الذنب 33
رواية...ذنب عينيك...سلالة العنفوان
بقلمي...نور سمو العراق
💔💔💔💔💔💔💔💔💔
ولكننيّ مملوء بالقلق يا الله ، ذلك القلق
الذي ينبُت على أطراف الليل يُرافق
الروح الوحيدة ويملأها بالتعب والشرود
..............
قربئ...
اليوم كعدت واني علئ نار مشتعله كاعده حزن اجتاح روحي واستوطن بنص صدري واستعمرني ما اعرف حسيت الحكم راح يكون اقسئ من القساوة
كعدت من تلاثه الفجر صليت ودعيت ربي يحفظه ويكون الحكم عادل من ناحية ذياب....
ما اعرف الي صار بيه شنو والرجفه الي صابتني من الفجر لحد الان ما تريكت ولاتغديت رغم هم تغدو وتريكو وجانو صابرين ومحتسبين
جنت بحالة ذهول حتئ اليحجي ويايه ما اسمعه ولا حتئ اكدر انطق
حسيت الوقت صار طويل ولاسمعنه عنه خبر التجئت للنوم الكاذب حتئ اقلص الوقت واشرد من هل عالم الحقيقي...
ما كدرت انام ولا غمضت عيني كعدت وشمرت الغطاء من جسمي وروحي هايمه مشيت بخطوات كلها وجع بالبيت
عندي رغبه اريد اصرررخ بصوت عالي اريد ابجي واصبر،نفسي ما ابجي واكول ميخالف قربئ اتفائلي ان شاء اللة يارب يكون بخير ان شاء اللة يكون الحكم عدل الناحيته لا تنوحين ولا تبجين لا تفاولين عليه يا قربئ...ادعيله
بس سرعان ما لكيت نفسي ابجي ولكيت دموعي مبلله وجهي بجيت من كل كلبي،ومن وجع عايش بصدري وكل ما ازيد من بكائي ارجع وكأن اني ما نزلت دمعه اليه وارجع انوح من جديد...
رجعت دخلت الغرفة خالتي فتحت كنتورها لكيت مخليه صورته علئ الحافه مال الكنتور سحبته جانت صورته من ترفع نقيب يعني قبل لا اتعرف عليه
دحكت للصوره وعيوني تتأمل طوله عيونه ضحكته كل شئ حلو بي كل شئ بي يختلف او يمكن لان اني احبه من كل كلبي وبكافة مشاعري وأحساسي
حطيت الصوره علئ صدري ضميتها حيييل كانو اضمه هووو
شهكت بصدمة...عزاااا شكد صارلي مفاركته عزا اني،شكد لئيمه شلون هيج مفاركته وساكته اني شكد حقيره شلون ما متت من فراكه
كعدت علئ ركبي وابجي وحاضنته...اعرف هو مو بخير اعرف ذياب ما يتاقلم بهل وضع ما يعيش حياة السجن و بسببي شهكه قسمت صدري نصين خوف ورغب مثل واحد منتظر الموت اليوم يا اما اموت يا اما احيى
ما اكدر اعيش من دون ذياب ما اكدر اكون وحيده بهذا العالم مااكدر اكمل من دونه ما اكدر...
بست الصوره حييل وترستها دموع اليوم هو بنفس اليوم الي،اني وكفت بي بزنزانة السجن مضلومه محرومه عايشه بذنب مو ذنبي انحكمت حكم قاسي
راح يعيش ذياب مثل شعوري مثل احساسي،ورعبي،وخوفي وقلقي راح يحس بيه اكثر نفس،الموقف نفس،الوكفه نفس المعاناة عشناها يا ذياب شربنه من نفس الألم والوجع....
ذياب ما تستاهل اليجرالك رب يخفف عنك مثل ما خففت عني وطلعتني من غياهب السجن
ضميتها بالكنتور وتحسست بطني طفل نايم بين احشائي ...ادعي الابوك حبيبي ادعي الابوك والله اذا ذياب طلع سالم غانم انت تتدلل تعيش،بحب ابوك ودلاله حبيبي انت ادعيلي...وادعي الابوك ...
ضلينه منتظرين علئ،نار بخوف وقلق والم شوكت يجي فاروق ويفرحنه ولو صار عندي نوع من اليأس ياست للحظات واحس شيبت من القهر
وبعدها نهرت نفسي بغضب،لااا يا قربان لا تياسين من رحمة رب العالمين حرام عليج
يا راد يوسف اليعقوب رجعلي ذياب وفرجه عنه يارب..يا مخلص يونس من بطن الحوت خلص ذياب من السجن...
لا إله إلا انت سبحانك اني كنت من الظالمين
ردت اشوفَك حتى اغنيلَك لهفتي
وردت اگلَك من مشيت الشيب
لَم روحة بگذلتي
..............
انطق الحكم وهل حكم سبب عدنا حاله من الهلع والخوف شلوون هييج كال.. بالحكم بالإعدام
توقف الزمن الثواني عشنا حاله من الخوف والرعب ذياب اختطف لونه من اصدار الحكم ...
صارت ضجه بالسجن وهووسه احنه ضلينه نحجي وجدي تخبل من الحكم الي اصدر.
