رواية #سلالة العنفوان...ذنب عينيك الفصل التسعون 90 - بقلم الكاتبه سمو العراق

الذنب 32
رواية...ذنب عينيك...سلالة العنفوان
بقلمي...نور سمو العراق

💔💔💔💔💔💔💔💔💔

"ألا يمكن أن ينضج المرء ويصبح واعيًا، دون أن يتهشم قلبه وتحترق روحه؟"
...................

لحظات اشد من طلوع الروح من الجسد وكعت مغمي عليه بس سرعان ما صحيت هو اعتقد مو اغمئ وانما صار عندي مثل الغيمه الي حجبت علئ عيوني وصار كل شئ اسود بنظري بعدها من وكعت رجع الوضع طبيعي عندي

وكفت واني احس بدووخه ورعب ركضت بنص البساتين واني اصرخ بصوت عالي،وادكدك بالابواب مال الفلاحين

فدوووه يا ناااس يا عالم الحكووو راح يتكاتلون تعالووو فدوه الزموهم

طلعو الفلاحين والناس،من بيوتها علئ صوتي وعلئ صوت الرمي

سألوني بلهفه...شكووو شصاير شني هذا الرمي

برجفه شملت كل اعضاء جسمي جاوبتهم....تعاركووو تعاركوو صار رمي راح يكتلهم فدوووه يكتلهم اييي الحكو عليهم راح يموتهم يرمي

احجي كلام من خوفي ما اكمله هم ركضو المصدر الرمي واني اركض وراهم شفت ايهاب رجل عسوله يركض وقميصه كل دم ...

كلوله بخوف ...شكووو شكووو

رد عليهم برعب...كتلو فاروق

من كال كتلو فاروق احس توقف عندي الزمن دخلت بحالة رعب وصراخ هستيري بحيث العالم تركو الرمي والتجئو اليه

حسيت تشنجت اعصابي واصرخ بكل صوتي واني واااكفه بمكاني تسبيت مثل جذع النخله ما يتحرك لا يمين ولا يسار

بعدها حسيت غير ان اني ارتطمت بالارض بقوه واني انعي فاروق اخويه الي ما جابته امي 

.................

فاروق

اول ما تهدد علينه وتهددنه عليه ضل يطالب بقربى عاد احنه لو يكطعنه وذر مال لحم ما ننطي شعره من شعر مرة ذياب

الشامخ ما قصر اول ما كطفه بالسبحه ذاك انتفض طلع مسدسه وضل يرمي عشوائي لا كال هاي جهال لا تنكتل لا كال نسوان ضل يرمي بدون شوف

ركضت عليه بس هو رفع مسدسه ليفوك نغل ما ناوي يكتل بس يهدد ويخوفنه من شفته ضل يرمي ليفوك عرفته مو كتال

ضل يتهدد ويرجع ليوره وهو يكلي...ارجع ارجع لا انومك بمكانك ارجعععع

الشامخ صاح علية...جدي فاروق ارجع لا يكتلك

والله والزمه واحضنه ولزم ايده البيها المسدس وهو يغلط ويسب...لك حيووووان عوووفني اليوم انومك بصف شرهااان

هو مو يدفع بيه وانه لازك بيه دفعني بجسمه انلطخت بالباب جان الباب جينكو انشكت ايدي بي من الساعد لحد الجف والدم ضل يتناثر بس ضليت لازم بي

ركض عليه الشامخ وهو يصيح...ادخلن جوووه يووول لا تطلعن ودخلن ويلاد ذياب بساااع

من شافه واكع بس المسدس ما عافه ضل لازم بي شكد حاولت اخذه منه بس جان ضخم وقوي ما كدرت اخذ المسدس منه متشبث بي بقوووه

ركض الشامخ وداااس علئ ايد فياض البيها المسدس حييل بحذائة الجلد والطركه تكرمون مال حذاء يابسه خله فياض يصرخ وغصبا عنه ترك المسدس

بعده الشامخ دايس علئ ايده ونزل نفسه اخذ المسدس منه وحطاه براسه...

تركته وكعدت علئ الصبه صاك علئ اسناني ولازم ايدي احس الجرح يسمط بيه

دخل ايهاب الاثول شافني واكع الدم ملطخ قميصي ضل يصيح...كتلو فاروق ...فاروق انكتل

وطلع يصيح...يابه جيبووو سياره سياااااره الولد راح يموت...

مرته دخلت اخس منه عسوله مدري شسمه تلطم...يمه فارووووغ فاروغ انكتل

صاحت علئ جدة قربى كلتلها...ولج ما بي شئ صيحي علئ رجلج لا يرعب غربان

ردت عليها...هو يا فاروغ ؟ بس لا صديق ايهاب

غمتها بعصبية ...اهمدااااج دشي دشيي

دخل ايهاب يركض كال...هاااي بتكم تخربطت

الشامخ صاح..ول فاروق هاي قربى تخربطت روح اركض الها...

