رواية سلطان زمانه الفصل السادس 6 - بقلم زهراء العراقيه

وصلت يم المعهد ونزلت بس ولا الي نفس ادرس بعد هذا الموقف ... يعني الفضل الي قدمه الي الرجال الي لهسة ما اعرف اسمه لحد الان  . خلاني فعلا احس نفسي وحيده ...  فكرت بهاي اللحظه اترك الدراسة  واكعد واسكت افضلي ولا اتعرض لهيج مواقف بالفعل خلصت من المحاضرة بفكر مشوش وصعدت تكسي هالمرة وحدي اشجعت وصعدت عبالي صارت عندي سهلة لأن من اجيت هم اجيت وحدي مع اثنين غرب ...بس الوضع كان مختلف طول الطريق كلبي يخفق وكأني مسوية جريمه من صعدت وياه وحدي .... يا الهي ليش من اجيت ما حسيت هيج شورطت نفسي اني .... نزلت براس الشارع    وجان  يصير صاحب المحل بوجهي ..كأنه ينتظرني ااااه هذا شكعده على الرصيف ...
خليت ورحت من يمه على السريع وسولفت لدعاء على الي صار وهي وصلتها لأخي بطريقة لائقة بس فهمته اني اتعرض لمضايقات من امشي وحدي فكال خل تكعد وتسكت لا تروح دورات ....!!!!
ظنيته راح يشوفلي غير حل لكن هو راح للاسهل بالنسبة اله ....بالفعل اني هم كنت متعبة وضايجه فما درت بال .... بالليل من ردت انام ... والوحده صاحبتني داخل غرفتي ...تسألت اني اشلون صعدت وياه ؟؟؟ اوووف مكنت بحالة تسمح الي اقرر صح ... بعدين وين الغلط هو جارنه  واني ما اعرف ليش من صعدت وياه عادي كأني ما مسوية شي او كأني مع اخ او اب ...لكن من رجعت وحدي كاني مسوية عملة حتى ما دخلت للفرع نزلت قبل لا اوصل شارعنا 
بعد ايام الا حسيت نفسي دا اضيع الوقت من عفت الدروس اني بأشد حاجة الها لاني مو قوية بمادة الانكلش والعربي ايضا وحتى الرياضيات كنت ماخذه دروس فيه ، اطمح لمعدل زين من صحيت من صعوبة الموقف مال العركة الي بسببي واحتياجي لشخص غريب حاولت اقنع فرات يخليني اروح
كان كاعد يقري ابنه واني جلست يمهم بالهول
"فرات ...
اكولك بخصوص دروس التقوية ترة اني دافعه بيها افلوس
باوعلي صفح
وما جاوب
"اي ادري اشبيك قفلت فرد قفله ترة هاي مهمه بالنسبة الي ...
" رهف سدي الموضوع ...مال اختي تتعرض لمواقف مزعجه واسكت هاي لا صارت ولا تكرر
ارجوج طلعيها من بالج
" اي يا فرات والله السادس صعب
الناس تدخل دروس خصوصية واني حتى هاي ما اخذها ...حباب
