رواية سلطان زمانه الفصل السابع عشر 17 - بقلم زهراء العراقيه

من كتابات زهراء العراقية
لفت بيه الارض ودخت حيل عايد والد كلثوم . يعني زوج سلطانة السابق  وابن عمهم الي ممنوع انجيب طاريه بالبيت   .... !!!!!
...
رجع سلطان كالعادة الساعه ب11
كنت كاعده انتظرة
خلع جاكيته وكعد تعبان
" سلطان ..متعشي
"اي
" زين اسبح ابسرعه 
"سوي الي جاي
"هم راح تسهر ؟
راح يسبح
.....
جلست جنبة
وصرت اشرب وياه
شفته استغرب مو عادتي هاي وخاصه احنه معزولين عن بعض
"اكولك صدوك
"شخبار عمك
مجاوب
" زين هو اخذ جرعات  كيماوي لو شنو
"منو؟
"عمك
" اشجاي تحجين
"اشلون صار بعده يعاني من المرض لو طاب
" يا مرض ؟هو هذا يصيبه شي
كومي افتحي الشاشه
رحت فتحت التلفزيون..
'اها يعني اني مشتبهه هو مو مريض اهاا اضاهر سلطانه ما تقصده
" هو هذا يصير بيه شي اشجابه على بالج
صفن عليه واني افكر . سلطانه كذبت عمه مو مريض
وعايد ابنه وهو رجع اله ورثه بس بعدهم ممصافين وابد ما دخل بيتنا زين اشلون اجه لبابا واجه بيوم كعده الزلم يخطب لسلطان ؟؟؟؟
اسئله دوختني وما اعرف جوابها
" اشبيج صافنه
" سلطان صارحني بيك شي ليش ما اتنام ليلك ..؟
'اوهو روحي نامي رهف
" منو عايد؟؟؟
صاح
"كومي نامي
"اذا ضام عليه شي كوله ..
خزرني واشرلي اكوم عفته ورحت لسرير
دخت بهاي العائلة
عدت ايام واني بالقوة ماسكه اعصابي واجنب سلطانه بودي اروح اكول لسلطان كلشي واريح ضميري بس اعرف اطير بيها رقاب فساكته ومتحمله

بيوم رجع الضهرية سلطان ينام ويرتاح ويطلع العصر
جلست جنبه
"سلطان قبل لا اتنام اريد اكولك شغله
" كولي
كان مغمض
"اريد غساله الي واريد مكنسة واثاث للبيت كله جديد وتطلع بيه بشقه او بيت صغير
"شنو!
" تعبت من اختك ....اعزل بيه سلطان ما متحمله اختك ...والله اخجل استقبل احد من اقاربي دومها مهملة لنفسها وأطفالها .. وحتى البيت مدا اسيطر عليه بوجودها

"اعوفها وحدها؟! لأن حضرة جنابج تستنكفين منها
"اولادها كبار
"ما اكدر اعوفها
" مو وحدها انت راح اضل قريب عليها بس تعزلني عنها
" ماكو طلعه اكعدي واسكتي معليج بيها ما اكدر اطلع وحدي ببيت واتركها هاي اختي
" لا والله وجودك قابل فارق وياها هو انت كادر الها
كلتها بعصبيه وكمت من جنبة جلست على سريري
عصب ونهض الي
" شنو ولج
"لا تكول ولج رجائا ولا تعصب عليه و تفتح اعيونك
ما فد يوم طلبت منك شي وسويته
اخذ افراشه ونزل وتركني اسمعه على الدرج ينزل ويسب ويغلط ...

