رواية #سلالة العنفوان...ذنب عينيك الفصل السادس 6 - بقلم الكاتبه سمو العراق

الذنب الرابع
رواية...ذنب عينيك...سلالة العنفوان
بقلمي...نور سمو العراق

💔💔💔💔💔💔💔💔💔💔
لتصدگ غريب بيوم يأذيك
  هنة البيك من المنك وبيك

.

..............................

شكد صعبه من تعيشين ببيت تفتقدين بي لحنان امج بين جدران ما بيها صدئ صوت الجنه...

بيتنه الهلكان مفتقد لكلماتها لابتسامتها مفتقد الصوتها من تكعدنه من الصبح حتئ نروح للمدرسه

شكد صعب من تعيش يتيم بزمان ما يعرف الرحمه

اني برأيي اساس السعاده هي الام...وينج يا ام سليم تعالي شوفي حالي من بعدج اركض اريد منفذ ومنقذ لاخواني وابويه وماكوو...

من بعد ما اخذو اخويه وابويه بذيج الليله المشؤؤمه مجان عندي احد اروح اله ومن حلاة روحي وخوفي علئ اهلي ركضت استنجد بعمي لان ايده طايله بالدوله

ركضت لبيت عمي فتحت الباب ودخلت شافني عمي فياض وهو راسم ابتسامه علئ شفايفه كال...شكووو

كتلة ببكاء ورعب...الامن اخذو ابويه تميم فدوه عمو الحك الهم

رفع حاجب متفاجئ...ليييش؟ ليكون منتمين الحزب او معارضين اذا هيج ما اكدر اساعدهم اخاف علئ نفسي...

هزيت راسي بنفي...لا والله عموو ابد ما منتمين اصلا هم وينهم وين الانتماء اشو من الشغل للبيت

قاطع كلامي بعصبية...سلييم ما يكعد واكيد مسويله مكسورة هسه المهم ان شاء الله اني اروح واشوف الوضع شنو وان شاء الله خير

شهكت...اي فدوه عمووو الحك عليهم لا يسوولهم شئ مشفتهم شلون اخذوهم...

جر نفس وهو يباوع الاظافره...اووووف يله راح اسوي ل الله ولو ابوج ما يستاهل قبل كم يوم اجه هاد عليه ويريد يكتلني بحجة شنو اني ماخذ حقه ويتهمني باشياء ما الها صحه يله نسوي زين ونذب بالشط...

مسحت دموعي ...ميخالف عمو يضل اخوك والاظفر ما يطلع من اللحم

تجاهل كلامي كال...سليم هم اعتقلو

جاوبت واني مفرفحه...لاااا سليم مو هنا طالع

عض اصبعه بقهر...ساس،البله هذا سويلم الكلب يله بسيطه انشوفلها حل وانتي ارجعي لبيتكم واقفلي الباب

فتحت عيوني مصدومه ...معقوله يعني معقوله اكو هيج ناس يعني اني بنت اخو وخايفه وارجف وابجي وبيتنه فارغ وهو يكولي ارجعي لبيتكم حتئ ما كلف نفسه وكال ضلي هنا بين ما يرجعون اهلج

جريت نفس وطلعت بكرامتي رغم خوفي كعدت بالبيت ارجف صار يتخايلي كووولشي حتئ البرده من تتحرك تتخايلي غمضت عيوني واني اسم باسم ربي وأصلي على النبي...

حسيت اكو حركه بالسطح واني بلعت العافيه غطيت نفسي بالبطانيه حتئ رجلية وراسي وعكفت نفسي وارجف وابجي الوحدي بالبيت وظلمه بس الفانوس مشتغل...