"اكلج كافي وانت نزل راسك بكتابك وحل الواجب
صفنت عليه ضايجه شسوي واقنعه
"زين انت وصلني اكو يم المعهد مسطبات اكعد عليها على ما يفتح
جاوبني بعصبيه
" من كل عقلج انتي
'اي لعد احسن من ما.......
"منو شنو انتي كمتي اتخربطين شنو اكعدين شنو 
ترحين
مرة شكبرج فكري عدل
ضجت من كلمة مرة اشكبرج حيل جرحتني رديت بهدوء عليه بنبرة مجروحه
"ولأني جبيره ما كلت لبابا ولا حبيت اكسر كلمتك
بس  تحز بنفسي من تستهل الامور من جانبك انت بس ..
"رهف لا اسويها زعله ...حبابه
ترة والله تعبان انتي ما تدرين بالدوام شصير بيه وشنو من نفسيات اتعامل وياهم
"  وانت صديقي مو بس اخوية
عبالي تفهمني من خليت دعاء اكلك ... على العموم الموضوع هذا يهمني حيل لأن هو يحدد مستقبلي
" با مستقبل هذا ؟؟ هاي نزوة من نزواتج هههه
يلا رهوف لا اضل معبس
رديت بعصبيه
" لا تستهزء بيه
" ياالله منو مستهزء
" فرات ما اشوف كلامك اني هذا مستقبلي ...حلمي صار اكمل دراسة بيها خير واتعين مثلكم على الاقل احس بكياني ...احس نفسي اكدر اشيل نفسي من غير ما احتاج  احد
تواسي وحدتي ...
سكت فرات وضل يتأفاف
جمعت كلام معدل وكتله
" فرات هذا شغلك الي تعبان منه حلمي .. 
كتلك انتظر المعهد ينفتح وادخل ...انت بس وصلني اله وروح لدوامك بعدين المنطقة راقية مراح اتعذب بالانتظار ....ترة بالكيات جنت اشوف الويل .
واخيرا كدرت اقنعه بعد ما نشف ريقي .. 
ومرت ايام و اخوية يوصلني وخطية يطلب زمنية ويرجعني تعبته حيل اعرف بنفسي لكن هو اخي خل يتحملني ويساعدني منا من يقوة عودي  .. 
بيوم هم اكررت سالفه رامي طلعت هالمرة وبجيبي افلوس رحت جبته من الشوراع واتعمدت اروح لمحل ابو شوراب وكذله ...
دخل رامي فتح المجمده واختار بينما اني اتمشى على كيفي  . والرجال يصلي لأن اذن المغرب  . 
رامي اخذ واكل واحنه لهسة ما دافعين ..طلع من المحل يلعب ويطفر واني على وكفتي انتظره يخلص حتى احاسبه  . 
شفته سلم ولم سجادته
وكف اشطوله يارب
" اشلونك اخي
باوعلي بنظرة خطافيه منزعجه جدا
بينما اني اكلته اكل بنظري  دنكت من لمحني وهم  ابعد نظرة عني ،سحب المجمده مكان رامي سادها عدل
" خوية اني حبيت اشكرك على الي سويته الي

