رواية سلطان زمانه الفصل الرابع 4 - بقلم زهراء العراقيه

وصلة تعجبي من طلبة ....جاوبني بأتزان

" لا والله بس حتى نضيفك انتي والاهل عادي يعني
" ها اوكي عادي من نطلع وين صاير ؟
"بمول ******
"اها قريب علينا اووك  بالعطلة نجي اني والحبايب
...
بعد ما خلصت المكالمة لمت نفسي
يامدري شجاني وعود صرت سبورت وقبلت
يلا قابل اني وين رايحه هو لمول ويه اهلي
خل املي عيني شوف بيه مممم بس مبين طاك اذا هو بس على مود يغير مود يروح يكعد بيه مو مالته تبع اخوه
فهمت من كلامه همه احوال ومراكز مممم وتالي وياك سيف ... تضل شاغل فكري ولا اكدر انام يعني اخلص من مكالماتك تطلعي التخيالات واضل افكر شكلت واشلون ضحكت اف حقي عمي عمري 27 سنة واعيش جفاف عاطفي قاحل . ! مدري اشلون اهل كبل يزوجن  وبيوم العرس الا تحجي ويه رجال ...اشو جيلنا اذا ما نلكه اهتمام نضل  ضياع واقل كلمة تسحرنا ... 

انتهت فترة امتحاناتي ... و بدت العطلة .... يومي عبارة عن اعمال بالبيت بسيطة  و طلعات مع الاخوة او الاب مرات يفرفرنا والاجمل اني حتى سهير تتوسل بيه اطلع وياها لان بابا ما يقبل تطلع مع خطيبها وحدها هي اختي الصغيره عمرها 24 خريجة معهد و موضفة حلوة وناعمه بس اشوية اطول  مني  وحنطاوية على بابا ورشيقة ...
كنت دوم اتحرج من اروح وياهم كقاطع ارزاق
مرات افضل اكعد وحدي بس همه ما يقبلون  الا وياهم على نفس الطاولة انوب من كثر ما اطلع وياهم واشوف خطيبها صرت وياه ميانه حيل..
هذي طريقة حرق الوقت الزائد والفراغ .. وبالليل اه يا ليل صار حلمي يقبل علينا بعد ما كنت اعتبره فقط للراحه والنوم  ولسكون النفس ... لا صارت انفاسي تتضارب من اشوف رقم سيف يتصل بيه .. يتحدث وياي عرفته هو منو  ... وشنو يشتغل طلع طبيب اسنان !!!!
اااه معقولة الله ما عايف صفه اتخليني ما اتعلق بيه لطفة ذكائة طريقه كلامه .. ما اعرف ليش جان يتصل بيه ...كلامه وياي بس للترفيه عن النفس هو دوم يكول هيج . لأن عنده هموم بس شنو هاي الهموم ما اعرف !!اني هم عرفته عن نفسي 

اكو حاجز بين كل الاشخاص الله حاطه حتى نتعامل بحيطه وحذر مع بعض و ينزال عند الافراد بمرور الوقت حتى تستمر بناء العلاقات ... هذا الي صار واعتقد هذا سبب ارتاحي اله وارتياحه الي ...من كنت اتكلم وياه انسى تماما هو نفسة ابو العيون العسلية والعضلات ... مدري ليش ما اكدر اتخيل هذا الجميل  يحدثني اني رهف ....رهف القصيرة والي من طفولتي اسمع كلام من قريناتي كلام هو بريئ وطفولي اني كاني باندا و وماعندي اعيون لو ام خشم ...حتى اخي كان يصيحني هذه اللقب لكن بابا حذره ما يعيدها من شافني اتحسس وكبرت ... مو صغرا بنفسي لكن رحم الله قوما عرف قدر نفسه .
،
بيوم رسلت رسالة اله احنه راح نروح للمول
هو ابسرعه رد .. هو مو اهناك بالعيادة . بس كال جاي انتم بس تأخروا اهناك ...
