رواية #سلالة العنفوان...ذنب عينيك الفصل الثاني والتسعون 92 - بقلم الكاتبه سمو العراق

الذنب 34
رواية...ذنب عينيك...سلالة العنفوان
بقلمي...نور سمو العراق

💔💔💔💔💔💔💔💔💔💔💔

عندما عشقتگ سألت اي جنون يجذبني اليگ
وأي جاذبية تلك التي احتلت....   ارجائي
فأينما توجهت اعود اليگ...
ويجذبني جنون حبي منگ واليگ...

تنبية...بنات جان عندكم تساؤلات تخص فياض حبو الابطال يكون الجواب عن لسانهم لذلك ابو الفوارق رد عليكم بمشهد 😘

دمتم في حفظ الرحمن

....................

عاشت بكابوس مرعب لدقايق،وقت قليل بس هذا الكابوس اخد من نفسيتي هواية تعبت من خلال هل حلم عشته بكل تفاصيله حسيته حقيقي حسيت بي من الواقع ابد ما جان ببالي ان هذا حلم

بحيث اني بالحلم وادعي ان يكون هذا المريت بي حلم فرفحت من حزني،ومن قهري من موت ذياب بالحلم الله يساعد گلبي شلون طار عليه لعد شلون اذا عشت هذا الشئ بالحقيقه

فزيت برعب من تفكيري اسم الله اسم الله بعيد الشر عنك يا ذياب ان شاء اللة عمرك طويل ان شاء اللة من عمري علئ عمرك وما اذوگ لوعة فراكك يا حبيبي

مسحت دموعي وتفاجئت معقوله بحلم ونعيت ذياب!! بحلم ودموعي نزلت عليه لعد شكد ماثر بيه هذا الحلم ولو شلون ما ياثر واني شفت اعز ناسي فاقدته ورايح عني

مسحت دموعي وتنهدت حسيت بخنكه مو طبيعيه خنكه لزمتني من صدري وكطعت انفاسي اريد اصرخ اريد ابجي ابجي علئ ذياب وهو عدل ضكت لوعة فراكه بالحلم شلون لو بالحقيقه؟

انطيت النفسي مجال ابجي عليه بصمت مريع ناجت ربي،وقت السحر،طلبت منه ينجي ذياب،من هل حقرلء ويرجعه القلبي،المحروم بالسلامه ويكحل عيوني الهايمه بي...

رجعت لفراشي حضنت نفسي،واني انوح من خلال ما استرجعت احداث الحلم انقسم گلبي نصين وجرح استوطن بنص روحي...

بعدها حاولت ان ابتسم لان الحلم يفسر غير هذا الشئ جنت اسمع من امي اسمع دكول اذا الشخص مات بالحلم يطول عمره ...

طمنت روحي وهديت من روعي شوية...اهدي يا قربئ اهدي لا تخافين مجرد حلم وحلم رغم عشتي مأساته بس حلو الصالح ذياب،ويتفسر غير شئ...

شهكت بدموع...هم يطلع واشوف طلته الحلوه بعيوني واسمع كلامه واعيش تحت جناحه واصبح علئ عيونه الحلوة...

سرحت بذاكرتي للبعيد اتذكر قبل من جنه ببيتنه وهو جاب حبل ربطه مرتين واخذ خشبه عريضه وربط بيها للحبل من الصباح...

وبعدين شدها من ناحية الشجرتين بالجذع مالتها من اليسرى ومن اليمنئ...

