رواية سليله الانتقام الفصل الخامس عشر 15 - بقلم taratel

..كال كلماته الي صعقني بيهن وهو يتقدم عليه
هاشم :مشتاقلج اختي
الن:هاشم

..تقدم عليه وجرني من شعري وهو يغلط عليه
هاشم: والله اليوم اشرب من دمج ولج دا..

..حجيت واني جوه ايده يضرب بيه
الن: والله ماعندي احد اروحله انت دخلت السجن وعاصم انعدم
هاشم:غيرر شهدتي ضده ياااجلبه ولج كتلتي ابوووي
..سحلني من شعري وهو يطلعني ما اذاني بس لمن ضرب ريم الي ضلت تتلوه من الوجع قبل لا اطلع صحت بصوت اتمنى تسمعني

الن: ريم خااابري الضبع

.. سحلني من شعري وهو يضرب بيه باايده ويفشر ويغلط كدام العالم الي بقت واكفه ونص بيهن سد الباب ورجع كعد بشقته نزلني وصعدني بسياره وجان هوه وواحد ولد بكده صاعد بلصدر بده يسوق وهو كلساع يندار عليه ويضرب بيه

هاشم: بس اوكفيلي خل نوصل اله انتقم منج والله

..سكتت وبس ابجي ماعرف هاشم شراح يسوي بعد ما شهدت ضده وضد ابو

.. وصلنه لمكان بعيد عن بغداد حيل مثل البيت بس جان غرفه وحده وحمام ومطبخ خربان حيل نزلني هاشم وويا الولد الي جان ويا لزمني من ايدي وشمرني بلغرفه وكال

هاشم : وهسه نتصافى يحلوه
الن: هاشم عوفني شتريد من عندي

..تقرب عليه وهو ينزع حزام بنطرونه
هاشم:شهدتي على عاصم
الن: غيررر كتل امك الي هيه امي غير كتلها شبيك عود هاي انتي اخوي

..تقرب عليه وهو بوجهه ابتسامه مقرفه
هاشم: ومنو كال انتي اختي؟؟

..تقرب عليه حيل وضربني بلحزام روحي شاطت
هاشم: لج كح.. كيفتي مو عبالج تخلصين من عندي
..ورجع ضربني اقوا

الن: الله عليك كافي بداعت ماما نيران
هاشم: لا ادكولين ماما انتي مو بتنه افتهمي

كال هيج لو انهاريت من البجي
الن: كافي الله عليك كافي ولك انت اخويه ليش هيج تسوي وياي ليش
هاشم: شهدتي ضدي بلمحكمه مو كلتي يتحرش بيه ؟؟
..سكتت بس ابجي
هاشم: خوش لعد هسه اراويج التحرش شلون يصير
..ابتعدت بخوف
الن:هااشم لا تتخبل وخر عني
..اتقرب حيل عليه ولزمني من ايدي
هاشم: شايفه شكد بنفسي اخخخ واخيرا اجا هذا اليوم

..رحت اركض على الباب اريد ينفتح ما انفتح اصيح بلكت الولد الي اجا ويا يسمعني ويفتحلي الباب بلكت يشفق عليه بلكت يحن عليه اكثر من اخووي!!

.. اجا ورايه ولزمني من شعري الي تكطع بايده وهو يكول
هاشم: اله انتقم منج انتقام

الن:ولك ليش مو اني اختك ليش الاخو سند ولك هاااشم

..كلتها وضربت على خدي احس نفسي انهاريت من شافني هيج خله وطلع لميت نفسي لاحد زوايا البارده الي جانت عكس روحي الي مشتعله نار جسمي الي ياذيني من الضرب حجيت بغصه قهر

الن: ليش شنو ذنبي ليش كلها تدور انتقام من عندي

حطيت ايدي على شفتي اخفي شهكاتي
الن: ياربي شنو ذنبي اني ليش

..بقيت كاعده ابجي اندب حضي بدنيا لو على اهلي الي خلوني اعيش هاي الحياه شويه ودخل بيده علاكه بيها لفاات ذبها يمي وكال

هاشم:اكلي ورانه سهره اليوم

..باوعتله وخزرته
الن:حقير وسافل واحد كو..

..اني كتله هيج لو تخبل هجم عليه يضرب بيه بوجهي وكعت بلكاع ماكدر اكوم ضربني برجله على بطني خله رجله على راسي وضل يضرب بيه يشيل رجله حيل ويرجع يضرب براسي الالم الي اجتاحني الغصه البصدري والخنكه القهر الحزن الالم كلهن مرادفات لنفس المعنى

.. قيديني باايدي وهو يحاول ينزع ملابسي
ضليت اصرخ بااعلا صوتي
..ولكككك اني اختتتك

..جانت عيني على الباب انتظره يجي يخلصني جنت انتظره بس ما اجااا

احاول ادفعه عني ميتحرك شكك ملابسي خرمشت باايده بوجهه ميتحرك كل ما اتحرك يضربني بوكسي بوجهي خشمي طك دم صوتي راح من الصياح

..انفتح الباب ودخل باوعله ورجع يكمل فعلته
هاشم:تعال خوش وليمه

..تقرب عليه الثاني وهو يحاول يخلي لمساته المقرفه على ركبتي ويتلمس بجسمي

في اللغة العربية يقال ان
الكمد هو حزن لا يمكن امضاؤه
وان الوجوم هو اخطر انواع الحزن

فكيف ما لو التقى الاثنان في قلبي ...

