رواية سلطان زمانه الفصل التاسع 9 - بقلم زهراء العراقيه

انهبطت من دخلتها عليه
سديت الخط ابسرعه
" منو سلطان
كمت على حيلي
" محد .. ا اقصد ابو الخط
بعدين ليش هيج اتباوعين عليه واضحكين !؟؟
"لا ابد ماكو شي ..اشبي وجهج صوفر
"اعتقد اني اذا دخلت لغرفتج من غير اذن راح تتضايقين
"اي طبعا اني مرة مزوجه ما يصير ادخلين عليه ..بس انتي مرة عزابية ...قابل يصير شي بغرفتج عيب الواحد يشوفه
ذبحتني كلماتها مدري البسامير الي تقصدهم اني عانس وماعندي شي .....لو لان عندي شي ضامته عليهم وهي شاكه بيه
التزمت القوة كدامها
" اروح اتحضر للدوام افضلي ...
عفتها بغرفتي ..وابتسامتها قتلتني ...قتل
انشالله ما يطول انتظاري وينطي عم سلطان ورثة ونخلص من سالفة التخفي  .
....
ردت اصعد بالخط وشفته واكف برة المحل
ابتسمت اله ورحت ...صعدت
رسل الي رساله
" لا اضحكين بعد بالشارع اخاف واحد غيري يحسبها اله
ابتسمت بخفوت وحطيت التلفون على صدري
باالليل اتصلت بيه صرح
دردشنا اشوية وبين سوالفنا سألتني صرح سؤال خلاني اشك بنهى موصله الها شي
" شنو قصدج صراحه بماكوا واحد منا منا
شتقصدين
اذا نهى موصلة الج شي فهذا مااله اي اصحية
" اشبيج رهف ....اكلتيني حاصل فاصل وشنو سالفه نهى ،؟؟؟؟؟
" ما ادري اخاف موصله الج شي
" لا ..بس اضاهر اكو شي هو اني هم شكيت بينج وبين الولد معرفه لكن مو وقت الملامه هسه مدام هو اتقدم الج هسة يعني علاقتكم جادة ..

'شنو !!!!
ما فهمت شي من الي اتكوله شنو سلطان رايح لأختي الكبيرة ؟؟
" عمته اليوم اجتني للمستشفى .. وطلبت مني عنوان البيت حسب الاصول يجون يشوفوج
وكالت عود هي جايه من قبل معارف بس اني اقتنعت وهسة اكدتي الي هو مو خطوبة تقليدية ..
"صرح اسمعي
"رهف .. انت اتعرفين اتتصرفين من جبتيه للطريق .لكن الاهم يطلع صاحب سمعه زينه .. النسوان راح يجن الجمعه  عكب باجر والله كريم
ما عرفت ياهو تقصد صرح وشنو دا تهذي
خابرت سلطان
"احنه مو كلنا ماكوا اتصال بالليل  الا بالضرورة
"ادري شنو هاي العقد سلطان
" مو بالليل العشك ما يصير عذري يابعد بيتي
"هههههههه 
اااه سلطان
انت داز ناس على اختي صرح ..
"شنوو يا اختج
"يعني دزيت عمتك اليوم حتى تطلب من اختي موعد يشوفوني بيه ؟؟؟؟؟
" لا والف لا اني اريد حرمه اجي لأبوج للزلم مال بيتكم واخذج منهم ...لا عندي عمه ادزها ولا صخام
هاي منو خاطبج ...
عصب وضل يخربط بالكلام ..اني سكتت ما كلت شي
حاولت اهدي
" سلطان اشبيك ترة عادي الخطابة يجون لأي وحده
سهلة بس ردت اعرف انت لو لا
"والله احرك بيتكم اذا اجني يشوفنج ...ماكو مرة للزواج ببيتكم ...
"لا والله لعد اني شنو
"انتي محجوزة الي بس يطلع القهر حتى اخذج ..
"ههههه فدوة لليغار
'لا اضحكين ..والج اجنزة وراسج اجنزة الي يتقرب لبيتكم
......
