رواية سلطان زمانه الفصل العشرون 20 - بقلم زهراء العراقيه

من كتابات زهراء العراقية
شفت سلطان عصب ... وطلع تلفونه ...وكف بوسط الهول يصيح بالمخابرة على علاء
"ولك انت ازلمه اشلون عايف خواتك ... يا عار تعال للبيت
سده وصاح بينا لأن واكفات جامدات
" عزلن البيت
طلع واني خلفه
"سلطان شنو راح اسوي
" اربي الي داس عتبة بيتي بغيابي
انذعرت
"لا الله يخليك لا اسوي شي وانت معصب

" روحي ادخلي
اشرلي وصعد بالسيارة وراح واني قلبي وكلني عليه
سلطان وعصب ....

كترنا البيت واجانه علاء خواته سولفن اله الي صار ..اشو هذا هم عصب وطلع بقى بس محمد ما طلع .......
نص الليل رجع سلطان واني كنت كاعده بسجادتي ادعي وانتظرة بقلة حيله ....
كمت اله
" سلطان حبيبي شنو سويت
حط مفاتيحه على الميز ونزع حذائه وانطرح على السرير .....
" شصار
"كلشي ما صار لا اشغلين بالج ..
وكفت اباوع لعيونه بقلق
" رهوفه .... ادعيلي ارتاح تعبت
"الله يريح بالك سلطان ..
لميت السجاده وجلست جنبه
" غيري الي ملابسي مابيه حيل
نزعته جواريبه ......
وجلست جنبه دا افتح بأزرار القميص
كانت اجفونه تلمع كانها مدهونه بزيت ... ومغمضها
" مو البنطرون اولى بالاول !
ابتسم وفتح اعيونه
عضيت شفتي ما اريد اضحك واني قلقانه ...
"سلطان شنو سويت من طلعت من البيت
هااا
جاوبني
اهنا فتحت القميص وثنيت ايده حتى اخلعه الردن
سحبني وطرحني وصار هو فوقي
" انت كولي الي اشلون اتنامين من دوني ام خشم
ولعب بأرنبة انفي
درت وجهي عن وجه
رجعه هو
"باوعي الي اشلون اعيونج تغفى بدوني
وبدا يتلمس بأطراف اصابيعه جفوني
" فتح ذراعي وحط راسه عليه وغمر نفسه بجسدي
"نعسااان ماانايم من يوم ما رحتي !!
بس كمل الكلمتين وغمض حسيته غفى !
رغم انه احنه نايمين بالعرض لكني ما صحيته ونمت وهو بين احضاني ....
كعدت الصبح على قبلاته المتناثرة عليه ..
.
ابد محد جاب طاري عايد واني بس أسال سلطان يغير السالفه ..
العصرية جنت انضف بالمطبخ ..سمعت صوت الباب .. رغده راحت تفتحها ..
اجت امي اجت امي
صارت ربكه بالبيت ... نفضت اديه ورحت للهول .. شفت سلطانه وبناتها يحضنن بيها ..خلفها واكفه مرة كبيرة منتكئة على عكازة ...
غاده " يمه همزيت اجيتي

ضلن يسولفن الها وما يلحگن دوخنها ما افتهمت شي كل وحده اسولف الها شنو صار بطريقتها وعن تهجم ابوهن عليهن ...
"اشلونج ام علاء
ما ردت يمكن ما سمعت من اصوات بناتها .
نزل سلطان ....
ضل يخزرهن بنظراته خوفتني
عبالي هو اذن الها مبين ما يدري اصلا
"اشعدج جايه ...
سلطانه
خوية وين اولي غير اجي يم جهالي
ضل صافن على المرة

