رواية سلطان زمانه الفصل الحادي عشر 11 - بقلم زهراء العراقيه

من كتابات زهراء العراقية
بديت ارجع للخلف واعيوني مدمعة.عقلي انهلع من حس بالموقف الي هو بيه ،نزلت  دموعي بصمت على خدودي و ظهرت نظرة حزينة منكسرة .. حطيت ايدي على فمي حتى لا تطلع مني الصرخه المكتومه وافتضح امري بين خلق الله
اني وحدي بمكان مغلق مع واحد سوابق ..هذا مو سلطان ...  هذا واحد ثاني غريب ما اعرفه من شفته اتحرك  وبده يتقدم الي ....اقشعر بدني وسرت بيه رعشة من الخوف والهلع والذهول ....
" س سلطان .. انت ...شدسوي ....
ضعف صوتي اكثر
"طلعني منا .   حباب
شفت بأعيونه الحسرة و الحزن ...
اتقرب مني ...اني رجعت للخلف وانصدمت بالميز
" الله يخليك ....لا
غمضت اعيوني المبللة ما عندي غير الترجي حتى او اقبل ايده يتركني ماعندي مانع
"حباب
صرت اشأهق مثل الطفل ومغمضه .. حسيت بملمس ناعم على وجهي ديمسح دمعي ...فتحت ... لكيته يمسح دموعي بمنديل ابيض ..ابتل منها ..  ويباوع الي بنظرات حانية وهادئة مابيها أي شر او خبث
جر كرسي واشرلي اكعد
من التمست بيه بعده سلطان كلت بعناد
"ما ما طلعني منا 
كنت اجر بنفاسي والعبرات خانگتني ...اشوي اتقويت من شفته هادئ
"يلا افتحها ...ابسرعه ..
ضرب الكرسي بالارض حيل .. صدر دبة . وبنظرته الغاضبه أمرني اكعد ....كعدت واني مرتعده ومحاوطه  جسمي بأدية كأني احميه ....
راح جابلي عصير ومد ايده .. ضليت اباوع لأيده وللعصير بخوف .. هز ايده حيل وگعت قطرات على ملابسي .  اخذته منه ...
وهو وكف كدامي
" ما خليتي الي درب اجيچ منه ... ايام واني احترگ بناري لا ليلي ليل ولا نهاري نهار .. 
كل يوم
كل يوم
واشر على الشارع
كل يوم انتظر جيتج لهنا واكول بلكت اتمر والمحها
كل ما اتصل اتمنى بس اتفتحيه حتى بس اسمع صوتج ...
" م ما اريد .. اتواصل وياك
الله يخليك عوفني   
عدلت شالي وادموعي اتصب كأنها نهر
" لا اضلين هيج تتصرفين
نتر بيه خلاني اخنس وايدي تنزل عن شالي
" بس اسمعيني ... بالاول ليش انسجنت
" م ما اريد اسمع هاي هي حتى لو زور اني بعد بعد ما اريدك
اني نطقتها لو هو ضرب بأيده كاسات الايس كريم كانن محطوطات على شكل مثلث مسطرات فوق بعض اكسرن كلهن واني سديت اذني من صوت الحطام القوي ما اتوقف كسرهن كلهن شكو شي كدامه دفرة منطيني ضهره ويكسر بعدين راح لزوية كعد بيها على الارض ويباوع الي بقهر ...كان ثاني رجل وماد الاخرى وايده على فمه كاتم صرخاته واعيونه تلمع
" حقج تتخلين عني .... ولا چني هذا الي چنت اتكولين اله انت حب عمري .. حگچ اتعوفين واحد سوابق .  
هو اني منو نصفني .. حتى ربج غاضب عليه ..من صغري واني الدنيا تضرب بيه .. لا اب دام الي مات وعافني انيو اخت شابة حايرين بزمانه ....
امنا اااخ
عض اصبعه حسيته راح يقطعه ..كزبر جسمي ..

