رواية سلطان زمانه الفصل الثامن عشر 18 - بقلم زهراء العراقيه

من كتابات زهراء العراقية
كنت نايمة جنبة  .. احس بحركة .. فزيت
كان مختنك وبالقوة يجر نفسه فتحت الضوة
" حبيبي  اكعود ..سلطان
صحى
"اااه اااه عوفها ولك
" منو سلطان ...حبيبي
فرك اعيونه ..
صفن اشوية صحصح ..
لزم راسه
" اريد انام مرتاح تعبت تعبت
سويت مساج لراسه ..
" حبيبي  .. لو اعرف شنو جرالك ..
'اريد انام تعبت
" تعال بأحضاني.
ابتسم .. واجاني
"سلطان كولت الك نام
هههههههه كافي

........
خليت سلطان يجيب علاج الي ولبنات سلطانه
لأن ماكو فايده اذا ما يطلع من البيت هم يرجع الي .

مرن يومين عليه شفت دلال منه ما شفته بيوم عرسي ...
اكلي كله جاهز وحضنه دوم حاويني ..
هو بالعمل خابرته كولت اله حروح مع سلطانه للطبيب وافق ...

اني ما اطيقها لكن ماعندي غيرها
بالتكسي رن تلفون سلطانه ردت وصوتها شعلاته
"ها ليش شتريد
ها تجي علينا خوش
عيادة الطبيب ب........ قرب.......
خوش خوية
سدت الخط
"هذا رجلج راح يجي ورانه بعد شتردين
"شنوووو
صوفر وجهي وارتعبت من المأزق اهنا نزلنا من التكسي مشيت للعياده بفكر شارد ...
انوب ابسرعه دخلت خدرني وطلعت برة انتظر .. واني عقلي يضرب اخماس بسداس ساعه اكول اعوف كلشي واطلع منا ساعه اكول خل شصير يصير تلفت اعصابي لأن خابرته قبل لا ادخل لسيف وكولت اله ماكو داعي واصر خرب حظي مو وقته ابد يريد يثبت الي هو يهتم بيه   . بس مو وقته   
صاحوا اسمي كيفت كلت كون اخلص ابسرعه قبل لا يجي هو .
كعدت وسيف يتكلم وياي بهدوئه المعهود ويبتسم ااه بعده ما تغير يحب يتكلم وياي وكأني رفيقتة..
اني بالي بس اشوكت نخلص
غمضت اشويه تألمت
سيف " تألمتي
كالها برقه ...اندكت الباب .
السكرتير
" زوج الاخت
اني جمدت اطرافي سديت حلكي
سيف "افتحي عزيزتي
يا اهلا وسهلا .. تركني سيف وراح لسلطان واني جامده واباوع للسكف
"مرحبا دكتور
"مراحب اهلا وسهلا سيد ..
" سلطان ...... دكتور بشر اشلونها خلصتوا
لحد الان سلطان ما لاحظ سلام سيف اله كان خاص يعني مو مال طبيب عادي .. مال واحد عده معرفه
" لا بعد
اتفضل
اتفضل انتظرها اهنا ..
جلس سلطان امامي .. مكان يقل بشي عن سيف من ناحية الاناقة سلطان اضخم وملامحه شرقيه بحته اكثر من سيف الابيضاني النازك ...
ابتسمت اله ..
كلبي كان يدك بقوة اجه يوكف . خايفه لا سيف يبين اله من غير قصد هو يعرفني
اتحركت ...
سيف
" دا تتألمين ...رهف . ضلي ثابته
كان جدا قريب عليه واديه داخل فمي واني اعيوني على سلطان الي بده يمسح بوجهه عرفته من هاي حركته بدأ يضايق كلش وكف واجه فوق راسي حاط اديه بجيوبه . 
موقف  لا احسد عليه  واحد امامي مبتسم ما اعرف ليش والثاني خلفي .....
يشتغل سيف واني كلت هاي هي اذا  اتكلم سيف اني اروح بداهية وينتهي زواجي لمت نفسي وتصرفاتي الي مالها معنى ابد .

