رواية سليله الانتقام الفصل الثاني وثلاثون 32 - بقلم taratel

- رأيته في المنام
- ثم ماذا
- تمنيت ان يحل بي مثل ما حل با اهل الكهف

...............................

.. هزيت برجلي بقلق واني كاعده على الكرسي مسحت دموعي وابتسمت واني اسمع كلامها وهي تحجي بلغتها

- يمكن ان نكمل في الجوله القادمه

.. هزيت براسي واني اجاوبها

الـِن: سوف اكون على الموعد

.. تقدمت عليه وهيه تربت على اكتفي وكالت

- قويه

.. رفعت راسي عليها وابتسمت اخذت جنطتي ولبست القمصله وطلعت من العياده جانت تمطر لبست الكلاو ومشيت للميترو

.. فتحت باب الشقه واني اخذ القمصله اعلكها رتبت الصاله رفعت شعري وبديت اسوي الغده خلصت وكعدت با الصاله واني اخذ ملازمي وايبادي اقرا حسيت على الجرس ابتسمت واني اروح افتحه

.. اجاني صوته وهو يصيح فرحان احتضنته وحجيت

الـِن: هلا بيك يا ماما شلونك اليوم

.. هزلي براسه فرحان واخذت من عنده القمصله ودخل جوه حجيت

الـِن: جود اصبلك غده

جود: لا

.. تقربت عليه واني مضيقه عيني حجيت بصوت واني اشوف نظراته مليانه خوف ويحاول يغطيها بضحكته

.. نزلت عليه وصرت بمستوى

الـِن: احجي شمسوي هلمره

.. بعد عينه عني ورجع كال

جود: اتعاركت

.. اخذت ايدي واني اضغط على راسي قوي واحجي

الـِن: ولك راح تموتني هاي ثالث مره هذا الاسبوع اروح لمدرستك راح يطردوك

.. بعد عينه عني خايف

الـِن: اكل عود وبعدين نتفاهم

.. حضرتله الغده على الميز ورجعت لمكاني ادرس شويه ورجع اندك الجرس حجيت واني عيني على جود

الـِن: منو

.. باوعلي بااستغراب وكال

جود: يمكن بابا

.. كمت على حيلي واني اشوف منو سبقني جود وهو يفتح الباب

.. حضنه وهو يبوس بي وجود الفرحه ما سايعته صارله اسبوع ما موجود رفع راسه عليه وابتسم كال

ادم: شلونج

.. رجعتله الابتسامه وحجيت

الـِن: زينه

.. اخذ جود ودخلو للصاله حجيت

الـِن: ادم تريد غده
ادم: ياريت مشتاق لطبخج

.. ابتسمت وبديت احظرله هو هم ورجعت لمكاني اندار عليه وكال

ادم: وانتي
الـِن: ما اريد
ادم: باجر عندج امتحان
الـِن: اي

.. اخذت ملازمي واتجهت للغرفه بديت اقرا وجان يوصلني بس صراخهم وهم يتعاركون ويلعبون مصارعه

.. جود حيل متعلق با ادم وعلى باله هو ابو با الرغم دائما اشرحله واحجيله منو

.. سديت ملازمي والكتب وتمددت على السرير ثبتت عيني على السكف واني اتذكر الاحداث الي مريت بيها نزلت دمعه بطرف عيني مسحتها ورجعت كمت على حيلي اشوفهم ماكو اصواتهم

.. دخلت وجان جود نايم بحضن ادم بس شافني رفع راسه وحجيت

الـِن: ادم شيله ودي لغرفته

.. اخذه بحضنه وهو يشيله ياخذه لغرفته اتجهت للصاله واني افتح الاضويه والشبابيك كعدت اعزل بيها بعد ما رجعوا خربطوها حسيت عليه دخل وراي وكال

ادم: رحتي اليوم للدكتور
الـِن: اي
ادم:الى متى راح تبقين ترحيلها مابيج شي

.. ثبتت عيني عليه وحجيت

الـِن: مو انت الي تقرر اني اعرف نفسي شنو الي اريده واحتاجه ما كاعد اكدر اشفي نفسي من ضبع كلشي سوا بقى بروحي مستحيل يكدر ينمحي

.. ثبت عينه عليه وكال

ادم: جنت با العراق

.. رفعت راسي عليه وحجيت

الـِن: شلونه

ادم: ما ادري بي اختفى هو وملاك محد يعرف عنهم شي

.. ثبتت عيني على الفراغ وحجيت

الـِن: وين تتوقع

ادم: با اي مكان بعيد عنج

الـِن: تتوقع لحد الان ضبع يدور عليه

..قبضت ايدي قوي خايفه وانتبهلي رجع كال

ادم: لا تخافين ما يكدر يلكاج

..رفعت عيني عليه واني اثبتها حجيت

الـِن: ست سنوات ادم سته واني بعيده عنه وكل يوم اكعد خايفه يطلع هذا حلم واني بعدني يمه

.. مسحت دموعي وحجيت

الـِن: المشكله ما اكدر انسى ما اكدر

.. تقرب عليه وهو ياخذ ايدي ويضغط عليها قوي وكال

ادم: تنسين صدكي صيري قويه علمود ابنج

.. مسحت دموعي وحجيت بضعف

الـِن: شلون انسى وابنه نسخه عنه شلون عيونه لو تصرفاته العدوانيه لو هيئته كلشي بجود يدل عليه ويذكرني بي شلون انسى

.. بقى ساكت من حس على جود كعد وهو واكف باب الصاله رفعت عيني عليه واني امسح ادموعي ابتسمت بوجهه وحجيت

الـِن: تعال ماما

.. تقرب عليه وهو خايف حضني قوي وبقى يمسح بدموعي وكال

جود: اذا عيوني اتذكرج بي ويخليج هيج تبجين راح اغمضهن دائما علمود ما تشوفيهن

.. ضحكت عليه واني اقربه اليه وابوس عيونه قوي وحجيت

الـِن: احلا عيون با الدنيا

.. ضحك ورجع وهو يحضني قوي اندارينه على صوت ادم وهو يكول

ادم: ترحون لحديقه الحيوانات بما انو اني اجيت ونكدر نطلع

.. جود ما صدك وضل يكمز خبصنه خبص هزيت براسي لـ ادم وحجيت

الـِن: نبدل ونجيك لعد

ادم: انتظركم

.. اخذت جود ابدله واني هم لبست الكوت وطلعت واني لازمه باايده لكينه ادم واكف با الصاله اشرلنه نطلع

.. اباوعله شلون فرحان وهو لازم ايد ادم شيصير لو جان بمكانه ممكن ينسى انتقامه ممكن نبدي من جديد ممكن هسه حياتنه مختلفه ؟

.. بقيت اصوره وهو يفتر لو ادم شايله

.. كعدت على المسطبه الي موجوده بنص الحديقه وادم وجود كدامي يلعبون شويه واشوف ادم اتجهه نحوي تارك جود يلعب بمفرده وكال

ادم: تعبني

.. ضحكت بصوت وحجيت

الـِن: اي الله يساعدك

رجعت حجيت

الـِن: شوكت ترجع بعد للعراق
ادم: ما معلوم

.. نزلت راسي با اسى وسمعته كال

ادم: امتحانج صعب
الـِن: يعني تدري بيه اني زينه بهاي الماده
ادم: اي طبعا غير عندج اني

.. ضحكت وحجيت واني مثبته عيني عليه

الـِن: مستحيل راح انسى الي سويته اليه عمري كله

ادم: ما سويت غير المفروض يصير جان لازم تطلعين من لعبتهم

الـِن: طلعت بس بخساره

ادم: مو مشكله الخساره اهم شي طلعتي سالمه

.. ابتسمت باا استهزاء وحجيت واني اردد اخر كلمه كالها

الـِن: سالمه!