جنت صافنه عليه وهو يشتغل بهمه وجكارته بين شفايفه

ابتسمت عليه وحجيت ويه...ول ابو علاوي ضربتك الشمس شدتسوي،

رد عليه والجكاره بين شفايفه...اسويلج مرجوحه ناوي ادللج دلال مثل ما يكولون خلاها بمرجوحه وهزاها

عضيت شفتي وضحكت...لا هيج هوايه حتخبلني تخليني اتعيقل

رد بعدم اهتمام...اتعيقلي،بويه حلو عليج التعيقل

ابتسمت عليه وعيوني تتاملة بنظرات حب وعشق وهيام وهو مشغول واهتمامه كله بالمرجوحه

كملها وشدها وامنها كال...اهااا وهاي صارت جاهزه

حفصه جانت واكفه تلعب بعلاوي كلها...يله حفوص حدري هينا تا نجرب بيج للمرجوحه

حفصه رفعت حاجب بزعل...صدك عيب عليك يووول تريد تجرب بيه مرجوحتك ول شنو انه فار مال تجارب

ضحك كلها...لا مو كلت خاف اصعد قربئ قبلج وتزعلين

ردت عليه بنص عين...لا يول ما ازعل صعدها صعدها

اجيت اركض كتله...اي اي ذياب اموت على المرجوحه صعدني

جاوبني...لا كيفج يول بحذر بحذر لا تكع المرجوحه وتتكسرين

ضحكت بحماس...لا لا ما اوكع

رد عليه وهو يثبتها...يله بويه كضبتها اصعدي،بحذر لا توكعين

لزم المرجوحه اليه واني صعدت دفعني مثل النسمات الدافيه مو سريعه بخطوات بسيطه ودفعات هادئه...

كتله بترجي...ذياااب حييل حيييل

رد عليه...ول عيب استحي لحد يسمعج

درت وجهي عليه واني لازمه بحبال المرجوحه وسالته ببراءة...ليش؟

باوع علئ حفصه ملتهيه بعلي كال...لا هيج ماكو شئ

بعدها اجت حفصه وهو شال علي حفصه ضلت تدفع بيه واني فرحانه مثل الطفل الطاير واضحك بصوت عالي واحس طايره بالجو مثل الطير الطلير

صحت عليه...ذيااااب،ذياااب حفصه اقوه منك شوف شلون تدفعني،قووي مو مثلك علئ،كيف

ضحك ورد عليه بحب...يولو غير احببج اخاف عليج توكعين وانه اذا صار بيج شئ اموت وراج

ابتسمت...لا اسم الله عليك بس،لا انت مو تعرف تدفع المرجوحه ما بيك حيل كبرت

نزل علاوي علئ الارض وتقدم مني بخطوات منتقمه كلها..حفصه ديري بالج علئ علاوي تا اشوف هاي المصكوعه شلون كبرت وما بيه حيل

تقدم مني واني،اضحك...اي والله ما بيك حيل ههههههههههه حفصه احسن منك

هو لزم المرجوووحه ورفعني،بيها صعد بيها مسافه بطوله الفارع واني،ميته من الضحك وارجف من الخوف بس ممبينه

كال بسخرية...هاااا بعد لو كافي وبعدج عند كلمتج ما بيه حيل

هزيت راسي بضحكة..ههههههههههه اي،ما بيك ما اتراجع عن كلامي

عاد هو صعدها اكثر واني تشبثت بيها اكثر وخفت صحت بخوف...لا ذياااب،اتشاقه وياك والله

ترك للمرجوحه وهي،طرت ورجعت ليوره بكل قوه صرخت بصوت عالي وشعفتي المعطبه طايره وياي ومستناسه علئ،المرجوحه

صرخت...لا ذيااااااب لااااا يمه كلبي،حيوكف

رجع دفعها بقوه طيرها للسموات السابعه واني اصرخ واتوسل بي يوكفها وهو معاند وبعد كم هائل من التوسلات وكفها

ونزل راسه عند اذني،كال...هاااا يول شرايج بيه حامي لو ما حامي،قووي،لو ما قوي

تنفست بصعوبه عبالك جنت اركض ورديت عليه وايدي،علئ،كلبي...ااااه لااا لا قووي،قووي،بس،بعد لا تعيدها

نزل شفايفه علئ اذاني وطبع بوسه حلوه عليها كال...العفو بويه ما جان بنيتي افحطج بس انتي استفزيتيني

