رواية تاروت الفصل الرابع وثلاثون 34 - بقلم زيـنـب علـي 🦢

#تاروت

البارت «35»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

روح العب بعيد شجابك وياي
انه دربي طويل يتعب هواي
وماعندي حمل يتطشر بريح
اجودر وين ما ذبتني دنياي

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم"

باوعت الورقتي مكتوب بيها غير الجملة مالتهم

" انا فخ ولست ارض مليئه بالزهور احذر انتقامي" وبعدها مخلي نفس رقمهم 8.0.2

انتبهت الصوت دائب وجهلي الكلام

دائب: شنو مكتوب يمچ

طبكت الورقة وحچيت
رميم: نفس عبارتكم

حكمة: شنهي فهموني منين طب انا جنت نايمة انتم وين

گعد بصفها يمان يحچي مستغرب
يمان: جنا طالعين انا ودائب مو بعيد ورجعنا للبيت ولكينا الورقة على فراشاتنا

خيال: وانا كعدت اسوي سحور لگيت الورقة بباب غرفتي رأسا اجيتكم

دائب: شلون دخل

خيال: الباب جان مفتوح ترى انا خليته لان على بالي انتم بره گاعدين وما طالعين اكيد دخل وطلع قبل لا ترجعون

يمان: وانتي رميم شگعدچ

رميم: انا لگيتها بصفي ويمها خناجر 3 شيقصد

دائب: يخوفنا

خليت ايدي على بطني احچي بخوف
رميم: بهاي الحالة حتى اطفالي حاسبهم ويانا

دائب: اوو كلشي توقعي من باتر يسوي ماعدى ان يأذي شخص يحبه

حچاها وابتسم بستهزاء ، اعرف باتر اله غاية من هاي الحركة بس ماعرفها شنو ، فراشهم جان مفروش بنص الاستقبال يعني نازل جوه ومفتر بالبيت وداخل على حكمة كل هذا وماحسينا بي بقوا يحچون بالموضوع وحكمة تفرفرح شلون مخليلها ورقة تهديد

حكمة: ولكم جيبولي هالشلايتي اطلع ضيم گلبي بيييي انا حكمة اتهدد على تالي وكت

دائب: وسفه يمه وين راحت ايام الشحاطة مال الفواتح بس يتنفس ينعلس بيها

حكمة: عبنه عزيز اكتله بشحاطتي الغالية

يمان: وانا انكتل بنعال الحمام يمه مو عدل هذا

حكمة: ياا هذا المدلل عزيز گلب نرجس

بقوا يداهرون حكمة ويسولفون يشوفونه منين دخل وخيال تحضر بالسحور

درت عيني على الساعة شفتها بـ 2 وانا صعدت انام من الـ 9 معقولة الحسيت بي حلم بس هو جان متمدد بصفي وانا النعاس مسيطر عليه ماگدرت اركز ولا ارفع راسي بس فعليًا حسيت نفسي نايمة بحضنه

گعدنا نتسحر ويسولفون بالموضوع كل واحد ينطي رأي شكل ونتساءل هو لو مو هو انتبهت على حكمة اشتمت ملابسها بعدها اتقربت مني هم اشتمتني وسط استغراب من الكل باوعتلهم وحچت

حكمة: هو ها اها هذا عطره مچلب بيه وبرميم

وجهوا انظارهم الي وانا احس روحي صرت ارجف مدري خوف على خجل تداركت خيال الموضوع وحجت

خيال: وجهچ تعبان وحملچ ثگيل لا تصومين بعد مو زين عليچ

رميم: خاف حرام بس من صدك انا احس روحي ماگدر اكمل كلش متأذية

حكمة: افطري يمه صوميهن بعدين انا ستشرعتلچ وتأكدت مابيها حرام

رميم: لا لازم اكو خطورة على الجنين يلا يجوزلي افطر

حكمة: باجر نروح للدكتورة مالتچ ونشوفها شتگول

سكتت رجعت حكمة باوعت للولد شافتهم نازلين بالاكل دوسه ونص

حكمة: باچر راح تصومون

باوعلها دائب وگال متفاجئ
دائب: ها

حكمة: وعلا باچر تصومون على هذا اكلكم تصومون بمكانه يمكن

دائب: شبيچ حكوم حاسبة علينا اللگمة

اكل اخر شي بماعون الجبن وكمل كلامه
دائب: حتى سديتي نفسي ماريد بعد

حكمة: دگوم اكلني بعد اشوفكم تتسحورون يعني باجر تصومون

اباوع عليهم يمان بقى ساكت ماحچه شي شويه بعدها ثنينهم سوو انسحاب تكتيكي هزت ايدها تحچي