اني هم اتعمدت اتأخر حتى بس يلحك عليه وضليت افرفر وية دعاء و سهير وفرات وابنهم .. 
همست
"دعاء دعاء
خل ندخل لهنا
واشرت على محل مرايا جميلة
ضحكت ودخلنا تدري بيه سولة كلساع اعدل شالي
وكفت كدام وحده طويله ضهرت شكلي كله وباوعت هاي النضره الاخير الي لنفسي بعدها عيون سيف اشوفني هالمرة راح تتضحله ملامحي اكثر
كنت حاطه كلحه بيضه طوخ تكبر عيني من داخل ومن خارج حاطه ريميل ازرق و طبقتين ضل رصاصي و وردي  لأن بنطروني رصاصي و قميصي الطويل وردي وجنطتي بيها من اللونين والحمرة لونها ازبري .. وعدسات خضره فاتح عدلت كذلتي الي لونها من فوك اسود ومن جوة سلفر اطلعها كلها من الشال ومن خلف احط قراصه للجمال  تضهر كأنها شعري عالي من خلف  الشال ..
توترت اكثر وطلعت من المحل مع اهلي .. 
كتلهم على الكوفي .. دخلنا الها ضليت بس صافنه على ارضيتها والميوزة  ياربي ليش احس كلشي اهنا من لمسات سيف المكان راقي مثله .وكله روح شبابية ... كلبي فز من شفت نفس الرجال الي صفن عليه ابو شارب ثخين اضاهر هذا اخوه الي صاح بوجهي وسألني مات ؟!*
كان كاعد على المحاسبة ويه شباب اخوية شاف ركن وكعد هو والبنات وطلبوا أيس كريم اني بس اتلفت مثل المضيع ولف .. وينه اشو ما اجة ؟ وينك سيف وينك رقبتي راحت من كثرما التف ورافعتها .. اجت الطلبية  .. كمت اكل بضوجه .. اني بطبعي نازك اكل ملعقة وامسح بالكلنس شفتي وهكذا اكلت اشوية واكتفيت شربت ماي ورفعت راسي وصار بوجهي سيف دخل دخلتة احسها هزت الارض هز واحس كرسيه يهتز بحيث الماي وكع منه علية
سهير
" رهوف اشبيها ايدج ترعش غرقتي نفسج ؟؟؟؟
انتبهت نزلت الكلاص وهو كعد كداااامي ياااااربي هذا هو كال اريد المحك مرة ثانية ...بس اشلون بيه كمت اخربط من ثولي  سويت نفسي اكل ايس كريم رغم اكتفائي منه  ..
مسحت بالكلنس وطلعت زايد بالظغط خليت الحمرة تنمسح بالكلنس
رفعت راسي مرة ثانية شفت اخوه كعد يمه  . وهو نظرة لأخوه ونظرة عليه مبتسم واني هم ابتسمت بخجل
دعاء" يا رهوف حمرتج ممرغطة حنچك اتفشل
انصعقت صعق يعني شنووو اني عود باوعت اله بثقة وابتسمت اثاري هو يبتسم على شكلي شلت كلنس ومسحت حنكي
سهير" يا انوب دمرتي نفسج بالزايد .
اااه مسحته بنفس الكلنس ابو الحمرة فتحت كامرة الموبايل شفتني اخرع حنكي وحتى جواه حمرة ممرغطه  .. عزه
باوعت لسيف بس يباوع الي ... لعنت حظي وطلعت اكلنس ورحت ادور على حمامات  .. رجعت للبيت طالعه روحي اني رهف ام البرستيج والاستايل  ودومي لبقة ليش هيج صار بحضورة للليش خربت كلشي كعدت ابجي  كلشي ولا موضوع يتعلق بمضهري حيل يقهرني وكدام الشاب الي معجبة بيه والي بيه محاسن ولباقة الدنيا كلها يصير كدامه هيج واطلع ابسرعه .....ليش ....ظليت ابجي على حالي وهو اتصل ما رديت  عليه ما رديت ابد ...