ابتسمت..عادي عادي تهون ذيبي،بس،بعد لا تعيدها كلبي،جان وكف زين وما اجو اهل الديره علئ،صوتي،يوول

ضحك...لي والله فضحتينه هساع لو جايينه شراح نكلهم نكلهم ذياب يلاعب بمرتو ول هاااي واكفه

ضحكت بصوت عالي علئ كلامه...هههههه فدوه حلوه هاي مال ذياب يلاعب بمرتو هاجست نفسي،طفله

باوع الحفصه شافها ملتهيه بعلي لذلك هو رفع راسي ونزل راسه عليه بالعكس وطبع بوسه دافيه علئ،شفايفي كال...انتي،طفله بالغه شحلاتج 

ابتسمت علئ حبه اليه سالته ...شكد تحبني ذياب؟

صفن بوجهي،وجر نفس كال...انتي،شكد تحبيني ؟

رديت عليه بمزح ...مو هوايه شويه ههه لا تزعل من الحقيقه

جر نفس ...وانه احبج جثير بكد طول حفصه «حفصه جانت كصيره»

درت وجهي عليه وخزرته ضحك كال..يعني زعلتي،بس انه ما يصير ازعل من دكولون مو جثير شويه احبك!!

رفعت حاجب...اي ميخالف اني انانيه بحبك حتئ،كول اموت عليج اشعل احساسي وتعرف بيه شكد احبك بس،جنت اتشاقه

جر نفس ورد عليه...وانه اموت عليج وتدرين بيه وبمشاعري عليش،بعد تسوين مشاكل وانتي وارتني بحبج ور

نزلت راسي واني اخفي ابتسامتي وهو ضل يدفع بالمرجوحه بكل هدوء واني مستمتعه وفرحانه بحنيته واحساسه تجاهي فعلا الله ياخذ شئ ويعوض بشئ

اخذ اهلي لكن عوضني بانسان كله دفا وحب وحنية

رجعت الواقعي والدمعه بعيني ربي انت مو عوضتني  عن اهلي بذياب ياربي لا تحرمني منه وخلي خير عوض عن اهلي منك اليه يا رب....

..................................

فاروق...

لحد الان بعدنه بصدد موضوع ذياب ملتهين من الرئاسه للمحامي للمحكمه والسالفه ما خلصانه وشيخلصها فياض خصم قووي وحقير وخبيث مو شلون ما جان

وهذا كله بصفحه واخت فياض وبنتها  الطلعت صفح بصفحه واخت شرهان مديرة مدرسه ما اعرف معلمه جان من الماجدات اصلا مو من الماجدات اصلا جانت حزبيه وهي الها ايد بسجن قربئ...

جانت عاصيه وخبيثه وتهدد بالسان سليط لحد الان اتذكرها لابسه تنورة عريضه سوده ولابسه ستره طويله سوده ام الكتافيات ولابسه شحاطه سوده ديدي،ومو هي حزينه شاده مثل الربطه مال مصريات علئ راسها عبالك ما لابسه اسود عبالك غاطه بالتراب طالعه ملحه جلحه جنها ست حميده معلمتي ايام الابتدائية الله يرحمها مدري الله يذكرها بالخير

جان هاي اخت شرهان تقدم أوراق وان علص وتقدم ادله وتناقش بحده لسانها شطوله وهم معصعصه بس جنها زاجل مو مثل سوزان جنها كتكوت

كرهتها حييل وضجت منها شكد تلح ومتعصبه حييل وتريد توصل ذياب الحبل المشنقه بأي صورة

منا رجل عمتي شوتيه يشتغل،ومنا هي تشتغل وعالكه بينه وبينهم ومنا فياض كل شويه ودز كوامه يطالب بقربى يريدها ترجع عنده والشامخ راسه والف سيف ما ينطي قربان وجهالها...

كعدنه انه وياه يا سبحان الله يكولون وعسئ ان تكرهوا شيئا وهو خير لكم وعسى أن تحبوا شيئا وهو شر لكم...

