رواية تاروت الفصل الثاني وثلاثون 32 - بقلم زيـنـب علـي 🦢

#تاروت

البارت «33»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
.Insta: zainab__.ali1

هلي شوفوني ما أنفع
شني من المغرب أتوجع ؟
صرت ماي بـ بلم واتخيل شمكروه
علیه تگابلوا رادوني بس أطلع
أنه المفروض تبچولي
انه المو هيج اتودع

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

من گال هيج گلبي نبض حيل للحظة حسيت الزمن توقف ويا كلمته الي گالها بصوت مبحوح ممتلئ بالانكسار هزيت راسي احچي بدموع

خيال: افهم حس بيه المفروض انت اكثر بشر تحس بناري مو فقط لان تحبني انا وانت عشنا نفس المعاناة انت امك انقتلت گبال عينك وانا هم شفت اهلي مقتولين گبال عيني شتريدني اسوي يمان ما جاي تطفه نار گلبي

صاح بيه
يمان: بس مو تكسريني مو تضيعين عليه شغل شهور طويلة

خيال: مراح يضيع شي بجميع الاحوال القضية راح تنحل ويبين القاتل ان جان اخوك او غير واحد

اباوع عليه راد يحچي بس تراجع عافني وطلع لزمت راسي احسه راح ينفجر وكلمته بقت ترن بأذني مسحت دموعي وانا احچي

خيال: لو اعرف اخسر حياتي راح اكمل بالقضية واطلع كتال اهلي

تذكرت رميم فكرت أن بعد گعدتي كلش مو لايقة ولازم اخذ اختي ونطلع بس وين نروح صفنت شويه بعدها گمت بسرعة دورت بغراضي لگيت مفاتيح الشقة الي انطاها الي اخذت تليفوني اتصلت عليها جاوبنتي تحچي

رميم: خيال تعاي اخذيني ماريد ابقى وحدي

خيال: حضري نفسچ فد شويه امر عليچ اخذچ

رميم: وين نروح

خيال: عدنا شقه يعني حتى اذا من عنده هي اول وتالي بأسمي شنسويله قابل

رميم: متأكدة

تنهدت احچي
خيال: ماعندنا غير مكان ملك النا غير الشقه وماعتقد نرجع يم حكمة هسه خايفة عليها ماريدها تعرف بباتر انسجن لان اذا تعرف تنجلط ما تتحمل

رميم: راح انتظرچ بسرعة تعاي لان شويه احس نفسي دايخة كلش وتعبانة

خيال: ساعة وانا يمچ

غلقته منها ولميت غراضي كلهن بسرعة بسرعة طلعت من الشقة قفلتها ودكيت باب الشقة المقابيلها طلعتي مرأة متوسطة العمر انطيتها المفتاح وويا ظرف بي مبلغ وكلتلها من تشوف دائب او يدگ الباب تنطيهم اله اخذتهم خطية ماگالت شي

طلعت بوجهي الرميم للعنوان الي دزته الي وصلت اول ما فتحتلي الباب حضنتني كلها ترجف وجها اصفر حضنتها حيل الي احچي

خيال: ريمي ليش هيچ سويتي بيه شلون تعوفيني

رميم: الصار لازم يصير حتى ناخذ حقنا

حجتها ورجعت حضنتني ترجف

خيال: على كيفج امي انتِ ما يحتاج كل هالرجيف

رميم: مشتاقتلچ والله

حجتها بدموع ابتعدت امسح بوجها ابوس بيها واحچي

خيال: لا تعوفيني بعد ردت اموت وراچ شسوالچ رميم عنفچ ضربچ الما يخاف من الله حبسچ مو

رميم: لا والله لا لتخافين ماعنفني ولا حبسني عرفت اسيطر وتماشه ويا الوضع

خيال: متأكدة مسوالچ شي ولا ضربچ

هزت راسها بـ ايّ سحبتني من ايدي وگالت
رميم: تعاي ندخل

دخلت وحچيت
خيال: وين غراضچ يلا نطلع قبل لا يتأخر والوقت

رميم: بعدني الملم بيهن فوگ تعاي وياي خلي نخلص بسرعة ونطلع منا

صعدت وراها للغرفة شفتها ململه نص الغراض الي لفتني ان ملابسه موجودة بنفس الغرفة حچيت مستفسرة

خيال: شنو جنتوا تنامون بغرفة وحدة

بسرعة باوعتلي صفنت شويه بعدها گالت بعدم اهتمام وهي ترفع شعرها

رميم: ايّ

انتبهت على رگبتها ونصعقت من المنظر اول ما نتبهت على نظراتي بسرعة جرت الشال وخلته على رگبتها تغطي بيها اتقربت منها احچي

خيال: هاي شنو ؟

رميم: شنو

خيال: چنت اريد اسألچ بس بعد هالمنظر ما اعتقد اكو داعي للسؤال وصلني الجواب

تحسرت وگالت بقلة حيلة
رميم: چان لازم هيچ يصير حتى اكدر اخذ المعلومات وتبين الحقيقة وين

ماتحملت جريتها من ايدها اصيح جمرت من الاعصاب
خيال: بس مو على حساب نفسچ رمييممم شلون هيچ تسوين شلون تسلمين نفسچ اله تخبلتييي

صاحت بيه
رميم: تتوقعينها سهلة عليه تتوقعين جنت فرحانه ومكيفة والله بالدقيقة اموت الف مره روحي تنازعني وتصير مثل العصف تتناثر بس مجبورة لو ما مسويه هيچ جا خطوة وحدة ماتحركت لو معاندته بهذيچ الليلة جان ممكن يحبسني يعذبني او يقتلني بلا ما يحس حتى ، انا سويت هيچ وكسرت كل جبروته بهاي الخطوة وخليته بدل ما يحقد ويعذبني يتعاطف وياي او يحس بالذنب ناحيتي

بقيت صافنه عليها اريد استوعب اختي شوكت عرفته ودرست شخصيته الهاي الدرجة اتقربت عليه تحچي بدموع

