رواية سلطان زمانه الفصل الثامن 8 - بقلم زهراء العراقيه

اهتزت اوصالي وارتعدت بس اتبسمرت بمكاني من راح يمه ولزمه من خوانيكة
ضليت مذعورة بمكاني اتلمس الخلاص من هذا المأزق والموقف الصعب كلش
شفت الناس اهل المحلات ابسرعه فكوا سلطان عنه
بس اسمع سلطان يكول
" هذا ابن .....
الولد " والله ما اعرفه
اني واخيرا كدرت احرك رجلي واروح يمهم لأن السالفه راح تكبر .....
" خوية مصار شي الولد وكفني حتى ينطيني افلوس ترة سوء فهم
الزلم هم هدأو لأن اجه ينكتل السايق بسبب سلطان الناس عبالها متعرض الي ياربي انوب نصهم جيرانه من عمر طويل ويعرفونا رحت بيها بسبب هذا الطايش . الناس ركبوا الولد سيارته وقبل لا يسوق كال
" حتى بعد ما اجيها اشلون ناس ....
اخذت جنطتي الي وكعت من ايدي ورحت للبيت مسرعه .
طول اليوم اني عايشه بخوف لا من يجون اخوتي لو ابويه يعرفون بالسالفه والله يبطلوني اووف امنين اجتني هاي السالفه
مر يوم ثاني والحمدلله محد من اهلي عنده خبر بس اشلون اروح للمدرسة .. كلت لوالدي الولد بطل ..كال اخابره واني متت خوف طلبت منه ما يخابره اني ما اريد امشي وياه وساعه كامله ضل بابا يحقق ليش شصاير واضطريت اكله ما ارتاح وياه سياقته طايشه ، كل كذباتي بسبب سلطان البلوة وضل دمي محروك لا اكدر اروح اله بعد اخاف جيرانه اهل المحلات ينتبهون الي بعد الي صار وضاله بحسرتي ودي ارزلة ... اذكرت رقمه ..رقمه عندي من اليوم الي اتصلت على نفسي من رقمه .. ضليت اكلب بالمكالمات الواردة ولكيته واخيرا هو الرقم الغريب الوحيد بتلفوني ... دكيت عليه واني محضره اشلون رزالة معدلة ...
دك التلفون ودك تأخر اجت تخلص المكالمة
فتح خط
" الووو منوووا ؟؟؟
" الوو سلطان اني رهف
بصوت حاني ورقيق
"رهوفتي
الله يا طاري حسج يبهذلني مووانوب حسج متصل بيه
" س سلطان
كنت لازمه التلفون وارعش
" يروح سلطان يا قلبي انتي يا اول فرحه الي
حكيت جبيني بأرتباك وخجل
صوتي بالقوة طلع فاهي و ناصي
" شنو هذا الي سويته
" شسويت يروووحي
" م ميصير هذا الكلام عيب
" لا عوفيني اكلج كل الكلام الي من اشوفج اتبهذل وما اكدر اكولة
بس انتي امنين جبتي رقمي ؟؟
اخذت نفس طويل
"افييييش يا نفس المحبوبة ودها ريتي تاخذه الها و اتحبسه ما يطلع بعد
"س سلطان كافي عاد
"والله مو بيدي شو هو لساني صار هيلك
" شوف يا ابن الناس اني تعبت منك حيل
تصرفاتك غريبه وكلامك اغرب الي يشوفك ما يكول هذا انت
" والله اني نفسي ما اعرفني انتي خبلتيني
"اوكف استوب لا تاخذني بكلامك خن اكول كلام الك واسمعه زين
" اي تمام بس امنين جبتي رقمي ؟
"هاي اشبيك بيوم الي ساعدتنا اتصلت على رقمي من تلفونك ...
"يااا كولي وعلي
"شنووو انته شتكول
"صدك يعني اااااااااه
يا سلطان الغبي
سمعت صوت ارتطام كانه ضرب نفسه
"الووو
" رقمج طول هاي الايام يمي واني ما ادري
جاوبت بأمتعاض
"اي يمك ... عوفنا هسه منه اني ما اكدر اجيك بعد الي صار بس اكولك لهنا وكافي بعد ما اكدر
اتحمل
" والله احبج
خرسني بكلمته ياااربي احسها طالعه من اعماقه ومو اني الشخص الي يستهان بالحب غمضت اعيوني متوجعه حيل ...كلبي واجعني عليه
"احبج حيل والله ما اجذب صدكيني اني مو العب وياج ولا عليج
" زين والمطلوب
" ما اريد شي منج
هي بس نظرة تكفيني ...والله ما نيتي وياج شينه اني احبج وبس
سكتت ضاع وشرد الكلام مني .. اباوع للفراغ واسمع انفاسه تتضارب ...
" رهف اني جنت اكره النسوان والله اتعرفين شنو يعني اكرهن
ذهلني الي كاله
"شنو!!!
" اي والله ما اطيق امر من يم مرة .. احسها الله خالقها غضب علينا اكره عطرهن ما اطيقه
"انت شتكول ...انت مريض
" اني عانيت اهواي
بعمري ما باوعت لمرة بالشينه ولا بالزينه ... عبالي بس الدلع والمكر عدجن
تنهدت بقلة صبر اريد اعرف هذا ليش هيج يكول
"كمل بالله
" بيوم شفتج اني تمشين بثقه من كدامي كرهتج قبل لا اعرفج ..
"اويلي ليش
"تنورتج اكصيره وتتمايلين بخصرج . لافه عمامه جنها مال سيد وتمشين وتعلجين ...اخ من ذبيتي العلج وفتي من يمي ودي انزل للكاع اشيله واصمغ حلكج بيه ..
" كلمة وحده منك واسد الخط .
"يااا هاي انتي متصله ....خرب راح اسده وارد اتصل .
"ليش
"مو سلطان يكلف ابنية
سدة بوجهي وضجت ودي ما ارد عليه من اتصل بس الفضول واريد اعرف سالفته طلع شايفني من قبل ما اني اعرفه ....
"الووو كمل من غير مقدمات من اشوكت شايفني ؟؟؟
"حييل من ازمان ..
ودوم اشوفج بحكم شغلي جنتي اطلعين اهواي
"اهاااااا
وين اشوفني وشنو جنت تشتغل
"جنت عامل خلفة وعدنا شغل بعمارة بالشارع الي وراكم وانتي ما شاء الله كل يوم اطلعين
الصبح ومتعدله على سنكه عشرة
"اشوكت هاي اخاف من جنت اروح لدورات تعليم الحلاقه ...
مممم صح جنت اطلع بس حتى اشتغل مو العب ..
بس طلعت انت شايفني من زمان .. حتى قبل لا اني ارجع للمدرسة ...
اي كمل وشحول هذا الكره الى حب

