب بتردد وانحراج من شهد واجه الوكت الي رسل خليل امه و اخته النا كعدن مع امي
وشافني

،

بالليل رحت لغرفة امي

وكفت يم باب غرفتها وهي كاعده كدام مرايتها
- ماما يوم حاولي اقنعيه بأسلوبج

- اشوفج الج رغبة
حركت اعيونها كأنها شاكة بشي

-احم تعرفين يمة لا تحرجيني اني شايفته اكيد اكو قبول مني لأن
عرف ومن خلال شهد مضمون
يعني اشوفه مناسب لا اكثر

- اعرفج اكبر من عمرج  وشفتيه لا غبار عليه كلتي مناسب ادري ماعندج شي

الله كريم اذا قسمتج تاخذيه

- الله كريم

-تعالي ادهني الي رجلية ..
،
بعدها

رحت لغرفتي والليلة امي راح تفاتح والدي

كعدت من الصبح طلعت لغرفة امي  وابوية اووه بعدها مغلقة
اشوكت يصحون؟
رجعت لغرفتي
باوعت للساعه ب٦ وربع
يووه اني كاعده من وكت شيطلعهم ؟

من حركتي وفرتي بالغرفة كعد علاوي

وركض على تليفون امه يلعب بيه

-تعال اطلع الك لعبتك

واني حاطة علاوي بحضني ويلعب سمعت صوت حركة بالممر  ، وخرت علاوي بسرعة وطلعت ومر من يمي بابا بگلبيته البيتية رايح لبرة

رحت لغرفة ماما

لكيتها بعدها مطروحة

-ماما ماما......

فتحت بنعاس

- ها
رجعت غمضت

-شكال بابا  ماما اصحي حبابة وكولي وافق لو لا

تثاوبت وانطتني ظهرها

- ماما يا حركتها بخفة من متنها

-ماما بابا وافق على خليل لو حط عقد

-الماطور ليش ناسيه

اخترعت و وجهي اصفر بابا خلفي ويسأل عن ماطور سحب  الماي ، اكيد سمعني توني نطقت سؤال لامي

ظليت منطيته ظهري واباوع لظهر امي بغباء

امي شالت راسها وباوعت النا

ابوية بصيغة امر غاضب
- روحي سوي ريوك

مشيت من يمة محنية  الراس

بس طلعت من الغرفة هرولت وعثرت بالسجادة الكاربت و كعت

دكوم ولمحت بابا  من جواي يباوع الي وهاي النظرة حافظتها عن ظهر قلب
(مال واحد ما عاجبه الحال)
كمت و رحت للمطبخ لكيت رقية صاحية من النوم و واكفة تشرب ماي

- بابا وافق وافق على خليل خليل ؟

مسحت وجهي بعدني ممجاوبة كالت هي

-صباح صباح الخير بابا بابا

التفتت هم بابا خلفي ، رحت للثلاجة فتحتها وسويت نفسي مشغولة اخذ بيض ..

رقية-ها بابا وافقت وافقت  على خليل

عضيت شفتي واني كلوب الثلاجه صاير كدامي ودي اطلع راسي اضربها ببيضة ماعدها بريك

ماكو جواب منه

-اريد بيضة عين بس مو نص استاو لا اسويها انت خل زينب اسويها

- اي اي

طلع سديت الثلاجة

-ولج الا كدامي أساليه هاا

-مو انت كلتي  البارحة البارحة ملهوفة ملهوفة اتعرفين وافق على خليل خليل لو لا لا ها ها
هلووو هلو مرتضى صباح الخير
الخير

حطيت البيض على الطاولة والتفتت على مرتضى من رقية صبحت عليه

- سوي جاي اريد اشرب واطلع

كالها بزمخ....