القاضي ضل يكدك بالمطرقه مالته حتئ يخفف من الضجه الي صارت
بس ذياب جان بحالة صدمة المحامي حجه ويه القاضي وضل يقدم اعذار وطعن بالحكم ...
رجع القاضي كال...نقدم الرئاسة الجمهورية طلب للرحمه وكونه هو عسكري عنده خدمه ياريت يخففون عنه للحكم ويصير مؤبد
رد فياض بعصبية وانتفاض...لا لاااا ما يتغير الحكم سيدي ما يصير يتغير هذا قتل انسان بريئ خادم للجمهورية واحد من افراد الجهاز الاستخباراتي يعني الحكم قليل بحقه
المدعي العام كان مؤيد الكلام فياض والمحامي مالة ذياب رفض الحكم وطعن بي وقدم طلب،للرئاسة
رفعوا الجلسة وبعد ضلينه علئ طلب الرحمه وتغير الحكم والتعاطف ويه الرائد ذياب الشامخ كون عنده خدمة وطنيه وعسكريه
اجو ثنين من الشرطه اخذو وجدي لزمه كله...لا تخاف ذياب لا تخاف لو اعرف اقدم رگبتي لحبل المشنقه اقدمها ولا انطيك الهم راح احجي،ويه رجل بتي شوتيه واخلي هو يقدم الطلب
جر نفس حزين كال...استعجلي،يالشامخ ما اريد افارككم روحي بعدها هايمه بيكم هايمه باهلي،بمرتي بجهالي،ما شبعت منكم
حطيت ايدي علئ جتفه اواسيه كتله...لا تخاف ذياب ان شاء اللة عمرك طووويل كلبي بارد والله يارب يتخفف الحكم كل شئ نكدر عليه نسوي والله انطلعك من حلك الموت ونقدم ارواحنه فداك
جانت اديه مجلبكه ابتسم بوجهي كال...هذا الموقف شايفه انه هذا الموقف مار عليه وعشتو بنفس الوجع والحيره بنفس المكان انحكمت قربى اعدام وبنفس الوقت قدمت طلب للرئاسة وطلعت منها سلامات بس انه مستحيل اطلع منها...
الشامخ بحزم...لا يول تطلع منها هذا شاربي مو عليه اذا خليتك بهل حيره يا ذياب انه راح اجمع كل معارفي راح ابيع كل املاكي بالغربية واشتريك يبعد جدك
بلع ريكه بحسرة...ما تقصرون بس اكلكم شغله روحي بعدها تريد الهوا بعدني الي نفس بالحياة ما شبعت من الكل...
رد عليه الشامخ بحزم ..وانه جدك ان شاء اللة عمرك طويل خلي املك بربك جبير واكيد انا وفاروق نسوي كل شئ في سبيل تطلع من هل محنه سلامات يا ابو علي ...
تتهد بحيرة ورد علينه...لا تحجون بالحكم حاليا كدام امي و قربان تعرفوهن ما يعيشن اذا سمعن بيه شئ
بلكي الله يلطف بحالهن ويتغير الحكم وينقبل الطلب
رد عليه...ان شاء اللة ينقبل انت عندك خدمة عسكريه اكيد اذا ارفقت بالملف راح يتخفف الحكم يبعد جدك
ذياب بحسرة....امين يارب
بعدها اخذو وراحو واحنه طلعنه ويانه المحامي الشامخ تخبل وتعصب علئ المحامي وضل ألمحامي يقدم اعذار
احتاجينه واسطه قوية ونخلي ونروح التكريت رجل عمتي شوتيه لكيناه مو هنا بالدوام ونروح للدوام مالته...
هناك ما خلونه ندخل هو جبير بالدوله ورتيته عاليه وبعدها كلهم الشامخ بس انطو اسمي،وهو يتصرف
راح الشرطي انطاه الاسم واجه كال...يكول تفضلو
دخلنه ونشوفه رفش شكبره ضخم حييل وهم اكرع واحمر ابرص وشواربه جنهن باگة رشاد ...
وكف وشلم علئ الشامخ ورجع سلم عليه كعدنه يمه وهو مقابيله مكتبه
ويحجي تكريتي،صعب كلامه ولا فهمت منه شئ افتهمت بس كثيغ...عود كثير مدري هواي
المهم ضلينه نسولف وياه بعدها الشامخ سولف اله عن ذياب وعن الحكم
رد بصدمه...لاااا ليش،ما حجيتو الي جان حضرت المحكمه مالتو
الشامخ طلب،منه يكون واسطه لذياب ويقدم هو الطلب للرئاسة رد عليه ...تدلل ابو محمد اكيد اقدملو طلب واتوسطلو وارفق ان هو جان رائد محنك للدوله وخادم مسؤولياتها...
تشكرنه منه وطلعنه رجعنه للانبار دخلنه لكينه البنات كاعدات كلهن وحذيفه كاعد يشرب جاي ...