يعني رغم ذياب بازمة بس هل ازمه قربت بيني،وبين الشامخ وصار يعتمد عليه ولو هو اعتمد او ما اعتمد طز مو ذات اهميه بحياتي...

جنت صافن وافكر لو جدي قاسم يشوفنه اني الشامخ هنا
كاعدين سوه اله يملص راسي مثل ما يملص راس الفختيه بس شسوي والله الهاطر ذياب...

انتبهت على صوته وهو يوجهه اليه كلامه...انه افكر بموضوع اذا فياض اخو معارض واهل قربئ معارضين هو شلون ضل بمركزه عليش ما انطرد وعليش ما نحبس حاله من حالهم...

جريت نفس وجاوبته.  لان هو الي اشتكئ عليهم ترا فياض مو غبي حتئ يخلي غيره يشتكي عليهم لان تعرف اذا غيره اشتكئ راح يتضرر وراح يفقد كل شئ واصلا الدولة راح تطرده وتسحب كل امتيازاته

بس اذا هو اشتكئ وهو الي قدم اهله قربان للدوله هنا الامر اختلف راح يحصل نوط الشجاع وراح يترفع كونه فضل الدوله علئ اهله وناسه واخوته

فهذا الشئ بي ترفيع اله ويعتبر شجاعه ولو هو ظالم اهل قربى وقتل امها بدم بارد راد يغطي علئ جريمته حتئ نحد يطالب بدم ام قربئ لذلك ورط ولدها ورجلها حتئ يمحي ذكرهم كلهم...

جر نفس ورد عليه...ول هذل عدو مو اخو معقوله اكو هيج بشرية

اجيت اكله اي انت بس،سكتت كرامتة لذياب جاوبته...اي اكو مو يوسف اخوته شمرو بالبير وجانو ناوين علئ قتله وبعدو عنهم وعن ابو بسبب الحقد والغيره ...

تنهد كال...اي والله قصص بالقران تبثبت النه شنو الخبث الي بداخل نفوس البشر هساع عوفنه من هل عار وسوالفو يوسف ابنو مو ضدو يكدر يساعدنه

جاوبته...لا لا ما يكدر لان يعتبر يوسف مجنون كونه داخل مستشفى الأمراض العقلية من قبل وعنده ملف كامل هناك

رد علية...عجل شلون لازم نلكه فد حل تا نورط بي فياض لازمنه شهود علئ جريمة فياض انه قربان ما اكدر ادخلها بهل موضوع لان ما اريدها تتبهذل بالمحاكم

صفنت بتركيز...اممم ام بثينه عندها دليل ترا قربى ما عندها دليل ضد فياض بكد ما الدليل عند ام بثينه  ويوسف وبثينه بس ذول كلهم ما يشهدون ضد فياض لان الخوف يعدل الشوف

بعدها رحنه للمحامي كال ان شاء اللة الخميس الجاي نصعد نشوف الحكم اما يكون تغير او نفس وضعه وان شاء اللة يارب تغير...

الشامخ كال...انه رايح الصبيحه اجتلها عجل شلون تهد علئ ابو سوزان وتريد تطيح الجاهل وشلون تجي من الغربية البغداد ...

عفته راح ياريت والله يكتل صبيحه يوم عيد واعياد راس السنة...

خليت ورحت اشوف سوزان عند اهلها خطيه ولا جنها متزوجه خلصتها عند اهلها خخخخ

بس والله شسوي تمشي الرياح بما لا تشتهي السفن كل شويه وطلعتلنه سالفه معفنه...