- خل مرتك تسوي

باوعلي بنظرة ملامة وزعل وكال

-ما اريد

رقية - هسة اسوي اسوي
لا تزعل وراحت تبوس بيه
-ما اريد
ويباوع الي
طلع

-يووه بس  لا زعل مني اووف

-ليش زعلتيه زعلتيه

-لأن يزمخ بيه كلتها هيج لان ضوجني

ورة اشوية واني اقلي بيض وادردم

-هسة الا عين خمس بيضات كليت وما خلصت اووف
اكلو مخلمة
رقية تحضر الاكواب بالصالة وتجي تاخذ الشكر ، و دارت الجاي بالترمز وراحت توديه

دخلت شهد

-صباح الخير

-صباح النور

- اكلج ترة مرتضى سامعكم يكول شنو زينب ملهوفة على خليل وكعد يحقق وياي وصاير نار هسة
كنت احط على البيضة دهن حتى تستوي من صفارها حطيت بسرعة طفر  اتراجعت عن الطباخ

-سامع !!
اني لا ابد لا هاي رقية
كملي كملي انت گلي

شردت لغرفتي سديت الباب وحطيت ايدي على  جبيني مصخن

-شنو هالمواقف البايخة الي صارت الي
بشارة مو خير اوووف
ما اشوفهم وجي اشكد عيب مكفاني بابا طلع مرتضى سامع

ظليت بغرفتي انتظرهم كلمن يروح لأعمالة و اتصلت بفاطمة سولفت الها الي صار لامتني ...
،

-افتحي الباب ليش مقفول

هذا صوت ماما

دخلت
- اشبيج ليش ما طلعتي تاكلين
روحي تريكي

-ما اريد ماما

-بس لا مسوية هذا التايت
ولج لا اصيرين مسلوعة روحي اكلي شي

- ما مسوية دايت بس
بس
ماما مرتضى زعلان ؟

-شنو زعلان كلشي ما بيه صاير شي بينكم

-لا هيج مصاير

-راح للدوام وابوج طلع ... روحي اكلي لا اظلين بلا اكل .... وبالنسبة  للموضوع ابوج بالليل سدة ما اهتم اله ، بس هسة قبل لا يطلع كال خل اكعد ويه الولد واشوف كلمته !

مم اعتقد لأن شافني مهتمة سألت أمي

-ها صدك
زين هو مو يعرفة

- اي يعرفة بس هسة يريد يكعد وياه كعدة خاصة بالموضوع ويشوفه كد الي قادم عليه وينطيه فرصة ..

ومرتضى ايدة يكول ننطيه اصلا 

-صدوك  اووف ماما مرتضى سمع شي سخيف وزعل

سولفت الها

كالت لا عادي ينسى رقية ما ينوخذ على كلامها

-ماما خاف عباله عندي علاقة بيه هو كان السايق

- لا الرجال  الخط عايفه مو مستمر وياج
قابل ما يعرف اخته
واضحة الشغلة انت صادته و اجه من الباب

تباوع الي مثل الي شاكة

-لا لا ماما ما تعرض الي ابد ابد

سوت ايماء بوجها مال واحد ما مقتنع

لكن ما لحت وياي
اختصرت الكلام بجملة

-المهم مدام عرف الطريق الصحيح نمشي وياه للاخير والله كريم ولو گلبي لعب منه
بس امه خوش مرة

اليوم بالليل موعد خليل وية بابا مثل يوم امتحان عليه

عفته بالاستقبال وية بابا و مرتضى ..

و رحت لشهد لغرفتها

-شهد يا ترى شنو النتيجة

-مدري مرتضى حيل متعاون و هو مثل الي جاي يسعى تصير
بس الخوف من ابوج ورجل اختج الي بالطريق
-شنو ابو مصطفى جاي !