بدأ يتنهد
حركت راسي سيف عدل حركتي ولزمني من راسي عدل الكرسي ورجعت للخلف  .
"دكتور اشوكت تخلص
كالها بعصبيه محاول يخفيها بس واضحه
" صبر اخي
انتهى واخيرا
" معافية رهف
راح يغسل اديه
" انوب الطبيب  عرف اسمج ..ليش ما ادخلين سلطانه وياج ها
رجع سيف لمكتبه
واني صافنه على سلطان
" يلا امشي
دا يكتب النا علاج . سيف الحمدلله صار يعاملني برسمية امام سلطان .. اخذ منه الوصفه .  ولمحت سيف ظل صافن على سلطان حملي جنطة ايدي واشرلي امشي كدامه
"مشكور دكتور هاي هي بعد ما عدها جلسه
" لا كلشي تمام
"مشكور خويي
اجيت ابكي خليت زوجي بموقف لا يحسد مكان فضول لا كان انانية مني ردت اشوف سيف كمل بطريقه وعايش حياته مرتاح  رحت اله وعرضت سلطان لموقف جدا سخيف ما يدري كلشي  حسيت نفسي ما افرق عن سلطانه  الي كاعده برة تنتظر ..
طلعنا سلطان ... ووصلنا للبيت نزلت سلطانه
ردت انزل
"انتظري
شغل السيارة وانطلقنا
اشرتله بمعنى وين
ابتسم
"مشوار يا حلو مو اتريد تطلع  ..ولو بعدني ضايج منك اشلون اتروح لطبيب  شاب ووحدك تدخل
خنست بمكاني .
مكنت مصدكه نفسي طالعه وياه ..لازمه بأيده لا يضيع مني . دخلنا لمجمع غرف نوم واهنا فاجئني سلطان راح يجدد الي غرفة جديدة .. 
اختاريت بصعوبة وحده . لان ذوقي صعب ..
حجزها سلطان وطلب  توصيل للبيت ..
طلعنا مناك. وما ادري وين راييحين . دخلنا للمول . شفت نفسي واكفه  كدام محل ورد ....
كان من  اجمل ايام حياتي مع  حبيبي رجعت للبيت وبأيدي باقه ورد .
الساعه ب 7 هو كال مشغول طلع واني بغرفتي ارتاح
.
جعت نزلت لجوة ٌ شفت سلطانه  خطفت وبأيدها سفطه افلوس ما شافتني واكفه على الدرج كانت مدنكه ...
رحت خلفها وين رايحه للحديقه شسوي ...
شفتها فتحت الباب .. اريد اشوف مع منو واكفه  اسولف ..رحت من غير تردد  وكفت خلفها فتحت الباب
هي كانت لازمتها بأيدها
صار بوجهي شاب من عمر علاء اول ما شافني خله وشرد ووجه سلطانه صار اصفر وكامت ترجفت .اني اتخوصرت وضربت برجلي الارض منتظرة تبرير

" اي وبعدين ...
كملت بسخرية
ام علاء ما تحجين منو هذا ؟

انشدهت للحظة ...

"هذا هذا ابن الجيران اخذ مني افلوس السلفه

"اهااا ابن ام السلفة ..

دخلت هي واني خلفها ضاق بيه البيت وياها .
وصلنا للهول

" زين وحسام منو
وكفت التفتت عليه
"حسام!!!!!!!!
" هم ابن الجيران .   ترحين اله للبيت ؟
انت شنو سالفتج هااا
"اششش 
ضلت اتحاول اسكت بيه لا احد يسمع من العائلة  استفزتني من حطت ايدها على حلكي
ابعدتها وكلت بصوت عال
" لا اسدين حلكي ...منو هذا حساام واشعدج تنطيه افلوووس
على صيحتي انفتح باب الاستقبال ....  واجانه علاء وجهه صاير احمر نار
" حساام ...بعدج تلتقين بيه .. واتنطيه افلوسنا
" علاء انت ما عليك.
دفع امه  للخلف وضل يصيح عليها 
"  تنطين تعب خالي لذولة الناس الحقراء انتي مثلهم والله الا اكول لخالي عليج
"لا لا تعال يمة علاء
خله وطلع
كعدت سلطانه تبجي والبنات التمن
غادة" شنو يوم بعدج ترحين لبيبي ؟؟
يوم هذا خبل راح يكول لخالي وتدرين شصير اذا كلة
" شسووي كولي الي شسوي
صاحت منفعله على بتها وراحت اتغسل وجهه اني كلشي ما فهمت ...
"غاده منو هذا حسام
" حسام خالي انتي ليش ضليتي اصيحين راح يعرف خالي سلطان بعد شيخلصنا
"خالج !!!!!!!
حسام خالج ...يعني اخو سلطان ؟؟؟
لعد ليش اني ما سامعه عنه
ما جاوبني عافني وراحن لأمهن الي تبجي وخايفه
ضليت حايرة شصرف اني كرهتها وما طقتها من شفتها مو راحه وظامه شي بس ما خطرلي هي تتواصل مع اخوها ..
رحت الهن
لكيت سلطانه تتصل
"محمد الحك اخوك .. حباب ابسرعه الحكه للمعرض راح لخالك يكله امي اتروح لبيبي ولك عوف الطوبة وروح ...
سدت الخط واحنت راسها تبكي ...
وبناتها كاعدات يمها وحواليها .  عفتهم ورحت للهول كعدت متضايقه كون ما اصير مشكلة ..
صعدت لغرفتي اسطحت على سرير ....مر وقت اكثر من ساعه ... سمعت صوت اصياح سلطان يرج بالبيت رج اخترعت لبست شالي ونزلت ..
يصايح ويه سلطانه وهي واكفه كدامه ساكته
" اشعندج رايحه لهاي.............
كان يسب امه و اخوه
وفاقد والبنات اطشرن بالبيت خافن منه . علاء واكف خلفه  وهم معصب . ومحمد صاير سادود بين خاله وبين امه لأن سلطان يشمر بأديه ويصيح خاف لا يضرب امه  .. 

