رواية سلطان زمانه الفصل السادس والعشرون 26 - بقلم زهراء العراقيه

سلطان زمانه
استقبلتني بنت اخي سامي ..
سلمت ببرود و شرود ودخلت .. اول ما فتت كعدت ارضع ملك الطريق كله تبكي واني بالي مو يمها ...انطيتها صدري ما اخذته وتصرخ ..
نسوان اخوتي استقبلني ...سلمت عليهن واخذن مني ملك ... سألت عن بابا كالن بغرفته
حسيتهن يباوعن لجنطي برهبه ...
نهى" خير رهف ؟؟خو ما صايرشي
" كلتي بابا بغرفته...
رحت اله ...شفته كاعد يقرة على كرسيه الهزاز ...من شافني خلع نظارات القراءة .. و وكف الي
" هلا برهف ...
رحت اله ... هو مد ايده حتى يسلم عليه بس اني رميت نفسي بحضنه وبكيت .....يمكن خوفته عليه ...لكن غصبا عني انفجرت بحضنه ...
وهو بس يمسح بضهري ...
ابعدني عنه ... واني اشاهگ ...
"شكو يابة .. ليش هاي الدموع ... صاير شي لزوجج بنتج وين ؟
"بابا ...
من بين شهقاتي
" اني عفت البيت ...
"ليش
ما اريد اكمل ما اكدر اكمل وياه بابا ما اكدر تعبت ..
مسحلي دموعي الي ماتنشف  واخذني كعدني على طرف السرير وجاب كرسي وكعد كبالي
' شنو الي صار ..
سولفت لبابا كلشي ..اقصد ماضي سلطان واشلون طلع ماخذ ورثه بابا ضل صافن ..كل ظنه هو ماخذه بالقانون عباله عنده وثائق تدل على ملكيته بس عمه مكان منطيه حقه واخذه منه  ....هذا الي الكل فاهمه الا اني ..عبالي بالبداية مثل ما كالت سلطانه متمرض عمه ومتندم بعدين فهمت بالغصب بس كل ظني بحيلة اشرف من الي سمعتها ... متلاعب  بعرض عمه ...
بابا حط ايده على جبينه ما يعرف شنويكول ...
'بابا متأكده هو هيج كلج
"اي بابا اي ..هو لأن منهار كال كلشي الي ...
" يعني هو حرامي لص .. دخل لبيت بنت عمه الارملة سرقها و صورها !!!!!!!!
معقول  .!!!!!!!
" يكول رجعت الها ذهبها من بلغتها مو بحاله  اني
" سواء سرق او لا هو الي سواه ذنب كبير وان كانت بنت عمه مومس فهمو مقرن استغفر الله ياربي
استغفر الله
معقوله يطلع هذا من سلطان ...على كم فلس
لا حول ولا قوة الا باالله وين راح توصل بينا بعد وشنو من تفكك عند هاي العائلة ... كنت اظن فارق مستويات لا اكثر ... كلت تتحملين بيئته افضل ما اضلين على وضعك   
لكن ما اصورت بيوم تطلع هيج اخلاقه
بابا ما يدري بمعاناة سلطان مع عمه .. حس بالندم الكبير ...
طلع بابا من الغرفه تاركني ابكي .... رن تلفوني ..
رديت عليه
" ها اشرايد
"ليش طلعتي رهف ؟
" اني بيت اهلي وسولفت لبابا كلشي  انتهى سلطان بابا اكيد راح يفرقني عنك
طبعا اتحدث وابكي ..
هو كان صوته ذبلان
" شفتي بس كلت الج طلعتي
"لعد اتريدني اضل على عماي ... ليش هيج ليش
كل حلفانك كذب
"ما كذبت عليج بيوم
صحت
"وحلفانك الي شنوو
" ما حلفت على شي جذب .. حوراء نص كلامها جذب ..سوتني مجرم ...هي بس .....
قاطعته
" النهاية .. كانت صادقه بيها
وهاي الاهم ...
"وعدتيني ما اطلعين
"وانت حلفت الي كذب
"حتى ما اخسرج
" واني رحت حتى ما اخسر نفسي  
سديته ودموعي مثل البركان وانفجرن عليه ...
حركني حرك    من اجو اخوتي صار عدهم علم و علت اصواتهم بالنقاشات وملامه سامي لبابا .. واني منعزلة عنهم بغرفتي السابقه وحاليا تشغلها بنات سامي كبرن وصارن صبايا .. كاعده يمهن وبنتي بحضني تلعب ....
واسمع سامي يسقط بسلطان اب بنتي 
فرات يكول ..لازم يطلكها ذوله ناس تعبانه طلعوا انغشينا بيهم و سامي ما ينطي حلول بس يلوم بابا يكول لازم اكعد وياه بالاول واتفاهم ...  وصفى بالاخير رأي بابا راح يروح يتكلم وياه سامي كله لا اتروح اله واتكبر راسه دز عليه يجيك لهنا واحنه اهنا وياك نطيح حظه
من يتكلم سامي بهاي الطريقه عنه اني روحي اتروح وانهظم ... بعده حبه يدك بالراس ..
للعصر ..
بابا كلي راح يجي سلطان خابرته ...
..
اني حابسه نفسي بغرفتي وبلغتني دعاء ان زوجي وصل بالاستقبال مع بابا واخوتي  ...

بعفوية حاجيت ملك
"اجه بابا ..
ابتسمت بألم .. هي ضحكت ومشت مثل الارنوب .. طلعت من الغرفة
"تعاي ماما
"بيبة بيبة 
راحت للهول كبل ..
وكفت
"ين بيبه
شهكت مكدرت اشوف لهفة ملك واتحمل ما ابكي ..
اخذتها وكفتها يم الباب الاستقبال و وكفت يم الحايط الها وهي كأنها  شافت ابوها جانت اتباوع الي من شافته دخلت تركض .. 
صار هدوء كأنهم  سكتو
طلع بابا وحامل بأيده ملك شافني واكفه انطاها الي
"لا تخليها تدخل
كانت مهظومه وصرخت من اخذتها ورحت للهول  . ورة اشوية سمعت سامي يصرخ وينتر
" احنه انغشينا بيكم  ناس  تعبأنه
ما سمعت رد سلطان كان صوت سامي عالي ويهين بسلطان كأن بينهم ثار وهسه انتهز الفرصه من صار الخلاف ...
" اعراضكم ما صنتوها اتريد نأمنك على مرة
"احترم نفسك اني لحد الان محترم كعده عمي
واخيرا سمعت حسه على
" شوف انت مرة ما الك يمنا بعد ..  ورقتها توصل