" بيوم جنتي طالعه مستعجلة والدنيا جانت ماطرة قبل يوم والشوارع مليانه طين
انتكيت على المقعد مالتي كان على شكل كف ، التمست الراحه وكأني دا اسمع قصة حب واطلع على بداياتها
"اييي .
"اني جنت جاي حتى اغلف البايات لا ينعدمن بعدنا ما صابين السكف
وشفتج واني اريد ادخل
اتمنين من كرهي الج توكعين كدامي
فزيت من مكاني
"عشتوا ليش هذا الحقد
" حتى ما تمشين بغرور
"اني مغرورة ؟؟!!!!!!!!!!
"ايي حتى سلوان من شافج كال الي مبينه مغرورة بس اني ضربته على السانه ...حكه ما يعرفج
" اها
كلتها بسخرية
"كمل
" انت ما وكعتي بس شفتي طفلة تمشي وطمست بالطينه وكامت تبجي اجيت اني اروح الها انتي اقرب الي منها رحتي الها من غير ما تهتمين لكعبج ولا لشكلج وهندامج طمستي حتى اطلعيها لأن جانت مخترعه واصيح .. شلتيها بطينها بحيث عبالي اتخصج ...شفتج من هديتها و سكتيها وخليتها تضحك بطريقه كلامج الضاحك ولا يكلك طامسه بالطين وغركانه لحد اركبج ..
من سألتيها عن اسمها ...مثل الكف الي اجه على خدي ...فد استحيت من نفسي واني مدري ليش حاط عقلي وياج واكرهج هيج من غير ما اعرفج ..
طيبتج واخلاقج العالية خجلتني ..رجعتيها لبيتها ورجعتي واني بس اراقب بيج .