رحت البيت اهلها اخذتها شفتها مطنكره شويه كلتلها...هااا سوزي مريتي شبيج شو وجهج يلطم اكو شئ

ردت عليه...لا ماكو شئ حبيبي عادي وضع الحمل وهرموناته

ابتسمت وفريت السياره...لا ترا صار هواي مو مال هرمونات الحمل منو مضوجج لو ضايجه لان مفاركتني هاي الايام ؟

جرت نفس كالت...اي صح فاروق احس اهتمامك بيه مو مثل قبل

رفعت حاجب من كلامها...لا والله صدك تحجين ويني،وين الاهتمام انه يبااا انه ليلي كله ما انامه محتار بضيم ذياب انه اريد وأحد يهتم بيه ترا مو سهل عليه وانه اشوف اخوي مهدد بالموت

نزلت راسها بفشلة وفركت اديها بتوتر كالت...العفو حبيبي اسفه ونبي فعلا اني وحده غبية كولش اسفه واعتذر منك بس ما اعرف هماتين الي حق عليك

جريت نفس وسحبت ايدها بستها حيل احسها هل ايام تتحسس ما اعرف منو لاعب بعقلها ولو هي ما تلتقي بأحد ليش هيج احسها متحسسه من قربى وخلفيه من موضوع ذياب...

لا سوزان مو طبيعية انه احبها اموت عليها بس هل موضوع اخذ حيز من تفكيري يا ربي بمنو افكر افكر بذياب افكر بسوزان المطنكره والله حيره واحد وين يروح اشمر روحي،بشط العرب

........................

وئام...

دخل عمر جان عند ذياب سالتو عنو كال..ما شفته ما قبلو بس شفت جدي الشامخ كال هسه فاروق جان وياي،وراح

عضيت شفايفي بخوف كتلو...فدوه عمر اخاف صاير شئ فدوه احجي طمني كول اي شئ

جر نفس ورد عليه...بعده الحكم يوم الخميس ان شاء اللة نهاية هل اسبوع

تنفست بقلق...زين فدوه عمر ان شاء اللة الحكم لصالح ذياب يعني اكو امل يطلع ؟

كعد ومسح وجهو بتوتر كال...ان شاء اللة اذا ربج يريد يبدل الأقدار يبدلها ادعوله الله يفرج عنه ويفك اسره من السجن

همست بدموع...اميين يارب يطلع ونكحل عيونه بشوفتو والله من انسجن لحد هساع وانه ما اهاجس بطعم الحياة...

تنهد..هو منو حاس بطعم الحياة عبالك كلنه محبوسين

اردف بهدوء. امي ماكو وين ؟

رديت عليه...عمتي مو هينا راحت لبيت عمي ابو فريال

استغرب...ليش،شعندها

رفعت اكتافي،بعدم معرفه وبهل اثناء دخلت عمتي هي ومحمد كعدت وضلت تسولف كلها عمر..شكوو شعندج رايحه لبيت ابو فريال

جرت نفس وحجت...ماكو شئ سوالف نسوان وقتيبه يريد يرجع يخطب حفصه

انتفضت من مكاني...شنوو يخطب حفصه ههههههههههه هذا شبي تخبل ول منو كال ترضئ،بي

ردت عمتي...لا يكول هي تحبني حتئ انتحرت بسببي

ضحكت...وحده غبيه وثوله وعار عجل اكو وحده صاحيه تنتحر لخاطر واحد عار مثل قتيبه الجبان

رد عليه عمر...وبعدها تحبه لو لا

جاوبتو بسرعه...ول لا لا وييع لا ما تحبووو اصلا تكرهو ما تعرف شلون انتحرت بسببو خلي،يولي

عمتي ردت بجمود...اي همزين لا ترجع اله لان للضاهر جاي يخططون علئ شئ مو زين فخليها بعيده عنهم

رديت عليها...اكيد ما تقبل عجل هو الادبسز مو راد يعتدي عليها واخوي ذياب جتلو وطيح حضو

عمتي...اي خوش حذريها هن ناوين علئ شغله مو زينه ويردن يجمعن بيها قتيبه وحفصه حتئ يكدر يتردد علئ بيت الشامخ بالغربية بعد ما نمنع منه

وكفت...اي هساع اخابرها واكولها واذا قبلت بي اتبره منها لا انه اختها ولا هي اختي...