هَلي انتم سبب حزني
هلَي طحت طيحه
مثل دمع على الكاع
محد كالي اسم الله

..اصعب شي من تشوف روحك انباكت وجسدك موالك لحضات سريعه هيه بس بلنسبه اليه عمر كل لمسه قذره منهم قيدوني وهمه يتلمسون بجسمي شككو ملابسي كلها بقيت بس بلداخليات واحد نايم فوك ركبتي والثاني يم رجليه ويخلي شفته المقرفه على بطني ويتلمس بصدري

..اصيح ابجي اشهك ادعي ..مافاد
حجيت بصوت متعب
الن:ولج يمه الحكي شوفي ابننننج شسوه بيه

..جفلو على صوت طلق رمي صار برا والباب اندفر
اجت عيني عليه شكد اتمنيت نفسي ميته ولا يشوفني بهذا الموقف طلقتين رمه بس وخلاني اغرك بلدم رفعت راسي عليه وحطيت ايدي على جسمي حجيت واني ابجي

الن: مره الضبع اعتدوا عليها وانت ماكو
..اجا يركض عليه وخرهم من يمي وهمه يتلاون من الوجع نزع سترته العسكريه ويحاول يضم بجسمي
دخل ٤ ورا وصاح بيهم بصوت

ضبع:طلعوووو
..راسا طلعو لزم راسي باايده ويطبع بوسات متعدده عليه
ضبع: ماعاش الي يمس مره الضبع

..ضربته على صدره حيل
الن:لزمووووني وطبعوا وصخهم على جسمييي انضربت وانهانيت وانت ماااكو انتظرتك كلت هسه ضبع يجي ما يعوفني بس مااجيت ماااجيت

..حجيت بضعف وكتله
ولك ضبع اخوووووي اغتصبني اخوي

..لمني بحضنه وشالني نزلني على رجليه يم هاشم خفت منه حيل لزمت بضبع وحطيت عيني بعينه وهزيت براسي لا

الضبع : باعيلي شو
..رفع وجهي بااصابعه وخلا عينه بعيني وخله المسدس على راس هاشم ثواني بس وايدي وجهي والستره مالته انترست دم

..حضنته قووي واني اصيح وابجي
الن:لااااا ضبع لااااا

.. سترته الي جانت واصله لافخاذي ورجلي طالعات راح شال جرجف من الكاع ولفه عليه وشالني بحضنه وطلعنه طلعت واني محاوطه باايديه ركبته وراسي على صدره طلعت والولد الي جانو برا راسا دنكو روسهم من طلع ضبع واتجهه بيه للسياره فتح الباب وخلاني ورا

..شال ايدي وطبع بوسه خفيفه عليها وكال
ضبع: ثواني وجايج

..لزمته من تيشرته
الن:ضبع لا تعوفني بعد ياذوني

..هز راسه وتقرب
ضبع:مااعوفج بس اخلص شغلي واجيج

..عافني وراح ثواني ثواني بس ورجع صار صوت رمي تقربت اباع من الجامه وشفت الولد الي جانو وي ضبع طلعو جثه هاشم الي جانت عباره عن دم وراسه متطشر خلو بلكاع حيل تاذيت من شفته بهذا المنظر اكثر من اذيته اليه شكد تمنيت ينسجن ويطلع انسان ثاني ويستعدل بحياته ورا دقيقه طلعوا الجثه الثانيه للولد الي جان ويا ونفس الحاله اباوع على ضبع ملابسه انترست دم اجا تقدم على السياره وصعد

..حطيت راسي على الجامه رفع مبايله وحجه
ضبع: دفنوهم ونظفوا البيت ماريد احد يعرف

...خلص كلامه ورجع غلق المبايل حجيت وصوتي متشحرج من الصراخ

الن: جان عمري ٦ سنوات وهاشم ١٠ جنت العب بلشارع وكتلوني دخلت للبيت ابجي من شافني هيج اجا عليه وهو خايف سولفتله وطلع متعصب وضربهم بيومها فرحت حيل حسيت محد راح يكدر ياذيني واني عندي هاشم جنت اشوفه سندي

ضبع: اني سندج واني اهلج

..ما تحملت بجيت راسا وكف السياره ونزل اجا على
جهتي وصعد يمي لمني بحضنه وهو يوخر شعري عن وجهي وكال
ضبع: لا تبجين وانتِ ابحدج ابجي بحضني امانج الوحيد
رفعت راسي عليه وخليت عيني بعينه
الن:خايفه يجي يوم وهذا الامان يصير خوف
..طبع بوسه على راسي وكال
ضبع: روُح الضبع

