رواية سلطان زمانه الفصل الثاني عشر 12 - بقلم زهراء العراقيه

من كتابات زهراء العراقية

كاعده بالمتنزه الترفيهي صافنه على العمر .. صافنه على الدنيا ..احسها تمشي سريع .. بحيث ما حسيت بأيامي احسها تركض بيه ركض شبسرعه وتوسطت الثلاثين ...شبسرعه تخرجت و رجع الفراغ رفيقي
فرات و دعاء راحوا يصعدون لعبة مع اطفالهم ...
و نهى ما اجت ويانا ما تحب هذي الاماكن وزوجها من شافاها ما اتروح ضل وياها بالبيت بس بناته ويانا راحن ودا يلعب مع عمهن ...بس اني اخاف من ديلاب الهوى .. اخاف لا يدور بيه وادوخ ...مثل ما دارت دنياي ودوختني ندمانه اي ندمانه وشبعت ندم
مشيت خلف عقلي وفكرت ليتني ما فكرت ومشيت وره هواي . حجم الظلمة الي روحي بيها بعد سلطان لا ينوصف .. رجعنا للبيت واني الملل قاتلني . كاني مو وياهم بعالم ثاني مدا اتمتع بشي .. 
اشوف الناس والعوائل اشوف الامهات و الابهات واكول شنو احساسهم هسة ؟ شنو احساس الام ؟؟؟
اهه مرات اباوع لدعاء من ترضع بنتها حديثه  الولادة واكول بسري ..ترى شنو شعورها من ترضعها .   شنو تحس من يدر من صدرها الحليب واكو مخلوق غيرها دا يتغذى منها  ..
طلعت من غرفتي على صوت بكاء ترانيم بنت اخي ..
دخلت واخذتها من الكاروك .. هزيتها ما سكتت .. غمضت اعيوني واني متردده من الرغبة الي بداخلي ..الى أن لبيت رغبتي    وحاولت ارضع البنت واجرب الاحساس كيف يكون ...دمعت واني اشوفها ترضع بشغف ...غزاني شعور لا يوصف .. شنو من علاقة عطاء مقدسة بين الطفل والام .. رجعت تبكي البنت .. لأن ما عندي شي يشبعها .. طلعت بيها ادور على امها انطيتها الها ...
كالعاده اجلت شغلها دعاء لخاطر بتها ..اني مكنت امد ايدي بشي  كنت اشوف الشغل شي مزعج  خاصة اني ماعندي شي غير نعومه بشرتي . واضافيري .. بدل تربية الاطفال كنت اربي بيها ..
دخلت لغرفتي وصار بوجهي القفص الي على كنتوري .. دمعت عيني من تذكرت بلبلي من مات ..
ما ضل منه غير قطعه الحديد فوك كنتوري . 
فتحت كنتوري طلعت بوكس ..ظامة بيه شي كلش ثمين لا يقدر بمال الدنيا . مرة شاب اهداني وردة ..
اخذتها واحتفظت بيها .. كانت اول هدية الي من شخص اعجب بيه صح ما كنت اعرفه لكن تقديسا لهذا الشي اخذتها وظميتها كونه اول شاب يعجب بيه .. سلطان .. شنو اخبارك هسة ..  اشلون عايش .  كنت تبكي اذا اكولك نفترق واصد بيك باخر الاوانه ..اشو غيبتك طولت ..
طلعت من البوكس صورته وسقطن دموعي على ابتسامته  ااااااه يا لهفة قلبي ..يا اول واخر حب سقى قلبي ...
رجعت ضميتهم.. دخلت عليه نهى وخبرتني بالعريس الي جاي من طرف الجيران ... غصبت نفسي اسمعها
بداخلي ما اريد .. من عرفته ارمل وعمره 45 . سكتت مكدرت اطلع بيه عيب لكن من كالت عنده خمس ولد جنيت ...اني ويني وين تربية الاولاد كبار
مو بيبي .. صعب جدا علية رفضت ...