"اشعدج جاية
"اشلونك يمه
ضل يشمر بأديه
"مو زين يلا اخذي بتج وبرة ....
"يمه هذا بيتها
"دطلعي برة برة
انتي وياها ما اشوف وجهكم
سلطانه وهي تترجاه
"خوية هاي امك ما يصير هيج تطردها
" ولي انت وياها وما اريد اشوف وجهكم ..
سلطانه " الله يخليك
ام سلطان ..
'يمه اني رايحه ...بس خل اختك ترجع لجهالها لا تمرد كلبها عليهم
اتقرب من امه واعيونه تلمع حقد انحنى عليه ..
"هااا وليش ما انمرد كلبج انت ؟؟؟ مو وكفت واني عمري 13 سنه اكبال بيتج ابجي تأخذيني ...ليش ما انمرد هااااااااااا
لكت قربه فرصه هي فحضنت خدوده بكفوفها
" غلطت يا يمه ... غلطت
والله اني هم شفت المر بغيابكم ..خالكم جبرني ازوج بمعاملته الي هو ومرته يكلك زنيت من اترملت متت من الذل ...
محد يقبل بيكم وياي يا يمة . كلت ترحون يم عمكم احسن الكم .... والله يا يمة عشت بحسرتي عليكم ..
" ليش ما لمتينا ... ليش ما وكفتي بوجهم
كان صوته مثل أنين الطير المذبوح ضعيف واعيونه لمعتهن اتحولت دموع ...لكنها من بلت تحت اعيونه صحته ..ابعد اكفوفها عنه بقوة ورجع للخلف يشمر بأيده امامها ويصيح
" ما اريد اعذارج ولا اريد اشوفج ...
اشر على سلطانه
"هاي اتريدج اخذيها واطلعي ....
"يمه خل اختك
"شفتي ....ما اتريدج ذبتج مرة ثانيه وانت خابصه نفسج بيها ... حسيت وجه المرة صار اصفر . سعلت .. وضلت تسعل اختنكت اني كنت ماخذه وضعية المتفرج ...فزيت من مكاني ورحت الها .. كعدتها ... وهفيت الها بأيدي وسلطانه هم اجت يمها تبكي واصيح يمه اشبيج
واولاد سلطانه هم بس سلطان خله وطلع ..
"خاله اشبيج ...فتحت حجبها فركت اكفوفها . بدت تهدأ ...
" يمة اشلونج هسه
كالت زينه بثقل .. اشرت لبتها اتكومها .. طلعن من البيت واطفال سلطانه يبجون عليها ....
بعد ما طلعن رجع سلطان للبيت ..
صعدت خلفه
" وين رايح ...تعال ليش هيج سويت
"ما عليج ...
"شنو ما عليه .. امك هاي ترة
جاوبني بعصبية
"اااش لا اتكولين امي
" سلطان ... عوفك منها..... اختك ... شنو ذنب اطفالها هااا

لبس ساعته بغضب وراد يطلع
"ترة انت دا اسوي بيهم مثل ما سوة خالك ؟
يتمتهم وامهم عايشه
وكف بمكانه رحت كدامه
" لا تعود گلبك على القسوة سلطان لا تخلي الدنيا تلعب بيك ... ذولة مالهم ذنب اذا ماتكدر اترجع امك على الاقل رجع الهم امهم ...ما لك حق تخلي سلطانه تاخذ نفس موقفك ما اتريد امك هذا شي يخصك اذا ماكدرت اتسامح ...
ضل يسحب بأنفاسه وجلس كأنه بدأ يفكر
"عيد حساباتك حبيبي
جلست جنبة
"لا تخليني اخاف منك .... لا تخلي الحقد يقسيك
خابرها حبي خليها ترجع

سكت

ها شكلت ...
اخابرها اني
ها سلطان رد عليه حبيبي ...

زفرت نفسي كانه يفكر بكلامي اذا اتركه اخاف الحقد يرجع اله وينسيه كلشي

زين سلطان شكلت.

"تعبان الف فكرة براسي .. والف مصيبه قايمه عليه

" لو اتگولهن الي نلگى الهن حل بس انت مصر تبتعد عني
زين هسه عوفك من مشاكلك وخل نرجع المرة لبيتها
" تعباان ما ادري ...
كمت جلست على حجرة ...ضليت ادلك جبينه ... هو ارتاح وغمض ... دلكت راسه ..نزلت على اموتنه خليته يسترخي ...اكو حركة اكرها اني بس ادري بيه هو يحبها .. نزلت جوة رجليه جلست ولزمت قدمه دلكتها اله ..
هو حط كوع اديه على السرير ورجع راسه للخلف مسترخي
واني ادلك احسه فعلا سلطان ... واني جارية عنده اكره هذي الحركه لأنه حيل يحبها !!
"راح اخابرها تلم ملابسها وترجع .
ما انطاني جواب
توقفت
"اوك على راحتك خل الحقد يتحول لأولاد اختك عليك
حطيت رجله على الارض بزعل
رجع حطها بحجري
"خابريها
"والله ...صدوووك
سكت
"سلطان
اكول الها ترجع ؟!!!
"اي اي بس كملي ..
ابتسمت واخيرا كدرت عاد عليه هذا الي متعبني
.........................
اتصلت بسلطانه ما ردت عليه ... نزلت لجوة
"غادة ....غاده
اجاني صوتها من المطبخ
"ها خاله
"تعاي حبيبتي
هااا
" خابري امج كولي الها خل اجيب كل ملابسها وتجي واذا اتريد دزي الها محمد يجيبها
"شنوو
ضحكت
"قنعت خالج
شمرت نفسها عليه حضنتني وتضحك وصاحت لكل البيت وخبرتهم ....
..
رجعت سلطانه للبيت ...،
كانت بالغرفه اتحط بملابسها وبناتها حولها
'الله يساعدك ام علاء ...اشلونج
جاوبتني وهي اتسفط ملابسها
" الحمدلله على كل حال
" اظنج بعدج ماخذه بخاطرج مني؟؟؟
التفتت عليه
" لا ابد ... هم رحم الله والديج من قنعتيه