" اخذت حصتها بالورث وشمرتنا على خالنا ازوجت وهي مرة اشكبرها خلتنا ندولب منا ومنا ببيوت الخوال خدم ...  طالب بينا عمنا .. اخذنا
كان مدمع بس من يحكي يبتسم بطريقه ترعبني
"الأطفال  الى بعمري يرحون لمدارسهم واني واشوف اختي كدامي يتحرشون بيها .. !! افكر اشلون احرسها
طفل شابع كتل من مرت العم والعم ...يگلك راحتهم النفسية من يطلعون غضب دنيتهم عليه ...
كبرت واني الفيترجي و الكهوجي و البناء و السايق والخادم والحارس و المراسل عند عمي و ولده اشتغل
اااه علموني و خلو عودي قوي ...يمكن هذا احسن شي سوه الي من قسولي كلبي على روحي
بحيث عادي اذا اشيل ثكل الدنيا على ضهري واحمل الهم ..
عادي ما انام عادي ما اكل ..عادي اذا تأخرت بالليل  اكل صوندات و وايرات ....كلشي عادي ..
سكت شوية واني بعدني على نحيبي الصامت
مسح انفه ....وباوع الي بقهر
" خلصت عمري خادم جوة رجليه ..  اخذ اختي لأبنه جانت خدامه عدهم .. وهمه عايشين بخيرنا ..
بس كبرت ووعيت طالبت بحگي ..اشكال شفت منهم حتى حرك رادوا يحركوني  ..
لحد ما عمي بيوم ضحك بوجهي ....
تدرين ضليت اليوم بطولة اني فرحان ..وكل ما اشوف واحد من ربعي اشر واكوله تعال ولك
ولك تعال عمي اليوم ضحك بوجهي وگال الي انت مثل ابني ...تعالو اليوم عمي گلي بوية ... 

اهنا انفعلت كمت اهتز وابكي بحرقة
وهو هم يبكي بس يمسح دموعه ...

" طرت من فرحتي والله يا رهف ما همني لا ورث ولا افلوس من اصافه وياي هو ولده ...من شفتهم صاروا خواني بعد ما داعيتهم .... بس ردت سند وناس يحبوني ...
اااه
گام يبجي بصوت واني گدامه مربطه مابيدي اروح اربت على متنه بس حيل كسرني منظرة غمضت اعيوني  ...
حل السكوت
" سلطان كافي طلعني لا تأذيني تأخرت
اشويه جفت دموعه
وكأنه ما سمعني
" ضل عمي وياي يتعامل على الناعم لحد ما وهمني بمشروع مال اله وجود بيعنا اني واختي گاعنا الي تسوة ملاين اتعيشنا ملوووك اتعرفين يعني شنو ملوك حصت ابوية جانت اتخلينا انعيش احسن عيشه ....  عمي خسر افلوسه اولاده دخلوه بمشاريع فاشله ضل اله بس البيت الي كاعده بيه اختي الخرابه والي هسه هو كاعد بيه هم جان خرابه وعمره بفلوسي ..
ضليت اشهر واني موهوم عندي مشروع ...
اااااه اشكد اكرهم .. كلهم مكر وحقر .  حتى بناتهم وحده منهم تهمتني اني اتحرش بيه اهنا شفت وجه عمي الحقيقي  شبعني كتل هو ولده التمو عليه

كنت اسمعه وهو يحكي والقهر والغل بعيونه الجامده والحمرة ...

"كتل وصلت بيه للموت ..  وطردوني مثل الجلب الخايس بالشارع ....
خلف الله على سلوان لو ما هو اني ميت يم الزبل مشمور ... ما شكيت عليه ولا هان عليه عمي دمي ولحمي وتربيته انه ...
ههههه بس كلت اخذ افلوسي ومشروعي منهم .اغبى ولد يمكن اني ..كل ظني دا يبني الي المشروع ويصير عندي معرض سيارات ...من طالبته طردني ونكر ... نكر يا رهف نكر وطلعت اني بايع الارض وماخذ افلوسها ومضيعها ...شهرني واني ما ماخذ فلس بيدي ...حتى اختي ماصدكتني ...
حقها من تكرهني ...ضعت وضيعتها وياي وراح حگنا
شفت الذل بعينه وانه كل عمري 19 سنه .. شاب كلشي ما شايف من الدنيا ...
كرهت النسوان  من ورة مرت عمي وشره وشر بناتها وكرهت عمي وكرهت امي وكرهت نفسي من اشوف اختي اتحولت لوحده عايقه .  من الكتل والذل .ماعدها حل غير اتبوس ادين الحرامي زوجها الي ابوه باكنا حتى بس يبقيها على ذمته .