اجه يوم الجمعه .. واجت صرح وطلعت مخابره سهير وبس يصجمن بيه عبالهن اعرف الي يريد يجي يخطبني   واني احلف الهن ما اعرفه ما يصدكن
كنت احضر الضيافه ووكفن يمي بالمطبخ
صرح "اي عيني اتحضر لأم سيوفي الضيافه وبالكذب من اجيت ما قدمت الي كلاص عصير
وكع من ايدي الكلاص الي كنت اغسل بيه من جابت طاري سيف او امه
' سيف ...الي يخطبني اسمه سيف
سهير "عود هي متعرف ههههه
صرح "ي سيوفي
والله عمته مرة نازكه ومتحدثه بنفس الوقت ..مشرفه تربوية ومبين الكتاب من عنوانه عرفتي اتنقين
اجن النساء
واني بغرفتي اروح وارد متخوفه من الي يصير  ..
دعاء دخلت عليه
"يلا  رهوف اطلعي شكو اهنا كاعده
"دعاء دخيلج حاولت افهمهن اني ما اعرفه ولا اريد اطلع بس خواتي ماكوا ولا يسمعن حبابه اعفيني
" رهوف وشكوا ..؟حتى لو متعرفيه قابل ما تتزوجين
فركت بأديه بقوة واني اتنهد هذا الموقف صعب
ودعاء تتفرج عليه
"ذوله ناس هاي لاي ..وربي امه تنحب اتخبل تشبه الهام شاهين فد انيقه ..يلا تعاي ...
طلعت واني كلبي يخفق ألم ..
شفتهن سلمت عليهن بتوتر
امه كأنها غيمت من شافتني ..
بس عمته ضلت مبتسمه ..واني اباوع لصرح على هذا الموقف الصعب
امه كانت لافة شعرها للخلف ومطلعه خصله وحده متسيبة على خدها وعمته شعرها ولادي
.
اتحدثوا وطلبوني يعني كلام نسوان وصرح كالت الهم بس ناخذ رأي الزلم حتى يشوفوه ويسألون عنكم ...
من راحوا صرح طارت اطيور طلعت سامعه بأم سيف  صاحبة منظمه انسانية ومعروفه عند البعض مثل صرح ..  وناس جدا راقيين
دخلت لغرفتي دايخه ما فاهمه شي سيف ليش خطبني ...ليش رسل اهله عليه ؟؟؟؟
هو مو يشوفني اخت لا اكثر !!!!
اهواي علامات استفهام صارت ...
ردت افك الحضر واتصل بيه بس كلبي نغزني .. حسيتها خيانه لسلطان .بمجرد اني اتصل بسيف اكيد  راح يجن ومايقبل ... اااه يا سلطان اشكد نضيف وماعندك شي مو مثلي اضاهر انت احسن وانقى مني من حبيت حبيت صدك مو مثلي مثل الغركان يشاكف بأديه ما يعرف وين يحطهن اول ما اشوف خيط الزم بيه عبالي طوق نجاة يطلع سنارة صيد .. 
لا اريد اعرف ولا راح اوافق ..كلت بقراري لصرح وسهير الي ماصدكن الي اكوله واني رفضي قطعي حتى ترجيتهن لا يكولن لأخوتي ...
راحت صرح لبيتها بعد ما اتعاركت وياي لتضيع هاي الفرصه والصبح راحت سهير ...
الضهر كنت ارش عطر دخلت نهى وسدت الباب
"اكلج اذا انتي هيج اتحبيه واضيعين هيج فرصه عمود سلطان .. ليش ما يتقدم الج ويفضها لو هو صادق ؟؟؟؟؟؟؟
التفت عليها بخوف
كانت معالمها جامده
"اي اي اعرف كلشي من يوم ما سمعتج اتكولين اسمه من طلعتي من الغرفه فتحت تلفونج وشفت المسجات والاتصالات الي بينكم ... اكلج يا محل لي تحجون عليه لا يكون هذا سلطان ...ابو مرطبات سلطان زمانه ؟؟؟؟؟؟؟
سكتت وكعدت على السرير رجليه نملن  .  اخفيت وجهي بأديه هاربه من نظرات نهى
كعدت ابصفي
لزمت ايدي
'ليش ايدج ترجف
اهاااا
شوفي يا بت الناس اني من دخلت بيتكم كان عمرج 13 سنه طفله ربيتي تحت عيني انتي واختج ..
