رواية سلطان زمانه الفصل الخامس 5 - بقلم زهراء العراقيه

صرح رادت تغير من مودي بس العكس الي صار من رجعنا مكدرين ورجلها عينه مزوركه ..!!
ساعه اضوج عليه وساعه اضحك من اذكر ابو اكذلية اشلون اتولاهم ولا بعد حتى من ينضرب يضحك ويكول هلا من مزيد ويتوعد ... فعلا مشهد يصلح يكون سينمائي
..
مرات هي الضروف الي اجبرك تنعزل بنفسك عن العالم .الروتين الممل و الناس القريبين بعيدين كلمن لاهي بهمة حتى لو تجمعنا ضحكة ما اطول وكلمن تالي الليل يروح لغرفته مع أنيسة ... بابا مع الاطلال وذكرياته مع امي حابسها بغرفته ..واني اه يا اني ماعندي غير قصة سيف تنخر بدماغي ليل ونهار الوم بنفسي من كثر الملامة انهد حيلي يعني ما فكرت ابد اشلون اضل بلا مكالماته ولا بعد ما اسمع صوته قدر الرسالة الي وصلة اله .. جرحت من كرامتي كدام نفسي وانخدشت أنوثتي الروحية خل انكول ... اني اذا طلعت بمكياج واتخربطت ازعل من نفسي كيف بهذلتها مابالك هسة صورتي الي اشوهت كدام روحي ... بيوم اجتنا اختي سهير خطار ... وهاي اول بيته الها عدنا بعد الزواج ...

من صار الليل ورحنا سوة للغرفة .. كعدت اسولف
واني ابادلها ...من كثر الظغط النفسي ...كبل كتلها
"سهير عوفج من عمتج ...عفية اني خليت نفسي بموقف كلش محلووو
سهير اني تعبانه واريدج اسمعيني لا انفجر بوجه اي احد وافضح امري
تعابير وجه سهير تغيرت من ضاحكه الى خايفة و مرعوبة
" وراء كل مصيبة رجل
احجي رهف ...تعرفتي على احد
!!!
" يمكن صدقتي
سولفت الها الي صار ويايه وهي بس تسمع وحاطه ايدها على خدها
بجيت وكلت شسوي احس نفسي راح اموت من الغمتة ... اشلون اطلع نفسي منها
باوعت الها مستجدية عطفها
"عفية لا تلومين اعرف نفسي استاهل كص ركبه
حطت ايدها على حجري
" رهوووف انت اسم على مسمى ....
عادي قلبي انتي ما غلطتي حالج حال أي بنت ...تنجرف وره عواطفها ..طبة طوب قرة او لا المهم انتي ماكنتي قاصده توصل
لكن !
"لكن شنو
" انتي انتي بعدج اتحبيه ...واتفكرين بيه
" هو عندي غيره
" ولج انسيه هذا الان اول رجل هيج تأثيره عليج
قوي بس صدكي تنسين ...

لعب بمخي كلام سهير من كالت هو متقصد يعلقج بيه !!!
"شنو!!
" ولج عادي اني هسة مو عندي محسن جان قبل زواجي احجي وياه وزميل ومثل اخويه شقه وسوالف وياه بس اثنينا موضحين نوع علاقتنا
مو هذا كاعد ويلعب عليج .. حبي لا اصيرين هشة ميزي الناس مو اني الي انصحج
بس انتي حيل رقيقة و طيبة يا رهف انتي احساسج مرهف بالحب من صغرج تردين اتعيشين قصص حب وتنتهي بفارس وسيم ولكيتي هذا الشي بسيف الي الله واعلم شنو نيته ....
فرت راسي فر سهير ...انوب حتى شككتني باول لقاء النا كالت يا خطف هذا ويتركوه حي واهلة ابسرعه يعرفون المنطقه وياخذوه !!!!
قصته صارت مبهمه اكثر !!! بس سالفه هو يضحك عليه ما دخلت بمخي ابد سيف مو هيج

راحت ايام واتعدت ايام ... وبديت استرجع نفسي اشوية اشوية وانسى قصة الرساله والاعتراف الي دمر عقلي .. بدت امتحاناتي التهيت بيها ... بيوم نزلت من السيارة براس فرعنا .. وفرعنا يطل على شارع عام .. وجان المح شخص مدنك يلم كارتون .. صار وجهه بوجهي ...نفس الملامح نفس الرجولة وكذلته الي ضحكتني و الشارب كأنه جاي من زمن الحواري والابضايات !، هو لا مو هو وبين حيرتي صفنت على الرجل حتى هو انتبه الي اشو هذا حمرن اخدوده الحنطاوية المكسبة من الشمس ودخل ابسرعه للمحل .. كأنه خجل من نظراتي عزه خرب هذا شنو فهم صفنتي اني دا اشبه عليه مو اتغزل بيه بنظراتي الغبية هاي
فتت للفرع شتمت عفويتي الي مرجعتني للخلف