" اعتقد عمي الي كاعد .. والمرة هم وينها . همه الي لازم اتافهم وياهم
علت اصواتهم اكثر واسمع فرات يسكت بسامي بس بابا ساكت ...
بعدين سمعت صوت فرات صاح
"ابوك اتخربط كافي
وانت روح الله وياك
اني ركضت لهناك مسرعه
"بابا ..
سامي " كله من وراك .. اطلع منا الله لا يرضي عليك .. كان بابا جالس وحاني راسه وفرات لازم ايده يفركها ويسأله اشلون صار
صار كدامي سلطان ... نظرلي نظرة عابرة ..... وراح
ما بيها عتب بس خذلان وندم .. اني رحت يم والدي اشوفه اشبيه   كال ما بيه شي ودوني لغرفتي  .نص الليل اتخربط علينا ودينا للمستشفى .. ضاربه عنده الجلطه .. ظل ايام بالعناية الا طلع منها . 
اني التعب والسهد وضح عليه الم الاشتياق و خوفي من فقد والدي هو الاكثر معذبني ...
بعد ما اتحسن طلع من المستشفى ..اتحدث وياي .. وعرفت سبب انتكاسه الندم  حاس هو السبب كل ظنه هو الي دخل سلطان لبيتنا هو المسؤؤل ما يدري سبب ارتباطي بسلطان  حبي المسبق اله والا ابد ما كنت اوافق على واحد مثله لأني بس هايمه بيه رضيت ادخل بيته وحاولت قدر ما اتحمل ابقى وياه لكن فشلت ...سنتين زواج منه ما حسيت بالندم قدر هاي الفترة ..  الحب  مو كلشي ...اكو الاهم منها وهي الثقه الصدق و الاهم انك اتكون مأمن نفسك مع الشريك...مو كل يوم مكتشفه شي اعظم  . 
مر شهر سلطان ما يسال عني .... بس سلطانه دوم اتخابر اتلوم بيه اتكول سلطان متعذب ليش عفتيه ..بهذا الوقت هو بحاجتج ..
ليش خليتي بيه ..ارجعي لبيتج ...
ومرة خابرت تتوسلني اخابره اسال عنه .. 
ومرة خابرت وكالت سلطان  يريد يسمع صوته بته .
فتحت اسبيكر وكركشت ملك حتى تضحك ويسمعها ..
"روح عمه ..فديت هاي الضحكه .. هاج هذا ابوج يريدج ....اني من يمي حطيت اذني وياها ..
" ملوووووك
اجانا صوته الخشن ..
"ملوووكه حبيب بابا  الدبي
سكتت ملك . اتباوع يمنى ويسره عبالها ابوها يمه ..
طلب فيديوا .. ضغطت موافقه .. اني اكترت على صفحه وولزمت التلفون لملك ...اول ما شافت ابوها
ضحكت و صفكت بأديها ..
"بيبة
ضلت  اتناغي اله وهو هم
واني اسمعهم بالكوة لازمه نفسي
"ملوكه لا تنسين بابا
" جرت التلفون ملك قطعت الاتصال  بحركتها ..
...
اخوتي كالوا اذا ضل مغلس خلال اسبوع احنه راح نوكل محامي همه من سمعوا بقصه بت عمه لعبت نفسهم من العائلة كلها .....

سلطانه دوم اتكول اريد اجيج بس اخاف من نسوان اخوتج يسمن بدني .. اني اتكلم وياها وما قطعت علاقتي بيها .. كنت اسمع منها اخبار سلطان  وبلغتها اذا ما يطلك راح ارفع دعوة تفريق .. سدت التلفون  بوجهي وهم ما عادت تتصل بيه ...

سامي كمل بناء بيته باقي تلحيظات بسيطة حتى ينتقل بيه ويلبي رغبة مرته لأن بناته كبرن ورامي هم كبر ..
ما بقى من المهلة بس ثلاث ايام ويرفعون الدعوة 
كنت اتمنى اغمض عين وافتحها و الكه نفسي خالية من كل ذكرياتي وياه وانسااه ... هي بس ملك اكبر ذكرى اله يمي اشلون انسى ! ... اساسا اني لخاطرها راح ابتعد ما اريد بنتي اتكون الها صله بيه اخاف ربي يعاقبه بيها بيوم ويردله الدين .. لولاه لكانت شيماء تزوجت الي كانت متفقه وياه .. و ما توفت حوراء ... كل ما اكول اخاف اني ظلمته من تركته اتذكر عملته  ..هو نفسه مراح ينساها وراح  يضل يعاني  .....
مرات اكول اني السبب عفته ينجرف للهاوية  اااه لو بس ينعاد الزمن لو بس عدنا فرصة ثانية نصحح اخطاء الماضي ...

كنت اقلي عشا للأهل وبنتي تلعب بالهول مع جدها  ..
رن تلفوني ..
شفتها غادة ...طفيت النار عن الطاوة ورحت للغرفة ..لكيت بنت سامي بيها عفتها ورحت لغرفة بابا انتهى الاتصال .. اني عدته
"ها غادة  اشلونج
وصلني صوتها الباكي
"خالة ..
انرعبت
"شكو غاده صاير شي
"خالي خالي .
"اشبيه سلطان
" اخذوه اخذوه الشرطه ...
"شنو شنو ما فهمت الو
الو
بس تبكي متكدر تحجي ..
الو يمعوده احجي غاده
" ضارب عمي  قاسم بالسجين
انعقد لساني  . وقلبي  راح احسه يريد يوكع لجوة
هاي شنو اتكول ..
" شن شنو
" جاي متعارك مع خالي بالمعرض
"واشجاب السجين اهناك
' مطوة هي ما ادري خاله عمي يكولون مضروب  بخاصرته
"لا حول ولا قوة الا بالله . 
اعيوني يحركني بس دموع ماكو ما يطلعن وراسي صدع ...   سلطان هاي اخرتك تقتل ..
عصبيتك و اندفاعك وداك للهاوية . ضعت وضيعت ملك وياك ..الليل  كله مانمت واحس ضغطي هبط .. من هبطات سلطان ... ما كدرت اكول لأحد من اهلي شي ..  كافي عليه  سامي الي محسسني اني مذنبة لمجرد ان تزوجت الانسان الي هو مكان مقتنع بيه  .
مرن يومين واهلي عرفوا بالخبر  وبابا جدا اتندم    . واني هم الندم عشعش بيه ... كل ما اشوف ملك قلبي يتفطر عليها شنو ذنبها والدها هيج يطلع .. 

