رواية تاروت الفصل السادس وثلاثون 36 - بقلم زيـنـب علـي 🦢

#تاروت

البارت «37»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
.Insta: zainab__.ali1

من گـالوا عليك هـواي ،
لملمتك
ومن گـالوا عليـك دواي !
حشمتك
يموش دواي ، بس جروحي رايدتك

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم"

مالحگت التفت صارت همسه بأذني وانفاسه الحارة لفحت بشرتي وهو يحجي

باتر: اششش بلا نفس تحركي

فزيت وصرخت بصوت عالي ردت اوگف السيارة صرت ماسيطر على حركة ايدي لزم اديناتي من ورى يصيح

باتر: اشش اشش هذا انا لا تخافين

انبلع صوتي من الخوف ردت اجيب من الخرعة

باتر: لا تلزمين بريك ديري بالچ ننگلببب كملي

ماد روحه ولازم الستيرنك يعدل بي ويحچي
باتر: عدلي ايدچ راح تگلبينا

بعدته بدفعه قوية اصيح
رميم: وخررر باتر هو هيججج زين ماموتتنا ماتعرف تجي مثل البشر

حچيتها ووكفت السيارة على صفحة سند اديناته بنص الكشنات يحچي
باتر: افا عليچ ريماي انا اجيچ جيه تافها بدون أكشن ومغامرات

تجاهلته لزمت بطني اخذ نفس عميق وازفره بهدوء احاول اهدي روحي من الخرعة الاكلتها نزل من السيارة وحول يمي يحچي

باتر: يلا تحركي

خزرته احچي
رميم: وين

باتر: القصرنا الملعون أميرتي

رميم: وين چنت انت ؟

سحبني اله جعص وجهي يبوس بخدي ويحچي
باتر: تشتاقلي الأدب سز بس ماتحچي

بعدت نفسي منه اباوع عليه يضحك ويستهزئ ماعرف هالرجال يمتى يصير ياخذ الامور بجدية

رميم: انت شوكت تبطل سوالفك وتحچي وين چتت مختفييي

باتر: ليش تغارين عليه ماخنتج لا تخافين

لزمت رأسي اريد استوعب رجع گال
باتر: يلا تحركي

رميم: وين

باتر: حركي السيارة امشي وبسس

رجع باوعلي هز ايده وحچه
باتر: نسوان اخر زمن تسوق والزلم بصفها

تنهدت اريد اشوفه وين يوصل شغلت السيارة وطلعت باوعتله تمتمت بتعب
رميم: باتر وين چنت

باتر: بگلبچ

غمضت عيوني بقلة صبر رجع ردف
باتر: وبعدين شنو ماتحسين بيه يوميه نايم بحضنچ وانتي متونسه للوضعية

رميم: قصدك تنطيني ابرة مخدرة زين ماموتتني انا وولدي خاف تعاطفت وياك الفترة الراحت من بعد هاي الخطوة لو تمووتت مااسامحك لان انت مو كفو ولا گد المسؤلية

باتر: انتِ تاخذين حبوب مهدئة وبعدين انا نطيتچ الابرة بعد ما استشرت نص دكاترة العراق وأكدوا لي ان هالنوعية بالذات مو خطرة عليج اذا اخذتيها مرة وحدة وبجرعة بسيطة

رميم: افرض صاير بيه لو بأطفالي شييي ليشش هيچ سووييتت

باتر: شني ليش هيچ سويت عمي انا رجال والي احتياجاتي اروح اطيح بالموبقات والمحرمات والعياذ بالله لو اروح المرتي

فتحت عيوني مصدومة احچي
رميم: شسويت

باتر: اليحبه گلبي بس ها مو حبًا بيچ شسوي بعد انتِ محسوبة عليه مرة وحلالي يعني شلون اروح للغريبة احسن

رميم: حقييرر

باتر: بعد روحي ام ولدي مشكور على حسن اخلاقچ السز

رميم: شلون دخلت للبيت

شمر المفتاح گدامه وگال
باتر: شلون يعني بالمفتاح ولا تسأليني شلون اخذته من جنطتچ مره من جنتي عايشة وياي

رميم: انت مو بشر انت جني فضائي

باتر: شكرًا على الاطراء الجميل ام ولدي

حچاها وطلع تليفونه من جيبه فتحه وگال
باتر: خلي نشوف بلا رجعوا للبيت لو بعدهم

رميم: وين تشوفهم

باتر: هنا حبيبي شبيچ

دار التليفون عليه وصار يگلب بزوايا البيت يمكن بكل مكان مخلي كاميرا

رميم: عود صدگ تحچييي

باتر: ايّ وحزام الحمزة

رميم: شلون هيچ تسوي متستحي تتجسس علينا افرض اختي ماخذه راحتها باللبس بلا حجاب وهي صايمة هو يجوز تباوع عليها انت شنو من بشر شهالحقارة التمشي بدمك

باتر: على كيفچ شيخة رميم اغض بصري بكل مكان تتواجد بي اختچ ماافوت عليه وبعدين هي مثل اختي ومرت اخوي

سكتت منه اسوق ماعرف وين رايحين

باتر: وبعدين هو انتم شسوون بالبيت انتِ بس نايمة لو تفترين انتِ وطوبتچ على ساعة تدهربين وامي حدها للحديقة تسقي سندانات الأشجار وترجع القرآنها واخوي يحصر باختچ وين مايشوفها ودائب يجيكم خمس دقايق وباقي اليوم لو يگابل المنتزة الي تگعد بي أمه لو يروح ياخذله صفنه يم بيت المسعدة ويرد ، بس ترى انا مااراقبكم مجرد فضول

رميم: لا واضح ماتراقبنا

باتر: ايّ وسيراميك مكة شني قابل اجذب عليچ

رميم: هسه احنا وين رايحين

جنت لابس جنطة مالحگت انزعها بقت بحضني مد ايده عليها طلع تليفوني انتبه البطني وگال بنبرة صوت حقيرة

باتر: بس ترى قوي انا قوي حبلتچ بثنين ولد من اول بطن شتردين بعد

رميم: سخيف شتريد مني هسه من يرجعون للبيت يقلقون عليه ماريد اروح وياك

باتر: تلعبين عليه ريم مو بسيطة

حجاها بمكر وجبرني افتحله تليفوني ربطة على نت تليفونه وطلعلي موقع امشي عليه وتليفونه مخلي گدامه يباوع بالكاميرات يريد يشوفهم شوكت يرجعون ادري بي قلق على حكمة ومتوتر كلش بس مايبين

بقيت اسوق هواي وقت تعبت كلش وانا جنت تعبانة باوعتله عينه بتليفونه نترت بي

رميم: راح نوصل الناصرية انت وين ماخذني تعبت من وانا اسوق

باتر: انزلي اسوق انا

وگفت السيارة على صفحة ونزلت دار هو يسوق شارع عام والمنطقة هيمة وهو يباوعلي بنظرات كلها شر من وحدي صرت اتخيل سيناريو وفلم رعب انوب مايقبل يگول وين رايحين الحدما وصلنا البيت فتح الباب يباوع عليه ماتحركت

باتر: متنزلين مستحية تردين اعزمچ لو خايفة

رميم: منين اخاف مننكك ؟!!!