" ها بلا شكر ولا شي هذا واجب
عزة هذا اشبيه كالها بمنية ازعجتني حيل
حطيت افلوس الموطة على المجمده
" هاي افلوسك ...
ردت اروح وصلت يم الباب
" ما انريد شكر بس انريد تنتبهن على نفسجن لا اطلعن وحدجن ولا تعرضن نفسجن لمواقف انتن بغنى عنها ....بعدين حتى جيتج المغرب غلط اخوج جبير هو يجي وحده
درت وجهي عليه مستغربه كلامه كان طالع من قلبه حسيته بالفعل خايف عليه
" اها مو بيدي خوية لازم اعتمد على نفسي
' اييي
اشر بايده بس انتي شابه وحلوة يعني محلوة اطلعي...
سكت الرجال  كانه توه حس على نفسه وعلى كلامه الي طلع بعفوية و سهوة منه
حك راسه وسوة نفسه يمسح بجام الميز
كال بنتر
"المهم وكفتج طولت يمي
اني جنت مصدومه مثل الي صافكيها كف واكفه كدامه وصافنه عليه هزيت راسي حتى اصحصح نفسي
وعدلت شالي وطلعت انصدمت بالجام 
ضحك عليه رامي
كدته ومشينا واني اخدودي صارن نااار من الحماوة يااللهي شصيرر بيه
كبل للمغسلة ..رحت ابرد وجهي .. باوعت لنفسي بالمراية .
شفت الكحله سالت مع المسكارة
" اني حلووووة
عطست ورجعت اباوع لنفسي
واردد بتعجب اني حلووووة
هاي اول مرة اسمعها اني حلوة !!!!!!!
ردت ادخل لغرفتي انركعت بالباب اثاري ما فاتحتها
دخلت واني بعدني متبنجه
"انييي حلوة!؟؟؟؟؟؟
صاحوني على العشا قبل لا اطلع باوعت لوجهي وكلت
اني حلوة؟؟؟
طلعت اتعشيت واني ببال شارد يم ذاك الرجال ابو كذلة ..كانما بعدني بوسط المحل واعيد كلامه كنت جدا واعية حتى من كلمني من وسط انفه بالبداية لأن طالعه هيج وقت ما عاجبة وضعي لأن مبين من نصحني بحرقة مال واحد خايف بس اووي ليش ينتر
عليه ...
كمت من العشا ابسرعه حتى بس اشوف وجهي
هالمرة مو قصة شاب واعجبت بيه لا ابد شي مختلف احس كلمته العفوية انطتني طاقة .. طاقة حلوة خلتني اشوف شكو شي كدامي حلو حتى الروتين صار حلو وانضافت اله حبات سكر حلت يومي ...كعدت الصبح كلي نشاط وحيوية لليوم وكلساع اباوع للمراية واعدل واضحك  على نفسي
...
بيوم كنت كاعده انتظر المعهد يفتح حاطه كتابي واراجع  .. 
اجتني ريحه دخان كريهه حيل اختنك من ريحه الجكاير ولا اطيقها ابد ما رفعت راسي .. ضليت اقرة ..
بس الريحه طولت شنو هاي
رفعت راسي باوعت منا ومنا وجان اشوفه كدامي واكف يم الحايط رافع رجل عليه والثانية واكف عليها ويشرب جكاير .. عززة
سديت الكتاب هذا شسوي اهنا
بهاي المنطقة !!!!!!!!!!!!!
  كل نفس ياخذه احسه دا يريد يجي يظربني بعده وربي متت خوف منه ...
اريد افسر وجوده اهنا ....شنو يسوي وليش يباوع الي  هيج ضليت عين على غلاف الكتاب وعين عليه .  اتقدم ومشى خطوتين الي ..  مد ايده جانت خلفه . وانطاني غصن !!!!!!!!!!
مد كدامي
ضليت صافنه على ايده الترجف رجف انوب باوعت لوجهه
هو اصفر وجهه من شاف الغصن
ولعن حظه !!
"خرب حظي
باوع للخلف رجع للحايط شال الوردة
واجاني اني ممفتهمه شي
"خرب هاي الوردة وكعت من الغصن
وضل يجعص بيها كانه يريد يرجعها للغصن مالتها
مدري ليش اجتني ابتسامه غطيتها بكفي
" شنو اخي اشجاي اسوي ترة مفهمت شي
دردم بكلام ما فهمته وحط الغصن بغضب ابصفي وكال
" عود هيج كلشي ماكو
كان عركان وكالها بنتر
"!!!!!!! ليش تصيح عليه
اكو شي
" لا هيج بس عود اليوم هو عيد الحب !
هاي الورده ترديها ترديها ما ترديها ذبيها