ادم: ما رحتي لنور زرتيها بعد واخذتي ادم

.. هزيت راسي نافيه كلامه وحجيت

الـِن: لا يمكن باجر راح اروح

..هز براسه وهو يكول

ادم: يله نرجع

.. صحت على جود واجا يركض

.. عيني عليه جان نسخه ثانيه عنه بشكله وعيونه وحتى كلامه ومن يعصب وهواي تصرفات اخذها من عنده

.. وصلنه للشقه وفتح ادم الباب ودخلنه اندار عليه وكال

ادم: راح اروح
الـِن: تمام

.. طلع وقفلت الباب ورا واخذت جود ابدله وغسلنه واخذته بحضني مثل كل يوم واني اسولفله قاطعني وهو يكول

جود: شنو اسم الخيل مالته

.. ابتسمت وحجيت

الـِن: العمُرد

.........................
...flash back

ضبع: راح نبدي من جديد واخليج تسامحيني الـِن

.. ابتسمت بقهر ورفعت السلاح عليه طلقتين سريعات ورا بعض باانحاء جسده وكع بلكاع وهو فاتح عينه والدم انتشر با الغرفه عرفت بيها الضبع مات

.. اتقربت عليه بخوف واني احاول اخذ مفتاح الباب رمشت عينه وصاح متألم وعيونه انگلبن بيض وراسا غمضهن

.. رجف جسمي ايدي انترست دم خفت جريت المفتاح قوي واني مغمضه عيني ما اريد اشوفه اخذت المفتاح من جيبه وطلعت افتح الباب مشيت وهاي اول مره بعد اشهر اطلع من المخزن

..غمضت عيني قوي واخذت نفس قوي وبديت اركض واني خايفه واحس گلبي راح يوكف وصلت للبوابه الخلفيه وجانت مسدوده ومسيجيها وكفت واني اجت عيني على ايدي المتروسه دم

.. غمضت عيني قوي خايفه مدركه للخطأ السويته وبجيت رجعت بخطواتي خايفه اتجهت للبوابه الرئيسيه وجانو حرس واكفين اتقربت عليهم وبس شافوني وكفو على حيلهم اتقربت عليهم ما اكدر احجي اشرتلهم للمخزن محد افتهم مني بقيت ابجي واني اريد الكلمه تطلع من عندي بس ما اكدر

.. اخذت ايد واحد من الحرس وبقيت اركض راجعه للمخزن بقيت واكفه برا واني عيني على الغرفه دخل قبلي وبقيت برا واطرافي يرتعشن خايفه شويه واجو الحرس البقيه وهم ملتمين على الغرفه ابتعدت خايفه

..اتقرب عليه واحد من الحرس وهو يجرني قوي من ايدي ياخذني للقصر بقت عيني على الغرفه اريد انطق اريد اعرف هو ميت لو عايش بعده ماكدرت احجي وبس دموعي ينزلن دخلني للقصر وهو ياخذني لوحده من الغرف ويدخلني بيها وقفل الباب وطلع

.. بقيت عيني على ايدي الي جانت متلطخه بدمه مسحتها بملاسي واهز براسي كمت على حيلي متجهه للباب افتح بي ميفتح بقيت اضرب بي بلكت ملاك تسمعني ما جان اكو جواب

.. ارتديت للخلف واني تعبانه من الضرب بقيت افتر با الغرفه خايفه شلون لو مات ضبع؟ يعني اصير مجرمه ؟

.. رفعت ايدي واني امعن النظر بيها معقوله قتلتي الانسان الي حبيتي بهاي ايدج معقوله سويتيها

.. غمضت عيني قوي ما احس جنت بوعي شويه وحسيت الباب نفتح ودخل

- اطلعي

.. هزيت راسي واني ااشرله

- راح تبقين با القصر لحد ما يطلع من المستشفى وهو يتصرف

.. غمضت عيني ونزلت دمعه فرحت بداخلي يعني عايش!

.. طلع وتركني اتوجهت لغرفه ملاك افتحها ما جانت موجوده نزلت عيني بقهر واني اتذكر هيه تزوجت!

.. طلعت واني اغلق الباب توجهت لغرفتي فتحتها وجانت مبعثره حيل حتى قماصني جانن على السرير اخذتهن باايدي واني محتاره شيسون هنا رجعتهن وفتحت البلكونه عيني على البوابه

.. مر الوقت وما جان اكو شي بس الحرس واكفين اخذت غطوه من جوه وقربتها عليه اتدفى بيها وبقيت كاعده قريب البلكونه وعيني على البوابه انتظر

..  فاتحه التلفزيون با الصاله واني اعيد الكلمات واني انطق نفسهم بس ما يطلع من عندي شي بس صوت وكلمات غيرمفهومه رفعت عيني على الساعه واني اشوفها يومين مرن واني انتظره يرجع بس ماكو وماكدر احجي وي الحرس ماجان اكو احد بلقصر غيري حتى العاملات الجانن يشتغلن ما موجودات حسيت على فتحه الباب كمت على حيلي خايفه متوقعه هو

.. دخلت بنيه ووياها مره جبيره اتقربن عليه واني خايفه ابتسمت بوجهي وهي مادتلي ايدها تصافحني

- دكتوره واخصائيه نطق راح اشرف على حالتج بتوصيه استاذ ضبع

.. هزيت راسي فرحانه واتقربت من عندي الحجيه وهيه تسلم عليه وكالتلي

- واني امها ولو راح نزعجج هاي الايام لحد ما يطلع ضبع من المستشفى

.. ابتسمت بوجها ورجعت كالت وهي تضحك

- يفكر بيج وهو بلمستشفى يكول لا تبقى وحدها خاف حالتها تسوء

.. نزلت راسي با اسى يفكر بيه واني شنو الي سويته بي ؟

.. حست عليه وابتعدن هنه يدخلن الجنط واخذن وحده من الغرفه رجعت كعدت با الصاله شويه واجن يمي وبقو يسولفون جنت فرحانه واخيرا سمعت صوت ناس حقيقين ويمي بس ماجنت اكدر اجاوبهم بس مستمعه لكلامهم وعيوني تترقبهن شويه وكالت

- يمه راح اكوم اسويلجن اكل وانتي ديري بالج على البنيه

.. اتقربت عليه وكالت

- اسمي رنا وانتي الـِن مو

.. هزيت براسي واني مبتسمه رجعت كالت

رنا: تحبين نبدي هسه بجلستنه لو بعدين

.. اخذت ايدها واني اضغط عليها قوي وهزيت براسي اريد ارجع انطق قبل لا اشوفه اريد من اشوفه احجيله شكد جنت غبيه احجيله شكد مشتاقتله

.. بدت تسويلي تمارين للفك وكلمات متكونه من حرفين بقينه ننطقهن سوه وجان نطقي حيل صعب انطتني ورقه وقلم وبقيت اكتبله الي اريده

