رواية سليله الانتقام الفصل الرابع وثلاثون 34 - بقلم taratel

ملاحظه: سوو اعاده للبارت السابق علمود تستذكرون الاحداث🚫
...........

.. دخل وبكل ثقه ابيناتهم دخل وويا شيوخهم وعمامه
الكل رفعو روسهم عليه مستغربين ليش اجا؟

.. الا واحد بيهم ابتسم بمكر وهو مثبت عينه عليه وهذا الي جان ينتظره كام على حيله واتقرب عليه وكال

ضبع: شتسوي

.. طلقتين سريعات قريب رجله رجع بخطواته للخلف وكلها تجمعت عليه وبدت الاصوات تعلا

اشتر: ضبع لا تجبرني اخطو خطوه مااريد اسويها

.. انفتح الباب واجت عينه عليها عيونها الحزينه الخايفه وشكلها المتعوب ما جان يتمنى يشوفها بهاي الحاله وهيه ملاكه!! صاح بصوت رجج المكان ونار الغيره بعيونه

اشتر: اررجعي

.. رجعت وهيه خايفه وانسد الباب حول نظره للشيخ وكعدوا الطرفين يتفاهمون بعد صراعات استمرت لساعات

- شلون البت مرتك وهيه مطلكه محكمه

اشتر: ما مطلكها شيخ بس محكمه

.. بدت اصواتهم تعلا وانظار الاستفهام على ضبع وهو يكول

ضبع: خوش لعد ما دام الشيخ موجود تطلكها شيخ هسه

.. ابتسم با استهزاء وكال

اشتر: ما اطلك

.. كام على حيله وهو يتقرب عليه ضربه بوكسي على خشمه والدم يطافر وكع على الارض ونزل عليه يضرب بيه والاشتر مستسلم بعدو عنه بصعوبه وبدت ناس تهدد بناس واخر قرار جان

- يابه الرجال يريد مرته وحرام عليك هيج تسوي لاتصير ظالم

.. حجه بصوت وهو راص على اسنانه وعيونه تحولن دم

ضبع: والبنيه ما تريده

- ما يصير هيج خليهم يكعدون سوه ويتفاهمون اذا ما تريده نطلكهم

.. ثبتت نظره عليه بغضب وسمع صوت

- انتو تضحكون علينه البت متزوجه وجاين نخطبها

.. بقو يتراددون بلكلام الى ان اخذوا ناسهم وبدوا يطلعون وبقت الساحه بس اله رفع نظره على الضبع وهو  يتقرب ويمسح با الدم وكال

اشتر: بس مره وحده اشوفها وافهمها بس مره ضبع

ضبع: الكف الباب اشتر ولا تراويني وجهك بعد

.. اتقرب عليه وهو يتمسك با اكتافه كال

اشتر: ضبع لا تحرمني شوفتها صح اني واحد خسيس ونذل وما استاهل اظفرها بس بروح صداقتنا وعشرتنا لا تاخذها مني ولا تحرمني منها

ضبع: طبك مرض ما كتلك تعوفها وتروح بليله عرسها لك ادمرت من وراك ادمرت ما بقى بيها شي كل ما اباوعلها واكرهه نفسي لان قبلت بيك وكلت صاحبي واعرفه بس طلعت واحد جلب

.. بعد ايده وهو منزل راسه وكال

اشتر: بس مره وحده ضبع

.. ابتسم ورجع كال بصوت

ضبع: بشرط

اشتر: شنو

ضبع: اطلع برا وكاعد ادكلي شنو الشرط انت لو فعلا اتريدها ما تسئل شنو راسا ادكول صاير

.. نزل راسه وهو يبتسم يعرف هذا عقاب الضبع

اشتر: يابويه صايرين بس غير نعرف شنو

.. صاح بصوت

ضبع: اطلع اشتر اطلع لا تخليني ارجع عليك مره ثانيه

اشتر: ايد سم خشمي لحد الان يطفر دم

.. من بين كلامهم الغير مفهوم من بين ابتساماتهم الماكره محد يتوقع هم اعداء لو اصدقاء؟؟

..كال بصوت وهو يتجهه للباب

ضبع: صيحيلي ملاك

.....................

.. رجف گلبي واني اسمع صوته رفعت عيني على الِـن خايفه ابتعدت عن الباب واني رجلي ترجف نزلن دموعي واحس غصه بداخلي ليش اجا ليش يريد يخرب عليه فرحي مرتين

.. اتقربن البنات للباب يشوفون شكو ثواني بس وفزينه على اصوات طلق حطيت ايدي على گلبي خايفه معقوله ضبع كتل اشتر  بدت اصوات تعلى تقربت للباب اشوف فتحن النسوان الباب وصار كدامي اجت عيني عليه اول مره اشوفه بعد سنين نزلت دموعي وغمضت حيل ما اريد اشوفه ما اريد اضعف نزيت على صوته وهو يصيح

اشتر: اررجعي

.. سحبتني الـِن من ايدي ودخلتني وسدت الباب وكالت

الـِن: ولج غبيه شعندج داخله عليهم

.. باوعتلها واني احس جسمي مااكدر اشيله ماعندي طاقه ورجليه يرجفن حجيت بصوت ارجف

ملاك: الـِن عينيني مااكدر بعد

... اتقربت عليه هيه وريم ولزمني من ايدي وهنه يكعدني بدت النسوان تستفسر وناس تطلع وناس تدخل لحد ما سمعت وحده صاحت

- عيني البنيه ما مطلقه

.. فتحت عيني بصدمه واطرافي يرتعشن وغصه بداخلي اتوجهت عليهن الـِن وهيه تتعارك رفعت عيني على ريم الي جانت لازمه باايدي وحجيت بصعوبه

ملاك: ريم عفيه دخليني للغرفه بعد ما اكدر اتحمل

..اخذت ايدي وهيه تدخلني للغرفه وعينها عليها بس غلقت الباب وكعت على الارض منهاره ضغطت على شفتي ما اريد صوت شهكاتي يبين غصه بداخلي وحركه بجيت قوي واني اضرب على نفسي وزلغت صدري بدا الدم ينزل واني ما حاسه اتقربت عليه ريم وهيه تحاول تهدئني رفعت عيني عليها وحجيت تحت بكائي

ملاك: ولج ريم راجع بعد سنين ويكول مرتي؟؟

.. نزلن دموعي بشهكه واني اضرب بقبضه ايدي على صدري

.. اندارينه على فتحت الباب ودخلت الـِن وعينها علينه اتقربت وهيه تشوف حالتي صاحت بصوت

الـِن: ياغبيه باع المكياج ساح هسه شلون يشوفج اشتوري

باوعتلها بنظرات استغراب وتقربت عليه وهيه تمسح ادموعي وتمسح المكياج با الكلنسه واني اترقبها تكمل كلامها كالت