باتر: هم صدگ هي المثلچ يفوصة تخاف

رميم: احترم نفسك اريد ارجع للبيت هسه يبقى بالهم عليه اذا رجعوا ومالگوني وسيارة خيال شلون

باتر: نزلي رميم راح تجيچ دفرة تخليچ تجيبين من حلگچ

رميم: كلشي اتوقع من واحد مثلك

ملامحة تحولت جدية بالكامل اشريلي برأسه وگال
باتر: يلا

نزل ماعرفت شسوي ماعندي غير حل الا انزل ويا وهم اريد اشوف شنو نهاية الي جاي يسوي ويوميه مدخلنا بمصيبة رجعنا البيتنا الگعدنا بي اول مرة لزم ايدي حيل جرني وراه

رميم: عوف ايدي شبيك

شدد قبضته عليها اكثر وگال
باتر: ماريد اسمعلچ صوت

حاولت اجرها منه ماكو عاصر ايدي بأيدة عصر مايعوفني الدرجة حسيت الدم وگف بيها فتح الباب ودخلني للبيت بدفعة خفيفة لزمت بطني بخوف احچي

رميم: عمه بعينك لا تدفعني ما تشوف بطنييي

باتر: حية رگطة كلشي ما يصير بيچ

رجعت عليه دفعته حيل اصيح
رميم: شتريد من عدنا فوگ عمايلك السويتها تريد تاخذ حقك منا فوك ما تنطيهم عذر ان انت چنت ماتساعد نفسك وتعترف انت القاتل

اتقرب مني يأشر على روحه يحچي بقهر
باتر: كل واحد بيكم عاف چويه بروحي نارها تسعر ماتطفه تحرگ بيه تموتني

رميم: منو خلا نفسه بهذا الموقف انت بيدك خليت الكل يصير ضدك بدل ماتبرر تحاول تثبتلهم انت بريئ صرت تتصرف العكس وتثبت الجرم عليك شلون انطاك گلبك تأذيهم

باتر: كل السويته مايجي قطرة بحر يم اذيتهم وتلويعهم الروحي كل السويته مجرد اشلع گلبهم گلبي ماينطيني يتأذون بس انا حالف مااعوفهم وضوگهم المر

اتقربت منه اهز بي احچي بحرگة
رميم: اصحهه بتار اصحههه وشوف الموضوع من جانب آخر شوف حكمة رغم كل الي سويته جانت اگعد بنص الليل اسمعها تبچي تدعي مو انت تطلع القاتل بهاي اذني اسمعها تگول تربية ايدي يسوي كلشي بس مايكدر يكتل نملة مو بشر

اباوع عليه صافن عيونه صارن بركان دم اخذت نفس ورجعت احچي مأنبته

رميم: ليش نسيت يمان شسوه علمودك خرب حياته وعاف حب عمره واختارك جان مستعد يعوف الدنيا والبيها الخاطرك شبه متأكد انت القاتل ومع هذا هو مافرط بيك يمشي ويگول وصية أمي اعوف روحي وما اعوفه من انسجنت هو ودائب لحظة وحده ما هجعوا وگعدوا افتروا العراق كله حتى بس يلگولك مخرج من تهمتك ، وهسه جاي تلومهم على كلام طلع منهم لان جزعتهم بسوالفك هم يبررون افعالك وانت تثبتها على روحك فتح عيونك وباوع زين عوف حقدك وبشاعة روحك

الكلمة الأخيرة حچيتها بصياح تلف اعصابي رجع صاح بيه غمضت عيوني من صوته العالي صار يدوي دوي

باتر: الي تگولين عليه مجرد كلاامممم كلامهم اخذ نص حيلي ظلمهم الي نار وگابه بصدري ماجاي ارتاح ماجاي يطلع من بالي

رميم: لانك واحد مريض نفسي تريد تطلع روحك انت الصح وبس خاله حكمة هذا حالها اليوم وهي بالمستشفى كله من وراك ومن ورا قهرك الها

جرني من ايدي عطت بخوف لوها وخلاها ورى ظهري يهمس بأذني

باتر: منو هذا المريض النفسي

رميم: انت واخ باتر ايدي شيل ايدك مني

عصرها حيل حسيت ايدي انخلعت ماعرفت شسوي اريد يعوفني ماكو وخايفة على بطني ماگدر اتحرك واقاومه

باتر: عبالچ نسيت سوايتچ يعني ترى انت الچ العقاب الأكبر روح گلبي

رميم: تستاهل الصار بيك عوفني باتر جاي تأذيني

رجع شد على ايدي ضربته بمرفق ايدي ببطنه ولا اهتز خرمشته واصيح حتى يعوفني فقدت من الألم ماعرفت شلون اتصرف ويا لزمت بطني وصحت

رميم: اااه راح اجيب يمه بطنااايييي

بسرعة هد ايدي يحچي
باتر: شجيبين بعدچ بالسابع ماداخلة

دفعته احچي
رميم: حتى تعوفني يامتخلف على الاقل لا تخاف عليه خاف على جهالك

باتر: لا عبالچ جبتچ يمي ميت على عيونچ السود جبتچ الخاطر حابيب گلبي

رميم: وانا تحلم اتقبلك بعد السويته بيه

باتر: شسويت بيچ ماعتقد اذيتچ بگد ما اذيتيني

رميم: لااا حشاك شسويت بس تزوجتني تحت التهديد وتممت زواجك مني وصرت كل يوم تثبتلي انت قاتل اهلي بدل ماتبررلي وتحاول تثبتلي برائتك

باتر: هذا ثمن لعبچ وياي

رميم: لو شيصير مراح احبك ولا انسى حقارتك وياي

ابتسم بـ استهزأ
باتر: ماميت عليچ اريد جهالي 

رميم: لو تموت مااخليك تلزم منهم شعراية وحدة

باتر: هم عوزچ فوك حگه دگه

رميم: جهالي
باتر: الفضل الي انا سويتهم الچ

رميم: مختل

اتقرب مني رجعت الي ورا بسرعة نطيته ظهري وتقدمت گعدت على التخم اعرف بي اذا يفقد مو بعيده يدفرني

باتر: اختاري تنگبرين هنا لو ترجعين وتتحملين الراح يصير الكم

رميم: انت صدگ تحچي ترى حكمة مريضة بعد ماتتحمل مصايبك والولد تعبوا باتر راح يصير شهر انت موگفهم على تگ رجل مايلحگون كل شوية بضاعة شكل كل شوية مفترين المراكز من وراك

گعد بصفي يحچي
باتر: تردين هذا كله ينتهي وباچر اروح ابوس راسهم هم مثل الحبابة تگعدين هنا وتسكتين

رميم: وتعوفهم

باتر: حتى انساهم

رميم: انطيني تليفوني اتصل على خيال انطيها علم

طلع تليفوني من جيبه شمره عليه باوعتله صفح بطرف عيني عافني وگام صعد فوگ ردت اتصل بخيال هي دگت جاوبتها اجاني صوتها المرعوب تحچي

خيال: رمييمم انتِ وينججج لا السيارة ولا انتِ بالبيت شكو

رميم: على كيفچ اسمعيني

خيال: وين رحتي متت من الخوف رميم

رميم: اهدئي ولا تخافين انا يم باتر

حچت بتعجب
خيال: باتر !! وين لگيتي وين لگاچ شسوالچ

هديتها وصرت احچيلها كل الصار من اول ماطلعت الحدما وصلنا ودليتها على اماكن الكاميرات اسمع صوت يمان يمها يحچي  ويتوعد الباتر

خيال: ديري بالچ على نفسچ مو تخلينه يأذيچ

رميم: لا تخافين عليه اعرف اتصرف ويا

خيال: وعلى كيفچ ويا مو كلشي بالتعصب اسمعي منه هو محتاچ واحد يسمعه طولي خلگ مهما يكن يبقى ابو ولدچ