رميم: لازم اكو تضحيه وانا ضحيت والحمد لله رب العالمين ما خيبني اصريت وصلت للأريده وهذاك وينه باتر بالسجن هسه

گعدت على الچربايه حچيت بتعب
خيال: واحتمال يطلع مو هو القاتل

رميم: قاتل مو قاتل هذا الشي ميهمني المهم تطلع الحقيقة الي هو ابد ما حاول ينفيها خيال هو بعظمة لسانه گدامي يحچيها انا الكتلتهم ما حاول يثبتلي العكس ولو مره وحدة

سكتت شويه تاخذ نفس وتفتر بالغرفة رجعت كالت بنهيار

رميم: حتى من يتقرب مني تخيلي يهمس بأذني انا الكتلتهم وانتِ هسه بين اديه يحاول بشتى الطرق يأذيني وما ستسلمت وكملت و اخذت المعلومات من بين اديه لااااا واحد يلومني لان هيج سوويييت

شمرت الشال من رگبتها ودخلت بنوبة بكاء اول مره اشوفها تبچي بهاي الطريقة گمت بسرعة حضنتها اسكت بيها

خيال: خلص خلص ارتاحي يعمري

رميم: والله جنت اموت اكره نفسي بس مجبورة

خيال: الصار صار وما يفيد الكلام بعد كل الحچي هواء في شبك

حضنتني ورجعت تبچي منهارة گوه سكتتها واخذتها غسلت وجها ورجعت لمينا الغراض استفربت من شفتها اخذت تيشيرت من ملابسة ورشت عليه عطر ماركة رجالية وخلته بالجنطة ما حچيت سكتت بس الافكار صارت تهاجمني انتبهت على صوتها تحچي

رميم: هاي هي خلصت

نزلنا وهي تفقدت البيت وطفت الغاز وقاطع الكهرباء قفلته وطلعنا للشقة مالتنا اول ما وصلنا بدينا بيها بحملة تنظيف ماگدرنا نگعد بيها وهي متربة رميم كل شويه تدوخ ماخليتها تشتغل هواي انا نزلت بيها جلف وهم صغيرة بسرعة خلصتها

سبحنا وارتاحيتا ودخلنا انام انتبهت عليها جابت غطاها وحچت

رميم: اريد بحضنچ

ابتسمت فتحتلها اديناتي وگلت
خيال: تعاي اذا ماتخذچ بحضني منو اخذ بعد

ابتسمت واجت نامت بحضني تنهدت بتعب افكر واخيرا بعد عذاب شهرين گدرت ارجع اختي الحضني ... بس بومها ماكدرت انام للصبح وهي هم بس صافنه وتفكر الحد ما غفت وانا الوجه الفجر صليت وبعدها حسيت قواي خارت ونمت من تعب التفكير

مر كم يوم واحنا مستقرين بالشقه وانا اتابع القضية وبكر زميلي يمشي بالاشياء المهمة الحد ما گلي نقلوهم من النظارة للسجن يلا ارتاحيت وطمنت بعد ما يگدرون يطلعون الا بعد المحاكمة، ايام عادية لكن انتبهت على رميم صايره تتحسس من كلشي ودمعتها بطرف عينها رغم هي اذا واحد يذبحها ما تبچي بسهولة ابد وهم تكره ريحة الزفرة وتلعب نفسها من الچاي ومرات ادخل الغرفتها اشوف التيشيرت جوه راسها شكيت بالموضوع

الا ما بيوم فزيت على صوت ركضة رميم دخلت للحمام الي بالغرفة وصرت اسمعها تتقيئ كمت بخوف دگيت الباب احچي

خيال: رميم شبيچ امي شو فتحي الباب خلي ادخل

ماتجاوبني بس اسمع صوتها تتقيئ دقايق وفتحت الباب تنشف بوجها

خيال: شجاي يصير وياچ

كالت والخوف مبين على وجها
رميم: مادري يمكن ماكله أكله اذت معدتي

رادت تفوت مني ستوقفتها احچي بتعب
خيال: رميم خاف حامل

اباوع عليها صفنت بوجهي ثاغرة خلت أيدها على بطنها وحچت بخوف

رميم: لا لا مستحيل

اتقربت منها احچي
خيال: جنتي تاخذين حبوب منع حمل

رميم: لا بس اووو خيال مادري بس مستحيل حامل

صحت بيها
خيال: يعني جان لازم تفكرين والذكية من سويتي سوايتچ الماتتسولف اكيد تحبلين وانتي مماخذه احتياطاتچ

رميم: معقولة

خيال: شكد صارلها ماكو

رميم: من اول ماتزوجت ماكو خيال يعني شنو انا هسه حامل

خيال: احتمال كلش چبير ايّ هسه نروح للمستشفى نتأكد

شهگت تحچي بدموع
رميم: مستحيل شلون بيه اذا طلعت حامل

خيال: هذا نتيجة غلطچ ومهما كان لازم تتحملينه

رميم: خيال ماتنعقل فكري بيها مايصير شلون شلون انزله مااخلي

اتقربت عليه احچي بعصبية محذرتها
خيال: اياچ اسمع هذا الكلام منچ مره ثانية اذا طلعتي حامل يا رميم تنچبين وتسكتين شنو ذنب الطفل هاي روح بشر مو لعبة

رميم: خيال شجاي تحچين انتِ

خيال: احچي الي لازم ينحچي خلي نتأكد هسه وبعدها الله كريم بدلي بسرعة خلي نطلع

عافتني والخوف مبين على وجها ماعرفت شسوي خايفة اكثر منها بس ماريد ابين گدامها اخذتها وطلعنا الاقرب مستشفى سوينا تحليل بعدها گوه طلعتها حتى ناكل على ما تطلع النتيجة اباوع عليها اكلت كلشي موجود رغم هي ضايجة ومقهورة