حكمة: شنهي مربيتلي يهود يربي حتى اليهود عدهم عبادات احسن من ضيمي

خيال: اگلچ خاله هم من جانوا صغار هم مايصلون ومقصرين هيچ

تنهدت تحچي بحسرة

حكمة: جنت اعلمهم واخليهم يصلون وياي بس من كبروا تهيلگوا كلششش وفلتوا من اديه

بقت هي وخيال يسولفون على طفولتهم وشلون جانوا صغار يشتغلون وعتمدون على نفسهم وماحتاجوا احد لا عمام ولا گرايب من تحچي على باتر انتبهت على نفسي ابتسم واركز وياها

ثاني يوم العصر جان يوم جمعة طلعنا انا وخيال وحكمة ويانا رحنا  العيادة دكتورتي حتى اسوي معاينة طمنتني على ولدي وضعهم مستقر وحملي زين بس هم كلتلي ممكن الصيام يضر بصحتي وصحتهم لازم انتبة من هاي الناحية

نزلنا من العيادة وحكمة تحچي عليه تريدني افطر

حكمة: الا تسوين بروحچ شي يلا ترتاحين

رميم: بس راح يخلص الشهر حرامات افطر

حكمة: ولو صار بيچ شي انا ربحي بيمن بهذول ولد الچلب لو بأبوهم

باوعتلي خيال تحچي بجدية
خيال: مثل ما مخليناچ تصومين اليوم باجر هم ماتصومين وخلي الحرام يصير علينا

بقن يحچن عليه الحدما اقتنعت اقطع صيامي رادت حكمة تروح تشتريلي العلاج اباوع الخيال تليفونها دگ طلعته وجاوبت اسمعها تگول

خيال: لا لا انا قريبة هسه اجيكم

غلقته وگالت

خيال: هاي صديقتي اخوها عنده معارض بلكي شافلنا سيارة حكوم المعرض مو بعيد منا انتظروني نص ساعة وارجع

حكمة: احنا راح نگعد بهذا المنتزة على ماترجعين وهم نشم هوا

ودعتنا وراحت واحنا دخلنا للمنتزة وحكمة عافتني گاعدة وطلعت تشتريلي العلاج من الصيدلية ماقبلت اروح وياها بقيت كاعدة الوحدي اباوع على الجهال يلعبون والناس گاعدة لان ماكو شمس عصريات اكو بيهم يردون يفطرون هنا اجواء رمضانية تجنن

عيوني صارت على ثنين بنات مبينات توأم يلعبن لابسات نفس الشي ابتسمت تخيلت ولدي گدامي يلعبون لزمت بطني افكر بالي صار البارحة واحچي ويا طفالي

رميم: البارحة بابا فعلًا اجه لو مجرد وهم اذا حسيتوا بي مثلي انطوني إشارة

ماكو ساكتين تنهدت بضيق شويه حسيت صارت اكو حركة ببطني ابتسمت احچي

رميم: الظاهر راح تلعبون عليه انتم وابوكم

حسيت صارت تجيني اشعارات على تليفوني جنت مفعلة النت بالخط بسرعة اخذته اشوف منو شفته رقم غريب دازلي صورتي قبل شويه ماخذها الي وانا مبتسمة لازمة بطني وكاتب جوها

"Miss you my sweet"

بسرعة گمت من مكاني اباوع حوالية بترقب اريد اشوفه وينه ووين واگف اكيد هو باتر ماكو غيره رجع دزلي

" لا تعبين نفسچ ماراح تلگيني ولا تگدرين تشوفيني بس انا قريب منچ مثل الهوا تشتمينه بس ماتشوفينه "

رجعت كتبت له
رميم: " باتر هذا انت ؟! "

استغربت من الرد كلشي ما كاتب غير
" منو باتر ؟ "

بالعجل ضغطت اتصال اتصلت عليه ما يجاوب على الواتساب اصلا ما يدگ حولت على الخط واتصلت طلعلي مغلق رجعت دزيتله

" اذا انت باتر احچي لا تخوفني انت منو "

تجاهل كلامي ودز " ليش ما لابسة حلقتچ اذا مامزوجة هذا يا گـ*** نافخچ "

رميم: " اذا انت رجال شوفني نفسك "

