رواية سلطان زمانه الفصل السابع 7 - بقلم زهراء العراقيه

دخلت لمسامعي وضلت اثر رناتها ...صحيح الاعتراف مكان بالاسلوب الي كنت احلم بيه ..
مثل ما اعترف أنطونيوا ل بياترس بأحد الروايات ..وكف راكع كدامها واعيونة العاشقة تتأمل وجها الناصع ...
"احبك يا أجمل مخلوقة يامن تنحني العذراى خجلتا من طيفك ...
هو بس همس بصوت خجلان اني عشكتج ... ؟؟؟
بعد ما عرفت اسمه بالقوة جريت رجلية كأني أسحل بيهم ...الكلمة كانت جدا ثقيلة علية ...
رجعت للبيت مهدمة الفكر .....وما اخذت منه كلمة بعد ما يلاحقني .
اني بالحلم لو حقيقة ؟؟؟؟
اريد افهم اني بالواقع لو بغير عالم ؟؟؟اني بعدني بالعراق ؟؟ لو شنو ؟ اني اااه يا سلطان انت من اي قدر طلعت الي .. ممصدكه اني صارحني احد ..
معقولة اني ما حلمانه معقولة كنت كدامه واكفه والكلمه كانت الي ؟!!!
زين شبسرعه واشوكت حبني ..ياربي اني ليش متيقنه هو صادق كأني اقرة الي بداخله لهذا الرجال
ظلت افكاري اتروح وتجي وما دخلت بدوامه ما بين من داخلي ازهار تفتحت من جديد على الشعور الجميل الي نمى داخلي اني انثى انحب ويعجب بيه احد وما بين الحيرة بالمصداقية لأن الشخص الي صارحني ما اعرفه حتى يعرض عليه حبه ...
بس الشعور الاقوى الي سيطر علية الارتياح من حسيت بأني اسكن داخل مخيلت احد . حتى لو كان مو صادق ولو هذا الاحتمال منفي بالنسبة الي لكن خل اكول حتى لو هو يضحك عليه لغرض ما بداخله
هم راح يكون شي ايجابي على الاقل هذا دليل اني مثل اي بنت تتعرض لأحتيال من قبل الجنس الاخر لاغراض ماكرة .لان بصراحه حتى لهذا الشي ما تعرضت ؟؟
سمعت صوت البلبل
كمت للصالة باليل بابا يدخلة لجوة ..
شفته يمه كأنه يتناشد مع البلبل
"بابا ؟ لهسة كاعد
" اشكد حلو شكله هالطير ..سبحان من ابدع ..