تذكرت ذاك الموقف الصعب جدا تعرضت بيه للرطوبة طبيت بوسط بركه طينيه البنية واكعه بيها يطلع عمرها 3 سنوات .. وديتها لأهلها واني كوة امشي بالشارع بذاك المضهر رجعت لبيتنا حتى خجلت من شافتني نهى وما طلعت من البيت لمده ايام خجلانه لا احد يشوفني ...

" ولا توقعت ابد انت شايفني من قبل
"شايفج وداعتي اكثر من مرة يبعد الروح وعانيت حتى بس كل يوم اشوفج
"شنو!
" عبالج من رحتي انتي واختج للقاعه واني اهناك صدفه ....لا يا بعد بيتي اني كل يوم رايح وراج اهناك واتنظر طلتج عليه

"شنووو ؟
لهالدرجة
"اي يبعد عيناي واكثر هم ..اني لا كاري مال اكعد بمحل ولا هاويها للشغلة بس شسوي لأجل المح عين الغالية اسوي كلشي

"والله ما اعرف شكولك .. شي غريب واحد يلاحظ وحده بهاي الطريقة ويعجب بيها .بس اشلون اتعرف صديقك بيه ؟
صاح سلطان منفعل
"يخسة اعرفه بيج ...مو ازلمة معتبر اذا مسويها
"انت كولت توك ؟!
" اي مسولف اله وحده مطيرة النوم عن عيني صح حتى اخذ فكر منه اشلون اكسبج و اخليج تنتبهين الي ...بس ما كتله هاي حبيبتي لا وشرفي هو عرفج وحده من اجيتي واني حركت ايدي عرف هذا ملعب ما يخفى عليه شي .....
انتهت المكالمة ....باوعت للساعه ضليت صافنه عليها واضحك ..خوش ارزلة وابعد عنه مكالمتنا طولت اكثر من ساعه يحجيلي عن نفسه واشلون حبني هههه اه يا سلطان ولا اكدر اصدك ابد
انوب كلماته ضلت مخزونه ببالي كلساع اتذكرها واضحك احس الله واخيرا نصفني عاطفيا من اكتشفت اكوا شخص باوع لروحي قبل شكلي ...