اول ما رجعنا للمستشفى لگينا التحليل طالع اخذنا ودخلنا للدكتورة الي اكدت حملها سوت سونار وكلتلها ان هي حامل بأسبوعها السادس ماحچيت شي رغم انقهرت بس بالنهاية يبقى روح وماله ذنب بالي صار

طلعنا من الدكتورة اباوع عليها وجها بهت وحلگها صار ابيض ومانطقت بحرف واحد عفتها براحتها ورجعنا للبيت هي بسرعة دخلت للغرفة وصرت اسمع بس بچيها ماعرفت شسوي شلون اتصرف ويا الموضوع

شويه وطلعت جنت گاعدة بالصالة بعدني مسحت وجها تحچي

رميم: خيال لازم ينزل مايبقى

گمت عليها احچي بحدة
خيال: كلتلچ هذا الموضوع ما تخلينا ببالچ مثل ما قدمتي على هالخطوة وانتي تجهلين عاقبتها لازم تتحملين نتيجة افعالچ وما تطلعين حقدچ بروح بريئة مالها ذنب ذنبة الوحيد ابو باتر وامه رميم

رميم: افهمي عليه شلون

قاطعتها

خيال: اسمعيني زين ابنچ هذا قطعة منچ يصير وتربينه وتحبينه وماتحسسينه بنقص واذا سمعت منچ كلمة انزله مرة ثانية حظچ اطيحه ، على شنو تصلين وتصومين اذا تردين تقتلين روح بريئة شنو تفرقين عن باتر هااا مو تگولين عليه مجرم

كعدت على التخم تبچي حچيت بلوم
خيال: جان فكرتي من قبل مو هسه جايتني تبچين رميم بعد كلشي ما ينفع تتقبلين الواقع غصبًا عليچ

عفتها ودخلت للغرفة وهي هم دخلت الغرفتها طول اليوم ماطلعت حتى على الغداء هم ماجت وانا عفتها براحتها لليل كلش يلا دكت الباب ودخلت عليه تحچي

رميم: انا قررت احتفظ بابني واليصير خلي يصير على گولتچ هو ماله ذنب باغلاطنا قابل هو گلي روحي واشمري نفسچ بحضن باتر

كمت حظنتها احچي
خيال: وانا ماراح اعوفچ صح الصار غلط بس صار بعد ما بيدنا شي نغيره ...

❛❛❛❛

وتر"

متمددة وعيني على الساعة صارت 2 الظهر وهو بعده يتصل ويصيح اتصال بعد اتصال ومخبوص هالايام واعصابة واكفة الدرجة حرف واحد ما استرجي احچي ويا ولا اعاند گمت طلعت من الغرفة شفته گاعد على اول بايه من الدرج والحسابه بحضنه فاتح مايك ويحچي اتقربت صعدت گعد ورا على باية الدرج الي فوگه سند راسه على رجلي وحچه بالتليفون

دائب: يمان حاول ويا رحمة للاسلام

يمان: ولك شلع گلبي مايقبل يتعاون ويا المحامين ولا يقبل يواجهنا حتى ، المهم انت وين وصلت

دائب: حصلت نسخة من التسجيلات وجاي اشتغل عليهن وانت

يمان: وانا ماخذ الرسائل البغداد انا وفرات بلكي نگدر نشوف واحد يفك التشفير دلوني على واحد مضبوط

دائب: وامي

يمان: امك رجعت البيتها وماتقبل تفتحلي حتى الباب

دائب: كون عرفت

يمان: لا ماريدها تعرف والبنات عرفت مكانهن بالشقه مالتي القديمة

عض على اصبعة يحچي بوعيد
دائب: خيال اخ خيال وعلي متحلف بيها ربتلي عله وخاصة من طالعة من الشقه ومخليتلي فلوس عود صايرتلي بس هي وبس

يمان: خلي نفك التشفير ونتفاهم بعدين

تنهد يحچي بتعب
دائب: اخخ لو ينفك التشفير چا اليوم خلصت القضية على الاقل نعرف راسنا من رجلينا

بقى يحچي ويا مافهمت شي بس حسب ما هو سولفلي ان اخوهم مورطينه بسالفة ويردون يطلعونها منه غلق الاتصال ورفع رأسه يباوع لي غمض عيونه يحچي

دائب: نعسان وتعبان

وتر: ايي نام

دائب: تعاي بحضني شويه على ماانام

حجاها وگام وكف لزم ايدي ردت احچي خزرني سكتت ومشيت ويا كعدت على الجربايه وهو خلا راسه بحضني غمض ونام

من بعدها مرت الايام هو كلش كلش انشغل لا يطلع ولا يمشي مگابل حاسباته وتليفوناته مبسط بنص الصالة وگاعد يشتغل حتى مايحچي وانا باقية انتظر رحمة ربي وليلى اختفت بعد ما سمعت حتى اسمها وخفت اسألة خاف يشك بالموضوع ...

وبيوم وانا بالغرفة سمعت صوت صيحته صاح بصوت عالي

دائب: شلون هيييج صار

ركضت بسرعة وگفت بالباب اشوفه شبي شفته يلم بالحاسبات جانن اربعة تقريبًا ويحچي كالعادة فاتح مايك

اسمع اخو يحچي بتعب
يمان: انفك التشفير وكلشي صار بالمكشوف ومثل ما توقعنا

دائب: وانا هم كملت شغلي ويا التسجيلات ، انت وين

گله على المكان غلقة ودخل بدل وطلع بسرعة مستعجل حتى ماكالي طالع ولا انتبة عليه من الاستعجال والحماس ماعرف شنو صار بس العصبية واضحة عليه ...

❛❛❛❛

خيال"

عفت رميم نايمة الصبح نزلت متوجه للمركز اتصل بيه بكر وگال انتظرچ هناك ماعرفت شنو السالفة بدلت ملابسي ونزلت...

