رواية سلطان زمانه الفصل العاشر 10 - بقلم زهراء العراقيه

صحيت على ألم بأيدي ... اعيوني مغوشة ،بالكوة حاولت افتح اكثر واميز منو واكف فوك راسي ..
" ا اني وين
سمعت صوت بابا
" رهف ...بابا اسمعيني
ردت ادير راسي على يمنتي واشوفه مكدرت
هو وكف كدامي
'بابا
اني وين
ميزت المرة كانت واكفه يمي وتعدل بالمغذي ..اااه كفي يوجعني من غرزة الكانونة ..
ميزت المكان من الغواش اشوية خف كأنها ردهه ..اني بالمستشفى؟
بابا كلمني ... وسمعته خابر دعاء يجيبها فرات ...

كعد يمي وهو يمسد على جبيني من تحت لفوق يصعد لقحفة راسي  بكفه بحنية
اني كنت مثل الي دا يصحصح  من اثر جرعه مخدرات او شارب كحول ودا يفيق للواقع توه
" ش شنو صار
ليش
كحيت حلكي كان مر علقم مكدرت بعد احجي
جاوبني بابا بهدوء وحزن
" صارلج يومين بابا بس نايمه !!
حسيت بشفايفي متشققة من الجفاء
"م ماي
اتقرب يمي ابسرعه وشربني  .. 
سكتت بعد ما حجيت شي ..ضلت عيني على شعاع ضوة الشمس الي ضارب من البرده ..
نزلت دمعه
ما اعرف امنين اتروت مدامعي وطلعت منه ..
تذكرت المخلوقة الي اتلكمت عن سلطان ...كان بيها شبه منه كبير ... المرارة احسها نزلت من حلكي وصارت غصة ومرارة بكلبي المفطور من المواجع والخيبات
ياما عشت بسبب شكلي معزولة عن عالم الحب والاقتران بحبيب ...بس فتحت قلبي شنو حصلت ؟
غير المرارة والخذلان
باوعت لبابا .. لاحظت شيباته كثرانات ...كأن التجاعيد هم مزداده على وجهه ... من شوكت ضهرت عنده الجديدات . اني كنت طول عمري اراقب كبرته .. غمضت اعيوني بحسرة ..تذكرت من يوم ما ضهرلي سلطان حجب عني الانتباه لكلشي بهاي الحياة درت وجهي عن معاناة غيري نسيت ابوية ..
نسيته وهسه محد كاعد يمي يراقبني غيره !!!!!!
حسيت دموعي انغمرت ندم ..وايد خشنه بدت تمسح بوجهي ...
ليتها هاي الايد تضربني ...ليتها اتسويها وتأنبني على خذلاني الها ...
هذا كل احساسي هسه الندم والخجل من الشيبة الي كاعده يمي اتراقبي حزني و بعينه الف سؤال وسؤال عن الي جرة الي كاتمه وصابر ..
اجوي الاهل خواتي و نسوان اخوتي ...
تالي الليل ضلت بس صرح يمي ..
وبابا هم مقبل يروح .. طلبت منهم يطلعوني ما قبل بابا رغم الطبيب كال عادي اذا تطلع ..
المشفى كان أهلي اني بس افيق اشرب ماي وانام ما اكدر اكل ولا بيه حيل اتحرك .. بالليل سمعتهم يتهامسون
صرح " بابا والله ما اعرف
" معقول هي فجأة  تجيها حاله الذعر من الواقع وعقلها يخمد غايبه عن الوعي مثل الي بغيبوبة
"اني هم احتاريت يعني شنو من صدمه عصبية اجتها هيج خلتها اتنام ولا اعرف شنو سببها
اااه بابا ولا نهى تقبل اتكول وين جانت طالعه وياها
معقول موضوع الزواج ...زين هي اخر مرة كالت ما اريد .ليش هسة ....
بابا "اشش دتتحرك يمكت كعدت  ..