..انداريت وحجيت
الن: وين راح تدفنوهم
ضبع:معليج حبيبتي انتِ
الن:لاادكول حبيبتي

..تقرب يم اذني وهمس
ضبع:اكول مرتي الشرسه

..ابتسم ورجع طبع بوسه على اذني وكال
ضبع: شمسويه بيهم بزونتي
الن:ديله على اساس انت خليت وجهم يبين
ضبع:الي يندك بمرتي يلكه روحه جوه الكاع
الن: يا ضبع شبيك ما صدكت كلساع مرتي ومرتي

باوعلي وابتسم
ضبع:احبج من ادكولين اسمي
الن:اهوو شو كوم عني ريحه الدم كتلتني

..ضحك وابتعد عني ورجع لمكانه ومشى واني لفيت نفسي بسترته والغطوه وحطيت راسي على الجامه احاول اتناسى كل الي شفته !! بس شنو الي انسى منظرهم وهمه يتلمسون بجسمي لو منظرهم من كتلهم كدام عيني
..........................

..نظرات الخوف والقلق الي تعتلي ملامح وجهن وهنه خايفات من رده فعله التعذيب النفسي والتعذيب الجسدي عند شرار الي تحول شخصيه ثانيه وهو يتخيل اول عشگ لگلبه باايد ثانيه غيره من اول ما شافها واجت عينه عليها اتمناها تصير من نصيبه بس هسه شنو ؟؟

....

شرار: بيا ملهى اخذوها
روان:مااعرف والله مااعرف
شرار: مااحب هاي الكلمه
روان: اسد اخذها
شرار:يقين شنو الها علاقه بيكم
روان: تعرف اسد ومن خلالها اخذوها

..ابتسم ابتسامه قويه وهو يضربها راجدي قوي وكال
شرار:مو كتلج لا تجذبين
روان: نورهان تواصلت وياها
حجت بااستنكار
نورهان:ياجلبه اني شكو تذبين تهمتج عليه

..رجع ضربها اقوى هلمره
روان: جنت احجي وياها علمود تصورلي ملاك وهيه نايمه وبعدين عرفت هيه تشتغل بملهى وكلت لاسد وخططنه لهذا الشي

..رجع ضربها وحجه
شرار:لاتكطعين عليه الجمل واحجي
روان:والله هذا كلشي صار
شرار:ليش تصورلج ملاك وهيه نايمه
روان:لان ردت ابتزها واقهرها

..ابتسم وهو يضيق عيونه وكال
شرار:حلو طلعتي انتي

شرار:شلون جنتي تتواصلين وي يقين
روان:اراسلها

..اتجه للمطبخ وهو يحمي السجينه وجاب سطله مي وكعد كدامها جر ايدها قوي وخلاها بسطه المي وفتح باطن ايدها وخلا السجينه عليها

..صاحن بصوت
روان:الله ينتقم منك ياحيوان
نورهان:الله عليك عوفني والله اني معليه بيهم ولا الي دخل يمخططاتهم

شرار:شايفات هسه الي كاعد تشوفنه لا شيئ من معاناتها حاليا

..تركهن وورفع مبايله يتصل
شرار:
..ضبع انت وين
..شتسوي بلمستشفى
..لكيت الن

..اندار عليهن ورجع يكمل مكالمته
شرار:لابس سوينه حفله حلوه صلختلك بنات عمك صاح
شرار:خرب يومكم مو عائله ضيم وقهر

..سد الاتصال ورجع يكمل ما بدا
..........................

ماعرف شوكت نمت كعدت على صوت ضبع يحجي وياي ويكعدني
ضبع:الن كعدي
الن:ها
ضبع: نزلي للبيت راح اجيبلج ملابس واجي اخذج للمستشفى
..هزيت براسي ولفيت نفسي بلغطوه ونزلت كدام بيت حيل جبير خله السياره بلكراج ونزلنه ماحسيت اله شالني باايدي وكال

ضبع: خلصت عمري شايل بيج وين تلكين هيج واحد

..خليت ايدي على شفته وكلت
الن:اسكت

..رجعت خليت راسي على صدره ودمعتي ما نزلت حس عليه وسكت دخلني للبيت جان حيل حلو وجبير وفارغ كعدني بلصاله واجت مرا جبيره شويه بلعمر انصدمت من شافتني وكالت

-يا كو.. ياضبع ادري بيك ما تكعد راحه نوبه جايبهن يمي شكو
ضبع: حجيه والله هاي مرتي مرتي

..من كاللها مرتي يله سكتت نوبه ابتسمت بوجهي واجت

-صدقه الله شنو هلجمال بس ليش حبيبتي لافه نفسج بغطوه

..باوعت لضبع وكالها
ضبع:حجيه ساعديها خل تسبح
..ليش ولك ضبيعان شمسوي
ضبع:مامسوي شي شو وخري اني اساعدها مرتي

..هزيت براسي لا مااكدر احجي صوتي متشحرج من الصياح حجيت بلكوه ينسمع
الن:لا ضبع
ضبع : اش
..شالني وصعدني فوك فتح اول غرفه الي جانت عباره عن سويت تجنن حيل جبيره وبيها بلكونه وكعده تخبل
خلاني على السرير واتجهه للحمام فتح المي بلبانيو