بس ما اعرف ليش احسجن ما ترتاحن الي
مع اني والله كلبي طيب
كمت ابجي .. اني شصار بيه . صرت تحت رحمه نهى
"هووش ليش هاي الادموع ..
انتي رفضتي فرصه على موده   . كولي اله حتى تسجل لصالحج وخل يستعجل
"الله يخليج نهى لا تكولين لأحد
" والله ما اكول هاي اشبيها الخبله
غير اخوتج يخلصون عليج
"بس خلي يتقدم الج هليام
" ما ما يكد ر ينتظر ورثه
"شنو
"مو مو
هو عنده ورث عند عمه بس يطلع اله يتقدم الي
"لا والله وصدكتي هاي الدروب
"سلطان ما يجذب ابد
"والله يا عيني لو اتكولين الي الحوت يهز ركبه ونص اصدك بس مال الزلم ما اجذب ههههههههييي
ضحكت ضحكه صفرة وطلعت اتهز بأيدها مع كل ضحكه تطلع منها ..كلبي ينذرلي جايتني مصيبه ...
شسوي اكول لسلطان لو شنو اسوي

انهاريت ما داومت ولا طلعت من غرفتي
العصر دك عليه سلطان اول ماسمعت صوته طكيتها بجيه
"رهوووف اليوم ليش ما دوامتي...
سكت من سمعني اكول الو وابجي
" رهفتي بعد بيتي ليش تبجين
احد ضاربج

" سلطان ..مرت اخويه عارفه كلشي
الله يخليك شسوي ..
سكت ما وصلني شي ولا اقترح عليه
مر وقت على سكوته طول
واني ابجي
'اهدأي هسه .  اهدأي والله كريم ..هو يحلها لا تخافين   ..
" سلطان شنو راح اسوي
" انتي حاولي اكسبيها وبلكت ما اكول شي
انتهت المكالمه بينا
مو هذا الرد الي كنت منتظرته منه .. رحت على بابا لأنه صاحني ..
طلعت صرح موصله اله موضوع الطبيب سيف
واني جددت الرفض ....
موضوع سيف ضل لغز بالنسبة الي
مرت ايام ومابيني وبين نهى كلام غير العادي ..
كنت اخاف افتح الموضوع مرة لخ واكول بلكت نست ما اريد اذكرها ..
....
المواقف وحدها هي كفيلة انها اتفرزن الك معادن البشر ...مثلا نهى
اكتشفتها المرة مو خطرة مثل ما متوقعه هي بس تغار من دعاء وهاي الغيره مخليتها تبث سم من خلال كلامها  .. واكتشفت انها مو سيئة بفضل حبي لسلطان هو الي وضح الي شخصيتها حسب ما اصرفت هي وسكتت وما كالت لأحد  ابد !!!!!!!!!
هي بس اشتغلت ناصحة عليه
...
عدت اشهر .واني ما منقطعه علاقتي  جدا قوة بسلطان ناقصها شي واحد كنت اتمناه بفارغ الصبر وهو العلن عن علاقتنا امام الاهل ...
كنت اثرم زلاطه
واجتني نهى وفاجئتني من طلبت اسم سلطان الكامل وعنوانه
اني ضحكت على فكرتها اتريد تسأل عنه .. واتكول هذا لعوب
"نهى انتي لو بس اشوفيه اشلون يغار عليه ما اشكين بيه ابد ..
اساسا سلطان حبه من غير مطامع وصادق كلش
انتي بس برأة اعيونه تاخذج بغير عالم مابيها لا جذب ولا خيانة زلم هالوقت
ضحكت وكالت يا ما تحت السواهي دواهي
راحت من يمي بعد ما انطيتها اسمه بعدم اهتمام والعنوان  ..

رحت اخابره  ..لأن بابا واخوتي لهسه ما اجوي ع الغده ودعاء اترضع ابنها
سديت الباب ودكيت عليه ..رد عليه
" هلا بالحب الاولي والاخير
" اكولك صدك باجر راييحن للزوراء ماتجي اشوفك اهناك خطافي
" لا ما حب اسويها
بس الله عليج لا اتلبسين كصيف خوش
"ههههه تمام
"والكذلة لا اطلعيها تسرح الله يخليج
"ههههه تمام بعد عندك اوامر يا حضرة
" والله غير من خوفي عليج .. 