ديحني وظليت ادولب ببيوت الاصدقاء ..
ههه مرات استحي ادك بيبانهم بالليل ابات يم باب بيت عمي اتكوم وانام. يطلع الصبح عمي للصلاة يطرد بيه مثل الذبان ویهنشه ..اشوفه صار احوال هو ولده يصوم ويصلي ويزكي وسبحته بيده قال الله وقال الرسول ...صرت اكرهه لكن والله ما بيوم نويت أذيه  اشتغلت انواع الاشغال الي تخطر ببالج والي ما اتعرفيها .. بس ما فديوم مديت ايدي بكت لو جديت .. الناس اكلت وجه عمي الخير اشلون ابن اخوك عايفه بالشوارع انطاني مفاتيح بيته الي رحتي اله .. 
رحت كمت انام بيه وهو خالي من كلشي .  لا بيه اثاث ولا بيه احد ولا بيه ريحه والدة ... !  بس ريحه المنهولة علينه كابه ههه
هههههه ههههههه
صار سلطان يضحك بهستريه واني ابجي .. على روحي وعليه .
"كبرت على القهر استقريت على شغله العماله  وكل يوم اختي جايه زعلانه واني ارجعها لان البيت ما ينكعد بيه  . واعرف هي تتأذه عدهم بس اكول لازم جهالها يم ابوهم يتربون لا ينذلون مثلي .  صرت خلفه شاغول كمت الم الفلس على الفلس حتى بس ارمم البيت عاد من تجيني اختي اكدر المها
والله ما اعرف الدنيا اشبيها كد ما دفنت نفسي بالشغل وجان بس حلمي اهد البيت واعيد بنائه    .
رحت بيوم لعمي . واتوسلت بيه ودزيت عليه ناس حتى بس يتنازل عن البيت الي انطانيها .. ما قبل !
اتهدمت احلامي واحد من ربعي قنعني بالهجرة منا .
وصارت هي حلمي ..

رجع بچى مرة ثانيه قطعلي گلبي

"انطيته افلوس حتى يطلع فيزه وكال شكوا فلس عندك لازم اتحوله دولار صديقي وثقيت بيه ..تاليها طلع حاجز لنفسه وسافر واخذ تعب اسنين ..
مسح بطرف فانيلته دموعه
"صرت مضحك ياهو الي اليجي يبوگني ...
حتى عمالي يضحكون عليه حگهم الخلفه طلع زوج
بيوم چنت كاره الدنيا ومابيها لأن واحد من العمال باك السكلة الي طفحت القوت الا گدرت اجيبها واصير اسطى ..

سديت فمي بأيدي اااه يا سلطان هي الناس التلفانه لو انت الطيب زياده ليش الكل جاي عليك

كمل حديثه
" اجتني اختي معدومه العافيه كاتليها كتله معدله ملتمين عليها مثل ما التموا عليه ..
واني مناك مبيوك والدنيا ضايگة بيه ركضت الهم حافي .. دخلت وما عرفت اشلون كدرت اكتلهم بحركه . ماخذ وياي حديده كسرت بيها رجل اختي  ..
وعفته وانهزمت للنجف يم ابوي ..
ضليت اهناك ضايع ..
باحد السيطرات قبضوا عليه بتهمة السرقه والاعتداء على اصحاب البيت .
وانذبيت سجن ...
باوعلي بعيون مكسورة
" اني مابگت . وهمه الي باگوني .. اني بس غبي
تحاسبني الشرطه .. واتريدني اطلع افلوس اصلا ما ماخذها ..
وشمروا اختي بالشوارع واخذوا جهالها اجتني للسجن ادعي عليه ..
كرهتها وكرهت الدنيا .. 
طلعت من السجن بعد ماگدروا يثبتون تهمه السرقه ..
بس ضليت اهناک مشمور سنه ..
خلف الله على سلوان وابوه وكفولي وطلعولي محامي ومخلين شيخ عشريتنا يكلم عمي .  وعمي اللوگي مال الشيخ .. اتنازل عن القضايا . بس بعديش
طلعت مكسور وحال الضيم حالي ..لكيت اختي شامريها بالبيت الخرابه هي وجهاله تشتغل وتصرف على نفسها طردتني كالت انت ضيعتني ..
حگها عمي من ورايه راح ورثها ومن ورة احلامي ..
محد يقبل يطلعني للشغل ما خليت مكان ما رحتله ..
هه حتى زبال اشتغلت تدرين
رمشت بعيني بعدم تصديق .
" لا تعوفيني
" انت انت يعني يعني من صدگك تحجي
" اي يبعد بيتي ... بس ما ضليت ضايع لميت نفسي واجرت هذا المحل ..حتى بس المح طيفج .. واشتغلت ويه سلوان وربعي والف شغله اطلع اشتغل بيها حتى بس اضل اكدر اصرف على هذا المحل ...رهفتي انتي حلمي ...
مسحت دموعي وكمت