خله وراح حتى ما انطاني مجال ارد بس لا هذا معجب بيه ههههه استغفر الله ياربي . 
دخلت للمعهد ومن خلصت رمش عليه فرات يعني وصل
طلعت اباوع لسيارة فرات وصارت كدامي المسطبة ... الوردة ما زالت بمكانها تطاير اوراق الغصن من نسيمات الهوى .  اتقربت الها واخذتها واني مبتسمه .. هذا الرجال يشوفني حلوة    ومعجب بيه تأكدت هسة ...مهما يكن على الاقل هو كلف نفسه وجابها الي حتى لو كانت مقطوفه من شجر الحي !!!!!
اخذتها هي والغصن ورحت لفرات واني ممبطلة ضحك بداخلي ....كنت مستغربه ... يعني هاي غريبه ولو هو يمكن رجل بسيط وعلى نياته ما مطلع وشايف ..  يعتقد اني الاحلى من حيث التعديل والاناقه واعجب بيه .  لأن أيقنت بعد تجربة سيف الرجال ما تحب غير شكل المرأة  هو اهم شي اساسي بيها والباقي كله ثانوي ...

.
رحت لدعاوي جانت اتقلي سمج و خطية شفتها حاطه كمامه تلعب نفسها من السمج ..
هاي هي دعاء وحامها يستمر طول فترة  حملها
" دودة يووومه خطية
اكلج اقلي اني
ردت بصوت خاوي
"روحي يمعوده اتحركيه لو اتحركين نفسج ما اعرفج
ضحكت
"اكلج اليوم شنو عيد الحب ؟؟
باوعت الي بطرف عينها
"اي عادي ترة اني حديقة فما اعرف اشوكت
"روحي منا
طردتني ورحت اشوف نهى
مديت راسي عليها شفتها كاعده تخابر رحت وعفتها
العصر هم عاد الكرة رامي هذا ابو الشوارع يرادله حيل، متعب انوب ابوه ما يتفاهم كبل اذا لكاه بالشوارع يضربه وهذا ولا يخاف عادي عنده اني وامه كلبنا عليه يضل نار اذا قربت جية ابوه وهو ماكو
رحت اله للحديقه ماكوا
رحت لبيت صديقه كالت امه بالساحه يلعبون طوبة
رحت لهناك واني طالعه روحي لأن بعيده ...
اه هاي شنو
هو !؟؟؟؟؟
بوسط الجهال يلعب ابو المرطبات ؟؟؟؟؟؟؟!!
و ذولة مكيفين بيه ويلعبون  وياه بالمعلب مالتهم الحلوة مابيه عارضات . الملعب بيه طابوكات  والحارس يحميهم  ..
يا هذا شسوي اهنا ؟؟؟؟!!!!
شافني واكفه .. وكف بوسط الساحه
عدل فانيلته هي سوده بس صايره ملحه من الركض
اجاني هو
لحكه رامي
" ها عمه رهف  شنو؟
همس الرجل
"رهف
امتعضت من شكل رامي
"امشي كدامي بعدين حسابك
راح رامي
" انت ليش تلعب مع الجهال
اووووه اقصد اقصد شنو هاي تصرفاتك
" على كيفج عيني
عادي واذا العب قابل حرام
"مو هذا قصدي بس شنو معنى جيتك للمعهد ؟؟ والوردة هم شنو معناها هاااا
" هاي الوردة هااا
تلكأ
بعدين كال بصوت هادئ وخائب
"عساس انتي اخذتيها !!!
عرفته مراقبني من عفتها ودخلت للمعهد من خيبة املة

" اشلون تريدني اخذ من واحد غريب ورده ولا بعد اتكول الي عيد الحب يا عيد هذا هسة وبعدين عيب ترة
"هااا
يا كلب يا سلوان
"شنو؟ ؟؟
"لا هيج هيج انسي
اشر باصبعه
"عفيه عليج هيج  ونعم التربيه صدك اصلا عيب تاخذين ورده واني اسف كلش

هزيت راسي ممقتنعه ياربي هذا شيكول هزيت بأيدي
"اشبيج واكفه يلا شيكولون الناس علينا امشي امشي
اشرلي وراح يقهر ياربي هذا راح يجلطني خلاني صافنه  انوب هو صار ناصح براسي بعد الي سواه الصبح

رحت وهذا الغبي رامي ضليت احجي عليه بكلبي ماشي  سريع ماهو خرب بس لا هم ما رجع للبيت