من شافنه تخبلن اجن علينه يركضن وقربئ،وياهن عيونه تحجي الما حجاه اللسانها خوف واضح علئ معالم وجهها وعيونه مفتوحه بصدمه كانها منتظرة فرحه منه منتظرة انطمنها ونسعدها بالاخبار الي عندنا بس للاسف الخبر الي عدنا اتعس،من التعاسه
كعد الشامخ علئ قنفه وام ذياب وحفصه وحذيفه يسألون عن الحكم
وقربئ تباوعله تنتظر من الاجابه وايدها علئ صدرها وغايصه باحزنها ومترقبه بكل خوف وحاضنه اديها لصدرها...
رد عليهم بكل هدوء كال...انرفعت الجلسة وبعد عندو جلسه ورة عيد الاضحئ
ام ذياب تنهدت بخوف...عبالي،دكولون انحكم سنه ويطلع عبالي افرح بوليدي،انه احسب الدقايق،دقيقه دقيقه واحسب الافراجو ثواني وبعدو عني مثل طلوع الروح شلون ياجلون الحكم والله ابني ما سوه شئ غير ان دافع عن شرفو وعرضو والي ما يدافع على شرفو هذا خنزير ...
الشامخ فرك وجهه بتوتر ورد عليها...مو الكتله ينتمي للدوله وبجهاز الاستخبارات وعمو جلاد يعني علاقاتهم بالدوله جبيره لهذا السبب راح يكون الحكم صعب علئ ذياب
لطمت صدرها...يعني شنو ذياب يموت لو ينحكم مؤبد والله اذا صار علئ،ذياب شئ والله اموت وراه والله
رد عليها...كولي يا الله ام ذياب لا تسبقين الأحداث كولي يا الله الكاتبو الله يصير واحنه مؤمنين بقضاء الله وقدرو ونحمدو علئ كل حال
باوعت القربى الدموع مسويه شوارع علئ،وجهها انقهرت عليها تحسها غاطسه بالحزن وجهه اصفر وعيونها مورمه من البجي وفوك كل هذا لا صوت ولا كلام...واديها مورمه من وره هل دكتور الي جرم بيدها وما طلع صوتها...
من سمعت تاجل الحكم خلت وطلعت بالمزرعه وجانت تباوع بنظرات حزينه وشاكه بالموضوع...
كلت خلي اروح لبغداد سوزان خطيه مناك هليام مقصر وياها هواي وما مهتم الها وانه الجنت اكول بش تحمل ادللها وتالي ذياب صارلته هاي المشكله وبعد ما شفت حتى سوزان ملتهي بي خطيه ولحد الان رعشه معتليتني بسبب الحكم الي صدر وكلنه امل ان يتغير الحكم حتئ لو مؤبد حتئ لو عشرين سنه بس مو اعدام......اعدام ظلم بحق ذياب
.................
قربئ...
من اجه فاروق وكال تاجل الحكم ما اعرف احساسي كال الحكم ما نصف ذياب لهذا السبب هم ما حجو عنه
شفت لمحه من القلق بعيونهم خوف ورعب وتوتر واضح علئ هيئتهم ..
من حسيت بمدئ،عدم الصدق بكلامهم حسيت بخنكه اجتاحت روحي وعقلي يا ربي ليش اعيش بهل عذاب عذاب فراك ذياب وخوفي،عليه ودمار نفسيتي كل دقيقه اموت الف موته خايفه لا يكون الحكم مو الصالحه
طلع فاروق من شفته اعترضت طريقه وهو وكف كال...ول ول كولة ذياب شو سديتي،طريقي
هزيت راسي بنفي اشرت علئ،نفسي ورجعت اشرت علئ،حلقتي،بمعنئ ذياب شلونه
تنهد و رد عليه كال...لا تخافين ما بي شئ والله يسأل ويسلم عليج
فتحت كف ايدي وخطيت باصبعي..والحكم
افتهمني،بعد ما باوع علئ ايدي،رجع باوعلي كال...تأجل
هزيت راسي بنفي وابتسمت ابتسامه حزينه...ممصدكه كلامه
جر نفس كال...والله تأجل يعني قابل حكمو بحكم مو زين واحنه هذا حالنه لا تخافين ان شاء اللة الحكم الصالحه
اشرت علئ گلبي وهزيت راسي بعدم قبول يعني كلبي منقتنع
بلل شفايفه بحيرة كال...والله ادري بيج بس صدكيني،بعده الحكم وادعيله يطلع من هل ازمه سالم غانم ويرجع ينور بيتج من جديد
رفعت عيوني واديه العنان السماء ولهج الساني المعقود بذكر الرحمن والاستنجاد برحمتة الواسعة ياربي تشملني،بيها...