حسيت بايد انحطت علئ كتفي واني صرخت بصوت عالي ...ولج يمممممممه لااااا منووو انت وخرررر

رد عليه بحنان.. لا تخافين قربئ اني يوسف

وخرت البطانيه من وجهي ببطئ باوعتله واني ارمش غمضت عيوني بتنهيده...تحجي صدك يوسف شويه جان انجلطت وبعدين انت شعندك هنا شجابك

مو عبالك شفتني الوحدي بالبيت تريد تستغلني لااااا ترئ اني لحمي مر ولحد الان ما تعرفوني زين 

تعصب بوجهي وجر البطانيه ..شنو قصدج اني ساقط مثل ابوووي ؟

هزيت راسي بنفي...لا يوسف اني اعتبرك مثل اخويه وانت اصلا مثل اخلاق اخواني ما قصدي عليك

ابتعد شويه وجر نفس كال...اني اجيت هنا حتئ احميج لان انتي ميصير تضلين وحدج

وكفت بخوف...بس غلط يعني انت محرم عليه وكل ثنين ثالثهم الشيطان

باوعلي بحزن كال...لا ما راح اضل هنا راح اصعد بالسطح حتئ منو يريد يكمز من السطح ما اخليه وانتي لا تفتحين لباب لأي واحد تمام

تنهدت بخوف...اي اي عفيه لا تضل هنا شرهان اذا اجه وشافك يموتني ويموتك

صرخ بوجهي بعصبية واديه ترجف خلاني جفلت بمكاني كال...شرهان نعلان شنووو اني ما اموت محد يكدر يموتني اي اييي محد يكدر ما امووت ما اموت...

رجفت شفايفي...اي اي لا متموت ما تموت

تركني وصعد للدرج كتله بتساؤل...يوسف تعرف سليم وين ؟

فتح عيونه بقسوة...اعرف وما راح اكلج ولا راح انطق سليم يمووت سليم يكتلوو خلي بعييد اي اي بعيييييد...

بجيت وخفت من كلامه...يوسف شكو احجيلي

رمش بعيونه ببراءه.  من احجي تموتون واني ما اريدكم تموتون...

صعد فوك واني ضليت جوه خايفه وابجي طلعت القران ولبست حجاب قريت سورة يس لأمي

بلكي يارب عمي يكدر يساعد اهلي ويرجعهم والله البيت ما ينطاق بدونهم...

نمت شويه وكعدت علئ صوت الباب رحت اركض فتحته بدون غسل وجهه واشوفهم شرهان وعمتي وبناتها...

من شفتهم كلتلهم بلهفه...همزين اجيتوو...شرهان ابويه وتميم اخذوهم الشرطه وما ادري بحالهم فدوه روح شوف وين صاروا

هو رد عليه...اي اي اليوم ان شاء الله اروح

خزرته عمتي...وين تريد تروح خالك فياض هو يروح اكعد لا انوب يورطونك

هو باوعلي بعصبية كال...كم مره كتله سليم اكعد راحه سليم لا تتفرعن وهو لا ابالي يعني هسه هيج احسن الكم

انقهرت من كلامه كتله بغضب...هو اخويه شنو الي مسويي اشو انت ما تعرف تحجي شرهان هي بدل ما تطمني انوب جاي تزمخ بوجهي وتحجي علئ اخويه

ردت عمتي...علئ كيفج علئ كيفج يمه اللسان يمه اكلتي الولد بگشوره هو شكال هاي فوك ما يدور مصلحتكم انتي واخوانج

دفعتني...دوخري وخري خلي ندخل نشوف حل لهل مصيبه

دخلو للغرفه واني رحت غسلت وجهي واجيتهم كالت...اكلج قربى بعد عمتج سويلنه ريوك من سمعنه الخبر اجينه نركض حتئ من دون ريوك

تنهدت وخليت ورحت للمطبخ هسه اني بحال ريوك هو اصلا منو اله نفس ياكل لكيت بيضتين كلت خلي اكصص وياها بتيته حتئ تصير هوايه...

وخدرت جاي ...دا احاول اطمن نفسي بأن اخواني وابويه مبيهم شئ بس نار مشتعله بصدري...مدا اكدر..

درت وجهي وشفت شرهان مرتجي علئ الحايط ويدخن ويباوعلي بإعجاب...