الـِن: الضبع يكول خل تجي للصاله يريدج

.. حجيت بضعف

ملاك: شيريد

الـِن: يطلكج من اشتر شيخ

.. مسحت دموعي واني اكوم على حيلي حجيت اتصنع القوه عكس داخلي

ملاك: يله

.. اخذتني وكفت امام الباب ودكته اول ما فتح الباب طلعلي ضبع وكال

ضبع: وداعت كل دمعه نزلت منج على هذا الجلب اله ارجعها الج اضعاف

.. رفعت عيني عليه خايفه ماعرفت افسر نظراتي اخذ ايدي وهو يضغط عليها استندت عليه وكانما استقوي با الضبع مسحت دموعي ودخلنه للصاله منزله عيني ما اريد اشوفه

.. كعدت قريب الضبع واني منزله راسي ما اريد المحه سمعت صوت رجال جبير يحجي وكال

- بنيتي احنه جاينج بطلب

.. رفعت راسي عليه وجان ابو الاشتر لابس زي عسكري وكعدته المهيبه والرتب مزينه اكتافه يشبهه اشتر حيل غمضت عيني على البطيئ وحجيت بتعب

ملاك: كول عمو

- ادري با ابني غلط وغلطته ما تنغفر وبعد كل هاي السنين رجع ويريدج ومايريد غيرج لان انتِ بت اصول وناس ومستحيل يلكه نفسج والانسان مو معصوم ويخطأ

..  جنت منزله راسي ما اريد المح عيونه سمعت الضبع وهو يكول

ضبع: عمي بس غلطته هاي ما تنغفر

.. اجاني صوت ثاني رفعت عيني عليه وجان شيخ كاعد ويمه ثنين ولد يمكن ولد عم الاشتر حجه بصوت وهو يوجه كلامه لضبع

- يا ابني لا تكون حاجز بيناتهم وابغض الحلال عند الله الطلاق ليش ترتكب اثم بتفريق زوجين

.. استدار عليه وهو يكول بصوت

ضبع: احجي تريدينه لو لا

.. نزلن دموعي واحس صوتي مايطلع هزيت راسي خايفه واني باعده عيني عنه سمعت ضبع يكول

ضبع: هاهيه عرفت جوابها هسه طلك

.. سمعت صوته وهو يحجي رفعت عيني عليه وهاي المره الثانيه الاشوف بيها الاشتر عينه مثبتها عليه قطعه حمره وخشمه ينزف دم حجه بصوت وهو يكول

اشتر: خلوني احجي وياها على انفراد

.. ابتسم الضبع وكال

ضبع: الي تريده تحجي كدامنه ميعجبك ذاك الباب

.. ماكدرت ابعد عيني عنه مشتاقه لتفاصيله وملامحه كعدته ضحكته عيونه كولشي با اشتر مشتاقتله بس هسه هو انسان ثاني مو الانسان الحبيته !! هسه الانسان الميت الي شفته با اول مره

.. سمعت صوته وهو يكول

اشتر: ادري السويته خطأ وداعت عشگي الج كاعد ادفع ثمنه غالي وهو بعدج عني لا اني الي كادر اكمل حياتي بدونج ولا اني الكادر ارجعج اليه عايش معلعل

.. حجيت بصوت ضعيف واني منزله راسي

ملاك: وين جنت كل هاي السنين ليش هسه من ردت اكمل حياتي طلعتلي وتريد ترجع تدمرني

.. رفع عينه على الضبع وخزره

ضبع: شبيك تباوعلي شعليه اني صحيح كلامها وين جنت كل هاي السنين

.. حجه بنبره توسل وهو يحجي ومنتظر جوابها وعينه عليها

اشتر: ارجعيلي

..اندار عليه ضبع وكال

ضبع: تردينه

.. ثبتت عيني عليه كانما اتحدى مو اني الي انذل مو اني الي انحط بهيج موقف حجيت بصوت

ملاك: ما اريده

.. حجيت كلمتي وكام على حيله وهو حاط السلاح على راسه كمت خايفه وكلها تقربت عليه وصاح بصووت عالي

اشتر: احجي عيديها كولي ما اريده طلقه وحده والله انتي تحجين منا واني جثتي تطلع منا

.. فتحتت عيني بصدمه واطرافي ارتعشن واني دموعي تنزل خايفه تقربت عليه واني اجره من عنده قوي بس ماكدرت حجيت بصوت ضعيف

ملاك: ضبع حباب اخذه من عنده

.. تقرب عليه ضبع ما كدروله والتمو عليه ولد عمه وابو ارتديت للخلف خايفه حطيت ايدي على شفتي اخفي شهكاتي عيني مثبتتها عليه

.. صاح بصوت وهو عينه عليه

اشتر: يله احجي انطقي كولي ما اريدك

.. هزيت براسي نافيه كلامه خايفه حجيت بصوت متوسله

ملاك: اشتر عوف السلاح الله يخليك

ضبع: بطل سوالف المزعطه وتطلكها

اشتر: والله اكتل روحي وما اطلكها

.. رجع صاح بصوت مرعب

اشتر: احجيي

.. بلعت ريكي وحجيت واني ايدي ترجف وااشر مااحس الكلمه تطلع من عندي هزيت راسي وحجيت بصعوبه

ملاك: ارجع والله ارجع بس اترك السلاح

.. باوعلي بنظرات مستحيل راح انساها نظرات عينه الي رجعت للحياه بعد ما كانت معدومه غمض عينه قوي اتقرب عليه ضبع وهو ياخذ السلاح من عنده ويشمره

.. تقربوا عليه ولد عمه وابو يحجون ويا واني ضبع اشرلي اطلع طلعت سريع واني گلبي يدك قوي اول ما فتحت الباب لكيت ريم والـِن كاعدات يتسمعن جرني من ايدي ودخلني للغرفه يحجن

الـِن: احجي شصار

.. هزيت راسي ماعندي قابليه للكلام

ملاك: راح ارجعله

ريم: ليش ملاك ليش ترجعين للاشتر مو كافي عليج دمرج

ملاك: وبعد راح يدمرني

.. كعدن يستفسرن ويسئلن شويه ودخل الضبع وكال وهو باعد عينه عني

ضبع: لمي ملابسج راح ترحين وياهم

.. كمت على حيلي اتقرب عليه

ملاك: شنو ضبع شتحجي انت شنو اروح وياهم

.. اندار عليه وهو يثبت عينه وكال

ضبع: مو اختاريتي يله روحي ويا

.. تركني وطلع انداريت على الـِن الي طلعت خلفه اتقربت عليه ريم وهيه تحضني بقيت ابجي بحضنها حجيت بصوت حزين

ملاك: ريم ليش ماعندي حظ

.. مسدت على شعري وكالت

ريم: تخلص صدكي

.. رفعت عيني عليها وحجيت

ملاك: ما اريد اروح ويا كارهته

.. مسحت دموعي وطبعت بوسه خفيفه على راسي وكالت

ريم: روحي ويا ملاك احسلج خلص بعد استسلمي لواقعج واشتر قسمتج شوفيها شكد دارت بيج الدنيا واخر شي رجعتيله