بعدني بالطريق اتصل بيه بكر جاوبته

خيال: بكر صاير شي ليش رايحين للمركز

بكر: ماعرف ست خيال بس اتصل بيه الضابط فواز ورادنا موجودين

خيال: انا راح اوصل للمركز

بكر: تلگيني منتظرچ بالباب

غلقته من عنده وفعلا وصلت لگيت بكر منتظرني بالباب سلمت عليه ودخلنا الداخل المركز وبعدها الغرفة فواز الي اول ما شافنا گام وحچه مرحب بينا كعدنا باوعلي وگال

فواز: خيال تدرين اتقدمت ادلة جديدة بخصوص قضيتكم

استغربت من رفع التكلفه بينا بس غلست وحچيت بتفهم

خيال: ماكو شي جديد هي كل فترة يقدمون أدلة

فواز: وخاصة هم موكلين الباتر من أكبر واشطر المحامين يعني راح يلوفونها عليچ ديري بالچ

بكر: بس هالمرة الموضوع مختلف اكو أدلة وتصوير كاميرات يعني القضية محسومة غير قابله للتلاعب

اتجاهل بكر ورجع وجهلي الكلام
فواز: يعني اذا طلع باتر بريئ ماراح تسوين شي

خيال: اذا طلعت برائته بحق طبعا مااسوي شي قابل گوه اخليها برأسه اذا هو فعلًا بريئ

فواز: بس خطيبچ جاي يسعى بكل الطرق حتى يطلع اخو من حبل المشنقة بس اكو شي محيرني

خيال: الي هو !

فواز: هو ابد ما جاي يتعاون وياهم ومصر على اقوالة واذا ما نفاها بعد كلشي مايفيده

خيال: شلون ممكن يغير اقواله

فواز: المفروض يغير اقواله قبل لا تتثبت ويگول ان هو جان تحت التعذيب واعترف بس هو مايريد

گمت وحچيت وانا الم اوراقي
خيال: يصير اشوفه بالمواجهة

فواز: مايقبل يواجه أحد بس ممكن ادبرلچ الموضوع اذا تحبين

خيال: ياريت اكون ممنونة منك

گام لبس بيريته وگال
فواز: نگدر نتوجه هسه

طلعنا ورى اعرف بي يصيد بالمي العكر ويحاول يخلق مشاكل بيني وبين يمان ماهتميت واستغليت هاي السالفة على ما تخلص القضية حتى بكر انتبه عليه واستغرب من حركاته

صعدت ويا المحامي وطلعنا ورى وصلت هناك انتظرنا شويه بعدها اجه گال ادخل الوحده من الغرف اشرلي عليها عفته كاعد ويا بكر ودخلت للغرفة شفته كاعد اول ما اجت عينه عليه كام وگف خازرني يحچي

باتر: انتي شجابچ هنا وباي حق تقابليني

خيال: لازم نحچي باتر بس قبلها تأكد انا حالي من حالكم هم جاي ادور على الحقيقة

ضحك بصوت عالي وگال
باتر: بعديش ، بعد ما اتفقتي ويا اهلي ضدي كلكم اشتركتوا بهاي اللعبة القذرة حتى توصلوني الهاي المرحلة كلكم التافيتوا عليه وقدمتوني الحبل المشنقة

خيال: يعني متأكد من نفسك انت النفذت الجريمة فكر بيها

گعد وگال بصوت خافت
باتر: مادري مادري انا بكلشي مادري بس مشيت ويا الموجة مالتكم واعترفت على روحي

جريت الكرسي گعدت گباله احچي
خيال: باتر اسمعني انا ماريد اي شخص يشيل السالفة وخلص لا انا اريد يطلع القاتل الحقيقي ساعدني حتى اساعدك واتمنى تطلع مو انت

باتر: انا اشيل الليلة وخلص مثل ما تردون

خيال: جاي تفهمني شنو احچي اريد اعرف القاتل الحقيقي يعني اذا مو انت ليش حتى تشيل الليلة على گولتك

باتر: هذا العندي وحتى ويا المحامين ماجاي اتعاون

خيال: إذًا انت تريد تروح الحبل المشنقة بيدك

باتر: بالضبط وهسه اريد ارجع

راد يگوم لزمته من ايده مستوقفته باوعتله وحچيت

خيال: وصلك الخبر لو انت اصلا ماشايف واحد من الولد

باتر: امي بيها شي انا ما شفت احد منهم

خيال: لا لا حكمة زينه بعدها للان ماتعرف باي شي بس رميم

رفعت انظاري اله شفته ركز وياي منتظرني احچي يسد على ايده حيل

بلعت ريگ وهمست
خيال: رميم حامل

رجع گعد وتنهد بحسره ابتسم بقهر وگال
باتر: والله جنت شاك بيها وخاصة من جانت تصير عدها اعراض اخر فتره ابحث بالنت وقارن بحالتها كلها تدل على ان هي حامل بس ماصدگت

خيال: حللت وطلعت حامل فعلًا

باتر: وين هي هسه

خيال: يمي حكمة ماتعرف بيها حامل الهسه حاسبها يمك

رفع راسه الي فوگ ساد عيونه حيل وصار يشنچ بركبته

خيال: اذا تريد ابنك الخاطرة تعاون ويا المحامين وخلي نعرف الحقيقة

باتر: واذا انا السويتها صدگ

خيال: تستاهل عقابك

باتر: ولو طلعت بريئ

خيال: نتستاهل عقابك

هز راسه بوعيد وگال
باتر: اذا صدك وطلعت راح اندمكم على الساعة السوده العرفتوني بيها

صك على اسنانه كام ورجع گال
باتر: انتهت المواجهة

ردت اطلع رجعت باوعتله وگلت
خيال: اتمنى مو انت القاتل ولا اختي راح تدمر

باتر: وتدمر اكثر اذا طلعت فعلًا مو القاتل

كلامه رعبني هالانسان غريب اطوار ماعرف على شنو ناوي عفته وطلعت بقيت شويه احچي واتفق ويا بكر وبعدها رجعت للبيت ومن يومها ماشفت يمان ولا دائب ولا واحد بيهم الكل مشغول ويدور على الحقيقة بطريقة الخاصة من بعدها قدمت كل الاثباتات الگدرت احصل عليهن وبقينا ننتظر المحكمة ..