باوعتله ودرت وجهي وكملت اغسل بالاستكاين ما حسيت غير باديه التفت علئ خصري ودفن وجهه برگبتي

تقززت من لمساته وانصدمت حسيت حتقيئ درت وجهي عليه ودفعته بسرعه لزكته بالثلاجه

تعصب من دفعته ورجع لزم ايدي وهزني كال...شبيج قربى ليش تضوجين من اتقرب منج

رمشت بعيوني وصدري احسه نار كتله...انت صدك تحجي  الناس بالناس وابو گرعه حاير شلون يمشط

ضحك...ههههههههههه شبيج گليبي زوجج ترئ اني لو اخذج هسه بملابسج محد يعترض

رديت عليه من بين اسناني...لا اكووو من يعترض اني الي اعترض اشو انت كل ما حجيت وكلت اخذج بملابسج لهل درجه مستهان بيه

رفع حاجب...قربى ترئ انتي حيل وكحه يعني لسانج مو مال عمرج

رفعت اصبعي بتهديد...شوف شرهان اني ماتت امي وربيت بنص اخواني لا عبالك عمري صغير وطفله لاا اني اعرف كولش زين انتم شنو غايتكم عود عبالكم يتيمه تستغلوني وتستفحلون عليه لا والف لاا واذا معاجبك لساني

نزعت لحلقه وخليتها بيده...هاااك هاي كل الي املكه منك اخذها وروح

انصدم...قربى تحجين صدك شلون هيج تفاولين علئ زواجنه شلون الج نفس هيج تهينين حبنه انتي صدك خبله لج اني من حبي الج هيج اسووي

كتفت اديه ومجاوبته ودرت وجهي متضايقه...

عمتي صاحت ...ولج قربى وين الريوك ترئ فطسنه من الجوع

كملته دا اخذه وهو مقبل لبسني الحلقه وباس ايدي واخذ الصينيه وراح كعدو تريكوا واني اباوع الهم بس ما مديت ايدي ولا تقربت رغم توسلوا بيه اجي اكل بس مقبلت...

شويه ودخل عمي فياض حمدت الله عمتي وشرهان هنا اخاف منه حييل

اجه سلم وكعد كال...رحت للامن العام وكالو بس نحقق وياهم وان شاء الله نطلعهم

عض اصبعه عود مقهور...اوووف كله من وره سويلم النذل داخل بالأحزاب المعارضه للرئيس الله يحفظه

عود عباله هو من يسوي هيج راح يسقط الحكم ما يدري يشكون حلگه وحلگ الخلفه اني لو بس اعرف هو وين جان ارتاح كلبي والله اذا الزمه اله اسكطه تسكط...

جاوبت بنت عمتي كالت...والله هو صدك سليم ميكعد وقربى من نحجي تزعل يعني خالو ترئ هو حتئ عليك يحجي

هو انتفض كلها ...شيكول ؟

شرهان عاط بيها ...اسكتي شيرين

صرخ بشرهان...هاااا شرهان تلعب من وراي مووو بسييطه احجي شيرين لا والله ما يصيرلكم خير اليوم

تنهدت..يعني يكول عمي جلاد وعادم بيوم واحد 25 واحد هذا الي سمعته

عض شفايفه بوعيد...بسيييطه اني هيج كلت اني شوكت كلت اصلا اكثر الناس ما تعرف مهنتي يعرفون اشتغل بالدوله بس ميعرفون شنو اشتغل
يصير خير يا سليم فاضحني كدام العالم

هو مو صوجه صوج ابووو هو حطهن بحلكه والله هل عائله ناويين علئ تدمير سمعتي

اني جنت صاكه لا احجي ولا اكول باوعلي كال...تعرفين سليم وييين

رفعت اكتافي بعدم معرفه

هو خله وراح وصاح علئ شرهان طلع وراه

اني باوعت الشيرين كلتلها...ليش،هيج نافقتي علئ اخواني وبعدين شرهان ما يكدر يضمله سالفه عليجن هاي الزلم الي سره ببطنها وهو يمشي ويحجي

وهي تخبلت...اكلي نعل ادبسز لسانج طولان والله والله اذا ما خليت خالي يريبج ما اطلع شيرين امشي يمه امشي والله اخلي شرهان يطلكها لسانها شطوله وتغلط عليه فوك ما داخلين باحزاب معارضه انوب جايه تهدد وتغلط علينه

عمتي هم گبت ...اي ولج اشو انتي لسانج طولان والله اذا ما خليت شرهان يكص هل لسان ما اطلع امه

ضحكت باستهزاء...والله اذا هيج بله هل زواج وما اتزوجه افسخو الخطوبه

تخصرت...اي مو هو لعب احنه بكيفج نلعب نخطب ونفسخ مخاسير وعازمين والخطبه كلفت ذاك الحساب وجايه تكولين افسخو الخطبه منو يخسر المخاسير ابوج ابو الأحزاب...