-اي كالي مرتضى

-لا خربت اني اكلج خربت

اكلج شنو لابس خليل من  طلعتي سلمتي عليه هاا وشعرة اااخ شعرة ما كدرتي اتقنعيه يكصة

- لابس قميص نيلي وبنطرون كابوي بوري ممم
وشعرة شادة للخلف كعكة

- لا ياربي
اوف شعرة بطول شعرج يا شهد ضعف طول شعري
واهلي واشلون ما تهمهم هاي السوالف

ساعة مرت و صارت ساعة ونص اني كاعده يم شهد بغرفتها على سريرها مرتبكة وبابا وابو مصطفى مستفردين بيه...

شهد -طلع طلع

-اشمدريج

-هاي رد على رسايلي خل اخابرة

رحت قفلت الباب ورجعت يمها . فتحت مايك

-ها خليل بشر

- ها

-اني اكلك ها شصار اشلونها المقابلة ...

- ما متفائل بيها

- ليش شصار ابوها شكال

-ابوها زين نوعاً ما بطريقة كلامة وياي 
رغم احسة مو كلش عليه علامات القبول . 

- يعني شنو مراح يوافق

-ما ادري كلها بصفحة وهذا نسيبهم بصفحة
متكبر يحجي وياي مشمر تصوري بكل احتقار يكلي " وهذا شعرك بعد الزواج هم تخليه هيج !

-يا

-لو شايفة طريقة كلامة اشلون يحجي وياي حسسني اني صغير ما اسوة

اشكد اكره المعممين ويحجي وياي بقلة خلك والله العظيم لو مو اني السائل  واحتراماً لابوها جان اضربه على اسنونه اطيحها

فركت جبيني بتوتر وحسيت الموضوع خرب كله مدام محمد ما مقتنع كلش

- انوب يكلي والحشد هم تجيك الحمية واتروح اله فجأة  وتبطل لو استقريت !.

سدت الاتصال وية خليل حيل معصب من محمد ..

-شهد اثري على مرتضى و بلغية بغلتج الخاصة اني عندي قبول بهاي الزواجة

-قصدج مرتضى يجبر ورجل اختج يكسر و منو الي راح يأثر على ابوج اكثر يا ترى ؟

- ما ادري  ما ادري

من عرفت ردة فعل محمد زادت رغبتي بخليل لأن الإنسان حيل منطي نفسة اكبر من حجمه بحياتنا
اكره  تكبرة حيل
كسرلي خاطري خليل  كان يأس و ضايج

من طلعت من غرفتها تندمت على انفعالي مهما كان هو زوج اختي الكبيرة ما كان لازم هيج احجي عنه كدامها . 

مرت ايام محد اتكلم بهذا الموضوع كدامي واني اجنبته بعد المواقف الي صارت لا اثبت التهمة عليه احس مرتضى شاك لان كان يشتغل يمنا ..
مع هذا رجع طبيعي و شهد من سألها اتكول ما ادري الخبر يم اهلج اخوج ع الصامت ما اخذ منه حق او باطل

اني  بهاي الفترة اتغيب وارجع اداوم لأن مسؤليات عندي لو شغل بالبيت لو طلبات من فاطمة اروح الها تطلع الي المشاغل ....

من مر اسبوع اجتني شهد للمطبخ

- زينب وينج

-بالخلفية جاي اگلي دجاج ..

الخفلية (منور للبيت، المطبخ و غرفة ماما وبابا شباكها عليها  و بابها من المطبخ طالعة  ..  طباخ منضدي بيها اطلعه بس بوقت تقلاة الزفر وارجعة اضمه من اخلص ماله مكان  ..

- ها

- ابوج وافق على خليل

-صدك  ههههه اشعجب

-اشوف الضحكة توسعت

- اثق بخيارات بابا اكدلي خليل مناسب

- بس كالي مرتضى هسة مو موافقة موافقة
توه الا  فكر    يسأل ويطقس عنه الا يوافق

-حيل ههههه هذا الاسبوع بس يلا ياخذ قرار يسال عنه لو لا ههههه

-اي رجل اختج كلش قافل على ابن خالي شدعوة

- هاا هيج لعد زين من وافق لان محمد اله تأثير على بابا ..