ابتسم اليه باستعطاف كال ...شلون صارت ايدج ؟
هزيت ايدي بعدم رضا وقبول
كال...بعدها مورمه موو ؟
جاوبته بحركة راسي
تنهد كال...والله كلبي نار عليج وعلى ذياب بس ان شاء اللة اجيبج البغداد واشوفلج دكتور زين هناك يعالجج
هزيت راسي بنفي بمعنئ...لا ما اريد
عقد حواجبه باستهزاء كال...امشي لج غصبا عنج ترحين انت حرمة اخوي وهو موصيني عليج لازم اداريج حتئ من يطلع اكون ما مقصر انه وتكعدين تحمدين بيه كدامه ههههههههههه
ابتسمت واشرت علئ،الورده الي بالحديقه وبعدها اشرت للسما
ضحك كال...هااا انه ورده مال الله اول مره اشوف ورده مزنجره ههههه
ابتسمت علئ كلامه كال...يله انه اروح محتاجه شئ اذا محتاجه اكتبيلي بورقه وانه ان شاء اللة ما اقصر وياج كل شئ تردينه اجيبه الج تتدللين
فرحه استوطنت صدري الحمد لله اكو ناس،داعمتني،من بعد ذياب اشرت بيدي بمعنئ لا
وجنت اتمنى اتشكر منه علئ موقفه الداعم اليه وأخلاقه الطيبه التنكط حنية ويايه
ضل يصبر عليه وينسيني،همي واجه علاوي باسه وحضنه وانطاه فلوس وكذلك غدير
وخله وراح اخذت اطفالي دا ادخل شفتها واكفه بباب المطبخ المطل علئ الحديقه وتباوعلي بنظرات مستهزئه ونظرات ما عرفت افسرها
عقدت حواجبي متسائله من نظراتها المستفزه بس هي،ما حجت...
علاوي جان ماكل نستله شلته وغسلتله بالمغسله هي كالت بسخرية...هههه خوش النسوان تحط واحد تحت ابطها خاف تخسر الأول
استغربت من كلامها ودرت وجهي عليها
كعدت علئ الكرسي وضحكت كالت...ههه الك الله يالفقير نايم ورجليك بالشمس شكد خطيه سوزان وذياب
فتحت عيوني مصدومه من كلامها وكفت يمها وهزيتها بعنف من تشيرتها
وكفت ونكتت نفسها كالت...اوووه شبيج هجمتي شدخلني،ما دكولين النفسج كاعده تضحكين وتسولفين ويه حماج وتتبسمين اله وزوجج بالسجن جان استحيتي علئ نفسج
غمضت عيوني واني اصبر نفسي من كلامها الحقير وطعنها الاحقر كل شئ ولا ويه فاروق فاروق اخ واكثر من اخ مثل معزة اخواني تميم وسليم
رفعت أصبعي بتهديد اريد احجي ارزلها تهجم عليها بالكلام بس ااااه يا لساني ربط عندي الكلام وخله السكوت محد الحديث عندي
اشرتله باصبعي اهددها
ردت بضحكه...يعني الله عليج مو هاي فكرتج ذياب يموت وتغرين فاروق حتئ يتزوجج بديتي بالخطه من هسه شكد شيطانه انتي
ما تحملت كلامها ورفعت ايدي بكل قسوه ضربته علئ عينها طفيتها الها ...
هي ضلت تصرخ ولازمه عينها...يمممه عيني عيييني طفت الحكولي الحكوووو عيني،بعد ما اشوف
اجه حذيفه يركض هو وامه وحفصه كالو...شكو شصاير
هي جانت مدنكه وتصرخ عيني عيييني طفت بعد ما اشوف
لزمها حذيفه بخوف وهو يكلها...بس خلي اشوفها بس انطيني مجال ادحكي عليه يوول
وهي تصرخ وتكمز من مكانها خفت بصراحه صح ضربتها حييل بس مو مال تطفئ عينها
كلها حذيفه بعصبية...اصبري شويه تااا نشوف
صرخت...هاي الجلبه الادبسز ضربتني بعيني اااااه يمه بعد ما اشوف
خالتي وحفصه كللها بغضب...عليش،شصار عليش ضربتج احجي قربئ عليش ضربتيها
جنت بس واكفه وارمش بعيوني لا اكدر احجي ولا ابرر ولا ادافع عن نفسي
رفعت رأسها لحذيفه وهي تبجي كالت...لان كلتلها لا توكفين ويه فاروق الوحدكم بالمزرعه عيب خاف الناس التجينه تفهم غلط خاف تجي ام شاهين وسيف وتاخذ عنكم نظره محلوه والناس ما ترحم عود انصحهه وهي جابتني براشدي طفت عيني...
هجم حذيفه وهو يصيح...انتي منو وتضربينها شلون تمدين ايدج علئ وفاء تاج راسج وبعد بس اشوفج واكفه يم فاروق الا اذبحج مفهوم
امه صاحت...ول ول شهل كلام سكت عيب عليك وشبي فاروق
رد عليها بغضب شديد....لا يمه عيييب عليها كل ثنين ثالثهم الشيطان شني تكف يمو عيب خليها تخجل وتخلي ذياب بين عيونها...