كنت احك بوجهي
شفتهم شغلوا الضوة واجوي يمي
ابعدت الغطى وردت اكوم بس رجلية تايخه كأنها اخيوط ما بيها عظام من النوم وعدم الاكل ..
"وين بابا
"حم حمام
اخذتني صرح للتواليت ..طلبت منها اسبحني هم ،
باوعت لبابا واني طالعه من الحمام والمنشفة على راسي وصرح ساندتني ..شفته كاعد على الكرسي وايده على خده ونايم .  نظارته صايره على خشمه ..اتقربت منه ... وابعدت صرح .. بسته من راسه هو كعد ..
نز عباله بيه شي
" رهف .. بابا
' تعبتك وياي ...
ابتسمت بدموع ورحت كعدت على السرير وكعدت ابجي وهو اجه يمي حظني على صدره فرغت الي بداخلي من آلم ... حاوطت ابويه حيل ..وبذاكرتي تجري الاحداث .. ابتسامتي اله واني صاعده بالخط .
رسائلي ... كلماته ..وعوده ..  صوووته ..معقولة يطلع كذبه انوهمت بيها معقولة هذا خيالي رسمه هيج وصار يشوفه مثل ما اريد خالي من الخداع والمكر
معقولة انتهى هذا الحلم بكابوس ملغم لحد الان ما ضهر الي الوجه الي اكتشتفه ..
حاولت اعتصر نفسي داخل صدر بابا عسى ولعل ينمحي كلشي اسجل بذاكرتي ويطلع سلطان من ذاكرتي كلها ..

الصبح  . حاولت اخفي الحطام الي بداخلي واريح بابا 
غصب عني اكلت لكميتن حتى اسند روحي ويقوة   عودي ..حسيت الدم رجع يجري بعروقي...
طلعنا من المستشفى  ولكيت الاهل كلهم ملتمين اهناك ... ما كنت اباوع بالوجوه ..
ع الغده طلعت من غرفتي اسند بالحيطان احس نفسي بعدني دايخه ...
كعدت وياهم
بابا ما اتوسط الميز هالمرة كعد يمي .. حسيت بالجرم والحقارة من صار يبعد بعظام السمك ويحط على تمني اللحم
سهير سكبت الي لبن وكعدت ..
باوعت للأكل عرفته كله من طبخ صرح رغم تعبها من سهرها البارحه الا انها طبخت لأني احب اكلها مثل طبخ امي الله يرحمها ينعرف من ريحته ...
الكل مبتسم ويضحك بوجهي .. حسيت ابتسامتهم وجمعتهم هاي اتكول لا تخافين وياج ..
ليتني اكتفيت بيكم وما مشيت خلف هواي وحبيت،
معاملتهم نغصت علية الاكل خلتني احس بالذنب الكبير والخيانه الهم ...حتى محد سألني ليش اني هيج ادهورت خوفا لا ارجع انتكس ....
عدت ايامي سودة حمرة مثل الليل بيوم مغيم ...
بداخلي حسرة يتيم بلا مأوى ..احاسيس متضاربة  عندي ملتمه كلها الندامه والحسافة و خجل من نفسي على الي سويته كنت بعدني على اثر الصدمه
هذا الي هادر طاقتي ....
اتكلم مع اهلي كلمتين واقضي اليوم صفنات ،و تاخذ من صحتي وعافيتي ارهقني التفكير ..
مر اسبوع واني غالقه خطي وتاركه الدوام .. واهلي احتاروا وياي ما يعرفون شنو سالفتي وازداد قلقهم من كنت اضأيق من يسألون وجوابي ماكو شي خافوا لا ضامه شي يصعب حلة .... خواتي دوم يترددن عليه ..اما نهى بررت الهم انها ما الها شغل اني نفسيتي تعبانه ....اتحججت بأمور ما دخلت عقلهم ولا صدكوني ولا اني صدكت نفسي اشلون عندي قدرة اكذب واني بهاي الحاله اضاهر ما اتعضت .. 