- بس حبيبي مرتضى موافق وخلة ابوج يوافق

-رضاوي ههههه
اي جان قبل ولا يأثر بيه بس هسة من صار ثلاثين جاد صارت عنده كلمة عند بابا

- هههههه ترة اكتلج على هاي ثلاثين صاك لا هذا مالي بس اني اتغزل بيه

هزيت ايدي وكلت
- كلت جاد ترة

- اروح يمة
وتركص بحواجبها

-يوم الجمعة  ما ينزل بيه مرتضى صاير معلك فوك

ضحكت وراحت ...

جمعة كاملة .. و همه يسألون اقصد بالجمعة الكاملة اسبوع من الجمعة للجمعة ، ...
وشهد تهدي بأم خليل ضاجت من التأخير وتحجج الها بحجج واهية ..

مرتضى حتى ما كلف نفسة يسأل عنه
عندة شي روتيني يكول اعرفة معرفة شخصية هو وياسر لا غبار عليهم
اني انتظر بابا و سيد محمد يخلصوني من تعقيدهم ... الصراحة حيل رغبتي زادت بهذا الزواج حتى بشتياق اله احس ...

بالليل اباوع على تصويراته الي ترسلهم الي شهد  ...

رحت لكنتوري اتفقد هديته .. لزمت طرفه واني اتخيل ادية وهي تختارة وتتخيلني اعيونه

ابتسمت

-خبال  اي والله خبال فرض نفسة فرض غير اهلي يرحموه ويرحموني ..

اشكد حلوة هو يوصلني ويرجعني واني خطيبته هههههه ما اعتقد راح يكعد عاقل بس اني اله بالمرصاد  الا اتغلى عليه ما ادور سنة ابوه الا شاعلة نار نارة هههههه

التفتت مخترعة بالضربة على رجلي

- اليد ممو ممو

- كول ممة مو صرت رجال عليوان

تعال  راح يصير عمرك سنتين و لازك الها ابو السان

- دبي (انجبي)

-عابت كله مني علمتك عليها

سويتها وحطيته بسريره يرضع  

رقية خلصت قراءة قران الليلة ليلة جمعة ودخلت لفراشها
اول ما انطرحت اني عاف مكانه واجه يمي انطرح ولزم ظفيرتي الي طولها وية طول رقبتي تعاني من الهزل !

- علاوي تعال يمي

مغمض اعيونه وحاط راسه   على صدري

رقية- تعال يمي علاوي

- خليه يمي

- ليش اجه يمج مو يمي

- علاوي ابنا

ضحكت
- مو ثنينا خلفناه خلفناه وحدي وحدي جبته

- هههههه اني ابوه وانت امه  احسبيني ببدال ابوه الي صارلج اهواي مادازته غير مرة لو مرتين عصريات

-ما ما انت وشهد اهنا اهنا  اتركضن اتركضن وراه
اهناك. اهناك ما ادير اله ياسمين بال بال  راسه راسه خاف ينفجر ينفجر

-يوه اسم الله
افكارج صايرة سودة

- اشتاقيت اله اله اهواي

- واني هم

-اشتاقيت لياسر

- هههه لابن خالة بس هذا سر بينا مو اتفضحيني

- ياهو ياهوو هااا

-  خليل اشبيج  انت

صفر هدوء الليل و نيمنا

فتحت اعيوني اليوم جمعة  خلصت شغلي اليوم  و قل واهسي من سمعت اليوم بيت فاطمة يجون يمنا جنت ناوية اطلع للجلسة ادري بيه ينتظرني !

رحت اكتب قائمة لمقتدى
مقتدى
-يلا اريد اروح هسة امنين طلعتو الي بسالفة السوك

- اسكت خل اركز

هاك
هاي مو تنسى شي

-وين الافلوس لعد

-هم عوزي انطيك مني روح لأمك

- اشبيج اصيحين عليه

-ولك لا تنتر 
لزمته من ياخته.