رحت خابرتها وحجيت وياها وهي ردت عليه..ول لو ابوي يطلع منو كبرو ما اقبل بي ما ضل عليه بس،وسخ رجليه ول ول خلي،يولي ما احبو اريد واحد عندو شخصيه وحلو وعندو شوارب ومملوح

ضحكت على كلامها ودعيت الها ربي يرزقها بإنسان يحبها ويصونها ويسعدها علئ كد نيتها ...

احنه اخوات ذياب وفاروق رغم نختلف مرات ومرات نتعصب وما نعرف نتصرف بس من نصحئ علئ حالنه بينه حنية العالم كلها ونصير ايد وحده يوم الحذيفه الي يلتجئ النه ويترك فيه الحية الي اخذتو حاصل فاصل وبعدتو عن اخوانو حتئ،ما مهتم السجن ذياب....

انوب هم كالت اجه الشامخ ورزل صبيحه رزاله ناشف هي،و فريال لان هادات علئ،بيت ابو سوزان وابو سوزان مخابر علئ الشامخ ومشتكي منها

وعاد الشامخ ما مقصر مرزلهن رزاله ناشفه غسل ولبس ويتوبن لا والله ولا يتوبن ذيج تتوب وهن ما يتوبن...

..........................

قربى...

ما اعرف شنو الي يدور من حولي ما اعرف الناس شنو تسوي من وراي شنو يحجون ذياب شوكت محاكماه انحكم لا هذا كله ما اعرف بي لان محد يشاركني الرايي محد يسولف ويايه ولو هم حقهم شلون يسولفون ويه وحده خرسة...

خالتي إم ذياب كالت...حضري نفسج اعرف وحده هينا تاخذ استخاره وعندها كرامه تقره علئ المريض الله يشافي

عاد اني من حلاة روحي لو يكلولي روحي الجهنم بس يرجع صوتج اروح اريد ادافع عن نفسي عن اطفالي كلام بداخلي اريده ينطلق من حنجرتي لان اذا يضل يخنكني

مرات يستفزوني بالكلام واريد بس احجي،بس ابرر ما اكدر اضل مثل الطير المسجون الي ما يكدر يطلب حريته ويدافع عن نفسه

بدلت بسرعه واخذت بس علاوي لان اخاف عليه حرك. و وكح وغدير خليتها عند حفصه هي،غدير حيل تحب عمتها حفصه ...

من شافتنه وفاء دنطلع اني وخاله ام ذياب ضاجت عبالك رايحين نتونس كبر حتئ كبر يحجون الواحد كوه

ضلت تدردم ..والله شنو نسوان عياره نسوان ما تستحي تمرض نفسها حتئ تثير عاطفة الناس والله عيب ما عاجبكم اطلعو من البيت

خالتي ام ذياب باوعت عليها تنهدت وهزت ايدها كالت...امشي امشي هاي تخبلت

ردت عليها بعصبية...شبيه مخبله والله انتم ما ترحمون بحالي باجي اني ماما كالت الكم وفاء عايشه ملكه هنا وتريد ناس تخدمها يعني وانتو وافقتو شنو هسه مخليني خدامه عندكم هذا ترا مو عدل

خالتي ام ذياب تخصرت كالت الها.. اكلج انتي منو طلب منج تنظفين مدكليلي منو طلب منج اشو حفصه نضفت البيت وقربى سوت الغدا وهي مريضه هن ماعونين اغسليهن واسكتي ما عاجبج روحي اكعدي بغرفتج وانه من اجي اغسلهن...

ردت بغضب..ما اعرف اشوف ماعون ما اغسله وبعدين شنو انتضرج منا لمن تجين واني غسلت ملابس حذيفه كومه وكويتهن وهم سويتله غدا ميحب ياكل من ايد قربى يكول مو طيب وما استنضفها

تنهدت وكتمت غضبي من كلامها من اسوي اكل تصب قبل العالم كلها وتكعد تاكل هي ورجلها بس،من الشامخ هنا لا تنتظر نصب،سوه بعد شوكت هي سوت اكل الحذيفه تجذب عينك عينك ...