ايام الا كدرت استوعب الي وصلت نفسي اله  وحاولت اطلع نفسي من فقاعه الاكتئاب .. قلق بابا حفزني ما احزن عيونه مرة ثانية ...كمت احاول اصنع السلوك الطبيعي ويمكن بالغت حتى كدرت اطمن  الي حولي ...
  ....
فتحت تلفوني واخيرا ... شفت مسجات سلطان كومه ورناته عليه بعد اكثر ..كمت افتح بيهم واقرة و دمعي غسل وجهي ...بعده يستخدم وياي كلماته بعد بيتي
رهفتي
هاي بأول رسائله لكن البقية من شاف غيابي طول
بس  يسأل ويني وشنو حالي
ااهه يصنع الخوف عليه
ياربي مدا استوعب هذا كله تمثيل .ما عاونت اتخلص من حالتي ذيج .. بس قريت الرسائل راح الندم والخجل من اهلي استبدل بالاشتياق والخيبة ...ودي اسمع صوته ...ودي يطلع كلشي  عرفته حلم مخيف   .. ودي اصدكه ...
هذا حبيبي الي  وثقت بيه وسلمته قلبي هذا الي يخاف يتصل بيه بالليل لا يطلع زايد بالكلام وياي هذا الي تكفيه نظرة مني وابتسامه ...
ضليت فترة احترق بناري ... وهاربة من كلشي حتى لا بس اشوفه ؛حضرته وهو اجاني من ارقام غريبه بس يراسل ...
اخر رسالة اله
" والله لو لا خوفي عليج لكان اجيت لهلج حتى بس اعرف ليش مبتعده عني ...مع هذا والله فرحت من حضرتيني على الاقل بلكت انتي بخير .. وياريت اتكونين ما ترديني ولا اهلج عارفين ومعذبيج ..

حرك مشاعري كلامه كلة ..
لكيت نفسي اريد  بس اسمع مبرر اله على الي سواه بيه ..
بلكت عنده مبرر بلكت لا مسجون ولا شي بس سوء فهم دب بروحي الامل ودكيت عليه ...
كمت وهو يرن سديت الباب وكعدت على الارض متقرفصه يم السرير وحاطه ايدي على حلكي اخفي شهقاتي ...
فتح خط
" الووو رهفتي الوو
بالقوة طلع صوتي الباكي
" سلطان ..
" يا روحه وينج ولج متت واني ادورج وانتي ماكو
الو رهف
رهف شصار الله عليج ..
نفسي يصعد وينزل راسي كام يدك بيه الوجع
" ش ش شخبار اختك الخياطه ؟؟؟؟؟
كان يريد يتكلم من سألته انشل لسانه وسكت
" هاا شو سكتت زين ما عرفت اشكد ضليت بالسجن   .!!؟؟
. زين عمك الي اتريد منه ورث شخباره ؟
وعملك هم .. كم بيت دخلت سرقت ...يا ترى البيت الي كتلي على اساس انته  بنيته ... كم مليون بكت منهم هههه
الو
كنت ارتعش واتكلم بصوت باكي مخذول .
اتمنيت يفشلني و يصيح عليه كذابه او امنين جبتي هذا الكلام .....ويزعل مني ..
ضعف صوته وبالقوة نطق
" ا الله يخليج ..بس افهمج
" شنو !!!؟؟
سلطان ...انت دخلت سجن ،،؟
" عفية بس افهمج .  والله ظلم و زور دخلوني
صحت واني منفعلة
"هو سؤال واحد
تداركت نفسي ونصيت حسي لا اهلي يسمعوني
" كول يا اي لو لا واني اصدك ...
والله اصدك
رجعت ابكي
" اي انسجنت .. رهف والله ....
"ايا جذاب يا دون يا مخادع طلعت رد سجون وكاعد اتمثل عليه ..