رميم: صدگ تحچين يعني شنو اطول خلگ ويا

خيال: مثل مااگلچ هو لو يريد يأذيچ جان سوه شي يأذيچ من زمان بس هو محتاجچ يمه لا تنسين الحلم والامانة خليچ گدها يلا امي انتِ حبيبتي مو تأخذين كلشي بتعصب التفاهم حلو

ابتسمت احچي
رميم: باع منو جاي يحچي ماعرفتچ لعد متتفاهمين انتِ وتريحين گلب نسيبي

خيال: تجيبين حالتچ وياي انا اختلف يلا روحي ولا تنسين الحچيته

بسرعة غيرت الموضوع تنهدت بضيق وسألتها
رميم: شلون صارت حكمة

خيال: زينة رجعنا للبيت وضعها مستقر شويه الصيام تعبها لا أكثر ماكو شي خطر

رميم: بوسيها الي

خيال: يوصل ديري بالچ على نفسچ امي

رميم: ان شاء الله ، باچر نجيكم واجيب السيارة

خيال: مو مشكلة

ودعتها وراحت گمت باوعت الروحي بملابس الطلعة هسه انا شلون انام بهاي الهدوم وانوب ميته من النعاس فززني صوته

باتر: شبيچ دردمين وحدچ ، طمنتي اختچ؟

رميم: ايّ وبعدين شلون راح انام وانا بهاي الحالة وماعندي ملابس هنا

شغل التلفزيون شمر روحه على التخم وگال
باتر: انزعيهن منين مستحية مني

خزرته عفته وصعدت للغرفة فتحت الكنتور ادور بلكي ناسية شي هنا كلشي ما لگيت ماعندي غير حل طلعت تيشيرت چبير من عنده نزعت ملابسي احچي بتوعد

رميم: انزعهن ليش لا انا الك لو ماطلعتلك گلب فوگ گلبك انا مو رميم

لبسته باوعت الروحي بالمرايه يادوب مغطي الورك نزلت جوه اباوع عليه صفن عليه بصدمة مامصدگ عيونه تجاهلته وگعدت اباوع على التلفزيون گام گعد بصفي كلش لزگ بيه حمحم حچيت

رميم: شتريد

باتر: ماتخافين عليه يصير عندي سكر هيچ نازلة

رميم: يطبك مرض وبعدين مو على اساس ماميت عليه شبيك راح تموت

باتر: يعني تبقين مرتي وحلالي ياهو الگالچ عليه حديد

حچاها وخلا ايده على رجلي دفعتها حيل احچي
رميم: اوويي وخر

باتر: احترگت عشيرتي

تجاهلته درت على التلفزيون منطيته ظهري كام طفه الضوء ورجع گعد يمي شويه وحسيت ايده تتحسس على بطني

رميم: ايدك شيلها لا تنكسر

باتر: ماميت عليچ انا لازم جهالي

دفت ايده تنهد واتقرب عليه اكثر احتضني من الخلف ظهري صار على صدرة واديناته حاوطن بطني گلبي صار يخفق حيل ويا حرارة انفاسة على رگبتي جسمي صارت بي قشعريرة اول مره احس بهذا الإحساس وانا بين اديه غمضت عيوني مسترخية همس مبين التفاجئ بصوته

باتر: رميم متأثرة بيه ؟!

رميم: وخر باتر ابتعد

باتر: لا تكابرين دگات گلبچ واصلتني وقشعريرة جسمچ واضحة

سكتت گام گعد گبالي لزمني من وجهي بثنين اديناته غمضت عيوني اريد اسيطر على نفسي ماكو مدري شجاني عض على شفته يحچي

باتر: اكيد انا بحلم هالحالة ماشوفها بس بالاحلام

دفعت اديناته عدلت نفسي احچي
رميم: شبيك ايّ حالة

باتر: حالتچ وانتِ سايحة بين اديه شني انا بحلم لو بعلم

گمت من يمه
رميم: بحلم هواي تتخيل اشياء مموجودة انصحك راجع دكتور نفسي

عفته وصعدت للغرفة شغلت السبلت تمددت على الچرباية دخل وراي يباوع عليه بنظرات مو راحة

غطيت نفسي زين نزع تيشيرته وتمدد بصفي تجاهلته وغمضت عيوني اتقرب مني كلش عطرة صار ويا نفسي ماگدرت اقاوم التفتت عليه احچي

رميم: ممكن اسوي شي وماتفهمني غلط

باتر: شنو

رميم: افتح اديك

فتحهن مستغرب اتقربت دحست روحي بحضنه خليت راسي برگبته اخذ نفس قوي اموت على هذا العطر اموت

باتر: شجاي تسوين

رميم: هاي مو انا هذول جهالك

هستوني غمضت عيوني حسيت ايده اتسللت من جوه الغطا على رجليه بسرعة لزمتها

رميم: دير بالك تلمسني

باتر: ارحمي بحالي

رميم: بتار نام باچر ورانا نروح البيت حكمة من الصبح

باتر: انطيچ عدية على الاقل

رميم: نام ماميته على عيديتك

باتر: چا وخري مني

رميم: جهالك يردونك ماتريدهم براحتك

ردت اوخر منه لزمني
باتر: خليچ

ابتسمت غمضت عيوني وهو بقى مضطرب شوية گلبه يدگ سريع فترة بقى على هاي الحالة اخر شي حضني ونام وانا هم غفيت ...

مدري شگد مر وقت گعدت من النوم باوعت التليفوني الساعة 3 الفجر وانا ميته جوع باوعت وراي شفته منطيني ظهره وگالب نفسه نايم على بطنه نغيته احچي

رميم: باااتررر گوممم

تحرك منزعچ مايقبل يكعد بقيت اهز بي مايقبل يگعد اخر شي لزمت بطني وصحت بصوت عالي

رميم: ااااااا بطنييي

بسرعة فز يعصر بعيونه
باتر: شنووو شبيچ

رميم: جوعانة

غمض عيونه يتنفس بغضب صاح بيه
باتر: صدك تحچييننن گطعتي الخلفة علمود جوعانة وبعدين بيش الساعة هسه نامي الصبح اجيبلچ اكل

رميم: لا هسه اريد

باتر: ريماي نامي

گمت گعدت وحچيت
رميم: هسه اريد اكل يلا گوم سويلي

تنهد ينافخ بملل گام من مكانه طلع من الغرفة طلعت ورا نزلنا للمطبخ فتح الثلاجة يحچي بنعاس

باتر: ايّ رميم خاتون شتردين

رميم: مشتهية تمن عدس

غمض عيونه صك على اسنانه يحچي
باتر: رميم باعي الساعة بيش مو مال طبخ هسه اكلي اي شي

رميم: انا شعلي جهالك مشتهين اتوحم عليه شلون يعني ما اتوحم

ما خلا شي من الثلاجة ماطلعة الي قفلت واشتهيت تمن العدس الا هسه تطبخ اباوع عليه فتح الكاونتر وطلع جيس العدس اخذ منه شويه وخلا عليه تمن وصار يغسلهم جوه المي ويحچي