" هههه فدوة
" وفدوايي ارووحلج يا بعد الروح
"هههه خوش لحن اكولك صدوك شو انت ولا مرة مغني الي
" اني ههههه صوتي يشرد العشيره
"لا حباب
"لا والله ما اغني
"زين انت يا مطرب تسمع
"هههه اكلج وما اضحكين
"كول
"فريد الاطرش وبس
"ياا ههههههه
ضحكت من كلبي ...على مطربة المفضل .
'اشبيج اضحكين انتي بس اسمعي اغنيه زينه مالته وراح تنطربين
"اها منا وجاي ما تسمع هاي الاغنيه خوش
"ليش بالله
"لأنها تجرحني  شنو تسمع اغنيه لزينه و ماتسمع لرهف
انتهت المكالمة واني لازم اكعد اشوية اتخيل واذكرت كلامته الاخيرة ..  والابتسامة شاقة وجهي
............
بيوم من الايام
تحديدا الساعه سبعه بالليل ..بابا بغرفته كاعد
واني بغرفتي ما ادري عن اخوتي  شي ..
دخلت عليه نهى وعلى وجهها ابتسامه نصر
قفلت الباب واتقربت مني ...كنت على سريري كاعده وكدامي كتبي  .. اهز بالقلم واباوع الها اريد اعرف سبب ابتسامتها
" مو كلت اني ...كولت الج ما مرتاحه لهذا سلطان
"نهى !!!
اني كلفت رجل اختي يسأل عنه كولت اله يريد يتقدم لاختي الصغيره عن طريق مرة اعرفها ..
وسأل  وعرف البلاوي الي كالها عنه ...
ابتسمت بثقه
" نهى شنو من سوالف عندج انتي وشنو من خلك
"غير انقذ حماتي الصغيره من ابن الحرام هذا يضحك عليج لا عند عمة ورثه عنده ولا شي
سويت نفسي ممهتمه واقلب بالاوراق
" اكبر غلط الي سويتيه اشلون اتوصليها لزوج اختج ..على العموم هو غلطان بالسؤال ..
باوعت الها مبتسمة بثقة
"لأن سلطان من سابع المستحيلات يطلع هيج
" لا والله ...اضاهر هذا دامغج بكلامه .  ولج طلع حرامي ..وسوابق   افهمي واسمعي الكلام الي كالوا عنه الجيران ...
عصبت من الحاحها
"ارجوج اش كافي اني ما متحملة منج كلمة.
'غبره والله غبره
كمت على حيلي
وخزرتها
"اخر مرة اسمح الج ادخلين بيها لغرفتي فاهمه
عقدت حاجبها بغضب
" ها فوك زيني
' اي زين هذا انت من يوم ماعرفتي بعلاقتي ..واتحاولين اتخربيها بكلامج .. نصحج هذا وفري الج ...رجائا انسي سالفتي
وطلعي الرجال من بالج لا ادزين ناس تسأل
لا تأذيني ..وطلعي نفسج من الموضوع
كنت انتتر واصيح منفعله
هزت ايدها وباوعت الي بنظرات شفقة ازعجتني اكثر وطلعت ..
كعدت على السرير مهدود حيلي . دوختني هاي ..
حبيت بهذا الوقت بس اسمه صوته دكيت عليه ..
" الوو يبعد بيتي
" سلطان اني تعبانه
" اشبيه الحلو منو متعبة
" انت
"اني ؟؟؟؟
شسويت كولي لأموتها لروحي اذا بيوم مستج

اضطربت حسيت بثقل الكلمات بالكوة اريد اغصبها وتطلع مني
" سلطان ...الى متى تبقى علاقتنا هيج
"مرت اخوج هددتج
اخذت نفس بعمق
"لا سلطان اني تعبت من هاي العلاقه ما اريد اضم شي على اهلي بعد
سكت كأني حيرته حتى ماعنده كلام يصبرني بيه
" هذا عمك ليش ما ينطيك ورثك وانت ليش ساكت درفع عليه قضيه غصبا ما عليه تربحها ...
" انشالله ....رهفتي  احسبي نهاية هاي السنه انتي يمي ....فلا والله ما محسوب على الزلم اذا ما صرتي مرتي ام جهالي ...