رنا: لهنا كافي اليوم

.. هزيت براسي فرحانه شويه وصاحت الحجه

- يلا يمه تعالن تغدن

.. اخذت الورقه وكتبت بيها واني انطيها لـ رنا

الـِن: ضبع وين

رنا: با المستشفى

.. رجعت كتبت

الـِن: شلون وضعه

رنا: ما اعرف والله هسه تعالي ناكل بعدين نحجي

.. بدينه نحضر الاكل وي الحجيه واكلنه هواي اشياء منعتنتي من عدها رنا مثل الاشياء الحاره او البارده حيل حتى البهارات

.. مرت فتره مو هواي واني اتعودت على وجودهم يمي بقيت اتمرن اني وياها ويوم عن يوم بديت يسترجعلي صوتي بكلمات غير مفهومه وصعبه تنفهم

.. كاعدين نتمرن اني ورنا وانفتح باب الصاله كمت على حيلي خايفه واني اشوف هيئته وهو داخل ثبتت عيني عليه ونزلن دموعي واخيرا

.. دخل وجان شرار من جهه وهو متكي عليه وجانت بنيه لازمته من جهه الثانيه

.. دخلو للصاله وطلعن الحجيه ورنا يتحمدوله على السلامه بقيت بمكاني واني امسح دموعي

.. جان يباوع ويجاوب الكل اله اني حتى ما اجت نظراته عليه 

واكفه على جهه واني اتمعن بشكله حيل متغير

.. اتجهت عليه واني ابعدهم من حوله وحضنته قوي وبقيت ابجي بحضنه ما جانت رده فعله شي بس دار وجهه عني رفعت راسي واني اريد انطق ماكدرت الكلمات ما تطلع مني ابتعدت عنه واني اشوف بروده اندار على البنيه الي يمه وكالها

ضبع: اخذيني للغرفه

.. اخذت ايده واتجهت بي لوحده من الغرف رفعت راسي لشرار واني اخذ الورقه وكتبتله

الـِن: صفوري شلون صارت ريم

.. بعد راسه عني وكال

شرار: الـِن ضبع ما قبل يقدم البلاغ

.. ثبتت عيني عليه خايفه ورجع كال

شرار: منين السلاح

.. فتحت عيني بصدمه خايفه جر ايدي وهو يبعدني لنهايه الصاله بعيدا عن رنا وامها ورجع كال

شرار: منو الي دخلج السلاح

.. كتبتله با الورقه

الـِن: شرار ما اعرف واحد يمكن من الحرس لان جان لابس نفس لبسهم وشمر عليه السلاح وكال اليوم اكتلي ضبع وراح ننتظرج برا اني وادم

.. اخذ الورقه من عندي وهو يقراها رفع عينه عليه ورجع مزقها وخلاها بجيبه وطلع بدون لا يجاوبني

.. اجت عيني على رنا وامها الي جانت عينهن علينه اتجهت عليهن خايفه واتقدمت للغرفه

.. فتحت الباب واني خايفه اول ما اجت عيني على ضبع الي جان متمدد على السرير وهاي البنيه تعالج بجروحه صدره متشوهه وهمه لافينه اله

.. اتقربت عليه بس ما رفع عينه عليه

.. اباعلها وهيه قريبه عليه وتتلمس بصدره رفعت راسها عليه وكالت

- اطلعي لا تبقين هنا وجودج مو امان يمه

.. رفعت عيني عليه جان منزلها بدون اهتمام ضيقت عيني وتقدمت عليها كتبت با الورقه

الـِن: انتِ اطلعي اريد احجي وي زوجي ابحدنه

.. نزيت على صوته وهو ياشرلها وكال

ضبع: اخذيها واطلعي

.. ضغطت على ايدي قوي وهيه تدفعني للخارج دفعتها قوي ودخلت للغرفه وقفلتها بقت تدك على الباب وتصيح انداريت عليه جان منزل راسه راسا رفعه عليه وكال

ضبع: اطلعي الـِن

.. تقربت عليه واني اكعد يمه على السرير وثبتت عيني عليه حاولت احجي بس ما طلعت عندي جمله جانت كلمات غير مفهومه اخذت الورقه وكتبت بيها

الـِن: تصرفي غبي

.. دار وجهه ما قرا ولا كلمه من الي كتبته اخذت ايدي واني اضغط على فكه وادير وجهه عليه ثبتت عيني عليه

.. بعد ايدي عنه قوي وكال

ضبع: طلعي لا تخليني اتصرف غير تصرف

.. رفعت تيشرتي واشرتله على خصري رفع عينه عليه بدون لا يحجي ورجع غمضها وهو يزفر النفس بملل

.. اخذت ورقه وكتبت بيها

الـِن: اتعادلنه

.. تركتها قريب عليه واتوجهت اطلع من الغرفه اول ما طلعت لكيت نفس البنيه واكفه وهيه متكتفه بس شافتني اتقربت عليه وكالت

- على اي اساس تطلعيني برا الغرفه هيج اني ممرضته وواجبي اهتم بي اذا نعادت مره ثانيه يصير غير شي

.. حاولت احجي بس ما طلع مني صوت

.. ثبتت عينها عليه وحجت با استهزاء

- الخرسه

.. ما جانت كلمه بقيت فاتحه عيني بصدمه ونزلت دموعي اتقربت عليها واني اجرها من شعرها قوي وملختها تملخ واني اصيح بكلمات غير مفهومه على اثر الصياح طلع ضبع والحجيه ورنا التمو علينه يردون يبعدوني عنها ماكدرو لحد ما تقرب ضبع وبعدني بقوه وكعت بلكاع على ايدي وحسيتها طكت

.. صحت متألمه ما اعرف اوصف الحزن والقهر بداخلي واني اشوفه شلون لمها بحضنه وهو يمسد على شعرها

.. نزلت دموعي بقهر كمت على حيلي وابتعدت عنهم اتقربت عليه الحجيه وكالت

- يمه ليش سويتي هيج ورجلج مريض وهسه طالع من المستشفى

.. شنو اجاوبها واني ما اكدر احجي ابتعدت عنها واني منزله راسي وصعدت للغرفه بقيت لازمه ايدي متألمه وبس افتر با الغرفه ومنظره ميروح عن بالي شلون رفعها عليه وسندها يحميها مني !

.. حسيت بغصه بگلبي مو المفروض يحميني اني

.. ابتسمت واني اتذكر الي سويته بي وهزيت ايدي السليمه وحجيت بداخلي

الـِن: يحميج بعد ما طعنتي

.. شكد كرهت دموعي مسحتهن واني گلبي يشتعل نار

.. رفعت راسي على فتحته الباب واني اشوف رنا تدخل وكالت

رنا: شبيها ايدج

.. كعدت على السرير وقدمت ايدي عليها جان باايدها عصاره تقربت عليه وصارت مقابيلي وهيه تدهنها اليه وكالت