..شويه واجا عليه
ضبع:يله كومي سويتلج المي دافي دخلي سبحي وراح اجيبلج ملابس من الحجيه

..هزيت راسي وطلع كمت نزعت سترته وخرت الغطوه ودخلت للحمام لكيته مسويلي المي والمي بي شامبو وصاير عباره عن وغف وفاتحلي شمعتين عطرهن يجنن دخلت نفسي احس ارتاحيت المي حار ارتاح جسمي بس گلبي ماارتاح انعاد عليه الموقف

..حسيت بنفسي انهاريت من البجي واني اتذكر لمساتهم المقرفه امسح بجسمي ماتروح بقيت فتره لكيت اكو برنص جبير بلحمام لبسته وطلعت لكيت ضبع كاعد بلغرفه

..خطيت نحوه قدملي  دشداشه اخذتها ورجعت اريد البسها بس الي صدمني شفت دم حيل خفت ياربي هذا شنو خفت اروح واكول لضبع بس ماعندي احد غيره
طلعت لكيته واكفلي بلباب والخوف مبين بعينه

ضبع:شبيج
الن:ضبع اكو دم

..تقدم عليه ولزمني من فكي
ضبع: تقربولج؟

..هزيت راسي بمعنى لا

ضبع:امشي اخذج للمستشفى ماتبقين هيج
الن: تمام

..نزلنه والحجيه كالت ها يمه تتغدون
ضبع:لاحجيه نروح بشغله ونرجع
الحجيه:خوش لعد

..اخذني ورحنه للمستشفى دخلنه لدكتوره نسائيه اختصاص وحجيتلها بلموضوع بااختصار

-عادي ماما تصير بسبب الخوف لا تخافين

..كتبتلي ادويه وانطيتهن لضبع جابهن نزلني يم سوير ماركت وكال
ضبع:تنزلين تاخذين شي
..هزيت راسي بمعنى لا وجاوبته
الن:مابيه حيل

..نزل هوه شويه ورجع جايب علاكه حلويات وشمرها عليه وعلاكه ثانيه بيها احتاجاتي ورجعنه لكينه الحجينه نايمه بلصاله اول مادخلنه كعدت

-يله يمه انتظركم على الغده
..كالت هيج وراحت على المطبخ ندست الضبع وكتله
الن:ضبع هاي المره منو والبيت المن
ضبع:بيتي والمره امي
الن:امك مو ميته
ضبع:امم
الن:لعد هاي شنو
ضبع:هم امي
الن:هواي عدك امهات نور وهاي وامك الحقيقيه

..سكت وما جاوبني صعدت للغرفه ونمت شويه وحسيت عليه يكعد بيه
ضبع:تتغدين
الن:ماريد
..اتقدم عليه وتقرب يمي وخر خصله من شعري وكال
ضبع:انسي
الن:ماكدر ماكدر انسى شنو الي انسى ضبع شنو انسى انسى لمساات..

..بعدني ما مكمله كلامي وحط ايده على شفتي يسكتني وكال
ضبع:لا تكملين

..سكتت  ونزلت راسي ونزلت دمعه من عيني تقرب عليه وطبع بوسه خفيفه على عيني

ضبع:ماعاش الي يبجيج بس اني

..كرصته حيل وكلت
الن:اي طبعا هوه من مرمر گلبي غيرك
ضبع:شفتي مو كتلج امانج بحضني ويمي ومحد يحميج غيري ومحد ياذيج غيري
الن: ضبع اني راح اساعدك
ضبع:بشنو
الن: انتقامك
.......................

..سجلنه خروج وطلعنه من المستشفى بس راسي شويه ياذيني
ريم: راح ترجعني للشقه
..هز براسه وهو ساكت صعدنه بلسياره واني راسي حيل ياذيني وكف كدام صيدليه وجاب دوا انطاني فتحته اشوفه شنو

ريم:هذا المن جايبه
-الج غير مسكن الم
ريم: ميحتاج بندول وكلاص جاي وفضت راحت

..ابتسم وكال
-اخويه وياج يدرس
ريم:صدك شنو اسمه
- احمد عبدالله
ريم:ياا اعرفه وياي بلدفعه من الاوائل
باوعتله وكلت
ريم:انت شنو اسمك سيدي
..سكت وجاوب
- سلطان
.. سكتت بعد ماحجيت ولا هوه حجه لحد ما وصلني للشقه دخل وياي جانت مكلوبه كلاب

سلطان: راح اروح محتاجه شي
ريم:لاشكرا تعبتك بما فيه الكفايه

  ..تقرب وطلع من جيبه مبايل وقدمه الي

سلطان: شرار وصاني اجيبلج مبايل حطيت بي رقمي اي شي تحتاجين اتصلي عليك

ريم: شكرا الك

..ابتسم وطلع بقيت لليل اعدل الشقه ومسحت الدم الي مله الكاع وكعدت بلصاله شفت المبايل وجايتني بي رساله