ما اعرف تفاصيل قضيته شنو بس سمعت سامي يكول ضارب ابن عمه وكليته مضررة لكن ما تلفانه
بابا هو مريض من الاساس .. و احتارينا بيه مرة لخ .
قلبه ضعف يروحي .. وما رحت للمحامي وهم هي هوسة صايرة فرات كال الي انتظري قضيته خطرة خل ينحكم الا نرفع قضية ابسرعه ينطوج حكم ..
اني من يحكون وياي بهذا الموضوع ابد ما استوعب هذا سلطان هيج نهايتي وياه مأساوية ..
صرح دوم تواسيني  واتكول لا اتباوعين فقط للتوابع السلبية من هذا الزواج ... اعتبريه منحة امومه الج اخذتيها منه .... هي بنتي فقط الي مصبرتني على العيشة
الله سبحانه وتعالى ما نعرف ابد حكمه شنو وليش دوم تضهر النا امور نحسبها مو بوقتها .. حسيت بأضطرابات عندي وشك ضئيل صار عندي .. كلت لصرح خافت هي الاخرى لا اولد ضحية اخرى مع ملك ... اجتني بالليل  .
وياها تحليل حمل منزلي .....اني من ولدت ملك لليوم ما اخذ مانع سلطان رافض واني هم ما اهتميت كنت اتمنى ريحة الطفل  . لكن هسة ومن شفت التحليل ايجابي متت بجي يعني اني بيا حال ...
ثاني يوم رحت لصرح ... اشوف اني بيا شهر بالضبط  لأني ما احسب ابد ...
طلعت بالثاني  ... البيت كله سخط عليه وكأني اجرمت صح محد عاتبني لكن اشوف بعيونهم الملامه وكأنهم يكولون الي عازين حمل احنه
مرت فترة واني كلش صرت تعبانه بسبب حالتي النفسية .. وبس نايمه ما اقوى البي احتياجات ملك اتوسل بنسوان اخواني اواولادهم  هالمرة ماكو سلطان يدلل ولا خدمه  سلطانه .  اكلاص ماي اشيل همه اشلون اكوم اجيبه ..صرت شبه المقعده بسبب ضهري ..فطمت بنتي عن الرضاعه واجرمنا بحقها جرمين الاول ابتعادها عن والدها والثاني فطامها ..
دا اريد اروح للتواليت اسند على الحايط وامشي .شافني سامي ..
"ااووف
تأفأف وتأتأ وفات من يمي غاضب ..
نزلت دمعتي ..من تذكرت حملي الاول من كنت اسند على سلطان وهو يحملني ما يصبر يشوفني بالقوة امشي .. لو من يسبحني من اشتد عليه التعب .هسه وينك وين صار حالك بيا مكان انت ؟! ما تجي تسندني  .. محد يرد عليه من اتصل بيهم .. اريد اعرف اخبارة .. 
بيوم خبرني فرات لازم اروح وياه اوكل محامي بس والدي ما قبل ..كال من تولد الا يتم الانفصال ولازم نبلغ سلطان بحملها سامي اعترض محد يروح يبلغه
من حديثهم فهمت سلطان محكوم ثلاث سنوات

بيومها من عرفت سلطان راح بلا عوده ماكو اي محل رجعه بينا .....وتأكدت هذا اخر المطاف بينا تعرضت لنزيف حاد  دخلت على اثرة مستشفى ثلاث ايام ..كنت جسد بلا روح خاوية ضجت من الطفل بعده ما راح .. عبالي اخسره واخلص من حملة اذاني و هو بين احشائي زودني تعب وتفكير فوك همي ...
رأفتا بحالتي من طلعت محد جاب طاري زواجي او موضوع طلاقي  حفاظا على صحتي 
خواتي اخذن فترة يجن كل يوم على وحده اتشوف طلباتي ...لكن فترة وبطلن خاصه صرح بس الصبح كانت تجي قبل دوامها وهم اظنها تعبت اساسا عملها مرهق
دعاء كانت تساعدني لكن هم تمل من مدارات وحده ملازمه الفراش وصلت  حالتي حاجتي بالقوة اقضيها الا بمساعده احد ..  بوسط هذا البؤس ما لكيت غير ايد وحده ابد ما ملت او كلت ..هي ايد والدي ... لكني اخجل منه واخجل من شيبه اطلب منه شي .على الاقل قايم ببنتي و صاير الها اب بدل الي ضيع نفسه وضيعني  .. 
طلعت من التواليت ودموعي بعيني . مسنوده على نهى وهي التذمر واضح على محياها ...
بليلة غبرة بابا اتخربط وهم اخذوه للمستشفى وفرات ضل يمه ايام .... يمكن هالمرة اهل البيت ما تأثروا هلكد من كثر ما تجيه الازمات وتعدي ... بس اني كان قلبي متوهج نار عليه حسبت هاي الفترة عليه مشؤؤمه خسرت بيه اهواي يا خوفي والدي من الخسائر ...
من طلع بابا محتاج رعاية صحية  كبيرة  صرح اخذته يمها واخذت اجازة من عملها .. 
..
بعد فترة حملي صار عليه خمس اشهر ...
شبعت ضيم من  المعيارت والتسأولات شنو راح اسوي  سامي طلع من البيت ودعاء كل يوم رايحه لأهلها شارد منا ما الومها منو يحمل اثنين مرضى
كمت اجي على نفسي حتى لو احبي واني كاعده البي طلبات بنتي
بيوم صارت مغثه بالبيت ودعاء اتعاركت مع زوجها 
ومتأكده بابا سمع اصياحهم مثل ما اني سمعته
"هاي فوك ما حامله ابوك واختك
هاي الجملة جارحه حيل
بيومها راحت لأهلها وبابا فرات وداه لبيت صرح ..
واني ضليت حسرة عليه اكوم اغسل لبنتي اريد اغير الها الحفاظه بالقوة واضل اشاهد من وجع ضهري
فرات خطيه جاب الي بيومها عشى جاهز .. 
لكن بقية المتطلبات اشلون اقضيها ؟؟؟؟؟؟
ثاني يوم اجانه رامي شارد من بيت جده ..
اشويه كمت اسخر بيه

العصر ابوه راح يشوف مرته ويراضيها وهو بقى يمي
  لكني احتاجيت حمام ضروري ...اريد اكوم ضهري كلش كايم عليه . مكدرت اتحرك ابد .... كمت اجر حسرات وابكي ....
اتبولت على نفسي الحامل تحتاج كل نص ساعه حمام 
انهاريت وضليت ابكي بصوت منا من تعبت وتلفت اعصابي  ..  رامي خطيه بس يسالني اشبيج عمه اني مغطيه نفسي بالشرشف وابكي ما جاوبته

ندكت الباب ..راح فتحها ورجع الي ..
"اتفضلي خاله
اني ارتبكت منو مدخل عليه هسه ...
" يالله
طبت
"سلاما عليكم ...
شفتها واكفه كدامي هاي سلطانه .... انذهلت من شافت وجهي مخرمش اني فقدت يمكن وضربت نفسي ..
"اشلون صاير حالج ؟؟؟
كعدت يمي واني انحرجت حيل مكدرت حتى انطق ..بس بكيت بصمت ..
كأنها حست بحالي ..
رامي راح عافنه وحدنا يستحي يكعد يم مرة غريبه ..
رفعت الشرشف
"هاي شنو
دكومي كومي ..
همست واني حانية راسي بخجل
ودي اموت ولا احد يشوفني بهذا الوضع
"ما اكدر ارفع نفسي ..
كومتني واني صرخت من الالم .. هي خلفي لازمتني من خلف وتمشي و بالقوة تسحلني سحل ..
دخلتني للحمام سبحتني .. وطلعتني ..
غيرت الفراش الي ونيمتني .
كالت الي سمعت بيج حامل كلنا لسلطان .. هو دوم يكول روحي الها ودي مصرف بس اني شايله عليج
بكيت
"شايله عليه !!
هو منو وصلني لهاي الحاله غيره كذب وغشني
صدتني بصوت عالي
"ما جذب ابد سلطان ...بس ضم عنج
تدرين ليش
"حتى يخدعني
"لاااء يدري بيج رچيچة وبلحظه اتبيعين
بعتيه من عرفتيه ماعنده 
ورضيتي بيه بس صار عده جم فلس .. 
خاف يكلج وهم اتعوفيه انت شردتي منه لأنه خطى
وانت السبب منج لله ضيعتيه ...رغم النايبات الي مرت عليه لا اذى عمه ولا سوة شي ..بس عفتيه انت هو راح اذاهم بعرضهم 
سكتت بس دموعي تجري انصدمت بكلامها وكمية الحقد الي بيه
"  كلنا جنينه عليه
هي هم كامت تبجي
مسحت دموعها وجرت نفسها
"يكول المحامي بس اتخلصين حملج اترفعون على سلطان دعوة طلاق ..
البارحه جنت يمه
سلطان يلكج ماكو داعي ...اشوكت ما ردتوا يطلق من غير دعاوي وقضايا
نار بجوفي وتحرقني ما تقبل تهدأ من سمعت بيه
"وهاج
حطت يمي ضرف
" هاي مبلغ الج
ولبته ما دامج على ذمته محسوبه عليه
"ليش ضرب ابن عمه ؟؟؟