ابتسملي
" من يومج على امج طالعه وانت و صرح اتحبون البلابل و طيور الزينة
" اي .. بس خطية صرح مات بلبل ابنها وضل يبجي عليه
" مسكين ...هي هاي الدنيا يا بنتي ماكوا شي يدوم والشي كل ما زاد جماله يكون اسرع زوال
ولو اتلاحظين الارواح الطيبة سريعه الرحيل لوجه الكريم ...
تنهدت بغصة بقلبي من تذكرت امي وطيبة قلبها العظيمة ....
فعلا بابا صادق الله سبحانه يختار انقى بشر دائما يكون عمرهم معدود وان عاشوا ...يعيشون بعناء وشقى ما اعرف ليش اشقى خلق الله هم صافيين النية طيبين الروح ؟!!!!
راح بابا لغرفته تاركني انظر للبلبل هيج علية ذكرياتي مع امي اااه يا ماما انت الوحيدة الي دوم اسمع منها انت احلى خلق الله ...انت اتخبلين ..وجمالج الله خافيه عن العيون بس الي يعاشرج راح يعرف قيمتج
ما سمعت هذا الكلام من غيرها .. اتحرك البلبل بطريقة صحتني من فكري ...تذكرت الي جابة الي ...
اااه طرى علية كلامه من كال بعفوية انت حلووة .
خلاني ايام اتحرك بخفة الهوى من طيب كلمته .
ااه انسان بسيط هو وطيب واني هم مثلة لهذا حسيت بيه ابسرعه كأني اعرفة من زمان حتى شخصيته كدرت افرزنها ...ياالله مبين من اجمل خلق الله لكن اشلون .يالله ما اريد اكسر بخاطرة
ولا اجرحه مثل ما جرحني سيف ابد
.
مرت ايام ...
بيوم كنت هم كاعده انتظر واول ما اشتميت ريحه جكاير باوعت لفوك ...
شفته واكف امامي بس مسافه عني ..رمى الجكارة وضل يلعب بشاربة ..
اجاهلته واني كلبي يخفق ...
ما كدرت امثل اكثر اني مجاي اقرة اني بالي يمه ..رفعت راسي عليه باوعتله معاتبة
نفخت الهوى طلعته من ريتي اريد اشرح اله اني مو يمة من غير ما اجرحه بس اشلون ....
همست
" حباب
بس اتكلمت اجه اتقرب يمي ...واكف
اشرت براسي
"ارجوك اكعد محلوة وكفتك ..
"هااا
اول شي السلام عليكم ..
'وعليكم السلام اترجاك اكعد
كعد على طرف المسطبة اني فتحت كتابي وعيني عليه ...حتى هو عباله رجعت اقرة
" اترجاك اني بالي مو يمك ولا احب هاي الامور
ااااه
تنهدت معرف اشلون اوصلها اله
" شوف اني يعني .. مو مال هاي السوالف ولا يمي مال بنات اصغر من عمري لا اشوفني ناعمه ترة اني كبيرة و ادرك هاي العلاقات مو دوم تمشي عدل لهذا مبتعده عنها ..
ياريت لو تغض نظر عن الموضوع
اني ادري بيك ابن ناس وراح تفهم كلامي واني مقدرة اعجابك لكن مو بهاي السرعه من ليلة ويوم انت متوهم اني لا حبك ولا انت تعشقني هذي الامور ماتجي هيج ياريت لو تفهني
يعني اشلون اوصلها الك ما ادري
كنت اتحدث بهدوء .. كانت المنطقة هادئة جدا ما تخلوا من المارة والسيارات الي تمشي على خط سريع
والمباني الي اتحواط حدائقها الازهار والاشجار المتسلقة ..
ومسطبات على الرصيف والمعهد كدامي مغلق بعده هو عبارة عن قاعه كبيرة ومكتب و مغاسل .. يجون الاساتذة كل واحد عنده محاضرتين بالاسبوع
باليوم ناخذه اثنين
.
هو ما قاطعني لدرجة شكيت هو ما سمعني
همست
تسمعني
سلطان
فز من مكانه خرعني
وكان ينظرلي والفرحه ضاهرة على وجهه  راسمه ابتسامة مجنونه
" شنو عيدي
ياالله اشكثر حلووو اسمي بصوتج
تحنطت اني وين اتكلم هو وين بعدين كل الكلام الي كلته ما عقب علية ...!!!!
"والله اليوم الله راضي عليه ...
واخيرا سمعته بصوتج العذب
"ها !!!!!!
كام راد يروح مشى خطوتين واني ارمش بعيني اريد استوعب هذا طبيعي لو مجنون ؟؟!!
رجعلي
"اهه يا محلى اسمي بلسانج نساني كلشي ...هاج هاي الاجراس تتشكل جوة القفص
امتعضت منه بصبر نافذ
"ياقفص
"مال البلبل
هم ضم وكسر حرف الباء
حكلي شاربه وراح من كدامي ..ضليت اتبعه بنظراتي كان يراقص الارض بمشيته من الفرح
يارب هذا ناصب عليه ويريد يجيبني للدرب بهاي أساليبه لو اهبل لو شنوو احتاريت وياه
باوعت لاجراس الزينة كانن بالون الزهري ...
هذا الانسان مجنون رسمي ؛
مرت الايام وكل يوم ابو كذلة جايني وحتى من ما يضهر نفسه اني اشوفه مرات ومرات لا ..
مايفيد بيه الصد بلطف وما اعرف ليش ماعندي غير اللطف وياه ماكدرت استخدم وياه غير اسلوب يمكن لأن هذا مو طبعي ويمكن هم لسانه الحلو مانعني اجرحه بصد قوي ....

