رواية #سلالة العنفوان...ذنب عينيك الفصل الخامس 5 - بقلم الكاتبه سمو العراق

الذنب الثالث
رواية..ذنب عينيك..سلالة العنفوان
بقلمي...نور سمو العراق...

💔💔💔💔💔💔💔💔💔

بعض الأبواب اذا فتحتها ستجرحك فدعها مغلقه
حفاظاً على ما تبقى 🌹

تنوية...لهجة اهل البصره يمكن مو الكل يحجي بهلي اللهجة او متكون لهجتهم بس هاي اللهجة لهجة اهل قبل واحتمال هسه انقرضت وبيت بيبية قربى جانوا هيج يحجون فلحد تجي ودكول احنه اهل البصره مو هيج نحجي ..انتم متحجون هيج بس جداد قربئ يحجون ما الكم شغل بيهم😁

.......................................

بطبيعتها النفس البشريه تتاثر برفقاء السوء احنه كبشر نتأثر بيهم بشكل كبير بسبب،حثهم الدائم علئ ارتكاب المعصيه والذنوب

وحده مثل بثينه تهتم بس الشهواتها وعلاقتها وابتعادها عن رب العالمين لازم نبتعد عن هيج شكولات لان حتاثر بينه وتأثر علئ اخلاقنه...

امي الله يرحمها جانت دائما تحذرني منها وجانت ابد ما تقبل اكعد يمها ومن اسالها دكول يمه اكو مثل يكول الباب الي يجيك منه ريح سده واستريح هاي وراها مشاكل...

من شفت هوبي قفل الباب رجعلي كلام امي ورجعلي خوفها وحذرها عليه جنت اضن امي،مقيدتني مجنت اعرف تريد مصلحتي وهي كولش زين تعرف شنو هل حشره...

تخبلت من هوبي قفل الباب صحت بصوت عالي وخوف...شنوو هاي ليش قفلت الباب

ضحك كال...شبيج يحلوه علئ كيفج بعدنه ما كلنه حلال

بثينه...ههههههه اعذرها شويه قربئ خوافه

صرخت بوجهها...خوافه شنووو اني لا اخاف ولا شئ وافتح الباب خلينه نطلع بله قلة ادب

صفك اديه وهو يضحك...هسه اني،شمسوي وسويتها قلة ادب هههههه بثينه شبيها هاي بنت عمج مخبله

بثينه...هههههه اعذرها زعطوطه

هي كالت زعطوطه لو اني تخبلت ولزم نعال لاستيك واركعه بيها وصرخت بوجهها...انعل ابوج لابو الخلفج ماكو غيرج زعطوطه وادبسز تتمضحكين ومكيفه وهذا قافل الباب علينه شدكول علينه الناس انتي ما عندج مخافة رب العالمين...

هي تخبلت وتخصرت ...شنووو شنووو لج اكلي نعل حيوانه مو صوجج صوجي اني الصار ساعه افتر وياج ادورلج علئ صدريه بس صدك لو كالو سوي زين وذب بالشط

رفعت أصبعي بتهديد ...شوفوا هسه اذا ما فتحتوا الباب وطلعتوني وروح امي وهاي اول مره احلف بيها الم السوك كله عليكم

تقرب هوبي وهو يضحك كال...واذا ما فتحته

اخذت نعال ثاني من المحل كتله بعصبية...والقران بهذا النعال علئ وجهك بس تتقرب

هو تقرب وبعده يضحك وسنه مكسور اييع من يضحك حتئ رحة العقل تبين ...اسنانه كلهن مسوسات مقرف حييل ...

بس هاي بثينه ضال يصرف ويكيت عليها وهي مكيفه مو لسواد عيونه ولسوسة سنونه...

اول ما تقرب واركعه بالنعال واشرد هو لزم وجهه ويغلط عليه...يا بنت الزمال والله اذا ما ربيتج ما اطلع هووبي

وبثينه وكعت من الضحك قليلة ادب

ركضت فتحت الباب مال المحل وانهزمت جان الجو دا يضلم واركض اركض للبيت وابجي عبالك ما اشوف عالم بس اني وادموعي وامي

حسيت اليوم امي زعلت عليه لان السويته غلط بس والله مو ذنبي هي بثينه الحقيره راحت اله...