لحد ثاني يوم هم ما جاوبته ابد .. اجتني منه رسالة
" ليش طلعتي ابسرعه ما لحكت ارجع الج الامانة.حرمات والله طلبت منج تجين حتى انطيج شغله يلا خيرها بغيرها
أي امانه يقصد ؟؟؟ شنو جان يريد ينطيني ؟

اووف كله بسبب الحمرة اللعينة حرمتني من كلشي .. دك تلفوني عرفني قريت الرسالة ..
"الو
" يا اهلا وووو سهلا اشلونج رهوف بالله صدك كذب شصار وهيج اصرفتي ... هسة عوفك من الملتقى بس ليش ما تردين لا يكون اتصالي بيج يعرضج لحرج ....
" لا بس كنت ضايجه اشوية
" ليش ؟
" هيج بس من اشياء صارت مو يمك السالفه
"اها على راحتك اذا هيج ... بس بقت الامانة يجي يوم واسلمها الج
'م مااعتقد بعد
"ليش
"ما اعرف عوفها على الزمن ...
ضلينا نحجي لنص الليل وهو اترخص وراح  .  وعافني اذكر كلماته الحلوة ..
مشت الايام بينا اسرع من المرصع  وفاتت ايام
اني ما احب الاختلاط ولا كلام النسوان يطلعن نسوان اخوتي يوجبن ،، و للنادي الرياضي النسوي بس اني ولا كنت احب هاي الطرق بالترفيه بس التسوق احبه حيل ودراستي هم كلش مهمه عندي ... وصلت لنهاية صف الخامس بين دراستي وعذابي من سيف بديت اتعذب من التفكير بيه حيل .. الاتصالات مالته خفت بين يوم ويوم او بين يوم وثالثهم .. هو دوم يطمن عني و يسأل عن دراستي لكن مو مثل اول ننسى نفسنا بالسوالف لا ابسرعه تنهي المكالمة ..يخاف عليه هو كالها مرة لأن علاقتنا ببعض مرفوضة .. ضليت شهر كامل افكر بكلمة علاقتنا شنو يقصد بيها وشنو مقصووده مو تعبت وهو لهسة ما محدد شكلها ..جنت دوم اخاف لا اخسره  ....
يوم 3/13
كعدت من النوم تعبانه من السهر البارحه كنت سهرانه اقرة وتعبانه حيل كوة كمت لفيت شعري وطلعت غسلت و رجعت اكلب بالكتب ..
ممم اليوم هو يوم عيد ميلادي خل اشوف احد يذكرة ..  محد ذكره  بالبيت اووف دومي منسية رغم اخوتي يذكرون موعد اعياد ميلاد زوجاتهم الا اني !
رحت للدوام ... بالحلة
صديقتي كالت بأنبهار فائق
" ولج ولج ولج شنو هذا المزززز خرب
باوعت لوين ما اتباوع هي ....شفته هوو فلا انساه هذا سيف !!!! واكف يم سيارته وبيده كارتونه !!!
اول ما شافني ابتسم واشر لسيارته ...نزلت منها طفلة عمرها 10 سنوات اجتني تركض اهنا البنات خفن وصديقتي راحت ... انطتني الكارتونه وضحكت وراحت واني واكفه بمكاني صنم  .. هو راح ويه البينه حتى ما انتظرني افتحها ...

اخذتها ورحت للبيت يكلك شايلة مفخخه خفت افتحها
سهير صارت بوجهي
"هاي شنو ...