اني مجان الي جواب مصدومه وبس صافنه حيرني شنو ارد اصلا ديحاولن يكسرني شويه شويه

رجعت كالت...والله تزوجين شرهان وغصبا عليج وهذا الاسبوع حضري نفسج واذا عاندتي اشاره مني لفياض اخلي يدفنج بصف امج

خلت وطلعت وبنتها وراها بلعت ريكي واستغفرت ربي يالله شنو هاااي معقوله ذول شبيهم عبالك وحوش ممصدكين انتموا للدوله

طبعا شيرين هي معلمه انوب صارت معاونيه حييل قاسيه ويه الطلاب وهماتين هي حزبيه ودوم تقود مسيره طلابيه وتنظم حفل للريس...

لهذا السبب هي هماتين متفرعنه...

ضليت منا للعصر روحي ذايبه وبس ابجي وادعي لاخواني

شويه ودخلت بثينه تركض لابسه العباية البغداديه بدون حجاب

خفت من منظرها كلتلها...خير شكو؟

لطمت خدها وفرت شفايفها...لج عمي لزم يوسف سكطه تسكط لج متشوفين المنظر اول مره عمي هيج يضرب يوسف

لج كتله بصونده يابسه ولج وطلعت ام يوسف وخنكت عمي فياض ولج لو تشوفيها صايره تخوووف كلها وسخ وشعرها مكوش وهوسه

لج انوب عمي حبس يوسف وامه بالقفص مال الطيور الجبير هذا الي فوك تعرفينه

انقهرت حييل كلتلها بغضب...وعمج ما اله رداد ليش يضرب يوسف كون عمتي ام يوسف خانكته ومخلصين منه

نفخت بقهر...مدري شكلج لا ما اله رداد ويييع اكره الساقط

تدرين دوم يباوعلي يكول انتي حلوه تذكريني بامج بشبابها...

هزيت ايدي...اي هو انتي وامج ناطياته مجال لهذا السبب هو يتماده وياجن

تنهدت...اي شنسوي نريد نعيش

عفتها وكعدت علئ الدرج اجت كعدت يمي وهي تلعب بشعري كالت...اكلج شرهان هم يبوسج؟

باوعتلها مصدومه...شنوو شنوو خير يمه علئ شنو بايسني لا حبيبتي لا بايسني ولا شئ

حطت ايدها علئ شفايفها...ههههههه هسه شهر وتطلعين حامل البيت فرغ بس انتي وشرهان ضالين بي مو اليوم جايكم

لومت اديه بحماس...الله عليج سولفيلي شيسويلج شرهان

سحبت اديه...اكولج انتي ما عندج غير هل سوالف الطايح حضها يعني هاي بدل ما تكولين ابوج واخوج مطلعوا من السجن وين صاروا محتاره شرهان باسني لو لا ؟ انتي عقلج وين حاطي

وكفت ولبست عبايتها...اهووو قربى شكد ططوه انتي هم يومين ويطلعون شدعوه هلكد متشائمه

خلت وراحت واني ضليت علئ هل حال شرهان يتصل اجاوبه يضل بس يتغزل اطيح بالتليفون واقفله اني وين وهو وين...

اسأله عن اهلي يكول.. اهوو قربى اني اخبارج تتلكيني بمشاكلج ترئ ميصير هيج من احجي وياج عوفي مشاكل اهلج علئ صفحه

من حجه هيج قفلت الخط ما اريد انسان ما يهتم المشاعري ولا الاحزاني ولا يفكر بيه يفكر بس بنفسه

ضل من يتصل ما ارفع السماعه عليه وهو دز اليه بثينه يتوعد بيه عود شلون لابسته وما ارد عليه

واهلي طولوا لا من تميم وابويه ولا من سليم ...