.
رغم الاكل كان طيب لكن منعت نفسي ان أكل اكثر من كم لكمة .. حبيت الرشاقة الي اتوصلت الها موخرا
دعاء" لا اكولين خلصتي !!
عرفتها تقصدني من نظرتها الي
'اي حب....
بعدني ما كملت تدخلت نهى
" اي اكلج اضاهر ما عجبها ..لأن مكثرة بالزيت
ضاجت دعاء وسكتت ..
" لا ابد كلش طيب وكوة منعت نفسي عنه بس تدرين دا احاول امشي على نظام غذائي
بابا " خوش اسوين بابا ....صدك بنات بعد العشا يجيني صديق عدلتن الاستقبال
نهى "عدلته بس رامي خربطه
دعاء "اعدلة من نخلص
"اوف من رامي صاير وكح
دعاء"همه كلهم الولد وكحين
فرات " صدك يابة اليوم مبارات العراق ..بس لا هذا صديقك يشوفها وياك
هز راسه بابا بمعنى اي ..
اني كمت غسلت ونمت بيومها من وقت حيل تعبانه ..
الصبح من فزيت مفزوعه عبالي خالص وقت الامتحان .. صليت على النبي من شفتها ب 10 الصبح .. كمت راجعت ودعاء سوت الي ريوك بالغصب الا اكل .. اكلته واشكرتها .. من صارت ب12 طلعت من البيت ...
وصلت لراس الفرع وجان المحه هذا ابو كذلة الخجول .. مدري ليش حصرتني ضحكة لأن الشبه كبير بينه وبين الي صاح عليه وكال النسوان يكترن بس .لا هذا شي ثاني مبين هادئ .. بالقوة لزمت نفسي وانتظرت الخط شفته يمشي راح يوصل يمي واصعد ..هم اخذتلي نظرة على الرجل مبين دا يرتب بالمحل .. هذا كان محل عطارة ..هسة يا ترى شنو راح يسويه هذا الرجل ..اكيد لحيم .. لو حداده مبين من وجهه .. صعدت ورحت
.
رجعت بعد الضهر نزلت من الخط وصارت كبالي لافته ....اويلي هذا المحل مرطبات من اللافته الي يم المحل مركونه على الارض بعدها ما معلكه عرفته راح يفتح محل مرطبات ..شفت بوسط المحل زلم يرتبون الديكور اتعديتهم ومشيت لطريقي .. واني كلي فضول اريد اعرف هو لو مو هو !!

وجان انصدم بوجوده داخل فرعنا ... اتعدينا بعض بمشيتنا ...واني كلي حيرة ... درت وجهي التفتت علية ...هو ارتبك ودار وجهه لطريقه ..عزززة هو كان ملتفت عليه لو صدفة !!!

بيومها طلعني سامي مع عائلته .. واحلى شي سواه من دخلني للاسواق وافتريت واشتريت افضل الماركات من عطور و سيت بيت جديد و .....الخ
اكثر من مرته اشتريت ..كنت مولعه جدا بهاي الامور وانيقة بشكل لأن غير اخر مودة ما البس ..