" صارلج اشكد ترحين من ورايه
"سلطان اهدأ
صاح بيه رجعني للخلف
"ماعليج انتي ...
" احجي اشعندج ترحين الها .. هااا مو هاي الي طردتج انتي وجهالج . مو هاي الي ذبتج وراحت 
لو لا ....كل ما ترحين الها ما تستقبلج اشكد احتاجيتيها وهي سدت باباها بوجهج ..
اشعدج رايحه
دارت وجها عنه وكعدت على الارض مهدود حيلها
" وهذا ابنها اشعده يجي لبيتنا ..  احجي
طبعا هو يصيح مو كلام هذا ..
" امي مريضه ....
"امج منو امج انت صاحية ...!؟ عقلج لكف
لج هاي وحده ماعدها گلب
عمرها سألت عنج ؟؟
نسيتي من رحنا الها  هااا نسيتي من عايد الكلب كان يتحرش بيج وشردنا الها نشكي حتى تاخذنا ...رجلها بس ما قبل هي رجعتنا .
نسيتي من اخذتي جهالج ورحتي الها من طردوج وسجنوني .....فتحت بيتها الج لأن مات رجلها وضلت حايرة . ضحكت عليج بكلمتين
الله بسماه اذا رحتي الها مرة ثانية الا ارتكب جريمة
" هاي امي
سكت وصفن بوجها
صك اسنانه وكال بصوت غاضب
" وروح ابوي اذا كلتي بعد هاي امي اطردج منا
" بس تبقى هي امي وامك ...
"اشششش
"امك مريضه  وحالها يصعب على الكافر
" اش لا اكولين امي
" امي سلطان ما اكدر ما اروح الها ماعدها احد. حسام اصغير
لزمها من زندها
"لعد روحي الها
صاح
"جيبوا عباتها
البنات كامن يبجن ومحمد  يجر بأمه وسلطان جرها  . وحط عباتها على راسها وطلع للحديقه  واحنه خلفه نتوسل بيه يتركها وهي بس تبكي  بصمت  واتباوع النا  ..
فتح الباب وطلعها وعاط بينا كلنا رجعنا للخلف ودخلنا غصب .. عاط بينا كلنا كلمن راح لمكان .. اني رحت  لغرفتي لازمه راسي راح ينفجر الندم اختلط بالتعب ...
نزلت للبنات اول ما شافني كامت غاده سدت الباب بوجهي  .!!
رحت للهول شفت سلطان واكف يم الشباك
" سلطان !!
ما جاوب ..اتقربت اريد الومه اشلون يطرد اخته هيج لمجرد هي اتشوف امها ... بلكت يحن ويرجعها
وكفت يمه .  ابسرعه مسح عيونه ...كانن حمر عرفته باكي لكن كابر اشوفه عافني وراح للحمام .. يا ويلي
اني شنو سويت ....بس ماتقصدت بشي كنت معصبة منها و هاجمتها حتى اتواجهني ... انتهى اليوم واني مقهورة ...محمد طلع خلف امه وصلها لبيت بيبيته ام سلطان ورجع .. احس بعيونهم الملامه ...
حتى صرت استحي اباوع بوجوهم وسلطان طلع من البيت .. النوم جافاني والندم عذبني والسهر دمرني .
الصبح كعدت لكيت سلطان مطروح جنبي على بطنة ونايم بملابسة اشوكت جاي ما ادري ؟، كعدت يم رجليه وخلعته جواريبه حسيته اتحرك ..