..
ما اجاني النوم ...
كنت مغمضة حسيت  بأيد تحرك بشعري .. هاي ريحته الي حبيتها
ما تحركت  اخاف لا يروح بس يشوفني كاعده .. قبلني على خدي وابعد شعري عن وجهي و راح لفراشه شفته يگلب ...اردت اروح اله . بس ما كدرت لو يريد قربي كان ضل يمي .. 
حبيبي رغم اني ازعجته لكنه لزم اعصابه وما ثار عليه ... خلاني تصرفه بس اريد اكسب وصله ..
واخيرا الصبح اجاني فرات وجاب الي الي طلبته منه ..
حطيته على  الميز بغرفتي وبيومها اعلنت العصيان ما عليه بيها حدي لغرفتي وبس
باوعت للقفص
اذكرت ايام ما كان يشغل هذا القفص بلبل سلطان والله كانت اجمل ايام عمري
لاعبته وانطرحت انتظر رجوع سلطان ... صار وقت الغدة
دخل للغرفة عصبي
'ليش عازلة نفسج
ازعجني تصرفه حسيت ام علاء دافعته عليه لأن مطلعت اليوم
" اهااا يعني انت جايبني خدامه لأختك
"شنو انت ليش  اتحبين اضوجيني  يعني حلو هاي كعدتج
" ما الي شغل بيها
واشرت بأصبعي محذرة
"لا تدخل بينا مدام ما تكدر تعزلني عنها
ازعجني شكله كان عصبي و يعض بشفته كأنه بالقوة مساك اعصابه عليه
"اهااا
تكتفت
"شنو كالت الك سلطانه وهيج دافعتك عليه
لزمني من زيجي كأنه فقد
" منو يدفعني ...انت طفلة ...هاا طفلة ...  ضاله من غير اكل شوفي شكلج اشلون صاير
دفعني للخلف
" دفعتني عليج موو . المرة اتكلي اعزلها لا تموت من العزلة حابسه نفسها وما تاكل ويانا
دمعت وبكيت
"اختك ما تنحمل وانت بعد هم
كعدت ابكي
" اسكتي كاافي ولا يكلك مرة اشكبرج اقل شي وبجيتي عليه ...هسة اني شسويت الج ...الله يطيح حظي لأن خايف عليج .
انزلي اتغدي لا والله افلش الحيطان عليج
نزل . ورة ربع ساعه او اقل صاحلي .. نزلت واني مخنوكه بعبرتي ...ما اريد اكل من اكلها . قليت بيضه وكعدت بالهول ....
اجاني سلطان كان مبدل لابس سيت بيتي
"شنو تاكلين انتي ؟؟
" ما اريد اكل من طبخ اختك مو نظيف
هز بأيده وراح
صاحت سلطانه اثاريها كاعده بالكلدورة
مدري شسوي يمكن كالعادة اتفلي لوحده من بناتها
مدت راسها
" ترة الخبز الي تاكليه اني عاجنته
استغفر الله ياربي ليش حاطه دوبج ودوبي

حطيت الخبزة بالصينية وانقرفت  اكله حشة نعمه الله ....
صعدت لسلطان حاولت اكلمه
"  لا تحجين وياي .  اتنرفز منج
رحت جبت اله البلبل
" اكولك ما شفته ...ما ذكرك بشي فتح عينه هز بايده
وانكلب على بطنه ونام
رجعت القفص وطلعت الفون اسمع بي شي يريح اعصابي
العصر كعد هو وصار يبدل ملابسة
اني جالسة اللاعب البلبل
"تؤ تؤ حبيبي
كنت اريد اسمع صوته  لهذا اضرب بخفه على باب القفص وهو يتحرك
" توتو تجي لأيدي حبيبي اطلعك ؟؟
تعال يروحي
دا افتح الباب
شال القفص من امامي سلطان كان بعده ما مزرر قميصه وصدرة المفتول ضاهر شاله بعصبيه حطه برة الغرفه ورجع
"ليش طلعته ؟؟
" انجبي بعد ما يدخل للغرفة
اتكله حبيبي

.. اشر بايده

" الي ما اتكوليها شايله خشمج

اخذ حزامه وطلع معصب

حطيت ايدي على حلكي وضحكت عليه هو هاجرني ويغار عليه من البلبل .....!!!