وباليلة من اليالي جنت نايمه الوحدي وما اشوف اله البيت اقتحموا عليه دخلوا الامن مسلحين

ومتعصبين باوعتلهم احس الموت دخل برجليه حتئ من كثر خوفي وكعت من طولي

تقرب مني واحد منهم حصرني علئ الحايط جان ضخم وطويل ولابس الزي العسكري ومسدسه بيده كال بهدوء وبرود...اني الملازم اول سعيد معروف عني ما اتعامل بالطيب يا اما تحجين وين سليم يا اما نعتقلج

رجفت شفايفي ويبس حلكي همست بعد ما بلعت ريكي بصعووبه...سس سيي سيدي والله ما اعرف

ما حسيت غير براشدي شوهه معالم وجهي وطرحني علئ الارض

رجع رفعني بكل قسوه كال وهو يرفع حاجب...شوفي لج لا تخليني هسه اكفر بيج انتي مدام هيج فاكيد عملية لحزب الدعوه لج ادبسز

مجنت اعرف اتصرف ومن كثر الخوف بس دموعي تنزف همست...والله سيدي حتئ ما اعرف شنو حزب الدعوه

خنكني بيده...متعرفين مووو ولج ساقطه عود هناك بالسجن هم كولي ما اعرف

ضل يفشر ويكفر بوجهي كفران اول مره اسمع بيها

رجليه احس دخل بيهن الموت وانهاريت ضليت ابجي بصوت عالي ...

مسحت دموعي وتمتمت بخوف...اني عمي ينتمي للدوله

صاح بصوت حاد...عوفينه من عمج ولا تضلين تخبطين اعتقلوها يالله لهل ساقطه الكح...

سحبوني .اني ابجي واتوسل بيهم وابجي والشارع جان فااارغ مدت راسها ام بثينه كالت...يااا شكوو

كلتلها بتوسل وبكاء...فدوه عمه الحكولي

ردت عليه...يله يله لا تخافين اخلي عمج وشرهان يجون وراج بس خلي عمج يرجع من شغله...

دخلوني بسياره مثل القفص الحديد واخذوني جنت ضحية جلاد ما يعرف الشرف...

باوعت البيتنه الي ابتعدت عنه بذكريات هشمت احشائي وسحگت بقايا روحي

ضج بيه الالم وتمالكني الحزن والاسئ وغلبتني الدموع...

اني رواية متكفي ان اوصفها علئ ان هي رواية مؤلمه اني ضحية مثلي مثل غيري تدمرن من دون سبب...

تكسرت جناحاتي وتحطمت اعصابي وتلاشه عندي الامل من دخلوني للسجن بالامن العامه

دخلوني بالسجن الانفرادي بس محد تقرب مني ولا احد حجه ويايه واني كل هذا وارجف خايفه خاااااايفه لحد النخاع ما اعرف شنو شعوري احس الوجع يحفر بصدري...

ما عندي سلاح غير الدعاء والبكاء ...ابجي واني كاعده ابجي واني نايمه

مرة عليه ايام صعبه بس الله يعرف بيها المشكله مو هنا المشكله مجاي اعرف اوقات الصلاه ولا اعرف اني عصر صبح

وصلت لحاله من الجنون ...يجيبولي اكل عباره عن صمون جيس يلعب النفس كوه ينوكل ومرات يجي معفن و وشوربه

كل يوم هذا اكلنه لو مركة لهانه لو مركة بصل ابجي واستنجد بربي وصلت لحالة من الإكتئاب والهوس ضليت تقريبا شهر علئ هذا الحال

تجي السجانه تنطيني الاكل وتروح ومرات تطلعني للحمام انطتني ملابس تخص السجينات

احس نفسي وسخه وقذره حييل ضليت احك بجسمي ونايمه علئ الصبخايه البارده بالسجن

أسأل السجانه متجاوبني مجرد تاخذني وترجعني

رجعتني للسجن جان اظلم شويه ويخووف احس تهسترت

ضليت اصرخ واملخ بشعري ...طلعوووني ما ارييييد ولج يمممه ولج يمه ويينج

ضليت اضرب بباب السجن واصرررخ وارافس برجليه

شويه واجت السجانه وياها ملازم سعيد اول ما فتحوا بباب السجن وهو سحبني من شعري جان شعري مو اجعد اتاذه حييل من واحد يملخني