مرت فترة ... ضليت على اتصال بسلطان ..لكن مو مكالمات مطوله ...كان يخاف عليه حتى مو دوم يتصل ... .... مرات بين يوم ويوم ومرات كل ثلاث او اربع ايام بوضح النهار يتصل ابد ما يدك بالليل عليه .. مكالمة قصيرة يسأل عن حالي وبس ..
بس نظراته الي من اطلع من البيت وارجع هي الي تحدثني عن مدى شوقه الي
بيوم اتصل بيه كنت يم اهلى كاعده ..من دك كمت لغرفتي ..
"سلطان
" يا هلا
" يا هلا بيك
اكولك اهلي مجتمعين دا اباوع فلم وياهم ..بالليل ادك عليك ..
تنهد بأسئ
"اااه مو سلطان الي يدك بنص الليل على بنات الوادم
"شنو!!!
" والله ما اريد ابد اسويها اني اصلا اتصال كوة اتصل بيج ...غصبا عني
جاوبت بنتر
"منو جابرك شنو هذا الكلام
" لا تفهمين غلط بس وغلاتج اريد كلشي حسب الاصول بس ااااااخ من الوكت
جر حسرة عميقة
" سلطان ...؟
" اي والله غصبا بس لأن اشتاك حيل لصوتج اتصل اطمن ...واروح .. غير هيج ما اريد يكفيني اشوفج كدام عيني ... انتي والله اغلى شي بحياتي
هزتني كلماته احتاريت من نفسي ليش ضايجه اني
سديت الخط ورحت
معقولة بديت اميل اله ....؟؟؟؟؟
مرت الايام وراحت الايام واني كل ما مر الدهر يزداد
تعلقي بيه حبيت اهتمامه محسسني اني شي مهم جدا مو لأن اني مفتقده هذا الاحساس لأني مهمه عند اهلي ابوية اخواني خواتي كلهم يحبوني لكن هو حبه غير ... غيرته غير كلماته اثرهم على قلبي غير ...دوم احس نفسي هو ممتلكني اله واني اغلى واهم وافضل شي صار بحياته شعور جديد بعمري ما حسيته وهو التعود عليه بشكل مرات يخوفني بحيث صرت اتلوع واني انتظر اتصاله او موعد الدوام .. مع الاسف عطلنا ..ناخذ فترة استراحة للقراءة .. وبعدها امتحانات اخير السنة .. صرت اطلع لنفسي مشاوير حتى بس المحه كدامي ... صرت اني ابحث عنه وعن وجوده ..
بيوم مليت من كعده البيت ومن الكتب .. محد كان موجود غير دعاء نايمه بغرفتها .. ونهى عد اهلها والولد طالعين همه وبابا العصر ما يكعدون بالبيت .. رحت تأنقت وتعطرت ... وطلعت بحجة اشتري أيس كريم منه ...
دخلت شفته يبيع ..
انتظرته يخلص ويطلعون ..
وكفت كدامه
" ممم اشلونك
باوعلي بغل
"اخ منج اخ
"شكو سلطون
" وشاربي اذا عدتيها اروح احرك بيتكم
رديت بفهاوة
" هاي اشبيك
' اشبيه شنو هاي سلطون ..
' انت مو اصيح الي رهوف .. على وزنها
" اني ازلمه ما احب ادلع
رفعت حاجبي عليه
"لا والله
اشبيك اتباوع الي هيج
باوعت لنفسي ...تنورتي كانت ميدي
" لا ماكو شي
بس العين بصيرة والايد كصيرة
شرايده
" اريد مممم من هاي
لا لا اريد كبوسة ممم وازبري
" اكلج سلوان على جية يلا استعجلي
شلعت كلبه ضليت اتفها حتى بس اوترة وازعجه اشكد احبه من يحمى اخذت الاريده ورحت .. طلعت من المحل ... صار بوجهي سلوان
" اشلونج خوية
التفتت على المحل ما شفت سلطان يمكن انشغل يرتب ما شافنه
استغربت هذا ليش يسلم عليه
" هلا
ردت اروح
" اكلج كولي لسلطان كافي ..ترة ما يفيدج والله
"نعم !!!!
" الله يخليج ترة المحل بس خسارة بخسارة عليه
خليه يرجع لكاره ..
دخل ابسرعه سلوان واني رحت مستائة عليه
يفيدني او لا هذا ما يعني لسلوان بس مال المحل بس خسارة عليه لا هاي ما اقبلها ابد ....
من رحت انتظرت الليل يصير حتى ادك عليه
....
ختلت بغرفتي ودكيت ....
ما فتح . رسلت رسالة
"سلطان رد ترة ضروري ردك مسألة مهمه
اتصل ابسرعه
" شكووو بيج شي اجيج رهف
ابتسمت على خشونه صوته من يحجي ..