طلعت وعفت الشامخ هو وفياض بعد ما اخذ سلاحه منه وضل يهدد بي

اول ما طلعت شفت قربى واكعه يم النهر والعالم ملتمه عليها يشمرون مي علئ وجهها

وخرت الناس منها ...وخرو يمعودين هاي اختي وخرو منها

دفعتهم شفتها واكعه وشعرها لازك بوجهها بسبب المي الي نزل عليها

سحبتها وشلتها وركضت بيها طلعت سويج السياره من جيبي ودخلتها بالسياره طلعت مرة خالها وهي تلطم ...يمه غربه خاله غربه سوده عليه غروبه خاله

وجدتها تركض وراها ...غروبه يده غروبه شطلعج سوده بويهيي

صعدن وياي واخذها لاقرب مستوصف اخذوها منه الدكاتره بالطوارئ فحصوها كالوو...صاير عندها انهيار عصبي وخفقان والضغط مالتها متخربط الواطي صاعد والصاعد نازل صايره عندها خربطه بالضغط

شكلو العا مغذي وضلينه منتظرين كتلها...حجيه جهال ذياب منو ضل يمهم بس لا بيهم شئ

ردت عليه...لا لا ما بيهم شئ بس يتصارخون علئ امهم وهم خافو بس وصيت عسيله وبطيطه عليهم

جاوبتها...لو وحده منجن ضاله يمهم احسن ما اجيتن ثنينجن

جدتها بجت...يمه فاروغ ما اكدر هاي بت بتي وحديتي هاي بت ام سليم شلون اخليها وحدها شدكول عليه يدتي ما دايرتلي بال ولا تحبني انه اموتن غبله هاي غربه مو شلون ما جان

جريت نفس وضليت منتظرها لحد ساعتين كالو ...صحت تكدرون تشوفونها

دخلنه كلنه باللهفه عليها وخوف لكيناها كاااعده والحزن كاسي ملامحها والدموع نازله علئ خدها تشكي الهم والالم الي توشحت بي

تبجي الوحدها بهاي الغرفه وحيده وجريحه ومخذوله من اهل ابوها...

حاولت تحجي فتحت شفايفها وحطت ايدها علئ عنقها مسحت عليه بحركه سريعه كأنها مختنكه من شئ مانع خروج صوتها

رجعت بمحاوله ثانيه تصرخ بيها لكن صوتها ما سعفها ولا بدر منها اي صوت تحاول تحجي بس ماكو الها صوت وكأن صوتها تكطع وتلاشئ مثل السراب

حررت اديها من المغذي وشمرته بإهمال وكأن صوتها اهم اولوياتها تريد تحجي تريد تسأل تريد تبجي

ضلت تحرك باديها بإهمال و خرت الغطا وتاشر بيدها علئ صوتها جانت مثل الذبيحه وكت الذبح خايفه ومرعوبه

وكعت علئ الارض وبجت بمراره ركضنه عليها وجدتها ومرة خالها كعدن مقابيلها كللها بخووف..غربه غربببه احجي شبيج

اشرت علئ صدرها ورعب كاسي وجهها عيونها جحضت من شدة خوفها ورجليه واديها ترجف بقلق

كعدت يمها ولزمتها من اكتافها حجيت وياها بحده...قربئ كولي يا الله كولي يا الله كولي بسم اللة كولي يا محمد

جانت بس تحرك اللسانها داخل جوفها بس صوتها ما طلع

تحجي الكلمات بس مجرد تحرك شفايفها بس بدون اصدار اي صوت الها

شديت علئ شفايفي بقسوه وصفطت اديه باسف كلتلهن...اروح اشوف الدكتور

طلعت بسرعه تاركها ويه جدتها ومرة خالها الي تخبلن من شافنها فقدت صوتها

رحت حجيت ويه الدكتور كتله...فدوه دكتور المريضه قربى صوتها اختفئ وما جاي تحجي شنو السبب ممكن تجي تشوفها

وكف واخذ السماعة مالته ورحنه الها لكيناها متمدده علئ السرير وتبجي مثل الطفل الضايع من اهله وخايف من العالم

وجدتها ومرة خالها يصبرن عليها ويبجن

فحصها الطبيب بلل شفايفه بحيره كال...يومين ويرجع صوتها هاي صايره عندها صدمة عاطفية فقدت علئ اثرها النطق بس ان شاء اللة يومين وترجع مثل الاول

جاوبته بقلق...دكتور يعني ما عليها شئ ما ناخذها دكتور اخصائي

جر نفس كال...انتظروا يومين اذا ما رجع صوتها لازم دكتور اخصائي وان شاء اللة ما بيها شئ...