باتر: احمدي ربچ حامل وبطنچ واصله الحلگچ والا جان عرفتي شسوي بيچ

اتقربت اباوع عليه شيسوي حچيت
رميم: لا تنسى عينك الطفيتها خليك متذكرها

باتر: غير جنت العب وياچ ومستخطيچ وهسه هم الخاطر جهالي الشايلتهم

رميم: استعجل ترى بعد ماگدر اتحمل اكثر ميته على التمن

باتر: تعرفين طريقته

رميم: لا وانت

باتر: منين اعرف شايفتني ست البيت

رميم: وبعدين حتى اذا اعرف انا مشتهية تمن عدس انت تطبخة اذا جبته من غير شخص مااكله

باوعلي بطرف عينه عافني وطلع شويه ورجع بيده تليفونه يدور باليوت على طريقة تمن العدس طلعه وثبت التليفون گدامه يسمع ويطبق وكل ما يسوي هيج اگله لا غلط اخر شي زهگ صاح بيه

باتر: هاچ انتِ سوي

رميم: هو اني وين اعرف

باتر: چا سكتي ووخري منا شبيچ محشوگه بيه ادري بيچ تحبيني بس مو الهاي الدرجة

رميم: مصدگ روحك اريد اشوف شسوي

تنهد احسه گوه مصبر على روحه ماينفجر بيه ورجع يطبق الطريقة

رميم: مو هيچ لازم تخلي بصل

باتر: وين اكو تمن عدس عليه بصل رميم اسكتي راح اطبخج بمكان التمن عشت وياچ شهور للمطبخ مادخلتي هسه تردين تصيرين طباخة براسي

حجاها ورجع يطبخ وانا مضايقته ايدي ويا ثنينا سوينا المطبخ هوسه حسنا حوس على ماخلص التمن وطبگه ، كعدت على ميز الطعام صبه وخلا الماعون گدامي يحچي

باتر: يلا تفضلي خاتون اكلي

باوعت التمن لونه جوزي ومعجن شكله مايشجع ابد بس خفت اگول مااريد وهو معصب

رميم: فاتت الجوعة ومن شميت ريحته شبعت

اخذ الخاشوگة من ايدي خلا بيها تمن وصار يوكلني
باتر: كله هسه يخلص

رميم: انت هم اكل شمدريني شمخليلي بالاكل

اخذ لگمة اكلها والثانية يوكلها الي الحد ما شبعت غسلت وعفته بالمطبخ ينظف ويرجع المواعين على مكانها صعدت مرتاحة الغرفة باردة تشجع على النوم تمددت على مكاني ونمت بعد مادريت شصار ...

❛❛❛❛

وتر"

قبل العيد بكم يوم چنت وكفة گبال المراية اباوع على وجهي بالمراية وجهي صاير يلعب النفس قررت اهتم بنفسي دام بعد كم يوم عيد

لبست حجابي والبشت مالتي اخذت فلوس من المنطيهم الي حكيم وطلعت من الغرفة صاحت وراي مرام

مرام: وين مولية

وتر: معليچ لا تدخلين

مرام: ولي عساچ ان شاء الله گلعة بلا رجعة

ماهتميت الكلامها عفتها وطلعت اشتريت الاشياء الي احتاجهم من وحده يمنا تبيع اشياء نسائية حلاوة وشمع وهاي الشغلات مال البنات اخذتهم ورجعت امشي بالشارع ومدري شبيه ادور عليه بوجوه الناس اريد المحه من بينهم ماكو مابين

وتر: هو هذا الي انا ردته صار بعد ليش ضايجة مو هاي الحرية الحنيتي ونيتي عليها امشي وسكتي

امشي و أؤنب بروحي كل الطريق من صدگ صرت اختنگ ببيت حكيم والأفكار صارت تحاصرني وافكر بكلام دائب الچان يگوله الي

دخلت للبيت ورحت الغرفتي اهتميت بنفسي وبعدها دخلت سبحت وطلعت لافة الخاولي على رأسي تفاجأت من شفت عبير موجودة بالغرفة تدور بغراضي سديت الباب وحچيت مستغربة

وتر: عبورة محتاجة شي من غراضي أخذي كلها گدامچ

باوعت عليه فتحت عيونها حيل اتقربت مني جرتني عليها تباوع بوجهي وتحچي

عبير: هاييي شمسويههه بروحچ

وتر: شمسوية نظفت وجهي واهتميت بنفسي شويه

عبير: حقيييررةة سويتي هيچ لان تدرين باچر تجي ام محمد حتى تشوفني تردينها تشوفچ وتخطبچ بمكاني

نصدمت من كلامها
وتر: شبيچ انتِ شجاي تحچين ايّ محمد هذا

عبير: لا تغشمين روحچ بيوم الوكعت بي وتخربطت محمد نفسه الاخذتي مني وسويتي ويا علاقة لان عبالچ انا راح اموت ويخلالچ الجو ويا بس شوفي رب العالمين شسوه بيچ خلا حكيم يبيعچ وانا اعيش

وتر: انتِ هم عود اسمچ اخت

عبير: مو اختچ لا تگولين اختي وخاف عبالچ تاخذين محمد تحلمين هذا حبيب گلبي انا ويا مكتوبين البعض افتهمتتييي وانتِ راح تنشمرين يم سنان بيت عمي يردونچ خدامة

دفعتها حيل وخرتها مني صحت بيها
وتر: انعل ابوچ لابو محمد وياچ لا ابو سنان وبيت عمچ دوخري هو منو ميت عليه المايع الزنانة

رادت ترجع عليه لزمتها حيل من ايدها فتحت الباب ودفعتها بره الغرفة وسديت الباب ارجف من الأعصاب وهاي عبير اكثر من مرة تسوي هيچ وتسمعني هذا الكلام مشطت شعري وبقيت بالغرفة ماطلعت لليل سمعت صوت حكيم يصيح بالبيت

اتقربت خليت اذني على الباب اسمع عبير تصيح وهو يصيح ويگللها معليچ بوتر لا واحد يتدخل بيها چنت فرحانة كل ضني ابوي يحبني وخايف عليه

مرت الايام والمفروض بعد يومين للعيد عصريه چنت گاعده بالحوش على الدرج اگلب بتليفوني ملل يمكن اذا اكول حسيت بالوحدة وانا يمهم اكثر من ما حسيتها وانا محبوسة ماكون ابالغ

اشوف مرام وعبير مخبوصات ويعدلن كلبن البيت گلب رادن اساعدهن ولا تحركت انطيتهن الاذن الطرشة حچن غلطن رادن ابد ولا كأني اسمع

بس اندگ الباب ركضت عبير للمطبخ مرام تقدمت بفرحة تفتح الباب تباوع عليه وتخزني ماكمت بقيت گاعده فتحت الباب ودخلن 3 مبينات اكابر كلش سلمن على مرام من ورى خشمهن ودخلن وحده منهن صارت عينها عليه ابتسمت وگالت

- مساء الخير

رديتها
وتر: مساء النور

باوعت المرام تحجي
- هي هاي عبير

ابتسمت مرام ابتسامة تسليكية تحچي
مرام: لا عيني هاي اختها الصغيرة

اباوع عليهن وحده باوعت بوجه الثانية بأسف ودخلن شويه اقل النص ساعة وطلعن يباوعن عليه ويبتسمن مارتاحيت للوضع بسرعة دخلت الغرفتي وعبير وجها ما يتفسر

بس طلعن اجتني كسرت الباب عليه تصيح
عبير: اطللعععيييي **** ادري بيچ ليش تعمدتي تكعدين يم الباب حتى يشوفنچ ويختارنچ الابنهم

وكفت ورا الباب وصحت بيها
وتر: ولا تستقر العائلة المالكة والامير المبجل

مرام: افتحي الباب حيوانة

رجعت كعدت ومافتحت الباب مابيه حيل مشاكل بس نصدمت من عبير تهسترت صارت تدگ الباب بجنون وتصيح