رجعت للكنتور ...
"حلوات ملابس البنات ...
"ها اي شريناهم من المول
"زين والله جهالي لبسوا هيج لبس كضوا عمرهم كله باله
" بعد اليوم انشالله اتكون حياتهم افضل ...انت بس ديري بالج عليهم واني هم راح احسن مستواهم الدراسي

جلست جنبي على المدة او الزولية .
"كالت الي غاده اتعبين وياهم بالتدريس ...صدك انت معلمه مو ؟
"اي مدرسة ...
" اني بطلوني من وكت ما اعرف اقري ..
مرت عمي اتكول شسوين بالدراسة ..
اخذوني للخدمه من اول ما شبيت ... ياهو الي يجي يصكع بيه
اختنكت بحزني اكره قصص التعنيف
" جان سلطان طفل .. ويدافع الي ويشبع كتل ..
كملت وهي تتأمل الماضي المحزن
من يجي عمي من الشغل تتلكاه بناته .. بس انه اخذاي زويه اخاف اتقرب ومرته اتفشلني ...ما يوم احد سأل عنا.....
"ما كان لازم امكم تعوفكم هي عدها ورث رجلها جانت تكدر تطالب بيه وتوكف بوجهم
" ما تكدر يا خيتي ... اهلها نحسين دمورها اني اذكر اشلون جانت تشبع كتل اذا مرت خالي شكت عليها زور
حابسيها ...اتقدم الها واحد وافقوا عليه وهي عبالها تكدر تقنعه وتاخذنا بس ما قبل وخافت ترجع للذل مرة ثانيه واحنه بعدها اخذنا عمي وصار وصي علينا ...
اني هم حقدت عليها بوقتها .. بس هسه من شفت العيشة اشلون وفهمت المرة اشلون تنذل اذا ماعدها رجال عذرتها ....اوووف بس سلطان ابد مراح يعذرها

"الله يعوضكم خير وهاي نعم الله عليكم بعيشه بعيده عنهم

"اههه بعديش عمري خلص حسرات اعيوني راحت من المكينه .. اديه كلها اجزمه .. لو السكر الي عندي .
دسكتي خية اسكتي كضيت عمري المع واكرب ببيتهم شحصلت جاب براسي مرة وطردني هالعايد
دمرنا وسجن اخوي ..بس شنو اترجه من واحد ماعنده محنه على جهاله
"فعلا اني هم محتارة وين اكو اب هيج
"اكو وادعتج ... اكو هذا علاء شبع كتل منه حتى يكره كره اعمى صار
ما اشوفين ولدي يحبون خالهم اكثر .. احتى عبودي يصيح لخاله بابا .. خليها بالكلب تجرح ولا تطلع لبرة تفضح
طلعت دموعي وما عرفت اواسيها .. الي عاشته مو قليل اثاري سلطانه ميته من زمان والنفس الي تأخذه تقضيه حسرات
ما عاد اي شي يريحها بعد لا افلوس ولا بيت !!!