انتهت دروس التقوية وكعدت بالبيت وكنت دوم اقرة
وملتهية بدروسي ..
اجتني دعاء الي بطنها بدت تتكور
" اكلج والله مشتهية لبلبي
"هههه ما خلصنه من شغله الوحام
" رهوف هذا رامي صايع دومه من اريده
ما ترحين اجيبين الي فدوة
"هههههه شيطلعني
"حبابه
"دزي وحده من البنات
قصدت بنات سامي
"لا امهن ما تقبل ومابي حيل الها
" مممم زين امنين اجيب الج اني شوديني يم السوك
" لا ولج البارحه من رحنا للدكتورة مرينا من يم محل المرطبات كالب يبيع لبلبي حار يمووووت وحلويات
"اشجاب الجلاق ع البانية
"اشمدريني حبابه روحي والله قريب غير اني فرات مانعني من الطلعه
"اوك ..بس وين كلتي المحل
"ولج هذا براس الشارع ابو المرطبات كلبه لان بردت الدنيا
صفنت
"على جهتنا اليمنه
"اي اي
همست متسألة
"سلطان .
"شنو؟؟
"لا هيج حروح اجيب
لبست وتأنقت كالعاده
من طلعت للهول
دعاء كالت
" اف منج هي منا لهنا
" ميخالف
الوحده لازم اتكون دوم محافظه على ستايلها

طلعت واني ايدية بجيب بالبالطوا تبعي
دخلت للمحل شفته واكف مع واحد يسولف من شافني انسطر سطر كان لازم بأيدة سويج وكع منه
"مرحبا
ما رد عليه
والثاني سوة نفسه يلعب بالتلفون
"ها شنو تردين ؟؟
جفاه عجبني هذا اشبيه
هيج متخوف و كوة يحجي
" اريد طاسة لبلبي
"اي اي
انتي روحي واني اجيبه
"نعم
كلتها مستغربه
"وين اروح خوية
تنهد وراح يسكب الي وبس يباوع الي ويباوع لصديقه  ..
"ااااااااااااااخ
ياربي
هذا اشبيه وكع على ايده ماي لبلبي حار .
ضليت اباوع للمحل اشلون صار بيه انقلاب بينما هو راح يغسل ايده ...
صفنت على الرفوف واثناء تطلعي للمحل لمحت صديقة مبتسم
" ما تنطيني انت عفية تأخرت
باوعلي واتسعت ابتسامته اكثر
"هاي انتي
"!!!!!!!!
ما فهمت شنو يقصد حطلي بكيس   لبلبي  وبعلاكه اخذته منه  اجانه سلطان
اعيونه تشعل نار واني هم ما قصرت ضليت اباوع اله
" ها خو متأذت ايدك
" لا مابيها شي
يلا روحي لبيتكم مرة ثانية دزي رامي .
كلمني بنتر احرجني كدام الولد 
خليت العلاكه وطلعت
عبرت الشارع واتوجهت للسوك
"وين رايحه
حسيته خلفي يمشي مباشرتا
" ماعليك ..  الحمدلله والشكر اكو غيرك يبيعون
" لج ما اريد ربعي يشوفوج
وكفت واني اباوع لكدام

" امشي لا توكفين هيج تحرنين
مشيت وهو خلفي
"ارجعي اخذيه وروحي
" ما اريد اسلوبك جدا مزعج
"لعد غير اغار عليج
هم وكفت حرنت
" والله اشتاكيت والله
كل يوم اروح للمعهد.
ليش ماتجين
سكتت ما جاوبته وليوفت رجعت
وما ادري هو خلفي لو لا ... بس من عبرت الشارع شفته عبره قبلي ودخل للمحل
وكفت ابابه  .. جابلي كاسة كبيرة كلها لبلبي وعليها اشياف نارنج طازجة
تنفست بأريحية واخذتها منه
"اشكد تريد
" لا هاي عربون اعتذار
"ههه
رحت وهو ضل يتبعني بنضره ..