ضلينه محتارين وبعدها طلعتها جانت منتهيه حييل وجهها شاحب عبالك ميته والذبول طاغي علئ وجهها جفونها حمر

تلكانه الشامخ كال...هاااا بويه فاروق هااا شبيها قربى

جاوبته بارتباك...لا ما بيها شئ مجرد انهيار عصبي

رد عليه بتنهيده...عجل يله لزوم نرجع للديره هساع هذا يتخبل علينه بعد ما نكتل احنه هناك ديرتنا واهلنا وناسنا نكدر نجتلو وندافع عن رواحنا

جريت نفس...يله خلينا نروح بسرعه

ودعت قربى جدتها وبنات خالها ومرة خالها وخالها واخذنه الجهال ورحنه للغربية

جدتها خطيه اول مره ما راحت ويانه بعدها كلبها ما انطاها اول ما حركنه السياره اجت تركض بجسمها الهزيل وتصيح ....فاروغ يده فاروغ انتظرني

وكفت وفتحت الها جام السياره ورجعت بالسياره الها كتلها...هااا حجيه محتاجه شئ

جاوبتني برجاء والدمعه بعينها...ما اكدر اخليكم ترحون وانه بالي عند غربه فدوتك يده خذوني وياكم ما اكدر اضل وبالي مشغول بيها

الشامخ كلها...اصعدي حجيه اصعدي تنور بيج الغربية اهلا و سهلا بيج من البصره للغربية

أبتسمت بحزن واجت وراها عسيله تركض شايله بقجه بيها ملابسها هاي تكون ثوب ويدخلون بي بقية الملابس يسو مثل الجنطه

مدت راسها عسله من جام السيارة وكالت...خايبه ام السعف وليف حتئ ما شفتج هي هاي هم ييه « جيه»

لزمت ايدها وعصرت من دون ما ترد عليها

عسيلة بصدمة...ياال ما تحجين شبيج تخورستي شكد جلبه عاد كولي مع سلامه عسوله خيه بس وين انتي تزوجتي نغيب ثلث نجوم شتردين من الله بعد

الشامخ باوع العسوله باستغراب وهي مستمره ترطن بالكلام كلتلها...لا يبا نسر ونجمه رائد وراح يطيرن من وراج

ردت عليه...يااااع صدك كالو كاتل شرهان العار الله يرحمه لا تخافون يطلع يطلع اخذتله خيره عد عمتي كالت يطلع يومين

عاطت بيها جدتها...خايبه عسيله ترحين منا لا انعنع ضلوعج

هي خلت وراحت وتحجي علئ جدتها وعلئ قربئ شلون ما ترد عليها السلام ما تدري البنيه انخرست من وره عمها الكوا....

خلينه ورحنه جنت اسوق واباوع القربى حاضنه علاوي بيد والايد الثانيه محتضنه بيها غدير جانت نايمه بس علي كاعد

الشامخ كال القربى...جدي انطيني علاوي تا اخلي يمي

اخذته وانطته الها كلها بتساؤل...شلون صرتي

هزت راسها بمعنئ زينه باوعلي الشامخ بنظرة استفسار علئ اثرها جريت نفس عميق وما جاوبته وهل شئ اثار الشك بداخله

حضن علي،وهمسلي...جدي فاروق شبيها حرمة اخوووك ؟

رديت عليه بتنهيده من اعماق صدري...ما اعرف فقدت صوتها والدكتور يكول يومين ويرجع واذا ما رجع صوتها افضل تاخذوها دكتور خاص

جاوبني بصدمه...ول ول شهل كلام كله بسبب عمها العار اذا ضل صوتها هيج ما يطلع انه وفياض كوم احنه ابنه سلم نفسو للحكومه مو من حقو يجي ويتهجم علئ حرمتو هل عار الكلب

مسحت وجهي بتوتر...والله ما اعرف هذا شيريد بالضبط ترا هو الي كتل ام قربى وخبر عن اهلها نكدر نستغل هل شئ الصالحنه

الشامخ...هاي مشكله هساع يكولون انتم شدخلكم بام هاي البنت اذا مو هي حرمة ذياب؟

جاوبته بقلق...  ما اعرف شكول خليني التقي بذياب ونشوف الوضع شلون والله كريم

حضن علي وباسه وعلاوي يلعب بسبحة الشامخ رد عليه...الله كريم البي خير يتقدم ان شاء اللة...

وصلنه للغربية واخذناها لبيتها لان هي ما قبلت تروح البيت الشامخ ما عندها طاقه للمواجهه واحنه هم ما ضغطنه عليها خليناها تروح البيتها وجدتها وياها...

كلت باجر ارجع لبغداد خابرت علئ سوزان طمنتها عني لان خطيه تضل بقلق وانه ما اريد اقلقها خاف تضعف...

كلت من ارجع اروح لذياب هم اطمنه عن مرته وجهاله وهم اشوفه واتطمن عنه واشوف المحامي شسوه ...