"رهف ..
" ها سلطان 
" تعاي
عدل نومته على ضهره كعدت يم راسه ..
وابعدت كذلته عن اعيونه ،
" وين كنت
" بالمعرض
" وليش ما رجعت من وقت
تعبان رهفتي ونعسان تعاي يمي
" سلطان الي سويته غلط رجع اختك لأطفالها
" والله فلا ترجع بعد ،خليها يم ذيج المرة خليها تنفعها
" واطفالها
"ما عدها اطفال كلهم كبار
غمض اعيونه
" مرغي الي رجليه تعبان
كوم اسبح سلطان .... هسة ترتاح عظامك
لبست شي على راسي وطلعت اسوي ريوك لأهل المدارس ..  حضرت الشاي و الاجبان .. صعدت فتحت المجر ما بيه افلوس   دورت على محفظه سلطان ماهي
اتقربت يمه
" سلطان اريد افلوس ... سلطان
دكعود عاااد اريد ادز على صمون
ولا يتحرك  .. دنكت علية انوب نايم على ضهره وايده على وجهه  .
ماهي بجيب بنطرونه الامامي ...
حاولت اصحي ما يقبل يكعد .. اووف
مديت ايدي على جيب قميصه ادور بلكت الكه بيه خردة ايده لزمت ايدي بقوووة
"اااااه
لزم ايدي الثانية وطرحني على الفراش ونام فوقي
"اااخ ضهري ووووخر
يمعود ...
بالقوة يطلع صوتي اختنكت من وزنه هذا نايم ...
" حموت
فتح اعيونه وضحك
" اشبيج ما تتحملين ..
"سل سل طان متت
كام عني
" كومي سوي ريوك للجهال
' اااااه ....اريد انتفس
سويت اريد صمون ..
..
مرن ايام وسلطان دومه معصب ومزاجي   اولاد سلطانه هم محد يتحاجى معدا علاء ومحمد طبيعين وياي
شفت رغدة وكلثوم يلعبن بيت ابيوت بالهول
" يا بنات شو اليوم هم غايبات
كلثوم
"ماما ماهي
" ادري اشلون اضلن من غير دوام
رغده
"انت معليج بينا
"شنو هذا الكلام عيب
ادخلت غادة كأنها سامعتنا من الغرفة واجت هادة عليه
' انت ما عليج بينا فاهمه
لا تدخلين بخواتي  .  
خزرتني  عفتهن ورحت
حسيت بكرهن الي .. احس كل الي بالبيت ما يريدني .
تعبت وسلطان هم رجع دومه طالع ومن يجي عصبي وطلباته لا تنتهي
...
بالليل حضرت صينية بيها كرزات و عصائر و مكسرات على طلب سلطان وصعدت بيها اله
كنت الهث الدرج يتعبني حيل
حطيتها امامه
"سلطان والله تعبت من الدرج ...اني اتعب من الصعده والنزله ما تغير بالغرف اريد جوة
" اهنا ماخذين راحتنا وحمامنا وحد اهناك هوسة
" اييه بس اني تعبت
سكت واخذ صحن الجوز
ابتسم
"ما اتركصيلي ؟؟؟
" لا والله اني اكوله تعبانه من الدرج يكولي اركصي
انتكأ على المخده
"دكومي ...
"ههههه ما شتحب منه ما تكلي
احبج وانتي تتمايلين كدامي
"هههه ما احس نفسي اضحك انت شتحس من اشوفني اتمرعص ههههههههههه