طعني بنص صدري حسيت كلامه راح ينطقني لان كلامه ينطق الحجر بس للاسف مو هاي الصدمه النطقتني وخلتني رديت حذيفه وطعنته برجولته
خالتي ما رضت عليه كلتله...اسكت كص لسانك يوووول حيوان الا اخوك فاروق ومرتو لذياب لا تطعن بيهم
ضل يصيح ويغلط و وفاء وياهم تغلط وتحجي عليه صدك كلامهم اذاني وما جان عندي سلاح غير الدمعه الحزينه علئ اخذت مسار علئ خدي
دخل الشامخ بكل وجبروته وعنفه كال...ووول واحد ما يرتاح منكم دقيقه اذا ما طلعتوها من عينو عليش هل صياح اطردكم برا واخلي شياطين الأرض تنوح عليكم
سكتو هم بإذعان الكلامه ضرب رخام الكاونتر بقبضة ايده فزو من مكانهم كال...ووووووول احجي بلعتو الساناتكم
رد عليه حذيفه بارتباك..هااا لااا بس قربى تجاوزت علئ وفاء وضربتها وعمت عينها لان بس وفاء نصحتها
خزرة بغضب...وكاعدين تتكاونون وانت جنك سعدانه والله شني تكاونت وفاء ويه قربان وانت بنص النسوان تحل مشاكل...عليش تكاونن بالله
ردت وفاء وهي تبجي...والله وداعة عمري وامي بس لان نصحتها بهدوء شفتها تضحك وتاشر الفاروق وضحكها واصل لسابع جار كتلها عيب من العالم واخاف تدخل علينه ام شاهين وتنتقدج وهو يضل حماج مو وكت شقه وضحك ورجلج بسجن بس هاي الخسرتها وداعة روحي....ان شاء اللة اكمع حذيفه جذابه
صرخ بيها وصك علئ اسنانه...وانتي شدخلج شلج غرض بالوادم هيي مصكوعه ووول انه اتخبل من هل سوالف
تقرب منها ولزمها من جتفها...شوفي يوول بعد اذا جبتي طاري فاروق ويه قربان ما تلومين الا حالج ول ول تردن تسولجن سالفه تخبلن الوادم حتئ تشوهن سمعتنه انه اذا سمعت واحد حاجي بمثل هذا الموضوع اشگو شوگتين والله...
وانه هذيج صبيحه عليش مخليها ببغداد وما جايبها لان اعرفها بس تجي هينا تسوي مشاكل فانتي اكعدي وانلصمي لا الكحج يم صبيحه مفهوم ...
عافهم وراح وحذيفه تخبل كال...لا بعد ما اكعد هينا دقيقه الضاهر ما النه اي مكان هينا وجدي صاف ويه الغريبه ضدنه وهو الجان يكرهه الغريبه ما ادري شسوتلو وهيج متخبل
ردت عليه وفاء بقهر...سحاره اكيد غيرت الشامخ 180 درجه
حذيفه..بعد هذا هو ما اكعد بهذا البيت دقيقه وخلس البيت تتهنئ،بي قربئ
وفاء...اي والله صدك خلي تتهنئ،واحنه راح نكعد ببيت ذياب لان الحياة وياكم لا تطاق وانتم هم ما تنطاقون
رد حذيفه ...اي والله لل تطاق رايحين نكعد ببيت ذياب ونخلصكم من شرنه ونخلص منكم
اني صدك ضجت بيتي ما دخلته من ذياب انسجن لحد الان بس اول ما اجت بيبي ويايه ومن راحت البيت صار اضلم عليه
وكعدت عدهم وقفلته وحلفت ما ادخله الا ذياب ويايه اثاثي اغراضي ذكرياتي ومواقفي،ويه ذياب كلها بهذا البيت مو من حقهم يأخذونه حتئ عيب عليهم ذياب بالسجن وهم يتنعمون باملاكه
سكتت ما حجيت ولو اني ما اكدر احجي ولا بدر مني اي ردة فعل ...
بس خالتي ام ذياب تخبلت من سمعت كلامهم لطمت علئ صدرها وصرخت...وووول تكعدون ببيت ذياب وهو كاعد بالسجن ونايم علئ الصبابه وانتم نايمين بغرفتو والله والله انتم روحو اكعدو ببيتو وشوفو اطلع من البيت من دون ملابس وافضحكم كل شئ ولا بيت ذياب ينفتح ...
هم اسكتو ما حجو ثنينهم واني رحت دخلت الغرفتي تعبت من الهم والحزن والمشاكل وكل هذا صوتي مفقود ...
صادف بعد اسبوع العيد عيد الاضحئ وهل مره ذيب مو ويانه وهل شئ جارحني وفاقدني لذة العيد
بس خالتي ام ذياب ما قصرت كالت خطيه الجهال ما يعيدون راحت اشترت الهم ملابس للعيد وفرحانه بيهم رغم حزنها احفادها اولاد ذياب بعد...
...................
وئام ...
بصباحية العيد ، جان يوم كئيب عكس باقي الاعياد .. مر علينا هالعيد وهواجس تقتل قلبي بكل لحظة خايفة لا ميمر علينا واخونا ذياب ويانا
بكل عيد اشوفه بطولو وهيبتو وهو شلون لاف الشماغ الاحمر على راسو ودشداشتو البيضه شكد حلو عليه الزي العربي
يدنج على راسي ويبوسو ويعيدني ويخلي عيديه بيدي وبيد محمد هالسنة مفتقدتو جثير
دخل عمر عليه جان رايح يصلي صلاة العيد بالجامع اني عيدتو الصبح قبل ميطلع للصلاة وبقيت بالغرفة صافنة وافكر
كال عمر هاي بعدج على وضعج نزلتي عيداتي امي لو بعدج ؟
جاوبت بحسرة وعيوني ع كل مكان تتجول هساع كلت اريد انزل ودخلت انته
اجه كعد يمي خله ايدو على جتافي وسحبني الو
كال هذا عيد الله ميصير تبقين هيج كالبه الخلقة ادري ضايجة على ذياب بس حاولي لا تستبقين الامور وادعيله اليوم عيد وبي الدعوات مجابة
خليت راسي على صدره وشهكت مخنوووكة عمر مخنوووكة كلبي معصور عصر هو احتضني وباسني كال كومي هسه بدلي وبدلي لطيبة ونزلي جوة عيدي امي وخلي نطلع اشوفج اجواء العيد شلون حلوة ببغداد
وخرت راسي من حضنه ورجعت رجليه صعدتهم على السرير جاوبتوا لاء دخيلك مالي نفس الشي الحياة مظلمة بعيني
ورجعت تمددت ودااغطي روحي ...