بلكي الله وهل ايام يرجع صوت قربى لام مت اكدر اىوح لذياب وقربى هيج حالها اكيد يضل بقلق وهو من النوع الي يخاف عليها وبحبها حييل وانه ما اكدر اجذب عليه لان هو يحلفني فاريد كل المعلومات والمصادر الي انطيهن اله صحيحه وبعد الله كريم..

....................

وئام...

بعد ما راحت خالتي ام ذياب للغربيه اخذها حذيفه اني رجعت علئ بيتي

اجتنه عمتي صبيحه هي وفريال اجن العمتي ام عمر عمتي من شافتهن انهبطت تخاف من المشاكل تعرف عمر عصبي واذا سون وياي مشكله عمر ما يسكت ابد

اني تكفيت الشر وكعدت بغرفتي ما طلعت الهن ابد ما بيه حيل مشاكل ومو مثل قبل قويه لا بعد ما ضربتني سهام بصدري وسويت عمليه اهاجس مفاصلي خربانه تتخرخش...

كلت عاد اكعد بغرفتي بدل ما اسمع كلمة منهن تغثني
واتعصب واذي نفسي وااذيهن...

صاحت عليه عمتي مديحه كالت...وئام وئام تعالي محمد متعارك ويه بيت زنوبه وضارب ابنها اموري بعينه

لطمت خدي...عزااا هذا الولد ولا يكعد اذا ما يسوي مشكله ما يرتاح

نزلت بسرعه من غرفتي ونزلت ويايه طيبه شفت محمد كاضب مصياده و واكف علئ صفحه هاي المصايده سواها الا عمل من جفوف بلاستيك مال عمليات وخشب وربطها سواها مثل المصياده

والله يا عمر عليه سوالف تخبل الواحد سوالفو تور ور عجل هساع محمد مال مصايده مو يعرفو وكح والكاع ما تحملو عليش هيج يطلع عينو وما يفكسها

زكحت عليه بغضب...محمد اليوم اذبحك ول ول عليش ضارب الولد

رد عليه ببرود...انه اريد اضرب الطيره واصيدها وهو واكف جدامي مثل ألبومه كتلو يا ابن الحلال وخر وخر من هينا وهو اثول واكف مثل الصنم انه نيشنت علئ الطيره واجت بعينو يعني ما متقصدو وداعتج يا فلفلتي

زكحت بوجهو مره ثانيه...خالك فاروق اكدر للسانك انه

اندك الباب بقوه اجونه الشکايه اخذ المصايده من ايدو وهو كاضبها قوي ويصيح...عوفييها عوفيها مالتي اهووو لا تعاندين

اخذتها منو گوه وطلعت للمره جانت متخصره كالت بعصبية...وينه ابنج هذا المستهتر ترا ما صارت هاي والله عمر مدلله يهجم البيوت فوك روسنه شويه استحو كولو جيران الرسول وصه بسابع جار

جاوبتها بإحراج...العفو منج خاله بس والله رزلتو هساع وطيحت حضو وبس يجي عمر اگلو عليه واخلي يجتلو

هو مد راسه من الباب ورد عليها من دون خجل...خاله انه شدخلني عجل هو ابنج مطفي اكولو يا ابن الحلال وخر من جدامي ما يوخر واكف مثل البومه

سحبتو ودخلتو وعضيت اصبعي...ول انه الك بس خلي تروح المره اليوم اذا ما نومتك بالسطح ما اطلع وئام

كالت المره...شفتي شفتئ ابنج شلون ما عنده تربيه

خلت وراحت وهي تحجي...كبر حتئ كبر ناس تنطي خبز وما تنطي تربيه والله لو لازمته الا اطلع عيونه من راسه طير عين الولد حقير كبر لهيج ناس ما تنطي تربيه لجهالها

سديت الباب ودخلت ومحمد انهزم يم بيبتو ام عمر رحت وراه ناويه اجتلو كال...عليج العباس،وئومه والله بعد ما اعيدها

حطيت ايدي علئ خدي...ول ول ول منو معلمك تحلف بالعباس ول مصكوع

رد عليه...مو اسمع الويلاد بالشارع هيج يكولون

زكحت بي...اطلع من وره بيبتك انه اليوم اجتلك اجتلك

صاحت عليه عمتي...يااا وئام شحدج تمدين ايدج علئ عمر غير ما رايده روحج انتي مره طلعي من وراي واضربي الا اكسر ايدج

رديت عليها بعصبية...عجل ما تشوفي ما عندو تربيه خبلتو كد ما تدافعون الو

جاوبني ببراءة...هساع هو قابل انفكست عينو ترا ما بيها شئ بس هو دلوع وبساع يبجي

حطيت اصبعي كدامو بتهديد...اسكت ولا حرف النفس تكطعو

دحكلي بخزره ما عاجبو الوضع هجمت عليه تا افكس عيونو بس هو ختل وره عمتي وعمتي هددتني ما احاجي واذا حاجيته تطلكني من عمر عاد انه كل شئ ولا اتطلك من عمر