راد يحجي سديت الخط ورميت التلفون كدامي ..  وغوشت الصورة عندي من للدموع ....
انفجعت ..كأني اليوم أترملت .....حسيت احساس الفاكده ولف ومات بالحرب ...
...
بيوم لبست واتحضرت حتى اروح للدوام لأن ما ينفع اضل بدوامه الحزن الي خلت اهلي يشكون لا مو يشكون همه على يقين اني اعاني من شي وضامه عليهم .. والي حيرهم ما يكدرون يضغطون عليه .حتى بمرة الحت عليه سهير صحت عليها واندفعت .. وصحت  اني ما بيه شي حالة أكتئاب من وضعي وبس .
...
اجتني دعاء
"رهوف اليوم يداوم
ابتسمت بخفوت ودنكت لكفت جنطتي وتلفوني وطلعت وهي خلفي
" اي هيج ارجعي للدوام للبيت النا ..
" تمام حرجع
"خابرتي ابو الخط يجي ياخذج
" لا حروح عبريه ..صارلي اهواي تاركه اخاف شاف غيري اليوم اداوم واشوفه ...
وكفت اعدل شالي ودعاء راحت ..ورة اشويه رجعت وكالت خابرت فرات ...كال جاي بالطريق بس تنتظرني اجي اخذها
"يا ليش زحمتيه خطيه
" حبيبتي انت تعبانه ما عوناج اتكومين النا وينج وين شلعان الكلب مال العبريات ..
كعدت انتظر فرات ... اجاني خطيه حتى ماتغده خاف يأخرني طلعت للحديقه صفنت على سيارته
"هاي شنو مدخلها للكراج
ضحك واشرلي اصعد
فديت الي يدلل بيه رحنا .. للجامعه دنزل سحب جنطتي وفتح جزدلاني حط بيه افلوس
"هاي شنو فرات
"دخذي وادخلي للكافتريا عود بالريست ..
ابتسمت واشرت اله مودعه بأيدي ورحت وبالرجعه هم رجعني واستمريت اول اسبوع هو يجيبني وسامي لو بابا يرجعوني ... حسيت بروحي بدت ترجع الي ولو الي انكسر بداخلي ما اصلح واضل مساهرة ليلي بس اتذكر صوت سلطان واتحسر عليه ..حتى كمت اخاف من نفسي لا اضعف واخابرة ااااه يا سلطان زرعت بيه حبك بكذبك عليه ... خليتني ضعيفه الحيلة ... بعد اسبوع ما رجعلي فرات حتى يوصلني واني هم اتفقت مع ابو الخط يجي عليه
طلعت من البيت واني كلبي يدك ... رغم اني طلبت من السايق يجي من الناحيه الثانيه مال الفرع حتى بس لا اشوف سلطان او اصادفه لكن ارجف ..لا عيني تجي بعينه مرة ثانيه ..طلعت من الفرع  . اتمشيت على السريع و صعدت باالكية ....
وضليت يومين هيج اجي مناك وارجع مناك ..

...
بيوم كنت اقري بنت اخي ..
دخلت نهى للغرفة وطلعت بتها اني جريت حسرتي عرفتها راح اتفاتحني بموضوع سلطان.
"نهى حبابه ...لا اجيبين طاري ذاك الموضوع
ترة روحي خلصانه
"بس لازم نحجي
"لا نحجي ولا نعيد ..نهى طلعتي انتي صح واني غبية .. تركته وعمري مراح افكر بيوم ارجع اله
ابتسمت
"والله العظيم عرفته جذاب لأنج دوم اتمدحين بيه وتصرفاته مبالغ بيها مال واحد يريد يمثل ويطمطم ويصنع ...عوفج منه ..بس اه حرامات ذوله الناس الواصلين راحت عليج خوش قسمه
نغصت عليه يومي بكلامها ....وذكرتني بسيف ..سيف هذا الثاني شنو قصته ليش اجه وطلب ايدي ؟؟؟
اووف توني الا ذكرته ... سلطان خلاني ما اشوف  غيره ...