" لا ماكوا بس عندي موضوع وياك
" وكعتي كلبي
" لا يوكع قلبك خلة بمكانه وكولي انت دا تربح بمحلك لو بس خسارة
" شنو هذا السؤال
"عليك الله جاوب
" والله انه رابح
فرحت بداخلي حيل يعني سلوان يكذب
" صدوك
"اي والله انه رابح شوفتج
أبتسمت بألم
" وداعت امك سلطان انت دتربح لو تخسر
جاوبني بعصبيه
"اخر وحده اتحلفيني بيها هاي فاهمه ..
بعدين ليش اسألين ها
"ليش عصبت ؟؟؟؟ سلطان من هاي عصبيتك معناها دتخسر وانت مستمر بس حتى اضل قريب عليه مووو
سلطان كول عليك الله
" اي اخسر . البيع يمكم يا دوب اطلع الاجار ..
"يعني ما كذب سلوان
عصب بالزايد فوك ما هو معصب
"هذا المطي حاجي وياج
حطيت ايدي على حلكي شجاني ...
"بس والله مكال شي الولد ترة قلبه عليك
"سدي سدي والله لكسرة تكسر هذا
" ترة مكال شي غلط وما اجرم
" هو بس كلامه ويه البنية مالتي معناها اجرم و خان صاحبه ..
سد الخط
"ياربي زلة لساني راح اسوي مصيبه .....
ظل كلبي عليه وكلساع ادك وما يشيل للوحده اني سهرانه .....دكيت عليه
رد
اجاني صوته ناعس
"الووو
" سلطان شنو سويت
" بعد بيت سلطان
سلطان تعبان
" شنو سويت بصديقك
" ما سويت ...
"كتلته
"هههههه  هيج اشوفيني مجرم
" لا بس عصبي
تضحك يعني ما صار شي
" لا ما صار شي
"لعد ليش تعبان
" لأن العين بصيرة والايد قصيره
" هاااا سلطان اذا الشغل بيه خسارة عوفك منه
" لا لا مو على المحل ...اساسا هذا شي شكلي اني كل يوم اطلع اشتغل لا تخافين اني سبع صنايع
"اي اعرف ادري بيك شاطر من شفتك ذاك اليوم نايم جوة سيارة ابو الغذائية تصلحها اله
عرفتك شاطر وما يصعب عليك شي
بس كلي سلطان ليش تعبان
" ااااااه اريدج يا بت الناس ...بس  ايدي ما طايلتج
"شنوو
رجف كلبي فرح حسيته راح يطير
"ليش ما طايلني
" ما اعتقد اهلج يرضون بيه
سكتت معرفت شكول ذهلني هو طلع مفكر بالزواج مني وهاي اول مرة يلمح او يكول هو يريدني للزواج ... مع اني لهسة متحفظه ما صارحته باالي بكلبي ما كولت اله اني انتظر اتصاله انتظار الزرع للمطر ما كولت اله نظراته اتحسسني بكياني صرت اخذ منها طاقه اتجدد عليه نشاطي وتفائلي بيومي كله ...
سولفلي عن نفسه اشويه بهاي المكالمه ..هو خلفه بناء كان وتركها لأن متعبة صار يكسب رزقه من عده سبوبات هسه مأجر المحل وبنفس الوقت يطلع يشتغل ويه صديقه بتصليح السيارات .. سلطان عمره 32 سنه بس احسه بريئ كلش قلبه صافي لمح بس هو عاش طفولة صعبة بسبب اليتم كالي عنده ورثه من جده عند عمة وهو منتظرة حتى يكدر يتقدم الي 
واني صرت انتظر هذا اليوم وصار حلمي يتحقق هذا اليوم وتتحسن ضروفه حتى اكدر انجمع بيه
مرت ايام وليالي وحبي لسلطان يكبر وينضج كان يعلمني واعلمه ...هو يعلمني احبه واحب طبيعته
واني حاولت اعلمة الصبر و  الاتأني ولو اعاني بهاي المسألة لأن هو طبعه متسرع ما يلزم اعصابه كبل من غير ما يفهم مستعد يسوي حرب؛؛ عصبيته مرات تخوفني من يسولف الي مواقف   اكشن ...
كان صادق وياي و واضح لأقصى حد كل صغيره وكبيره اعرفها عنه هو عايش وحده ببيت وارثه عن ابوه بس هو عمله ما مستقر بيه منتظر الورث يطلع حتى يكدر يعمل مشروعه ويحقق حلمه و هو   يدخل شريك بمعرض سيارات  ويزوجني هاي كانت اقصى احلامه واني اسعى بتشجعية حتى يحققها ... 
طبعا بهاي الفترة خلصت من السادس وقدمت على كلية تربية قسم تاريخ وداومت اول سنه تحت اعيون سلطان  وحراسته الي .