عبير: اللقيطة لفيناچ من الشارع المتشردة خلف الله علينا ربيناچ وكبرناچ

گمت بسرعة فتحت الباب احچي برجفة
وتر: شتحچين انتِ منو اللقيطة

عبير: انتِ لقيطة اشتريناچ من الشارع مو الاجل السواد عيونچ لا حبيبتي غلطانة

اباوع على مرام صارت ترجف تحاول تسكت عبير المنهارة ماكدرت تسيطر عليها

عبير: اشتروچ لان انا مريضة انسجتچ تتطابق ويا انسجتي بين قوسين اشتروچ حتى يعيشيني بكليتچ وبعدها ابوي يبعچ خدامة عند اي واحد يتقدملچ

وتر: انتِ چذابة ماصدگ بيچ عبير شغيرچ هيچ

عبير: لا مو چذابة هاي انا چاي اگلچ الحقيقة حتى بالامارة مرام تصير خالتي اخت امي المتوفية الي هي مو امچ

ماعرفت شسوي بس الصدمات صارت تتوالى عليه ماجاي استوعب احس نفسي مصدومة

عبير: اصبري هسه اثبتلچ

لزمتها مرام تحچي
مرام: شجاي تسوين يالمدهورة هسه يجي الا يطين عيشتنا

عبير: وخري مني خلته يخطبها ويعوفني

دفعتها ودخلت للغرفة طلعت هوية مرام واجتني شمرتها عليه تحجي

عبير: هاچ اقري هاي شوفي اسم الاب والجد مثل اسم امي مرام خالتي ياريت تقتنعين احنا مو اهلللجججج

شهگت مثل واحد يلفظ أنفاسه الأخيرة ودموعي من وحدها صارت تنزل مرام تهدي بعبير وانا صافنة عليهن وهي تبچي وتفرفح فزيت على صوت صيحة حكيم صاح

حكيم: هاااييي شچاي يصير هنااا عبييررر شنو هذا الكلام الحچيتي

عبير: قابل مجذبة خليها تعرف الحقيقة خليها هالحقيرة الحية الصفرة

تجاهلت عبير وركضت الحكيم لزمت اديه ابچي واحچي

وتر: الله عليك گلي الحقيقة گول انت ابوي وانا مو لقيطة الله عليككك گوللل

اباوع عليه عافني وراح العبير جرها من شعرها يصيح عليها

حكيم: حييووانههههه شلون تگليلها الحقيقة هااا شلووننن

عبير: مانريدها خلي تروح زوجها بيعها خلصنا منهااا

ضرب عبير راشدي قوي صارت تبچي وتدعي عليه اخذتها مرام ودخلن للغرفة وانا اتقربت منه بهدوء احچي

وتر: يعني الكلام صحيح

هز رأسه بـ ايّ

وتر: اذا صحيح ليش رجعتني

رفع رأسه وجاوبني بحقارة
حكيم: اعوفچ ترحين بلا مااطلع تعب الربا بيچ

فتحت حلگي مصدومة اريد استوعب الي گاله صحت بي

وتر: مو بعتننيييي ليششش رجعتني ليشش انت مو بعتنييي

جرني من شعري يحچي
حكيم: وهسه ناوي ابيعچ مرة ثانية واستفاد براسچ اسمعي ولچ بعد ماانطيچ السنان ابن عمچ هذا الاسمه محمد ابو نائب وخطبوچ مني وانا وافقت يعني حظري روحچ اول يوم العيد تعقدون

تخبلت تهسترت رجع ببالي كل كلام دائب على حكيم وخطورته عليه بس اني ماجنت اصدگ صحت بي

وتر: بسس انا عاقدة مايصير وهم مارييدددد محمد رجعني الدائب ماريد هذا رجعني الزوجي

حكيم: نجبي عقدج بالاجبار باطل وتزوجين محمد غصب عليججج

ماتحملت دفعته حيل اريد اوخره مني
وتر: انا صوچي ماثقيت بدائب ومشيت ورى عواطفي ورجعت الواحد حيوواننن حقيررر ماعنده نخوه مثلك

جرني من مقدمة ملابسي شنج روحة بعصبية وضربني حيل على وجهي عضيت شفتي والدم صار ينزل منها نومني بالگاع وراح جاب الصوندة وصار يدگ عليه محد يخلصني منه حسيت روحي فرت مني وهو مستمر يدك عليه بكل قوة حسيته شطبني تشطب من غير الدفر والضرب بالايد نهاني جوه ايده بس ما يوصل الوجهي صرخت عيطت بچيت توسلت محد اجاني ونقذني منه

اخر شي سحلني من شعري للغرفة شمرني بيها واخذ تليفوني قبل لا يقفل الباب عليه گال

حكيم: بعد يومين تعقدين اريد اشوف تگول لا الا اطلع روحچ بيدي

قفل الباب عليه وراح فقدت من الالم والبچي مابيه حيل حتى ارفع ايدي بس اون ودموعي تنزل وصرت اسمع عياط مرام وعبير بره هم

وهيچ مر اليوم انا بس متمدده وابچي ضرب وجنت صايمة حسيت بيومها روحي طلعت مني گمت بيه مابيه گعدت بزاية الغرفة وبقيت على هذا الحال نهار كامل گوه جبرني اكل واشرب بالضرب كل مااعاند يضربني

حتى خلا مرام تشتريلي فستان وتجهزني على الخطوبة وانا فاقدة لا ايد ولا رجل قبل العقد بيوم بالليل كمت بيه مابيه وطلعت التليفون الي انطوه الي

وتر: مو انا الابقى لعبة بيد حكيم يتاجر بيه

دخلت على رقم دائب واتصلت عليه ماجاوب ارجعت اتصلت بـ يمان بسرعة جاوبني

يمان: وتر هاي انتِ محتاجة شي كولي

حجيت بصوت مخنوگ ابچي
وتر: فدوة طلعوني من بيت حكيم انا هسه ماعندي بس رب العالمين وانتم

يمان: اهدي ولا تبچين خلي افهم منچ

وتر: حكيم يريد يبيعني ودائب مسويلي حظر ومايجاوبني

يمان: على كيفچ وفهميني وحدة وحدة ليش مسويلچ حظر

وتر: ماعرف فدوه ماكدر اطول لازم اطلع باچر يريد يبيعني

يمان: خليچ وياي وخلي التليفون يمچ ضمي مو يشوفونه وانا هسه اتصرف على كيفج بنيتي صيري سباعية وتحملي

وتر: لا تتأخر فدوه

طمني وسد التليفون مني بسرعة رجعت المكاني وخليت التليفون جواي حسيت الباب انفتح والتليفون هم حسيت بي صار يهتز وراي اجاني صوت حكيم دموعي زادت بالنزول گال

حكيم: هاا فكرتي حتى اذا ما فكرتي بجميع الاحوال انتي ماشية يعني ماشية فخليها تكون برضاتچ احسن

ردت اخلص منه مسحت دموعي وحچيت بصوت متشحرج من البچي

وتر: هاي هي الي تشوفه

اباوع عليه ابتسم وگال
حكيم: من الاول وهيچ عفيه عليچ بنيتي

عافني وطلع والباب بس سده ما قفلة والتليفون وراي يدگ بأستمرار ماجاوبت خليت تعبر هواي وقت خاف گاعد ورا الباب كلشي يصير