رنا: شنو بينج وبين ضبع

.. ما جاوبتها رجعت كالت

رنا: هاي الممرضه الي جايبها فد وحده كح.. حجت عليج يمه اشكال والوان

.. بعدت عيني عنها ماكدرت احجي اخذت ورقه وكتبت

الـِن: رنا اريد احجي سريع حبابه بعد ما اتحمل احس نفسي راح انفجر

.. باعتلي وكالت

رنا: لازم انسوي فحوصات وتخطيط صوتي

الـِن: ضبع ميخليني اطلع من القصر

رنا: هيه هنا المشكله بس اتوقع اذا حاجيته يقبل

.. نزلت راسي ما كدرت احجي وسمعتها كالت

رنا: دزني عليج يكول شوفي ايدها شبيها

.. رفعت راسي عليها واني مبتسمه ورجعت كالت

رنا: هنيالج بـ ضبع

.. اخذت الورقه وكتبت

الـِن: شلون

.. حجت بحالميه وهيه ادكول

رنا: كلشي بي حلو وفوك هذا يحبج ويهتم بيج

.. ابتسمت بااستهزاء ورجعت كتبت با الورقه

الـِن: اكدر اطلب منج طلب

.. ضيقت عينها وكالت

رنا: شنو

الـِن: اريد مبايل

.. عقجت حواجبها وكالت

رنا: راح اشوفلج

.. كتبتلها بقلق

الـِن: ما اريد ضبع يعرف وتبقي يمج

.. هزت براسها وكالت

رنا: ديري بالج من هاي الممرضه تخوف

.. ابتسمت ونزلت راسي رجعت كالت

رنا: تعالي خل ننزل لا تفرغين الساحه الها

.. واتجهت عليها ونزلنه جوه جانت الحجيه كاعده با الصاله وهاي تفتر يا داخله للغرفه يا طالعه كعدت با الصاله واني عيني عليها دخلت للمطبخ شوي وطلعت باايدها اكل واخذته للغرفه سمعت صوت وهيه ادكول

رنا: شبيج تحوسين

.. تركتها واتجهت للغرفه فتحتها قوي واني عيني عليها جانت توكله وتسولف تضحك ويا وهو ما مصدك اتقدمت عليها وبيدي الورقه والقلم كتبت

الـِن: اطلعي

.. گلبت عينها بملل وهيه ترفع نظرها لـ ضبع وكالت

- تريدني اطلع

ضبع: اطلعي سيلا

.. رفعت نظرها عليه وهيه تخزر بيه وطلعت كعدت بمكانها مقابيله ووخرت الصينيه وكتبت

الـِن: غيرها ما عجبتني

.. خليت الورقه مقابيل وجهه دار وجهه قربتها اكثر واني احطها على عينه اخذها من ايدي وهو يقراها وكال

ضبع: مو احنه حسب مزاجج نشتغل

..حجيت بصعوبه نطق حسيت عليه ما فهم اخذت الورقه وكتبت

الـِن: والله اعترف حيل غبيه بس ضبع لا تنسى شنو سويت بيه حبستني اشهر بمخزن حسيت نفسي صرت مريضه نفسيه

.. ما جاوبني تقربت عليه حيل واني اخلي ايدي على صدره وامشي اصابع ايدي برقه عليه وعيني بعينه اخذ ايدي قوي وهو يبعدها وكال

ضبع: المسدس منين

.. نزلت دموعي وكتبت با الورقه

الـِن: دخل عليه واحد وكال هذا ادم دزه وكال راح ننتظرج برا اكتلي الضبع

.. ثبت عينه عليه وكال

ضبع: وانتي اي واحد يكلج اكتلي الضبع تكتلي

.. نزلت عيني ورجعت كتبت

الـِن: جنت حيل كارهتك

ضبع: اطلعي الن

.. اخذت الصينيه الي جانت قريبه عليه وبديت اخذ سوب با الخاشوكه وقربته عليه بعد راسه وكال

ضبع: اطلعي

.. بعدتها عني ورجعت كتبت

الـِن: ما اتوقع تعادلنه كل اذيتي جانت بسببك يمكن طلقتين قليلات بحقك المره الجايه اربعه

.. بعدني دا اكتب بيها وخفت اراويها اله راسا اخذت عكمشتها با ايدي

.. اخذها سريع من ايدي وكعد يقراها وابتسم

ضبع: لا تتوقعين كل هذا يصير على عمه عيني اعرف زين كل خطوه تخطيها

.. قرب ايده عليه بصعوبه وهو يرفع خصلات شعري ثبتت عيني عليه خايف

ضبع: لا تتوقعين تكدرين تتجاهليني وتلعبين بكيفج

.. نزلت عيني بخوف وقلق رجع كال

ضبع: وهسه اطلعي وصيحيلي سيلا

..كتبت با الورقه واني ارفعها بوجهه

الـِن: اييع اسمها مو حلو

.. ما جاوبني

.. ابتعدت عنه خطوات ورجعت انداريت عليه وتقربت اكثر كال با استغراب

ضبع: شكو

.. قبل لا يكمل كلامه اندفعت عليه واني اخذ شفته بدون معرفه بدون وعي بدون مهاره جانت اغبى تصرف ممكن اسوي ابتعدت من حسيت عليه ما تجاوب ويايه رافضني نزلت دمعه من عندي وطلعت سريع

.. ماجان اكو احد با الصاله صعدت للغرفه ابجي جنت حيل محتاجه احد يمي لميت نفسي وبقيت ابجي

.. غمضت عيني ما حسه على شي مستسلمه

.. فتحت عيني بطيئ واني احس على حركه يمي اجت عيني عليها وهيه ادكول

سيلا: هاي غرفه ضبع

.. كعدت على حيلي واشرتلها باايدي

.. باعتلي وابتسمت

سيلا: اريد ملابس لضبع اغيرله ملابسه

.. ابتسمت واشرتلها على الباب دخلت اخذت ملابس وطلعت نزلت وراها واني اترقب وعيني عليها جان شرار يمه اتقربت اكثر وهيه طلعت بقيت واكفه قريب الباب يمكن شرار هو الي يبدله فرحت اتقربت اكثر واني اسمعهم يحجون

شرار: المسدس مو لـ ادم

ضبع: لعد لمنو

شرار: ما معلوم مابي تسجيل قديم

ضبع: شرار تحققلي من البصمات زين اريد اعرف منو هاي المره

شرار: رحمه وين ضبع تدري بيهم يردون يكتلوك علمود رحمه

ضبع: يحلمون

شرار: دنجب شنو يحلمون غير وصلت الموت ذاك اليوم

.. صاح بصوت ففززني وكال

ضبع: الـِن

.. لزمت گلبي قوي وفتحت الباب اجت عيني على شرار رجع كال

ضبع: ادخلي

.. دخلت واني منزله راسي وكال

ضبع: المبايل وين

.. هزيت ايدي وفتحت عيني بصدمه

.. اشر لشرار ينطيني ورقه وقلم

.. كتبتله

الـِن: يا مبايل

.. ضيق عينه عليه ورجع كال

ضبع: الاستغباء عوفي واحجي المبايل وين

الـِن: ما اعرف جان بملابسي با المخزن

ضبع: ادم انطا الج

.. هزيت براسي بمعنى اي ورجع كال

ضبع: شوكت

.. كتبت

الـِن: من سلمان اخذني رهينه عنده وشرد

.. صاح بصوت وهو يكول

ضبع: قصدج من شردتي سلمان

.. ابتسمت ونزلت راسي

.. رجع صاح وكف گلبي وكال

ضبع: راح تموتيني والله لج انتي شنو بس فهميني شنو

.. صاح عليه شرار وهو يكول

شرار: هيه ما راح تموتك هيه صدك موتتك

.. ضيقت عيني على صفوري وخزرته ورجعت كتبت

الـِن: مو اني هذا المسدس رمه ابحده

.. رفع ايده ياشر وهو يستهزء

ضبع: يله بله اسمع السالفه الجديده

.. ضحك شرار وكال

شرار: لا تصيح مو زين عليك

.. بقيت كاعده با الغرفه واستمعلهم شوي وطلع شرار بقيت بس اني وضبع الي ما رفع عينه عليه وجان ماخذ مبايله ويباوع بي تقربت عليه واني اشمر نفسي على السرير رفع نظره عليه وكال