مرتضى وهو ينزل من الدرج

- اشبيكم انتم بس تتناكرون

مقتدى-هاي حاسبة نفسها عليه جبيرة

-وهي هاي الي تهيههك

مرتضى- لا ترادد و اصخر

مقتدى-هو بس اني كدرتكم عليه يوم اكشر الي صرت بيه الصغير
لو اني مرتضى جان اشبع هاي دك

يمشي وصل للهول ويدردم
-ترة سمعتك سمعتك

جنت حباب  ليش هيج صاير

مرتضى-لا تركزين وياه مراهق وجاي يكبر احترميه اشوية

شراح اسون غدة

- سمج شوي و تمن احمر

الساعة بهدعش اني واكفة بالخلفية بالتنور الصغير حاطة شواية سمج و اشوي بيه وبالثاني الكبير اخبز  
وملثمة وجهي لا يتحسس منه وامي وفاطمة بالمطبخ اسمع سوالفهن وشهد يمهن تثرم زلاطة ..

خلصت سبحت و اني على ترقب الرد ..لبست صاية سودة عريضة و حجاب ورقية بالمثل ..

صبيت غدة و مقتدى ومصطفى يحملون الصواني .. بقى اللبن اخذته ورحت للسفرة اخليه .بس بابا و السيد كاعدين  ..
سمعت سيد محمد
-من البداية كلت الك لا تسأل  اصلا وتتعب من هيأته..

من اتقربت يمهم شافني وسكت ،اجني امي وفاطمة والبقية 

يوم مرهق .خليت شهد تعزل المطبخ واني سويت جاي ودخلت لغرفتي لكيتها مقلوبة من قبل ولد فاطمة وعلاوي ..
كعدت بنص الهوسة والغراض المنفشة وصافنه افكر بكلام محمد ..بس لا يقصد خليل

دخلت فاطمة وبيدها استكان الجاي ..

-زنوبة تعبناج اليوم

-اي كلش

-عابت

كعدت يمي

-صدك  مرتضى راح يكول لشهد تبلغ قريبها برفضنا

التفتت عليها التفاته منفعلة

-من ورة رجلج اعرف والله كنت متأكده

-لا ماله علاقة اشبيج هيج تحجين عليه

- لا اله
شفته على الغده اشلون كاعد يزن باذن بابا كله منه
معقد حكم عليه من مظهره

- زينب لا تحجين بنتر هيج وياي وعلى رجلي 

-غير كله منه واحد عكرة ومتسلط شعليه بينا يدخل بكلشي بحياتنا

-زينب !

كمت وخرت ابنها عن كتبي بعصبيه

- يقنع بوالدي لا يوافق وهو الي أخرنا ما محتاجين سؤال مرتضى يعرفة اصلا
دوخر

دفعت تقي

- غبية  اشلون اترفعين صوتج هيج عليه
و تحجين على محمد بهذا الاسلوب
ولج انت ربى ايدي

-فاطمة هاي الحقيقة لا ازعلين مني زوجج متسلط على حياتنا ...

-لان مثل اخوج الجبير وتدرين يصلح يصير ابوج وهيج تحجين عنه بهذا الاسلوب وهو خايف عليج
نسيتي ياما كعدتي بحضنه

-دسكتي عاد يا مثل اخوية
مرتضى ما عندا السلطة الي عند محمد بكلشي  حاط كلمته
اشبيه خليل وهيج  ماخذ عنه نظرة
لا بايك ولا ناهب باسم الدين

ضربتني بخاشوكة الجاي بعصبيه
- لا  تخربطين  بالحجي واشمرين بالكلام
على محمد فلس حرام ما مدخل النا لو يقبل الحرام جان احنه هسة عدنا قصور

عافت الاستكان وطلعت مطلعه وياها أطفالها  بعصبيه ..

صديق قبل لا يطلع
حضني من رجليه الي وصل الهن وطلع

كعدت طالعة روحي و گلبي يوجعني

المغرب من فرغ البيت علينا صعدت لشهد ..