اااه  منه و بالليل يجي يمي يشمني او يبوسني ويروح ينام
والله تعبت وانهد حيلي ما اعرف سبب هجرانه الي ودي اكله اني احبه بكل حالاته وما اريد منه يتغير بس لا يتركني وحدي اعاني الهجران لكن عزة عليه نفسي ... 
لزمت خدي الي عليه اثر بوسته   ونزلت اله على الارض .  جلست جنبه كان يدخن وصافن على السكف
"سلطان
باوعلي ومد ايده اتلمس وجهي .  كانت اعيونه تلمع و حزينه طاغي عليها السواد  ..
بلعت ريقي واحطيت  ايدي على ايده
"شتريدين
اريد اكوله اريدك ...
" اني تعباااااان واريد انام ... بس
" اهاا اتنام ...
ما رايده شي بس ردت اكولك اريد افلوس اشتري كم غرض الي
ابعد ايده
" كومي من يمي
كشول ورجع يباوع للسكف
" ليش معصب هاي لأن كلت الك اريد افلوس ما اريد منك شي .  اووك
التفتت عليه وبعيونه السخط
" ردت انام بحضنج عبالي جايتني تالي الليل مشتاقه طلعت اني حالي حال مداسج بس ادوسين عليه روحي روحي
انطاني ضهره واني انصعقت شسويت اووف
كمت من يمه ضايجه بالزايد .....
حسيت شعري يحكني . ودبي بيه .. لا وبعد رحايتي هم هايجه عليه ...
وقلبي هم يلوم بيه والتمن كلهن سوة

الصبح
    سلطان  تأخر بالنوم لل10 الصبح صبحت عليه ما رد

نزلت حطيت القفص جوة 
بعد ما تريكت غسلت صحني وصعدت تاركه البيت مكركب على اصحابة
شفته كاعد
كان واكف يمشط شعره . ضلت بنفسي اجي يمه واني اعدل غرته لكن .... يا وسفة مكدر . كنت خايفه اتقرب لا  يصدني . وكفت قريبه عليه خلفة . اظن شافني بالمراية بس ولا عبرني ..
" سلطان ...
"على الميز الفلوس خلي ام علاء اتروح وياج
عافني وطلع ..
حطيت اصبعي على حلكي .. اكتم صوتي لا يطلع ويسمع بكاي .. كعدت على السرير مشنجه ...يا الله انطيني الصبر ما اكدر اتحمل بعد طاقة تحملي خلصت ..
دخلت عليه ام علاء
" هييي انت  شو كاعده . يلا اطلعي هذا الكراب قابل كله عليه ...
"واني شعليه بزعبلة اطفالج ..
اتعاركنا كالعادة .. طلعت من غرفتي اتعد واصف وتتحلف بيه
رحت اني للمطبخ وجان البلبل بأيد ابنها .. .اخذته منه ورجعته للقفص زين ما ميت .  وصعدت لغرفتي   خوفا من هاي المرة وجهالها ..
للعصر مكدرت اتحمل الالم خابرت سلطان مرد رسلت اله رساله
:- اني حخابر واحد من اخوتي اذا  ما يجي ياخذني هو للطبيب
خابرني
كلمني بجفا . ما اخابر احد . اروح مع اخته لطبيب الاسنان .
"ما اريد اطلع وياها تعال انت اخذني
سد بوجهي وره اشويه رجع اتصل
"اتصلت بيها راح اتبدل حضري نفسج وروحي وياها
"اووف سلطان  . ولا يكلك مزوجه حتى من اتمرض ما اطلع وياك للطبيب الله اكبر
سديته بوجه اني هالمرة وبدلت ملابسي
لزمت خدي وحطيت ايدي على مكان الالم  . 
غيرت ملابسي وتأنقت ونزلت اطقطق بكعبي واشوفلك سلطانه لابسة عبايتها وكاعده
اووف جريت الحسرات على منظرها اشلون راح اطلع وياها .. كنت لابسه تنورة وجاكيت جويتي
وشيلة بصلية
اما هي على حاشية العباء بقع ناعمه الله يعلم اخر مرة غسلتها اشوكت .
" هيج اطلعين ما اتلبسين عباتج
"لا ما الج علاقه ..
هم ناقص البسها من اروح لهناك .
اخذنا  تكسي  .
ونزلنا كدام عمارة كبيرة دخلت وخلفي  سلطانه دخلنا للعيادة .  كان كدامنا خمس مراجعين ..
جلست انتظر ..  صاحوا اسمي كمت واني مرتبكه حيل
فتحت باب اريد ادخل بس اني رجلي ترجف و خايفه ... جيتي اله اكيد مو صدفه وراح يعرف متعمده  عزة اني وين راح عقلي من اجيت
" ادخلي اختي
باوعت للسكرتير بأرتباك ودخلت . بطيئة الخطى 
الوم بنفسي اشلون سمعت لنفسي واجيت لهنا
كان جالس  خلف مكتبه ..
رفع راسه
" اهلا ...
صفن بوجهي سيف
ازداد توتري ...
وكف هو
"رهف !!!!!!!
ابتسمت حاولت اخفي ارتباكي
"مرحبا اشلونك دكتور
"  رهف يا اهلا وسهلا
وكفلي وسلم عليه ..
اشرلي اجلس جلست وهو امامي كنت اباوع لأدية ومتورته ...
راسي افتر .. 
قاطع ثورة افكاري سيف
" انقطعت اخبارك ...
اشلونك