...عرفتيني
..منو سلطان
..ولك بواب شبساع نسيتني

..راسا انطيته حظر ورا شويه رفعت الحظر عنه وجاوبته

..شتريد
..راسا رجع جاوبني
شرار:اهنا ماكو باب بس اكو حظر خرب يومج شهلعقل العندي
ريم:شرار لكيتو ملاك
شرار:لكيناها
ريم:صدك شلووونها
شرار: مو زينه بعدنه ما واصليلها بس حددنه المكان باا اخ.. مكان بلكره الارضيه
ريم:حبيبتي سوده عليه
..ماجاوب رجعت دزيتله
ريم:والن
شرار:يم ضبع
ريم:اي الحمدالله لكاها ضبع هذا اخوها واحد جلب هواي اذاها وضربها
شرار:وانتي
ريم:شبيه؟؟
شرار: شلون صرتي اتاذيتي؟؟
ريم: لا بس راسي
شرار: وصيت سلطان عليج اي شي يصير واتصلي عليه سبع ميقصر
ريم:شرار بس امتحاني راح
شرار:لاتخافين نحلها
ريم:تمام
.. بعد ما جاوبني ولا اني دزيتله رحت للغرفه فتحتها وحشه على الن كل يوميه ساطرتني سطر بسوالفها اليوم ماكو نمت وبعد ما حسيت اله على دكه جرس كمت افتحه لكيت سلطان واني فاتحه تك عين كتله
ريم:نعم شرايد من الصبح
سلطان:اول شي صباح الخير شبيج وجهج مكلوب
ريم:شعندك ب٧ الصبح جايني
سلطان:اخذج للجامعه خابر عليه شرار ووصاني اخذج نعيدلج الامتحان
ريم:دوامي ب٨ ونص بعد وكت
سلطان:مو مشكله اخذج هسه نروح نتريك بمكان
..هزيت براسي وسديت الباب بوجهه

رحت بدلت وطلعت لكيته واكف بلباب عيونه شايطه خفت وكتله
ريم: صبااح الخير

..ما جاوبني ومشا
سلطان: صارلي ساعه واكف بلباب انتظرج
ريم: اي يعني شتريد مثلا ادخلك للشقه واني بنيه وبحدي
سلطان: استغفرالله

..كال هيج ومشا صعدنه بلسياره وكال
سلطان:تردين نروح نتريك
ريم: لا ماريد بس وصلني راح اموت من القلق والتفكير
سلطان: على شنو خوف وقلق
ريم: امتحاناتي
سلطان: لا تخافين تخلص بس هلسنه

..سكتت وراها وصلنه للجامعه ودخلنه اني ويا البنات كلها تباوعلي وتباوعله مستغربين اول مره يشوفوني امشي وي واحد حيل استحيت واني الشخص الانطوائي بلجامعه دخل لرئيس القسم وحجه ويا وضبطو الامور وكالولي اعيده وطلعنه

سلطان: هسه ارتاحي بعد ولا تخافين كلشي نحل امتحني وخلصي وان شاء الله خير

..هزيت راسي وهو راح واني رجعت للبيت

..هيج مشت الايام لحد ما خلصت امتحاناتي وشرار وضبع مختفين الن بعد ما شفتها سلطان ضل يتواصل ويايه كل يوم ويسئل عني جان اخر يوم اليه باالامتحانات رجعت فرحانه اول ما وصلت لكيت رساله من شرار قبل خمس ساعات  دازلي لكينه ملاك اتصلت عليه ما جاوبني رجعت اتصلت عليه جاوب

ريم: ها شرار بشر لكيتو ملااك
شرار: ميته
............................

..اتجهت بخطواتي نحوه مثل ما كالتلي هو بس شافني تقربت عليه ابتسم وكال

-ياهلا تعاي تعاي بحضني كعدي

..تقربت نزلت يم رجله ولزمت باايده هو انصدم من شافني هيج
..باوعتله بعيون تارسها الدمع وحجيت

ملاك: الله عليك ساعدني والله خاطفيني وجايبيني هنا بلكوه
..هو راسا دفعني وشال ايده مااحس اله بلقيس اجت عليه ولزمتني من ايدي وكومتني
بلقيس : ولج بربو.. شسويتي

..ماجاوبتها بس ابجي صاحت على واحد من الولد الي وياها اخذني جرني وطلعني للغرفه الصغيره

-جلدج يحكج مو
..ضليت ابجي ما جاوبته شويه ودخلت بلقيس
بلقيس: شوفي ولج سكتنالج هواي بس هسه راح اعرف اتصرف وياج اذا ما اخليج تجين تبوسين باايدي بسيطه

.. صاحت على الولد الواكف وكالتله
بلقيس: اخذها ذبها يم الحجي وكله هاي هديه من ام علي

.. اجا تقرب عليه واني زدت بلبجي حاولت اركض اطلع بس ما كدرت ركض ورايه ولزمني من شعري اذاني حيل ضربني قوي على ظهري حسيت عظامي تكسرت احاول ابعد ايده عن شعري بس مااكدر كل مااحاول يزيد اكثر ويجره لحد ما تكطع باايده

..حجيت واني اشهك من البجي
ملاك: والله اسوي مثل ما ادكولين ابوس ايدج حبابه لا توديني هناك