ماوصلت غلق النت رجعت گعدت محتارة هو لو لا كلي گمت ارجف اذا مو هو منو ياترى فكرت احچي الخيال من تجي حسيت على وصول أشعار شفته من الشاشه الرئيسية كاتب

" ديري بالچ تگولين الأحد على مراسلتنا لان العواقب راح تكون وخيمة "

رجعت اتصل بي وبقيت الح بالاتصال ماجاوب بس عرفته هو مبين من طريقة كلامة وكتابته ابد مو غريب عليه اسلوبه دزلي

" لا تلحين مااجاوب واحسبي حسابچ من اليوم ماتشوفين طعم الراحة الا اخليچ تدورين حول نفسچ من الخوف والرعب حتى جهالچ ماشفعولچ "

حسيت بخوف من كلامة المليان حقد جريت نفس بصعوبة ودزيتله

" ارجع واگلك انا رميم تحلم تكسرني باتر ومامتندمة وتستاهل الصار بيك وازيد "

رجع كتب
" منو باتر ؟ "

وسد النت صار عندي شك بداخلي هو لو مو هو فتحت جنطتي وطلعت منها الحلقة صفنت عليها تذكرت بيوم الي انطاها الي

بيومها بالليل اتعاركنا عركه كلش چبيرة عفتله الغرفة ونزلت جوه للصالة دموعي من وحدها تنزل

بهاي الايام جنت كلش حابه عطره بعدني بداية نساوتي انتبهت عليه نزل وراي بسرعة مسحت دموعي اتقرب مني يحچي

باتر: افعاتي اول تالي تبچين لان باتر صيح عليچ

رميم: مابچي لان صيحت عليه ابچي على حظي

ضحك گعد بصفي كلش قريب مني غمضت عيوني استنشق عطره

باتر: شفتچ نزلتي جوه واجيت وراچ اكيد اشتاقيتي العطري ريماي

دفعته احچي
رميم: اييعع دوخر تلعب نفسي منك

باتر: وعلي چذبتي چا منو الطول الليل لازگه بيه تشمشم

رميم: وخر باتر لا تخليني ابتلي بيك هسه

لزم وجهي حيل يبوس بحلگي ويحچي بلهفة

باتر: ابوس اليبتلي بيه الصاير حساس ودموعه بسرعة تنزل

دفعته وگمت صحت بحرگة گلب

رميم: ااييعع دوخر

كعدت على غير قنفة بيعده عليه اباوعله تنهد گام قرفص گبالي لزم اديناتي يبوس بيهن ويحچي

باتر: تدرين بيه اموت عليچ ليش تجبريني حتى أأذيچ وتأذى اضعاف اذيتچ

رميم: المفروض اگوم اركص هسه من الفرحة

ضحك يبوس بأديناتي اباوع عليه نزل السلسلة من رگبته فتحها وطلع منها حلقة لزم ايدي جريتها منه مستغربة

رميم: شجاي تسوي انت

باتر: هاي حلقة امي ماعتقد اكو وحده اغلى من امي ممكن تلبسها غيرچ

رميم: باتر لا تسوي هيچ

تجاهل كلامي وكمل يحچي

باتر: بيوم الي توفت بي يم المغتسل حكمة نزعتها من أيدها وخلتها بيدي وگالت

حكمة: حلقة امك ضمها ودير بالك عليها ولا تضيعها

باتر: من هذاك اليوم لهذا اليوم انا ضامها بروحي مو بس معلگها برگبتي مدري ليش حاس راح يصير بيه شي خليها بيدچ ديري بالچ عليها هاي قطعة من روحي مو مجرد حلقة

حچيت بقلة صبر
رميم: بااااتترر

باتر: روح گلبي اعتبريها امانة وخلتها امي يمچ مو انا

سكتت اخذ ايدي لبسها الي وصار يبوس بيها ويحچي

باتر: من ايد امي الايدچ نفس الحنية نفس البياض نفس الترافة ونفس الحلقة

سحبت ايدي وگمت منه ماتحملت دموعي تنزل عفته وصعدت للغرفة هو بقى جوه ماصعد وراي ...