...
بيوم دعاء طلبت مني اروح اجيب الها من امها غراض همه بيتهم بنفس المطنقة وهي حبلت بأول اشهر طلعت العصرية ...جبت الغراض .. وطلعت من فرعهم كلت امر بالسوك اشوف شكو ماكوو
دخلت لمحل احجبة ..وكفت اختار ..ووكفت يمي مرة ..
دردمت عليه بصوت هامس بس تعمدت اسمعها
"شنو هاي استغفر الله بنات اخر وكتب كاسيات عاريات ..
اني استغربت هذا الكلام الي ...بس محد غيري يمها ..
سكتت وطلعت ..اشبيه اشو لبسي محتشم ناس تحط خشمها بكلشي واذا يعني اطلع كذلتي ...اساسا اني محتشمه ومو ملتزمه .. رجعت من السوك ..واذكرت ما جبت شي للجهال ..صار كبالي محل ابو كذلة ..اجتني ضحكت وكلت خل اروح اشتري منه ..دخلت شفته يطلع للجهال موطه من المجمده . ا
"السلام عليكم ..
رفع راسه ابسرعه وعدل وكفته كان منحني على المجمده .. حركته كانت سريعه وكع الموطه بالمجمده وصفن بوجهي ....كأنه ممستوعب اني كدامه ...
ما رد علية ...انحرجت ..
"اريد فد كيلوا عائلي ...
حك مؤخرة راسه
"وعليكم السلام ..
دنك انطى الجهال ..
وفتح المجمدة الثانية وبدة يطلع الي ..
اني
"فدوة لا تحط وياه كاكاوا
شفته صفن اتقربت وشفته ايده ضلت على وضعها لأن غارف وحاط
"يبوو اكرههه
يلا بعد خليت ..
اشو هذا حطها على صفحة وجاب طاسة غيرها
" شتحبين
صوته كان خشن وغليظ ...اني عفت الموطه وركزت بصوته وضليت اقارنه بصوته من يصيح ويتعارك ..حتى اتاكد
" شتحبين
"هااا
كلشي عادي كريمية فستقية فانلا فراولة ...بس كاكاو لا
"صار
وكفت انتظرة على صفحة واتفرج على المنظر الي مخليه على الحائط كأنه قديم موديلة . لكن شكله حلووو ...اهنا دك تلفوني .... رديت
" ها صرح ... لا ما اجيكم ...مو دعاء تعبانه
اي ....اي يا صدك خطية اشلون مات ... لا هسة الجهال ضايجين عليه ...اي خطية جان بلبل حلوو ..ااوف لا ما اجيكم اخاف ابجي من اشوف قفصة فارغ ههههه جاوو
انهيت المكالمه كان صوتي واطي ..واكفه كدام الميز و منطيني ضهره يحضر الي طلبيتي ..اخذتها منه ودفعت ورحت ....
عجيب هذا الرجل نظراته غريبة ..بس لا يذكرني اني متأكد هو نفسه ..معقولة اذكرني هههههه اشلون موقف اسخف منه ماكو ..
؛؛
ماكو شي جديد بعد الامتحانات نوم اكل
كعده ...كلشي مألوف ..بس من اطلع ارتاح واتونس .
رتبت ملابسي حسيت عندي اهواي ما احتاجه وين اودي هاي الهوسة اووف ...
المشكله كلهم احبهم ...
مممم هيج وادخل كلية ...اويلي اكيد راح تتغير نفسيتي ..اشكد كنت غبية من تركت ..اذكر صرح اجت تبجي من تتوسل بيه ما ابطل واترك ..لكني كنت دلوعه امي .. وهي موافقتني على كلشي وحققت ما اريد ...
بيوم اجتني دعاء خايفه
" وج رهوف الحكي عليه هذا رامي لهسة ما رجع
"يااا الدنيا غروب
" اووف ينسى نفسه باللعب وابوه مانعني اطلعه بس هو وكح شسوي اذا ضل اهنا يكتل بالبنات وامهن اضل تحجي عليه اطلعه يروح بعد ما يرجع تعبني هالولد
انوب شخلصني هسه من فرات
" اني رايحه اجيبه ...
لبست ورحت هالمرة ما عدلت روحي لفيت شال وطلعت .. اهبد.على رامي ...رحت للحديقه لكيته مترب ويلعب طوبة ونازع حذائه وركبة مجلغة
اتقربت يمه جريته ورحت
"حبابه عمه لا تكولين لبابا
"اتخبلت اكله حتى يكتلك .. بس انت ادعي نوصل قبله ...
وصلنا للفرع .. شفنا سيارة فرات بالباب
فلت ايدي رامي وعنتر ماقبل يدخل خايف
صفنت اشوية ... كلي خل انروح ع الشارع واشتريلي شي وكليله طلعنا سوة نشتري. من السوك