..اشرت للولد يعوفني وقدمت ايدها

بلقيس: يله

..اتقربت يمها واني كارهه نفسي الي كاعد احافظ عليها منهم بس الى متى؟؟ اني هيج يصير بيه
تقربت وطبعت وبست ايدها بااشمئزاز

..مااحس اله جرت شعري وشدته عليها حيل

بلقيس: شوفي هلمره راح اسكتلج لان جديده بعدج المره الثانيه راح انتقم منج وهلمره مو بس للحجي نسويلج فره حلوه على الجماعه

..هزيت راسي واني ابجي عافتني وراح يم الولد كالتله ياخذني للبيت بقيت على هاي الحاله يومين محد يتقرب يمي وبس كاعده بلغرفه تنطيني بس وجبه وحده بليوم وهنه كل يوميه يطلعن واسمع هوستهن وطربهن ووصخهن لحد اليوم الثالث ودخلت عليه بلقيس

-اليوم تطلعين
..هزيت راسي بمعنى لا واني خايفه
-ما اتوبين

ملاك: ماكدر احس نفسي مريضه
-عرج مابيج يله بساع هسه يجنج البنات ويلبسنج

..طلعت ورا شويه دخلن البنات وياهن فستان لون اسود ساده لبسته وجان مبين كل تفاصيل جسمي اباوع على نفسي بلمرايا

ملاك: انتِ منو
ابتسمت بقهر ورجعت جاوبت
ملاك: انتِ ملاك رضوان مهيوب النعمه
انتِ مدللِـه رضوان انتِ الي ما يوم ونزلتي راسج والما يوم وتوسلتي بااحد ولا يوم انذليتي بس هسه انتِ منو؟

.. دخلت عليه وحده من البنات وهيه ادكول
-يله اتاخرنه

..اخذتني وصعدنه بلسياره تقربت لنفس المكان بس هلمره جانت غير
ابتسمت وكلت بنفسي
.. اخر انفاسي لو اطلع منا واني شارده لو اطلع جثه

دخلن البنات وودخلت وياهن وكفت واشوفهن يهزن بااجسامهن بكل رخص وكفت واشوف ام علي تخزر بيه وتهدد بديت امايل بنفسي مع ابتسامه زائفه باوعتلها لكيتها تبتسم .. وتاشرلي اتحرك بقيت بنفس مكاني

..واهز بجسمي ونظراتهم المقززه عليه وواحد يشمر فلوس وواحد يصيح وواحد يتحرش واني الي عيوني غوشت من الدمع ونظرات الحقد والحزن والالم وين جنت ووين صرت اني بنت العز والدلال اصير بهيج مكان وصخ اخخ يازمن تقربتلي وحده من البنات

- ام علي ادكول خل تروح لذيج الكراسي الي هناك واشرتلي عليهن
-مااروح
كرصتني بخصري وكالت

- لج ادبسزز لا تضيعين هاي الفرصه من ايدج اني اجيت اكلج ذوله كولهم
ضباط وشخصيات كبار بلدوله تقربي لواحد من عدهم بلكت يساعدوج

- اخاف شوفي نظراتهم
- روحي وجربي حظج هلمره
- اذا وكعت هلمره بيها نفس ذيج راح يبيعوني للحجي مثل ما هددت ام علي شلون خايفه اوكع بيده عاد هنا بس اركص هناك الله يعلم شراح يسون بيه

- روحي ملاك فرصتج اليوم روحي بس لا تتقربين للي لابس قميص اسود
- ليش
- ياكلج
باوعتلها بصدمه وخوف بداخلي
- شتحجين انتي
-لا بس هوه فعلا اكلج بخزراته بس باعيلي جماله يمه يكطع

- شوفي هذا الوحيد الي من يجي ميسوي شي ولا ياخذ بنات بس يباوع حتى الشرب ميخلي بحلكه وشكد جان يجي وكولهن البنات يتقربله بس هوه تلعب نفسه ويدفعهن فاابتعدي عنه احنه نريد فريسه سهله نصطادها
واذا سوالج شي هلمره ام علي راح تحس

ودفعتني على طاولتهم رحت واني حاطه ايدي على صدري احاول
اغطي مفاتني باايدي واقنع نفسي رحت واني خايفه والخوف مبين على وجهي كل ما اتقرب كل ما يوضحلي شكلهم وخاصتا خزراته ونظراته الي جانت تدور حولي وصلت وضليت اهز بجسمي يمهم علمود ام علي ما تشك بلموضوع

وصلت وكل واحد جان حاطله كلاص شرب ويشرب بي اله هوه
واحد من عدهم حط ايده على خصري ولزمني ويحاول ينزل جوه خصري دفعت ايده ما خلاني جرني اكثر عليه لعبت نفسي حاولت اوخر نفسي من عنده بدون لا تنتبه ام علي الي جانت واكفه وتباوع عليه وخايفه من الخطوه الي راح اسويها

ماحسيت اله على ايد جرتني قوي
باوعت لكيت الولد ابو القميص الاسود جارني عليه وكعدني بحظنه
حاولت اكوم واجت عيني بعينه وايدي محاوطه اكتافه وهوه محاوط خصري بكل قوته