ردت عليها خالتي بسخريه...هههه ما يستنظفها دروحو نظفوا غرفتكم ملتم النمل بيها من كثر الحلويات الملكوحه خليني ساكته وفاء احسن

ردت عليها...هسه عوفينه من هل كلام خلي قربى تغسل المواعين وتروح تلحك علئ الشوارع رجلها مو هنا وضاله تفتر ما بيها شئ اذا غسلت جم ماعون

عاد خالتي دخلت للمطبخ لزمت المواعين وركعتهن بالكاع فلشتهن تفلش اني تخبلت لزمت ايدها وحاولت اهديها...

هي بعدتني عنها وضلت تصيح...وخري،منيي وخري ول متت مليت منها تزعطط بروحها هنا ماعونين ما تكدرين تغسليهن وخري من وجهي وخررري

هي صفنت وترجف ردت عليها...ليش كسرتيهن لو غاسلتهن مو احسن من هل دراما كلها

خالتي صاحت بيها...لا والله اليوم انتي تغسلين المواعين وتنظفين المطبخ كلو يا ادبسز وبسيطه بس،يجي الشامخ انه اخلي،يشوفلو حل وياج بعد ما اتحملج..

ردت عليها ببرود..طلعيني ببيت وحدي وارتاحي مني

ضحكت خالتي كلتلها...لو تموتين ما اطلعج تطلعين جنازه وما اخليج تحققين غايتج وتاخذين بيت ذياب،ول عاد استحو انتي،ورجلج ذياب بالسجن وانتم وتحمون علئ،بيتو يا دنيئين النفس يا ملطلطين ...تف عليكم

سحبتني كالت...يله امشي امشي انتي الثانيه لل اجتلج

رجعت باوعت الوفاء ...شوفي اذا اجيت و ما لكيت المطبخ نظيف انه اخذج بيدي البغداد الكحج بصف امج واشبعي دلال ونوم يوول...

خلينه ورحنه وهي تحجي وتدردم عفناها ما تستحي احسها مرات زعطوطه وخبله مرات احسها شخص يحرض بيها بس هي مو صغيره جبيره ولازم تعرف الصح من الغلط....

رحنه للمره دخلنه عليها قرت عليه وانطاني اوراق ومي ورد وبخور كالت اسبحي بالورقه والمي،والبخور اتبخري بي...

وكالت..ان شاء اللة خمس ايام وتحجي

تشكرت منها خالتي ام ذياب ورحنه للسوك كالت اتفرهي شويه صح افترينه بس جان اكو غصه بداخلي وحزن عميق كل شئ ضلام بعيني بسبب عدم وجود ذياب عني...

رجعنه للبيت اشتريت بس ملابس العلي،وغدير لان خطيه شتاء واريد ملابس الهم تدفيهم...

من رجعنه لكينه وفاء منظفه المطبخ ومنظفه المواعين ما تجي بس بالرزايل بشر مطي والله مصيبه هاي..

دخلت للغرفه لكيت حفصه منومه غدير كعدت يمها اسولف كلتلها خالتي ام ذياب...نامت غدوره

ردت عليها..اي نامت اول ما رحتن وكلتها ونامت

خالتي ردت عليها...عفيه بنيتي،بعد امج هساع انه صرت ارضئ عليج من صرتي خوش،بنيه وفكيتيني،من فريال وربعها

ضحكت...هههه ادللي،ولو مساع هي خابرتني،ودكول ترا قربئ جذابه ما متخورسه

كلتلها...اي شلون

ردت عليه كالت...مو هي جانت نايمه و وفاء جايه للغرفه مالت عمتي،ام ذياب وقربى نايمه وسامعتها دكول وهي نايمه وتتحلم علاوي غدير تعالو