الناس تمشي واتروح بالطريق وهم شميت ريحه جكاير بس عادي ما لفتت انتباهي بس هم طولت باوعت خلفي ....ياالهي هذا هم وراية يشرب جكاير ويمشي ...
اووف اشلون سالفه وكفت اتعدت مرة من يمي وراحت من اتقرب هو
"ترة عيب والله تلحكني ...
"شنو وياي .. عمي طريقج قابل هو اريد اروح للمحل
"اها
مشيت بعصبيه فشلني ...
بس هو بأمكانه يروح من اي دربونه اطل على الشارع العام ومناك يتمشى اشمعنا منا هف وصلت للبيت دخلت وهو طلع كبل ..  لكيت رامي راجع يلعب
...
بيوم نزلني فرات براس الشارع كان مستعجل ما منطيه زمنية اليوم 
باوعت للمحل وضحكت كلت الا ادخل
دخلت شفته يلعب بتلفونه ..
شافني رفع حاجبه
"مرحبا
"هلا هلا برهف
باوعتله مستنكرة كولته لأسمي بهاي الطريقه
"اشلونج
"اريد عصير وازبري

كلتها بعنترة
اتحرك من مكانه واني لفت انتباهي  القفص رحت اله كان بيه طير حلووو ضليت ادك دك على كيف بطرف اصبعي
حسيته بصوته خلفي
" هذا بلبل
من كالها بضم وكسر حرف الباء خرطتها ضحكه
"اشبيج ترة هذا فريد من نوعه
حك شواربة وكال
"اخذته بورقتين  ما يموت ابسرعه !!
"انطيني انطيني اخذت منه العلاكه واني ميته ضحك
وهو مدري اشبي بس يتأمل بوجهي سكتت واحمرن خدودي .. حسيته اول شخص يعجب بضحكتي
رجفت ايدي اريد اطلع اله افلوس وكعت جزدلاني
دنك قبلي واني هم دنكت
بس ابسرعه رجعت وكفت
وهو انطانياه  
بالكوة طلعت الفلوس
"خليها هدية مني
"مرة ثانية !
كلتها بسخرية
ضحك وحرك شاربه بطرف اصبعه
" اعتبريها اعتذار عن موقف الورده
"هههههه
هم ضحكت من تذكرت تصرفاته
رحت وعفته ...

"ياربي هذا صدك فطير ههههه حاطليي طير حر ويكول عليه بولبول فريد نوعه هههههههه اكيد صايده من فوك النخلة مال حديقتهم
..
وكفت كدام مرايتي شنو اني صغرانه لو يتهيأ الي ؟
زين خدودي مو موردات ؟
ضحكت لنفسي وضليت اصنع ضحكه اريد اشوف نفسي من اضحك هيج اصير حلوة لدرجة الرجل هام بيه !؟؟؟؟؟؟؟
واني هم مدري اشبيه جني عصفور وجابولة الطعم
ياربي اكفيني شر هوى نفسي كلساع ومورطه نفسي بشي ..الاحسن ما اروح بعد اله ولا احتك بيه هذا يمنا بالمنطقه لا اصير مصيبه اني مو كدها ..