"اريد اطلع سلطان صار الليل لك شكول لهلي
'بس ...هذا
والي گلته الج شنو .  شنو
"اريد اطلع ..
كام من مكانه مسرع خفت رجعت للخلف هو فتح المحل وضل يباوع يمنه ويسره
رجع الي جان ضوة المحل مطفي
' الناس رايحه وجايه روحي اهنا اختلي يم المغسله واني اراقب الشارع لحد مااشوف فرصه واطلعج
رحت ولطمت على وجهي شنو من موقف اني بيه 
اشويه واشرلي .. طلعت من المحل واني بيدي علاگه موطه هو حطها بأيدي .. طلعت مسرعه ما اباوع غير على الارض ..هي لاصت عليه .. ادموعي اصب عشره عشرة وصلت للبيت ميته بجي دخلت من ممر المطبخ وجان اشوف تهاني تقلي العشا
" وين جنتي ابوج طلع يدور عليج وفرات هم 
باوعت لأيدي اخذت العلاكه شافت بيها موطه
" هاي شنو
بس لا يمه ؟؟؟
" الحكيني نهى حموت حموت
"ولج اشبيج
جنت مخنوكه من البكاء مكدر اتنفس
اخذتني للمغسله ذبت على وجهي مي وسمت ..
رحت لغرفتي وهي خلفي
فتحت المروحه اشوية كدرت اخذ نفسي .. نمت على وجهي وابكي
طلبت من نهى تتركني وحدي ..
ما اعرف سبب نوبة البكاء من الظلم الي اتعرض اله سلطان لو لأن طلعت سالفته عصيبه لو على الموقف الي اتعرضت اله والله الي يعلم منو شافني من طلعت من المحل ..

دخل عليه بابا ..
كمت من الفراش ..
" وين كنتي ؟؟؟؟؟؟
كنت بس اجر العبرات و امسح بالدموع اريد بس ارتكز حتى اكدر اجاوب
صاح
" وين كنتي ولييش هيج حالج
شصار
اهنا اجه فرات دخل وكف يمي
نتر
" وين جنتي
انشل لساني واني اشوف بعيونهم الاتهام ودخلت دعاء
" ليش تأخرتي
فرات " انتي بعدين حسابج
"والله بس كلت الها اجيب رامي وهو رجع وهي ماكوا لليل
عصب كلش فرات وبابا هم وصارت عليه هالة الشك كبيرة
واني ماعندي جواب حاضر  غير البكاء .
اجت نهى
" اشبيكم اصيحون .. هاي فوك ما اجيب ابنك من الشوارع
باوعت نهى لفرات
هو هدأ كلش يحترمها ...
"البنية متخربطه وواكعه بالشارع هي تعبانه ما تاكل والهبوط ملازمها
اني كعدت على السرير مهدود حيلي بين ما نهى تتكلم .. فرات كعد يمي ورفع وجهي مسحه
"اشبيج وين وكعتي ...
كالها بخوف وقلق
والدي هم قلق واتحولت نظرات الاتهام الى دعاء لانها رسلتني اني بس ابكي
" رجعت  انهارت من الفشله ...
ما اشوفون وجها اصفر خطيه
كول لمرتك بعد لا تتوسل الها خطيه طلعت وهي متخربطه اني شفتها
زفر نفسه فرات بحرقه ..
"اخذج للطبيب بدلي ملابسج
نهى"لا ما يحتاج  تربكها ..خل تغير وترتاح وتتعشى واتنام احسن
طلعت دعاء وفرات خلفها اعتقد راح اتصير بينهم خلافات بسبب كلام نهى ..طلعت تضحك احسها اشمتت بالمرة ...اني اشوية هديت ..
كنت ابعد بالشال عن رقبتي ..حسيت ايد بابا ساعدتني وبعدته ...ما انتبهت لوجوده عبالي طلع ..
"ما عاجبتني ابد ..
سكتت ما جاوبت ...
صابتني رعبة ... ورجعت للاكتئاب  الشديد لا اكدر اكل ولا اشرب بس اتحلم بسلطان من نايمه ..ومن كاعده بس اتذكره من يبجي ..