هو سحبني حييل وشمرني علئ الحايط انركعت بالحايط حسيت اضلاعي تكسرت

واني ضعفت حيييييل بحيث الثوب الي لابسته مغطي بس العظام اتلمس وجهي احس،بي بس عظم وجلد

لزمت ضهري واني اتوجع رجع رفعني من شعري كال...شبيج تصيحيييين

رجفت واني الملم بنفسي...سييدي سس سيدي والله راح اموت عااد خخ خلوني بسجن ويه العالم ليش لوحدي راح اجن والله اريد ناس تحجي ويايه

باوع للسجانه وضحك كلها...ههه قربى خاتون تريد ناس تسامرها هسه من اشك حلكها اكو واحد يلومني

ردت عليه...لا سيدي هاي تتعاير

دفعني و وكف نكث اديه كال بتهديد...حسسج اذا سمعته والله ما اخليج عااايشه مفهوووم يله لا تزعجيني اليوم خفر واريد انام...

مسحت وجهي بتوتر ورجفه اباوع الاديه ترعش ترعش عبالك مثل السعفه باليله بارده...

بلعت ريكي بتوسل...فدوه سيدي سويها ل الله

كفر بسرعه وانوب دفرني علئ وجهي كال...بنت النعال من وراج كفرت

رفعني وضربني راشدي وهو يصيح ويرفس وانوب هجم علئ السجانه كلها..باعي ديري بالج باجر تنطيها سم بطنها كله من وراها كفرت

ردت عليه بخوف...تامر سيدي تامر

تفل عليه...بسيطه والله اذا ما خليتهم يعدمونج ما اطلع ملازم اول سعيد

رجفت بخوف وزحفت لزكت روحي علئ الحايط وخشمي يجري دم...

باوعلي وبعدها تقرب مني وهو يبتسم بخباثه حسيت احشائي تكطعت حضنت نفسي بخوووف ولميت رجليه لصدري

سحب ايدي بقسوه وهو يباوع للحلقه كال...اهااا مخطوبه الخاتون وينه كوادج شو ماكووو

محاجيته هو شحجي اذا احجي حجايه يسكطني تسكط احسه يتلذذ من يضربني

سحب الحلقه من ايدي بقسووه وخلاها بجيبه كال...اييي نستفاد منج جم فلس ولو عار خليتيني كفرت

تمنيت بس يطلع خفت من وجوده وياي بالغرفه دعيت ربي بس كون يطلع منا

لان تعبت حيييل اذاني واني مدا اتحمل ابببد

هو طلع واني تنفست بارتياح الحمد لله من طلع

رفعت عيوني اعاتب امي...اوووف يمه تعالي شوفي شصار بيه من بعدج ولج يمه ادعيلي فدووه اخلص من ذول الحقر...

كطعت كلامي رغم الكلام جان بداخلي من كثر الرعب والخوف جنت اخاف يقرون افكاري مدري شنو الي جنت افكر بي كووولش خايفه

اتذكر امي جانت دكول لا تحجون ابد علئ الرئيس لان حتئ الحايطين عندها اذان وتسمع شنو تحجون...

نمت وخشمي ينزف وكلبي وينزف قبل كووولشي ...

شويه واجت السجانه دخلت وهي ملهووفه سحبتني من ايدي كالت وهي تتلفت...انتي ولج اسمعيني زين لا تتهورين وتحجين شئ من يحاجونج لا تردين توسلي بيهم ترئ ذول ما بكلوبهم رحمه

بعدها باوعتلي خايفه شلون لعبالك كفرت كالت...لا مو قصدي قصدي يعني هم رجال الدوله لازم تسكتين تعاوني وياهم حتئ يتعاونون وياج

همست بتعب...ماكو غير هذا الملازم هذا ابد ميتفاهم بعدني محاجيه حجايه ضربني

تنهدت...ماكو حاليا بس هو بلكي يجبولنه نقيب رائد نقل لان المركز بحاجة لهذا الشئ او بلكي ينقلونج لغير سجن..