ضبع: اطلعي

.. رفعت راسي عليه وهزيته رافضه وكتبت

الـِن: اريد انام بحضنك

.. اخذ الورقه مني وعكمشها با ايده وشمرها تقربت عليه واني افتح ايده ون با الم وهو يصيح عليه فززني وابتعدت صاح وهو راص على اسنانه وشكله مرعب

ضبع: كتلج اطلعي

.. طلعت من يمه واني الدمعه بعيني لكيت رنا موجوده بس شافتني كالت

رنا: يله الـِن شوكت نبدي

.. هزيت براسي وتقربت عليها وبدينه نسوي تمارين كل يوم

رنا: خلصنه حاولي تحجين حتى لو جانت كلماتج ما مفهومه اتركي القلم والورقه بعد

.. هزيت براسي واني فرحانه وحجيت بكلمات ما فهمتني اخذت الورقه وكتبت

الـِن: اريد اسوي اكل لـ ضبع شنو اسويله

رنا: كومي اني وياج نسوي نسبق هاي الحيه

.. ابتسمت عليها ورحنه للمطبخ بديت اجهز الاشياء الي نحتاجهن وهيه جانت تعلمني شنو اسوي با الرغم اعرف بس ردت شي صحي اله لحد ما خلصت وخليته بصينيه حيل تعبت عليه جان منظره يشهي ابتسمت واني عيني على رنا كتبتلها

الـِن: راح يعجبه ؟

.. ردت عليه الابتسامه وكالت

رنا: اكيد يعجبه غير انتي سويتي

.. ابتسمت واني ماخذته اله اول ما فتحت الباب اجت عيني على سيلا وهيه كاعده مقابيله وتوكله رفع عينه عليه وجانت تحجي هواي اشياء مفتقدتها حسيت نفسي تفشلت رجعت بخطواتي للمطبخ واني دموعي تنزل خليت الصينيه على الميز وكعدت امسح بدموعي اتقربت عليه رنا وهيه خايفه كالت

رنا: شكو شبيج

.. حجيت بصعوبه

الـِن: س..يلا

.. ابتسمت على نفسي واني كدرت انطق فتحت عيني بصدمه ورنا ضحكت كالت

رنا: اي كملي

.. جنت انطق بس اول احرف مفهومه الباقي مينفهم بس جنت فرحانه حسيته انجاز تقدمت على الصينيه الي سويتها واشرت لرنا وحجيت

الـِن: ت..عالي

.. اتقربت عليه وكعدنه ناكل جان حيل طيب كتبت الها

الـِن: خل يفيده اكل هاي المسمومه

.. خلصنه اكل وكعدنه با الصاله وجانت الحجيه يمنه وتسولفنه على ايام قبل وسيلا دائما متواجده يم ضبع او بغرفتها ما تكعد يمنه

.. صعدت واني عيني على باب غرفته غمضت عيني قوي واني ابالي فكره

.. صعدت واني على ثغري ابتسامه مكر فتحت الباب واني اخذ فستان بيتي قصير لبسته وفتحت شعري واني اترس نفسي عطر

.. اجت عيني على الساعه وجانت بـ 1:30 نزلت جوا وجان ماكو احد تقربت على غرفته والابتسامه على ثغري فتحت عيني واني اشوفها تطلع منها ووضعها مو طبيعي وتعدل بملابسها بس شافتني فتحت عينها بصدمه وعدلت شعرها ومرت من يمي خايفه

.. بقيت جامده بمكاني ماعرفت شنو اتصرف بعدني ما تحركت ورجع فتح الباب بس شافني فتح عينه بصدمه وكال

ضبع: شتسوين هنا

.. مسحت دموعي بحزن واني ابتعد عنه

.....................

الحاضر

.. فتحت عيني بطيئ واني ابوس بجود وازعجه

الـِن: يله ماما اكعد عندي امتحان ماكدر اتاخر اليوم من وراك اخذك للمدرسه واروح للمستشفى

.. كمت على حيلي واني افتح الشبابيك غمضت عيني من ضربتني اشعه الشمس مستمتعه با الهوا رجعت انداريت عليه واني اصيح

الـِن: ولك جووود

.. اتجهت للمطبخ وبديت احضرله الاكل وخليته اله با الحافظه وسويت كهوه حسيت عليه كام وهو يتقرب عليه صحت بصوت

الـِن: لك ماما بدل بساع ما اكدر اتاخر

.. اندك الجرس فتحته على السريع وجان ادم سلمت عليه ودخل اتجهت للغرفه بدلت وطلعت لكيت ادم يبدل لجود وهو منعس رفع عينه عليه وكال

ادم: اخذكم اني اليوم واروح لدوامي

الـِن: ياريت

.. اخذت جنطتي وطلعنه برا قفلت الشقه وصعدنه بسياره ادم

الـِن: جود اليوم بس اخلص اجي عليك لا ترجع ابحدك نروح لـ لامي

جود: اوكي

.. ودعته ودخل للمدرسه رجعت لسياره ادم الي جان ينتظرني دار وجهه عليه وكال

ادم: وهسه ننطلق

.. هزيت براسي ومشى بقيت اراجع با الملزمه وادم يساعدني لحد ما وصلنه

.. دخلنه للمستشفى وكلها جانت عينهم علينه الكل على بالهم اني وادم بيناتنه شي وخاصتا ادم جان من الدكاتره المحترفين با المستشفى ودعته و اتوجهت لقسمي واني اركض جانو مجموعتي موجودين وكفت يمهم وبدينه

.. طلعت واني فرحانه ادائي جان زين وتعبي ما راح تمشيت للميترو واني متجهه لمدرسه جود اخذته من المدرسه وجان منتظرني بس شافني اجاني يركض وهو فرحان

.. وكفت مقابيل القبر واني اخلي الورد على قبرها نزلت دموعي وحجيت

الـِن: ما شبعت منج انحرمت من كلشي بحياتي لا ام ولا اب ليش بقت حسره بگلبي اعيش شعور العائله والحب

.. تقرب عليه جود وهو يحضني بوسته وحجيت

الـِن: هاي بيبي نور يله اقرالها الفاتحه مثل ما علمتك

.. وكف وهو فاتح ايديه الناعمه ويقرالها الفاتحه اخذت ايده ورجعنه للشقه

.. اول ما دخلت فتحت عيني بصدمه واني اشتم عطره!! لزمت ايد جود قوي خايفه وحجيت

الـِن: ابقى هنا لا تدخل

.. بقى صافن عليه ودخلت ما جان اكو شي با الشقه غير عطره !! ضغطت على راسي خايفه تكون شكوكي صحيحه طلعت واني احجي

الـِن: تعال ماما ادخل
جود: شكو
الـِن: حبيبي ردت اتاكد

.. راح لغرفته وهو يبدل اخذت مبايلي واتصلت على ادم اول ما اجاني صوته حجيت

الـِن: ادم يمكن ضبع رجع

.. حسيت على صوته وهو يهمس

ادم: شيلي هاي الافكار من بالج ضبع ما يلكاج لو يفر الدنيا كلها

الـِن: خايفه شلون لو عرف مكاني واخذ جود

ادم: ما يعرف لان جود مو با اسمه وهو مايدري عنده ابن فـ على شنو خايفه بعد

.. غلقت الاتصال من عنده واني ابعد الافكار من راسي اتوجهت لغرفه جود ولكيته يريد ينام تقربت عليه وتمددت يمه وحجيت