واهلي حايرين بيه ...كنت استغرب ضعفي ...
حسيت بعد الي صارلي اني فعلا عشقت سلطان عشق مو حب واهم ...مثل سيف كدرت بسهولة اطلعه ...لا هذا ساكن خيالي وأحلامي  ...صوته يرن بأذني صورته مرسومه بعيوني ...
عانيت كنت مثل الي روحه دتطلع على كيف ويصارع الموت وما محصلة ... ايامي كلها سواد بسواد ..
بابا حتى شيخ جابلي يقرأ الي خواتي اجن يمنا يقضن اسبوع يمي عسى ولعل اصحى من حالتي  دوامي اخذولي اجازة .. 
ولمه العيلة وعطائهم  وحبهم كدرت اشوية اتحسن على الاقل اتكلم كلمتين ... محد كان فاهم حالتي غير نهى ...
مرت فترة ... والدي فاجئني انه طالب اجازة هو الاخر وحجز لأربيل انروح اني وياه فقط ...
رحنا اهنا كم يوم غيرت نفسيتي وحضرنا اهناك حفلات رقص الدبكات الكوردية وغيرت جو اشويه
ارادتي قوت و عزيمتها كلها شغلتها حتى بس ارجع لحياتي لخاطر بابا .
قضينا  اسبوع . ورجعنا  لديارنا .. من السيارة دخلت للفرع شفت محل سلطان مغلق  .. نزلت دمعتي عليه ..
ايام واني اعيد بحسابتي واصفي اموري ..
الحل لمشكلتي هو واحد و واضح كان لكن جدا صعب .. رجعت  اداوم ..
لكن جسد بلا روح ...
اتعمد اجنب المرور من جانب محلة ...
...
نزلت من الكية امام الجامعه ... كنت متعاجزة امشي لان القسم مسافه .  شايله جنطه صغيره بحجم الجزدلان و دفتر وكتاب صغير ..
جمدت اطرافي من شفت سلطان واكف ويباوع الي ..
سلطان ...حفظته وجها  على قلب ... هاي نظراته ادل انه على اخره اعصابه تلفانه ...
لازم ادارك الموقف اذا ادخل واجاهله الله اليعلم شنو يعمل ..
اتقدمت نحوه .
'شجابك لهنا تعال ع صفحه نحكي
مشى خلفي .. وكفنا خلف سيارة عاليه واكفه
" شكوا سلطان ...اشلون تجيني لهنا
بس يباوع الي
"سلطان الله يخليك روح ...
"هاي شنو لابسه
بعدين كولي الي شنو فايده هاي الوصله على راسج وانتي تنورتج هاي
اشر على تنورتي كانت ميدي  ..
وجواريب سود شفافه تغطي ساقي
صكيت على اسناني
"سلطان ...روح
" والله ما اروح ... وباجر راح ادز ام سلوان تخطبج
" شنوو
هسة مو وقته روح اخابرك ...و نتفاهم
ردت اروح
"خوش بس افتحي الحضر ..
" اي اي روح
عفته ودخلت ...واني كلبي جمرة وتسعر بيه
بالليل كعدت فتحت الحضر ورة ربع ساعه جهازي ما سكت من الرسائل
" ام بيتي واخيرا

" ما عليه راح اطلب ايديج .. رهف ردي عليه موافقه

"اكلج  صدك هاي بعدني ما عفتج وهيج رجعتي لعادتج والله اذا باجر لمحتج لابسه مثل اليوم الا احرك بيتكم وملابسج يروحن عطاب فاهمه ..
اخر رسالة ضحكتني بآلم ذكرتني بأيامنا سوة

"اااااااااااااااااه
ضليت اجر حسراتي ...
حسيت نفسي راح ارجع لدوامتي واضعف سكتت نفسي وطلعت اغسل ما اريد ارجع اسيرة الاكتئاب مرة ثانية
دكيت عليه واني اجمع بقواي ...