كرصتني من زندي حيل وضلت لازمه بيه توجعني

دموعها جرت
بصوت مبحوح
"سلطان ما ضرب احد .. هذا علاء ضرب عمه من شافه متهجم على خاله
خاله شالها عنه والكلب ابن عمي ثبتها على اخويه
وسلطان هم اعترف على نفسه  . وشال القضية حتى لا يضيع ابني الغبي ضيع خاله وضيعنا
شهكت
"ليش ليش
" يكول انه استاهل
تنهدت واخذت تزفر انفاسها بحسرة
"والله يحبج ...سلطان ..يكول كولي الها اني راح ابقى احبة وكل ليلة اتخيلها يمي ..  صورتها هي وملك ما اتفاركني ... يكول اذا ولد لا اسميه ملك ..
كامت سلطانه واني اباوع للفراغ وبصدري نار احس روحي انتفخت من الحسرات ... راحت سلطانه وتركتني بنيران ثوراتي ..  هاي المرة الثانية يدخل بيها سلطان  سجن من غير ذنب ...
احيت بيه رسالته الشفهية الحب الي اسود قلبي
صرت اتخيله هو يكوله الي و بعيونه لهفة اللقاء ..
ما رجعت دعاء مع زوجها اتكول تعبانه ..
وبابا هم ما رجع واني ضليت ما الي احد .. اجتني  سهيره صبحية وراحت متكدر اتضل ...
اضطر سامي يجيب مرته يمي ويا كأس الذل الي كل دقيقه يشربني منه من رجع للبيت على مودي
على العشا .. كومتني نهى .  و كعدت وياهم
دناكل ...
سامي" صدك اخت هذا اجت يمج
"ها قصدك سلطانه .......اي اجت
نهى" شتريد
"انطتني افلوس    وكالت الطلاق يتم من غير دعاوي

فرات
" وفر علينا تعب
سامي " اووف هسه لو بس ما صاير هذا الطفل الثاني
سكتت اني
فرات
"الي صار صار بعد المهم نخلص من هاي الزيجه وما يبقى محسوب علينا نسيب
سامي ' اي يا اخي بس ذوله شنو ذنبهم سكط راح تطلع سمعتهم على سمعه ابوهم
" ليش يطلعون اسكاط واني امهم ؟
"اقصد سمعتهم
اذا ابوهم معريهم بعمايله رايح ضارب ابن عمه
ومسبب اله اذى ومحكوم 3 سنوات هاي سمعه راح اضل وياهم طول العمر
صعدت مرارة الالم لبلعومي مكدر ابلع الزاد .. كمت بثقل ورحت لغرفتي تركت سامي يذمر عباله زعلت  من كلامه .. بالحقيقة كمت حتى لا اصيح بوجهه سلطان ما سوة شي ...
الصبح دا اكوم اغسل ... سمعت صوت ملك تبجي حيل .  كمت واسند على الحيطان لكيتها كاعده يمهم تبجي همه دا يتريكون على الميز وهي مكعديها على الارض تاكل ... مبدية الشاي مالتها على الارض
وافتهمت من منظر بكائها احد ضاربها او صايح عليها ..
كانت تبجي واتباوع لنهى
" نهى هي طفله ليش هيج
قبل ما اترد نهى جاوبني سامي
" وانت مثلها طفله اقل شي وتتزعلين
قصده على البارحه
"اني ما زعلت منك ... نهى بعد لا اتريكها اني من اكعد اوكلها 
العصر راحوا لبيتهم وتركونا .. وحدنا ...
...
مرت ايام وراحت ايام ..بيوم ولادتي اخذني ولادي وصرح فقط .. 
دخلت مكتأبة وطلعت مكتأبه سويت عمليه مكدرت  اجيب طبيعي ...
صحيت والدنيا كلش طلعت من عيني ..
صرح
"كعدت المامية الحلوة . 
جابت الطفل وحطته ابصفي
" وهذا الاوليد الحليوة مالتج ..
"مالتي ؟؟
كنت اعرف جنسة  قبل الولادة .. كانت مشاعري باهتة جدا جدا كأني دا اصارع الموت بحد ذاته لأنه بمجرد ان ولدت راح يتم الطلاق ويرجع اسمي بالجنسية  وحيد ... .
ما اكدرت اشيله ولا اخذه بحضني كنت اتوجع . اهناك اجتني سلطانه  شافتني ..
بعد ايام ... بدى الكلام  واشوكت الطلاق ..
اهنا اجتني الصدمه من اسمعهم يكولون اولاده ننطيهم لأهلهم هو كلام مو فعل و والدي ما وافق اخي سامي ابد ...لكني حزت بنفسي من كال احنه شكو نربي اولاد غيرنا !!!!!!!!
تذكرت بيوم اني لمت ام سلطان وابد ما اقتنعت بالمبررات الي اتكولها سلطانه . وبرأيي امه هي اختارت بعد اطفالها  عنها ....  ويا سبحان الله اني فكرت بيها وهي اجتنا بنفس اليوم مع بتها اشوف حفيدها
كعدن يمي ساعه زمن وكأنهن حسن الوجوه ثكيله
ودعاء ما كعدت يمهن
بس اني وكنت تعبانه نفسيا وجسديا
ام سلطان   " ما راح اسالج اشلونج لأن لونج مبين
شوفي يا بت الناس راح اكلج شغله حطيها حلقة بأذنج ...المرة منو الها بعد الله ... 
سكتت مجاوبت
" الاب ..  ما دايم
والاخ اخو مرته
اني الي اعرف كلش زين من ينفقد الرجل اشلون اضيع المرة ..
شوفي جهالج .. اشرت على ملك الي كاعده بحضن عمتها تلعب وياها
" كل ما اتباوعين الها وهي اهنا بين اولاد اخوتج ...راح اشوفيها مكسورة  بتج راح  تنذل بين الخوال ...
الطفل ما يرتاح غير ببيت ابوه وانت هم .. بيت رجلج اكثر مكان امان الج ...
دمعت
"هو وينه رجلي
" رجلج راح يطلك ...يكول مدام هاي غايتها ما اجبرها اتكمل وياي
بس يا بتي تراج اذا اطلكتي راح اضلين طول عمرج اهنا  ماكو مفر من اهنا مو بعيد تدولبين بين الاخوة ..
و جهالج اول وتالي يشردون من خوالهم بس يطلع ابوهم ويشوفون حنانه ...تبقين انتي متهجولة ومشرده ماعندج بيت يلمج ولا  صدر احنين يضمج
اختاري يا بتي هليام ... يا اما ترجعين لبيتج او تتشردين بين الاخوة ..
....
مرن شهرين  والطلاق ما تم مثل ما وعدني سلطان وسامي ضل يحجي و يتوعد .. وفرات كال راح نرفع قضية ..
وبالفعل . رادوني اروح اوكل المحامي العصر على ساس نروح