وصلت لبيتنه واني امسح بدموعي اخواني ابويه اذا يشوفوني بهذا الحال اكيد حيشكون واني ما اريد تكون ورقتي سودة بنظرهم قدر الإمكان دا احاول احافظ على نفسي لخاطر اهلي وامي...واصلا هل شئ حرام

بلعت ريكي دا اريد افتح باب بيتنه وامسح بالدموع المنهمره علئ خدي ما حسيت اله بايد شخص سحبتني

شفته معصب وعيووونه ناااار بلعت ريكي بخوف..شرهاااان

صك على اسنانه كال بغضب....وين جنتي وليش تبجين الدنيا مغرب شطلعج ترا شفتج من اول ما دخلتي للفرع وانتي تبجين منو وياج اكو واحد تعرضلج

هزيت راسي بنفي...لاااا محد بس رحت اشتري صدريه وتيهت من عمتي ام بثينه وبثينه

ما اشوفهن اله اجن يطركن كالت بثينه باستهزاء...ههو مساع مستحيه وتبيعين شرف براسي وبراس هوبي وهسه واكفه تتغزلين انتي وشرهان شكد متناقضه

خلت ودخلت هي وامها وهو تعصب كال...احجي شبي هوووبي

كتله بخوف...شرهان يا هوبي دوخر منا لا يطلعون خواني والله يتخبلون

همس بغضب...احجييي

حجيت اله عن الموقف الصار اشو هذا بدون سابق انذار ما اشوف اله جابني براشدي انركعت بالباب مال الشارع

باوعتله مصدومه وايدي علئ خدي رفع اصبعه بتهديد كال...كم مره كتلج بثينه قندره لا تمشين وياها وانتي لا ابالي بسيطه قربى بسيطه اني الج

باجر اني جاي لاخوانج وابوج واسولفلهم علئ هل سالفه

لزمت ايده بتوسل...لا شرهان فدوه لااا حباب والله استحي منهم لا تشوهه صورتي كدام ابويه واخواني

دفع ايدي وخزرني كال...اني باجر اجي اخطبج حتى اخلصج من هل مستنقع وانتي ما الج مكان للرفض لازم تقبلين حتئ هذا الموضوع ميوصل لخالي

دمعت عيوني...تستغلني

رد بتنهيده...لمصلحتج

تركني وراح احنه جنه واكفين صح بباب البيت بس يعني قبلها تكون حديقه يعني مو كدام الناس بس هي تابعه بس لبيت عمي احنه بس ندخل منها بس ما النه حق بيها عمي فياض ميقبل

دخلت لبيتنه واني ارجف شجاب شرهان هسه يربي استغفر الله

لكيت اخواني مو هنا طالعين بس ابوي نايم بالسطح كعدت يمه واحس البيت موحش امي الله يرحمها جانت تارسه البيت

سالني ابويه عن الصدريه كتله ما لكيت ولفيت راسي ونمت وخلصتها ابجي واعاتب امي لو امي موجوده جان هي اشترت الي صدريه وما رحت ويه ذن الحثالات...

صفنت يوسف ابن عمي فياض ليش من دخلت عليهم طردني شنو السبب ليش يكرهني والله اني احبه حييل وانقهر عليه والله بمعزة اخواني ...

الله يشافي يارب احس اكو شئ بداخله احسه بداخله جبل من الهموم...

ضلينه يومين اني غايبه ما رحت للمدرسه وجنت خايفه من شرهان وام بثينه وبثبنه اخاف يذبون التهمه بيه ...

والله وما اشوف اله باليل ويجي شرهان وامه واخواته وابوو

كعدو ابويه واخواني استقبلوهم متت خووف وقلقت حييل صدك شرهان خطبني من ابويه

وابويه كلهم هي بكيفها اذا قبلت مبروك عليهم

اني لزمت خدي بوجع تذكرت شرهان من ضربني اشو محبيت اكون زوجه اله ومتردده خايفه حييل

اجه ابويه حجه ويايه كتله بخيبة امل...بكيفك يابه انت تفصل واني البس

هو حضني كال.. لا بويه اني ما اريد اجبرج كيفج انتي بس بويه شرهان ابن عمتج واحنه نعرفه كلش زين و ولد شاريج ويخليج تكملين وانتي بعد بكيفج

وبويه اني اخاف اموت واعوفج وانتي محد الج هاي الدنيا ما تتامن...