.. بقيت حاضنتها واني ابجي لحد ما دخلت الـِن وكالت

الـِن: يله ترا منتظريج

.. هزيت براسي وطلعت لكيت الـِن محضرتلي الجنطه رفعت راسي عليها وحجيت

ملاك: حبابه الـِن حاجي الضبع ماريد اروح

.. لزمت ايدي وهيه تفتح باب الصاله جانو كاعدين بيها بس شافني كام على حيله وعيونه تترقبني نزلت راسي وهيه دفعتني اتقرب عليه وهو ياخذ الجنطه من ايد الـِن ومشيت كدامه قبل لا نطلع سمعت ابو وهو يكول لضبع

- بعيني اخليها

.. طلعت وجانو هواي ناس برا واكفين عرفتهم ولد عمامه واقاربهم جانو اكثرهم لابسين دشاديش وشكلهم مايدل منا صعدت بسياره اشتر وابن عمه با الصدر وهو يسوق

.. الطريق كله واني ابجي بدون صوت خايفه يسمعني شويه ووكف السياره وصاح

اشتر: عثمان انزل

عثمان: عمي ما يقبل

.. صاح بصوت وهو يكول

اشتر: انزل كلت

.. نزل واندار عليه وكال

اشتر: صعدي با الصدر

.. مسحت دموعي وحجيت بدون لا اباوعله

ملاك: ما اريد

.. قرب ايده وهو يمررها على خدي يمسح دموعي اخذتها قوي ودفعتها عني وحجيت

ملاك: ايدك اذا مديتها عليه اكسرها الك لا تتقرب

ابتسم وهو يكول

اشتر: نوصل ونتفاهم

.. كاعده واحس روحي تاذيني وبس دموعي ينزلن رفعت عيني واني اشوفه يدخل لبيت جبير واول ما دخلنه بلكراج جانت هواي سيارات وناس

..اندار عليه وكال

اشتر: انزلي

.. بدون لا ارفع راسي عليه نزلت واخذ ايدي وهو يضغط عليها رفعت عيني عليه حجيت واني راصه على اسناني بغضب

ملاك: كتلك ايدك اكسرها لاتمدها عليه

.. ما جاوبني ومشى حاولت ابعد ايده عني ماكدرت دخلني للبيت اول ما دخلت جانن نسوان كاعدات وامه من ضمنهم ورفل بس شافتني تقربت عليه وهيه تحضني وكالت

رفل : مشتاقتلج

.. نزلت عيني بضعف وانداريت على الاشتر حجيت

ملاك: اريد احجي وياك

.. هز براسه وكال

اشتر: شويه واجي

.. تركني وطلع دخلت سلمت على النسوان الجانن موجودات عرفتهن ذني عماته وبناتهن بقيت كاعده يمهم لحد ما تقربت رفل عليه وكالت

رفل: اشتر يريدج با الغرفه

.. باوعتلها بااستغراب وحجيت

ملاك: وين

.. اخذت ايدي واشرتلي على وحده من الغرف اول ما دخلتها عرفتها للاشتر من ريحه المعقم جانت فارغه ماكو احد كعدت على السرير واني خايفه رفعت عيني من حسيت عليه دخل وتقرب عليه حيل وه يحضني دفعته عني قوي وارتد للخلف وكال

اشتر: ملاك سامحيني

.. ضيقت عيني واني احجي بصوت

ملاك: لو يبقى اخررر يوم بعمري ما راح اسامحك وين جنت هاي السنين كلها وين ؟؟

.. اخذ اصابعه وهو يضغط على عينه رجع رفع نظره عليه وثبتهن وكال

اشتر: يومين بس يومين اخذت من عندي سنين

.. هزيت راسي مستغربه وحجيت

ملاك: شنو

.. تقرب عليه وهو يكول

اشتر: علاقتج بسيف

.. حجيت بصوت خايفه واني مثبته عيني عليه

ملاك: شنو

اشتر: جانت عندج علاقه قبل

.. فتحت عيني بصدمه خايفه حجيت واني صوتي يرجف وارجع بخطواتي كال

اشتر: بيوم العرس
......................

.. ملتمين عليه واحنه فرحانين ونضحك عليه لبس قاطه جان لون اسود وقميص ابيض والفرحه ما لامته واخيرا راح يحصلها حب سنين !!

.. اخذ مبايله وهو يشوف رفع عينه على شرار وكال

اشتر: شرار

.. ضغط على المبايل حيل واتقرب من يمه شرار يشوف بعد المبايل عنه وغلقه

.. رفع عينه عليه وهو قلق شكله اتغير وطلع للخارج طلعت ورا واني اشوفه صعد بسيارته وانطلق بيها

.. رفع مبايله وهو يتصل

اشتر: مصعب حددلي عنوان هاي الرساله وموقعها ولمنو

.. غلقه وهو يشمر الجهاز على الكشن وكف السياره وهو يضغط بريك قوي نزل راسه على الستيرن وهو يذكر عيونها شعرها وملامحها الهادئه واول موقف جمعهم سوه

....................
...flash back

.. كاعد بلسياره وهو لابس الزي العسكري اخذ مبايله يتصل

اشتر: ضبع لا تصير ..... انزل منتظرك صارلي ساعه با الكراج

ضبع: خل اادب اسمااء واجي

.. اتأفف بملل وهو يغلق الاتصال ويشمره

.. اجت عينه على المرايا وشي غريب خلف السياره نزل يشوف وجانت بنيه ما مبين منها شي وهيه منداره وكاعده ولامه نفسها خاتله خلف السياره وشعرها نازل على الارض

.. ضيق عيونه بتعجب وهو يتقرب عليها صاح بصوت

اشتر: ليش كاعده هنا

.. اندارت عليه بخوف وحجت بتلكؤ تخفي نفسها

- عفيه وخر لا يشوفوني

.. ثبت عينه عليها وكال بهمس

اشتر: هاي ملاك لو بشر؟

.. ضيقت عينها با استفهام ما فهمت كلامه ورجع كال

اشتر: منين خايفه

-الله يخليك وخر راح يندلون مكاني

.. اتقرب عليها وهو يصير بمستواها كال

اشتر: منو انتي؟

.. حجت بهمس خايفه وعينها متروسه قلق وخوف

- ملاك

ابتسم وهو يكول

اشتر: فعلا ملاك

.. دفعته عنها قوي وكامت على حيلها مسرعه للقصر اندار وهو يشوفها تبتعد عنه وهيه تمشي وتستدار وشعرها نازل بقت عينه عليها لحد ما اختفت من امامه

..................