رد عليه
" هلا بالغاليه ...
والله توها ردت الي عافيتي
تدرين عبالي راح اتعوفيني
بس الله اضاهر عوضني بيج
اني ادموعي صبت .. وحطيت ايدي اكتم الشهقات
" تدرين والله اكدر اجر الج بيت . بس مو يمكم غالي دورت بمطنقه انسب .. والله راح احطج بعيوني بس كون اهلج ينطوج
البارحه كله ندور اني و سلوان لكيت مشتمل مرتب والله وصاحبه ابن اوادم ...
فرحة كلبي وينج ما اسمع الج حس
" س سلطان ما يصير
بالكوة كلتها
"ليش تبجين ... لا لا تكوليها كلشي يصير
" لا والله ما اكدر
"والله العظيم لو اعرف اجديج من اهلج وابوس رجل ابوج هم اسويها بس حتى اضوين حياتي
رهفتي الو
الو
بس صوت بكاي يوصل اله واعرف كلبه دا يتقطع بس اني ما اكدر ما اكدر
" مو اهلي
مو اهلي
مو اهلي
اني  اني ما اكدر
"شنو ....؟
الو
" ما اكدر ازوج واحد عنده ماضي .. ما اكدر احط والدي بهذا الموقف ...
ما اكدر سلطان صعبة
بحة صوته رنت بطبلة اذني
"لا لا ...زين راح اعوفج فترة تهدأين مراح الح ...
راح تتقبلين ادري والله
"لا
مسحت دموعي
"لا ما اتقبلك اعذرني سلطان هاي نهايتي وياك ما اكدر اكمل ...
"لا لا تتقبليني ادري
اخذت نفسي وزفرته
"لا ما اكدر
"لا هسة انتي منفعلة
"لا سلطان لا تتأمل ما اكدر

"اكدرررررررررين
صيحته فزعتني و سطرتني سطر من صاح بحركه
"اكدرين انتي كلتي الي ما اعوفك ابد
انتي وعدتيني انتي كلتيها ...اي كلتيها
" م م ماكنت اعرفك سلطان انت كذبت عليه
اهلي والله ما يقبلون
"ما عليج اني احلها
" لا ماتكدر ولا راح تكدر اضل يمهم دهر ولا ينطوني الك ... هاي اخر مكالمه بينا ...سلطان والله اني اني
بكيت مكدرت بعد خانتني دموعي
بس مع هذا كملتها وكولت اله احبك وسط بكائي ما ادري فهمها لو كانت غير مفهومه ..
سديت الخط .. وانفجرت على مخدتي ... راسي على وشك الانفجار ..

....
اني رهف عيسى بنت المدير العام ....
تربيت على الحياة المتيسرة ... الي اريده مباح الي بأي وقت ..مسافرة خارج العراق مرتين سياحه مع والدي واخواتي ..  دائما اوصي ملابس من الخارج .
ما اكول فاحشة الثراء اني بس حالي متوسط .
نصف راتب بابا يصرفه عليه ...  عايشه ملكة زماني
بين الاهل ...عائلتنا من حسب ونسب طيب وكريم
ماكوا واحد عدنا داخل مخفر شرطة ..تاريخنا ابيض
مثل الثلج ... ما توقعت بيوم احب شخص من غير بيئة ومن غير مذهب وضروفة جدا متعففة
اني ادري بنفسي مستحيل اتحملها ...
ما اكدر لا اعيش الفقر وياه ولا اكدر اواجه اهلي بهيج حب الا اخسرهم والى الابد ... حبي الهم ولعيشتي كان اقوى من حبي لسلطان .. لازم الانسان يحكم عقله   لأن اذا تركها على هواها راح يخسر الاول والتالي ...
سامحني سلطان ما اكدر اظلم نفسي وياك حبنا شبه مستحيل يتحقق اني كنت واعية انت حالتك مو مثل وضعنا لكن عمري ما توقعت اتكون حياتك قاسيه لهاي الدرجة ...
كنت دوم اقنع نفسي بهذي العبارات حتى بس اداوم على رأيي ....
وهو ضل دوم يتردد عليه بالكلية واصده .. وقلبي يتحطم عليه .لكن بلا جدوى كان صابر عليه وما يقتنع ابد الكلام طالع من قلبي ..
...
بيوم اجتني نهى متخبلة اني كنت توني جايه من الدوام
" ولج رهف رجعت اله
"ها شنو
"شنو شنو اليوم اجتي ام عابد وياها مرة اسمها ام سلوان يردن يخطبنج اله
وكعت من ايدي  تعلاكه الملابس .