نزلت راسي وتذكرت كلام شرهان وشفت ابويه امقتنع بي كتله...موافقه

باس خدي وابتسم حزين علئ حالي وراح كلهم بموافقتي وعمت ضلت تهلهل...

واني خليت ورحت صعدت للسطح للمكان الماتت بي امي وبجيت بصوت عالي اريد امي اريدها تنصحني هي الي تقرر عني تشوف وين مصلحتي اكون مسؤؤله منها مو مسؤؤله من نفسي...

حددوا يوم الجمعه الخطبه وعمتي كصتلي قماش فضي وخيطته فستان كالت حتئ تنزعين الاسود بيوم الخطبه

مقبلت انزعه وضليت ابجي ابويه حجيه ويايه واخواني بس رفضت رفض قاطع ما ادري ليش ردت الخطبه تكون بالاسود و قبل العرس عود انزعه

بعد هم استسلمو للامر الواقع وجابولي بدله سوده بس حلوه

صارت الخطوبه جنت لابسه فستان اسود اني طبيعة شعري اجعد بس اني احبه احسه مميزني مو سرح مثل باقي البنات ولونه حلوو خليته هيج ما سرحته

وبنات عمي فياض اجن خللي مكياج هن يعرفن يخلن لان بثينه معلمتهن...

وبثينه ما اجت زعلانه شلون شرهان خطبني وما خطبها وهي تحبه..زين اذا تحبه لعد وهوبي

ما ادري والله شلون تفكر بثينه عود هي صدك تحبهم لو تجذب؟ الله اعلم...

اجن النسوان واقارب شرهان وضلن يدكن ويهوسن ويركصن ويكولن...حلوة خطيبة شرهان بس صغيره

اني جنت كووولش بحاجة امي واحنه حتى بيت بيبي معزمناهم لان بعيدين وطريق طويل وينراد مصاريف وهم ما عندهم...

هم اصلا ما يجون اله كل سنه طريق متعب وطويل وبيبي مريضه وخالو رجله مبتوره وعنده بنات ومرته متكدر تعوفهن وحدهن...

تمت الخطوبه علئ خير و وزعوا شربت بكلاصات
دخلونه اني وشرهان يعقدون النه جان لابس قميص مخطط اسود وابيض وبنطلون قماش اسود

جنت حيل ضايجه منه لان ضربني وجبرني علئ القبول بس بعد صار زوجي لازم اتقبله

كملنه العقد وهو شاف بابا طلع لزم ايدي بلهفه وباسها حييل وخلاها علئ صدره

بلعت ريكي خايفه...شرهان شبيك جنك بثينه جنك ما شايف نسوان

هز راسه وهو ذايب ...اي والله ما شايف اني وين شايف هيج عيون بريئه وشفايف جنهن فراوله

درت وجهي زعلانه منه...بس اني زعلانه منك لان انت ضربتني واني ما احب واحد يضربني

رجع لزم ايدي وباسها كال...المصلحتج يروحي لمصلحتج لج اني خلصت ليلي كله ما نايم شلون اضربج بس وعد اخر مره تنمد عليج مره ثانيه اكسرها..مو رجال اذا مديتها عليج و وعد ادللج دلال

درت وجهي عليه وضحكت...الرجوله افعال مو اقوال اريد تثبتلي هذا الشئ بافعالكم اما اقوال اني ما اريد لان اللسان كووولشي يحجي ومراوغ ...