.....flash back
.. رفع راسه من سمع صوت المبايل يتصل اخذه وهو يجاوب

.. هز براسه وهو يستمع للطرف المقابل صاح بصوت

اشتر: مصعب دزلي دوريه وكتاب القاء قبض با اسمه

مصعب: لك مطي اني بعرسك كاعد ومخبوصين دتعال ارجع وعوف هاي السوالف

.. صاح بصوت وهو يضرب بقبضه ايده على الستيرن بشكل سريع

اشتر: كتلك دزلي دوريه وكتاب القاء قبض بساع

.. غلق الاتصال وهو منتظر على نار حرك السياره سريع متجهه لوجهته

.. نزل وهو ياخذ سلاحه من السياره وكف كدام البيت وهو يدك الباب طلعله ولد شاب اول ما شافه دخل هجم عليه وهو يضربه بنهايه السلاح على راسه وكع على الارض واتقرب عليه وهو يضربه قوي ويشوهه ملامح وجهه كانما يطلع حرقه هاي السنين الي راح يعيشها بدونها وهو السبب

.. جره من تيشرته وهو يكلبج ايدي طلعوا اهله والناس التمو عليه يردون يعرفون الصار طلعهم هويته وهو ياخذه يصعده با السياره

.. شمره ورجع صعد يسوق ابتسم وكال

اشتر: نتونس اليوم

.. حجه بخوف وهو يتوسل بي

سيف: س.. سيدي شمسوي غ.. غير اعرف تهمتي ليش ماخذيني

.. صاح بصوت رجج السياره

اشتر: صوت واحد افرغ الشاجور براسك

.. بقى ساكت وهو خايف

.. نزل كدام مخزن قديم فتح السياره وهو يجره قوي وينزله جانو ٣ حرس واكفين بس شافو الاشتر تقربوا عليه وهمه ياخذونه للمخزن

.. دخل وراهم وهو عينه عليه وگلبه مشتعل نار هسه شصار بيها ؟؟

.. اخذ سيخ حار وهو يقربه عليه وكال

اشتر: الصور منو مسويهن

.. حجه بصوته الخايف

سيف: يا صور سيدي ما اعرف ياصور تحجي عليهن

.. قربه عليه وهو يخلي على ركبته ينزع جلده جسمه صااح بصوت متكرر ومتألم وهو يبجي 

سيف: والله بت عمهاا بت عمها هيه انطتني فلوس اسوي الصور

.. اخذ الكرسي وهو يكعد مقابيله صاح على الحرس الي يمه وكال

اشتر: عندك جكاره

.. هز براسه وهو يقدمله باكيت وجداحه
.. اخذ وحده وهو يورثها وهو ياشر للي يمه وكال

اشتر: نزعوا ملابسه

.. باوعلهم بخوف وهمه يتقربون عليه ابتعد احد الحرس مشمئز وكال

- مسويها على روحه الجبان

.. بدوو يضحكون عليه وهمه يخلعون ملابسه ويبتعدون تاركي للاشتر

.. شمر الجكاره الثانيه وهو ينفخ دخانها

.. كام على حيله وهو ينزع سترته ويصرفن ردانات القميص طك بركبته بشكل مرعب واتقرب عليه

.. اخذ ايده وكال

اشتر: انت سويت الصور مو بهاي ايدك؟

.. هز براسه نافي خايف يحاول يتحرك مايكدر وهمه مقيدينه

.. ابتسم بشر وبحركه سريعه طك اصبعه صاح من الالم وهو خايف يتوسله يبعد عنه وهو يبجي

.. ضحك وكال

اشتر: تريد تشوهه سمعه مره الاشتر ما تعرف ويامن تلعب اذن

.. ابتسم وهو يطك اصبعه الثاني

.. اندار وهو ياخذ اداه حاده ويقربها على عينه وكال

اشتر: عيونك الي سوت صور وصخه ما تحتاجهن مو!

.. هز براسه وهو يبجي خايف غمض عينه قوي وهو يتوسله شخط عينه قوي وبدت تطفر دم

.. شمر الاداه وهو ياخذ بطل صغير فتح القبق وهو يكعد مقابيله كال

اشتر: تدري هذا شنو

.. ما جان اكو جواب خايف حيل وهو يبجي ويستنجد

.. صاح عليه بصوت قوي

اشتر: وللك صييير زلمه شنوو كاعد تبجي مثل النسوان

.. ابتسم وهو يرجع يكول

اشتر: كم وحده مبتزها بهيج صور

.. ما جاوبه رجع تقدم عليه وهو ينزل قطرات من البطل على جسمه صرررخ قوي متألم محترق جسده متأذي بقى يزيد بصرخاته المستحيل احد يسمعهن لكون المكان بعيد حيل

.. رجع كال

اشتر: احجي

.. صاح بألم وهو يبجي

سيف: واللله ماااادري هواي ما اتذكر

.. رجع نزل قطرات على جسده العاري ورجع متألم ويصرخ

اشتر: من اكول كلمه ما تصير ثنين كتلك كم وحده يعني تنطيني عدد

.. صاح بصوت

سيف: والله مادري سيدي ما ادري هواي

.. اتأفف بضجر وهو يصب البطل على جسده و يكول

اشتر: مو كتلك ما اعيد كلامي

.. شمر البطل على جهه وهو يبتعد عنه بعد ما تركه وهو مشوهه

.. اشر على الحرس وكال

اشتر: عالجو ما اريد يموت بهاي السهوله

.. طلع خارج المخزن وهو يفتح مبايله عشر مكالمات فائته اتصل على اول رقم واجا صوته

شرار: ولك اشتر الكواد انت وين ضبع گلب الدنيا عليك

اشتر: شرار تعرف روان بت عم ملاك

شرار: لك مطي اني احجي وين وانت وين ارجع بساع

.. اخذ نفس وكال

اشتر: ما ارجع اذا ما اخذلها حقها

شرار: شتحجي انت لك اشتر الساق.. ال... اررررجع البنيه شلناها للمستشفى

.. ضيق عينه بحزن وهو ضاغط على المبايل وكال بصوت ضعيف

اشتر: شلونها

شرار: صار عدها انهيار عصبي

.. اخذ نفس وهو يكول

اشتر: اكمل شغلي واجي

.. غلق المبايل وهو رجع اتصل وكال

مصعب: ولك اشتر هذا واحد مهربجي مخدرات ومبتز درجه اولى اذا يمك بعده جيبه للمركز

اشتر: مو هسه مصعب رتبلي الاوضاع من يمك على ما اطلعلي من عنده كم حجيايه

مصعب: كم حجايه انت تخلي يطلع كم حجايه هوه هسه غير مزوعه العافيه درجعه لا يموت وخلي نشوف شغلنه

اشتر: رتبها من يمك ما ارجعه اليوم

.. غلق الاتصال وهو يدخل للمخزن واجت عينه عليه جان فاقد لحمه جسمه مبينه وباقي انحاء جسده متشوهه

.. اخذ كرسي وهو يكعد مقابيله وكال

اشتر: شلعولي اظافره

........................

الحاضر

.. فتحت عيني بصدمه واني اسمع كلامه حطيت ايدي على اذني واني ابجي بدون صوت مذهوله بكلامه يعني طلعت روان وسيف هم ورا الصور!!