انتبهت من صفنتي على صوت طفلة صغيرة تبچي شفت حكمة اجت تمشي من بعيد جايبة العلاچ ومي الي بقينا گاعدين ننتظر خيال على ما اجت خيال ورجعنا للبيت ومر اليوم عادي صار الفطور يمان جان موجود گعدنا ناكل باوعت حكمة الخيال وگالت

حكمة: شفتي السيارة

خيال: ايي واقتنعت ان شاء الله اخذها

حكمة: احسن مانبقى ورا هذول الشلايتيه شلعوا گلبنا حسرة نطلع المكان

يمان: منو راح يشتري سيارة

حكمة: خوخه

باوع الخيال وگال
يمان: ليش لگيتي سيارة

خيال: ايّ

ندستها حكمة تحچي
حكمة: شنهي مشترين الحچي منچ بفلوس

خيال: حكوم خلينا صحاب

حكمة: صحاب وأحباب بس الچلمة الحلوة مريوده يالعنيفة

ضحكنا على سالفة حكمة ، باوعتلي وگالت
خيال: انتي تعرفين تسوقين الا انا شيعلمني والله اتعاجز ادخل دورة تعلم سياقة

ابتسمت احجي
رميم: نسيبي يعلمچ مثل ما علمني وخلاني اطلع حتى اجازة

خيال: ماريد بطلت انا عود اروح ادخل دورة تعلم سياقة وهاي هي

يمان: ليش انا اعلمچ بطريقتي حتى اجازة دولية اخليچ تطلعين وداعة امي

يحچي ويغمزلها

خيال: شكرًا الجهودك انا ادبر وضعي

يمان: خليلي بس اسمع مني بأسبوع واحد اخليچ محترفة وانتِ بالسانچ تجين تطلبينها

انا وحكمة نضحك بصمت وهي بس تخزر بي

خيال: انت طالعة عينك فد مره

يمان: شبيها نيتچ انا اقصد تطلبين نطلع فرة بالسيارة

گامت وحچت
خيال: مستفز

راد يگوم وراها لزمته حكمة تحچي وهي مختنگة من الضحك

حكمة: اكعد ما عوزنا بعد توم خلي اخيتها تلحگ تذب فروخها

ضحكت بصوت عالي اباوع على خيال رجعت دخلت تحچي على حكمة  ووجها صار مايتفسر ويمان يضحك ويستفز بيها...
 
من بعدها مر الايام هدوء نسبي وبعد مابين شي من باتر وحتى الرقم الي دزلي منه بعد ماتصل بالنت ومغلق طول الوقت وبيوم جنه هسه مخلصين فطور ودائب صار ما يتواجد بالبيت الا قليل بس يرجع ينام ويطلع وحكمة تحچي عليه ودائمًا تردد مكابلها وگاعد انا وخيال ما نعرف السالفة غير ان هو يحب بنت من الصغر مربيها وهي ما تريده ...

وبيوم بالليل نزلت جوه اريد اروح يم خيال ومريت من الشباك شفت يمان ودائب گاعدين بره يدخنون ارگيلة ويسولفون ماعرف ليش انتابني الفضول اسمع كلامهم اريد اعرف اي شي عن باتر اتقربت يم الشباك طفت ضوء الاستقبال وفتحته ووكفت ورا البردة اسمع كلامهم اول شي چانوا يحچون على البنت ماعرفت شنو يحچون بس اسمع دائب يردد اسم وتر ردت اروح واستوقفتني حچاية يمان من گال

يمان: هو باتر شلون دخل البيتك

دائب: كاسر القفل وداخل

يمان: بلا سولفلي الموضوع من البداية

دائب: من يوم الطلعت بي وتر من هذاك البيت بس قبل چم يوم احتاجيت غراض عايفهن هناك ورحت اول مانزلت من السيارة استغربت اثر طين جاي من البستان واصل للباب

اتقربت للباب اول ما دفعته انفتح بيدي طلع ضارب القفل طلقة وكاسرة وداخل وطبعات حذائه مبينه بالبيت من الصالة وصاعد الدرج عرفته متقصد يخلي طين ورا حتى اتبع اثر الخطوات صرت اتبعهن صاعد للغرفة الفوگ اول ما دخلت شفت اللوحة الراسمها مسوي عليها علامة X بالاحمر تنهدت احچي

دائب: الظاهر هاي اللوحة ما مقسوملها ارسمها وتبقى الا تخرب

انتبهت على ظرف ابيض مشمور بالگاع يمها فتحته لگيت بي طلقة وورقة مكتوب بيها

- ليش بنتك ما موجودة دگيت الباب بس ماطلعت للاسف ، من دخلت ولگيت البيت خالي عرفتها هي هم عافتك وراحت لا لا ياحرام ادري بيك مشتاقلها دور بالظرف زين جبتلك صورتها