اخذ نفسه
" احس نفسي سلطان  زماني....سلطان و حوريتي الي حفيت اسنين حتى اخذها كدامي معيشتني ملك
"ههههه
كمت على مهلي . طلعت ثوب ورحت للحمام لكيته يلعب بفونه ...خلعت الروب وشغلت موسيقى بالفون
رفع نظره عليه من صرت اتمايل   امامه   . وكام وصار يرقص وياي بثقل ..  بوسط ضحكنا و ونستنا نسينا نفسنا   ..
بس هاي الركصة الها توابع وخيمه كعدت الصبح مكسرة مكدر اكوم .سلطان كالي اخذج لهلج بس لا تباتين مكدر ما بلاج  . كولت اوك لا تمرلي اخلي فرات يرجعني .  رحت لهلي   .
العصر وصلني فرات محد بالهول .. ما اهتميت  دا اصعد الدرج واشتميت ريحه من المطبخ ما اهتميت
صعدت غيرت ملابسي وعدلت الغرفة ، طلعت للحمام ريحه قوية مال حريق ...تذكرت ريحه الطبخ اخاف اكلهن احترق  . نزلت على السريع وجان اشوفلك كلثوم طالعه من المطبخ تبجي
"شكووو
"نسيت الاكل احتركنا
دخلت للمطبخ اخترعت من منظر شي مشتعل احمر صاير من النار وااج ويطلع دخان اسود و سلات لايلون محترقه على الطباخ والجدر هم تطلع منه نار احتاريت شطفي وخنكه ..
اجت غاده تركض وصاحت .. دخلت طفيت المنظم
و رحت للسنك واني اكح اختنكت من الريحه وهنه بس يصارخن  .. ذبيت ماي على الطباخ و ضليت اذب منا من طفيته  طلعت مصخمه ومختنكه
" افتحن المفرغة 
طلعت غسلت وكعدت امام التكيف .. اجتني غاده تبجي
' الحايط صاير اسود
هسه خالي يعصب
" اشلون اتعوفين الجهال تدخل للمطبخ
" مو طفله هي .. دوم اتكلي لروحها
عصرونيات اشمدريني تنسى الجدر
"وين كنتي انت
"نايمه ما ادري بيهن
" اووف لو ما الوصله الي عايفيها يم عين الطباخ والسلات مكان صارت دخانية هيج .. 
حاولنا نطلع السواد بس مراح اجه المغرب سلطان اليوم على عين الحريق وجايب مسواك اتلكنا اخذنه منه حتى بس لا يدخل للمطبخ .
" بس مع الاسف راح للحديقة و بأيده كارتونه بيها ثقوب صغيره من فوق  
" جبت الج شي
"شنو
" تعاي للمطبخ شوفيه .  وين البلبل
"هاا
صحت خلفه
"مو بالمطبخ فوك 
البنات كان فيه يرتبن المسواك
دخل هو وضل صافن على الصخام الي فوق الطباخ
"هاي شنووو
" هاي هاي
" منو هيج مسوي
كالها بعصبيه
البنات اوجوهن صوفرت
" اه اني ..  نسيت الوصله يم الجدر وصعدت
صاح بيه
" اشلون تنسينه
"بعد صارت صعدت للغرفة ونسيت
عصب وضل يصيح ويحجي واني سكتت
طلع
كلثوم بجت
عفتهن ورحت خلفه
لفوك
دخلت شفته ينزع قميصه بغضب
" اشبيك اصيح عليه كدام البنات
"اشبيه حاركه الدنيا واتكولين اشبيه؟!
" وشنو يعني اصلا اني اريدك اتحوله كله سيراميك ليش مخليه للنص قابل هو غرفة ! .
" حتى اتحركين على راحتج مو
لشوكت اضلين هيج كلشي ماكوا ..سلطانه راحت بعد البيت صار من مسؤليتج ماصارلج كم يوم وحركتيه
ضحكت مكنت مهتمه حيل لأن فعلا اريد اغير البياض الى سيراميك معاجبني
"اي لعد شنو عبالك .. اني ترة معرف شي انت ما ماخذني من المطبخ .. اني الورد ما كنت الوحه
ببيت بابا
خزرني بعصبيه
بدلع معزز بالغرور