(تم التحفظ على تفاصيل كشف جريمة لاسباب تخص الابطال والعاملين على كشفها )

❛❛❛❛

فزيت على صوت رميم لزمت ايدي ايدها ترجف باوعتلها غمضت عيونها تحچي

رميم: بطني صارت توجعني شوكت يجي دورنا

رقعت راسي تنهدت بحسرة بهاي الابع اشهر المرت شگد عشنا احداث صعبة ما مصدگة اليوم المحكمة اليوم كلشي يخلص جان بوكتها رمضان والجو حار مديت ايدي لزمت بطنها احچي

خيال: وجهج اصفر كلتلچ لا تصومين ماتگدرين وانتي حامل بتوأم وصيام والجو حار

رميم: لا ما عليه شي وحملي مستقر راح ادخل الشهر السادس مابقى شي

مشيت ايدي على بطنها البارزة بشكل كلش واضح اليشوفها يكول باواخر اشهرها لان توأم ابتسمت احچي

خيال: شنو شعورج وانتي بعد اشهر قليلة تصيرين ماما

رميم: هو واحد وجنت شايله هم اله مو عاد طلعت حامل بتوأم ولد

ابتسمت بحزن وهي كملت كلامها وگالت

رميم: ان شاء الله هالمره القضاء ينصفنا

خيال: ان شاء الله

ردفت بحزن
رميم : كلش ضايجه على حكمة من عرفت البتار ممكن ينحكم إعدام لحد لان ماصحت صارلها يومين رغم فرحتها بحملي الماگدرت تضمها تخيلي صدك ينعدم !

خيال: بس تخلص المرافعة نروحلها للمستشفى على اعصابي عفتها والله وانوب وگعت وهي صايمة سودة عليه

رفعت راسي شفت يمان ودائب گاعدين مقابيلنا على صفحة يمان گاعد ودائب اتقرب منه انطاه كوب گهوه واسمعه يگله

دائب: هاك الزم ان شاء الله خير صار شهور انهد حيلنا

يمان: راح ينهد حيلي على وصية امي تخيل بعد الصار كله مايطلع منها

دائب: گول يالله يمان لا تفاول

حجاها وگام يفتر كل شويه يباوع الساعته وينفخ بضجر رفع رأسه يمان وصارت عينه علينا ندستني رميم تحجي

رميم: باعي يمان سوده عليه شگد متغير

انتبهت عليه مبهذل ولحيته طولانه ومخربطة رجعت گالت

رميم: الكل مبهذل ما عدى اخوهم عبالك رايح الزفة لا طولت لحيته ولا تبهذل جاي للمحكمة ارتب مني

غصب عني ابتسمت رغم هي حجتها بجديته وتعقچ بوجها متألمة

ورى دقايق وحانت ساعة الصفر من صاحوا باسمينا وصار دورنا تنهدت كمت امشي متوجهة الباب العدالة

قبل خمس سنوات من اليوم كعدت هاي الكعدة وانا جاهلة الكلشي حوالية لكن اليوم ختلفت اعمارنا وتفكيرنا وموقفنا بقضية اهلي هالمره انا المسيطرة وانا مصدر القوة هالمره القتلوا اهلي هم الي راح يطلعون بالخسارة وبالخيبة وانا الي راح اطلع اضحك راح اخذ بثار ضرغام وهيلين وسليمان سنين الوحدة والعذاب سواء كان باتر القاتل او غيره

اول ما دخلنا جابوهم اباوع الباتر صارت عينه على رميم وهي جانت لابس صدرية حوامل لونها رصاصي مقفل بوردي وصايرة تجنن تجنن وخاصة بهاي الفترة الحمل كلش محليتها

...

رميم: رفعت راسي باوعت له شفته عيونه عليه اول ماصارت عيني عليه ابستم انتبهت عليه متغير كلش وجهة تعبان واثار التعذيب واضحة عليه بس ماكو بوجهة اي خدوش وكدمات بس الواضح متعذب

نزل انظاره يباوع البطني حسيت اطفالي حسوا بي مدري انا توترت وصاروا يركلوني وتحركون

بعد التداول صار موعد النطق بالحكم اباوع عليه وگف بكل هيبة خلي ايده اليمين فوك اليسار لازم كف بكف ويباوع علينا بكل شموخ باوعلي ورفع حاجبه بتحدي وانا هم رفعت راسي اباوع عليه بكل تكبر واركز بنص عيونه بلا مااهتز گلبي اسود معتم من ناحيته

ماهتميت شنو ما كان الحكم خلي يكون غمضت عيوني من القاضي صار يحچي

- حكمة المحكمة حضوريًا بتاريخ على المتهم باتر صمد

وگال تاريخ اليوم واسمه الثلاثي بعدها انصدمت من نطق الحروف حسيتها تتسلسل وتدخل الاذني حرف حرف

- وبعد الاطلاع على كل ما ورد بالقضية والاستماع الى كافة الاطراف والشهود حكمت المحكمة بالبراءة من التهمة الموجة اليه

گلبي رجف ماعرفت افسر شعوري شنو رفعت راسي شفته عايفهم كلهم وعينه عليه مركزة رافع راسة بتكبر يباوع عليه بنظرات حقد كلبي صار ينبض حيل

لزمت بطني ودرت وجهي على خيال الي واكفة بلبسها مال المحاماة والعيون محاوطتنا

غمضت وسيل الذكريات صار يمر گدام عيوني وخاصة كلمته شتگولون الربكم لو طلعت بريئ

في غضون الساعة السوداء بعد منتصف الحزن
ارتجف قلبي ينادي داخل تجويف صدري المسن
اشبه بمغارة خاليه يتردد بها صوت يرتجف
يصدح ويردد
مجرمون ابرياء
خائنون اوفيـاء
متعجرفون بسطاء
تواضع كبرياء
حب جفــــــاء

استفاقيت من الصدمة

والصدمة الاكبر من تحولت القضية كلها على الشاهين ونضال الشاهين انحكم اعدام وقتل خمس اشخاص سليمان هيلين ضرغام ياسين وحسام النعمان ومحاولة قتل خيال ، ونضال مؤبد بتهمة التحريض على الشروع بالقتل ونجيب كذلك ...