كالت عمتي صبيحه...شبيج عيني ما تسلمين الجلب العضج كتلناه

رديت عليها من دون نفس...هلاو  شلونكم

هزت ايدها كالت...خرب بالحظ جانت خدامه النه هسه ما يعجبها تسلم

رفعت عيوني للسكف ..ربي اشهد شوفها دكول جانت خدامه النا معناها ضالمتني سجلي يا ملائكة الله الصالحه سجلي

صاحت بيه..شبيج تسودنتي علئ شنو شايفه روحج خاف عبالج ذياب بضهرج ذياب راح وانتهئ وابسط شئ ينحكم اعدام هم متزوج وحده معارضه وهم كاتل كتل مع سبق الإصرار والترصد

رديت عليها بجزع...اسم الله فالج ما كبلناه وان شاء اللة يومج كبل يومه ويعيش بكد تراب كبرج

دحكت العمتي كالت الها بغضب...شفتي مديحه شفتي شلون لسانها طويل وتجادل وتدعي عليه طلكيها من عمر طلكيها...

ضحكت عمتي...ههههههههههه صدك ضحكتيني يا صبيحه ولج شنو هو بكيفي اطلك وازوج كون يسمعج عمر الا يتبره منج خالته يتخبل علئ وئام يموت عليها

باوعتلها بفخر وابتسمت ورفعت حاجب...عليش يمه يطلكني يموووت عليه اصلا ما مصدك متزوجني ويكول لو يخيروني بين الف مره اختارج وانه كتله خاف انوب تسويها سواية ابو سوزان

فتحت عيونها بصدمه وعصبية كالت...شكد حقيره بعد بت جميله المطلكه شنريد تطلعين

جاوبتها ببرود كال عمر...لا قابل انتي صبيحه واطلكج

وكفت بعصبية كالت...كح..ادبسز ساس جميله هذا الجنت خايفه منه

محمد زكح بيها...هييي لا تغلطين علئ امي لا بالمصايده

ودحك الي برجاء واردف بتوسل...فلفله مو دافعتلج لا تچتليني ولا دكولين لبابا ضربت الولد

ضحكت علئ سوالفو ومجاوبتها

وهي كعدت تدرم وتحجي فريال سكتتها و وجهت سؤالها لعمتي ام عمر كالت...من بعد ما ذياب انسجن اكثر شئ اعدام او مؤبد شنو حيكون مصير قربى وهو كل الي جره من تحت راسها اني متأكده مليون بالميه الشامخ حياخذ الاطفال ويطردها

ضحكت بصوت عالي وهزيت راسي باسئ...ههههه الضاهر الناطق الرسمي الي بالغربيه ما ينقلج الاخبار بصورة دقيقه

دحكت اليه باستغراب وعكدت حواجبها كالت...شنو قصدج منو الناطق الرسمي فهميني اكثر

ابتسمت...حبي اولا قربى بالغربيه الشامخ جابها من البصره وخلاها مراقبه تحت انظارها اخاف اكو شخص ناوي يضرها وياذيها

وشويه صحتها تعبانه وهو متخبل عليها وحفصه اختي دكول جدي متخبل علئ قربى وحزنها اكثر من ذياب ومصيرو

باوعتلي بنظرات مصدومه ومرتبكه كالت...والطفل الي بطنها يدري بي الشامخ

ضحكت...اي يدري قبل لا يقتل ذياب شرهان وهو الي كال لذياب لا تفصح عن الطفل لان اكو ناس حسوده وما تتمنالك الخير ...فكافي تنسبن الطفل الغير ذياب مفهوم

ضلت تباوع الصبيحه وصببحه تباوع عليها وحدتهن وجهها ما يكصو السيف

ابتسمت بفرح...اممم مرة ابو سوزان وسوزان وقربئ اعتقد يجيبن بنفس السنه لان كلهن حوامل ما شاء اللة

اني ما حجيت هيج وهي عمتي صبيحه انصكعت بمكانها وكفت مرعوووبه كالت...شنوووو نااادين حامل

رديت عليها...اي فدوه الكلبها حامل بلكي تجيب نونو حلو مثلها

صرخت بعصبية...كووومي فريال كووومي والله اليوم العب بابو سوزان الكو...لعب انوب حبلها فوك ما تزوج عليه يحبلها اني الك اليوم لو اني لو نادين

خلت وراحت تركض وفريال تركض وراها تطك بكعبها وكوه تركض من تنورتها الجينز السوده

عمتي ما رضت عليه كالت...وئام ليش هيج تسوين ليش ولج ما تستحين انتي تردين مشاكل

جاوبتها بحقد وحده ...طبهن مرض يا ما ويا ما تفرعنن وستهزئن بيه هسه دكول جنتي خدامه عندي الحقيره فوك استغلالها انوب تعيرني

عفتها واني اغلي من الداخل صعب من تحاول تتناسئ الماضي ويجي واحد هو السبب بماضيك ويذكرك بهل ماضي الاليم بحياتي ما شايفه ولا راح اشوف مثل حقارتها ولا اكدر انسئ الي سوته بيه اني وفاروق هذا الي اسوي بيها قليل هي جانت تحرض الشامخ علينه وهي السبب بكل شئ صار ويانه

.....................