كانت بالهول كاعده هي والاهل باوعت الهم وكلت
"هدية من صديقتي خطية اليوم ذكرت عيد ميلادي
ابتسمت بضوجه حسستهم بتأنيب ضمير ورحت من يمهم
قفلت الباب عليه وكعدت اكبالها اشوفها
واني كلبي يرعش
فتحها وجان تطلع كيكه بالويفر اووووويلي اشكثر اعشقها  اوووف منك سيف اشذكرك بعيد ميلادي يا حلو خليتني احبك اضعاف  وكل يوم ازداد تعلق بيك حتى ثكلك وانشغالك عليه حبيته  .. 
اندكت الباب
سهير
- حبي هسه دفتحي اشكد حساسه والله نسيت فرفوشه افتحي ...بابا كال نتعشى برة ويجيب الج كيكه واطفين الشموع بااليل
دعاء
" حبيبة افتحي ... والله حقج ازعلين عليه ولا مرة نسيتي عيد ميلادي ... رهوف
عبالهن زعلانه ما يدرن اني فتحت رساله اجتني  من سيف
" اليوم هو يوم اشراقة القمر ..كل عام و العزيزة بخير ....فأنت نعم الانسان الطيب والخلوق ..
مممم ذبت ويه كلماته ونمت على فرشتي

بيوم تجهيز سهير طلعنا للاسواق واني اصريت نروح للمول ادري بيه هو اهناك رحت حتى افاجئة بصراحه كنت فرحانه بيه ممصدكه هذا الانسان يكن الي اني رهف ! مشاعر بس كل الي يسوية يدل على اني اهمة
راحت ويانا حماة سهير الصغيره منى  و نهى كمرة كبيرة
كنت لابسة تنورة قصيره فوق الركبه و بدي
كعدنا واني اعيوني عليه وهو ولا انتبه الي، ما شافني
اني هم استغليت الفرصة وضليت أتأمل بيه وهو يقرأ كتاب مبين من العنوان انكلش ... اشكثر جذاب و رجولي شكله اشكد احب هدوووئه اكثر صفات احبها بالرجل الهدوء والاتزان والثقة واللباقة وسرعة البديهه والذكاء واهمها يكون حكيم ...وكل هاي الصفات صارت ولكيتها بهذا الرجل سيف سيفي فارس احلامي ... ابد ما بيوم سمعني غزل او كلمة على الدوام مؤدب وطريقة مدحة مرضية الي  .. ردته بس يرفع نضرة ماكوا ملتهي يقرأ ااااه اني اموت عليه هيج وذايبة بيه بس هو شنو متاني اني متأكده هو هم يبادلني نفس الشعور ...بس يمكن يخاف يخسرني اخاف اصده لو ما واثق بمشاعري اتجاهه ....
انتبهت على نفسي الولد انتبه لوجودي واخيرا باوع عليه وابتسم واتسعت ابتسامته ...حك وجهه على السريع مكان مصدك اني كدامه بشحمي ولحمي كبل كام من مكانه .. اجتنه طلبيه احنه ما طلبناها
سالنا النادل كال هاي هدية للزبائن الجدد وابتسم وراح مبين يكذب وهذا سيف راسله محد فهم الفلم غيري وهذا كام من مكانه واتقرب علينا  ممصدك اني كدامه ويمه  يمكن ابد ما رفع نظرة عنا ....
وحان وقت روحتنا ... من كمت ..
سمعت احد يصيح ورايه يا ابنية نسيتي هذا يا ابنيه
وكفت بمكاني
هذا صوته ...ااااه سيف شسوي هذا !!!
وكفن البنات
هو ابتسم النا وانطاني كيس واني صافنه معرف شنو يسوي
"هذا عفتيه
راح ..
اني متت من الرعب
هنه مشن عادي لأن كنا محملات اكياس ما اهتمن .. اني سولتي بالكيس اريد اعرف شبيه ..
اجتني رساله ردت افتحها بس ابسرعه اجانه سامي اخذنا ...واني بالسيارة فتحت الرسالة
" هلوو
اليوم منورات .. هاي الامانه كنت حاطها بالخزنه على امل تجين وانطيها الج .. بايدي وتاخذيها من ايدي وصار واجيتي ...ارجوا ان تعجبج  ..