" ترة بابا كان مدللني اكثر منك
ابتسم و دلعي بالكلام امتص غضبه ؛ اتقرب يمي
لامس كفه خدي
" تعاي ادللج لعد
"ههههه
"تعاي شوفي شنو بالكارتونه ..
'شنو جبت الي
"بالحقيقه مو الج لهذا واشر على البلبل
"اوويلي
طلع جايب اله ونيسه حطه يمه وضلينا نباوع الهم
حط ايده على متني
"خطيه ..الحياة ما تسوى من غير ونيس وغمز الي
...
بيومها اكلنا جاهز خاف لا احرك نفسي واني هم خلصت من التقلاة هذا الموقف  مكان سيئ من خلاله كسبت ثقة بنات سلطانه ..  بيومها رجعت احك وعرفت رجعلي الشي الي انقرف منه ...نضفت نفسي ونزلت للبنات فتشتهن لكيت عند كلثوم نضفتها وضليت اوصي بينهم وفهمتهن هذا عيب يتواجد بالراس وشي مخزي  .   سولفت الي غادة قصة بيبيتها مثل ما فهمته اني اتخلت عنهم وازوجت وحتى بعد الزواج ما استقبلتهم ابد وعدها ولد من عمر او اكبر من علاء بشويه اسمه حسام .. بعد ما اتوفى زوج ام سلطان ...سلطانه صارت تتواصل مع امها لأن مريضه واداريهم كاشفها سلطان ومسوي الها عركه  وناهيها اتروح
كلش يكره امه واخوه الصغير .. وعلاء هم يكره حسام .. ما اعرف ليش احس سلطان قاسي وياهم كلش اهواي ؛؛ اتوسلت اله يرجع سلطانه لكنه يعصب ويتحول لوواحد ثاني لهذا صرت اجنب الحديث وياه بهذا الموضوع .. مر شهر بيها سوينا تعديلات للبيت جدد صبغه الي كله شخابيط و المطبخ سيراميك مثل ما اريد ... اني وصيت احد صديقاتي زوجها يشتغل بأتأثيث المطبخ  .يسگم النا كاونتر داير حبل وانطيت مقدم الها  حتى يبلش بيه ،،ما اكول اولاد سلطانه مشوا مثل ما اريد لكن على الاقل البنات بلشن  يقلدني  واني دوم انصح و اعلم بيهن    سلطان صار يذمر من كثر طلباتي .. يوم ردت منه نطلع اني والبنات اشتري الهن ملابس .ويوم ردت مكنسه كهربائية ويوم ردت طقم قنفات ... صار يتخبل من كلمه اريد ... رفض بعضها ونفذ البعض الاخر   ..
هاي هي حياتي مشت هادية  وكلشي بيها واضح  سلطان ما عاد يكوبس وهو جنبي لكني لهاي اللحظة ما اعرف شنو صاير وياه   واعرف سالفه اخذه لأرثة مكانت بالطيب وبقى بس هذا الجانب من حياته غامض..
.......
كان يريد يغفى على ايدي
" سلطان ..
بصوت ناعس
" لا تكولين الي اريد واريد
"ههههه لا والله بس اريد
"اش اش
"ههههه اريد اريد اني انام على ايدك ايدي تعبت
" وتتعب وشنو يعني . بس انت تردين دوم ..اني هم اريد ما فد يوم سالتيني!
"اهااا شتريد حبيبي
كول واني انفذلك لو تطلب اعيوني هنه الك
" اريد شي واحد ....اريد طفل . اريد اوليد منج يصيحني بابا
نغزني گلبي طلبه و دمعتي طلعت
" اشوكت اسمعها
"نام حبيبي نام
غفى واني دموعي توسدن على خدي طلبه هيج عليه أوجاع بداخلي احاول  اتحاشاهه
...............
كنا كاعدين نتعشى ورن تلفون سلطان
" الو ..
شنو
اشوكت
شفته انفزع وكام   رحت خلفه للحديقه
"شكو شصاير
سلطااان
"ارجعي اكلي ما عليج مصاير
..
نص الليل الا رجع  كعدت .
من فتح الضوة غير ملابسة وانطرح جنبي ..
"حبيبي !
انطاني ضهره  . وحسيت متنه يهتز .
" سلطان صاير شي ؟
سمعت انينه حطيت ايدي على ضهره واجيت اشوفه بعدني بأيده
وكام من يمي وطلع من الغرفه .
قلبي ما مطمأن ابد ..
ضل يومين دومه حزين وتعبان وماله واهس لشي والضحكه غابت عن وجهه  ..
بليلة
لمت نفسي ليش اكابر حتى ما اضغط عليه . عفته نايم جنبي وغيرت ملابسي بسيت قرمزي اللون ببجامه كيمونه زبده .. وفردت شعري  .  انطرحت جنبه وحاوطت خصره بأيدي    ..
"حبيبي ..
ما جاوب  .. عرفته غاط بالنوم ...ضليت افكر  وردت اغفى واني وجهي على ضهرهه
همس
" حو حوراء وينج 
اااه لا حوارء !!!!!
فتحت اعيوني وابعدت ايدي وجلست فوق راسه اريد استوعب شنو يكول
عاد اسم حوارء واني عقلي اجه ينفجر ....