سوزان...

كنت عند بيت بابا لان فاروق مموجود راح القربى هو وجدو الشامخ

اني بصراحه ما اكدر اكون الوحدي اذا مو فاروق وهماتين اخاف ...انوب واحد يهجم عليه مثل ابن عمة قربى فصرت اخاف...

جنت كاعده يم نادين واتلمس ببطني جنت بالاشهر الاولئ كلتلها...نادين اذا صار عندج ولد شنو تسمي واذا بنيه شنو تسميها

ردت عليه بضحكة...ما اعرف بكيف ابوج بعد وانتي ؟

جريت نفس ...اكولج هسه اني تقريبا بالشهر الرابع بس احس بطني مقسومه نصين واحسها اكبر من بطنج رغم انتي اسمن مني واضخم

ضحكت..ههههههههههه خاف بيج توووم

صرخت بفرحه...ياااااي ونبي اموت من الفرح انجلط

كالت...تعالي امي تعرف بله خلي نسالها

رحنه يم ام نادين لزمت بطني كالت...ياااا جنج بيج توم والله

دمعت عيني بفرحه...صدك خاله ونبي فاروق يموت من الفرحه ياااااي مدا اصدك

سألتها....خاله ولد لو بنات فدوه خاله كولي بنات حبابه حبابه

ضحكت كالت...خاله هذا رزق من الله ما يعلم بي غير ربج

ابتسمت وحضنت بطني...الحمد لله شنو يجي من رب العالمين اهلا و سهلا وراضيه وحامده لرب العالمين

صفنت اكول ياربي صدك بيه توم لو مجرد تهيائات بس والله اذا صدك فرحه تغمر صدري ونبي ما اعرف شلون احس املك العالم كله

اندك الباب بقوه تفلش تفلش راح اخويه الصغير فتح الباب ودخلت ماما هي،وفريال من شفت ماما احس رجليه ماتت ما اعرف شنو الي صار بيه انرجعت عليه احداث قديمه

حطيت ايدي علئ عنقي كوه اتنفس نفس العظم رجع عليه حسيت نبتت بعنقي ما اعرف هل شئ يتخيلي،

صرخت بصوت عالي يدوووي بكل مكان وفريال جانت لازمتها كالت...ولللللج ولج نااااتدين صدك حااااامل ولج كلج خلك خدامتي اخذتي رجلي وكوشتي علئ حلالي وتاليها حامل منه والله اليوم اذا ما طلعت الطفل من حلكج فلا اطلع صبيحه هسه تذبين الطفل

ضلت نادين محتاره كالت بخوف...ام سوزان شنو هل كلام غير زوجي وحامل بالحلال شنو اذبه

هجمت عليها بس لزمتها فريال وما خلتها دخل بابا وشاف ماما هاجمه علئ حمامته الحلوه وهو تخبل هو نادين ما يخليها تنظف يخاف عليها وعلى طفلها انوب يخلي ماما تهجم عليه

تعارك ويه ماما وطردها ضليت ابجي من صار هيج يعز عليه هيج مواقف بين ماما وبابا مهما يكون تضل امي رغم كل شئ تسوي

حبست نفسي بغرفتي وما طلعت منها الا لمن اجه فاروق اخذني وبهل اثناء سمعت بابا يخابر علئ جدو ويكوله صبيحه عيب عليها تتهجم علينه اني رجال محرم عليها مو عيب هيج تسوي والله تمنيتها مو ام سوزان الا اقدم عليها بلاغ ترا ما صارت مره طلكتها ما يصير كل يوم هاجمه علينه

عفتهم ورحت وبابا طلع ورايه باسني واعتذر مني كال...يا بابا يا سوزان امج اني ما ضالمها هي ضلمت نفسها

سكتت ما حاجيته وخليت ورحت اني وفاروق البيتنه

اول ما وصلت نمت او استدعيت النوم رغم كل شئ ورغم حتئ ماما من اجت ما باوعت بوجهي والتهت بمشاكلها بس اني احس نفسي حييل مشتاقه الها

اتمنى انام بحضنها اشبكها وابوسها مثل قبل تضل امي رغم كل سوالفها وحقدها وغلها علئ العالم

نمت والدمعه بعيني وما جفت علئ انسانه ضيعت نفسها وضيعتنه وياها

وين جنه و وين صرنه خسرت كل شئ بانانيتها وبتدخلها بأمور غيرها....