( Flash back ) الجريمة ....

(هذا ما ورد من اعترافات الشاهين للعدالة )

قبل حادثة الجريمة بشهر

الميناء / الساعة السادسة مساءً

الشاهين"

چنا واگفين يم الميناء منتظرين بضاعة جديدة تدخل حتى ننقلها نزلت من السيارة ضايج روحي طافرة من ورا سالفة ضرغام انتبه عليه نضال انطاني جگارة وگال

نضال: شبيك وجهك يلطم

الشاهين: يمعود هذا ضرغام وطلايب ضرغام اكو غيره عين الضبع متخبل منه وخاصة بعد ما قرر يتوب ويبطل من عين الضبع

نضال: وهو عين الضبع شيريد منه

الشاهين: ولك هذا ضرغام داهية سودة شوف جان ياخذ مخدرات بكميات كلش حلوه وچبيرة مو فقط يتعاطى بيهن لا صار شيسوي يوزعهن ويبيع بيهن ضمن نطاق منطقتهم عين الضبع من شافة هيج صار ينطي ويسجل عليه وبعدها يگله كل ماتبيع اكثر ازودلك الحصة والفلوس اكثر الحد ما ضرغام طمع وصار يلعب بذيلة ويتعامل ويا تجار صغار بالمخدرات ويبيعهم بضاعة عين الضبع وهم يبيعونها بكسر السعر الاصلي ... هنا عين الضبع تخبل وأمرني ان اقطع عنه وكلشي ما ابيعله فترة حتى يتأدب بس الصار ان ضرغام تاب وتعالج وهسه العين تين متخبل يريده

سحب نفس من الجگارة يحچي
نضال: ليش ما تصفي وتخلص وعندي الك خطة تضرب بيها عصفورين بحجر واحد

الشاهين: شلون

نضال: انت مو تريد تتخلص من الرهبان وضرغام

الشاهين: ايّ

نضال: اخبط حار ببارد اكتل ضرغام وذبها براس واحد بيهم هم اذا ضاع واحد منهم كلهم يضيعون

الشاهين: وانا شلون راح اسوي هيج وهم الرهبان وين بنكضون

نضال: شگد غبي الخاطر الله انت تعرف بباتر عنده خلاف ويا حسب ما گلت قبل فترة

الشاهين: ولازال الخلاف قائم

نضال: زين هسه ننقل البضاعة وبعدها ادزلك الخطة مدبرة لا تخاف

نزلنا البضاعة ونقلناها وبعدها صار يدزلي مسجات ويشرحلي بيهن الخطة الي حسب تسميته سماها ( ليلة رأس السنة جريمة قتل الرهبان ) وسوالهم تشفير وتعمية

الخطة هي ان نتفق ويا باتر يجي للميناء بحجة عندنا شغل ويا يخلصه النا وخلينا الوسيط بيني وبينه صديقة اسمه حسام النعمان الملقب بـ سراي

يجينا للميناء بيوم رأس السنه وبعدها اتصل على ضرغام واحاول استدرجة يجي حتى تصير مشاحنات بينه وبين باتر وتعاركون ويتم تصويرهم وهذا الصار صارت بينهم عركة كلش كبيرة من بعدها سجلنا الباتر كل كلامة واكو مختصين قطعوا الكلمات وتم دمجهن وصارن مقطع صوتي كامل مدموج من اكثر من مقطع

بعد ماراح ضرغام گوه سحبنا باتر للمستودع دخل وهو يحچي على سراي

باتر: كلتلك انت بس احمي ظهري وعوف الباقي كله عليه

حسام: متاكد من كلامك

باتر: لو عايفني عليه الا اطيح حظه هالزعطوط

باوعلي ورجع صاح بيه
باتر: الولد فقير الشاهين بطل سوالفك وعوفة

الشاهين: هو جاي يلعب بالنار

جر الكرسي وگعد فحطان اباوع السراي انطاه مشروب يحتوي على حبوب هلوسة بس شربة ورى نص ساعة صار يهذري ويحچي عامي شامي وشنو اسالة يجاوبني لو يعيد الكلام وراي وهيج كدرنا نسجلة تسجيلات الحدما طفه كلش صار مايندل دربه وين يروح ووين يجي

من بعدها انتقلنا للمرحلة الثانية وهي التنفيذ صعدنا بالسيارة وتوجهنا البيت ضرغام حسام ونضال ونجيب بقوا يم باتر بالسيارة وانا نزلت تسللت للبيت بحدود الساعة 11 بالليل قبل ساعة من يوم 1/1 من السنة الجديدة

اول مادخلت للبيت تلاگه وياي ضرغام طالع من المطبخ بيده اكل تفاجأ بيه بلا تفكير نيشنت السلاح عليه وضربته بسلاح كاتم للصوت اجت الضربة برأسه وگع ميت تفاجأت بوالدته طلعت تركض عليه هم من المطبخ بس شافتني صرخت ماكدرت انسحب هم نيشنت عليه وضربتها براسها بعدها بصدرها على اثر صرختها طلع الاب بعده بباب الغرفة ضربت عليه اجت برجله من طاح رجعت اطلقت عليه النار برأسه وانا مصدوم من السويته ردت اكتل بس ضرغام صرت كاتل عائلة كاملة

سحلتهم 3 النص الصالة وطلعت مستعجل عفت باب البيت مفتوح نزلنا باتر من السيارة ومشيت بي دخلته الداخل البيت وسديت الباب عليه وشردنا قبل لا يخلص مفعول حبوب الهلوسة