.. اتقرب عليه وهو يتلمس اكتافي وكال

اشتر: ماردت احد يشوهه سمعتج وانتي الـي

.. بعدته عني قوي واني اضرب بقبضه ايدي على صدره واني منهاره حجيت بصوت عالي

ملاك: وانت ما شوهت سمعتي من عفتني بليله عرسي ماكلت هسه شيكولون ليش عافها ليش تركها بهذا اليوم شنو شبيها

.. بقيت اضرب على صدره واني متألمه وگلبي ياذيني رجعت حجيت

ملاك: دمرتني الله ينتقم منك ما كلت شنو ذنبها هيه هسه اكيد كاعده ولابسه البدله البيضا وتنتظرني ما كلللت

.. اتقرب عليه وهو يلمني لحضنه بقيت احاول ابعده عني ماكدرت ضربته قوي واني امسح دموعي وحجيت بصوت متشحرج

ملاك: الدنيا ما بقتلي شي حتى انت اخذتك مابقى شي ما صار بيه انذليت حيل

.. طبع بوسات على راسي وهو يكول

اشتر: ما عاش الي يذلج وخشمي يشم الهوا

.. رفعت عيني عليه واني امسح دموعي

ملاك: انت الي ذليتني اشتر كل شي صار بسببك انت

.. بقى لامني بحضنه دفعته عني قوي وحجيت بصوت

ملاك: اطلع برااا

.. ابتعد عني وهو عينه عليه طلع تاركني ضغطت حيل على راسي واني اتذكر الاحداث وكل شي عشته كانما اليوم لميت نفسي واني ابجي لحد ما حسيت عيني غوشت

.. فتحت عيني بطيئ واني احس بيه يغطيني بلغطوه رفعت عيني عليه وكال

اشتر: لامه نفسج بردانه

.. بعدت الغطوه وكمت على حيلي تاركه السرير اخذت مخده وشمرتها على الارض ونمت رفعت راسي عليه وحجيت بصوت مزعوجه

.. اتقرب عليه وهو ينام يمي ويلمني عليه قوي ويشم بشعري

.. انداريت عليه وحجيت مشمئزه

ملاك: تدري اني ما عندي نصيب با الحب

.. ابتسم با اريحيه وهو يتلمس خصله من شعرها  وكال

اشتر: ليش اني ويمج بعد شتردين

.. ابتسمت بمكر وحجيت واني مثبته عيني عليه

ملاك: ما اقصدك انت

.. ضيق عينه با استغراب وهو يكول

اشتر: منو؟

.. حجيت با ابتسامه عكس داخلي الي جان يغلي نار

ملاك: محمد حبيته وتعلقت بي ومثل كل مره لازم تجي انت وتخرب عليه حياتي

.. فتح عينه بصدمه وخزرني اتقرب عليه وهو يخنكني با ايده بعدت ايده عني قوي وارتد للخلف رص على اسنانه بغضب وكال

اشتر: لو جبتي اسمه على لسانج بعد اكصه

.. مسحت عيوني بقهر وحجيت

ملاك: احبه واموت عليه

.. ابتعد عني بغضب فزيت عليه وهو يكسر المرايه بقبضه ايده الي بدت تنزف دم رجعت للخلف خايفه واني اشوفه بهذا المنظر ما جان اشتر اتحول وحش ما جنت اسمع بس صياحه وصرخات رفل وامها يردن يفتحن الباب

- ولك اشتر شبييك افتح الباب

.. ما جان يستمعلهن حرفيا اشتر ما بقى شي با الغرفه صاحي واني لامه نفسي با الزاويه خايفه واطرافي يرتعشن ما جان ملاحظ وجودي لحد ما كعد على الارض وايديه عباره عن قطعه دم رفع عينه عليه بنظرات انكسار قرب ايده على راسه يخفي نظراته

.. رجلي ترجف واني اشوفه بهذا المنظر كمت على حيلي واني اتقرب للباب فتحته سريع واني اطلع من الغرفه خايفه منه لزمتني امه من ايدي وكالت

- ولج احجي شبي اشتر

.. ماكدرت اجاوبها جنت بس اشهك خايفه وجسمي يرجف

.. تركتني سريع وهيه تدخل للغرفه اتقربت عليه رفل وهيه تاخذني من ايدي للصاله وكالت

رفل: ملاك احجي اشتر شبي ما انشوفه هيج الا نادرا شصاير

.. هزيت راسي بخوف ما اعرف اجاوبها مسحت على راسي وهيه تلمني بحضنها وتحاول تهدئني شويه وطلع وهو يتقرب عليه بكل هدوء ولا كانما نفس الشخص الي جان با الداخل

.. رجف جسمي واني ارجع خلف رفل خايفه صاح عليها بصوت وكال

اشتر: طلعي رفل

.. رادت تكوم تمسكت بيها قوي خايفه ابقى يمه واتوجهت اطلع وياها لزمني من ايدي قوي يرجعني للصاله

.. ارتديت للخلف وعيني عليه حجه بكل هدوء وهو مثبت عينه عليه

اشتر: تردينه؟؟

.. حجيت بصوت خايفه واني امسح دموعي

ملاك: اي

.. ابتسم ورجع كال

اشتر: تردين اطلكج؟؟

.. رفعت عيني عليه بصدمه وهو يكول وراسه منزله ومبعد عينه عني

اشتر:حبيتج من اول مره شفتج بيها وخطبتج من الضبع ورفضتي ومن اجيت اريد اعرف السبب شفتج وي واحد ما يسوا اظفرج اتزوجت وحاولت انساج ونسيتج فعلا ومن اجتني بنيه سميتها ملاك على اسمج بلكت اشوفج بيها بس الواضح  انتي مو من نصيبي

.. فتحت عيني بصدمه وحجيت مستغربه

ملاك: شوكت؟

.. ابتسم بقهر وهو مدنك راسه وكال
اشتر: سنين وحبج محفور بگلبي ماكدرت اتخطى عيونج وكل ما اراقبج اكثر احبج لحد ما عشكتج

..سكت ورجع كال

اشتر: مو مشكله الي تردي يجرالج حضري نفسج يخلص الليل وارجعج للضبع ونطلك شيخ

.................

..كاعده افتر با الغرفه طلعت ملاك وبالي يمها شوي ودخلت ريم وكالت

ريم: اني راح اروح وهذا الضبع يريدج

.. اتقربت عليه خايفه

الـِن: شيريد

ريم: واني شمدريني روحي شوفي

.. هزيت براسي قلقه

الـِن: يبو شافني با الفستان هسه شيخصلني

.. ضحكت وهيه ادكول

ريم: يعني شنو نكول على الخير المولود الثاني

.. هزيت باايدي مستهزءه وحجيت

الـِن: باع هاي ما تدري يريد يعلسني

.. ضحكت بصوت وكالت

ريم: ديله لعد اني اني اروح هذا شرار واكف برا وروحيله لا تتاخرين عليه

.. غمزتلي واخذت جهالها وطلعت بقيت محتاره وهزيت ايدي واني احجي بصوت

الـِن : ياربي هسه اني بيمن احتار بملاك بضبع

.. طلعت خايفه واتوجهت للصاله اول ما دخلت جان كاعد والجكاره بحلكه وشكله وكعدته المرعبه خطيت خطواتي واني خايفه توجهت وصرت كدامه واني شابكه ايدي بقلق حجيت بصوت واني منزله راسي