..................

قربى

صار تلث ايام علئ رجوعي من البصره ولحد الان صوتي ماكو اختفئ

اني الي رعبني هو ايهاب زوج عسوله من كال كتلو فاروق اصعب شعور من اسمع انسان غالي عليع وغالي علئ ذياب يموت ما اعرف شنو الي صار بيه انصدمت صدمه الجمت لساني

هاي مرتين صارت بيه اني من شفت اخوي وابويه يضربوهم واغمئ عليه وصارت عندي متلازمة التاتا بس ما فقدت النطق تماما لا جنت احجي اتمتم بكلامي

بس حاليا ابد ولا حرف ولا اكدر انطق اي كلمه اذا ردت شئ احجي بالتاشيرات وهم ما يفهمون عليه بعدها صرت اكتب بدفتر وقلم وضل هل سئ ملازمني الدفتر والقلم

اخذوني الدكتور اخصائي سووالي فحص كامل واشعه كال...ما عندها اي شئ صدمه هاي وما معروف شوكت يرجع صوتها يعني مثل طفل تعرض الخادث او سخن وفقد النطق هيج حالتها يا اما يرجع يا اما لا

جدي الشامخ كال اخذها للشيخ الي رجع سوزان طبيعيه اخذني اله ما قصر ضل يقره عليه ايات وانطاني اوراق احركهن بحرمل وجمر سويتهن ونفس الحاله

شكد احاول اصرررخ احجي ماكو ما يطلع صوتي راااح ابد ضليت مثل المنهاره احس نفسي مثل العميه مثل الإنسان التايهه

اكو اشياء بداخلي اريد افضفض عنهم احجي الكتمان سبب عندي حاله نفسيه وحاله من القلق بله اجاني حرامي شلون احشم علئ العالم

رحت البيت الشامخ وخطيه حفصه ما مقصره كل شئ تسويلي واني كل يوم مشكليلي مغذي الضغط ابد ما مستقر ويخافون يقتل الطفل....

وكف بالمزرعه مال الشامخ اذكرت اول مره طلعنه بيها اني وذياب وخبرته عن حملي بغدير جنت خايفه منه ما يقبل بس جانت فرحته تختلف

حطيت ايدي علئ بطني هذا الطفل الثالث وذياب بعيد عني

ناجيت ربي بصمت مطبق ..يارب رجعلي ذياب ترجع الفرحه الداخلي وينزاح عني الحزن

مسحت دموعي الي تلالئت علئ،وجناتي سمعته وهو يكول...شكد تبجين الخاطر الله

درت وجهي بخوف و هلع علئ مصدر الصوت ومشيت بخطوات سريعه مبتعده عنه

رد عليه...ولا جنج حامل للمره الثالثه عبالك طفله ولا تكبرين رغم الهم والغم الي محاوطج حلو لو تصيرين ارمله لو مطلقه

خفت منه حييل خفت يستغل امتناع صوتي من الصدئ وتجري الامور الصالحه

ركضت بسرعه مخطوف لوني وملهوووفه انصدمت بحفصه لزمتني كالت بقلق...شبيج قربى؟

درت وجهي للمكان الاجيت منه واشرت الها...

استغربت وباوعت كالت...محد هينا. !!

مسحت وجهي بتوتر وحركت شفايفي افهمها بس ما فهمت عليه

كالت انطيج ورقه وقلم تا تكتبين بيهن

عضيت شفايفي بجزع وهزيت راسي بقبول

اجت وفاء بسرعه وقطعت الدار بينه كالت...جدو يكول خلي تجي قربى تنوم علاوي لان نعسان

خليت ورحت اخذته من كال...شلونج بويه ان شاء اللة احسن

هزيت راسي بقبول وبست اصابع ايدي وخليت علئ جبيني بمعنى نعمة من الله

تنهد وقبض علئ سبحته كال...ان شاء اللة باجر اروح لذياب

اشرتله وطبكت اصابعي السبابه والوسط  سوه بمعنئ «اروح وياك »

افتهم حركتي ورد عليه...لا يا جدي ما اريدج تتبهذلين وانتي حامل خليني اروح الوحدي وانه اطمنج عنه

هزيت راسي بقبول والحسره تاكل بصدري تايهه ضايعه من دون ذياب امشي،من دون لا روح ولا جسد احس الايام صارت سنين

والخوف استوطني ما انام اليل اخاف بي شئ اخاف ماذي ضاربي اخاف مو بخير كلبي وعقلي وهواجسي كلها وياه الناس تحجي واني بغير عالم ..عالم ما بي بس ذياب....

................