مرت الايام
بيوم كنت كاعد وفرات توه نزلني وراح ...ولازم انتظر من ال8 لل9
كالعاده مطلعه سجل واقرة ..
نزيت من انحط قفص يمي رفعت راسي شفته كدامي اااه يا اللهي
كان لابس فانيلة ربع ردن جويتي وبنطرون هم مبين ماكل وشارب عليه الزمن ... وشعراته يطايرن ...هو طويل حيل وضخم بس مو رياضي ولا يعلب حديد بس رشيق و حنطاوي ودوم الاحظ اديه افتح من وجهه مبين متعوب حيل .. وجه طيب الملامح خشمة طويل اشوية بس مو نشاز متوالم مع وجهه وشفاه مكتنزة و احواجبه مثل الهلال برابع يوم العيد متروسات وعنده طبرة كانها اثر ضربه قديمه بحاجبه الايمن  ملامحه عربيه بحته ...
باوعت للقفص بيه بلبل هالمرة
" مو اني الي ينضحك عليه
"نعم !!!!!
"ضحكتي عليه ذيج المرة  وطلع مو بلبل.. وعليه هذا الج تاخذيه
"هاا
مافهمت ترة اني ما كلت الك ؟
"ايي بس ضحكتج تارسه وجههج عبالج غشيم ..ترة ادري بس عبالي تمشي عليج
وعليه تاخذينه لأن ضحكتي من عرفتيه وسكتي
كمل مقلد
"ترة قالي وما يموت فريد من نوعه
ورفعلي بحواجبه وراح
بهدوء واني صافنه ممستوعبة شي !!!
بيومها ضليت حايره بالبلبل ودخلته وياي للقاعه والكل اتغزل بيه حتى الاستاذ عجبه ...
وحتى كعد تقريبا بالربع ساعه يتكلم عليه وطلع صدك فريد من نوعه و غالي الثمن وما يتحصل بسهولة !!!!! ابو حواجب ليش هيج يصرف وياي
اني ما منطيته وجه ولا مأملته بشي عباله بهاي تصرفاته انعجب بيه
مرت ايام واني ابو كذلة بدة يشغل فكري بتصرفاته ..هو صدك عود معجب لو يضحك عليه
زين هو شنو جريئ لو خجول لو شنو حيرني وياااه
بيوم صارتلي فوته من يم محله شفته فارغ بس هو دخلت
من غير سلام
" اكلك ترة الي سويته غلط ...شنو عبالك اني هااا
وتهديني وردة وساعه اجيب الي بلبل غالي الثمن ..
هااا انت شتريد مني
كنت اتحدث بصوت واطي لا احد يسمعنا
" سوة نفسه يطلع الي ايس كريم
" ترة مقصدي شي والله
" ارجوك بعد لا تجيني للمعهد انت تعرضني لاحراج
" بس اني ما احجي وياج كلمتين واروح
تنهد
"اي والله يابت الناس اني هذا مو ثوبي ما اشوفيني اخربط
انطاني ضهرة
وهمس بقهر
"بس شسوووي بعد عشكتج
اني مصدكت الي كاله
"شنو شنو انت شتكول
اهنا شفت اطفال دخلوا
سويت نفسي اباوع للبراد

همه فتحوا المجمده واخذوا وراحوا يدفعون اله
"عمو هاك عموا هاك
الحوا الجهال بعدين ملوا لأن الرجال كان محاوط احد المجمدات بأديه ومدنك راسه  .. 

حطوا افلوسهم على المجمده ملوا وراحوا
" اكلك انهي هاي السالفه واترجاك انطيني كلمه بعد ما اشوفك قريب على المعهد
"ما اكدر ... والله اني كل يوم اهناك رايح ...
"شنو!!!
"بس ما اخليج اشوفيني
"شنو شنو
" اي لعد اذا اخوج يعوفج ساعه كامله
" اي عادي وانت شعليك
ضوجته كلمه انت شعليك رد بعصبيه
" خوش غيره عنده
" لا والله !!!
ما اسمح الك
" والله اسمحين ما اسمحين اني كل يوم اهناك
"شنو هي غصب
"اي غصب لو نسيتي سالفه السيارة
وصلتني كأنه يعيرني
"بعد م الك شغل بيه فاهم
" مو بكيفج والله
اشو هذا تحول من الرجال الفطير الى واحد عنيد
" انتي لهسة ما اتعرفيني .. 
من شافني خفت منه وردت اطلع
" ترة والله مو بيدي اخاف عليج اني
كالها بحنيه وكفتني التفت عليه ردت ابجي
من التمست الصدك بكلامه
كلت بلين
"انت منو
" اني سلطااان
ودك على صدره !!!!!!!

يتبع