دخلت على دعاء
"اووويلي ولج ردت اشويه
اووف كلبي صغير لا يتحمل
اخذتها حطتها على الكاونتر
كالت بس اكمل شر ملابس وارجع ناكل سوية
اني كولت الها اوك بس ادخل ابدل ملابسي
وكفت كدام امرايتي
" وبعدين وياه هذا هههههه حتى زعل ما اكدر ازعل عليه  اشكد ينتر اعبر اله
هههههع مجنون عود ليش ما يقبل صديقه يشوفني قابل هو يعرفني اصلا بهذا تصرفه كشف نفسه ...
طلعت ورة وقت من غرفتي
شفت دعاء ادور
بالمطبخ
" ها رهف وين الطاسة ؟؟؟
"يا طاسة ؟؟؟
قصدج كاسة البلبي مو حطيتها اهنا
يلا م خن ناكول
"شنو طارت ...
رحت للهول شفت نهى كاعده هي وبناتها والكاسه كدامهن فارغه
دخلت خلفي دعاء
"يااا هاي مالتي ليش اكلتوها
نهى " شنو ؟؟
صرنا نتاحسب على الاكل وهذا مالتي وذاك مو مالتي
اني حكيت جبيني بعد العناء الي حامل وجبته لخاطرها ما اكلته
دخلت لغرفتي وعفتهن
كل ما اذكر شكل سلطان وهو يمشي خلفي ويباوع منا ومنا خوفا عليه  ويحجي لو اشلون زحلكني من صديقه متواجد يمه رغم اني شفت بعيونه الاشتياق

ع العشا كعدنا ناكل الا نهى وبناتها ماكعدت !!
بابا
سأل عليها
" وين مرتك والبنات
" ما ادري
نهى نهى  . سلوى 
اجتي نهى  كالت لزوجها
"ها صحت الي ؟
ابوية سألها
" ليش ما تتعشون يابة ؟
" اااهي
باوعت لدعاء وكالت
"والله يا عمي صرنا نتحاسب على اللقمة اهنا خفنا ناكل وهم اتكول اكلتوا عشاي
دعاء غمضت اعيونها  ونزلت خاشوكتها حكت خدها بطرف اصبعها مزعوجة
ورجعت تاكل
ابوي لامها على كلامها وسالها اشبيها .
وسامي هم
جاوبت بتمسكن
" اي اذا دعاء لأن اكلت اشوية لبلبي اشسوت بيه

دعاء "ترة والله ماكلت شي ما طلع سؤال
فرات "شصاير
" مصاير شي فرات 
نهى " ترضاها فرات مرتك اتحاسبني على اللقمة .
بابا " كافي هاي السوالف وصيحي لبناتج وتعاي
سكتت نهى وراحت
فرات " انت شعليج بيها ليش اضوجيها دوم
زعل فرات مرتة بطريقه كلامه دوم يحسسها هو واكف بجانب نهى
اجت نهى وهي و بناتها
فرات " عمي ليش هاي التكشيره
باجر انروح واخذكم للمطعم حتى بس يطيب خاطر ام سلوى
نهى
" هههههه لا يمعود اخاف نغص
وباوعت لدعاء