صدك ... لهناك رحنا وهو زرك لمحل المرطبات
دخلت وراه ..
"عموا انطيني من هاي ...
ابسرعه شافنه الرجل ... بس ماكدر يلبي طلبه دا يبيع لغيرنا ..
اخذ رامي وحده ام خمسمية واصر ياخذ فريز ..
"يلا عمة خلصت
"ادفع بالاول ابو المصايب
"هااا الفي صرفتها من ازمااااان
"شنوو
باوعت للرجال ولرامي
" ولك عبالي عندك ... مو انطيتك الف قبل لاتطلع
"ههههه صرفته
صكيت اسناني
"اشلون تورطني لعد !!!!!!!!!
احتاريت شصرف اذا ارجع فشلة شكله نسيت اشيل افلوس ...
اخذت نفس ورحت وكفت كدامه كان خلف الميز حاط ايده على خده وباله شارد
"اا خوية ميخالف اجيبلك الفلوس باجر ..
كلتها واني مفتشلة من نفسي حيل حتى ما باوعت لوجهه
"صدك جذب فدوة الج
احرجني لطفة
"اشوية ودزلك رامي ....يدزها الك ..
"لا عمي اعتبريها وصلت
" شكرا ...خوية ..لا اشوية ويجيك
رحت واني ادفع برامي كدامي
"امشي ولك دومك مفشلني اصلا ابوك اذا شافني ما مشتريه شي من السوك يشك بيه اطمطم الك ...
اول ما وصلنا لكينا ... فرات منتظرنا بالحديقة
حتى ما سألني جر ابنه وراح
سمعته يصيح عليه ويغلط اااوف عرفت نهى متلكيه فرات ومفتنه على الولد ..

ثاني يوم موعد استلام النتائج .. طلعت من البيت منفعلة مشاعري ومتخوفة حيل ........ استلمتها وطلعت نااااجحه ومن الاوائل ... الفرحة مكانت تنوصف ابد ...صعدت للسادس اويلي مبقى شي كدام حلمي .. نزلت من السيارة ..... صار محل المرطبات كدامي ....تذكرت الالف مالته ... دخلت واني وجهي يضحك ضحك
"السلام عليكم
عليت صوتي حتى يسمعني لأن صوت mb3 مشتغل بالغت ...وبغجت ...خليت الرجال يصفن عليه ...ابتسمت بلعت الفشلة اشكد عيب ليش طلع صوتي هيج عالي

"وعليكم السلام !!!
"اتفضل هاي الفك
حطيتها على الميز
"وكعت ابد ولا اخذها ..
" لا خوية
"والله ولا اخذها
رجعتها بأيدي ...
ضليت واكفه والسؤال على اطراف لساني ما اكدر بعد اريد اريح فضولي
"اكولك خوية نفسك جنت بالكراده
صفن عليه مفهم سؤالي
" اقصد العركة ....الزلم ... انت لو لا
" هااا قصدج هذولاك العار ... اي اني
" صدك يعني انت نفسك
" اي اني .... بس انتي وين شفتيني ؟؟
" اضاهر ماتذكر شكلي
صفن بوجهي والتقت اعيونا ... ابسرعه اعيونه اجنبتني ودنك ...
"اي شذكرني .. بس هي اخر عركة حضرتها ..
" وشردت منها
رفع حاجبه مستنكر شقاي
استوعبت من ضوجته هو ما يحب الشقة
" اي يلا باي
خليت ومشيت ...
يلهوووي اشكثر معانيه اتخوف وعصبي ...ولا يكدر واحد يتنفس يمه . بس طلع هو هههههه واخيرا تأكدت ...رجعت للبيت وزفيت الهم خبر نجاحي ...