كرص خدي ..تدللين يرويحتي انتي لج متدرين شكد فرحان لان صرتي الي والله ممستوعب اكرصيني حتئ اصدك

كرصته واني اضحك كال...ههههههه صدكت فديتج يروحي انتي الجمال اليوم شطالعه تخبلين والاسود يذبح عليج

ارحمي عزيز قوم ذل ...لج والله دتذليني بجمالج

نزلت راسي خجلانه...شرهان كافي تتغزل خجلتني

تنفس بصبر...اروح فتيت لهل خجل هو اني شمخبلني غير خجلج

تقرب مني راد يبوسني واني وكفت بضيق...لا شرهان فدوه لا تسوي هيج

سحب ايدي بقسوة...ليش بالله مو خطيبج لو شنوو ترئ انتي هسه مرتي لو اخذج هسه بهذا ثوبج محد يحجي

رفعت حاجب...ياااا والله ليش يمه تاخذني هيج منهوبه لو شنو اني اريد عرس تحلم بي كل البنات

سحبني من خصري وتنفس بذوبان...اوووويلي اني حالف اخلي البنات يحسدجن علئ دلالي وعلئ عرسنه

ضحكت...هههههه نشوف

واردفت بجديه...شرهان انت ليش هلكد تحبني ؟ بحيث احسك تفدي روحك اليه

لزم اديه ثنينهن ولفهن علئ رقبته كال...اييي يبعد اهلي كلهم افدي الروح الخاطرج

جاوبته...هوووايه تتغزل

ابتسم...اي لان انتي غزال لازم اتغزل بيج خلينه نتزوج والله اشبعج غزل

ويه ما حجه هيج دخلت عمتي ام شرهان بدون سابق انذار تخصرت وكالت...هله هله ولك شرهان بعدك ما خطبتها واختليت بيها بس لا انوب من تزوج هيج لا يمه لااا اني اريد جنتي تنضف وتشتغل ونضوك طبخها ترئ ماخذتها لكل العايله مو بس الك

هو ضحك كال...اي اكيد يمه قربى ان شاء الله متقصر

سكتت محجيت شئ بس ضجت بداخلي شنو يردوني خدامه الهم ...

تذكرت عمتي من اروح الهم تكرب عليه وخاصه من ماتت امي احسها حيل استغلت موت امي

يعني مو اول مره كل ما اروح الهم وكالت قربى كومي نضفي البيت والي يقهر بناتها متصخرهن بس اني

هن بناتها يدرسن بس لا انوب تبطلني واضل اخدم بناتها...

وهااا عندها ثنين بنات متزوجات ومتعينات معلمات يخلن جهالهن يمها تغسلهم وتوكلهم وينطنها من الراتب عبالك حضانه صاير بيتها...

اجت حضنتني وهي تضحك كالت...اي اريدها تساعدني علئ جهال شيرين ونسرين لان ماكو احن من قروبه علئ الجهال

هو ضحك...اكيد يمه هل جهال ابرياء وقربى ما دكول شئ مو هيج قروبتي

هزيت راسي بقبول بس ضجت من كلامهم حسيت بغايتهم

هو حس بيه رجع حضني وكال لامه...بس هااا اذا قربى ما عاجبها محد يجبرها مو هيج يمه

ضحكت وحضنتني...اكيد هيج هي بكيفها اني ادللها دلال اخليها تنام للظهاري اخلي كل البنات يتحسدوها...

ضلت هي ترفع وهو يكبس منا لمن راحوو بس جابولي حلقه صدك هو لبسها اليه وكال باقي الذهب بعدين نجيبه...هسه بس،حلقه...

ضل شرهان يوميه جاينه بس اخواني ميقبلون اكعد يمه يجون ويكعدون وهو يتخبل يشيل روحه ويركعها بالكاع هههههه

انوب ضل يلعب وياهم طاولي واني اضل كاعده يمهم اشجع شرهان حسيت بي حنين عليه وحباب كدر ياخذ مني استجابه وكدرت اتقبله...

ضلو هم يسولفون تميم اخويه كال...اكلكم صدك عود عمي فياض جلاد يعني يعدم وادم

رد عليه شرهان وهو يلعب بالطاولي ويدخن...اي وشنو يعني ترئ شغله قانونيه وما بيها حرام تعتبر مهنه مشروعه

ضحك سليم باستهزاء...ههه كلتلي مهنه مشروعه مووو؟ والله عجيب مدري شلون يكدر يزهگ رواح الوادم

شرهان..ههههههههههه يله المهم يخوف

تنهد سليم...العالم تخاف من الدفان والدفان گلبه ارهف من خالك فياض اخاف الدفان من يموت الانسان يجي يدفنه لا خالك فياض هو يخنك الروح بيده  ههه صدك جلاد