بسرعة صرت ادور بالظرف طلعتلي صورتها ماخذها الها وهي نايمة بغرفتها ببيت حكيم شعر راسي وكف ردت اتخبل وكاتبلي ورى الصورة

" I'm a good brother "

يمان: شلون وصل البيت حكيم شلون عرف كل هاي المعلومات علينا

دائب: هو هذا المخبلني المشكلة دخلت بدوامة تفكير هو لو مو هو

يمان: واضح هو من كلمة brother مايحتاجلها تفكير

دائب: اذا طلع هو ويحاول يأذيني بوتر مايلوم الا روحه الحيوان فوگ شينه گوة عينه هو جان يثبت الجرم على روحه وبعدها يگعد يلومنا

اباوع عليهم جان دائب يرجف من الأعصاب ويدخن هواي ويمان هم محتار ويا عرفت باتر شجاي يسوي يدخلنا كلنا بدوامة الشك ويخلينا نفكر الجاي يلعب هو لو مو هو وهذا الصار كلنا مانعرف باتر لو واحد غيرة واذا هو محد يعرف على شنو ناوي وشجاي يخطط مرت الايام على هذا المنوال خيال اشترت سيارة و باتر وين وعلى شنو ناوي محد يعرف ...

❛❛❛❛

وتر"

أيام مرت وانا ببيت حكيم احس بروحي اختنگت ولا كأني انا موتت نفسي حتى ارجع الهم

اختي فد مره متغيرة عليه وكله صافة يم مرام الي بدأت تحقر وياي بس اول ايام مالها شغلة بيه

جنت انظف والملم بالاستقبال ماعرف ليش اجه ببالي مرات من اشوفه ينظف بالبيت ويلح بالتنظيف كلش وانا گاعدة ماسوي شي بس اباوع عليه انتبهت على نفسي جنت مبتسمة طردت الافكار من بالي وكملت تنظيف فزيت على صوت عبير تحچي

عبير: امي تگول من تخلص الاستقبال خلي تنظف غرفتهم

وتر: نظفيها انتِ مشوفين بيدي شغل

اتقربت عليه تحچي بعصبية

عبير: اگلچ انتِ اجيتي هنا ترا للخدمة لا اكثر وابوي بباله شي يسوي ماميت على سواد عيونچ

وتر: عبير خليني محترمتچ واگول اختي الچبيره ولي نظفيها انتِ

عبير: ماگدر انظف اخاف على اديناتي بعد يومين يجي حمودي يخطبني هو واهله يشوفون ايدي مو حلوة من ورى حضرتچ

جانت تحچي بتموع بقيت صافنه هاي مستحيل عبير شمغيرها هيچ

وتر: ديلا عيني هو خلك واحد مهتلف محسستني حمودي ابن حيدر العبادي والله يالله

بس حچيت هيچ شو هاي اتقدمت عليه جراتني حيل تحچي بصياح مثل المخبلة

عبير: ترحيله فدوه حييووانههه انوب اذا حچيتي كلمة زايدة عليه اسحلچ هنا واريد اشوف منو يطلع وراچ

دفعتها حيل احچي
وتر: دوخري والله بس اتصل عليه يجي يموتكم بس هو هم صوچي انا ذبحت روحي حتى ارجع هنا وهاي اخر مره تمدين ايدچ عليه خليني محترمتچ واگول خطية مريضة

عبير: يعني حضرتچ تعيرينيييي بمرضي

وتر: مثل ما تردين تحسبينها حسبيها

عفتها وطلعت مهضومه دخلت للغرفة امسح بدموعي واحچي

وتر والله لو يدري بيكم هيج تسوون بيه الا يموتكم كلكم

بقن هي مرام يحچن ويصيحن عليه حتى انظف البيت كله ولا اهتميت حچن وسكتن

للعصر ماطلعت من الغرفة غير من سمعت باب البيت تندگ بقوة والجرس ماسكت طلعت شفت مرام فتحتها تفاجأت من شفت ليلى دخلت تصيح

ليلى: وييينن وتر خلييي تطلع بسرعة

مرام: منو انتي وشلون هيج تقتحمين بيتي بهاي الطريقة

ليلى: اريد وتر طلعووهااا انا اعلمها تعض الايد الي نمدت الها

طلعت بسرعة انصدمت من شفت وجها صاير عبارة عن خرايط والرأس ملفوف شكلها صاير يخوف بس شافتني اجت عليه تصيح