تطمنت محد موجود بسرعة طلعت التليفون مكتوب دائب ماصدگت عيوني جاوبته اجاني صوته يصيح

دائب: وتر شبيچ شنو هذا الحچي السمعته من يمان

وتر: لو تلحگ عليه لو اموت نفسي يريد يزوجني وانا عاقدة يريد يبيعني دائب تعال اخذني مااستاهل بس لا تعوفني بعد ربي ماعندي غيرك

صوت انفاسه صار واضح يضرب بالسماعة گال بهدوء

دائب: تكدرين تطلعين من الغرفة مو

وتر: اي هسه فتحها عليه

دائب: بعد ساعة ترحين للترك تلگيني موجود تمام

وتر: شلون خاف حكيم يشوفني

صاح بيه
دائب: مااععررففف دبريهاااا يلا بعد ساعة الگاج بالترك

سد التليفون مني حسيت الباب اندفر ودخلت عبير مثل المخبلة تصيح

عبير: شلون توافققيينن ولج انتِ شنو من بشر

گمت بصعوبة لزمت ايدها ابچي واحچي
وتر: اذا تردين تخلصين مني ساعديني اطلع منا فدوه وبعد مراح تشوفين وجهي للابد ولا اتزوج محمد

عبير: شلون

گعدت وفهمتها على كلشي خاطرت بس اعرف بيها حبها عاميها راح تسوي كلشي في سبيل تخلص مني

عبير: انا راح اسويلچ طريق للترك وانتِ اطلعي

وتر: مراح انسالچ هذا المعروف

عبير: انتِ بس نگلعي كلشي ماريد منچ

عافتني وطلعت شويه واجتني اشرتلي اطلع من الغرفة بلا صوت

طلعت جانت دنيا نص الليل مانتبهت على الساعة شگد فتحتلي باب الترك شفته واگف يروح ويرجع بتوتر ماصدگت عيوني رغم جسمي متكسر ركضت عليه استقبلني بحضنه فتح اديناته الي تعلگت بركبته كل قوتي وهو رفعته اله ضميت راسي بركبته وابچي واحچي

وتر: لا تعوفني والله انا تربيت وعرفت ماعندي غيرك

خلا ايده على راسي من ورى حضني حيل يهمس
دائب: اششش كافي لا تخافين هاي انتي صرتي بين اديه اريد اشوف واحد يوصلچ

وتر: اخذني منا احبسني باخر نقطة بالعالم بس المهم يمك

نزلني حتضن وجهي يحچي
دائب: ها ولچ جرب غيري تعرف خيري انا دائب مو شوية

تعلگت بي احچي
وتر: لا تعوفني اريدك

باس راسي وخدودي يحچي
دائب: ضربچ حكيم

رفعت ردن الثوب الجنت لابسته وشوفته ايدي مشطبه وصرت احجيله كل الصار

اباوع عليه عض على شفته بقهر وتمتم متوعد
دائب: لو ماكسرت اديك ورجليك ياحكيم ماطلع انا دائب

وتر: عوفه واخذني هسه

دائب: باچر اخذچ

فزيت احچي بخوف
وتر: ليشششش !!

دائب: مرتي يردون يزوجونها وانا اخطفها خطيفة وينكلب الحق من عدنا علينا لا بابا لا ارجعي وباجر انا اجي اطلعچ من وسط الحفلة

لزمت ياخته احچي
وتر: خاف ماتچي بعد

دائب: اذا مااجيتچ معناها متت بس بهاي الحالة ماگدر اجيچ من روحي تطلع

خليت راسي على صدرة ابچي واهمس
وتر: اسم الله عليك

دائب: يلا يحيلي ادخلي ومشي اليوم طبيعي وانا باچر جايچ افضحهم الج فضيحة

وتر: خايفة

مسح على خدي بظهر كف ايده نصه عليه يباوع بعيوني يهمس
دائب: تثقين بيه بنيتي

وتر: طبعًا

دائب: خلص لعد ادخلي جوه وصيحيلي اختچ اتفاهم وياها

دخلت وصحت العبير بقى يفهمها گوه اقتنعت رجعت للغرفة بعد ما ودعته مرتاحة اعرف بي يسويها ويجي

ثاني يوم جانت الحفلة المفروض العصر انا جبروني جبر البس فستان ولان جسمي بي كدمات مرام جانت مختارتلي فستان مستور وشدت مثل التول على رگبتي وفتحت شعري ونزلته

طلعت گعدت يم النسوان عينهن عليه ومسوين حفله عائلية وبيت سنان هم موجودين احس الناس كلها تتهامز وتتلامز وعبير مامهتمه مرام متفاجئة من حالتها

احس الدقايق صارت مثل السچاجين بگلبي ماتمشي اريد بس اسمع صوت برا ماكو

اجو اهل محمد امه وگرايبة ناس شايفين نفسهم ويباوعون علينا بنظرات حقد وقرف ناصبين ميز وكوشه وكيكة مخلصين ومسوين كل شيء على حسب الاصول

مرت الوقت وبس صارت الساعة اربعة ماحسيت الا صوت طلق صار بالشارع اباوع النسوان كلها فزعت تشوف شكو وعبير اول وحده كمزت ركضت جابتلي عبايه شمرتها عليه تحچي

عبير: اجه حضري نفسچ

گمت وگفت وانا ارجف وماسمع بس صوت الطلق وصارت هوسه الزلم والنسوان هم يصيحن وتعاركن يردن يفهمن شكو گوه دخلتهن مرام تصيح

مرام: عيني نسوانه سالفة صغيرة بين الزلم هسه تنحل ارجعن المكانجن

رجعن كعدت بس ماهدن بس يحچن ويستفسرن وامه صارت تصح بس تريدهم يسكتون جان فجاة اندفع الباب حيل ودخل واحد مااعرفه اول مره اشوفه ضخامة بطول النسوان صارت تطافر حتى تلبس حجابات رفع ايده يحچي

باتر: وياچن البتار شخصيًا حبايب لا تلبسن حجابات عليمن كلنا خوات عيني

صاحت بي مرام
مرام: انت منين وشلون ادخل علينا

باتر: احنا اهل البنيه يابه اجينا ناخذ بنيتنا وچنتنا

مرام: اطلع بره

تجاهلها وباوع بالوجوه استقرت عينه على الكوشه شافني اتقدم عليه ببتسامه يحچي

باتر: اضنچ انتِ مرت اخوي لان بس انتِ الحلوة بدون لبخ الحبايب صايرات سوگ الجمعة

همست بدموع
وتر: انت منو

باتر: انا باتر اخو دائب يلا نطلع منا

ردت اتحرك ويا صاح بيه فززني

باتر: اووكفييي وين طالعة هيج تردين دائب يرتكب بينا جريمة

وتر: هو وين

باتر: يكتل بحكيم

هذا كله والنسوان مصدومات حتى مرام صافنه علينا باوعلهن وصاح

باتر: حبايبنااا نريد عباية عيني

رغم الوضع بس ابتسمت وحجيت
وتر: هاي عندي

باتر: البسيها ولفي روحچ لف

حجاها واتقرب شال الكيكة باوعلهن وكال
باتر: مرتي حامل تتنسى على كيك ماعندي فلوس اشتريلها