لكيتها كاعده وصافنه على الفراغ
حزينة
-ادخل

-طبي

- شهد انت زعلانه لان اهلي رفضو

دنكت راسها .

-شهد .... مو بيدي بلغيه اني اهلي صعبين بس اريد اعرف ليش بابا مشى ورة محمد ورفض من غير سبب

ما جاوبتني شهد ..

نزلت ...صار بطريقي مرتضى

- جنتي يم شهد

-اي

-كالت الج رفضنا خليل

سكتت

- محمد مدور وراه و طلع  جان يشرب

-شنو!

-ما كالت الج شهد سبب الرفض؟
هزيت راسي بلا

- من جان صغير
أتصلت
عاتبت ياسر وحلف الي بفترة بأول طلعة اله جرفوه اولاد عمه
هذا الكلام صارلة اكثر  من عشر سنوات
واعتيادي  كبر و عقل  بس ابوج متعود اكبر ذنب سواه ابنه حبة ل الآلات الموسيقى  ... الشرب عدة من كبائر الذنوب ما يغض نظر عنها الصراحة اني لو عندي بنية هم من المستحيل انطيها
لأحد كان يشرب
هسة متفهم لان شابة مثلة و متفهم الوضع بس الخوف الابوي شي ثاني

صدمتي كانت اثنين الاولى بخليل
والثانية بمرتضى كأنه يواسيني وحاس برغبتي بيه !،من اشوكت من يتقدم الي شخص وتخرب يوكف يبرر و يبدي رأي بهتمام  وعناية !

بين ما اني لازمه نهاية المحجر بيدي
أنتبهت اله شفته يباوع الها ...حطيتها ورة ظهري و عكبته ورحت للحديقة

كعدت على الثيل المبلول الاصفر مثل العشب ما اهتميت للرطوبة و ايدي على صدري ،حرارة دموعي تشكي الالم روحي

ليش هيج يصير وياي

ليش

احتركت مهجي بنار تتلفع بحسراتي
ردت اصرخ واصيح لكن حنجرتي كأن بيها حصو وحجار مثگل عليها النطق

شفت رقية جاية الي ..

-ليش تبجين تبجين

كعدت على ركبها كدامي ولزمت خدودي

- خربت طلع خليل عنده ماضي
خربت

باست دمعتي

- هسة اتروح اتروح الدمعة ..

عيوني تنزل دموع مثل المطر و خدودي صحرة  ما تروي وتشبع ،  احتضنت رقية و طلعت كل الاهاتي وما حسيت گلبي ارتوى من حدة حزني

بالليل الا كدرت الملم اثر صدمتي ..

شهد اتهربت ما تعشت ويانه فما شفتها
كعدت بغرفتي دزيت الها رسالة عتاب

-اذا جنتِ اتعرفين ليش ما بلغتيني كان حطيت اله حد  وما صار بينا وعد
ولا حطيتج ويه اهلي بهذا الموقف

ما ردت 

حسيتها غبية وظلت منحرجة لو ما مخلية نفسها بهذا الموقف

بعض الناس تحتفل براس السنة
الا اني متكدرة ومشائمة من بداية السنة
دخلت عليه دخلة قوية واذت گلبي مرة ثانية ...
مرت الايام ورجعت تقوقعت حول نفسي و رجعت اعاني بالتوصيلات راح خليل وحتى اخوه  راح ..
،

بيوم اخر امتحان الي  رجعت من وكت الظهر للبيت
ابوية وصلني ..
و طلع  جاينه الصبح تبليغ من المحكمة  دعوة لحضانة علي !
ونفذ ياسر انذارة النا

بعد جحود رقية و عجز اهلي وياها من نرسل علي تكتل نفسها بواجي

و بلغنا بلسان شهد من مل يريد يدير حضانه الولد اله اذا  ما التزمنا وياه ...