الـِن: ولك ما تنام بحضن امك

.. ضحك وكال

جود: كبرت بعد عيب انام يمج

.. ابتسمت عليه واني اكرص بخدوده واحضنه تمدد على سريره تقربت عليه واني انام يمه حجيت

الـِن: احجيلي شصار وياك اليوم

جود: ماكو شي غريب

.. صفن عليه شويه ودفن نفسه بحضني وكال

جود: ماما اليوم ساعدت واحد وجان يحجي بلغتنه

.. رفعت وجهه عليه وثبتت عيني عليه وحجيت

الـِن: شلون

جود: جنت واكف انتظرج واتقرب عليه رجال يطلع عمره هيج بكد بابا وسئلني على الميترو وين وجاوبته

.. ابتسمت واني امسد على راسه وحجيت

الـِن: عفيه عليك حبيبي

.. ثبت عينه عليه وهو يكول بكل براءه

جود: تدرين جانت عيونه نفس عيوني حيل يتشابهن كانما هي وسئلني على اسمي وكتله جود

.. فتحت عيني قووي وكمت على حيلي وحجيت واني لازمه باايده قوي

الـِن: جود احجي شلون جان شكله

.. حسيته خاف وبعد ما عرف شنو يحجي اخذت نفس ورجعت حجيت واني اخذه بحضني خايفه عليه

الـِن: حبيبي لا تخاف
جود: ما اعرف اوصفلج شكله بس جانت عيونه نفس عيوني وطويل حيل

.. سكتت بعد ما جاوبته تركته بفراشه وكمت على حيلي متجهه للصاله اخذت مبايلي واني ادخل لحسابه ما جان ناشر اي شي طلعت وشمرت المبايل على جهه حسيت على الجرس اندك فتحته جان ادم دخل وهو يكول

ادم: شلونج اليوم با الامتحان

الـِن: زينه

..ثبتت عيني عليه وحجيت

الـِن: گلبي ما مطمن ادم

.. باوعلي با استغراب وهو يكول

ادم: ليش
الـِن: احس ضبع بدا يلاحكنه
ادم: ست سنوات هسه يله رجع شيلي هاي الافكار من بالج
الـِن: ما اعرف

.. سكتت بعد ما حجيت ولا هو انداريت عليه وحجيت

الـِن: عندي موعد وي الدكتوره اليوم ابقى يم ادم عفيه
ادم: شوكت ترجعين
الـِن:بـ8 هيج اذا خلصنه الجلسه اليوم من وكت
ادم: تمام ننتظرج تجين ونطلع للمطعم اليوم نحتفل بمناسبه نجاحج

.. فتحت عيني بصدمه وتقربت عليه
الـِن: احلف نجحت؟ منوكالك

.. ضحك وكال
ادم: مبروك

.. اتقربت عليه واني اتشكره مستحيل مواقفه انساهن اخذت سترتي وطلعت

.. كاعده بنفس مكاني ابتسمت بوجهي وكالت

- نكمل

.. هزيت براسي تقربت عليه وكالت

- مستعده

الـِن: اي

.........................

flash back

..صعدت لغرفتي واني متجاهلته بديت ابتعد عنه بعد اخر موقف ما جنت انزل قليل واكثر الوقت وي رنا بديت اتمرن اكثر وبدا صوتي يرجعلي شرار ما شفته وملاك طول هاي الفتره ماشفتها ولا كدرت اسئل ضبع عليها

.. الضبع بدت تتحسن حالته ورجع يمشي بس سيلا بعدها موجوده وما تطلع من غرفته الا قليل ودائما اشوفها تطلع بنص الليل ووضعها متخربط جنت حاسه اكو بيناتهن شي جنت اموت من القهر وهيه بس تشوفني تبتسم وتتعداني

.. اتمشى با الصاله واني احاول انطق الكلمات مرت سيلا من يمي وهيه عينها عليه تقربت اكثر وكالت

سيلا: باركيلي

.. حجيت بصعوبه بكلمات مفهومه

الـِن: خير شكو راح تزوجين ونخلص منج ومن جهرتج

.. ابتسمت وكالت

سيلا: اي بس احزري منو

حجيت بخوف كانما قلبي علم

الـِن: منو

سيلا: الضبع

.. فتحت عيني بصدمه واني ادفعها بقوه متجهه للغرفه جان ما موجود رجعت للصاله ولكيتها كاعده وهيه مبتسمه شوي ودخل بس شافته وكفت على حيلها خايفه

.. عبرني بدون لا ينتبهلي واتجهه للغرفه اتجهت ورا سريع واني افتح الباب قوي بس شافني اندار عليه جان يلبس با الزي العسكري

.. حجه بكل برود

ضبع: شكو

.. تقدمت عليه واني اصيح

الـِن: شوف ضبع لا عبالك اني ساكتتلك صارلي فتره وحق الله اذبحك لو سويتها واتزوجت

.. اندار عليه وكال

ضبع: بمكان ما تباركيلي شنو

.. تقربت عليه واني عيوني متروسه دمع خليت ايدي على گلبه وحجيت

الـِن: ضبع گلبك بس الي

.. نزل ايدي بقوه وهو مثبت عينه عليه كال

ضبع: انتِ انتهيتي با النسبه اليه وجودج او عدمه نفس الحاله ما يفرق

.. نزلن دموعي مسحتهن على السريع ورجعت ثبتت عيني عليه وحجيت بقهر

الـِن: لا تسويها ضبع

ضبع: الاسبوع الجاي زواجي

.. هزيت راسي بعدم تصديق ودموعي تنزل مسحتهن ورجعت حجيت

الـِن: لو اني لو هيه

.. ما جاوبني انداريت اريد اطلع سمعت صوته وهو يكول

ضبع: هيه

.. تركته وطلعت واني ايدي على ركبتي احس الهوا انقطع عني شهكت قوي بحزن ومسحت دموعي اجت عيني عليها وهيه تضحك ومتشمته باوعتلها با اشمئزاز

..وصعدت للغرفه لميت ملابسي بجنطه صغيره ونزلت واني طالعه بس شافوني الحرس اتقدم واحد من عدهم يرجعني بقيت اتصارع ويا احاول اطلع من البوابه قيدني وهو يرجعني حسيت على صوت خلفي انداريت عليه خايفه

.. جرني من ايدي قوي وهو يرجعني للقصر

ضبع: وين رايحه

الـِن: معليك لا تدخل مو اختاريتها هي يله روح عيش وياها وحبها اني شكو خليني اعيش حياتي

.. ما جاوبني ودخلني للقصر وهو يسحل بيه من ايدي دخلت واني ابجي واصعدني للغرفه وشمرني بيها بقيت اصرخ

الـِن: شوف ضبع اذا ما تريدني عوفني الله يخليك شكو باقيه هنا اني هم اريد اعيش حياتي

.. حجه وهو راص على اسنانه

ضبع: ما تطلعين منا الا وانتي جثه افتهمتي

.. نزلت دموعي وحجيت

الـِن: ليش مو حرام عليك انت تروح وتزوج وابقى اني هيج محبوسه با القصر الله عليك ضبع عوفني