ريحني كلامه ...بهاي المكالمة كنت بس اريد اريح بالي واسمع صوته الي يبث صدق و شرف .حتى ابعد اوهام نهى عني ..ضليت يومين اني ما احجي وياها هي اتحاول بس اني ما اقبل واصدها ..
بيوم كنت جايه من الدوام تعبانه حطيت السجل وجنطتي على ميز الهول
اجتني نهى كانت لابسه ومتشيكه
" ها اجيتي تعاي وياي انروح لصرح مريضه
"شنووو
اشبيها
"امشي وياي دنشوف اشبيها
"دعا...
سكتتني نهى
" تدري دعاء هي يمها ..
"اها
رغم تعبي وجوعي لكن رحت وياها خفت لا صرح بيها شي وكنت قلقانه كل ظني اخوتي كلهم يمها مثل ما فهمتني نهى .. طلعنا من البيت وابسرعه هي وكفت تكسي واني على صفحه واكفه طلعلي سلطان ..رغم حزني ابتسمت اله  واشرت اله بحاجبي لحد ما صعدت للتكسي ومشت اني اباوع اله ..... الطريق كله اني اباوع للطريق
"نهى ....هذا مو طريق بيت صرح اخاف السايق مشتبه
"اش لا بس دنمر بشغله
"شنو
"اش
وصلنا لحي غريب اول مرة اروح اله بحياتي كلها
" نهى كل ما اسأل اسكتيني احنه وين
"احنه بالعنوان الي انطيتيه انتي الي
استغربت مفهمت شي
"اختج ما بيها شي اشويه ونوصل لبيت سلطان ...
"شنوو
نزلنا واني اتلاغيت وياها اشلون اجذب عليه طلعت حتى دعاء ما طالعه بغرفتها ! وكله جذب واني كلبي اشتعل على صرح .......
مشيت خلفها وهي كأنها  متيها البيت .. ضلت  تمشي وتسأل عنه .. واني خلفها مذمرة على تصرفها
وصلنا لفرع واخيرا كالو بيته بيه
وكفت ووكفتها
"بس اريد اعرف انتي شنو غايتج
صبرت نفسها كوة كأنها اتريد اثور عليه
"اريدج تصحين ...اخاف عليج من هذا ..اخاف لا يتأذون اخوتج بسببه ..اخاف على سمعتج وسمعتنا ..هذا شي حساس 
انتي مو صغيره لو يريدج صدك يدك بابج مو يضل يتحجج ..
مشت ورحت وراها اتأفف منها بكلشي حاشره نفسها 
واتحب تاخذ دور الناصحه والفاهمه ... هي تطلع مرة اربعينية بناتها وحدها 15 والثانية 13
سالت على البيت .وعرفته ...
اني دخت من صيحه الجهال الي يلعبون بالفرع الضيق طوبة وتعبت هم كعبي كلساع والتوة من الطسات ..
المنطقة كانها سوق هرج ... دكت بابهم نهى مصرة اشوفهم ..
انفتحت
طلع النا  ولد عمرة ست سنوات او اكثر لابس فانيله كلها وصخ ومن جوة من غير هدوم درت وجهي مشمئزة
نهى
"هذا بيت سلطان ؟؟؟
" بوية سلطان ؟؟؟؟؟
"هاااا انت ابن سلطان؟؟؟
كشر الولد وطلعت النا اسنانه الخايسه

صيحنه اهلك
صاح الولد
"يمه يمه نسوان .. يمه نسوان يردن يخيطن
طلعت النا مرة سمينه تمسح بثوبها
"امش البس
اني جامده بمكاني ولا مصدكه اصلا شي واكول لنفسي اشتباه ....تأكدت هسه مشتبهين بالعنوان نهى ورجل اختها
"اتفضلن  عيني اول مرة اشوفجن
دخلت نهى واني خلفها اباوع للبيت الي يريد ينهدم والجهال الي بيه يمكن اكثر من ولد الفرع !! وكله ريحه كريها ..
شفت بالهول مكينه خياطه ..عرفت منها هاي المرة خياطه وعبالها زبائن جدد
"اي عيني شنو عدكم اخياط كفات
كانها تتفحص ادينه فارغه
نهى "والله يا ام ....