همست ...ياريت والله بس خاف يجي الاتعس منه

جرت نفس وهي تباوع بحذر...بعد ما اعرف الله كريم اني هسه لازم اروح

نمت شويه وفزيت علئ كلاص مي كعدت مرعوبه شفته هذا الملازم بلعت ريكي بخووف وعود كلت خلي اسايسه كتله...سيدي صباح الخير

رد عليه بقرف...انجبيييييي لا صبح عليج الصبح

واردف بغرور وتكبر...يله حضري نفسج راح ترحين للشعبه الخامسه

همست بخوف...شنو الشعبه الخامسه

باوعلي بعيون غاضبه...لا تناقشين ادبسز

سكتت محجيت ونزلت راسي شكد حسيت بذل وقهر احس لو اموت احسن من هل ذل

اجت السجانه حضرتني وخلت الكلبجات باديه سالتها بقلق...فدوه شنو الشعبه الخامسه

ردت عليه بحزن ...اسو شعبه يحاكمون بيها الاحزاب المعارضه

هي كالت هيج واني حسيت حيغمئ عليه من الخوف رجلية ضلت وحده تضرب بالثانيه والدموع شلالات من القهر والحزن...

اخذوني الشرطه و وياه شرطه وهماتين هاي السجانه 

دخلوني للشعبه الخامسه هناك وكيل الامن لكيت هوايه بنات ونسوان ديتحاكمون وشكلهم اتعس مني

كعدت يم وحده مره جبيره بكد امي باوعتلي مستغربه كالت...انتي صغيره شنو تهمتج

رفعت اكتافي بحزن والدمعه بعيني كلتله...ما ادري

تنهدت كالت...يعني شنو متعرفين علئ شنو جابوج

بلعت ريكي...هم قبل فتره اخذو اخويه وابويه والثانيه ملاحق وهو عنده مكتبه حركوها الامن

فتحت عيونها كالت...قصدج يبيع كتب دينيه ولهذا السبب اخذو

جاوبتها...لا بس يكولون عود احنه ننتمي لحزب الدعوه والاحزاب المعارضه

درات وجهها وهي تداري دموعها كالت...نفس تهمتنا بس احنه صدك بالاحزاب المعارضه عدمو اختي وزوجي واني ديحاكمون بيه

هي كالت هيج واني رجفت ...عدموها شنقوها اختج

ابتسمت بحزن وقهر...لاااا ماتت فجأة بالسجن

باوعتلها بترقب...من الخوف موو؟

هزت راسها بنفي

بلعت ريكي كلتلها...لعد شنوو

سكتت مجاوبت

بعدها صاحو باسمي دخلت لوكيل الأمن جان يخوف يرعب يمووت خوووف مدري اني صايره اخاف من كووولشي جان كبير بالعمر

كعد يحقق ويايه واني السجانه كلتلي لا تناقشين واسكتي من يحجي وحاولي تكسرين خاطره

ولا دكولين عمو لان مره كلت الواحد منهم عمو وتخبل وضربني وكال هاي الرتب المن للخلفوج

هذا وكيل الامن احسه يشبهه عمي فياض ضل يحقق ويايه وانتم بالاحزاب واحجي عن سليم واعترفي وين حتئ تكدرين تنقذين تميم وابوج

بلعت ريكي بخوف...والله سيدي ما اعرف لو اعرف جان كتلك

حسيت بي حس بمصداقيتي كال ...تمام اني اكدر ارجعج لبيتكم بأمان بس بشرط

باوعتله باستفهام واديه ترجف

كال بعد ما باوع للملف وهو يقره بي ببرود كال...تتعاونين ويانه

رديت عليه بسرعه...سيدي اكيد اني متعاونه وياكم

رد بضحكه...حلوو مدام متعاونه راح ترسين علئ البر

جاوبته...سيدي كولي علئ الشئ الاسوي واني بخدمتكم

جر نفس ورجع باوعلي ...راح تكونين جاسوسه ضد الاحزاب او حتئ ضد منطقتكم وضد سليم وحزبه طبعا

وكفت مصدومه...شنو سيدي جاسوسه لااا مستحيل

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تبخلون بالتصويت حتئ ما ابخل وياكم بالبارتات😬

والبارت القادم حتدخل شخصيات جديده ❤

وهذا التعليق الفاز بالمسابقة البارت اهداء الها ونشرت تعليقها...