شرهان بعدم اهتمام...اي بس مهنه مشروعه ماكو عيب بالشغل  ومدام شغل قانوني وبعد احنه ليش نحجي وبعدين لا تكول جلاد كول منفذ حكم الاعدام

سليم...اي احنه ما نحجي بالقانون احنه دنحجي عن نظرة العالم هاي المهنه مهما كانت اهدافها بس تضل مهنه بشعه ما اعرف شلون خالك ينام وهو ايده ملطخه بيد الناس واكو هوايه من الجلاديين استغلو مناصبهم وضلموا هوايه ناس

اردف بقهر...تدري خالك يتفاخر باعدام العالم ويكول بليلة وحده عدمت خمسة وعشرين واحد من بينهم ثنين نسوان

زين اريد اسالك بشرفك شلون باليله وحده هيج يعدم هل عدد وهم تحاكمو لو شنو ؟ زين بعدين شلون اله عين تنام وهو بليلة وحده زهك خمسه وعشرين رووح ترئ اكو ناس عزل راحت ظلم...

شرهان سد الطاولي ورد عليه بعصبية مبطنه...لا تحجي علئ خالي ...سليم كافي وخليني انصحك نصيحه لا تحجي علئ اي واحد ينتمي للدوله ولا تنتمي الأي حزب وبعدين خلي مكتبتك نظيفه ولا تجيب بيها كتب معارضه او دينيه...

سليم رفع حاجب...ليش يابه مكتبتي وبكيفي اجيب اليعجبني انتم شدخلكم

شرهان...اكو كتب تكون ضد الريس حفظه الله ورعاه

سليم...لا يابه احنه منحجي علئ الريس واني ابيع كتب مو اكتب شمدريني شنو بداخلهن...

شرهان...بعد اني حذرتك وانت بكيفك...سليم ابعد عن الشر

تميم...هههه شبيك شرهان شويه وتسويه مسوين انقلاب ضد النظام

شرهان...يمعود انت متعرف العالم وترئ لا عبالك اليمشي وياك يطلع مخابرات ويخبر عنك فانتم احذروا

ضلوا يسولفون انوب هو خله وراح...

اني عادي اداوم مدرسه واهلي جابو تليفون ارضي ضليت اخابر بي شرهان واتعلق بي يوم عن يوم

اندك الباب رحت فتحته شفتها ام بثينه كالت ..اليوم معزومين عمج فياض مسوي ثواب لامج وللمرحومين اهله...

صدك والله كلت لبابا و ولد وخلينه ورحنه كلنه جانوا مسوين سمج وتمن ومركه اكلنه وكملنه

وعمي فياض من كمل رفع اديه للسما وهو يدعي ..اللهم تقبل هذا الثواب لروح المرحومه هدئ ام سليم باحسن القبول

يوسف ابنه جان ياكل بنزاكه وفجاة توقف وضحك بصوت عالي ...ههههههههههه هههههههه

كلنه انتبهنه عليه وعمي باوعله وخزره وكمل كلامه..قروا الفاتحه لروح ام سليم الله يرحمها ويسكنها الجنه

رجع يوسف ضحك بهستريا...ههههههههههههههههههه

كالت ام بثينه...لا تهتمون اله خبل جينات مال خبال من امه

عمي ضيدان عاط بيها...انجبي واسكتي هاي مرة اخوي فياض مهما يكون لا تتجاوزين

تنهد عمي فياض كال.. اي ما اقبل واحد يحجي علئ ام يوسف هاي رفيقة دربي وضلعي الايسر حتئ  انتي يا ام بثينه ما اسمحلج تتجاوزين علئ ام يوسف

يوسف رجع ضحك بصوت اقوه...ههههههههههههههه

باوعله عمي فياض كله...اكلك يابه يوسف اكو كلام الناس تحجي وميعجب الناس تضحك عليه واكو كلام الناس تحجي ويعجب الناس وناس تضحك. هسه انت كلامي عاجبك لو ما عاجبك

رد علئ ابوه بعصبية...لا معجبنييي

شمر الخاشوكه وخله وراح لبس نعاله بحذر  وهدوء ونكث اديه وخله وراح

عمي هز راسه بحزن كال...هذا الولد راح يخبلني ما خليت دكتور نفساني يعتب عليه ما اخذته اله وهو لا يصير زين ولا شئ