بيوم كنا كاعدين على الغده دناكل الاطفال ماكوا اتغدوا قبلنا ... لأن يوم جمعه وبابا يتأخر بصلاة الجمعه والأطفال  ما تصبر  ...
فرات كال لأبوية
" بوية هذا رامي شسوي اله
"ليش بوية شسوة
نهى "اكيد مصيبه برة من الولد ..
كانت دعاء تاكل واتباوع لأبنها الي منيمته على هزازه  ابصف كرسيها ...
ما مهتمه لأحد ..
فرات
"اووف اليوم اجه يموت لو لا رحمه الله ..هذا سلطان ابو الموطه اتعرفوه ...هو طافر عليه وساحله وواكع الرجال ايده مخلوعه من جرة رامي الوكح
وكعت من ايدي الخاشوكه
ابويه
"خو ما بيهم شي
"لا مثل القرد حشاك  كلشي مابي بس هذا الرجال خطية تأذى
سامي
" والله هذا ابن اصول ثاني مرة يساعده لأبنك .
اني ارتعدت خوف عليه .. باوعت للساعه ب 1 ونص .  عفت اكلي ورحت دكيت عليه ما رد .. انتظرت للعصر وكلبي ممرود ..  بالكوة انتظرت ...
طلعت اتسحب مابيه حيل اكذب عليهم  بمبررات لطلعتي هيج وقت .
رحت المحل معزل رجعت واني كلبي نار عليه ..
ومايرد عليه
الليل  كله ادك بلكت يفتح خط ..جهازة صار مغلق
يأست حاولت انام مكدرت واني بالي مشغول عليه
رن تلفوني طفرت للميز  ..بلهفة جاوبت حتى ما ركزت  بالرقم
" الووو سلط.....
" مرحبا رهف مو ؟
اشلونج
اتبسمرت وصوتي اختفى
باوعت للرقم . غريب ما حافظته ...
" منو انت
" اني سيف نسيتي صوتي
" شنوو !!
امنين جبت رقمي ...وشذكرك بيه
"والله ما نسيتج بيوم   وسعيت حتى بس اخذ رقمج وحصلته من صفحتج انت عايفته ضاهر
" هااا
عضيت شفتي ندم اشلون ناسيه رقمي ..بس هي صفحه فيس جديده .. القديمه سكرتها و رميت خطوطي القديمه ..
" شتريد سيف ..
" والله اريد اعتذر ...اريد اشرح الج اشياء اني ما كنت فاهمها ..
" ماكو داعي لا للعتذار ولا للاتصال رجائا احذف رقمي ..  وإنساني
"انطيني فرصه ابرر الج موقفي واشرح الج اشياء ما اتعرفيها عني
" الله يخليك سيف احضرني انت اكراما الك مراح احضرك اني مرة ثانيه ...
ما اريد اي تبرير انت مسويت شي
" لا سويت ولازم تنطيني فرصة
"ارجوك راح اسده
" اوكي راح اثبت الج الحقيقة الي كنت غافل عنها اني هليام ...حقه كلبج يخاف ويصد بعد الي صار
"ارجوك كلشي ما اريد ... وانتهى كلشي وبعد لا تحرجني بأتصالك ...