شالها انطانياها وكال
باتر: الزمي شبيج فاهية

اخذتها من ايده راح للتوزيعات اخذ منهن هواي يحچي

باتر: هاي الاخوي الچبير بلكي ينفتح بخته ويتزوج باقي عانس حجيات ادعله

راد يطلع رجع اخذ بعد ثنين باوعلي وكال
باتر: هاي النا ناكلهن بالسيارة

اخذ الكيكة من ايدي فتحلي الباب يحچي
باتر: تفضلي عزيزتي الانيقة اودعناجن يالحبايب

طلعت ويا تحت انظار النسوان المصدومات وخايفات من سلاحة الي بأيدة طلعنا من البيت بسرعة واسمع بس صوت يمان ودائب يتعركون وصوتهم طالع الزلم كلها تايد بكلامهم

صعدت بالسيارة دموعي تنزل انطاني مناديل وكال

باتر: وراچ رهبان لا تبجين ولا تخافين

هزيت راسي امسح بدموعي دقايق وطلعوا يمان ودائب من بيت حكيم هو صعد بصفي ويمان بالصدر ودائب يسوق بقى يمان يتطمن عليه ودائب ساكت طول الطريق اباوع الباتر صار ينطيهم توزيعات ويحچي

باتر: حتى جكليت جبتلكم بعد شتردون

يمان: انطينا من الكيكة

باتر: وعلي الي يمد يده عليها اكسرها هاي كيكة مرتي البارحة بـ 2 بالليل كعدتني تريد كيك منين اجيبلها

بقوا يضحكون من بعدها كل واحد وصله يم سيارته تطمنوا عليه ونزلوا بقينا بس انا ودائب جنت كاعده بالكشن الوراه اتقدمت لزمته احچي

وتر: شكرًا ماعرف شگول

دائب: واجبي هذا بنيتي

وتر: شسويت حتى طلعتني

دائب: مو مهم شسويت المهم طلعتي

بوقتها ما كال بس بعدين انا عرفت هو جايب الشيخ العقدلنا والشهود وهم مصور كل العقد لهذا كدر يطلعني غصبًا عن عين حكيم

وتر: راح نرجع البيتنا

دائب: اي البيتنا

رجعت نفسي على الكشن براحة على ما وصلنا البيت نزلني شايلني دخلنا

دائب: فوتي اسبحي وارتاحي انا اسويلج اكل

وتر: مو جوعانه بس اريد انام

هز رأسه بقبول دخلت الغرفتي شفتها مثل ماهي ويمكن ماداخل بيها ابد اخذت ملابس ودخلت سبحت وبعدها طلعت بوجهي للجرباية من التعب حتى ما مشطت غفيت وانا احس بأديناته يلعبن بشعري ...

❛❛❛❛

خيال"

رجعنا للبيت واتطمنت على رميم ادري بيها تعرف تتصرف ويا ، رجعت دخلت على حكمة شفتها نايمة الحمد لله استقر السكر مالتها اليوم من تخربطت ردت اموت كلشي ولا حكمة گلبي

طلعت من الغرفة سمعت يمان يحچي بالتليفون بالمطبخ صوته واصلني فاتح مايك ويا الطرف الثاني اسمعة يگول

يمان: بس فرات غريبة هم محد يسأل عليهم هذولي منين طلعوا هذول كون نطيتهم عنوان

فرات: لا طبعًا هو المؤجر گلي لان ما حصلك گلتله اذا رجع گله مانعرف عنهم شي شالوا واذا نعرف نخبركم

يمان: ما اوصيك ماريد احد يعرف مكان البنات ابد ابد

استغربت يا بنات احنا لو غيرنا بعدها غيروا الموضوع شويه وگال

يمان: فرات اتصال مهم روح خلي اجاوب

سكت شوية بعدها سمعته يهمس

يمان: الو شبيچ ليش تبچين منو وياچ بس على كيفچ وفهميني وحدة وحدة

مبين وواضح يحچي ويا بنت اخذت نفس قوي ودخلت للمطبخ اباوع عليه ماهتملي بس دخلت هو بسرعة طلع مخبوص ويگول

يمان: هسه عليمن هالبچي بابا بس حاولي تفهميني ليش منطيچ حظر

استغربت اول تالي يمان يحچي ويا بنات وهم منو جان يقصد بـ مكالمته ويا فرات وخرت البردة اباوع عليه طلع للحديقة يسولف بعصبية ويأشر بيده بعدها شويه واجه دائب مبين مستعجل ووجه مخطوف من الخوف اخذه وطلعوا للفجر يلا رجعوا جنت گاعدة اصلي خلصت وگعدت افكر بيهم زيم طلعوا مستعجلين خاف صار شي اول ما سمعت صوت سياراتهم طلعت من الغرفة وگفت يم محچر الدرج اسمع دائب يحچي

دائب: الـ ****** شمسوين بيها انا الهم باچر

يمان: اتصلت بباتر گال ولو ما تستاهلون بس اروح وياكم باچر يجي الصبح

دائب: خوش واحنا نروح العصر وصيتها تبقى على اتصال وياك ووياي

دخلوا للاستقبال وهم بعدهم يحچون كلشي ما فهمت من سوالفهم احس يحچون الغاز ما هتميت هواي رجعت للغرفة الحگ انام شويه قبل لا يصير الصبح

مالحگت نمت شويه ودگ المنبة كعدت بدلت ملابسي ولبست حجابي ونزلت جوه لگيت خاله حكمة گاعدة حضنتها وعايدتها باوعتلي وحچت

حكمة: چا رميم وين

تنهدت وحچيت
خيال: يم باتر من البارحة راحت

صاحت بيه فززتني
حكمة: شنههيييي شلون تخلونه ياخذها شمالكم تخبلتوا

خيال: اهدي خاله فدوه لا تعصبين هي راحت ويا برضاتها ماتدرين بيهم ثنينهم أعند من بعض

حكمة: ولچ اخيتچ حبلة وهذا مسودن بلا سوا بيها شي

كلش قلقني كلام حكمة بقيت صافنة بوجها عضت على ايدها تحچي بحرگة

حكمة: خيبة شلون تخلينها تطلع وتروح ويا شلوننن

خيال: خاله بالنهاية الي بطنها جهاله اكيد مايسويلها شي

حكمة: ابقي هيج فاهية ابقي ااخخ يايابه يابوية

عافتني وطلعت دخلت للاستقبال رحت وراها وگفت بالباب الولد چانوا نايمين گعدتهم دفر تصيح

حكمة: گعدوا ولد الچلاب انعل ابوكم لابو اخوكم الچلب

خطيه فزوا عليها النعاس بعيونهم عبالهم بيها شي يحچون بخوف شبيج يمه

حكمة: هسه تاخذوني البيت اخوكم الچلب ابن الچلب

دائب: يمه غير نفتهم شكو

حكمة: شلون تخلونه ياخذ البت وهي حبلة وهذا متخبل

يمان: قابل احنا انطيناها اله هي راحت ويا

حكمة: اگله گوممم اخذني عليها

گام دائب لزمها گعدها على التخم طلعت من الاستقبال بسرعة من شفته بدون تيشيرت

دائب: هسه هم يجون يمه اهدي البارحة جنتي بالمستشفى

حكمة: مو ورا اخوكم الشلايتي تبقى بيه عافية

بقوا يهدون بيها وانا دخلت للمطبخ اكمل تجهيز الريوگ ورا حكمة حضرته وجهزته وخليته على صفحة اسمعهم طلعوا للصالة وحكمة بعدها تفرفرح وتحچي بعصبية دخلوا غسلوا وگعدوا وحكمة تحچي وترزل بيهم وهم گاعدين على التخم ويسمعون اول ما طلعت من المطبخ اندگ الباب راح يمان يفتحه ودائب گال