كام و لزمني من ايدي وسحبني
وكال بعصبية : دكولي يا الله شبيج مفاولة على اخوج من هسه شسالفة دكومي كوومي
وظل يسحب بيه وانجبرت اروح اغسل وابدل ملابسي بين مسويت هذا كلو كعدت طيبة وبدلت الها
نزلت جوة شفت عمتي ماكو .. عمر كال يم الباب دتنطي للاطفال المنطقة عيديات وجكليت وكليجة
وفات محمد يركض اني بدلت اله الصبح ونزل جوه ..
اجاني وكف يمي كال ماما اريد اروح اعيد ويه الجهال
كتله ابقى هنانه هساغ لتروح تضيع بالمنطقة
هو اصر اله يروح واني مالي خلك اتجادل وياه
عمر كاله احنه حنروح بالسيارة نطلع نتجول تطلع ويانه
هز راسه لالا اريد اروح ويه جهال المنطقة اعيد ...
كتله اهوو روووح بس مو تكول ماخذتوني وياكم ؟
هز راسه بلا ومد ايده وكال اديكم على عيديه مدام حتخلوني هينل وترحون
كرصته من خده يوول مو الصبح انطيتك
رد عاد لتصيرين بخيلة لو طيبة متنطيها لو اني الفقير المسكين
ضحك عمر وطلع من محفظته ١٠٠ دينار قبل هال١٠٠ دينار جانت تسولف والها قيمة وانطاه اله
هو اخذهه بفرح وكال شكرا بابا وباسها وخلاها على كصته وطلع يركض
فاتت عمتي رحت عيدتها وبوستها على راسها وكتلها ان شاءالله حجية
وهيه كالت ان شاءالله من العايدين والله يفرج على ذياب ان شاءالله
همست بحسرة وقهر امين الله يسمع منج عمة ..
عمر كاللها راح نطلع نفتر شويه ونرجع ديري بالج على محمد يمه راح يبقى هنا ميقبل يروح
جاوبته وهيه تأشر على عيونها :- بعيوني يووم روح ولا تدير بال ...
طلعنه اني وياه وافترينه بالسيارة تريكنه بمطعم كيمر وكاهي ريوك مال مصباح كل عيد ...
واحنا راجعين افترينه على مرقد ابو حنيفة ، انكسرت ركبتي عليه .. حس بيه عمر كال هاا شنو رأيج ننزل نزور ؟
دحكتلو وجاوبتوا اي والله ياريت تسويلي فضل اريد انزل اصلي وادعي لاخويه بالفرج
فر السيارة ونزلنا منها دخلنا جوة جان هواي اكو زوار خليت عنده طيبة ورحت توضيت وصليت ودموعي تنزل واني ادعي لذياب
طلعنا من ابو حنيفة ورجعنا للبيت واحس ذبيت حزني وهمومي هناك
وصلنا للبيت الظهر صاير ... شفت عمتي غافية بالصالة ومحمد ماكو كلنا يمكن تعب وصعد فوك بغرفته
رحت صعدت ادور عليه ماكو ... نزلت لعنر اللهث ..
عمر عمر محمد ماكو
كال خاف بعده يعيد ويه الجهال بالمنطقة ...
جاوبته لا وين مو هسه اجينه الفرع مابي ولا بزون مو بعد جهال مو صار الظهر وكلها فاتت لبيوتها هذا وين راح
على حسي كعدت عمتي ... سألت خير يووم شبيكم ؟
سألتها بقلق ولهفة عمه وينه محمد ؟ اشو ماكو بالبيت كلوو ماكو
ظلت تتلفت وتلزم راسها يااا شنوو لهسه مااجه هو كال حيروح للمراجيح ميتأخر واني غفيت هنانه تعبانة كاعدة من الصبح
لزمت عمر من ايده وكتله عمر فدوة روح شوفه
كال هاج لزمي ... انطاني طيبة وطلع بسرعة
واني ظليت رايحة جايه ميتة من الخوف والقهر وادردم : ماصدكت ارتاحيت شويه لمن صليت وزرت اجيت والكه القهر كبالي
عمتي كالت كولي يالله يووم انوب اني شوون غفلت عنه ياربي هو كال ميتأخر بسرعة يرجع واني غفيت والله ماحسيت بنفسي
جاوبتها عمه هو صاير وكح ومينجرع لتلومين بنفسج انت معليج بس اني لو جابرته وماخذته ويايه
شوويه ودك التليفون الارضي .. ركضت جاوبت
طلعلي فاروق عيدته كال ترة ابنج محمد يمي
لطمت على رجلي يااااعزاا شجابه يمك بالله ؟
رد والله سألي نفسج انت وينج عنه وهذا شون يندل ويجي ؟
جاوبته يااا خطية عجل عمر طلع يدور عليه احنه جايين عليكم بس يجي عمر
ختمت المكالمة واني مصدوومة هذا شوداه لهناك والله وكبرت يا محمد وصرت تروح لبيت خالك لوحدك ...