واهتزت دكات كلبي هذا سلطان ولا يمل او ييأس
"وشنو كلتوا الهم
"رفضت وطردت المرة كولت الها نعرف ماضي الولد ترة كان مسجون نعرفه من الولد مرة جابوا سيرته اعذرينا وسديت السالفه ....
روحي انهضمت عليه اكثر من ما ضجت على نفسي حبيبي هسة اكيد حال الضيم حاله
يااارب انطيني القوة
بالليل وصلتني رساله منه
"ما راح اكطع الامل وراح اجي بنفسي احجي ويه ابوج ..
رجفت خوف اعرفه يسويها كعدت طول الليل افكر اشلون اصده ...ما اريد اعرضه لهيج موقف اريده يقطع الامل ...اني خلاص ما اريده ...كيف اقنعه ياربي ...
صار الفجر ... صليت وبكيت وطلبت من الله يغفرلي على الي نويت اسويه ...
من خلصت صلاة .. دكيت عليه وكانه ينتظرني ...
" رهفتي
"اولا اني مو رهفتك
ثانيا اشلون دز نسوان من غير علمي
"غير رايدج
"بس اني هاهي ما اريدك بعد ...
سلطان حس مو على مود اهلي دا ارفض اني ما اكدر
اخذك ... عبالي احوالك غير وعندك ورث هسة شنو اتورث جهالج اذا ازوجنا ...السمعه ..
سكت هو كان متفاجأ من لهجتي الي اني نفسي ما اعرف اشلون طاوعت روحي واجيت عليها حتى بس اقنعه الرفض مني
"شوف سلطان لا تتصل ولا تجيني واقطع الامل اني ما اريدك ...بعد ما عرفت حقيقتك الحب الي بلكبي راح
بصوت مبحوح
"ايه كملي
" هاي هي يا اخي طلعني من كلبك هي مو كوة تفهم انت لو لا مو الكاك اليوم يم باب الجامعه رجائا افهم اني ما اريدك ...افهم
" ليش بالله
ليش
ليش راح اضيعيني
" كافي سلطان ...انت تدري اني اشكد اصرف بالشهر ..زين تدري بابا شنو منصبه واشلون حساس ما كدر يناسبك ... اعذرني على كلامي بس بيني وبينك بحر صار ...
انساني اني مو الك والله يوفقك ويه وحده تليق بيك
"يعني اتخليتي عني
" الله يوفقك ويه غيري
" الله لا يوفقج ولا اشوفج لغيري
اوكفي لا اسديه
والله لأعبر البحر والله  لأشوفج منو سلطان والله لأخذ حكي منكم كلكم
"لا تهدد ...رجائا اني معليه بيك بعد
" والله لأشوفج سلطان شنو يكدر يسوي
احسه بكى
" والله لاندمكم كلكم ...
بس بسيطة
بسيطة
سدة وراح واخذ فرحتي وحيلي كله وياه ..شمرت التلفون ووكفت كدام المرايه وضربت وجهي كفوف مو كف
"ولج اشلون كدرتي هيج اسوين بيه ..ضليت اضرب بروحي وابكي على ضيمي ....
ومر يوم ويومين واني كل ما انزل من الخط اباوع بلكت اشوفه كدامي واكف ....ااااه يا حب العمر الراح
مر شهر واني خاوية بلا روح ...
اتعمدت بيوم نزلت كدام محلة واهنا خلصت روحي من شفت المحل معروض للأجار
صدك سواها هالمرة وعافني من صدك .....

...
يتبع
مساء الفل ....
ياريت دعم للقصة
تصويت من كل شخص قرأ
وتعليق على الاحداث
تحياتي  ل
linaomar111
zainabJkj
Alio121212
دائما يحفزوني  على الكتابة من خلال انفاعلهم مع الاحداث
اما الي اتكول كملي وليش اتأخرتي هاي ما تنطي غير الاحباط
بخصوص النشر بين يوم ويوم لأن النظر لشاشة الهاتف مضر لصحة العين لهذا أتأخر ارجو ترك كلمة ليش تتأخرين ..