"هههه ما ناخذها ويناها

ازعج دعاء شقى زوجها
"الحمدلله والشكر شبعت
كامت من مكانها واني زعلت عليها
ابتسمت لفرات وكتله
" ما اسولف الك شصار بيه اليوم
" ها رهوف الارعن شنو سويت
"جنت اقرة ودعاء الحت الا تاكل لبلبي اضاهر وحامها ما خلص   وطلعت للشارع ادور الها ما خليت محل ما رحت اله
وجبت الها ووكع مني ورجعت جبت الها مرة ثانية
هو كذب ما وكع مني لكن مكدر اكله رجعت الكيس عليه وزعلت ورحت للسوك
"ورجعت للبيت لكيتها خطيه اشر بملابسك خطيته الها على الكاونتر رجعت ما لكته  . 
بلكت تطلع اجيب الها ....خطية هي ماتاكل اي شي وابنك ماخذ من صحتها
خلع نظاراته الطبيه كلامي عنها كان مؤنب جدا
كام وراح خلفها ترك نهى خلفه اتباوع الي بمقت
ابويه بعد العشا ما ادري وين طلع .. حتى سامي طلع
اني غسلت مواعين وشفت فرات هم طلع .. 
بعدها شفت ابويه دخل عليه للمطبخ
"هاج بابا اسكبيه بصحن واخذيه لمرت اخوج
ههه شفته طلع لبلبي
اخذته الها وراضيتها بكلمتين اخذنا الصحن ورحنا بالهول يم نهى انشوف مسلسل
اهنا رجع سامي وبيده كاسة لبلبي
"هاي شنو منو سبقني
ضحكت اني
"بابا
ما هان عليه يطلعن بحفده حمصات هههههههه
نهى كامت تطحل
دخل فرات وهم بيده كاسة لبلبي
اني متت ضحك عليهم الادهى من هذا كله الكاسات كلها شبه الي جبت  بيها اني اضاهر سلطان اليوم رزقه بس علينا ههههههههه

ابتدا الدوام وصرت كل يوم اروح وارجع العصر انزل براس الشارع واشوفه واكف بباب المحل يستقبلني بأبتسامه
بيوم صعدت بالخط ... وشفته هو جالس على دراجته  ..؟؟
مشت السيارة .. من نزلت كدام المدرسة ...لمحته واكف ع الشارع
اويلي هذا متبع الخط !!!!
دخلت للمدرسة وعفته ابسرعه
من حليت هم شفته وهكذا كل يوم صرت اشوفه من غير ما نسولف ...مجرد نظرات لا غير
لكن للقدر رأي ثاني  .. بيوم كانت عجة حمرة طلعت من البيت مختنكه دا اريد اجيب رامي من الشوارع واني ميته خوف عليه ..
رحت للحديقه ما لكيته ..دخلت لدربونه اطل ع الشارع اخاف يم المحلات ... يادوب اشوف كدامي
وصلت لفرعنا وهو ماكوا شفت سلطان عزل محلة
وشافني اني اجيت يمه
" اشلونك ؟ ما شفت رامي
"اي شفته قبل ساعه يمكن
كتله ارجع للبيت
ما رجع
تنفست بضيق
"لا
عفته ورحت متوجهه للساحه البعيده