غلقته  ..واني كلبي نار على سلطان ..اوف اني مصارلي ايام وفتحت صفحه جديده بأسمي وصورتي الشخصية للتواصل مع طلاب القسم لا اكثر
اني بيا حال هسه حتى يطلع الي سيف ....باوعت للتلفون واترجيته يضهر رقم سلطان يتصل بيه .. مو راح اشتعل بنار خوفي عليه .. 
حتى ما فكرت لا بعودة سيف ولا تسألت شريد يبرر بذيج الساعه كل همي حبي سلطان ...

.. ثاني يوم الصبح .. قبل اروح للدوام
رحت اله ...دخلت للمحل واني كلبي ملهوف على شوفته ... شفته كاعد ويه اثنين ولد ..سلوان ابسرعه صرف نفسه واخذ صاحبه وياه    . واني عيني بس على سلطان الي كاعد وايده ملفوفه ...
" رهفتي شسوين جايه
" اشلون صرت
كلتها واني صوتي يرعد اريد ابجي
" زين يابعد بيتي
"سلطان والله اجيت اموت من خوفي
بجيت بعد مكدرت الزم اعاصبي تلفت
"ياروحي اسكتي والله مبيه شي
بس ناسي تلفوني بالمحل وطافي شحن ...هسة خليته يشحن حتى اتصل بيج يا بعد بيتي
" انت زين ...كل بسبب رامي ليش ايدك هيج اشبيها
"خلع يا بعد الروح بسيط .. لأن حركتي سريعه ..
بعدين هذا رامي من ريحه الغاليه ...
ابروحي افديه
"ي الله سلطان والله احبك
كانت ادموعي غامرتني
هو فز من مكانه وصاح خرعني
"افيييييييييييييييييييش
وج
ضل يحرك بشعره ويرجعه بطريقه مربكه واعيونه دمعت ممصدك نفسه سمعها مني
اني نفسي اتفاجأت من كلتها اله ، جدا حريصه ان لا تطلع مني واندم !  لكن هسة هزني خوفي اصلا هي ماكنت غير كلمة خوفي ولهفتي عليه هي اكبر دليل على حبي اله ردت فعله اربكتني اكثر من الكلمه كأنه ملك الدنيا ومابيها .. خليت وطلعت خجلانه ..  رجعت للفرع بين ابتسامه و ربكه بمشيتي مال وحده صغيره توها بدت تحبي بطريق العشق والحب
صار بوجهي فرات يم الباب دخليلك ربي ولا لاحظته الا من صرت كدامه
"وين جنتي
" ليش راجع من وقت
رديت على سؤاله بسؤال واني مرتبكه وارجف
" رجعت اني طلبت اجازة حتى اخذ دعاء للمستوصف عدنا لقاح
ادخلي اشبيج حرنتي
دخلت واني اهتز من الخوف
دخل خلفي
"وين جنتي
"هاا رحت اجيب شغله من راس الشارع
خليت ودخلت لغرفتي شارده من عيون فرات الي جاهلة كلشي عني لا افضح نفسي ..
دك تلفوني كان سلطان
" هلا سلطان
كلتها بصوت يرجف
" وين شردتي
فجرتي كلبي ورحتي لوين
" هاا والله نظراتك خجلتني انوب اصدقائك برة خجلت من وكفتهم
" يرحون فدوة لأم بيتي
ابتسمت واعيوني دمعت
" والله تحققت  اكبر احلامي .. من حبيتيني يا رهفتي ...بقت بس شغله وحده لو تسهل حتى اكدر اجي اخطبج  ...
"انشالله
"ولك فديت ربك يكول انشالله طلع هو هم رايدني

جريت الكلمه وكلت خجلانه
"سلطاااان

انفحت الباب عليه ودخلت نهى متخوصرة
" سلطان ؟؟؟؟؟؟؟

يتبع