فاروق

رحت للسجن طلبت ومقابله لذياب ما قبلو اول مره وبعدها واسطه وما ادري شنو بالكوه يالله خلوني هاي واني صديق الريس حكومه ما تفيد بيها حتئ الصداقه

جنت كاعد علئ نار مشتاقله اول مره اشتاق لذياب هلكد اول مره بحياتي اشتاق الشخص واحس ملهوف عليه حتئ سوزان ما مشتاقلها هلكد

وكفت وامشي بتوتر بالغرفه مال الانتظار بروده سرت بأطرافي

فتح الشرطي الباب ودخل جان لابس ملابس عاديه بس متغير صايره عنده لحيه مو مثل ما عهدته

دخلته عليه خلتني اتمعن بي هذا الجنت اكرهه جنت اتمنئ اله السجن اتمنئ يصير اسفل السافلين تحققت امنيتي العقيمه

بس للاسف ما عهدني مثل قبل وكأن الصار بذياب صار بيه والي تمنيته اله من قبل هسه اتمناه العدو وتغيرت امنياتي وصارت اهم امنيه عندي ذياب يطلع من هل محنه سلامات...

وانه اباوعله طفر كلبي من صدري والغصه والعبره خنكتني ما حسيت الا بدمعتي وكعت حتئ ما لامست وجنتي ...

تفاجأت شوكت بجيت وليش من شفته غلبني الحنين حسيت اليوم بطعم الاخوه حسيت فعلا ذياب مو بس اخوي لا ابوووي

هو من شافني جانت ملامحه جااامده وقاسيه وعاكد حواجبه بقهر من شافني لانت ملامحها وكساها الحزن

فتح اديه يستدعيني الحضنه ركضت عليه بجيت بصوت مسموع وهو يطبطب علئ جتفي ويطمني...لاااا ابو الفوارق ما عهدتك هيج انت سبع ما تنزل دمعتك شلون ما جان ول فاروق لا تكسر خاطري

شدد بحضنته عليه وبعدها رفع وجهي وباسني براسي رجع حضني،وهو كاتم الغصه بداخله

ضليت انوح علئ صدره وهو يهدي بيه كال بمزح...ول كااافي انجلبت ليكون سوزان زعلانه منك وانت تريد تطلع قهرتك بصدري هساع ما فاضت مشاعرك الا بالسجن

ابتعدت عنه ومسحت بقايا دموعي وضحكت من بين دموعي...دنجب يا سوزان يا اكلان نعل ولك مشتاقلك بحياتي ما فاركت واحد وشتاقيتله بكدك تتصور حتئ حمزيه شكد فاركتها ما شتاقيتلها بكدك

ضحك بغصه...هههه عجل طلعت اعز من حمزيه

جاوبته ببتسامه...شفت

جر نفس من بين ضحكته كال...شلونك مشتاقلكم جثير والله

بللت شفايفي بجزع وجريت نفس...والله احنه اكثر

كعدنه ضلينه نسولف سوه سال عن الكل امه اخواته الشامخ ما خله واحد يعتب عليه عبالك مفارك العالم

سالني بترقب وعيونه تلمع ...شلونها قربان ؟

تنهدت ...الحمد لله بخير

هز راسه بنفي وعلئ شفايفه ابتسامه حزينه...لا مو بخير هواجسي ما تجذب انه صار تلث ايام ما نايم اهاجس ام علي بيها شئ وهل شئ مطير نومة عيني

لزمت ايده باطمئنان جاوبته...ما بيها شئ صدكني بس اكيد مو بخير وهي تنوح عليك وحالتها حاله ما متحمله بعدك

جر نفس وزفره كال...والضاهر ما راح اطلع لو جنازه لو اعفن هينا

فتحت عيوني مصدوم...شهل كلام كول يا الله انت دافعت عن عرضك

ضحك باستهزاء...شرهان بالامن العام وجبير متغطرس هينا وفياض جلاد ويشتغل للحكومه بالخفاء وانه هينا موقفي ضعيف كوني متزوج بنت اهلها معارضين

جاوبته بخوف...درو انت متزوج قربى

رد عليه بعدم مبالاة...سألوني عنها كالو البنت بكامل عل اسم زوجتك ؟

رديت عليه...اي وشجان جوابك

ضحك بفخر ...دكيت الصدر بكل فخر وكلت انه خيالها وهي مهرتي

عضيت شفايفئ اكتم قلقي وخوفي جاوبته...رحت بيها يا ذياب

رد عليه...الروح ترخص الها وراح يصعدوني المحكمة الثورة قريبا

نهاية البارت...يتبع

كونوا انتم كونوا بخير...احبكم💔

نور سمو العراق 😘

لا تنسوا التصويت و المشاركه بكم نكتمل🌷

تابعوا هذا الحساب فضلا وليس امرا هذا الحساب بي تصاميم يعني البنيه تصمم اغلفه لقصص الي حاب تصمم اله يدخل علئ حسابها user44026272