" زين تعاي ارجعي للبيت واني اجيبه هاا  ؟
اجانه طفل يركض وكف يمي

"خاله رامي وكع بالساحه اتخربط

اني ركضت
سلطان
" تعاي وين راكضه يمعوده
روحي كولي لهلج.واني رايح اله
ما سمعته اصلا كنت مذعورة ركضت للساحه وهو خلفي هو والطفل  
دموعي تجري غصبا عني ... والهوى يذبح ويخنك بالتراب الاحمر  ..
وكفت يم دربونه الهث تعبانه  اجر النفس
" رهف ارجعي
امرني بصوته الخشن
" م م مكدر سلطان رامي واكع  .. كمت ابجي بصوت
" حبابه ارجعي واني اصرف لا اضلين تبجين اهنا
"روح روح كدامي اله روووح
اتلمست بملابسي .اااه ما شايلة تلفون
" ما اروح وانتي تبجين ..  الرايح والجاي يتفرج عليج  ..
امشي
مشيت لكن مو للبيت .. وصلنا للساحه شفنا بس الاطفال ملتمه عليه و واحد رجال ما اعرفه اني من شفتهم هيج وهو ما مبين
صحت
"راااامي 
عمة
ركضت اله
سلطان
" الا اصيحين
صاح بيه
وراح كدامي  .. ابعد الجهال عنه
الطفل وجهه ازرك ومغمض اعيونه
فقدت صوابي وضليت ابجي واصيح بأسمى
باوعلي سلطان بغضب
شاله وكالي
" رايح للمستشفى ال *********
"روحي لهلج خل يلحكونا لهناك ...
اخذه سلطان كدامي واني خلفه ما رحت لبيت اهلي ..
وكف تكسي حطه واني كعدت يمه ابجي و طول الطريق سلطان يباوع الي من المراية ويأشر اسكت

كأن قطعه مني دا اخسرها .. جزء اغلى من روحي .. نفسة كلش بطيئ وهذا الي جنني  .
ارش عليه من البطل  ماي ما يصحى
"رامي روحي تسمعني اني عمه رهوف ...الله عليك رد عليه
سلطان
"ما تسرع خوية اكثر
السايق
" والله يا اخي هاي السرعه الي اكدر امشي بيها بهاي العاصفة .. والله اني راجع لبيتي ما ردت اطلع كروة . بس شفت حالة الولد اجيت وياك
شصير منك ابنك
سلطان رد بعصبيه
"اي
اي
اني "عفية اسرع الولد راح يروح من ايدي .
التفت عليه سلطان وصاير اعصاب
ضرب على حجرة
وسكت  .. 
"سلطان ...انطيني تلفونك خل اتصل بالاهل
توني وعيت لازم يلحكونا  ...
طلع تلفونه  ...
ما اجه ببالي اي رقم  .  ما حافظه غير رقمي . دكيت على نفسي  ومحد يشيلة  ....
مرة ثانية حاولت 
"الو منو وياي
اجاني صوت فرات
"فرات  اني رهف
"رهف  ؟؟
وين طالعه وعايفه تلفونج
" فرات اني رايحه للمستشفى ..لكيت رامي متخربط بالشارع  .. ومختنك ماخذيه ل********
"شنووو اشبي شنو مختنك
"الحكني انت وبابا
"اشبيه رهف كلش صاير؟؟؟
ما ادري فرات ما ادري
اني رايحه لهناك والله الي يستر لا اتكول لأمه