التزمنا اسبوع وديناه لنصة و طلبناه رأفتاً بحالة رقية تخربطت ..

و بعد ما دزينا غير عصريات ويه شهد بس ما توقعنا التهديد يتنفذ كنا واثقين لان اخته كنتنا و مراح ندخل بهيج مشاكل .

راح العصر مرتضى يحجي وياه ...
رجع وكال ياسر يكلي افصل بين النسب الي بينا و حقة بعلي، اريد اربي ابني يمي اسقط الدعوة بحالة وحده ترجعون الي امه .

موعد الدعوة بعد اسبوع وصارت عدة. كعدات  بين مرتضى وياسر 

اخرها طلبه بابا يجي لبيتنا رفض  ومرتضى بالكوة اثر عليه و قبل يجينا ياسر ...

بابا يعرف ياسر يربح الدعوة وياخذ علاوي منا لهذا كان يريد يتفاوض وياه .. وطلع بابا مرتضى ومقتدى من الاستقبال و طلب يحجي وحدهم !

▪︎ياسر

خابرني مرتضى واشلون انحرجت منه من ذكرني بسالفة خليل القديمة وشرحت اله جان صغير وفترة قليلة وابوه منعة وكبر وما رجع اله
بررت اله بأحراج ولعنت الي موصل الهم سالفة عتيكة ناسيها اني وغافل عنها

وخابرتني شهد تبجي منحرجة من اهل زوجها ما تدري بالقصة ..

سكتتها وكلت الها لا تحجي بالموضوع وياهم تتصرف طبيعي قابل انت كفرتي ..

،
اجاني خليل المغرب  الدنيا طالعة من عينه

كعدتنا بالاستقبال دائما،
- دريت انرفضت ولك يا كلب ابن كلب نابش هيج سالفة عتيكة

- هذا رجل اختهم منبش وراية على هاي السالفة قديمة

-بس لا سالفة شربك

- اااخ حظ اريد حظ امنين اجيب الي
ما توقعت بيوم هذا السبب الي انرفض عليه.
فترة من عمري طايشة هيج تدمر الحاضر

- اشكد تعبتنا بوكتها و نصحناك وابوك تعب وياك الا بطلت
هو صح طيش شباب بس يا اخي ظل وياك للأبد

-لا تلوم اني طالعة عيني من الدنيا هسة

- هاي منو كايل الهم احنه  صحبتنا كل خير تكول عنك

منو ابن هالحرام هيج خرب قسمتك

-ما ادري ربعي كلهم دخلتهم انذار ومن اجو سألوهم كل الخير كالو عني

-وما جذبو انت هسة تستاهل نسبهم
بس منو هالابن الحرام الي ذكر شي قديم صارله سنين طويلة

-ما ادري وين بعد ينطوني مرة وين

ما صارت خطبته ولا نصحته يحاول مرة ثانية بس يحرج نفسة ابوهم اعرفة ... اخ بس لو اصيد الي سأليه
الا انهي حياته
خليل حاله حال اهواي من الشباب يغترون بفترة طيش فلت عيارة  و تعب ابوه  وصار يقلد ويسهر وية  احمد وجماعته
بس اشهر وابوه اتلاحكه  وبطل قبل ١٢ سنة  اكثر من ١٠ سنوات
مرحلة وعبرها اني اكثر انسان اعرفة ..

عفته بالاستقبال بالليل وحده مطروح على فراشة ويدخن ورحت لغرفتي

لكيت ياسمين تنتظرني

- خطية خليل ضجت اعليه

- هو الموضوع كله جان صعب

- همه ليش رفضوه

- صدك انت اشمدريج هو انرفض

-كوثر كالت  بس ما كالت الاسباب

ما جاوبتها وتعرفني ما عادت السؤال

-علاوي هليام ما يجي

- حيل مشتاق اله
امه تتخربط من ياخذوه منها

-ها

-اجاها ابنها ملفلف شتترجين منها

- كله مني حگك عليه

-  مو صوجج

شي وصار

لمتها اهواي كسرت خاطري ما اريد اظلمها وياي واظل احطم بيها

حطت راسها على ذراعي

-ياسر اذا قبل ابوها بيوم ترجعها

-اي وانه كايل الج من زمان

ام علي اذا قبل ابوها اردها لخاطر علي

سكتت و ابتعدت عن ايدي نايمة على الطرف الثاني ...