خابرت سلطانه  قبل لا نطلع منتظرين كنا سامي
" هلا عيني اشلونج
جان صوتها متعب
"مرحبا ام علاء اشلونج
" اااه والله مو زينه
" ليش شكوو
" سلطان سلطان
"اشبيه
" والله ما نعرف اشبيه .. وكع بالسجن .
وهسة بالمستشفى ااااخ يا خوية يكولون ايام من جبتي لليوم ما ياكل

كمت ابجي على بجيها
سلطانه
" ما يكدر يطلك ما هان عليه يمكن ... ووكع عليهم من طوله ...اورحله فدوة

سديت الخط مخنوكه ..  وبصدري العبرة محتسره صاحو الي كالو سامي وصل
كانوا بالهول سامي وفرات وبابا وعلى اساس اروح مع اخوتي ...
"يلا استعجلي
همست
"فرات
سلطان مريض
زجرني سامي
"اشمدريج
"اخته كالت
فرات " وهسه شنو يعني
" ما ادري
صاح بيه سامي
"شنو ما تدرين   يلا انروح وعساه بالموت عاد ويريحنا منه
ما اتحملت كلام  سامي عنه هو يصارع الموت لأن ما يكدر يفرقني عنه ...
عفته وردت ارجع لغرفتي
" وين تعاي
"ما اروح
اتعارك وياي سامي عركه جبيرة فقد اعصابه واني بس اكول ما اروح ما اوقع ...
ما اعرف اشبيه بس هاي الكلمه تطلع مني ماريد افارقه  اشمر بأديه واكول لا ما اروح لا لا
دخلت للغرفة ... واسمع اصياحه عليه وبابا يهدي بيه

كأني اني الثانية فقدت احساسي بالحياة لا كدرت بيومها اكل ولا اشرب ..  كل اشوية اخابر سلطانه اسال عن حاله والجواب نفسه ماتدري حتى مانعين الزيارات عنه ....  ثاني يوم بالليل اجه سامي وهم اتعارك وياي و والدي هم كلي لازم تتقدمين خطوة  ليش ضاله مرن شهرين على ولادتج وانت معلكه خل نرفع قضية طلاق احنه والقانون  ويانا ...
فرات هم ابد رأي لازم اروح .   صفنت بوجه سامي كان واضح عليه الغضب ...
ادري كلش زين ليش يريد هذا الطلاق يتم حتى 2 يسمع من احد رجل اخته بالسجن على الاقل يكول طليقها وطلع مو خوش اذا تطلكت .. كيف اقنع هذا الوجه الساخط اني من داخلي ما اريد الطلاق !!
هو اني نفسي بعدني ما مواجه نفسي بالامر بس حقيقتا ما اكدر ..اريد  اكول الهم اي ميخالف  من باجر نمشي بالقضية الساني ما يطاوعني ..
سامي" لا تخافين جهالج يمج ..  محد ياخذهم كلش كلش الولد من يكبر اكيد يريد ابوه العار  خليه يروح يمه ولكل حادث حديث ..خلصينا من هذا الموضوع وابسرع وقت ..
سكتت كل ظنهم السكوت علامة الرضا ...
اتعشينا ...
دا اتلم دعاء  بالصحون
هم فتح الموضوع سامي
" اكلك فرات انت باجر روح وياه ..
"تمام ...
رديت  عليه " ما اعتقد اروح باجر
'ليش شنو عندج
" ما ما اريد اسرع
انعفس وجه عفس
"شنو ليش يابه
بابا " ليش بابا شنو انت ما رايده الطلاق
"بابا اني عندي اثنين اطفال
صاح سامي
"وشنو يعني
سكتت
" انت باجر ترحين وغصبا عليج .. لخاطر جهالج تردينا انضل بصلة بهيج نسيب مجرم ..
ضرب الميز وكام يغسل
بابا " اروح اخذ علاجي
كان يباوعلي وحاير بيه
كام من يمي ..
دا اريد اروح للمطبخ رجعلي سامي بعد ما بابا راح
"لزمني حيل من ايدي وحطها خلف ضهري لوها
" لحد الان اكول مرة جبيرة عيب تصرف وياه بأنفعال
بس انت طلعتيني عن  طوري ما اكدر اعيد واكرر كدام ابوية يتعب ... باجر تمشين بقضيتج والا والله والسبع سموات يصير عندي تصرف ثاني وياج

رجع فرات شافه اشلون لازمني وكف بوسطنا ...
ما بكيت ولا نطقت بحرف .. تماسكت تركته ينظرلي بغضب ورحت متوجعه
..
اطفالي ناموا كل واحد منهم بجه الولد على يسرتي والبنية على يمنتي  واني كاعدة افكر سامي عنده بناته بالدنيا كلها وفرات هم عنده اولاده  اغلى شي
بحياته و سهير والدهم حتى يخاف على اولاده اذا اجو النا وبعيدين عن عينه .. وصرح والدهم الطبيب مهتم بيهم  واني هم عند بابا الدنيا وما بيها بس أطفالي وين ابوهم ؟؟
مو ذنبهم ولا ذنبي والدهم مو طبيب  ولا مهندس مو ذنبهم اذا كان مهجن عاش طفولة  قاسية وشبابة كلة مشرد منو المذنب بالي صار لسلطان؟ .  منو الي خلاه يساوم شرف عمه بألفلوس اني ؟عمه . اخته ؟
مهما كان داخله نظيف كل هاي الضغوطات لازم تأثر عليه  هي البالون من تضغط عليه يطك ، انحراف سلطان كلنا مسؤولين  عنه من امه الى اني .. 
هو افضل واحد بينا .. سامي الي يتكلم بالشرف  والاخلاق والي يسمي سلطان عار يفدي ابني بحياته مثل ما سوه سلطان؟ ؟؟  مكدرت ابعد فكري عنه واتضحت الي الصورة  اني احاسب سلطان على سوايته بس اذا انصب نفسي قاضي لازم احاسب المجتمع  بالاول ... 
صبح الصبح الساعه ب6 تقريبا محد يكعد هيج وقت .
اني كنت مخلصه صلاة وعشر مرات صليت الاستخارة .  وكانت اتحثني على الي بالي ..
حملت جنطه صغيره بيها غراض عيسى ابني
و شلتها وهو نايم حطيته بهزازه . مكدرت اخذ الجنطه ايد شايله الهزاز وايد شايلة ملك اخذت فقط جزدلان وطلعت من الغرفة . ما باوعت ابد خلفي  .. 
فتحت الباب الخارجي  ورجعت شلت الهزاز وطلعت ...
سارعت بالوصول للشارع  يمكن نص ساعه الا شفت تكسي دتمشي ....
ما وكف الي    حطيت الهزاز على الارض وانتظر ..
اجت كية .  صعدت بيها .. واني فاقده احساسي بالمحيط  .. وصلت للكراج .. صعدت كيه ثانية وبنتي تبجي اتريد ترضع  ممة ..  ازعجت الركاب ..
وصلت للحي نزلت براس الشارع . اتمشى وجهالي اثنينهم يبجون وياي ..مكنت مهتمه الهم .   امشي واني اكول بكلبي وصلنا يا اطفالي ..مراح اعيش مشرده بين الاخوة مراح اضلون بلا خيمة عراة ياهو الي يجي يدخل بحياتكم ارجعكم لحضن ابوكم هو خيمتكم  مراح اخليكم مهمشين هذا قدركم والدكم هيج يطلع وقدري هم دوناا عن خواتي 