باوعت العمي الله ماسخ وجهه والرحمه مشيوله من وجهه اكرع وضخم وعيونه ناطه ومزين لحيته وشواربه يخوووف حقه ابنه تصير بي حاله نفسيه

اكول حرامات يوسف النازك الحلو ابنه

كملنه اكل وسليم حسيته عنده شئ كال..اكلك عمي امي شلون ماتت؟

رد عليه باستغراب...وشكولك عليه ملك الموت واعرف امك شلون ماتت...؟

ابتسم بهدوء...لا مو قصدي بس يعني احنه جنه بحالة ما تنوصف ولا شفنه دكتور ولا حتى ورقة الوفاة شفناها وانت هم ما قبلت سديت علينه كل المنافذ فاني جاي اسالك يعني الدكتور شكلك

رفع حاجب مستغرب...اهااا وانت هسه يله تذكرت تسأل امك شلون ماتت وين جنت قبل

رفع اكتافه بعدم معرفه...ما ادري اليوم ثوابك لامي ذكرني

شال الكلاص وخلاه بغير مكان مقابيله يعني ورجع باوع لسليم كال...اي صارت عندها جلطه دماغيه وماتت هذا الي قرروا الطب العدلي بعد فحص الجثه

سليم...هاااا ما ادري والله غريبه ؟

جاوبه ابويه...شنو الغريب؟

سليم تنهد...المستغربه ضحكتة يوسف من عمي يذكر امي يعني حتئ لو هو مريض نفسي بس ميصير هيج يضحك من ينذكر اسم امي

فياض...عذره ما يعرف شلون يتصرف لا علئ المريض حرج...

رد عليه ابويه..معذور معذور...

خلينه ورجعنه للبيت وسليم مدري شبي متخبل وبمرور الايام حسيت بي ضل يتقرب من يوسف وياخذه وياه للمكتبه بحجة شنو حتئ يطلعه من حالته النفسيه...

بعدها صار يوسف صديق سليم ويروح ويجي عليه واني دائما اضحك وياه واتشاقه وهو حييل يستحي مني

شكد انقهر عليه احسه مثل سليم وتميم وشكد مهتم بنفسه بس للاسف المرض مخربه

يعني هو يغسل ملابسه بيده ويمسح حذائه ويسوي النفسه اكل مداري نفسه اخواته ابد ما مهتمات بي بس هو ممقصر ويه نفسه...

باوعلي وابتسم كال...قربى

ضحكت كتله...هاااا

كال...انتي حبابه حييل ياريت شرهان يقدر النعمه العنده

ابتسمت وباوعت لحلقتي...شرهان حباب

جر نفس كال...بس امه مو حبابه مكروهه مثل ابوي سكاطه

ضحكت...ههههههههه والله يوسف سوالفك حلوه لك اسكت لا يكتلك بس يسمعك

احتدت ملامحه وشد علئ شفايفه كال...هو اكيد يجيني يوم شتترجين من واحد جلاد

تنهدت...لا هو يحبك والله

رد...اكرههه

خله وراح وبعدها اني رجعت انضف شكد مشتاقه اروح للبصره قررت من قبل لا اتزوج اروح اني واخواني لان اكيد من اتزوج بعد شرهان ما يخليني اروح لبيت بيبي

رجعت بذاكرتي لايام زمان من جنت اروح اني وامي واخواني وخطيه بيبي تحتار شنو تسوي وهاي عسله بنت خالو تتخبل تغار علئ بيبي مني

مره رحنه واني جنت لابسه فستان قصير احمر ومنقط بابيض وفاتحهه شعري ولابسه حذاء بيضه

هي اجت عسله جايبه الشبزي شايلته كالت...هااا غربو ييتي « قربو اجيتي »

رديت عليها واني العب بشعري...اي اجينه اني وماما

كالت بقرف...احجي عدل ليش تعوين ام السان العوي « ام اللسان الاعوج »

ضحكت...انتي ليش تغارين مني

كالت...عمنج عوووبه وما تستحين نهار كله مطلعه ريليج « رجليج »

هي جانت لابسه زي هندي برتقالي رغم هي حلوه والله بس مدري شبيها تتخبل مني

راحت لامها كلتلها...يمااا هاي غربو ليش هيج تلبس انتي شمالج ليش ما تلبسني مثلها

امي جاوبتها بغضب...خايبه دووولي روحي شوفي بشيشه وبطيطه ويين يايتني « يايتني» غربو لبسيني مثلها..