حياتي كانت حياة باردة ...خاليه من الاهداف .. حاولت اداوم بمدرسة أهلية  لا همه عجبهم تدريسي ولا اني عجبني الوضع الراتب جدا قليل ما يسوى التعب ..وجع راس قوي يصاحبني من اداوم تركته ورجعت لكعدة البيت افضل ..اطلع بنهاية كل اسبوع اسوق بكثرة ..كل ما حسيت بالفراغ كل ما زاد شغفي بالتسوق   . 
بيوم كنت كاعده ارتب بغرفتي . 
سمعت صوت بابا طلعت اله  مسرعه
رحت حضنته وسلمت عليه  .. كان جاي من العمرة توه .... فتحت الهدايا ..واني بالي مو يمهن كل ساع اباوع لبابا الي كاعد وسطنا ...اشلون شكله تعبان .  هذا كله لأن احالوه من منصبة و هو قرر يتقاعد لكن ليش هيج متغير ... هذا كلة خوف من الفراغ الي راح يواجهة ... بابا قضيت سنين عمرك من التخرج لهسة انت تعمل .. اشحال اني الفراغ هو حياتي    ...
مرت فترة صعبة على العائلة  اجمع اعتقد بابا دخل بحالة أكتئاب  .. بس يصيح وما يحتمل الاطفال ودوم كاعد بالبيت يعقب خلف شغل نهى ودعاء ودومه عصبي يمشي ويحجي ما عاجبه كلشي ..
صار يدخل بأمور  ما كان ينظر الها ابد  .. صارت طاقة سلبيه بالبيت جدا اثرت عليه ... بابا حبيبي يحتاج منا الدعم .. لكن سامي لان مرته تتذمر دوم يكول اتمنى اطلع منا .  بس اني اترجيته يطلع هاي الفكرة من باله مدام بابا عايش.... يحبهم وهذا امرة بعد ما يموت الا كلمن يعزل وحده لأنه يحب اللمه وعائلته كلها يمه .... مرت اشهر وايام .. واتمرض بابا
و كان صعبة عليه جدا اشوفه يعاني ..  اتمنيت لو اكدر انطيه من صحتي وهو  دائما ينظرلي بحزن .. كنت اعرف الي بداخله وشنو حاز بنفسه ..  مكان مكدر عليه شي غير حالي،  خواتي واخواني كلهم عدهم عائلاتهم و اطفالهم الا اني !! لا ولد ولا تلد ...
والافضع من نكعد احنه الاخوات صرح هم تعايرني بموضوع العريس الوحيد الي كان مناسب ورفضته
ما نسته ابد حقها اذا ماكوا غيرة يذكر ..  المهم سالفه سيف بعد ما تركت سلطان والفترة الصعيبه الي عشتها بذاك الوقت .  فتحت الحضر عنه .. بدافع الفضول وحتى بس اشغل نفسي بشي .. وادخلت اله سلمت عليه .. وهو رد عليه .. عرفته هو خاطب وباركت اله هو ابسرعه سألني ليش رفضته هيج ابسرعه .. اني جاوبته  لانك انت غريب الاطوار وماتعرف شنو تريد
كال لا والله بس اتمنيت حيل اشاركيني حياتي .. انت فعلا انسانه معدنك ذهب مع الاسف ما اكتشفته الا بعد ما رحتي ...اني اهواي عندي مشاكل وحتى سبب وكعتي من شفتيني انتي   كانت بسبب بنت حبيتها هيج صار بيه شفتج طيبه حيل ومن اهل الله ما حبيت ادخل وياج بعلاقات خسرانه . ردتج اخت ..لكن . مع الاسف اثنينا ما كدرنا نخليها تستمر

اههه طلع هو حابني بس ما يعرف بنفسه من تركته الا عارف    حاول يتوصل الي لكن صدي اله وامتناعي بعده عني .  المهم دعيت اله بالتوفيق ..
ما اثرت بيه سالفته .. المهم عرفت هو ليش خطبني عباله يكدر يرجعني اله مايدري قلبي وروحي سلبت 
وخسرت كلشي  وما اعرف امنين الغلط  ...

،
اني و بابا ضلينا مقابلين بعض وجه بوجه 
صرت ونيسته وصار ونيسي .
اعتقدت هاي هي نهايتي . عادي حالي حال الكثير من البنات الي انحكم على حياتهن اتظل على مسار واحد وماتدخل الى عالم الامومه .....