"تمام .. انت اشلونك

" اني الحمدلله مثل ما اني ..
بس انت متغيره

"احم اهه للافضل لو للأسوء؟
" ههه اكيد للافضل
ابتسمت
حل السكوت
" اي
"ها اسفه . اني عندي الم اهنا
اتفضلي للفحص
رحت جلست وهو بدورة شافه شغله ..
متغير سيف .  كبران مزداد جمال واثارة من توسط الثلاثين بس ولا يبين عليه . صارت عيني بس على ساعته الفضية . وحلقته الي لابسها بأيده اليسرة .
كان لابس كفوف شفافه   كان جدا قريب عليه .. بس اريد يبعد ايده عني .. ما اعرف كرهت نفسي حيل بدافع الفضول جبت نفسي لهنا . لو رايحه لأي طبيب ما اعرفة  

خبرني احتاج الى حشوة . وجلستين عنده
صفنت على عيادته وترتيبها.. لفت نظري لمعان الارضية الگرانيت تلمع اكدر اشوف وجهي من نظافتها .. لو مكتبة غني بالاناقة والترتيب
.
طلعت من يمه ومشيت تاركه سلطانه بمكانها بالانتظار  . اجتي خلفي
" اشبيج طايره
" ما اريد احد يعرف انتي وياي ..
"هاي فوك زيني المذمة !
......
بالليل  تعبت من الحكة    . شعري دمرني . شفته بالمراية كله قشرة ..ااه مزعجة جدا استغربت اني ما اصير عندي دخلت غسلت شعري مرتين وطلعت
اريد انام بس اهرش ولا مرتاحه ..
حسيت بسلطان رجع اني بس اهرش ..
رحت للحمام وغسلته على امل القشرة اتروح .
الصبح كنت انظف البيت لأزم اشارك لأن متت من اكل البيض .. غسلت الكراج والمطبخ غسلته  وجلفت سيراميك المطبخ عن الدهون خليته يلمع لمع والارضية نكعتها بالنفط .. وبعدين بقاهر الدهون
وبالسيم اجلف بيها قطعه قطعه ..انهد حيلي واحس ضهري انفلق .. بس ارتاحيت نفسيا من لمعته . كله . طلعت من الكاونتر الدهون والزنجار صارت الساعه 12
طلعت من المطبخ تاركه سلطانه اتسوي غدة ورحت لغرفتي صايره جنازة نمت على بطني واون من الوجع ...اعيوني اتريد تغفى ..بس اكو دبيب وحكه بين خصلات شعري اجرني من النوم
اغفى ..هم افز من اثر الدبيب كأن احد دا يمشي بين خصلات شعري ...حكيتها بأضفيري ...حسيت شي انصقع ..
اجه سلطان ...خلع وراح سبح واجه يمي احسه يتحرك بس كنت مغمضه من التعب . 
اااااه فد ارتاحيت من ايده فركت رقبتي .. ونزل لضهري ...
اااه سلطان حباب ادعلكي ضهري ...
لكنه ما مرغلي وانما   كان مشتاق
"لا لا
رفعني واني ضهري يوجعني
راد يقبلني
اندكت الباب ...
غادة
"خالوا تعال دخل القنينه لامي
" وين اخوتج لعد
ما ادري اتكول تعال راح يخرب الاكل
كام يتأفف واني هم ضجت وقتها هاي ما صدكت يجيني ومن كيفه 