ليلى: حقيرة ناكرة الجميل طلعتي وگلتيله عليه تعضين الايد الي تنمدلچ

حچيت بصدمة
وتر: هذا دائب هيچ مسوي بيچ

ليلى: فوگ مجازاتي ويااااچ اليوم اشرب من دمچ حيوانة 

تحچي وانا داخله بحالة صدمة من منظرها المرعب شنو جارم بيها يمكن مسويها چيس ملاكمة من الكتل جرتني حيل تصيح

ليلى: تغدرين بيه لان كسرتي خاطري وساعدتچ

وتر: چذابة كسرت خاطرچ لو ردتي تخلصين مني حتى يخلالچ الجو ويا

ليلى: شمسويتله وهالگد يحبچ ليشش انتِ بالذاتتت

مرام: اگلچ فضحتينا اليسمعچ هسه شيگول مايگول جايه تتعاركين ويا وتر عبالهم وياي اطلعي من بيتي يلااا

بقت تصيح وتغلط ومرام صاحت بيه حتى ادخل جوه عفتهن ودخلت وهن بقى صوتهن طالع بقيت افكر معقولة الي مسوي بيها مفصخها وجها مايبين

ماگدرت اتحمل رحت بالعجل طلعت التليفون الي نطانياه يمان فتحته ادور بي شفت بي رقمين واحد مكتوب عليه يمان والثاني دائب  طلعت الرقم وخليته بتليفوني لان ماعندي خط اتصلت بالنت وفعلت على الرقم واتساب ورجعت ضميت الخط والتليفون بمكان بعيد

شفته عنده واتساب مخلي صورته وكاتب بالحالة
" لوحتُ له يدي مودعة ،ولا يعلم كم يدًا في قلبي لوّحت له للبقاء. "

فتحت الصورة وقربتها صرت اركز بملامحة اول مرة اكتشف هو وسيم وملامحة مريحة للنظر الهاي الدرجة گلبي نقبض وصار ينبض حيل للحظة حسيت المكان مو مكاني وموحش عليه حجيت مأنبة نفسي

وتر: شبيچ وتر حيوانة انتِ حتى تقبلين تنحبسين ببيت وحدچ بنص هيمة ويم واحد كلشي ماتعرفين عنه غير قصة وهمية ألفها الچ من خياله

انتبهت على صوت الباب تندگ كمت فتحتها دخلت مرام تصيح وتحچي علمود سالفة ليلى ولا هتميت جانت واگفة يم الباب اتقدمت سديته وقفلته عليه وهي تخبلت تغلط وتصيح ملت وراحت

اختنگت كلش ودموعي صارت تنزل ماعرف شسوي كل السويته رجعت للتليفون طلعت رقمه واتصلت عليه بلا اي مقدمات فتح خط ساكت وانا هم بقيت ساكتة بعد صمت بينا ساد دقايق همس

دائب: هاي انتِ وتر

مجاوبت بس دموعي صارت تنزل وماعرفت افسر حالتي شريد وليش اتصلت عليه حمحم يحچي

دائب: وتر

وتر: ها

حجيتها بصوت مخنوگ بالبچي

دائب: جاي تبچين بيچ شي منو وياچ احچي

وتر: مابيه

دائب: جا المن متصلة اذا محتاجة شي اتصلي بيمان هو انطاچ التليفون انا مالي دخل

مسحت دموعي وحچيت ادعي القوة
وتر: وميته عليك انا واتصلت حتى اگلك ابعد ليلى من طريقي لا كل شويه تجي البيت اهلي ومسويتلي مشكلة الحمد لله بابا جان مموجود

دائب: وتالي ويا هاي بنت الـ**** شگالتلچ وتر

وتر: گالت الي گالته اهم شي تبعدها من دربي وخلص

دائب: هاي هي بعد محتاجة شي

وتر: ليش هيچ تحچي وياي

دائب: عفوًا شلون احچي وياچ تردين

وتر: مادري انا اروح

دائب: الله وياچ

غلقته من عنده مقهورة من اسلوبة الجاف مدري ليش

فتحت الباب صارت بوجهي عبير باوعتلي بنظرات شك

عبير: ويا منو چنتي تحچين

وتر: ماحچي ويا احد ليش انتي جنتي تتسمعين عليه

عبير: نصيحة لا تتعلقين لان سنان ابن عمو بأنتظارچ وكلشي مخلص ويا بابا حتى فلوس دفع له