.. تركني وطلع بدون لا يجاوب وقفل الباب

.. شويه  وحسيت القفل انفتح ودخلت رنا وهيه عينها عليه

رنا: الـِن لاتسوين بنفسج هيج

.. رفعت نظري عليه ومسحت عيوني وحجيت

الـِن: شلون بيه رنا راح اعيش عمري هيج ما اعرف شنو نهايتي وشنو حياتي مجهوله وبا ايده الله يخليج ساعديني

.. تقربت عليه وكالت

رنا: اسمعيني اني متاكده ضبع يحبج بس اعرفي شلون تتصرفين ويا وخلي ينسحب من فكره الزواج خلي ابالج هاي لو تدوجت ضبع راح تلعب بعقله وياذيج اكثر عاد اكسبي لصالحج

الـِن: كلشي سويت رنا بس هو رافضني

.. صفنت با الفراغ واني افكر بكلامها ورجعت حجيت

الـِن : اريد مبايل

.. ثبتت عينها عليه وطلعتلي مبايلها وكالت

رنا: خلي يمج

.. اخذت من عدها ضامته عندي وبقت يمي شويه تقنعني بكلامها وطلعت

.. مسحت دموعي واني افكر بكلامها اخذت المبايل واني اكتب رقمها واتصلت اجاني صوتها وحجيت

الـِن: نور

.. حجت بصوت مستغرب

نور: الـِن ماما حبيبتي هاي انتي

.. نزلت دمعه جانت بطرف عيني وحجيت بقهر

الـِن: ماما انقذيني

نور: يروح امج لا تخافين مابقى شي ونخلص منهم

.. بجيت بصوت عالي ورجعت حجيت

الـِن:ضبع راح يتزوج

نور: يا جلب اللله ينتقم من عنده اسمعيني الـِن اصبريلي بس يومين والله جايتج

الـِن: راح انتظرج

.. غلقت الجهاز واني امسح ادموعي اخذت ملابسي ودخلت اسبح واحاول اتناسى حسيت على صوت با الغرفه طلعت لكيت رنا موجوده تقدمت عليه وهيه تحظني كالت

رنا: راح نطلع بعد

.. حظنتها قوي وحجيت

الـِن: شكرا الج ساعدتيني هواي

.. ودعتني وطلعت وهيه تقفل الباب مرت يومين واني محبوسه با الغرفه ضبع بعد ما شفته وبس عامله تدخل تنطيني الاكل وتطلع

..كاعده واحس روحي حتطلع من الملل ماعرف وين اروح وهوه قافل عليه الباب وصارله اربعه ايام ما موجود وبس المره الي تشتغل بلقصر تجي تنطيني اكل وتطلع كمت باوعت من الشباك الي هوه متنفسي الوحيد اباوع من عنده على حديقه القصر الي بنفسي انزللها واتمشى على الحشيش البارد لو اشم الورد وخاصتا الجو هاي الايام صاير بي بروده حلوه وهوا عالي واني سارحه بنظري على الاشجار اجت عيني على الحرس وهمه يفتحون الباب اله دخل بسيارته وسدوها وراه باوعتله من دخل وعينه صارت عليه راسا سديت الشباك واجت على بالي فكره

- لو اني لو انت 

رحت على غرفه الملابس الي جانت بنص الغرفه ورحت على قسم الفساتين الي اول مره اشوفهن واتقرب الهن  رحت على اكثر فستان حلو وجريئ جريته واني گلبي يدك بلثانيه الف دكه واحسه راح يوكف من ورا الخوف واردفت وي نفسي

- لج هذا الضبع ما يلعب عليه

هزيت براسي ابعد هاي الافكار واخذته ولبسته جان لونه اسود طويل بي فتحه على شكل سبعه من جهه الصدر وفتحه على طول رجلي جان حيل كاعد على جسمي ومبين كل تفاصيله فتحت شعري الي جان لونه عسلي وي لون جسمي الابيض الشفاف باوعت على نفسي بلمرايه

- ابوسج على هلجمال عيني وين ضامته

واني واكفه على المرايه تذكرررت المبايل الي نسيته على السرير
-عزااا وهوه جاي بلطريق ياويلي لو شافه

رحت اركض للغرفه حطيت ايدي عليه احاول اضمه وحسيت ايد صارت على ايدي واني لازمه المبايل لزم ايدي وعصرها حسيت المبايل راح يطك باايدي من كد ما عصرها

-اخخ

تقرب عليه وصار جسمه يطخ بجسمي وحط راسه قريب ركبتي واحس باانفاسه على ركبتي جسمي ضل يرجف قرب خشمه على ركبتي وهوه يطبع بوسات خفيفه عليها صعد لاذني وعظ شحمه اذني وكانما فاقد واني ضايعه باايده

- ضبع لا

همس بااذني
-اششش كل واحد لازم ياخذ عقابه وانتي لازم تاخذين عقابج الليله

.. لامني بحضنه وهو يطبع بوسه خفيفه على راسي وكال

ضبع: مرتي

.. ابتسمت على كلمته ورفعت راسي بخجل وحجيت

الـِن: مرتك الاولى والاخيره

.. ما جاوبني وهو يدور وجهه وهذا الي خوفني رجعت دفنت نفسي بحضنه متناسيه خوفي منه ورجعت واني فرحانه وبكل براءه حجيت

الـِن: ضبع اني احبك هواي

.. ضغط على خصري اكثر وهو يحاوطني عليه وما جاوب غمضت عيني وبعد ماحسيت بشي

.. فتحت عيني بطيئ وجان ضبع ما موجود كمت على حيلي واني اخذ ملابسي وادخل اسبح حسيت على صوت حركه با الغرفه لبست على السريع وطلعت جانت بنيه حجيت

الـِن: منو انتي وشعندج داخله للغرفه

.. ارتبكت وهيه ادكول

- اني اخت سيلا

الـِن: يعني اني ما عونت اخلص من سيلا تطلعلي اختها اتفضلي برا بلا زحمه عليج

.. طلعت وهيه عينها على الغرفه نزلت جوا ولكيت هواي نسوان جايات اول ما شافني بقن يتبسبن وسيلا بنصهن وعينها عليها تقربت عليهن وحجيت

الـِن: العائله الكريمه كلها هنا شكو شعدنه مفتحين دار عجزه

.. حجيت كلمتي واني استهزء

سيلا: عدنه عرس حبيبتي

الـِن: ها لازم ما تدرين انلغى عرسج للاسف وهسه اخذي اهلج واطلعوا من بيتي

.. ضحكت وتقربت عليه وحجت بكل قذاره

سيلا: تاكدي من معلوماتج حبيبتي

.. بقيت صافنه عليها ماعرفت اجاوبها صعدت للغرفه واني منتظره ضبع يجي بس ماكو شوي ونزلت جوا اتاكد اذا موجود اول ما نزلت لكيته واكف هو وياها تقربت عليه وحجيت

الـِن: ضبع تعال خل نحجي

.. فتحت اول غرفه وجانت بيها اختها رجعت سديتها ورحت للغرفه الثانيه وجان وراي دخل وغلق الباب ورا