وصلت للبيت دكيت الجرس والباب همين ...ضليت ادك حيل يكلك احد يركض خلفي
فتح الباب محمد
"خالة رهف
دفعته وانطيته الهزاز ودخلت .....
شال عيسى واجه خلفي
يصيح
"يووم يوووم
امه طلعت من الاستقبال باسدال الصلاة
" رهف
يا يا اشصار
بكيت وكلت
"رجعت لبيتي !!!!!!
صفنت بوجهي ممستوعبة مني شكول
اشويه وجرت ملك مني بوستها
"يا هلا بيج .
يا والله لو بيدي اهلهل هسة
اخذتني بوستني
وجرتني لغرفتي
"هاي غرفتج يا رهف محد يستخدمها عكب طول سلطان محد دخلها غيري انظفها واطلع ..
دخلت واعيوني ما اشوف غير اطيوف سلطان بيها اتحوم ريحته ضحكته دخان جكايرة ... كلشي بيها اهنا ...
تلفوني ما سكت فرات بس يدك عليه ما جاوبته ابد ..
من دك بابا فتحت خط
"ها بابا
رد عليه بقلق
"رهف انت وين ندك عليج من الصبح وماكو وين رحتي
" بابا اني  ببيتي
غمضت اعيوني وكأنه يمي ودا يشوفني كدامه
"يا بيت؟
" بيت زوجي بابا ...
"لا حول ولا قوة الا بالله من كان موجود تركتيه ومن راح رجعتي اله ؟
ليش
" لا تزعل مني بوية الله يخليك
سدة بوجهي اول مرة يكلمني بهاي العصبيه والسخط

ورة اشوية خابرني فرات ...ما رديت رسل رساله
" عذبتينا وياج ..  اني جاي ماخذج قبل لا يصير عند سامي علم ...
ما رديت عليه ...من وصل ما طلعت سلطانه الي طلعت  واجتي كالت الي اخوج راح ...
"شنو كلتي اله
" كلت اله هذا بيتها اذا ما تتريد تتطلك يضل بيتها وحرام اتغصبوها  ..رادج اطلعين اله كلت اله ما اتكدر تطلع تعبانه ....راح وهو طالعه روحه
اني خفت اطلع اله وهم يأثر عليه واروح ..واعاني عذاب التفكير ... لليل اندكت الباب حيل ...
قلبي صار بيه خفقان عرفتهم اهلي ..
دخلوا اسمع سلطانه اترحب .. خفت اطلع .
"هسة بس خل تطلع
هذا صوت سامي الغاضب ....اشلون اطلع اخاف ياخذني غصب ..
اجتني سلطانه كانت لابسه عبايه راس وحجاب
"اهلج بالهول
اخوانج وابوج و اختج الدكتورة ..
ردت اطلع بس كنت متردده وخايفه حيل ..رحت الهم اتخبط برجليه
صرح
" رهف اشرجعج اهنا
اتلافيت النظر لسامي
سامي
" جيبي أطفالج ويلا للبيت
باوعت بوجه ابويه اشوف وضعه يستحمل الي اكوله
"بابا .. اني اهنا مكاني ...غلطت من طلعت منا
صاح سامي شنو
سلطانه طلعت وتركتنا وحدنا
ابوية سكته
" ليش يابة الطلاق للي مثل حالتج افضل
" ما اكدر بابا اني بييتك احس اطفالي ضيوف .. اخاف اظلمهم
سامي "انت براسج عقل ...اهنا اتعيشيهم  حواوين
ااخ هذا اكبر غلط ابويه سواه من زوجج لهذا الرجال
فرات "سامي
سكته بابا ما عايز ملامه
" هاي قسمتي .. شسوي .. مكتوب عليه انتظر خروج زوجي من السجن .. افضل ما افرق عنه اطفاله طول العمر ..
ضل سامي يصيح عليه وفرات يهدي
دخلت سلطانه من صار يغلط على اب اولادي
" مساكم الله بالخير خوش والله ابيتنا واسبونا
خوش عدكم اصول يا اولاد الزواد  اسبون الرجال الي كاعدين ببيته يم اخته الي دخلتكم وضيفتكم
بابا كام وكف وكلهم وكفوا
"نرجوا المعذرة اختي .. بس احنه جايين ناخذ بتنا
" ماعدكم يمنا ابنية ...بعد صارت منا وبينا وبتك مرة شافت من مصلحة  اطفالها يضلون ببيت ابوهم ..
سلطانه ملسنه .. و لأن مرة ما ضلوا يناقشوها اهواي
" رهف لأخر مرة بوية انت رايده اكملين ويه واحد رد اسجون ..
بكيت كأنه دا يكلي راح اتخسرينا
هزيت راسي
"يلا بينا
صرح " رهف راح اتندمين ...
طلعوا اهلي .. ركضت لغرفتي حتى ريحه سلطان الي بيها اطمني  واتكول الي سلطان وياج.
مرت ليالي وايام ..  صح اشوف بتي رجعت زهرت وسط العائلة الي متعوده عليها .. واني احس نفسي رجعت راعية بيت مو عالة على احد ...لكن تبقى بالروح اجروح شنو ينحط الها واتطيب من ناحية اهلي الي خسرتهم والانتظار جدا صعب .. سلوان خطيه هو كان يشتغل مع سلطان وسلطان مكان مقصر وياه كانما صاحب المصلحة وياه .. فمسوي اله توكيل حتى يكدر يدير المعرض ..
علاء يشتغل وياه ويشوف طلبات البيت ..بس مكان يكدر يحط عينه بعيني  ابد    ...
سلوان زار  سلطان بالمستشفى وكال النا من سمع بخبر رجعه مرته حسيت روحه رجعت اله
ورة فترة سمعنا عنه طلع من المستشفى 
الايام صارت شهرين واني حسيت نفسي بديت ارجع اتقوة من سمعت بخبر قروب الزيارة اله . 