حسيت الطريق طوويل اشوكت نوووصل حتى اشوفها . ما عاونت نوصل عفتهم ورحت اركض بس سهير اجت ورايه خرب .. اخذتها ورحت للحديقه ..
فتحت الكيس .. مغلف كتاب زهري ..طلعت الكتاب مكتوب علية هواجس .. طبع  ..
فتحته ....ضليت صافنه بس قريت الكلمات قلبته ااااااه سيف طابع الي خواطري ....حطيت ايدي على حلكي وما اعرف اشلون افرزن مشاعري فتحت الرسائل ...قريت اخر رساله واقسمت هو يحبني  ...
" سيف انت درة
ماكوا منك
ما تم الارسال
اني كنت في قمه انفعالي ومشاعري جياشة جدا
كتبت اله
شكر
وامتنان كثير لكن الرسائل تفشل النت ضعيف
ضحكت على حظي وكتبت احبك حيل سيييف اموت عليك ...ادري بيك اتحبني
هيج رسلتها رغم انفعال مشاعري لكن ادري بيها مراح توصل بس حتى اشوف الكلام وهو بصفحته ااااه اشكثر احبه اهنا هو دك ..
فتحت خط واعيوني الضحكه مرسومه بيهن
وصوتي نبراته تركص
همست واني اباوع يمنى ويسرة لا احد يجي
"الووو
" اهلااا عجبتج الامانه
"كلش كلش
شكررا الك ما اعرف اشلون اشكرك سيف
" رهوووف انتي صديقة عزيزة لهذا راح اطلب منج طلب بس ارجوا ما اتفهميني غلط
"امر انت
" اريد رقم الشابة الي وياكم اليوم ..
تشوشت افكاري
" شنو ؟؟
" البنية الحلوة المحجبة ..
"منو شنو
" رهوف هاي الي لابسة جبة ...حيل عجبتني لا اتفهمين غلط والله اعجابي غير مؤذي بس هي صارت بخاطري اشوفها مبينه خلق واخلاق وجذبتني حيل
هو يتكلم واني أتألم احس ضرسي كام يووون دك بكل راسي و البرودة صقعت جسمي كله كمت ارجف وكع التلفون من ايدي ....
صدري ..  احس صدري ما يدخل لرئتي هوى  ..دا اختنك ...
مسحت وجهي وشلت تلفوني واني اعيوني اصب لغيت الاتصال ورحت لغرفتي .. كمت ابجي بحرقة .
ردت اشوف اخر رساله منه والحب الي حسيته بيها
ردت امووووت لا متت بذيج اللحظه من شفت اخر رساله مرسولة وتمت الرؤيا  !!!! طلعت السيم من التلفون وشمرته وكمت افتر بالغرفة ما مستوعبة كل الي صار اعترافي اله برساله كنت العب بيها مو قصدي .... و اهتمامه شنو يتفسر ....شنو الي دايصير وياي ...اني شسووويت ...
رحت غسلت وجهي بماي بااارد بلكت يهدأ الوجع الي بيه واصحى اشلون يهتم بيه ويطلع اصلا ما شايفني ....
االيل كله ما نمت واني اتوجع نفسيا ....حتى ما رحت للدوام ولا ساعدت سهير بالتجهيز
ذبلت حيل وضعف حالي كل ما اذكر الي الصار الوم بنفسي .. ما فاهمة شي ...
ابد
مرت ايام اصعب من الصعب ...وقربت مراسيم زفاف اختي واني حالتي يرثى لها ...