الـِن: ها ضبع

.. نفخ دخان الجكاره وكال بصوت

ضبع: اني شحجيت

.. رفعت راسي عليه وضحكت بعفويه

الـِن: كلت البسي فستان محتشم

.. خزرني وكال

ضبع: وشلابسه؟

.. ابتسمت بخوف وحجيت

الِـن: فستان محتشم مثل ما كلت

.. صاح بصوت فززني

ضبع: الـِن

.. نزلت دمعه جانت بطرف عيني مسحتها خايفه ورفعت عيني عليه

الـِن: ضبع لا تنجلب عليه هو فستان قابل شلابسه وثانيا بس نسوان عوف عياره الزلم بطلها

.. ماجانت اكو رده فعل ملامحه بارده حيل رجع ورث الجكاره

.. اتقربت عليه واني اكعد بحظنه وحسيت نفسي ضعت من كد ما ضخم اخذت ايديه واني احاوطهن عليه ورفعت راسي عليه واني اتلمس فكه وطبعت بوسه خفيفه عليه حول نظره عليه وهو يشدني قوي عليه اتقرب عليه وهو يبعد شعري ويتقرب على ركبتي ويهمس با اذني

ضبع: الي اكوله يتنفذ

.. نزلت عيني خايفه وحسيت على ايده وهو يصعدها لفتحه الفستان من جهه الصدر واصابعه تتلمس بصدري

.. رجف جسمي وهو يكول

ضبع: ارتاحيتي هسه من شافو جسمج هاا؟ فرحتي من شافنج وصورنج وتصيرين سالفتهن ويحجن بيج كدام رجولتهن

.. حجيت بخوف

الـِن: ضبع ايدك كاعد تاذيني شبيك

.. نزلن دموعي حاولت ابعد نفسي ما كدرت

.. اخذ نفس من الجكاره ورجع وهو مقربها على صدري فتحت عيني بخوف وتحركت سريع خايفه

الـِن: لا ضبع لا حباب لا تسويها والله تاذيني

.. ماجان يسمع لكلامي قربها عليه وهو يطفيها بجسمي صرخت متألمه واني ابجي ابتعدت عنه بقوه واني اصرخ من الالم احس روحي شاطت نزلن دموعي واني حاطه ايدي على صدري متألمه تركته متوجهه للغرفه وقفلت الباب بقيت افتر واني روحي تلوب اريد شي يسكن الالم احس نار ومشتعله بيه مسحت دموعي وطلعت للمطبخ اخلي عليها معجون صارت عيني عليه وهو صافن با الفرا وشابك ايديه حجيت بصوت

الـِن: تبقى جلب وما تصيرلك جاره

.. رفع عينه عليه خازرني خفت واني متوجهه للغرفه ماعرف شكد مر الوقت وجود ما رجع جان طالع وي ادم بدلت وفتحت شعري ونمت

.. حسيت عليه وهو يطبع بوسات خفيفه على اكتافي العاريه فتحت عيني وتحركت مبتعده عنه وحجيت بصوت واني مثبته عيني على الفراغ

الـِن: لا تتقرب عليه

.. قربني عليه وهو يلمني بحضنه ضربته قوي ما ابتعد كرصته ابطنه وحجيت

الـِن: وخر عني اني باجر راجعه وابقى ابحدك مثل الجلب

.. همس با اذني وهو يكول

ضبع: ماكو رجعه بعد

.. غمضت عيني با اسى واني قرفانه من الوضع حسيت عليه بدا يتقرب بعدته عني قوي وطلعت من الغرفه وبقت عينه عليه انداريت وحجيت

الـِن: اذا اجيت ورايه رجليك اكسرهن

.. ضحك وانداريت ابتعد عنه فتحت وحده من الغرف وجانت فارغه فرشتها وطلعت للصاله شفت ادم وجود دخلوا

.. اتقرب عليه وهو يحضني حجيت

الـِن: وين جنت

.. حضني قوي وهو يكول

جود: ماما مشتاقلج

.. ابتسمت وحجيت

الـِن: واني هم حبيبي

.. ابتعد عني وهو يكول

الـِن: اول مره ما اشوفج هلكد

.. طلعلي اصابعه الناعمه وهو يحسبلي الساعات ضحكت عليه وحسينه على ضبع وهو يدخل تقرب لجود وشاله وهو يسئله تقربت عليهم وصحت

الـِن: تعال جود ابدلك واغسلك شحالك مدري وين غاطك ادم بيا طينه

ادم: هاي فوكاها مو كتيلي طلعه ونسه

ضبع: ولك وين ماخذه شعره كله تراب

.. ضحك ورجع كال

ادم: يلعب با الطين

.. حجيت بصوت واني مضيقه عيني

الـِن: وماكو لعب بس با الطين صدك تحجي ادم

ادم: اللعب با الطين اله هواي فوائد للاطفال ومنها يعزز حالتهم النفسيه والذهنيه

ضبع: اتفلسف الدكتور

.. كال كلماته وهو يندار عليه وحجه بعناد

ضبع: كومي اخذي الطفل غسليله

.. ابتسمت بعناد وحجيت

الـِن: وما ادكوم انت اشفنه من عندك عاد مارس شويه دور الاب

.. ضحكت على شكله وهو ياخذ جود يغسله بقيت اني وادم وحجيت بهمس

الِن: ادم اريد ارجع ما اريد ابقى هنا

ادم: ليش

الـِن: شنو ليش نسيت دوامي هناك

ادم: اخذتلج شهر اجازه
الـِن: وبعدين وخلص الشهر شلون
ادم: نشتغلج على النقل

.. هزيت راسي اجاري بكلامه من حسيته قافل على رجعتي تركته واتوجهت للغرفه لكيت ضبع نايم وجود نايم على ايدين الضبع وهو مغسله ومبدله

.. ابتسمت على منظرهم وحجيت بداخلي

الـِن: شكد يتشابهون

.. انداريت على الجهه الثانيه واني اتمدد على السرير جريت ايد ضبع الي فتح عينه وهو مثبتهن عليه وحجيت

الـِن: اريد انام

.. ضيق عينه وكال

ضبع: ما كو مخده

.. ابتسمت واني انام على ايده غمضت عيني بهدوء وفتحتها واني اسمع صوته  بهمس وهو يكول

ضبع: عرمه

.. بقيت مثبته عيني عليه وهو كذالك مادري شكد مر الوقت واني مثبته عيني عليه عيوني ضد عينه جنت اباوعله بنظرات خذلان وانكسار ضد عينه الي جانت تباوع بكل حقد!!   شكد هو موذي بلنسبه اليه مسحتهن و غمضت عيني بطيئ واخر شي حسيت بي وهو يغطينه وطبع بوسه خفيفه على شفتي

.. فتحت عيني واني اشوف جود لاف نفسه عليه وضبع ماكو كمت على حيلي واني اغسل وبدلت كعدت جود وحجيت بصوت

الـِن: جودي اكعد حبيبي الوقت تأخر

.. بقى لاف نفسه بلغطوه ونايم طلعت واني اتمشى للصاله اول ما خطيت خطوه فتحت عيني بصدمه شجابهن؟؟

.. كاعدات وهنه مبتسمات ابتسامه حقيره وثبتن عينهن عليه وضبع كاعد كدامهن اتقربت وحجيت