رجعت معاناتي صرت انضف اني وبناتها خلفها وخلف ولدها الفوضويين لكن ماعدت اذمر ولا احس بسخط اتجاها . بناتها صارن صديقاتي منعت النت عن البيت من لمحت رائد ابنها يباوع لأشياء معيبه وخليتهم كلهم يعترضون وعلاء عاتبني ليش ؟ فسولفت اله كرجل وهو تفهم لا وبعد نفش ريشاته من كتله راقبهم انت وتابعهم ....
كنت احضر بالاكل ويه البنات ...وديناها على الميز بالصاله انتبهت لسطانه واكفه وصافنه على الميز
" ما اكعدين ام علاء
"بالله هاي اشلون اثرد اهنا
"ههههههه دكوعدي
كعدت وهي ما مقتنعه اجه سلطان وتوسط الميز ..
وكلهم ياكلون ويبتسمون ممتعودين على الاكل على الميز

ام علاء"بالله ما ادري ليش احس نفسي بمطعم
"هههههههه
سلطان " اخر مرة اخذتج . عباتج صارت جوة الكرسي وفشلتيني
"هههههه اي والله خوية انه ويني وين المطاعم ما ينطلع بيه افشل
جاوبتها اني
"خوش لعد حتتعودين
انتبهت لسلطان صفن عليه ومبتسم
معرفت اكل ضحكت
"اشبيك
اني كنت جالسه جنبه على اليسار

" من خطبتج وكعدتي كبالي ...تدرين شلت هم كلت هاي النازكه اشلون راح اجيبها يم ذوله الحبربشية
ام علاء" والله اني هم كلت هاي يومين ويشردها علاء بريحه جواريبه ههههههههههههه
علاء"جا اني شعليه
ضحكت عليهم وخلصنا الاكل بالضحك .
طبعا اني شرطت على علاء وخاله يجون على الغده كل يوم و يرتاحون العصر الا يطلعون للعمل ..
ما اكول اني مرتاحه والعناء راح لا ابد ابو طبع ما يغير طبعه الولد جدا فوضوية وامهم ما اتابع بس عاد كامت تخجل من اشوفني اتعب على اطفالها و شالت نفسها من ناحية النظافة وبناتها وردة حتى مستواهم بالدراسه صعد بس غاده كانت مو طالبة
...
حضرة جانب السلطان جاب النا بانيو بعد توسلات مني واول ما نصبة طلب مني اترسه اله ماي واكعد اني اسبحه علكت روبه الحرير الاسود مع بجامته و حطيت بيه شامبو برغوة كثيفه
دخلت عليه لكيته يدخن
"حضرة جناب السلطان تعال
كام واخذني وياه هالمتعب ..
بالليل ايدي تعبت من راسه نزلته بخفه ... ونطيته ضهري وغفيت تعبانه ..
سمعت صوته بكلام غير مفهوم .. صحى بالقوة يجر النفس
"سلطان
'اااااخ ليش عفتيني .. سحب ايدي غصب
"لج بس اعوفج اكوبس !!!
نام وكسرلي ايدي ... اااه لو بس اعرف شنو من كوابيس هاي بس اعوفه تجيه

الصبح ..
رحت اصيحه للريوك اشو تأخر ومانزل
الباب مفتوح ...
سمعته يكول
"هسه المهم هي زينه مالي خلك بعد يصير بيها شي هاي البنية انظلمت من ورايه اهواي
اكلك صلاح راقبلي حركات عايد اخاف هو الي مأذيها والله لأنسيه حليب امه
ها
يعني متأكد حوراء هي كالت هيج
خوش
هو اني شريد غير هي اتكون بخير والله ما تستاهل غير العافية سلم الي عليها
وكول الها اول ما اصير لسلطان فرصه يجي يشوفها بس يصفي اموره ..
خوش حبيبي
مع السلامه
اني واكفه يم الباب خدرانه رجليه حتى ما طلعت حس
كنت اريد اعرف شنو ضام عني ...لكني بهاي اللحظة تمنيت لو ما سامعه شي ..
هو كان منطيني ضهرة . التفت صرت بوجه بالمرايه مال الميز
باوعلي بقلق
"ها رهف ؟؟؟
اشبيج
بلعت ريقي
نظراته خوفتني كأنه بدا يعصب
"ما بيه ما بيه اني . توني اجيت ..تعال اتريك
نزلت وعفته والدموع اتغلغلت بعيوني ما مكتوب الي راحه البال بعد ما نسيتها وطلعتها من بالي رجعت الي حوراء وبقوة ..
حس هو بتغيري وما كولت اله السبب اريد اكتشف سرة بنفسي لأن هو ابد ما يكول شي اذا اواجه يتهرب مني وتتحول حياتي جحيم .. خل أتأنى وما اسرع بعد ابد ....
مرات اكول اخاف حوراء زوجته الثانية وعايد دا يحاربه بيها بس اصفن الها مرته اشوكت يروح الها هليام اني مخليته ما يطلع بس بأوقات العمل . حرت بيك يا سلطان ....
كنت مسطحه ودمعتي بعيني العصرية كلشي ماعندي
غير الافكار الشؤم براسي
"رهوفه
استغربت جيته هيج وقت مسحت دموعي والتفتت عليه
"اشعجب جاي هسة
" رهفتي اشبيج هاليام ضايجه ..
"مابيه ..!
"زين كومي غيري دنطلع