دائب: هذا الشلايتي اجاچ

سرفنت اردانها تحچي بتوعد
حكمة: ايّ هلا بي

خيال: على كيفچ خاله انتِ مريضة

حكمة: اريدن اطلع ضيم المرض كله بي

دخل يمان وبعده دخلوا باتر ورميم وراه صاحت بي حكمة

حكمة: حاطلي تهديد وتدخل البيتي بكل عين گويه جنگ عين الـگـ**

ضحك اتقرب منها جعص وجها يبوس بيها ويحچي

باتر: اهدد روحي وماهددچ العافية انتِ

دفعته حيل تصيح احسها تريد تطلع حركتها بي لان مشتاقتله

حكمة: ميل مني شلايتي ولك انا حكمة انت تهددني وتخليلي خنجر

باتر: تستاهلين حكومتي

حكمة: هاا استاهل مو دوگفلي

عافتنا ودخلت للغرفة دائب ويمان نصبوا عليه وهي شويه وطلعت بيدها شحاطتها تأشر بيها وتحچي

حكمة: لا حسبالك كبرت ونسيت الشحاطة مال الفواتح هاي شوفها بعدها برقمها

باتر: ولك وسيراميك مكة صارت السالفة صدگ

شرد منها ورا التخم صار وهي وراه شكلهم يموت ضحك

باتر: افا عليچ يمه تردين تكتليني بشحاطة الفواتح گدام مرتي احترميني بس كدامها

حكمة: ومحمد لو ما مرتك عزيزة على گلبي چا جمعتها وياك

رجعت تركض وراه باوع للولد وصاح بيهم

باتر: ومرض انتم بس تضحكون سوو شي نقذوني ترى ماروح وياكم والحمزة

گوه لزموها گعدوها على التخم فحطانة مدت ايدها وگالت الباتر

حكمة: تعال بوس ايدي واتعذر مني يلا

باتر: فوگاها

حكمة: تسوي هيچ لو اگوم هينك شلايتي

اباوع الرميم ضاجت ماعرف ليش همست
خيال: ليش ضجتي

رميم: احس تجرح مشاعرة حتى اذا شقى ماتروح من باله ولا واحد بيهم جاي يستوعبه كل اليعرفونه عليه هو مايتأثر وبس يضحك ويتشاقه مايدرون بي هو اكثر واحد بيهم يتحسس

بعدها تحچي انتبهت على باتر باس رأس حكمة وگال
باتر: كل عام وانتِ بخير شمعتي

وهي هم حضنته حيل تبچي وتحچي
حكمة: طلعت برئ ينظر عيني اجتني امك بيوم محكمتك وگلتلي ابني بريئ

حضنها حيل بدون كلام وكلها سكتت شويه وبعدها ابتعد فرگ اديه بحماس باوع لـ يمان ودائب

باتر: بشروا اليوم اكو طگ منا للعصر

دائب: حضر روحك

باتر: جاهز

عايدهم ورجع دار عليه وگال
باتر: زوجة اخي الكريمة كل عام وانتِ بالف خير يوم عرسچ ان شاء الله

ضحكت
خيال: شكرًا

يمان: نچب هي معرسة

باتر: اقصد انت لو ماتريد الواحد يسوي وياك زين

خيال: لا عيني شكرًا ماريد

حچيتها وعفتهم ودخلت للمطبخ انقل بالريوگ ورميم صعدت تبدل حكمة ودائب يم باتر حسيت على شخص دخل وراي للمطبخ باوعت شفته يمان اتقرب مني گال

يمان: ماعايدتيني ليش؟

خيال: كل عام وانت بخير

يمان: بسسس

خيال: شتريد

اتقرب عليه كلش حضني من ورى وباسني بخدي
يمان: اريد عيدية

خيال: العيديات بس للاطفال وانت مو طفل

يمان: احسبيني طفلچ مو مشكلة

خيال: ابتعد يمان هسه يدخلون علينا

يمان: مو قبل مااخذ عيديتي

نفخت بملل ودرت وجهي بسته بخدة بسرعة وطلعت من المطبخ نزلت رميم وگعدنا نتريگ وباتر نهد بالسوالف على طفولتهم احسه صار ينتقم منهم كل شويه يذكرهم بموقف اخر شي ملل دائب كل شويه يگله

باتر: تذكر من اجيتنا ااييع شلون وصخ بيومها امي ضلت تجلف بي سبع ساعات يلا بينت الفانيلة مالتگ

دائب: مو مثلك انا من انجرحت عفت اللزگة شهرين ملزوگة برجلي اليكول اول مره ينجرح فرحان مدري شكو الخايس

باتر: ايي ولك لا تذكرني چنت فرحان باللزگة اول مره اشوفها

يمان: لو من رحت تشوف صاحبتك وتكربست بالطينه

اول ماحچه يمان باع الرميم وگال
باتر: وسيد چنت مراهق

رميم: عود هسه مبطل

يمان: باتر جان اي وحده تفوت منه يعشكها

حكمة: گلبه رچيچ سودة عليه

باتر: ولا يسكت يمان افندي ولا يكول هو انسحل من اول الف مشگوگ وصاحبك عشگ باب البيت اربعة وعشرين ساعة مگابل بيت حكيم وكاعد

اباوع الدائب اشر الرميم يعني احچي حمحمت وگال

رميم: ايّ على الاقل شايفينهم بالحقيقة اكو واحد انسحل لان كتبت له طالع حلو اليوم

اباوع عليهم يضحكون وهو يعض اصبعة حيل يتوعد وحكمة ترزل بيهم خلصنا وبقوا للظهر متجمعين يم حكمة هيج خلقوا جو بالبيت يجنن اخر شي ورى الظهر طلعوا گالوا عدنا شغل بدلوا وطلعوا مدري شعدهم بس قبلها بقوا ساعة هم يخططون ... للعصر يلا رجعوا دائب ماكو بس باتر ويمان

رجعنا گعدنا للمغرب كلش گام باتر وگال

باتر: يلا عيني احنا نروح البيتنا

رميم: بعد وقت

مد ايده الها اشر بحواجبه بمعني گومي نفخت بأنزعاج لزمت ايده وگامت

حكمة: شمالك ويا البت عوفها وانت ولي

باتر: لا تروح وياي شعدها باقيه هنا

حكمة: لا الا تبقى

خيال: خليهم يروحون البيتهم حكوم شنسوي بيهم

حكمة: شوف الفوصة شوف تريد يخلالها البيت

ضحكوا اتقربت بستها احچي
خيال: يخلالي البيت وياج

حكمة: هاهوو هاهوو احاجيچ يبنتي اسمعچ يچنتي سوله تاك

باتر: الله عليج حكووومممم

اتقرب يبوس بيها وهي تضحك اباوع اليمان يباوع عليه بتعب مشيت كدامهم احجي

خيال: يلا البيتكم من غير مطرود

رميم تأشرلي يعني بسيطة لزم ايدها يردون يطلعون كلنا اتجمعنا يم الباب فجأة اندك

حكمة: اول تالي بابنا يندگ هذا ياهو الجاينا

يمان: هسه نشوف

اتقدم يمان فتح الباب سمعنا صوت رجال خشن كال

- هذا بيت الحجيه حكمة واولادها

يمان: اي تفضل انا ابنها الچبير يمان

- احب اعرفك على نفسي انا عم بنات حچي سليمان طالب عدنان سألنا وگالوا البنات عدكم ....

   يتبع ...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

TikTok: zeinab_.ali1

Insta: zainab__.ali1

متابعة ممتعة🦋