وهيج صارت الجريمة براسة وخاصة بعد ما شافه يمان وكل الادلة جانت ضد باتر من تسجيلات وغيرها

اما ياسين هكر دبرتله حادث بالمساعدة مع عين الضبع وقتله بعد ماعرفت بي صار يشتغل على فك الشفرات

وحسام النعمان خنگته بحبل بعد ما جابوا وحبسوا يمي بالمستودع جنت مجتف وهو مايشوفني رأسه مغطه وعرفت بي راح يتعرف مايتحمل التعذيب قررت اتخلص منه لزمت الحبل برجليه ولفيته على رگبته الحد ما اختنگ ومات بعدها ضربت راسي حيل بالحايط ووهمتهم ان واحد دخل علينا وقتله

الرسائل المشفرة فك تشفيرها يمان وفرات بمساعدة جهات حكومية رسمية ، وتسجيلات الصوت المفبركة حل وكشف دائب ....

﴿تم التحفظ على بعض المعلومات مع تغيير في معالم الاحداث الاصلية ﴾

(عودة)....

خيال"

طلعنا من قاعة المحكمة وبكر يحجي ويا المحامي مالتهم اسمعه يكله

- هم من المرافعة الاولى ماتصرفوا بحكمة وتلفوا اشرطة تسجيل الكاميرات بلا ما يشوفونها لو عايفينها جان انثبت براءته قبل خمس سنوات مو اليوم

سلمت على بكر وتشكرته واخذت اختي وطلعنا من المحكمة رغم كلشي صار طلعت مرتاحة مامتندمة على الي سويته لو باقية ممتحركة يمكن كلشي ماتحرك وبقينا ندور بنفس الدائرة

طلعت منتصرة طلعت قاتل اهلي وقدمته للعدالة و الحبل المشنقة

اخذنا سيارة اجره بوجهنا الحكمة للمستشفى اباوع الرميم طول الطريق صافنه تفكر حاول احجي وياها ما ردت عليه عفتها براحتها وصلنا اول ما دخلنا لگينا الدكاترة كلها ملتمة عليه ركضت على الممرضة احچي بفزع

خيال: شبيها فدوه شبيها حكمة

جاوبتني ببتسامة
- مابيها شي عيوني صحت مثل الورد الحمد لله على سلمتها

رميم: اووفف الحمد لله

خيال: الحمد لله والشكر على لطفك ربي

دخلنا عليه شفتها مجلسينها اول ما شافتنا صارت تبچي وتحچي

حكمة: ابني بريئ اجتني امه بالحلم تعتب عليه سودة بوجهي ولكم ابني بريئ نرجس ماتچذب

كعدت يمها ابوس براسها واحچي

خيال: وفعلًا طلع بريئ والمحكمة حكمت بهذا الشي

حضنتني وصارت تبچي گوه قنعتها تسكت شويه واجوا الولد ورانا دخلوا عليها يبوسون ويضحكون يشاقون وياها

حكمة: چا وينه شو ما جبتوا وياكم لا تقشمرون عليه

دائب: وداعة وجهج الحلو بس تكمل إجراءاته يطلع

يمان: لا تبچين ماكو دموع بعد فدوه العويناتچ

بقوا يسكتون بيها وهي تلوم بروحها لان اذته بكلامها انتبهت على رميم واكفة تباوع من الشباك اتقربت يمها احچي

خيال: شبيچ

باوعت عليه وگالت بجمود

رميم: لا تنتظرونه بتار ماراح يجي

خيال: شبيج غير طلع من السجن شنو مايجي

رميم: شنگول الربنا وهو طلع بريئ خيال بتار ماراح يرجع لا تنتظرون

خيال: منين تجيبين هذا الكلام هسه يرجع حكمة منتظرته

رجعت انظاري على حكوم وولدها انتبهت اليمان اصلا ما باوع عليه ولا كأني موجودة انا هم اعتبرته حاله حال الهوا اشرتلي حكمة تعاي يمي رحت يمها گعدت على طرف الچرباية حضنتني تحچي

حكمة: سويتي البراسج يفوصة وفريتهم فر

خيال: حكمة غير انا خيال

دائب: ولا تكعد المحامية الا شويه رادت تضيعنا بس ماعرف حضنا حلو والشاهين جماعتة ناسينه محد حس بي بالسجن

خيال: مثل ما انت اشغلت انا اشتغلت

دائب: خب دسكتي گلبي موجر منچ وداعة حكومتي

قاطعتنا حكمة تحچي

حكمة: شلايتيه شو انتم مگابليني گوموا جيبوا اخوكم

يمان: يمه قابل بساع يطلع غير إجراءات ودنيا اقل شي ينراد فد اسبوع

گامت عليهم تحچي

حكمة: شنهييي اسبوع مالي غرض شوفولكم صرفة واسطة فلوس اريدن اشوفنه ولكم نرجس مغتاضة عليه

حاولوا يقنعونها ماقبلت وگالتهم هسه تطلعوني للبيت وبعدها تجيبونه الي رغم حالتها ما مستقرة كلش بس طلعوها للبيت على ضمانتهم وصلونا وراحوا الباتر ...