"نطلع!!!
غيرت ملابسي من غير نفس ما حطيت ميك آب مابيه حيل .. طلعت وياه واني اباوع للطريق وبالي مو يمه ... افكر بتاليها وياها شنو لوين راح نوصل سوة وهاي الي اسمها حوراء ضاله غصة بكلبي ...
نزلت امام معرض للسيارات .....

" هذا مكان شغلك
حط ايدة على متني
"اي رهفتي
'غريب اول مرة اجيبني لهنا
"دتعاي ...
اخذني ودخلنا . مكان احد بيه غير علاء ..
"ماعندك احد يشتغل اهنا
"لا اني وعلاء وسلوان .. وولد يجي ينظف ويروح

رهفتي هاي كلها السيارات حديثة اي وحده برأيج حلوة ...

"مممم اشمدريني اني ما اعرف أمتيازات السيارات
لكن من حيث الشكل طبعا اميل لليكون شكلها نسائي

مشيت اشوية عجبتني سيارة لونها اسود مثل ظلام الليل وكبيرة . راحت ببالي فكرة اذا صار عندي اكثر من طفل احطهم خلفي واسوق ... جريت حسراتي .. واني اتلمسها
" ها رهفتي شكلها عجبتج
"مو هاي الي اسمها مونكا ؟
"اي .. عجبتج
"اي
دتعاي
علاء جيب مفاتيحها
"امرك خالي ...
فتح الباب الي
"اصعدي
"هااا وين ؟؟
"دصعدي
كعدت وهو اجه ابصفي
مممم فخمه من داخل
" تستاهليها يعمري ....
اخذ كفي وقبله
بينما اني ممستوعبة شي
" شنو ؟؟
شنو تقصد
" كل عام وانت بخير يا رهفتي
" شنو المناسبة
ضحك
"عيد الحب
"يا عيد هذا ؟؟بعدله اهواي
سلطااان
" ههههههه تذكرين الوردة
سكتت
ما يدري لساها عندي وبكنتوري هم
" هاي مرة ثانيه اسويها ...بس وين الوردة ..
ابتسم وداعب خدي
" هاي كاعدين بيها
"تقصدالسيارة !؟؟؟؟
"نعم
" اهه لا ممصدكه
"صدكي
ضحكت وحطيت ايدي على حلكي محتارة ما اعرف شكول ..
"معرف شكول ...بس شكرا ...شكرا الك
"ولج شنو شكرا ...هاي اتكوليها بالليل وبطريقتي
غمز الي
لزمت كفه وضغطت عليه
" حلوة هاي الهدية ...
'بس حلوة ؟؟؟؟
" ما محتاجتها ...سلطان
تعجب ضل يباوع الي بدهشة
نزلت منها ..
نزل هو ولازم الباب بايده

"رهف !!!
مو هذا طلبج !؟؟؟
اذكر مرة طلبتيها مني ؟؟
" تغيرت امنياتي ..!!!
اريد اطلع منا ...مراح اطلعني نشرب شي
سد الباب
"مثل ما تردين ...
رحنا
هو كلساع يباوع الي ممصدك الي سويته ..
لكني مدا احس بمتعه اي شي على شنو اخذها للسيارة احس نفسي بهتت وكل امنياتي تطلع حوراء عدم ما الها مكان بقلبك يا سلطان هذا ملكي وبس اريد هو وبس لا الي واهس بفلوسك ولا بهداياك ... والله لو هادي وردة مقطوعه ..كان تقبلتها بفرحه ..بس هديتك هاي خلت الشك يكبر عندي على شنو انت اتريد تغطي من غير ما احس دمعتي خانتني وطلعت
وكفت السيارة انتبهت ردت انزل . بس ماكوا مطعم او محل مثلجات
لزم ايدي
"اوكفي وين نازلة
"ها
" ليش تبجين ....!؟؟
اشبيج ما اكولين الي واتريحيني
اتمنيته هو الي يريحني ويكول شنو المضموم عليه
"مابية شي ..بس تعبانه ...رجعني للبيت
" رهف ... الله عليج صاير شي سامعه شي
كولي ..حتى اعرف اصرف
"هئ لا ماكو شي