الـِن: شكو خير شعدجن هنا

.. سكتن ما جاوبني رفع ضبع عينه عليه وكال

ضبع: راح يبقن هنا

.. ضيقت عيني وحجيت

الـِن: خير شعدنه ملجئ

.. ابتسم وهو عينه عليهن وكال

ضبع: مو ردتي عاملات

.. فتحت عيني واني اخزره

الـِن: وجايبلي نورهان وروان كلشي ميعرفن يسون رجعهن

.. كامن على حيلهن وهنه يتقربن عليه وعيونهن تتوسل

نورهان: لا عفيه والله نتعلم وشتردين نسوي ونساعدج بس خل نبقى هنا ماعدنه احد بعد بقينه با الشارع

.. بدت عيني تتجول عليهن واني اتفحص ملامحهن الي تاكد عكس نظراتهن وكلامهن ثبتت عيني على بنيه جانت كاعده يمهن ومنزله راسها شكلها حيل هادئ جان حولت نظراتي لضبع واني اخزره حجيت

الـِن: تعال

.. تركتهم متجهه للمطبخ ودخل ورايه انداريت عليه وحجيت

الـِن: شعندك هاي المره احجي

.. ابتسم وكال

ضبع: اذلهن

.. كتفت ايدي ورجعت حجيت

الـِن: ادري بيك متسويها احجي ضبع شصاير

..ثبتت عينه عليه ورجع كال بصوت قلق

ضبع: اسد طلع

.. فتحت عيني بصدمه وحجيت با استغراب

الـِن :ليش مو انسجن

ضبع: رجعوا فتحو قضيته با الرشاوي وشالو التهم عنه

.. حجيت بصوت واني اباوعله بخوف

الـِن: وليش جبتهن هنا

.. اتقرب عليه وهو يتلمس الحرك الي بصدري ابتعدت عنه واني خازرته رفع عينه عليه وكال

ضبع: بعد الي سويته بيهم مستحيل راح يسكت وخايف ياذيني بيج عاد يمي اخته واكدر اهدده بيها لو تحرك خطوه غلط

.. حجيت بخوف

الـِن: ضبع خلينه ناخذ جود ونرجع نعيش برا سوه

.. هز براسه نافي كلامي

ضبع: مو جبان وانهزم ما خايف من واحد زعطوط وخاصتا اسد

الـِن: ضبع اني اخاف من اسد ماكو بقلبه رحمه حباب خل اخذ جود وارجع

.. اتقدم عليه وهو يحاوطني ويبعد خصلات شعري وعينه مثبتها عليه

ضبع: ما اكدر على بعدج بعد

.. نزلت عيني بااسى خايفه

.. شدني عليه قوي وهو يحضني وايدي تتجول على ظهري بعدته عني وارتد للخلف وكال

ضبع: شبيج

.. حجيت واني اتصنع العصبيه ورفعت اصبعي بتهديد

الـِن: ضبع الجلب لا عبالك نسيت شسويت بيه لبارحه

.. ابتعد عني وهو تاركني خلفه بدون لا يجاوب ولا حتى يبرر ولا يعتذر بقت عيني عليه لحد ما طلع بكل هدوء

..اتجهت خلفه للصاله واني اشوف البنيه كاعده ابحدها اتقربت عليها با استغراب وحجيت

الـِن: اول مره اشوفج انتي بت منو

.. رفعت عينها عليه وباعتلي بنظرات خوف وخجل وحجت بصوت وهيه مرتبكه

- اني بنت احمد

.. حجيت واني اتقرب عليها

الـِن: الي اعرفه احمد ما عنده ولد ولا بنات 

.. ابتسمت بخجل وهيه تنزل راسها انتبهت لملامحها شكد هادئه وحلوه ولابسه حجاب بحيث شكلها ينكرط

.. حجت بصوت

- من غير ام

.. هزيت براسي وقلقني وضعها حسيت على الباب انفتح ودخل ادم اول ما شافها وكف مصدوم واتقرب وهو يكول وهو عينه عليها

ادم: شلونج لانا

.. رفعت عينها عليه مستحيه وكالت

لانا: اهلا

.. اتقرب وهو يكعد كدامها وبقى يسئلها واني جانت عيني عليه وهو يحجي وشكله تغير معقول ادم يحبها؟؟

.. سمعته وهو يكول

ادم: اخذتي علاجج

.. دارت وجها عنه بدون لا تجاوب

.. رفعت عيني على ادم بحيره وحجيت

الـِن: علاج شنو

.. ثبت عينه عليه بدون لا يجاوب سمعت صوتها وهيه ادكول

لانا: مريضه نفسيه ينطوني الحبوب علمود يسكتوني

.. فتحت عيني واني اندار عليها وحجيت

الـِن: مابيج شي

لانا: لا تخافين كل ساعه شكل

.. ابتعدت عنها خايفه وطلعت من الصاله انداريت واني اشوف ادم يتقرب عليها تركتهم وطلعت

.. دخلت للغرفه وجان ضبع يعدل بملابسه حجيت

الـِن: مو اكلك مره نادره

.. خزرني ورجع يكمل وهو يحضر جنطته

الـِن: شنو راح تلتحق اليوم

.. ما جاوبني اتقربت عليه واني اكرصه قوي باايده

.. مابدر من عنده اي رده فعل كمل الي جان يسوي حجيت بصوت

الـِن: شو انت الزعلان خير سالمين تذكر البارحه شسويت بيه

.. اندار عليه وهو يثبت عينه وكال بصوت

ضبع: الـِن لا تطلعين من البيت ابدا

.. حجيت واني مضيقه عيني

الـِن: ليش

ضبع: لمره وحده اسمعي كلامي ولا تطلعين لو تنكلب الدنيا افتهمتي

.. حجيت بصوت خايفه

الـِن : شصاير ضبع

.. تركني وطلع بدون لا يحجي ولا كلمه بقيت حايره ما اعرف شسوي طلعت خارج الغرفه واخذت ايبادي وبديت اشتغل

.. ما اعرف شكد مر وقت خلصت واني اسد الايباد واترك القلم الي باايدي ورجعت للغرفه وصل لمسامعي اصوات همس تقربت وجان صوت نورهان وهيه ادكول

نورهان: شلون اخطفه من البيت

.. فتحت عيني بصدمه وتقربت اكثر سمعتها وهيه ادكول

نورهان: ضبع موجود واني متاكده ما عطف علينه وجابنه لبيته اكيد اكو غايه وانت تعرف ضبع شنو

.. حطيت ايدي على شفتي اخفي شهكاتي شنو يردون منو يخطفون؟؟ تركتها واني متجهه ادور على ضبع جان ما موجود انداريت واني اشوفه لانا خلفي وهيه ادكول