بيوم كنت اقلب بتلفوني شفت بابا مغير ملابسه
"هلا هلا وين يا سيد عيسى رايح وعايفني
ابتسم
" طالع اغير جو
ابتسمت بحماس
"واخيرا ايييي
"رايح للقهوة مال العاطلين .  والكلهة مثلي
اخر كلمة حيل احزنتني واختفت ابتسامتي  ..
يلا المهم يطلع من حالته .. 
من تقاعد لليوم هو ما اله نفس لشي ..
دوم صار يطلع العصريات .. اخواني ملتهين عنه بوظائفهم واولادهم ..
..
مرت فترة ..
طلعت من الحمام  كبل للمرايه اشوف وجهي بعد ما حطيت ماسك فرقت التجاعيد مابعد الثلاثين الي ضاهره جنب عيوني  ..
"مممم والله ما يفيد بيجن شي غير اروح اشد وجهي واضرب ابر  مممم بس كون بابا يقبل ينطيني مبلغ ..
اوووف
ضليت الح على بابا ينطيني مبلغ ومرات اتحايل عليه حتى يقبل وماكوا مايقبل ..
بيوم اجتنا صرح وهم كالت اكو عريس من طرف اقارب زوجها  ..
كان والدي كاعد من جابت سيرته .. اني هم حاولت ارفض
"لا ما اريد ابتلي بيه
صرح "انت مو صغيره
" اي انتي كولتيها مو صغيره حتى اخذ واحد اكبر منه ب10 سنوات لا وبعد  مريض .  افضل الي اكعد يمكم ولا اتورط
ضلينا نتحاور اني وصرح
وضاجت مني
"بابا ما اتكول كلمه ..
" بابا صدوك عاجبك كلامها اتريدني اتورط بواحد مريض
'  رهف ..  لا تستعجلين خل نشوفه  .
"شنوو؟؟
فاجئني كلامه ..
حتى فرات ادخل وكال شصاير عليها تاخذ واحد مريض
سكته والدي من كاله اني ما دايم الها وانت واخوك من هسة تردون اتعزلون نفسكم عنا ...اشوفكم ابس اروح لدار الحق اتضل هاي المسكينه حايرة بوسطكم
بكيت ..
وكمت من يمهم ...اااه الفراق هو مرض قاتل .. بابا حبيبي انشالله يومي قبل يومه ..
وافقت اشوفه بس لخاطر بابا ..
الصبح
عيوني انعمن من البكي .. حقها صرح كلامها كله صح .  عمري صار 35 سنة واني اتبطر بابا ومريض اخوتي كدام عيني اشوفهم بس يردون يتحررون من هذا البيت .. بعد بابا نتفرق مثل الرمانه من توكع من غصنها تتطشر حباتها ...
اباوع لمرايتي ولوجهي الشاحب .. ملامحي وينج يا ملامحي
ضعتي مني بأي وجه اطلع للعريس .. 
صار العصر .. كانت دعاء كاعده كدامي وتعدل بيه ..وتهاني اتباوع الي بشفقه  واكفه يم الباب ولازمه يدتها ... .
طلعت للناس
كانت امه جايه واخته وهو كاعد وياهم و بابا اقباله صاير ..
سلمت عليهم بخذلان لنفسي .. وكعدت ابصف صرح  ..
اشوف الرجال خلصان يا اللهي هذا صاير هيكل .. هذا يريد اله ممرضه ومو زوجه .. لا وبعد امه كلساع تلمح عمري كبير زين شجابرك عليه غير ابنك مريض والي بعمره ترفضه ..
هي بس الباقيا ترضى بيه مثلي ..
قبل لا يرحون راحوا حددوا الكعدة وبيها يجيبون الشيخ ..
.........
فتحت البوكس المعهود .. طلعت السجل .. وطلعتها للوردة والغصن . خفت اتلمسها لا يطشر ورقها اليابس واتصير عدم مثلي ... حطيتها وطلعت صورته .  ونمت و هي على صدري كأني اودعه ..لأن حتى من احلامي راح يطلع هالمرة ..
هي بس فكرة التخلص من صورته وذكرياته قتلتني اشلون اكدر؟؟؟؟؟؟
دك بابي عرفته بابا بس هو يستأذن مني
مسحت دموعي ياربي اشلون راح اخليه يشوفني هيج مبينه باكية ..
دخل واني اضيع بوجهي
همس
"ما يحتاج نسأل عنه ... هو بعد على ظمان زوج اختج ..
سكتت  .

" رهف ..بوية هو صح مريض بس مو بعيده على الله  يصحى .. وبعده بعز شبابه .. افضل الج من الوحده ..