بيوم كنت محتارة بأطفالي وادري بسلطانه دا تطبخ .. سمعت الجرس دك ..
مااهتميت .. اجاني ابن سلطانه الصغير
"خالة ابوج اجه ..
شنو
فرفح قلبي يا بعد روحي بعد ما طلعت من شورة ما هنت عليه واجاني ..طلعت لبرة .. من خلف الباب
"بابا اتفضل
دخل
يا الله
"اتفضل اتفضل
ضل واكف اشوية كأنه يتفحص حالي وبنتهى الصراحه اني حالي احسن ما من عدهم عايشه على حس هاي العائلة واصياحهم وعركاتهم و ضحكهم احس بعدني بالدنيا مو الهدوء الي ببيتنا ينطي مجال لفكري يتعب  من الهدوء والوحدة!!!!!!!
  دخلته للأستقبال
" بابا الك وحشه . ويه ما جلس كعدت على ركبتي كدامه وحطيت راسي على حجرة وبكيت
"الله عليك بابا ساحمني الله يخليك
مسح بأيده على راسي
اخذتها بستها ..
"كومي رهف كومي
كومني كعدني ابصفه
"اااه يا دنيا اتحطنا بخيارات صعبة .. بابا انت بعدج على قرارج هذا
سكتت باوعت للارض
"انت جاي تاخذني منا ،؟
" إذا مرتاحه اكثر من ب بيتي فضلي
من غير ادراك كلت ابسرعه
"اي مرتاحه ..
خليته يباوعلي باستغراب
تنهد
"لعد هاي هي
"بابا الله عليك لا تزعل مني ..لا تغضب عليه
" ما اكدر ازعل يا رهف .. اني السبب اني الي ذبيتج بهذا الزواج . لو ضاله يمي ولا هاي البهذلة
" بابا اني راضيه
' اشراضية بابا زوجج ضارب ابن عمه .. اشلون تأمنين يمه وهم سالفته القديمه ماتنسي
" بابا سلطان ما ضرب احد هو متهجم عليه .. وعلاء ابن اخته الي ضرب عمه
سولفت اله ما جرى مع سلطان من اول يوم شب الى لهاي اللحظه شنو صار بيه .. ظلم عمه اله و تحمل ذنب هو ما سواه حتى يحمي ابن اخته من السجن وفداه و مرضة من قرب طلاقي منه ..
شفته احتار بيه ... واحتار شنو ينصحني .. 
المهم سولفنا اهواي وعاتبني اشلون اطلع من بيته فوضحت اله مخاوفي  اظنه تفهم لكن بعده ما مقتنع ان ابقى اهنا وحدي ..  واصر اهواي اروح وياه ...لكني هم اصريت عليه بود ابقى اهنا لخاطر اطفالي ..اهناك اخجل اطلب قوطية الحليب من اخواني او منه .. 
وكف
"اضاهر انت بالفعل كنت مضطهدة ببيتي لهذا اهنا عندك افضل
بابا لا تفهمني غلط
طلع برة الاستقبال ..
سمعت صوت سلطانه
" رهف كولي للوالد عشاه يمنا لا يروح
"اتمنى اتراجعين نفسج وبأي وقت تردين الرجوع بيتي مفتوح الج 
يلا اني اترخص
كان سلطانه كانت بالهول طلعت لبابا
"وين ابو سامي .. صدك جذب
ضل على العشا
بابا نظرة على الارض
" لا انشالله سفرتكم عامرة بيكم
يلا باباتي دربالج على نفسج وعلى اولادك
"والله يا ابو سامي ما تطلع منا الا ما تتعشى يمنى شسامع عنا بخلة
اصرت على بابا يضل حسيته انحرج
' بابا ضل بعد حلفت
سكت ودخل للاستقبال خلال ربع ساعه انمدت السفرة يمه وولد سلطانه جابوا الاكل اهنا علاء رجع من الشغل شفته راح لغرفته ..
رحت خلفه ودكيت الباب
" علاء
فتحها الي 
"اشلونج خاله ؟؟
" الحمدلله
اشبيك
ها اشبيه شنو ؟
علاء كنت صديقي ونسولف ونضحك سوة هسه ليش ماتحط عينك بعيني
دنك مجاوب 
بيوم العركة كان موجود محمد وسلوان وهمه بس شهدوا الحادثه محد كان متوقع منهم يدخل علاء ويضرب عمه ..هو صح كان يكرهم  ويحب خاله حيل..بس ماتوقعوا اثناء الشجار يدخل هاي الدخلة الشؤم

"خالة باعولي .. اني ما كرهتك  .صح الي سويته غلط انك تحمي خالك وتضرب عمك وتدخل نفسك بينهم واسبب بمشكله كبيرة
لكن تبقى بنظري شاب غير واعي . هذا درس الك خالك ضحى بنفسه لخاطرك  انت قدر هذا الشي وكون رجال بغيابه ... اما اني اترك الايام تصفي بالي نحايتك  واسامحك من قلبي ..
حسيته راد يبجي
"يلا يلا غير وروح اكعد يم ابويه عيب كاعد وحده من غير رجال ..
عفته واني قلبي يتحطم اني صح قاهرني تصرفه لكن هو بنظري مثل رامي وبغلاوته تصرفه عذبني اني وجهالي .. بس مرات اكول لو لا غلطته مكنت رجعت لسلطان ؟؟ ومكان غفرت اله . حمايته لأبن اخته رفعته بنظري ورجع كبر ... وحسيته هذاسلطان الي حبيته ضهر من جديد ..بابا على عينه بقى واصلا ما يتعشى هو الا خفايف وهاي سلطانه مسوية دولمه بيتنجان و سلك وياها باقلاء خضرة و شوربة و طرشي منزلي  بابا نسى صحته من اول لقمه  ولاحظته انطلق ..
كنا بس اولاد سلطانه الولد و اني وبابا على السفرة
وهي بناتها بالصاله ياكلن على الميز ..
حطيت اله بعد صحن اخر دولمه
"اتفضل بابا
"لا بعد ما اكدر

خلصنا عشى شرب شاي وراح .. حسيت تصرف سلطانه اجه بوقته ...حسيته ارتاح واطمن قلبة بضلتي اهنا ... 
اخوتي ما اجوني مرن اسبوعين وهم اجه بابا الي محمل لأطفالي  .  وراح
واجاني اليوم الموعود ...اروح اشوف حبيبي لكن تحطمت امالي كلها من اجاني خبر هو منبه ابد رجلي ما تخطي لباب السجون ولا ازوره منا من تنهي مدته وحالف يمين . 
عشت بقوقعه حزن عميقه .. كان بالي كلام اهواي اكوله ..
بيوم اجتني سلطانه فرحانه
"ابشرج سلوان هسه يم سلطان راح يخابرنا يسلم علينا
بس دك تلفونها سحبته منها رديت اني
"الوو
سلطان؟ ؟
"رهفتي ؟!
سحبت انفاسي وحطيت ايدي على حلكي اضم شهقاتي
رحت لغرفتي وسديتها اريد انفرد بيه
' حبيبي
"اااااااااااااه اشكثر مشتاق  الها بصوتج
بكيت مكدرت اتحمل اكثر
" حبيبة لا تبجين ...  رهفتي  ... ابنيتي لا تبجين
كافي
ترة اسده
"لا لا
حاولت اجبر نفسي اسكت
"اي والله ما اتحمل اسمعج تبجين ..لا تقلقيني
" لا حبيبي اني زينه .. بس والله مشتاقه الك وملهوفة لشوفتك ليش حرمتها عليه
"  احسن النا لا انت ما دخلت اسجون ولا اكدر اخليج اشوفيني بهاي الحاله
' وتالي اضل ما اشوفك
" اشعجب رجعتي
"ها ااا ما كدرت اسمع عنك اتموت على البطيئ
ما اكدر بلياك سلطان اطلع النا ابسرعه ..
" انشالله انشالله اطلع
"حبيبي اني سميت ابنا  عيسى خوما ضايقك اسم بابا
" لا حبيبتي .. بس كون هو على جده مو بس اسم
بتسمت بألم
"حبيبي 
" مراح اقلق عليهم طول ما همه وياج ...كولي الهم ابوهم مسافر ..
راويهم صورتي دوم خل يعرفوني اذا كبروا
"حاضر ...
"ديربالج على البيت بغيابي ...
"سلطان ؟؟ كأنك مرتاح ...احس مرتاح وانت بعيد عنا!!
"لا والله دا اتعذب اليوم يمر سنه عليه لكن الي مصبرني هو رجوعج الي ...ردت الي روحي من عرفتج ببيتي تنتظريني ...
" راح انتظرك حبيبي
" بس اذا تردين الصدك  مرتاح بالي من ناحية بيت عمي .. احس هاي محكوميتي خلتني ارتاح جنها عقابي واخذته هسة ..
ودعني وانتهى الاتصال بعدني ما شبعت منه ...
بيوم اجى بابا النا .. يتفقدني ..
وهم عزمته على العشا وافق ابسرعه كانه احب كعدتنا واكلنا    . 
من راد يطلع طلعت سلطانه . 
"ما شربت الجاي ابو سامي
" بالجايات انشالله .. سفرة دايمه عاشت الايادي طبخكم طيب
ابتسمت سلطانه .من مدح طبخها  وراح . 
اني ضليت واكفه بالكراج
سلطانه "اكلج ابوج اشكد عمره
باوعتلها وابتسمت
"70 سنه
"مامبين عليه الله يخليه
" اي بس اذا ضل ياكل طبخج راح يطلع اله كرش ..