- اثبتي ولا تتحركين
- حباب عوفني
- ليش انتي شنو شغلج
- اني مو مثل ماتتصور حباب عوفني باوعتله واني عيوني متروسه دمع

قرب وجهه عليه واحس باانفاسه تلفح بوجهي
انداريت لكيت ام علي تباوعلي خفت تشك بلموضوع

اندفعت ولاول مره بحياتي اسويها
تقربت على شفته واخذتها بوسه عميقه
حسيته تجاوب ويايه وعصر خصري

بعدني عنه تحت تصفيق وضحك اصدقائه الي كاعدين ويانه بنفس الطاوله
- مو مثل ما تتصور ؟ شو طلعت وغمزلي
انداريت واشوف ام علي بدت تخطو اتجاهي

تقربت لاذنه واني حاطه ايدي على صدره
- انقذني حباب بستر خواتك اني والله وحده شريفه و مخطوفه
ابتعدت من عنده واني اباوع على ملامحه عبالي الكه الاستعطاف لو المساعده لو اي نظره

تقرب لاذني وهوه يهمس
- والشريفه شتسوي بحظني

ماحسيت اله على ام علي واكفه فوك راسنه وهيه تصيح

-اهلا وسهلا سيدي نورتنه اليوم

غلس عليها وماجوبها اردفت مره ثانيه

-واخيرا عجبتك وحده من بناتي

-لابس هاي البنوته عدها شغله وياي وعبالها اساعدها

كومني من حظنه

-شتريد من عندك هاي

وهوه يطلع المعقم من جيبه ويمسح بي ايده وكانما جان يحاول يعقم نفسه من لمساته لجسمي باوع لام علي وهيه لازمتني من معصم ايدي حيل ودار نظراته عليه

-ادكلي مخطوفه على بالها اساعدها

باوعتله واني مصدومه ودموعي الي تنزل واحاول اكذب الي كاله وانققذ نفسي من الي راح يصير بيه والقهر الي بداخلي يعني خلص راح اودع حياتي السابقه جان اخر مهرب اليه واخر شخص التجئ اله اخذتني ام علي سحل من يمه ونظراتي عليه توسلته بنظراتي الي جانت بلنسبه اليه اخر نظرات بلحياه وهوه رجع لمكانه وجان يباوعلي وبكل برود بهاي اللحظه حقدت عليه حقد ومستحيل راح انسى... الشخص الي دمر حياتي

..نزلت بلكاع وصحت بااعلا صوت عندي
ملاك: ماكو واحد بيكم عنده غيررره يساااعدني
..محد جاوب بس اني متاكده سمعوني
نظراتي جانت عليه بس هوه جنت اتوسله بنظراتي يساعدني بس هو مااتحرك فتح جكاره وحطها بحلكه
ونفخ دخانها بكل برود 

.. صاحت ام على على واحد من الحرس واني هنا حسيت نفسي انهاريت

ملاك: ولكم الغيرررره انشالت حسبي الله ونعم الوكيل عليكم ولكم حررام عليكم حرررام

..جانو يباوعلي بنظراتهم بس محد اجا وتقدم عليه وساعدني جنت ابجي واحس گلبي راح يوكف تقدم عليه واحد من الحرس وضربني براسي حيل حسيت بشي حار نزل على عيوني اجت عيني بلكاع وشفت الدم ينكط من راسي وعيوني غوشت رفعت نظراتي اله الوحيد الي ما حرك عيونه جان مثبتهن عليه حيل جنت اباوعله استكدي نظرات العطف منه بس نظره وحده مالكيت جانت عيونه اشبه بلفراغ

..اجا واحد عليه وشالني من شعري وشمرني بمخزن صغير متروس فساتين واجت بلقيس ورا تركض

-اخذها بساع اشمرها يم الحجي ماريد اشوفها جهرتها بعد

..هلمره ما توسلت ولا حجيت سكت وبس دموعي تنزل دموعي الي ملت مني !

لزمني من ايدي وسحل بيه جنت جسد بلا روح مااعرف اوصف احساسي بوقتها لان ما جنت احس بشي..

حطوني بلسياره ومشو بيه مسافه وكفو يم بيت مهجور سحلوني للداخل واني اصارع بااخر انفاسي طلع رجال جبير كرشه نازل وسنونه قطعه صفره وحجه

-شنو بضاعه جديده
..اي بلقيس دزتها هديه الك
-حلو بعدها بنيه مو
..اي تريد تبيعها تريد تاخذها الك مثل ما متعود حجينه

..ضحك وبانت اسنانه الصفر وكال
..لا هلمره يمي مانفوت هيج قطع واتشكرلي من بلقيس

..طلعوا وعافوني يمه رحت يم رجله اتوسل بي
ملاك:عمر حباب الله يخليك ساعدني والله خاطفيني الله يخليك ساعدني

.. لزم شعري وكال
-شمسوين بيج الجلاب تعاي عمو تعاي

..ضحك بصوت مقزز كمت على حيلي ورجعت خطوات للباب ادك بي بس ماكو احد!!...