" بابا
والله موافقه بس لا اتحسسني انك بيوم اتعوفني
رجعت بكيت ..
وضايقته حسني وترة الحساس محتار بيه  ..
..
خلصنه عشى واني بس تعبانه من كلام صرح الي ما يخلص على اهل العريس  .
دك تلفونها الا سكتت . اني كمت من كدام الميز سكبت ماي .
ودعاء بدت تعزل بالصحون عن الميز ..
صرح كامت من يمنه  ..
رجعت النا ورة اشوية
" ام العريس اتصلت بيه هسة ..
بابا 'خير لا يكون يغيرون موعد الخطبة
" لا بابا
باوعت الي بنكسار وشفقه
" صرفوا نظر عن الموضوع كله
نهى "ليش
" مم ما ادري
نهى " والله سمعتها تتهامس ويه بتها اتكول خشمها اشكبره
سامي خزر مرته وبابا مسح بأيده وجهه
اني ابتسمت بخفوت
" مرة ثانيه والله اذا سمعت اجو خطابه وطلبتوا مني اطلع .الا اقتل نفسي واخلصكم ..
كمت بغضب وكلت لصرح
"شفتي الموقف الي خليتيني بيه  .كمت لغرفتي ..
طلعت دموعي المكبوته ..

بهاي الايام راعوا مشاعري ومحد اتكلم عن الي صار .  بس اني صارت عقدتي بشكلي حتى كمت ما اباوع للمرايه لا اشوف عيوب شكلي الي ما تخلص ..
ضعف حالتي النفسية  وخوف بابا عليه خلاه يوافق اروح بعد شهر مع صرح ..اتسافر لأيران اتريد تعمل شد خصر بعد ما اكتفت من الولاده واني اتوسلت ببابا حتى اروح اجرب حظي واعمل عملية لأنفي ..لأنه صار عقدتي     .ما اعرف اني صرت حساسه زياده بسبب تقدم العمر لو هو فعلا شكله قبيح ..
رحت لهناك .... واجريت عملية لأنفي ...
اختصر احداثي هناك ...برجوعي للعراق . ما سويت انجاز او شي نادر .. طبيعي جدا حالي حال الكثير من البنات  .. الغريب مكنت حاسه حيل تغيرت .. بس
نهى ودعاء يكولون اتخبلين صرتي ..
وصار همي شكلي ونحافتي ولبسي المذوق .. اني محجبة ..صرت البس كاب تحت الحجاب ولبسي جدا محتشم  لكن وجهي ما يخلوا من المساحيق الي صرت اضهر نفسي بيها اصغر عمرا  وانحت ملامحي الي تزعجني . ماعندي هوس غير شكلي !!!

بيوم اجاني والدي من برة .. وعلى وجهة الابتسامة
" الله يساعدك بابا
" رهوفة . روحي حضري نفسج اليوم انروح لبيت اختج
فرحت ورحت وياه كان طول الطريق مبتسم  . كأن اكو شي جد بس شنو هو ما اعرف . رحنا لصرح ..
على العشا ..
وشفت والدي كام خلف صرح من راحت للمطبخ . 
من ردنا نطلع تفاجات من توسلت بيه صرح ابات ..
لبيت رغبتها لأنها الحت وحتى بابا كال الي باتي . 