ضحكت وراحت خلعت شالها .. ضحكتني  هاي المرة اشعدها تسأل عن عمر ابوية !!!!!!!!!
بس لا معجبة بيه ههههه هي هاي الناقصة بس ما اعتقد بابا بيوم يباوع الها اصلا بابا رجال صاحب مرض وهم الفرق بينهم بين السما والارض ...
ورة شهر .. الا اجه النا وهم محمل كالعاده خطية من يستلم تقاعد  يذكرني دوم مع اني ما ناقصني شي
كانت ام سلطان مسيرة يمنا ..
وهو دوم جياته المغرب دخلته للأستقبال وضل كاعد يمنا حسام صاير شاب جامعي شاب مرتب   
اصرت عليه الحجية يبقى على العشا و ضلت اسولف وياه على اوضاع العراق وصارت محللة سياسية وبابا عنده خلفية متمكنه بس مكان يغلطها من تحلل .اتعجب على سعة صدرة يقدر يتحمل كل العقليات .. وكأنه منتظر  هاي الكعده هالمرة سلطانه وبناتها كعدن يمنا كلنا سوة .  وهم مسوية مالذ وطاب .. هم مدح الاكل واتشكرهم
سلطانه  بس خلص العشا اختفت .
تعجبت عليها وين راحت ..
لميت الصحون وكعدت جنب بابا والحجية دخلت ؛سلطانه كانت شايله صينية الشاي .. قدمت لأبويه وكالت
هالمرة استعجلنا اخاف هم تطلع من غير ماتشرب
ابتسم " والله انتم ما مقصرين
انتبهت لابسه صاية اسلامية سودة وبيها تطعيم جلد النمر نازك ولافه شال بطريقه حلوة دقيقه دقيقه هاي راحت غيرت .. وحاطه كحلة مو خاليه سالفتها هاي اول مرة اشوفها معدله هيج ومهتمه بشكلها ..من راد يطلع بابا باس عيسى كنت شايلته بأيدي
" بابا شبسرعه والله ما شبعت منك
"  عود تعاي النا
"تدري بأخوتي ما يحجون وياي
"ما عليج بيهم من تجين احاول اصلح بينكم
"انشالله
"صدك هاي حماتج مطلكه لو بس تاركها زوجها
"قصدك سلطانه لا مطلقه من زمان
"خطية والله مرة معدله وراعية بيت
"اي خوش مرة
"احم واكلها طيب
هزيت راسي مؤيده وصافنه عليه يباوع الشجرات و اديه خلف ضهره ووكف دقائق بس يمدح بالمرة بعدها ودعني وراح ..  هاي شنو عيني القلوب عند بعض .. هاي طبعا الماي راح تمشي من جواي  بابا الشويب و الست سلطانه اويلي منكم  اكو استلطاف متبادل لحد هاي اللحظه واحسه بدا يصير اكثر من استلطاف  متونسة عليهم ..  .  علاقتي  بخواتي رجعت اتصالات و مرات اروح اسير عند وحده منهم بس هنه محد تجيني ..
وفرات من سيرت يمهم اول مرة وجهه ثكيل بعدين بالجيات الاخرى صار زين وهو حسيته مرتاح بالبيت وحده مع مرته و ابوية الوحيد . الي احسه يحب اجواء بيتنا حتى كمت بين حين واخر اكوله تعال
اما سامي ما يحجي وياي .بس مرته عادي تحجي وياي اذا التقينا يم اهلي .  و ام سلطان ببيتها عايشه مع ابنها ودوم تجي يمنا اشوفنا ..وما تكدر اتعيش يمنا لأن علاء وحسام ما متراهمين  ..
اما سلطان يخابرنا من يحصل اذن بين احين واخر ..
ما اعرف احسه رجع ذاك الرجال المسالم البسيط الي يحب كل الناس حتى دوم يسأل عن امه وعن اخوه   
والامر الغريب ان عايد يحاول يتواصل مع اولاده
ما اعرف فعلا كان يشتاق الهم وحن لو عنده غاية ثانية الله اعلم على العموم همه ابد ما يحبون يرحون لهناك هو خسرهم ...
...
حياتي عبارة عن انتظار  اشوف سلطان بعيون أطفالي وكل يوم يمر عليه بألف سنة ..
ادعي بس كون عمري يكون مديد والحك اقر عيوني بشوفته واكحل ناظري بيه وهو هم ...
قضاء اخف من قضاء مرة اذكر سلطانه فقدة اعصابه من علاء عاندها ما لبى احد طلباتها لزمته من زيجه وكالت ما منك فايده بس  ضحيت بأخوي لأجلك وانت على ابوك بلا فايده
" راح اسلمك للشرطه واعترف عليك
ابعدته عنه وكلت الها اتهدي .. لا تخربين كلشي ..
لا اضلين اضغطين عليه اخاف الولد يتهور  . 
قنعتها ان سلطان كما راح حيجي يوم ويرجع . بس ابنها بهذا العمر اذا عاش شهر بالسجون  راح اتموت انسانيته من الي يصير اهناك ..سلطان عوده صلب ما ينخاف عليه ...لكن ابنها يكون ضحية وينعاد ماضي سلطان .. 
مرت سنتين  على محكومية سلطان وباقي سنة بالنسبة الي السنه تعادل السنة 30 عام الا التقي بزوجي  اهو عقاب من الله او امتحان ما اعرف شنو كان بس الي اعرفه لازم اتحمله مهما كان واجاوزة . 

دائما من يفارقني سلطان الا اعرف كمية حبي اله ..وعرفت هسة  بهذا الفراق الثاني اني احبه اكثر من نفسي  ودا اعيش ايامي كلها لأجل شوفته .. 
اذا غلطت بيوم بحقة فأدري بيه مسامحني واذا ينعاد العمر من جديد هم اختارة واظل انتظرة لأخر نفس بعمري  ....

تمت
اكرر واعيد احداث هذي القصة نصف حقيقة ونصف من وحي خيالي الواقعي ما خرجت عن الواقع
شكر خاص وعميق لمن ساعدت وصمتت الي الغلاف
وشكر كبير لطاقم المحاميات التي استاعنيت بيهم البارحة
وشكرا للمحللة linaomar111
وشكرا لحسن المتابعة
زهراء العراقية