كلت لعمتي هم انصدمت وياي على وكاحته هذا شوصله الهم ... وهي كالت ماغفيت هوايه يمته لحك يووصل
رحت للحديقة فتحت باب الشارع وظليت اطل من الباب ، شفت ابن جيرانه بالشارع بالبايسكل مالته
كتله ماشفت عمر ؟
رد اي خاله شفته هسه فات من هذا الفرع جاي يدور على محمد سألني عليه
جاوبته اي حباب روح صيحله وكله لكيناه محمد ارجع للبيت
كال تتدللين خالة ..
دخلت للبيت غيرت لطيبة ملابسها ودخل عمر عليه للغرفة ...
كال هذا شوداه لبيت فاروق ؟؟
والظاهر عمتي كالتله جوه ...
كمت على حيلي والله ماادري خلي اشوفو اله اشلع اذاناتوا
كال اني رايح اجيبه .
رديت عليه بسرعة وحماس ارووح وياك اني
بدلت لطيبة واخذناهه ورحنه لبيت فاروق ، عمتي مقبلت تجي ويانه كالت خاف يجينه احد وليوم عيد
خلينه ورحنا لبيت فاروق فتحلي باب الشقة واني فتت رأسا واطلطل وينه هذا الوكح ووينك محمد اليوم اشلع اذاناتك
دفعني فاروق وكال ولج عيدي سلمي شبيج الله غاسلج
كتله هاا فاروق والله مشفتك بالي يم هذا الشيطوون
كال ولج طول بعرض وماشفتيني ؟ هاي اهانة لهيبتي ترى
ضحكت وبوسته وسلمت عليه وعايدته من جد وجديد لان اني اصلا بالتليفون عايدته
فتت جو واتلفت وخليت عمر وفاروق واحد يسلم ع الثاني وسويت هجوم على محمد ولزمته من اذانه
وافر براسه يول هيج تسوي بينا خوفتنا عليك شبيك يول
هو لزم ايدي وكال يوول شبيج جيت اعيد خالي مايصير يعني
اجت سوزان فلتته مني وكالت بداعتي لتأذينه عوفي خطية بعد ماتكررها مو حمودي
هز راسه وكال متنعاد وداعة خالة سوزان وكل عام وانت بخير وان شاءالله عريسة
كتله اسكت ليسمعك عمر ... والله لو ماخالتك سوزان شيفكك مني اليوم
بعدين يله انتبهت اني ممسلمة على سوزان ... محمد طير عقلي ومنا هو طاير
خليت طيبة عند عمر ورحت للمطبخ وي سوزان نحضر الكليجة والشربت هيه خطية حامل ومابيه تدعبل دعبل
بس هاجستها مو على طبيعتها تصفن هوايه ونظراتها بيها كوومة حجي وغريبة
كتلها سوزان شكو شبيج ؟ ليكون خايفة من الولادة ولج بعدج لتفكرين هسه
تخسرت واجتي كعدت يمي كالت اني بيه كوومة حجي وئام مااعرف شسوي احس راح انفجر اذا كتمت اكثر
عدلت كعدتي بالكرسي كتلها شكو يولي خوفتيني ؟
عدلت شعرها برقة وكالت تعرفين وضع ذياب انتي .. وقربى يعني مااعرف شلون اوصلج الفكرة بس خايفة اني او مجرد هواجس لوو اكولج وئام انسي الموضوع امشي نودي التقديمات
كضبتها من ايدها وكعدتها لا سوزان احجي شكووو ضروري تحجين والله متكومين اذا متحجيلي
حكت كصتها وكالت خايفة لا سمح الله اذا ذياب انعدم بعيد الشر جدو الشامخ يجبر قربى او فاروق على شي هيج مجرد هواجس انسي وئام اني هم صايرة اخربط
ههه هرمونات الحمل مأثرة عليه وشاده حيلها ويايه
جاوبتها بجديه لا هذا مو حجييج سوزان اكو من يلعب بعقلج ليش انت متعرفين ناسج عدل متعرفين ذياب متعرفين بقربى
جاوبتها اعرف والله بس تعرفين جدو
قاطعتني ترى قربى تموت على تراب الي يمشي عليه ذياب وهيه حتى حجي متحجي شتتوقعين منها يولي منو لاعب بعقلج
صكت اسنانها فرياااال فرياااال اخخخ
كمت على حيلي اخخخ هاي الحية الصفرة كوون انتف شعفتها وانت هم وياها
كالت واني شعليه وئام
انت شوون تصدكيها !!!!