ثنينا فزينا على صوت حكيم هستوه دخل من بره صاح بيها

حكيم: شنو هذا الكلام عبيييرر

عبير: ليش بابا منو الما يعرف ان وتر محجوزة السنان ابن عمو

وتر: مو بكيفچ هي انا سلعة وانحجز الفلان وعلان

اباوع الحكيم خزرنا وگال

حكيم: كافي كلام زايد وسدوا الموضوع ماريد واحد يضغط على وتر فتهمتوا

باوعت العبير رفعت حاجبي بنصر ابتسمت تهز براسها بمعنى بسيطة عافتني وراحت وانا رجعت دخلت للغرفة

مر الوقت وحتى فطور اكلت الوحدي فجأة صرت مو طايقة اشوفهم ، لليل كلش بقيت الواتساب ماحذفته من تليفوني بس خفيته دخلت عليه لگيته دازلي رابط اغنية بسرعة فتحتها اسمع بيها اغنية لـ حسين الجسمي اسمها بحبك وحشتيني

اول ما شفتها رجع دز
"كم يأخذني الحنين الى كل تلك الايام التي استيقضتُ فيها على صوتك ورؤيه وجهك الحنون  وكل تلك اللحظات التي عشتها بجانبك كم يتمزق قلبي عندما ادرك انني فقدتها للابد"

وسوالي حظر بقيت كل شويه اعيد الاغنية واقرأ الي دزه والغصة خانگتني

من بعدها مرت الايام نفس وضعي ببيت حكيم ماتغير شي بالنسبة الي متعودة على حياتهم بس الي تغير ماصرت اهتم المرام ولا انفذ طلباتها وحكيم صاف وياي ماچنت اعرف شنو ضاملي الزمن بعد ...

❛❛❛❛

خيال"

جنت واكفة بالمطبخ اغسل مواعين حكمة ورميم گامن للصالة وهو بقى كاعد على ميز الطعام

يمان: راح ترجعين تفتحين المكتب

خيال: اي هالايام بس قبلها اتعلم اسوق

يمان: ليش ماتسمعين مني انا اعلمچ

خيال: ميحتاج سجلت بدورة

گام وگف يمي خلا ايده على السنك وصار كلش قريب مني يهمس

يمان: تعبتني خليل گلبي

خليت ايدي على صدره دفعته بخفه احچي
خيال: يمان

يمان: يا فزة گلبي

خيال: لا تسوي هيچ

يمان: شمسوي مشتاقلچ

درت وجهي منه سحب الشال من رگبتي اخذه وگال

يمان: حلو عليچ الحجاب لا تنزعينه حتى بعد رمضان

مجاوبت لان فعلًا جنت مقررة التزم بي

خيال: ممكن تبتعد شويه هسه يدخلون علينا شيكولون

تجاهل كلامي واتقرب عليه اكثر يهمس
يمان: احنا أعداء

خيال: لا مو اعداء بس هم مو حبايب تگدر تكول ماكو شي يجمعنا بعد الي صار

يمان: يجمعنا عقد شرع وقانون يامرتي

خيال: منتظرة الامور تهدا ونعرف باتر وين واباشر بموضوع الطلاق

من حجيت هيچ هو بسرعة كب حسيته مثل شرارة ولاحها بانزين صاح بيه بصوت عالي

يمان: انتِ اكيد تخبلتييي بعقلچ شيي شبيچ بابا خيال لا تسودنيني

خيال: صوتك لا تصيح وهذا القرار انا من زمان ماخذته وجنت أأجل بي لان مو وكته وهسه صار الوكت المناسب

جرني من ايدي عدل وگفتي گدامه لزمني من اكتافي بقوة يحچي

يمان: هاي الفكرة تطلعينها من بالچ ماريد اسمعها مره ثانية خيال خلي عقلچ براسچ وافهمي طلاگ مااطلگ لو يبقى اخر يوم بعمرچ

دفعته اصيح
خيال: شلون نگدر نكمل ويا بعض بعد كل الصار شلون فهمني

يمان: شصار اخوي طلع بريئ مو هو كتال اهلچ بعددد شصارر

خيال: اي ثنين علاقتهم تنبني على اساس الثقة وانا ثقتي مهدومة بيك تگدر تشرح لي شلون نكمل

لزم ايديناتي اخذ نفس يحاول يسيطر على نفسه گوه

يمان: ارجعلچ الثقة انتِ بس انطيني مجال

خيال: اخذت قرار وانتهى بعد

دفعني حيل على السنك صرخت بألم احسه فقد هاي اول مره يسوي شي يأذيني دخلت حكمة ووراها رميم