-لو اتعرفيها  ما جان غرتي وابتعدتي

-تبقى مرة والمرة الثانية مرة

- انت الثانية و كايل الج انه وهي  ملاك  روح طفل لا تحسبيها ضرة

،

تمادو وياي و حجتهم رقية تتعب و صرت ما اشوف علي الا وين وين حتى من اجيبة شهد ما الحك اعليه بالشغل انه

بعد فترة وبعد طول بال وصبر اخذت قراري اخر محاولة وية الشيخ اما اخذ ابني منه او ابني وامه سوة
ورفعت دعوة اسقط حق الام بالحضانه واخذها الي
.....
من طلب يشوفني الشيخ  كنت رافض ومتردد لكن لخاطر مرتضى رحت

حطيت بتوقعاتي قبل لا اروح الهم تفاوضة موافقة على رجوع رقية لعصمتي .... وهم حطيت العكس

كاعد كدامي بعد التنازعات الي صارت ودارت بينا  كاعد كدامه من جديد على نفس الموضوع

-عمي اني ما طالب غير ابني يمي
والاحترام و التقدير ال بينا ساير
وحياة ابني واجب عليه اوفرها و يعيش تحت انظاري ...انه ابني جاي يوعى عليكم اكثر مني

سكوته طال وهو يباوع لسبحته 

-اذا ارجع الك امه شنو الضمان  الي ما يمسها ضرر ؟

سؤاله احتاجيت وقت الا لملمت اله جواب

- الي اتريده ..

- شنو الضمان هي راح ترعى ابنك ؟
هي نفسها اثبتت ما تكدر ترعاها

غلطت غلطة عمري وضلل عليه النصيب وقدر الله وصارت هاي الزواجة

بس أثبتت فشلها بتي تحتاج الي يرعاها اكثر من ابنك نفسه

ابنك يكبر بس هي وضعها دائم ...

ليش ما تنتظر  هو يجيك ويميزك عن الكل
الا اكلك ليل نهار تبجي من تبيت علي يمك

- بس ماجانت هيج

- من وكع علي لليوم وهي وهواسية
حتى صايرة تعاندني ما تسمعني الا يرجع الها مثل الطفل الصغير

اذا ترفع دعوة تأخذه ضامن الك

بس تكتلها للأبنية ...

- شكلنا مراح نوصل لحل ..
انه اخذ حضانته واربية ويه اخوانه اوعدك اشوكت ما رادته ادزه لها بس يربى يمي

انتهت الكعدة وما صار الي اريده
ولا وعدته بالي يريدة كل واحد بينا خايف على مصلحة ابنة .....

•زينب
من قربت موعد الجلسة بابا صار يفكر بجدية يرجع رقية ولا يوكفها بالمحكمة
،،

بعصرية

زرنا وخلصنا و اخذنا مرتضى تعشينا برة اني وشهد ...

توسلت اله شهد يفرنا بالاسواق كال تعبان .

رجعنا نزلت فتحت اله الباب ودخل واني سديتها بعدهم ما نازلين سمعنا صوت صراخ امي قوي رج مسامعنا و فجعها

- بتييييي

جمدت رجلية واني اسمع البواجي والصيااااااح القوي المفجوووع اجاني علي يركض خايف واعيونه جاحظة مخترع احتمى بعباتي بين ما اني جامده
بمكاني ومرتضى ومرته ركضو للداخل ..

اسمع مات ماتت مدري ايش

اني رافضة ادخل واشوف شكو

يتبع ...