..اجا عليه يركض وجرني من شعري اتاذيت حيل وغوشت عيني ووكعت بلكاع ما حسيت بعد

................

-قهرتني حيل
اشتر:مابقى شي نصرت قربت نهايته
-اول مره اتقرب وحده عليك
..سكت ما جاوبه وكاع على حيله اخذ وحده من البنات ودخلها بوحده من الغرف وسد الباب....

طلع بعد كم ساعه ولكه بلقيس

-سيادتك نعتذر على الي صار بس اتمنى كدرنه نعوضك
..عافها وطلع لكه جماعته ينتظروا برا
-بشر
اشتر:خلصت

-لكيت العنوان
..هز براسه بمعنى اي
-واخيييرا راح نخلص ونرجع يايمه لعبت نفسي من الحياه
-صدك شباب اتصل عليه شرار وكال ينتظرنه بلمقر
اشتر:شعنده جاي
-يريدك بشغله
..سكت لحد ما وصلو وهو ما غاب منظرها عن شكله شلون لو بنته عاشت نفس الموقف راح يسكت؟؟

..وصلو للمقر ولكو شرار ينتظرهم

شرار:هلا لك كو.. وين اتصل عليك وماكو
اشتر: لك حيوان تدري بيه من عندي مهمه اغلق مبايلي
شرار: وين وصلت
اشتر: انطيت خبر للفرقه ودزيتلهم المعلومات كامله باجر نبدي مداهمه
شرار:خرب يومك مثل ماعرفتك ما تطلع منها اله وانت محصل الراس الجبير
..ابتسم لكلامه
شرار: اشتر عندي وياك شغله
اشتر:شنو
شرار: تعال نطلع برا نحجي

..طلعو برا
شرار: بنت عم الضبع مخطوفه
اشتر: اي؟
شرار: الضبع دزني احاجيك واسلمك مهمتها هيه اصلا يم نصرت وبلقيس
اشتر: معلومات ثانيه

..اتجهه للسياره وهو يطلعله فايلها ورجع قدمه اله اخذه باايده وهو يشوفه فتح عيونه من صدمته وصاح بصوت رعد الجو بحيث الي كاعدين جوه سمعو وطلعو على صوته

شرار : ها احجي شايفها؟

..لزم شرار من ياخه قميصه وصاح
اشتر: ولك شراااار بيدي سلمتهاااا الهم
.........................

كعدت على ايد تتلمس بجسمي فتحت عيني بعدتها
ملاك :الله عليك عوفني الله عليك

..تقدم عليه وصار فوك جسمي وقيدني باايديه حاولت ابعده عني ماكدر ذاب نفسه عليه اتلمس بجسمي بقذاره

..مافاد بجي ولا فاد صياح وتقرب عليه بكل حقاره وهو يضرب بيه ويخلي بصمات حقارته شكك ملابسي عليه وتقرب صوتي راح من الصياح مكاعد يطلع مني صوت

ضربني على راسي وهو يكول
-لج كح..اثبتي
..ضربني راجدي ولزم وجهي يثبتي

..ثواني قليله بس ثواني

ثواني وسلب روحي

صوتي رجفاتي دعائي مافادت !!

ثبتت عيني على السكف وهو يلهث فوكي مثل الكلب
نزلت دمعه بطرف عيني
..حجيت بهمس
ملاك:حسبي الله

..دفر الباب ورفع مسدسه طلقه وحده وطشر مخه وكع عليها اتقرب وهو خايف يلكاها ميته!!

اتقرب عليها وهيه عاريه تماما مثبته عينها على السكف وجها متروس دم والسرير راح وهو يجر الغطوه ويلفها حط ايده على گلبها يسمع نبضات گلبها
قربها بحظنه وهو يشيلها

..غمضت عيني ونزلت دمعه بطرفها
فتحتها على صوت دفره الباب رفعت راسي باوعت نفسه!! طلقه وحده زرفت اذني ماحسيت بس الدم مله وجهي والسرير رجعت راسي على السرير وثبتت عيني على السكف مااحس بروحي!!

ماكدر ارفع راسي احس نفسي متبنجه بس دموعي تنزل تقرب عليه وهو يوخر الحجي من عليه رفسه برجله وذاك وكع من السرير شال الغطوه وشمرها عليه
تقرب عليه وخر شويه من الغطوه وخلا ايده على گلبي

..غمضت عيني وانهاريت من البجي هوه من شافني هيج كال
..اششش لا تبجين خلصت خلصت
رفعت نفسي وكمت على حيلي اغطي بنفسي
..رفع راسه مصدوم

جان المسدس على خصره تقربت عليه وجريته قوي خليته على راسي وغمضت عيوني وسمعته كال
..لا تسويها
..باوتله وكلت
ملاك:دمرتني عساك تشوفها بااعز الناس عندك
وضغطت الزناد......
_______________________________
لهنا وصلنه لنهايه البارت 💗
بنات حبيباتي اعذروني اليوم مااكدر انزل بارت ثاني وهذا البارت ال١١لبارحه مانزل زودت عليه ونشرته علمود يصير مثل ما تحبون 🥺💕💕