انداريت عليه واني احجي

الـِن: شعدهم هنا ضبع

.. حجه بكل برود وهو مثبت عينه وكال

ضبع: شنو شعدهم

.. رجعت حجيت واني خايفه

الـِن: مو لغيت العرس شكو جاين اهلها

.. ابتسم وهذا الي جنت خايفه منه

ضبع: ليش الغي

.. فتحت عيني بصدمه وتقربت عليه نزلن دموعي مستهن سريع وحجيت بكل بغصه حزن

الـِن: ضبع واني ؟

.. ثبت عينه عليه وما جاوبني

الـِن: وحبي الك ؟

ضبع: ما حبيتج

.. دفعته قوي وضربته بقبضه ايدي على صدره وصرخت بصوت

الـِن: لعد ليش كسرتني يا نذل يا حقير ليش سويت بيه هيج متحبني ليش تقربتلي

.. ابتعد عني يطلع حسيت نفسي نهاريت وكعت على الارض ارجف واحس الهوا بعد ما يدخل بريتي ضربت باايدي قوي على الارض متوجعه بس مو مثل وجع روحي

.. بقيت ابجي با الغرفه واني كاتمه شهكاتي ما اريدهم يسمعوني ويتشمتون بيه عيوني ورمن من البجي

.. مر وقت واني حابسه نفسي با الغرفه خايفه اطلع ويكولون جانت تبجي عليه اتجهت للباب واني اطلع جان ماكو احد بس صوت همس تقرب واني اسمع الاصوات فتحت عيني مصدومه واني اسمعها ادكول

سيلا: خايفه يكشفني ويعرف اني مو حامل شلون

.. رجعت للغرفه واني مبتسمه

.. كاعده واني اسمع اصوات الاغاني وهوستهم نزلت دمعه من عيني ومسحتها سريع جنت حالفه هذا اليوم ما تنزل دمعتي

.. حسيت على الباب انفتح ودخل وبكل كشخته وعطره سابقه ابتسمت با استهزاء واني مثبته عيني على فراغ

ضبع: ما تطلعين

.. رفعت عيني عليه وحجيت

الـِن: ليش تريدهن يشمتن بيه

ضبع: لا بس صارلج هواي حابسه نفسج با الغرفه مو زين عليج

.. تقربت عليه واني مبتسمه ومثبته عيني عليه حجيت

الـِن: تخاف عليه

.. ما جاوبني تقربت عليه اكثر واني اعدل بقميصه وحجيت بقهر

الـِن: رجلي اريدك تطلع حلو اليوم

..ثبتت عيني عليه واني احجي كلماتي بشكل متتابع

- لا تنام بحظنها وتثبت عيونك عليها خاف تحب عيونك مثل ما احبهن

.. نزلت دمعه من عندي مسحتها على السريع ورجعت مثبته عيني عليه اخذت ايدي واني اتلمس عيونه غمضهن و حجيت بحزن

الـِن: هم راح تحب عيونك بكدي؟

.. مشيت اصابعي على ملامحه وجهه فتح عينه وثبتها عليه رجعت حجيت

الـِن: هم راح تحبك بكدي ؟

..جانت دموعي تنزل على خدي واني ماحاسه بيها ابتسمت واني امسحهن وحجيت بقهر وغصه گلب

الـِن: هم راح تتحملك مثلي ؟

.. سكتت واني اخفي شهكاتي رجعت حجيت

الـِن: زين وگلبي؟

.. بعد عينه عني واندار يطلع حجيت كلماتي الاخيره واني اضحك بقهر

الـِن: مبروك

.. طلع بدون لا يجاوبني غمضت عيني قوي امنع دموعي تنزل بس وحرگه گلبي لميت نفسي واني اسمع هوستهم واغانيهم وضحكهم

.. حسيت على فتحه الباب رفعت عيني وجانت ملاك كمت على حيلي وتقربت عليه وحظنتني قوي وبعدتني عنها وحجت بشكل سريع

ملاك: الـِن ماعدنه وقت نور تنتظرج برا اطلعي بساع ما دام كلها ملتهيه

.. بقيت صافنه بوجهه ما اعرف شسويت اخذت ايدي قوي وهيه تطلعني من الغرفه ودخلنه من باب المطبخ وطلعنه منه بدون لا احد يلاحظ بقت لازمه ايدي وهيه تركض لحد ما وصلنه للبوابه الخلفيه وجانت نور وكافه ركضت سريع عليها وحضنتها قوي بقت تبجي حسينه على صوت ملاك وهيه ادكول

ملاك: مو وكتها هسه اطلعن

.. انداريت واني اشوف ريم واكفه يم البوابه تبعد الشبك اشرتلي اطلع سريع

.. تقربت عليها واني احظنها وطلعت من البوابه جانت عيني على ملاك وهيه تمسح بعينها وكالت اخر كلماتها

ملاك: ديري بالج على نفسج

.. هزيت براسي ومشينه خارج القصر جانت نور لازمه باايدي مشينه مسافه بعيده وجانت اكو سياره واكفه صعدنه بيها  اول ما صعدت اجت عيني على ادم وهو يندار عليه كال

ادم: مثل ما وعدتج خلصتي من الضبع

........................... 

.. مسحت دموعي واني استذكر الاحداث رفعت عيني عليها وهيه تتقرب عليه وتقدمي كلنس اخذته من عدها وربتت على كتفي وكالت

- اتمنى ان تتخطي جميع الاحداث المؤلمه التي مررتي بها

.. ابتسمت واني ارفع عيني للساعه جانت ب7:13

الـِن: دكتوره متى سوف تكون مرحله العلاج

- الاثنين نبدأ بها اتمنى ان تكوني على استعداد

.. هزيت راسي واني ابتسملها اخذت الستره وطلعت من يمها تمشيت للميترو وحسيت على خطوات خلفي انداريت بخوف واني اتمعن ما جان اكو شي رجعت للشقه

.. اول ما فاحت الباب واجت عيني عليهم كالبين الصاله حجيت بصوت

الـِن: والله راح اشمركم اثنينم با الشارع شمسوين

.. ضحكوا ثنينهم وجود ختل ورا ادم وهو ياشرلي عليه وكال

جود: هذا بابا مو اني

.. ابتسم ادم وهو يكول

ادم: انت دومك اتذب التهم على غيرك طالع على امك

.. ابتسمت ودخلت للشقه بديت الملم الصاله بمساعدتهم اندار عليه ادم وكال

ادم: يله بدلو راح انتظركم

الـِن: ماعندي شي بس ابدل لـ جود

.. هز براسه وطلع اخذت جود ابدله وطلعنه جان منتظرنه برا

.. كاعده كدامه واني اسولفله على جلسه اليوم وهو يستمع بكل حرص ومثبت عينه عليه اتوقفت واني اندار اشوف جود الي يلعب وفرحان ابتسمت على ضحكاته ورجعت اندريت لـ ادم اكمله قاطعني وهو يكول

ادم: الـِن انتِ و جود جزء من عائلتي

.. اتقرب على ايدي وهو يمسكها ومثبت عينه عليه ورجع كال

ادم: صيرولي عائلتي با اكملها

.. فتحت عيني بصدمه خايفه انداريت بحيره واجت عيني على مكانه ما جان موجود كمت على حيلي خايفه وحجيت

الـِن: ادم ابني ماكو

.. تقدمت لمكان الالعاب واني اتفقده بين الاطفال ما جان موجود ارتعشن اطرافي خايفه بقيت افتر واني ادوره ما جان موجود !! نزلن دموعي وبديت اصوخ بصوت عالي وان لعل يسمعني ويجي

الـِن: جود

.. ما جان اكو جواب بقيت اسئل الموجودين محد يعرف وين راح وكعت على الارض اصرخ والتمو عليه الناس اجو الامن وهمه يتسائلون رفعت عيني على ادم وحجيت بقهر

الـِن: ضبع اخذ ابني