طلعت من غرفتي شربت ماي ...اذكرت بابا . خل احط اله ماي يشرب بالليل . قبل لا ادخل سمعته يكول بحنيه
"بابا هاي اختج 
" والله بابا احاول اطلعها وياي ما تقبل ودومها حابسه نفسها بغرفتها
ما دخلت ورعشت ايدي اجه الماي يوكع ليش يحجون عني  بابا وسهير؟؟؟
" يمكن لأن قرب زواجج وهي اشوف نفسها على حالها وهي اكبر منج ....خطية حاولي ما اتبرزين فرحتج وتحجين كدامها اهواي لا يصير بخاطرها
دخلت عليهم حطيت الماي بعصبيه ورحت ..
وصلت لحالة لا تطاق وبسببك يا سيف شنو تلعب عليه ...  طلعت التلفون وركبته ... اتصلت بيه ..
" اسمع رجائا انسى ذيج الرسالة ترة وصلت بالغلط ...وامسح رقمي ولا تذكرني بعد اوك ...
سديته وكعدت حضرته قبل لا يتكلم ولا كلمة
رحت ع الكتاب الي طبعه الي مزقته وذبيته بالزبل

توحشت بعد ما سمعت كلام اهلي صرت فعلا احبذ العزلة حتى الم شتات نفسي ودوم الوم بروحي على تصرفي اشلون العب بهيج شي واجازف هاي سواها الحظ وانرسلت هم كسرت كلب وهم فشلة كبرى ...
عدت ايام ... بحنة سهير حاولت اوكف مع اختي
واطلع نفسي من المود ومالكيت غير التسوق ونسه الي ...
خلص عرس سهورة  ...وصارت الغرفة وحشة علية حيل ...
كنت كاعده تعيسة على حالي ...
بحاجه ماسة لتفريغ الي بداخلي ... اجتني دعاء كعدت يمي .. صارت عندي رغبة ملحه اسولف الها كلشي حتى اريح نفسي  و اجيت اتحدث
غلبتني هي بالكلام
" رهوف ... حبي اريدج بسالفه
" ها دعاوي
"ترى نهى طوختها وياي و دومها اتعوف شغلها عليه واني ساكته بس زودتها من حتى جهالها .. عليه حجيت وياها رايحه شاكية لفرات وهسة زعلان وياي
بجت وكالت وهي مهظومه
" حتى غلط عليه ....
" ياا حبيبتي اسكتي لا تبجين كطعتي كلبي ...

بيومها نامت يمي زعلانه ... وحالتها حاله ...اني ضليت مساهرة ليلي كالعاده ... رن تلفوني الصرصور
فتحت الرسالة ...من شفتها من سيف
نص طويل مقسم الى عدة رسائل
قريته
" رهف افتحي الحضر خل نتفاهم

رهف والله ما اريد خسرج ابد اني دوم اردد عليج هاي الكلمه واعيدها
انقطعت الرساله لكيتها بنص ثاني
انتي صديقة غاليه علية
افهمي شنو يعني صديقة يعني اخت احطها على راسي والله وياج عرفت معنى ان تكون الي اخت تفكر بعاطفة ..

فتحت النص اللخ الي بيه تكملة ودوموعي سالن
وتسمعني ...اني قبل لا اتعرف عليج ماتت اختي متلازمه الدوان رغم مرضها لكن حيل  افتقدتها ولكيتها بيج
ضليت صافنه على النص
اخته وميته ومريضه واذكره بيها ؟؟؟
"هي بمثل طيبة قلبج ونقائة لكن انتي خير صديقه وفاهمه وواعية كل كلامي وياج مكان يدل على شي غير الاخوة حتى عيد ميلادج حفظته لأن اعرف اشكد تفرق وياكم انتم البنات هاي السوالف .. صدكي رهف اذا رحتي راح اتحسسيني بالفقد مرة لخ
كملت كل الرسائل وحطيت التلفون على قلبي وابجي وانوح  وكلبي يتألم وياي ...يعتبرني اخت !!!! والاهتمام طلع اخوية
هههه كمت اضحك بعيوني دموع طلعت من الغرفة لا دعاء تفز كعدت بالصالة ...اعيد بكلامه وافرفح
.