ام شنو عيني بلا صغرا بيج
"ام علاء
"ام علاء احنه .. جايين نستفسر عن سلطان .. هذا مو بيته .. هو يشتغل يمنا محل الايس كريم يمنا .. واختي
واشرت عليه
"نست تلفونها بالمحل وهو معزل يعني احنه بس انريد نتوصل اله وانشوفه هو اهنا
كانت نهى اتريد اتثبت الي هذا عنوان سلطان وهذا بيته والكلام الي كاله عنه رجل اختها صح
" الله اكبر عليك سلطان جايب الي العار دومك
كامت وصاحت
"شوفن هذا بيتي وهذا سلطان لا علينا بيه ولا انريده
اكيد هم باگكم  هذا الحرامي الدون جايبلي الفضايح
اني بأندفاع
"لا نهى مو هو سلطان ولا هذا بيته ..
طلعت تلفوني وحطيت كدام المرة صورة سلطان
"هذا الي نسأل عنه مو زوجج الحرامي
ضحكت المرة
"هو هذا اخوية مو مو زوجي
حرامي
باك عمي وباك رجلي خلاه يطلكني ويذبني بهاي الخرابه ..المطي
اتهسترت نزلت التلفون واني مصدومه
صحت عليها
"كذابه
نهى لزمتني كنت ارعش و اريد اهجم على المرة اقتلها
"اضاهر كلام ام سلوان صدك ...وانتي الي عاشكها سلطان مووو
هههه والله وعكج هذا ..بس نصيحه من اخته ..ترة سلطان مو مال زواج ماعنده غير الطك والنعل يتعامل بيها ويه النسوان
باوعت الي من فوك لجوة
"وانت مبينه بت ناس شبعانه شلج بهذا السوابق
ترة جان بالسجن باك عمي الي جان ساتر علينا
وراد يكتله

ضحكت بصوت ورجعت تلفوني للجنطه وطلعت من البيت واني متهسترة اضحك واضحك
نهى لزمتني من كفي واخذتني للشارع ..اخذت تكسي واني بس ابتسم وامسح بوجهي . عرقت وحسيت ريكي نشف
وصلنا للفرع نهى طلبت من السايق ينزلنا يم الباب ...
نزلت ودخلت للبيت مسرعه ..  خلفي نهى
اتخيل كلشي ضحكه كلامه ..غزلة .  وعده ... حلفانه .... صدق كلامه ... كلشي كلشي اذكره
دخلت واني دايخه ...حاسه بدوار فضيع ...اريد ابجي الدموع محتبسه   بداخلي ماترضى تطلع صحت بصووت عالي
" كاااااااافي .... ارتااااحيتي نهى
ركضت على مزهريه كبيره بالكلدورة ركلتها برجلي وكعتها كسرتها نصين شلت منها حطام وشمرته على المراية ....كنت بس اريد نغزات كلبي تهدأ ششوف كدامي اضرب واكسر واصيح بكلام غير مفهووم
ما اذكر الشخووص الي حولي ما اذكر شي ابدا
غير اني اصيح لدرجه صوتي اختفى .  واني كلي اختفيت ...بعد ماشفت شي ...غير اني دا افتح اعيوني .. واسمع اصوات ..يمي فتحت  وفرزنت صوت بابا وهو يقرأ قران فوك راسي
و دعاء لازمه ايدي وصافنه ..
حسيت بوجع قووي برجلي
وريكي نااشف
" ا اني وين
نهى وين
عرفت نهى متعاركه وياها دعاء والكل عبالهم هي سبب انهياري .. دخلت عليه صرح وبيدها ماي وخلفها سهير ..
اثاري بابا مخابرهم من وكعت عليهم .. الم رجلي لأني ساحكه كزاز اني مكسرته ورجلي ملفوفه
هذا الي كدر عقلي يستوعبه ...لكن كنت ناسيه اني ليش هيج صار بيه وشنو السبب
صرح
" حبيبتي نامي وارتاحي
انطيتج مهدأ ومسكن آلالم ....
شربت ماي ..... و التفتت على بابا ونمت !!!!!!!
كاني متخدرة .....

يتبع
تحياتي
هذا البارات اهداء
linaomar111