عادتا من ابات يمها اروح بغرفة بتها ..
صاحتلي رحتلها .. اخذتني وكعدنا بالاستقبال .
" شكوا اشبيج
وجهها ضاحك عضت شفتها كانت اتريد اتطير من الفرحه
" ولج اتقدم الج عريس .. عريس
كمت على حيلي
" شكلت اني وشنو طلبت منكم
جرتني من ايدي كعدتني
"اسمعي بالاول منو هو
"ما اريد بعد مليت من الشياب والمقعدين والمرضى .يكفي يا اختي
" لا لا هالمرة لا مريض ولا شايب
"اهاا يريد يزوج على مرته
" لا لا ممزوج
" عنده دسته أطفال اني ما بيه حيل
"لا لا
" اعمى أطرش كولي الي
"لا هذا ولا هذا .. واحد ابوج يعرفه من زمان وصارله فترة يلتقي بيه بالكهوة .. طلعت مالت صديق الولد ودوم يجي بيها صارت بينهم علاقة بسيطه .. والولد سامع عنده بنية .. طالبها منه اليوم  يعني بس كلام حتى يدز نسوان وابوج طاير اطيور من الفرح .
"تشاقين .. ما بيه اي عيب خلقي صحي    اخاف عقله ضارب
صاحت وهي تضحك
"ههههههه لا ولج كافي عاد صدكي حتى ابوج طاير من الفرحه كلش معجب بيه هو بس جابج لهنا لان اخر شافج حيل انكسرتي بسبب هذا الموضوع حتى افهمج بهداوة الولد ما بيه عيب يتعيب بس هو متأخر بالزواج حتى يكون نفسه .. اكبر منج يمكن لو سنه لو اثنين ماعنده لا ام ولا اب راح ترتاحين ..
شهگت مصدكت .  معقولة هذا نصيبي . هم الحمدلله اذا كان عدل هالمرة ..
يعني ما اكدر اكول فرحت من قلبي بس على الاقل راح اريح والدي .  حسيت بأرتياح كبير هالمرة ..
ايام واسمعهم يتكلمون بخصوص هذا الموضوع ..
وحددو كلشي .. بابا كال للرجل تعال انت واهلك نتعرف عليكم ..
كان يوم خميس يوم حظي الي اتفائل بيه . تعدلت كدام مرايتي
دخلت نهى
"اليوم انتي تعدلين بنفسج الله يرحم بالسابقون كنا احنه نسحل بيج ونعدل حتى بس اطلعين
ضحكت
" ما ادري شو اليوم منطلقه
"هاي اشلون هيج نحتي خشمج ما اسويلي
"ههههه هذا كونتور واضائه تعاي
كملت تعديل . 
كنت لابسة صاية مغربية حليبيه وبيها نقش جوزي والشال جوزي والكاب حليبي ومكياجي على هذا النحو الظل نصف حليبي ونصف جوزي غامق .وعدسات رصاصي يمكن بالغت بالتعديل . لكن ما اعرف احسها هاي اخر فرصة الي حتى ابدي حياة جديده مع زوج واطفال  مثلي مثل غيري   وكع مني غلق العطر دنكت لكفته ورفعت راسي صار  نظري على فوك الكنتور ...انعصر كلبي عصر على منظر القفص الفارغ .  دمعتي بالكوة اتلاحكتها لا تطلع وتخرب كلشي ..خليت وطلعت من الغرفه التهي مع البنات لا  اعكر اليوم بذكرياتي التي لا تنسى ..
ندگ جرس الباب وطلع رامي يفتحه طلع بابا من غرفته لابس رسمي ويعدل يكولك هو عريس . 
دخل رامي اجوي اجوي راح بابا وصرح وكفت بباب الاستقبال  تستقبلهم
اني رحت للمطبخ ضليت الف وارجع وافرك بأديه بتوتر
ضحكت دعاء على منظري كانت اتقسم الكيك الجاهز واتحطه بالصحون
"لج كافي راح توكعين
"مكدر مكدر احس كلبي راح يطلع من قفصي الصدري
ااااه هوى هوى هفولي اريد هوى
واهفي بأديه على وجهي
"مممم كانه هذا هالمرة نصيبج لأن ابوج هلكد ما يحبة طاير من الفرحه
"مدري مدري اكولج حمرتي خو مو صارخه
"لا تخبل
كولج اتخبلين مثل المليكانه
"اها خوش خوش

حموت حموت يربي اشبيه هيج مخبوصه وروحي روحي ما اعرف اشبيها اتريد اطير من مكانها . زين كلبي ليش هيج يدوك ..

دعاء "اشوكت نطلع
"غير همه يصيحون الي
اقصد بابا او صرح
"ممم زين تعاي خل نتفرج عليهم ونشوفه سعيد الحظ .. رحنا  للهول واني مرتبكه ..
وهاي دعاء كلساع اتفوت من باب الاستقبال وترجع

اشرت الها تجي عيب
اجتني وكالت محد شافني النسوان اضاهر كاعدات على اليمنه ما يشوفن بس هو كاعد ابصف ابوج ولج هيبه هييييبه ويباوع لابوج و يسولف ما يشوفج اذا رحتي وشفتيه اشويه
"هسه همه غير يصيحون الي والله راح رجليه تنشل
مشيت ردت اسوي مثل دعاء وارجف رجف . 
فتت من يم الباب وعيني صارت عليه ...اااه بس مكدرت المح ملامحه غير صفحته عليه .
عدتها مرة ثانيه هم ما شفت وجهه بس اااخ ضخم و هيبه على رأي دعاء لابس سترة زرقه تركي و حذاء اسود وشعره يلمع لمع  هذا الي كدرت افرزن منه .
اجتني دعاء وعدنا الكرة مشينا من يم الباب وكبل للهول اني انشدهت من شفت شي .. كأني شفت شي مألوف ..
رجعت عدتها ودعاء اشرتلي  خافت لا ننصاد
بس اني وكفت كبال الباب من غير ما اتحرك واباوع لأيده الي حاطها على حجرة .  ضلت اعيوني جاحظه على المحبس الي بأصبعه الصغير . ضليت ارمش احاول اوهم نفسي اني متوهمه اجت دعاء سحبتني كعدت بالهول صافنه واحاول اتركز ...هذا المحبس المحبس
همست لدعاء
"المحبس .. الخاتم ...

دخلت صرح
' يلا رهوف يصيحوج تعالي

يتبع