❛❛❛❛

يمان"

طلعنا من البيت انا دائب توجهنا للسجن البي باتر نزلنا ودائب مشغول يدور واسطة وتفق على المبلغ حتى يطلعونه بسرعة ويستعجلون بالاجراءات

دائب: لكيت واسطة اذا كلش لليل يطلع

يمان: خايف من ردة فعله كلش

دائب: هذا البتار صدره واسع لا تخاف

يمان: ماشفته طول المرافعة ماحط عينه علينا

دائب: بويه حقه عيونه مانزاحت من مرته

يمان: لا اكو شي اكبر شني باتر جديد عليك

بعدنا نحچي اجانا منتسب سألنا

- انتم الي اجيتوا علمود السجين باتر صمد

يمان: ايّ احنا اخوته

- هو طلع قبل ساعة تقريبًا وگال ماكو اي واحد يسأل عليه انا ماعندي اهل كمل كل إجراءاته وطلع

يمان: شلون بهاي السرعة اخلوا سبيلة

اتقرب يمي يهمس
- كلشي بالفلوس يمشي

عافنا وراح

يمان: هاا شگلتلك اعرفه گلبي مامرتاح السكوته

دائب: وين يروح يعني هسه ندور عليه ونلگاة بوحد من بيوته

يمان: انت تحچي وچنك ماتعرف باتر

حچيتها وهرولت للسيارة صعدنا ندور عليه ماخلينا بيت من بيوته ما خمينا ودورنا بي ماكو فص ملح وذاب

وصلنا اخر بيت نزلنا دورنا ماكو فارغ ماموجود بي وگفت بنص الصالة خليت اديه على خاصرتي اعرف بي من يختفي بعد هاي هي رفعت راسي الي فوگ صدري جمر من الحرگة تذكرت اخر كلام گلته اله ماتحملت دموعي من وحدهن صارت تصب

حسيت على ايد دائب على چتفي لزمني يحچي

دائب: گول يالله هسه نلگاه وين يروح

يمان: وين الگاه دائب انا شلون هيج گلتله ولك هو حيرني ماخلاله منفذ يطلع منه

دائب: حقك بس چنت قاسي عليه

سحبت تليفوني وطلعت رقمه احچي
يمان: شكاتب عليه "وصية أمي" حتى خاف في يوم من الايام اتصل بي واقرر اقسى ويا من اشوف الاسم ابرد

دائب: هسه نلگاه يم حكمة خل نرجع للبيت

يمان: بلكي امشي

رجعنا للبيت ايد ورا وايد گدام دخلنا على حكمة بس البنات محاوطاتها هو وين ماكو

خيال"

دخلوا يمان دائب وجهم ما يتفسر

باوعت عليهم حكمة وحچت بدموع

حكمة: ما لگيتوا مو

يمان هز رأسه وحچه بصوت مبحوح
يمان: لا ماموجود

صارت تبچي وتلوم بروحها نريد نسكتها ماكو قرفص گدامها لزم اديها وگال

يمان: يمه تذكرين من جنه صغار وصيحتي على السمسيه وشرد بقينا يوم كامل ندور عليه يلا لگينا

خيال: شنو هذا الموقف

باوعت لي حكمة وگالت

حكمة: الولد جانوا صغار جانت اكو مره يمنا تبيع سمسمية وانا چنت مانعتهم منها لان كل ما ياكلون منها تمرضون وصدفت انطيتهم فلوس وكلتلهم روحوا اشترولي معجون والزايد كلشي اشتروا بي الا السمسميه لا تشترونها من مرت طويلب

يمان: ايّ واحنا رحنا انا ودائب اشترينا بالزايد كله سمسمية من مرت طويلب من رجعنا للبيت خفنا من امي انطينا العلاليگ الباتر وكناله روح ضمهن ويا دخلته امي صار بوجها صاحت بي

حكمة: انا مو گلت هاي السمسمية ممنوع تاكلون منها مرت طويلب مدري شتخلي بيها تتمرضون ويم اوديكم هسه

باتر: يمه اشتهيتها وجبتها

رغم هو مايحبها ماعترف علينا بقى ساكت وبلع الرزاله الوحده وسكت مو بس هيج حرمته من المصروف وتعاقب ماطلع يلعب ويا الجهال بالشارع ورغم هو ما غلطان

دائب: مو بس هيج العصر من رجعنا وامي ذبت السمسمية هو نقهر علينا وراح طلع فلوسه المجمعهن حتى يشتري بيهن لعبة سيارة اخذهن وراح واشترالنا بيهن سمسمية وبيومها امي شمت ريحتها ودخلت علينا سوت مداهمة وگامت تصيح عليه بس هو حيل انهضم من هذا الموقف عافها وطلع من البيت يركض بيومها شگد دورنا عليه يوم كامل وهو ماكو مارجع

مسحت دموعها حكمة تحچي بعبرة
حكمة: اي سوده بوجهي طاب خاطرة من كيفه يلا رجع للبيت

تحسرت باوعت الرميم صافنه ويا كلامهم ملامحها جامدة خلت ايدها على بطنها وگالت

رميم: ما اضن هاي المره هم يطيب خاطرة ولا جويات روحه يبردن

دائب: انتي اخر من يتكلم الكسرة الخذها منچ ماتتسولف

گامت وحچت ويا بعصبية
رميم: انا محد يلومني جنت عايشة ويا كزوجة وانا ماعرفه مثلكم كل الاعرف عليه هو شخص مجرم قتل اهلي العتب مو عليه العتب عليكم يا اهله انتم تعرفونه المفروض ليش صرتوا ضده انا مامتندمه على الصار ولو رجع بيه الزمن هم اعيد السويته حتى اخذ بثأر اهلي منه ومحد يگدر يلومني

حكمة: حقچ محد يلومچ

اباوع عليها لزمت بطنها متألمة كاملها يمان يحچي وياها بهدوء ويحاول يهدي بيها ودائب عافهم وطلع من الغرفة طلعت ورا دخلت للمطبخ احضر للفطور شفته گعد بالصالة يباوع بتليفونه طلع وراه يمان

جنت اشتغل واباوع عليه كاعدين مقابيل الباب مدري شيحچون دائب عينه بتليفونه شويه وحسته كام وكف على حيله يصيح

دائب: هاي منين جابت المفتاح راح تطلععععع

يمان: شبيك مني التطلع

ركض للباب مستعجل ويمان ورا وهو يصيح بعصبية

دائب: وتر راحححح تشرد من البيت ...

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

TikTok: zeinab_.ali1
Insta: zainab__.ali1

متابعة ممتعة🦋