هي خلت وراحت باوعتلي وسوتلي حركه بيدها بمعنئ اني الج كالت...انه الج غريبه ام ريلين الطالعه « رجلين »...

اني مديت اللساني الها وانهزمت وهي تخبلت ضلت تصيح...يمه غربوو تعيب عليه ام حلگ العويي..اليوم اموتها عليه ابو فاضل جااا شني تغلد عليه

رجعت من ذاكرتي هههههه شكد جانت تتخبل مني وشكد حاولت اصير صديقتها بس ماكوو راسها والف سيف ولا تصادقني

يجوز هسه كبرت وعقلت او يمكن تزوجت الله اعلم صار هوايه مشايفه اخبارهم...

باليل اندك الباب جانت ضلمة وطافية الكهرباء طلع سليم بسرعه وبعدها لبس نعاله وراح كال...اجاني يوسف ابن عمي مدري شيريد

تقريبا ساعتين ورجع سليم مشتعل نار ضل يروح ويجي يروح ويجي وبعدها كعد ابوي من نوومه

اخذ ابوي وطلع برا وشويه ابوي دخل للبيت متخبل اخذ سجينه وراح هجم علئ بيت عمي ويصييح...ولك فياض ولك فياض يا عار اطلع اليوم والله اذبحك

طلعت اركض والعالم طلعت علئ صوت ابوي وعمي طلع كال ...شكوو شبيك لك ابو سليم

لزمه كله...متعرف شبيه مووو

عمي لزمه ودخله ودخلو هو وسليم وابويه بالغرفه مجنت افهم كلامهم بس سمعت صوت عمي كله...وتصدك بواحد خبل ههههههه انت والله صدك طلعت خبل

كله سليم...يوسف مو خبل مو خببببل يوسف شايف كلشي

رد عليه عمي...انطيني مهله اسبوع وراح اثبت كلامك جذب راح اجيب كل الفحوصات والتحاليل والتشريح بالطب العدلي

دفعه ابوي كله...خوووش نشوف

خلينه ورجعنه واني ابجي اريد اعرف شكو شصاير شكيت يحجون علئ مرة عمي مجنت نستوعبه شئ يعني معقوله يوسف كشف مرض امه جنت ملخبطه حييل...

مرة خمس ايام سليم راح يشتري كتب من صديقه وابوي وتميم بالبيت جانوا هسه صلو صلاة العشاء

وما اشوف اله الباب انهطر ودخلوا علينه الاستخبارات والامن العام وهم مسلحين احنه انصدمنه واني كلبي طاح ببطني

كال ابوي برعب...خيير شكووو سيدي

رد عليه واحد منهم...اسكككككت ويله كدامي مسويين حزب ضد الريس مووو وين سليم والله اله اعدمه بيدي

اخذوا تميم وابويه وهم يحلفون ان هم ممسوين شئ بس جانت الضربات تجيهم من كل مكان واني اصرخ وابجي وارجف حييل خفت من اخذوهم

ركضت لبيت عمي فتحت الباب ودخلت شافني عمي فياض وهو راسم ابتسامه علئ شفايفه كال...شكووو

كتلة ببكاء ورعب...الامن اخذو ابويه تميم فدوه عمو الحك الهم

رفع حاجب متفاجئ...ليييش؟ ليكون منتمين الحزب او معارضين اذا هيج ما اكدر اساعدهم اخاف علئ نفسي...

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسوا التصويت والمشاركه بكم نكتمل ❤

بنات رجعنه وياكم بفقرة اجمل تعليق حناخذ تعليق من تعليقات الواتباد وننشره بالفيس ومنو تفوز حتكون الها هديه بارت باسمها يعني مثل قبل برواية جولييت واسرها❤ وحتشرف عليه الادمونهjooorm

وتابعو كتاب ذنب عينيك تنزل بي وئام الشيخلي كل منشورات كروب الفيس والغش وكل الشغلات والتحليلاتWyaam1990

غلسوا علئ السحكات🙄