راحت نهى ورجعت صحت لبتها حتى اقريها ..
اجتني دعاء وجهه اصفر
" الحكي عليه رهف
"شكو اسم الله
"ولج فرات خابر كال اني بالطريق جاي اذا ارجع والكه رامي طالع بالشوارع اني اعلمكم اثنينكم
الله يخليج روحي جيبيه
" اني !! لا ما اطلع خلي فهود يمي وروحي انتي جيبيه
قصدت ابنها الصغير
"حتى اطلك ما اتعرفين اخوج انتي
هههف صح هو ناهيها تطلع وحدها ممنوع مو انوب اجيب رامي وتستر عليه ...بس اني اخوتي مالهم حكم عليه وبابا اقل تعقيد منهم وهمه هم وياي شو سبورت ما اعرف ليش مطمنين عليه ..
لبست شالي واهتميت بنفسي ودعاء فوك راسي اتلح
طلعت من البيت .. كبل للحديقه ماكوا رامي ...
اووف تنهدت بقهر ورحت للساحه واني التفت لا اصادف مخاوفي ..
رحت للساحه ماكو رامي ..اتصلت بدعاء سألتها راجع بالبيت
كالت الي لا حبابه جيبيه
ضليت التفت وامشي طلعت من دربونه اطل على فرع اخر وضليت امشي واهبد واذا شفت احد ربعه اسأله عنه .. كالو الي بمكتب الانترنيت كاعد يلعب ويه صديقه ابن صاحب المحل ...او رحت للشارع واني الخوف يسري بيه ... دخلت للمحل شفته يلعب صحته واخذته من ايده
طلعنا من المحل
"اني مو طفل
"لا اصيح وامشي
"ما عليج بيه
"امشي ولك
جريته ومشيته غصب هدني وركض كدامي لا اكدر اركض خلفه عيب .. مشيت مسرعه . وهو دخل للفرع ...دا امشي ومشيت من كدام مرطبات سلطان زمانه  ركاضي تقريبا .... دخلت لفتحت الدربونه واحس شي اندج بيه وكفت وجمدت
درت وجهي شفته اي شفته متت رعب وخوف من حسيت منيشن مطوة على خصري ...دمعت
" امشي كدامي للمحل لا والله اخلي امه لا اله الله كلها تتفرج عليه واني اضرب نفسي كدامج ..
اهتزت جفوني من الرعب وانداريت من غير تفكير
مشيت لكدامه وهو ادنى خله مسافه بينه .. اباوع بوجوه المارة وارعش ...كلمن بطريقه  يمشي بهاي المغربيه شجاكم احد يحس بيه ويخلصني منه ..
وصلت للمحل ...واقدامي انتهت بالكوة اسحل بيها
دخلت وهو دخل خلفي ..
"شنو تردين روحي اخذي من المجمده
مشيت بثقل .. يعني بعده يمثل هو خايف عليه لا احد يشوفني وياه ويشك بوكفتي بمحله دنكت واني  الخوف ما كلني ما اعرف ليش ..دا اخذ اي شي ..
حسيت  بالكبنگ. دينزل رفعت راسي ابسرعه سده
واني واكفه مصدومه ما اعرفت افسر الي ديسويه اني مو من الأشخاص الي يستوعبون المواقف ابسرعه ...جمدت بمكاني ودمي نشف واني اباوع لسلطان ...شعره منكوش ..يعبر  عن بأس حاله مزداد سمار ... تحت اعيونه كان اسود وحده من الاثنين لو ما ينام لو مدمن !.. تراجعت للخلف وهو ينظر الي بنظرات خلت جميع اوصالي ترعش خوف رجليه وحدها كامت ترجع للخلف و ابلع بريكي بعيون جاحظه
" س س لطان شنو حسو حسوي
كلتها بصوت يرجف
" الي لازم يصير ...!!!!!

يتبع