بعد اذا هي خرسه شلون هي نايمه وتحجي هاي الله فضحها وخله وفاء سمعتها وما رادت تفضحها لان وفاء تحب الستر

هزت ايدها خالتي كالت..عجل مو انه نايمه يمها شو ما سمعتها حجت ولا بيوم من الايام وفاء شلون سمعتها

حفصه...هههههه ما ادري وفاء وسوالفها

هزيت راسي باسئ،من كلامهن صدك ما يستحن يعني بعد اني بالغرب وهي،بالوسط وتحجي عني،وتاخط غيبتي شكد ما تستحي شلون ارتاح  وحده مثل فريال واختها واهلها يفترون ورايه  ويدورون عني الزلة....

ما اكول غير حسبي الله ونعم الوكيل يارب علئ كل ظالم

هذا كله مو مهم عندي اهم شئ عندي ذياب وكل كلامهن يهون ويصير سوالف وينطوي،بطي النسيان بس ذياب ما ينسئ وما اكدر اعيش من دونه واتغافل عن وجوده بحياتي احبببه ما اكدر اعيش،من دونه والله هو راحتي وسعادتي ..

................  

فاروق...

صادف اليوم خميس يوم المحاكمه مال ذياب بعد ما قدمنه طلب للرئاسه وفياض مشتعل نار اجه رجل عمتي ويانه كال بلكي يتخفف الحكم عن ذياب...

كعدنه بالمحكمة مالة الثورة منتظرين جابو ذياب من شفناه ارتبكنه وخفنه وكلوبنه تلهج بالدعاء وحاولنه قدر الإمكان ان نبين احنه صامدين وثاقين من الحكم الصالح ذياب رغم تكسر أجزاء بروحنه...

سلمنه علئ،ذياب متغير حييل وين ذياب ذاك الجثل القووي وين ذياب الي،بنظرة عيونه يهز بلاد...هسه نظراته كلها يأس قلق وجهه ضعفان وعيونه ذبلانه

وضعفان حييل اي هو ما متعلم علئ هل عيشه عاش عمره بكرم وعزة نفس ورفاهية اكيد ما يتحمل هل وضع...

كعدنه وجنه نتنظر الحكم وبدت المحاكمه من جديد

انتبهت علئ فياض حباية بنص خذه حمره وجبيره ما اعرف ليش انتبهت عليه ورغم هذا هو كاعد بكل ثقه وعاقد حواجبه ومطنكر جنه صخل اكرع...

لحضات اصعب من سكرات الموت مترقبين بكل جوارحنه  رجفه اعتلت ارواحنا والسن تلهج بالدعاء عسئ ولعل الله يستجاب النه هل دعاء وينقذ ذياب من هل محنه وبلكي الطلب الرئاسي يصب الناحية ذياب...

بعد ضجة وادعاءات و المدعي العام قدم اوراقه والمحامي كذلك

الحاكم كال...ان هو الحكم صدر من الرئاسه وهذا الشئ ما راح يقدم ولا ياخر نسمع الحكم وان شاء اللة الكل راضي...

ضلينه منصتين للحكم والقاضي اطلق الحكم بحروف من نار

حكم جان بوقتها قاسي،علئ،ذياب قاسي،لان انعدمت الحياة عنده حكم عليه بالدفن مو بالسجن

رغم كل الواسطات ورغم ان ذياب عسكري،وعنده خدمه عسكرية لكن هل خدمة ما شفعت اله هواي بسبب زواجه من قربئ...

وكفنه كلنه من هول الصدمه...لا مو معقوله ضلينه واحد مصدوم بوجهه الثاني رجلية صارت خيوط الشامخ وكف علئ اثر الصدمه

واحس حكم القاضي يتردد مثل الصداء،بارجاء المحكمه من كال..الحكم عشرين سنه مع سحب كافه الامتيازات ...

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسوا التصويت و المشاركه بكم نكتمل🌷