لانا: شبيج على شنو تدورين

.. تقربت عليها وحجيت بصوت خايفه

الـِن: ما شفتي ضبع

.. هزت براسها وهيه عينها عليه كالت

لانا: شكو صاير شي؟

.. ما عرفت اجاوبها بس عيني بقت عليه

.. ضغطت على ايدي قوي وهيه تدخلني للغرفه وسدت الباب ورفعت عينها عليه

لانا: الـِن يردون يخطفون ابنج اطلعي

.. تقربت عليها خايفه وحجيت
الـِن: سمعتيها؟؟

.. هزت براسها وهيه ادكول

لانا : ما سمعتها بس اني شفتها هيه واسد وكاعدين يخططون ينتقمون من ضبع

.. فتحت عيني كانما استذكر شي وحجيت

الـِن: جود وين

.. طلعت سريع من الغرفه وبقيت ادور عليه ما موجود طلعت با الكراج وجان يلعب صحت عليه سويع واحاني يركض حضنته قوي وحجيت

الـِن: ابقى يمي ولا تبتعد ابد

.. هز براسه وهو مبتسم اخذته ودخلنه جوه لكيت لانا كاعده با الصاله بس شافتني كامت على حيلها وهيه ادكول

لانا: لكيتي

.. هزيت براسي واني خايفه دخلت للغرفه وبا ايدي جود بديت احضر ملابسنه واخذته وطلعت ما جنت رايده شي بس احمي ابني متاكده ضبع ما راح يقبل ارجع ولا ادم طلعت بدون لا احد يعرف واني لازمته باايدي قوي وايدي الثانيه جانت بيها الجنطه شفت لانا كاعده با الصاله بس شافتني كامت على حيلها وبعينها نظرات استفهام حجيت بصوت اسبق كلامها

الـِن: اتمنى ما تحجين اني طالعه احمي ابني منهم

.. هزت راسها وكالت

لانا: احسن قرار اخذتي

..تركتها وطلعت ابتعدت عن البيت واخذت تكسي وصعدنه وجود بحضني خايفه عليه وكل شوي واندار عليه شويه وحسيت السايق جاوب على الاتصال واندار عليه وهو يكول

- يمي
...............
بمكان ثاني

لانا: الحكووو الـِن خطفت ابن الضبع
روان: عررف
لانا: لا
روان: لحد يكله والله يحركها
نورهان: راح اتصل عليه يرجعها نوبه يصير بيها شي وين تروح بهذا الوقت

........................

.. فتحت عيني بخوف وحجيت

الـِن: شكو

.. رجع للطريق وهو يرجعني للبيت حجيت بصوت

الـِن: شكو ليش راجعين

- استاذ ضبع ما يقبل تطلعين

.. فتحت عيني بخوف وگلبي رجف شلون عرف

.. رجعنه للبيت وجان ضبع واكف با الباب وهو حاط ايديه بجيوب بنظرونه ومبتسم وعينه عليه شكله مرعب لزمت يده الباب خايفه ما اريد انزل

.. اتقرب على الباب يريد يفتحه قفلته على السريع وصاح بصوت وهو يضرب الباب

ضبع: فتحي بساع

.. نزلن دموعي وحجيت واني حاضنه جود

الـِن: انطيني الامان

.. ضيق عينه وكال

ضبع: يا امان تردي وانتي ماخذه الطفل وشارده

.. اشر للسايق يفتح الباب وفتحها جرني من ايدي وهو ينزلني واخذ جود با ايده وعيني جانت عليه خايفه همست قريب عليه

الـِن: يردون ياخذون جود ضبع وللله سمعتهم بهاي اذني

.. ما جاوبني اشر لجود يدخل جوه وصاح

ضبع: ادخل جوه

.. عيني على جود وهوه يدخل للبيت حجيت واني اريد ابتعد عنه

الـِن: وخر لا يخطفوا وياخذو من عندي

.. دارني عليه وهو يضغط قوي على ايدي غمضت عيني متألمه وحجيت بصوت ودموعي تنزل

الـِن: ايدي ضبع شبيك

.. رص على اسنانه وعينه مثبتها عليه

ضبع: شحجيت اني مو كتلج لا تطلعين

.. حاولت ابعد ايده عني بس ما كدرت ضاغط عليها قوي رفعت عيني عليه وحجيت بصوت

الـِن: ولك ضبع راح ياخذون ابني

.. حجه بكل هدوء وكال

ضبع: ميكدرون

.. نترت ايدي من عنده قوي وضربته على صدره بقبضه ايدي ارتد مسحت دموعي وحجيت بصوت واني ارفع اصبعي بتهديد

الـِن: لو صار على جود شي بسببك عمري وحياتي ما راح اسامحك

.. تركته ودخلت اول ما خطيت خطوه للداخل لكيتهن كاعدات اتقدمت على نورهان واني اجرها من ايدها قوي وصحت بصوت

الـِن: اطلعي برااا

.. جريتها من ايدها وفتحت الباب واني ادفعها للخارج بقت تتوسل وسديت الباب انداريت على روان وحجيت

الـِن: لحكي اختج

.. بقت بنفس مكانها

.. اتقربت عليها واني اضغط على ايدها اطلعها انفتح الباب ودخل ضبع وورا نورهان اشرلها تدخل وتقرب عليه وهو يجرني من ايدي فتح باب الغرفه ودفعني بيها ارتديت للخلف متألمه صحت بصوت

الـِن: ضبع لو اني لو هنه افتهمت شنو

.. اتقرب عليه وهو يلزم ايدي وحجه بهدوءه المخيف وهو مثبت عينه عليه

ضبع: لج بابا ما يكدرون يسون شي افتهمي

.. مسحت دمعه جانت بطرف عيني وحجيت بحزن

الـِن: ضبع خايفه خاف ياخذون جود من عندي

.. تقرب عليه وهو يمسح دموعي وطلع بوسه خفيفه على عيني ورجع كال

ضبع: ميكدرون

.. ابتعدت عنه متجهه للسرير وهو طلع شويه ودخل جود للغرفته تقرب عليه وهو يحضني

الـِن: وين جنت

.. حسيت عليه وهو يستحي يحجي ضيقت عيني بااستغراب وحجيت

الـِن: احجي وين جنت

.. حجه بتلكؤ وهو منزل راسه مبتسم

جود: ويا ب.. بابا ضبع

.. ضحكت واني اضمه لحضني

.. ماخليته يطلع بعد وجان كدام عيني خايفه يروح من عندي كعدنه انعزل الغرفه وغسلتله وتمددت على السرير واني المه بحضني وكعد يسولفلي عن يومه مثل كل يوم

.. حضنته قوي كانما گلبي علم بعد ما راح المه بحضني بعد ما راح اشم ريحته غمضت عيني وهو نايم على ايدي

.. فتحت عيني بطيئ وجود ماكو كمت على حيلي خايفه ادور عليه ما جان موجود طلعت خارج الغرفه ماكو اخذت مبايلي اتصل عليه وايدي ترجف اجاني صوته

الـِن: ضبع جود ماكو يمك ؟

.. اجاني صوته وهو يرعد قطع اخر نفس بيه

ضبع: مووو يمي وين مووو جان يمج نايم با الغرفه

................................

لهنا وخلصنه البرتوت💕

اعرف طولتها عليكم بس ردت اخذ ريست قبل لا نكمل قصتنه

-هلمره ماكو توقعات لان خمس بارتات راح ينزلن بنفس الوقت🌚♥️