كالت مو انت تدرين بيها تفر عقل اكبر واحد
جاوبتها مو انت تدرين بيها حية صفرة مسموومة اخخخ كوون اعضها عضضضضه اشلع لحمة منها على هالافكار هايه
دخل فارووق وكال ولج استجني وكعدي هاي منو الي تردين تاكلينها شبيج جوعانة مجلوبه انتي
جاوبته والله لو تدري جان انت اكلتها بمكاني بس ايييع هاي لحمها مر وسام اصلا متنوكل
كال بصدمة شنوو منو شصاير هاا ؟
سوزان اخذت الصينية وكالت مصاير شي يله عيب عمر لوحده كاعد خلي نروح يمه ..
وطلعنه من المطبخ
...................
قربى....
جنت كاعده اسفط بالملابس مال ذياب استنشق عطرهن وريحتهن الطيبه الممزوجه بعذوبته اول مره استنشق ريحة ملابسه واحس بهذا الإحساس نزلت القميص من خشمي،وحضنته الصدري كأني حاضنته
ابتسمت وسفطتهن بهدوء وتريب تام وخليتهن...
حسيت اكو ضجه صارت وكفت بسرعه وشفتهم مخبوصين رجلية ماتت من الخوف كلتلهم...شكووو شكووو شصاير
سكتو محد جاوب منهم...
ارتجيت علئ الحايط بخوف من شفتهم يبجون بصمت مطبق ...
لزمت ام ذياب وحجيت بتساؤل...خاله خاااله شكوو ذياب بي شئ
ردت عليه بارتباك وتشرد ...ما ادري ما ادري
شهكت برعب ....شكوو ذياب شبي بي فدوه احجو
رد عليه الشامخ بايمان...انا لله وانا اليه راجعون ذياب مات بالسجن انكتل
فتحت عيوني مصدومه مرعوبه مخذوله مفرفحه شهكت .. لاااااااااااااا يمه ذياب يتيمئ،من بعدك والله ذياب فدوه كولوا عايش فدوووه
فاروق نزل راسه بحزن ورد عليه...ذياب مااات انكتل بالسجن
ركضت بسرعه وطلعت ارجف واصرررخ ...ذياب يا حبيبي ذياب يا روووحي لا تمووووت لا تعوفني فدوه منو الي،غيرك المن اعيش تعال اخذ روحي وياك يا روحي انت
اركض بالشارع عبرت شارعين ما شايفتهن بحياتي كلها والدمعه تسبق الدمعه والجرح اعمق بصدري
الجو جان باااارد ومغيم مثل حالي اشوف واحد لابس عسكري ويبرالي يكلي...اهدي اهدي علئ كيفج كولي،يا الله
رديت عليه....شلووون اهدئ،شلووون اهدئ كلبي،راح يوكف روحي فرفحت من الحزن هذا ذياب تعرف شنو ذياب مات وما اخذ حقه من العالم من كل واحد ضلمه مات وبعدني نفسي،بيه ونفسه بيه
صرخت بصوت عالي...اريييد ذياب ذيااااااااب تعال شوف حالي،من بعد حالك يا روحي انت
همست بوجع ورددت...كون حلم ياربي كووون حلم ولا حقيقه ما اتحمل ذياب ميت ما اتحمل والله ربي سريعه الفركه والله ما شبعت منه
ياااا نااااااااس ياا عاااااالم كولوا انتي كولوا تحلمين
كولو ذياب ما مات ومنتظرج جذبو عليه فدوه جذبو عليه
نفس الشاب العسكري الي،جان يبرالي طول الطريق يصبر عليه ويحاول يسكتني
واني ما يمه اصلا روحي هايمه واباوع للطريق بلهفه وگلب يرجف اديه كلها ترجف دموعي تتزل وتترقب الطريق
ادعي ربي بخوف . كووون بحلم ياربي كون حلم
شفتهم اربعه شايلين تابوت والتابوت بي نقشه ونفس العسكري اشرلي كال...هذا ذياب يا قربى
فزيت والدمعه بعيني رمشت بعيوني لكيت نفسي علئ مخدتي وفراشي وعلاوي بصفي درت وجهي لكيت خالتي وحفصه نايمات ...
شهكت برعب فتحت الشباك والبرده شفتها دنيا اليل،والمطر ينزل بهدوء ويغسل الارض ويتراقص علئ اوراق الشجر...
همست...حلم جنت بحلم كعدتي من الحلم وانتي تبجين يا قربئ لعد شكد متأثره
ثم إني أحببتك حُباً يُعادل الشمس حجماً
ويُعادل ضيء القمر نُوراً ويعادل سكان
الأرض عدداً.♥️🍃
نهاية البارت. يتبع
كونوا انتم كونوا بخير...احبكم 💔
نور سمو العراق 😘
لا تنسوا التصويت و المشاركه بكم نكتمل😍
البارحه ما نشرت دتصير عليه ضغوطات والله كومه تعرفون رجع الدوام والمسؤولية كبرت وابو مريم سافر البارحه تاركني وحيده فريده انعي غيابه عني😁💔
بنات فضلا وليس امرا تابعو قصه هذي الكاتبه اسمها بين النهوة وعشق العسكريZahra_Amjed12
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!