سديته وانطيته لسلطان
وصلنا لهناك .. نزلت اني وسلطان شال رامي ودخلنا نركض ...لهناك  .. ضل على الاوكسجين والطبيب فحصة ...
جنت فوك راسه واكفه وبس ادموعي تجري 
وسلطان من الجهه الثانية واكف
" ها دكتور اشبي
" متعرض لحالة اختناق من الجو
وعنده التهاب بالرئتين ...خل نجري اله فحوصات ونشوف ..بعدها
" زين هسة اشلونه
سلطان سكتني بعصبيه
" .. اشوكت اسولة التحاليل و هي عبارة عن شنو
راح مع الطبيب  يستفسر وقبل لا يطلع خزرني  ..
ورة اشويه رجع
" انت لا اسولفين ويه الزلم اني شنو واكف اهنا
ما جاوبته سكتت دخل فرات وبابا وسامي ركضت لبابا حط ايده على متني ورجعنا يم السدية الي عليها. نايم رامي ....
بيومها اشكروا الولد سلطان ..وسامي راح وصل لبيته .. واني بتت يم  رامي مع فرات وبابا رجع ..
غبت يومين عن المدرسه ..الا اتحسن ابني الروحي الا اطمنت عليه ...
طلبت من سامي نطلع نسوق ...لأن نفسيتي مو شي
وثاني يوم رحت للمدرسة ..
شفته براس الفرع واكف مثل ناطور المطر ابتسمت اله .. هو اشر ع نفسه بمعنى الي ؟؟
ضحكت ورحت صعدت ...مكدرت اشكرة غير بأبتسامه لأن الشارع مكتض بالناس ..
هو صعد على دراجته ...وعرفت راح اشوفه يم مدرستي ..لهذا اتعمدت انزل قبل لا اوصل الها بمسافه قليلة بحجة اريد استنسخ شي ..
نزلت واني اباوع لدراجته واله اشلون شعراته تتطاير وهو يسوق متبعنا  ..وكف الدراجه وصارت كذلته على اعيونه ....ابتسمت ورحت متوجهه اله وهو ممصدك نفسه يباوع منا ومنا وللخلف عباله قاصده غيره ...
" اشلونك سلطان ...عساك بخير ..
" ه الحم الحمدلله انتي اشلونج
"اني زينه تمام ..
"اشلونه رامي
" صار زين
حل السكوت بينا هو على الدراجه يم الرصيف واني واكفه كدامه منزله راسي والعب برباط الجنطة
"شكرا الك ...سلطان انت فعلا شهم ...ما اعرف لولاك اشلون اصرف
بس ابتسم  ..
" اا ممممم واني اسفه
هز راسه مستفسر سبب اسفي
" لأن خبصتك وبس ابجي واصيح .. بس والله غصبا عني
" لا لا ما انخبصت ...بس ما ردت احد يسمع صوتج ولا ردته يطلع
سكتت وضحكت على همه الاول والاخير محد يسمعني ويشوفني غيره
فتحت جيب جنطتي طلعت شي البارحه اشتريته
"اتفضل
باوع لأيدي لازمه خاتم بحجر اسود
اخذه مني وضل صافن عليه
"هذا شنو
شنو المناسبة ؟؟؟.
" عربون شكر
كلتها وضحكت وهو هم ضحك لان هاي سوالفه ما العربونات
حاول يلبسه جرب اصابيعه ما دخل غير بأصغر اصبع اله
باوعت اله بأحباط
"يا ما صار .
" ولا يهمج مراح ينزع ابد منا .. .
"ههههه الله يجبر بخاطرك ...بس حرامات ..معبالي كفك كبير هيج ...
على العموم ... يلا راح اروح تأخرت  .. 
ومرت الايام وظل سلطان ملازم عادته واشوفه يم المدرسه بس هم رجعنا للنظرات
الي اختلف صرت من ادخل او اطلع ابادله الابتسامة ....
  
بيوم وصلني ابو الخط براس الشارع قبل لا انزل انطيته افلوس الشهرية كل البنات انطنها الي واني انطيها اله ..
نزلت من السيارة وكالعاده رقيبي راجع قبلي يباوع الي من جام المحل ... 
" انتظري رهف ..يبنية
باوعت للخلف شفته السايق نازل
" هاي 25 الف زايده
" اهااا اشلون هي كل وحده 30 الف اني حسبتهم
"لا زياده شوفي .. اخذتهم منه حسبتهم وابتسمت
"اصلا ناقص مو زياده البنية الجديده اضاهر دافعه بس 25 ناسية  لأن هي الوحيده الي انطتني الفلوس خرده
ضحك هو هم لأن مطفي وناسي الجديده
"اصلا نسيتها ههههههههه
"ههههه دهاك وباجر عود ذكرها مو تنسى
التفت ردت اروح واشوفلك سلطان طالع من المحل مصرفن ردنه واعيونه اتبث شرر عليه فات من يمي
" اتضحكين وياه مووو
دشوفي اذا ما اجنزة الج اليوم
انعكد لساني وكلبي رجفني رجف قوي واني اشوفه اتقرب من الشاب
يتبع