طلبت منه بوسط الطريق يوديني لهلي تعبانه .. رفض لكن مع الحاحي وافق . بتت ليلة يمهم ..
ثاني يوم اجه اخذني واني صدوك صرت احس بتعب وارهاق شديد ...
صعدت لغرفتي .. كنت تعبانه وضهري يوجعني ..
كعدت على السرير وهو كتف اديه
" بالله هذا شكل وحده مرتاحه يم اهلها ...رهف اشبيج انحسدتي ؟؟؟؟
ردت ادنك افتح سير الحذاء
حسيت ضهري وكف عصبه
"اااااااخ ااااه ضهري
"اشبيج اتقرب مني
نمت على بطني
"ضهري اااه ضهري ..
راح صاح لأخته
"دخيلك ربي اشبيها البنية
رهف اشبيج خيتي
"اااه ضهري يوجعني
ااااااه
"ياا اخاف حبلة ؟؟؟
سلطان
"شنوو شنو
ضحك
"رهف حامل
"ولج رهف راح اسويني ابووو
صحت
من شفتهم متأملين ومكيفين واني بعز وجعي
"لا مو حامل ... اني عندي انزلاق بفقراتي يا حمل هذا
شفت الفرحه بعيونه كمت كعدت واني ابكي
"لا تفرح اني ما يصير عندي اطفال
ابتسامته اختفت وشفته صارت ترعش
" اي اني ما اكدر اسويك ابو ...
حطيت اديه على وجهي وكعدت ابكي على قدري
اثنينهم انصدموا بيه ما حسيت غير نفسي بحضنه ويطبطب عليه ...بيومها الحزن شفته ملى عيونه . لكني اعترفت اله ما ردته يتأمل مني شي . اني شهريتي تجيني كل ثلاث اشهر لو اربعه ومتقطعه لأن قضيت عمري كله اغسل . بيوضي دا تنفذ من وقت وضهري ما يساعد على الحمل .. كان عندي امل بيوم اكون احسن من هذا الوضع واصراحه بمرضي و اروح للطبيبه بلكت اكو امل .. لكن هسة مع اشتعال مشاعري والغيره الي مطمورة بقلبي فضحت كل شي
لأني تعبت
بالليل
حسيته مو يمي
كمت دورت عليه لكيته فوق السطح يدخن ..
" سلطان تعال ادخل ..
اجاني ابسرعه
" ليش هيج تأذي نفسك
" تعاي رهفتي ..
خل انيمج شكعدج
" كعدت افتقدتك
حضني وانطرحنا
"انت ما راح اتعوفني بيوم ؟؟
" من اموت
" اسم الله عليك ....
"اش لا تحجين .... عود خاف عبالج موضوع الخلفه راح يغير شي بينا لا والله انت باقيه بكلبي و مكفيتني
اسكتي لا اتعيديه مرة ثانية
"انروح للطبيبه من يصير ضهري زين انشوف بلكت عندي امل حتى لو انابيب او انام كل حملي ...بس كون يصير
قبل جبيني
" انشالله

ايام وسلطان حزين لكن مع هذا يصنع البسمة لأجلي .

بيوم كنت اقلي سمك ...ولعبانه نفسي منه حيل
اندكت الباب حيل اتكسرت ..
ركض محمد فتحها
اسمع صوت ابنيه بالهول .. رحت
شفت وحده كاعده وحاطه ايدها على قلبها ... لابسه فقط عباية راس وشعرها مفتوح والعبايه عافتها تنزل كدام محمد ؟؟
شعرها البني على صدرها نازل لابسه كلبيه حمرة ..
وترعش بالكوة تأخذ النفس كانت تخبل مبينه عشرينية بالعمر
رغد "عمة !!!!
البنية " رغده صيحي لخالج وينه ...
ترعش بالكوة تنطق وميته خوف
"خير محمد منو البنيه هاي
محمد "هاي
قبل لا يكمل دخلت سلطانه
"عزززوة حوراء
ولج اشجابج يا معزاية  !!!!!!!!!!!!!!

يتبع