نزلت خلفه ..
شفت الجدر مفتوح   . دخلت سلطانه من يمي .. 
كالت
"يا هاي اشجابها
اتقربت يمها وشفتها بعيني اشلون طلعت الذبابه من القدر وسدته
لاعت روحي واجه يغمى عليه
طلعت من المطبخ كارهه روحي
وكفت يم الدرج مكدرت اصعد كمت احك شعري من فوق الشال حيل لأن احسه يقرصني فضيعه هاي القشرة ...
غاده
"خاله شو اتحكين
التفتت عليها
"ما اعرف غاده متت ما طلعت قشره
همست بأذني
"اخاف البنات عدنج گمل ؟؟؟
ابتعدت عنها
" لا يمعوده شنو  شفتها قشره بيضه
" اخاف اصواب
"شنو يعني
اه اه يا قصدك بيوض
ابتسمت
"والله اني دوم انعدي من ذني الثولات وانحرج حيل . تعاي خل افليج .
رحت خلفها للغرفة . و فلت شعري
"هاا بشري قشرة مو
"عزة انوب شعرج اشطولة
لا مو قشرة
"لعد شنوووو
"متروس ترس اصواب حتى بادي يفقس
ابعدت ايدها
" كولي والله
"والله
" ا اني بيه قمل
حطيت ايدي على حلكي
صحت مذعورة
" بيه قمل ...
كمت من يمہا واصرخ فقدت اعصابي اشنجت كلها اصرخ بصوتي الضعيف وابكي والزم بشعري المحلول
"قمل
فتحت الباب صار سلطان بوجهي كأنه جاي على صوت اصياحي
" سلطااان بيه قمل ...
انعديت
اااه
ابكي واصرخ وطلعت من الغرفة مذعورة ذعر عمري ما توقعت هيج بيوم تنهار اعصابي .. 
هو خلفي
صاح
"محمد طب
صاح على ولد اخته يرحون  ..
لان كنت  مثل المجنون  امشي واجرجر بشعري
ردت اصعد تعبت وكعدت على الدرج و ادية على وجهي ابكي بحرقة وشعري على متني ومغطي اكفوفي
سلطانه
"اشبيها 
كمت
صيحت عليهم ويمكن غلطت وما اسمعهم بس اصرخ
وابكي
صعدت لغرفتي .. كعدت
على سريري وحيل ضربت نفسي بأثنين اديه
واصيح
"كله مني
لزمني و كأني اتعارك وياه اريد ابعده و اخلص من نفسي  .
ربطني بأديه
واني اصرخ
هد ادية حس نفسه عصرهن .  هجمت على صدرة وصرت اضربه بشكل عشوائي .
" كافي رهف .. اهدي
اهدي رجع لزمني واني هايجه مثل البحر بيوم عاصف
" رفهتي ...اسكتي يا بعد بيتي .. اهدي . اهدي يروح سلطان ...
رخت اديه معادت تهاجم  . اكتفيت بالنحيب على صدرة وهو باطراف اصابيعة صار يحك شعري
"اش كااافي
ابديت اسكت ..تحول الى بكاء صامت ..  بعدها الدموع جفت
" اريد اطلع منها
'يجرالج
" اريد وحدنا  وبس
"يجرالج يبعد بيتي
" و و اريد
كنت اتشاهق واتحدث
"اريد براد جديد
" ميخالف
وقبلني على راسي
"وا واريد سيارة واسوق
" اخاف عليج يا بعد بيتي
"ما اني تعبت اعاصبي تلفت
"اششش
حط اصبعه على حلكي
" هدي
ميخالف  يجرالج
" وا اريد تجي من وكت
و اطلعني وياك
اريدك تشتري الي ثوب على ذوقك
بكيت كان وجهي حااار حيل وانفاسي ثقيله واعيوني يحركني ووجهي هم من الضرب
" واريد  وردة
رجعني على صدرة ابكي واكول اريد وردة حمرة
" وا اريد اريدك اتبوسني ..
رفعت راسي عن صدرة
" بوسني سلطان
لزم خدودي وقبلني الى ان انقطعت انفاسنا
ابتعدت عن وجهه
" اني ليش كنت ابكي ؟؟؟
ابتسم
" تردين وردة !!!!!
"هههه اي صدوك اريد
حكيت راسي
تذكرت السبب
"وخر عني سلطان . اااه اني بيه قمل لا اعديك ورجعت ابكي من تذكرت السبب
رجع حظني
" اهدي رهفتي اني قابل
احبج يا قبل الروح ودوها
يتبع
طريقة نشري بين يوم ويوم لكن
البارحه نشرت واليوم هم ما اريد كلمة تتأخرين اهواي او نسينا القصة  حسب ضروفي  اكتب 😘😘