...
بعد فترة قررت اسجل دورات تقوية ....هي تقام بمعهد
اظطر كل يوم الصبح اروح الها ولأن مو على طريق بابا ...لازم اروح مواصلات ..رغم اخوتي عدهم سيارات لكن اثنينهن اتعذروا .. مني وهم همه خطية واحد دوامه تقريبا خارج المحافظه بعيد .. والثاني من الثمانيه لازم هو بالدوام .. واني ب9 الا اروح ..
اتمكيجت واتعدلت وطلعت من البيت مسرعه ...صعدت بكية ولمحت ابو محل المرطبات كاعد ...شنو اليوم عزل قبل لا يفتح !!!
...اشكثر اعشق الجلسة يم النافذة مكان اكو مكان غير كرسي متحرك ومكان يمه هو
ابسرعه من شافني راح هو للمقعد المتحرك ...واني جلست يم النافذه ...اووف صح شكلي مو مال هاي البهذلة بس شسوي لازم اعتمد على نفسي ... ابو المحل اشكثر عجبتني اخلاقه من ترك المقعد الي يمي وصار بينا مقعد فارغ في سبيل ما يضايقني
اووف خجلت من دفع كروتي حيل بس ما الحيت خنست ...
اهنا صعد شاب لابس فانيلة سودة وبنطرون نازل نصه ..باوعت لابو المحل بلكت هو يكعد يمي ويخلي الشاب بمكانه ..بس الرجال كان مدنك على تلفون .. اجه ودحس نفسه بوسطنا الشاب بعد ما اشرلي خو ما محجوز واني نفيت ...
ضليت اباوع من النافذه ... وحسيت بحركه غير لطيفه لكن شسوي .... ماعندي حل غير اني ابعد نفسي عنه بحيث اجيت الزك بالنافذه ...
تنهدت عسى ولعل يحس على دمه حتى اني مبينه اكبر من هذا المراهق المزعج ... لكن هو من جس نبضي هادئه ومو راعية مشاكل .... اتجرأ ومد ايده كرصني ....تلويت بداخلي وانقرفت .... باوعتله بغل ... ..هو كشر مبتسم ضاهر قباحه حلكه ...درت وجهي على النافذه ...
وهو احسه اتماده اكثر ...غمضت عيني بقهر ... كلت بكلبي خل انزل افضل حل الي حظي الاغبر ذبني بسيارة مقبطه .....
همست استحي على دمك
استغفر الله
وضليت محتارة ياربي اذا انزل من ورة هذا المزعج لازم ادكها مشي ....انوب هذا تماده ولزمني من رجلي فزت روحي وشهكت ....يمكن محد يسمعها غير الي كاعدين خلفي او كدامي ما اعرف ... اني من شكهت بس سمعت اصياح ، رجل والي ابصفي ياكل دك بوكسات من ابو المحل
"ابن الهايشه يا جرووووو
ودك كتل السايق وكف السيارة و الناس اتريد اتفاكك واني حاطه راسي على حجري وساده اذني لأن الكتله صارت يمي .. حتى الولد اجه يوكع عليه يطلع عمره فوق 19 سنه ..
الزلم جروا ابو المرطبات ...
نزلووه والشاب ينزف وجهه انقرفت وخفت كمت ابجي والناس كلها فهمت الولد متحرش بيه
الي يسألني اشلوني والي يكلي بتي اوصلج .....
اني نزلت واشوفلك ابو المحل يريد يوخر الزلم ويهد بعد على الشاب ..اني خليت وشردت ... اوووف عندي اثنين اخوه وخلوني بهيج موقف سخيف .. ليش ياربي محد يعتبرني مرة اشو زوجاتهم ما يطلعوهن وحدهن حتى بابا ما كان يخلي سهير تطلع وحدها ....بس اني ذاب عليه مواجهه الكلاب والناس التعبانه .... مشيت عن العركة واتعديتها ابجي حاااسة بضعف كبير ...يمكن محد يصدكني اذا اكول اني هذا حالي اسعى خلف مستقبلي وحدي حتى بابا يادوب موافق ادرس نجي للصدك هو يعتبره تضيع وقت بعد هذا العمر ...
حسيت اكو شخص ورايه خفت لا احد يتبعني ...التفتت شفته خلفي ...جبينه ينقط عرق والعكدات الي بجبينه لا تعد ولا تحصى
" امشي خيتي اني وراج راح امشي
"شننوووووووووو
"لعد اعوفج تتعرضين لنفس هذا الموقف هاااا
"لا خوية الله يخليك لا تعرضني لهيج شي اني راح اخابر اخوتي يجوني
"زين يلا خابري
وكفت على صفحه على الشارع مبتعده عنه بخطوات
دكيت وانتظرت بشيل خط سامي ماكوووو
باوعت للرجال شفته يباوع الي ومكتف اديه
رجعت دكيت على فرات طول الا رد
" ها شرايدين
" فرات اني على الخط السريع تعال اخذني
"شنو وين اجي يموعده بعد دقايق يبدي اجتماع عدنا
"لعد هسة اشلون حباب
كنت اهمس واباوع للرجال لا صوتي يوصلة
" رهف اتصلي بسامي
سد الخط واني اشوف الرجال اتقرب مني
" من يجون الا اروح
ياررربي عباله راح يجون اشلون بيه بهذا الموقف
اتصلت بسامي هم ما رد ...
اووف ما اريد اوصلها لبابا شيخلصني من ملامته وأسألته هم ليش نازله اهنا .؟؟؟
شفت الرجال وكف تكسي اااي واخيرا راح يروح مربطني ....عاد اني اصرف ...بس شصرف ياربي واني وحدي ....
رجعلي
" تعاي اصعدي خوية ....
باوعت اله مستغربه
"اعتبريني اخوج واحنه جيران اوصلج واروح
"لا لا روح
" لا والله فلا اروح وانتي اهنا وحدج
سكتت اني وضليت حارنه
فتح الباب وبصيغه أمر
"اصعدي يلاااااااا
باوعت اله متردده اشو هذا خزرني .
باوعت للطريق الي ماتجي يمه كيات غير مقبطه
صعدت وهو صعد يم السايق ...
يتبع