الصبح ما رحت للدوام وكفت كدام المراية ..
اول ما كمت
حليت شعري كان سرح واصل لخصري
"ههه اشلونج اخت سيف  اتخبلين مووو
اهه مو اني نفسي مكنت مصدكه  نفسي بيه انوثة تجذبه اصلا .. هو كان واضح من يحجي وياي حالي حال اخوه اشلون انعميت ...ضليت اجمع بالكلام واثبت لنفسي اشكثر ثوولة كنت وما افتهم ..
بعد ما كلشي وضح الي ... حاولت اتناساه ...وكسرت خطوطي وغيرتهم  ..كلشي غيرت بيه احاول اضحك واني من داخلي ادموع واحزان ...

بيوم كنت بالبيت كاعده عادي والملل رفيقي ..اجتني اختي صرح ... هي طبيبة جلدية وزوجها هم زملاء وحبوا بعض تزوجوا من عشر سنوات
ضلت تلح عليه اروح وياها للجم وارفه عن نفسي واني ما راغبة ابد لكن شسوي  لبيت رغبتها ووافقت اسجل وكمت اروح وياها العصريات ...هي عدها سيارة ...
بيوم راح ويانا زوجها يوصلنا لأن سيارته بالتصليح ويريد.ياخذ مال مرته
نزلنا  وصارت عركه كدامنا من وصلنا كدام الجم مال زلم ما نعرف شنو القضية بس نزل زوج اختي واحنه نكله لا  لا اتروح يمعود
نزل ما سمع كلامنا وحاول يفاكك و هوسة زلم تتعارك بالصياح والوعيد وصارت بالبوكسات .. زوج اختي اكل من الكتل نصيب واحنه نزلنا انصيح والناس التمت بس تخاف تتقرب لا يشملها الكتل
ست زلم بينهم يتعاركون رجل اختي وخر عنهم عينه مزوركه  ...
صرح شدخلك يمعود
هو كانت روحه طالعه .. باوع لذولة بغل وسب الي ضربه بصوت عالي
" انعل ******
همه ما عرفوا اللعنه المن واحد منهم حامي اجه على زوج اختي واستلمه واحنه نصيح والناس اهنا ادخلت بس ذوله مخابيل يضربون بالزلم حتى يرجعون يتعاركون  ..
اني اجرجر برجل اختي وابجي
ومرته هم ...
ضربت بنعومه  الرجال ردته يروخر عنه
رجل اختي
'رووحن منا
صاح علينا وذاك لزمه من خوانيكه
شورطك يا احمد
اهنا اسمع واحد صاح بيه
الزلم من تتعارك النسوان تتكتر
كان الغضب يشعل منه
وكبل هي طفرة وهي دفرة على ضهر الي لازم احمد رجل اختي ..
خلاه يهد احمد ويلتفت اله بوجع والرجل استلمهم ما يعرف كانه شنو السالفه بس يصيح
" دفرهم وخر شاب خطيه هم حاول يفاكك واتورط عنهم وفك من العركه
حضورة قوية بس الكلاب الصعرانه التمت عليه وهو كبل ماعنده مانع دخل عراك مو مهدي للوضع ..
احمد  انتكأ على السيارة ياخذ نفسة ...
واني بس صافنه على الرجل العراك يكلك متونس بس يصيح و يعير بيهم جبناء محد يكدرله .. كان مغتر بروحه حيل ...شعره  واصل لأذنه وعركان لابس فانيلة مارونية وكلها عرق وشعره هم صار رطب ووجهة يكت كت وهو مستمر منا من اجت الشرطه شفته اي شفته من خله وشرد !!!
ركض ركضه سريعه اختفى احنه هم صعدنا واختي ساقت مالنا بالمشاكل .. 
يتبع