حكمة: خير شمالكم تخبلتوا

اتقدمت رميم لزمتني تسأل
رميم: شكو

خيال: خاله فهمي انا بعد ماريده خلي يرحم بحالتي ويبتعد مني

فرك وجها بثنين اديناته يحاول يسيطر على غضبه
يمان: يمه سكتيها وعلقليها گليلها طلاگ ماكو

كالها بوجهي وطلع من البيت كله بقيت افور من العصبية گعدت حكمة اباوع عليها خلت ايدها على راسها وكالت

حكمة: خايبين الله أحد ما تملون من الطلايب ما جزعتوا من المناگر كل واحد بگد الحولي وطلايبة اكبر من راسه

گامت طلعت من المطبخ وهي تتوعد لنا

حكمة: دصبرولي انا الكم

رميم: هسه وكتها تفتحين هذا الموضوع ماتشوفين هو بيا حال

خيال: بس اريد افهم ليش كلها صافة ويا ونسيتوا حقي رميم هذا نفس الانسان الي استغفلنا سنة كاملة بحجة يطلع قاتل اهلنا وهو يلعب بكيفه ويظلل ويطمطم بالحقيقة بس لان اخو جان متهم

رميم: بس بعدين تندم ووگف ضد اخو وياچ لا تنسين هاي النقطة واكيد عنده مبرر للسواه بالبداية

خيال: وين المبرر رميم حچته جانت والله شنو اخوي وصية امي المهم عنده يتفذ وصية أمه بس يكسر گلوب ويستغفل بنات يتامة ماعدهن احد غيرة عادي والمفروض من طلع اخو بريئ اركض اخذه الحضني المجرم

تنهدت تحچي
رميم: بس هذا يمان لا تنسين اول واخر حب

خيال: يافرحة گلبي لازم ادگ چوبي هسه المفروض لان يمان اول واخر حب

اباوع عليها ابتسمت هزيت ايدي عفتها وطلعت لليل كلش يلا رجع ولا هتميت المهم بلغته بقراري

مرت الايام وهو ودائب مشغولين حتى ما يتواجدون دائمًا بالبيت
وبيوم گاعدين نتفرج تلفزيون ماحسينا الا يمان دخل مستعجل يهرول فزت حكمة وانا وراها

حكمة: شنهي ولك شصار كون اخوك بي شي

گوه وگفته حكمة لازمته وتحچي بعصبية
حكمة: يبست گلبي احچي شمالك اخيك بي شي

يمان: لا يمه مشكلة بالشغل ماكو شي لا تخافين

بس گال هيج عافنا ودخل للغرفة مستعجل بقت حكمة تلوب وقلقة گعدتها

خيال: اهدي خاله ان شاء الله ماكو شي

رميم: بس يمان وجه ما يبشر بخير

خيال: ابقي يم حكمة وانا اروح ورا اشوفه شبي

بقت تهدأ بيها لان موزين عليها تنفعل وانا دخلت ورا يمان للغرفة شفته يخلي سلاحة بخصرة ويعدل بي ويحچي بالتليفون لحگت على كلمة

يمان: شلووونن هييچ صار وانا راح يصير سنة موگف هذا الشغل ومنسحب منه ... مافهم شي الا اجي

غلقه حچيت
خيال: يمان شكو ؟

باوعلي ورجع يكمل مدري شنو يدور بالكنتور ويحچي مستعجل  

يمان: مشكلة صغيرة بالشغل لا تخافين ماكو شي

خيال: شكلك مو مال مشكلة صغيرة

تنهد راد يطلع بعدها رجع عليه سحب راسي باسني منه وكال

يمان: طمني امي ماكو شي

عافني وطلع بقيت مصدومة من حركته رجعت يم حكمة اشوفها شايطة وبس تتصل عليهم انتبهت الصوت رميم لزمت بطنها تحچي

رميم: اخخ يمه احس صار عندي الم قوي

لزمتها وگعدتها احچي

خيال: تعاي كعدي لا تصير عندچ ولادة مبكرة وين اوديج هسه

رميم: اكيد باتر سوالهم شي يمان وضعه مايطمن

خيال: ماعتقد

حجيتها واشرتلها على حكمة حتى تسكت بقينا ننتظر حتى يرجعون او على الاقل يطمنونا مر الوقت وصار السحور وخلص وتعدت الصلاة وكشف الجو وعدهم بعدهم مابينوا وحكمة سودة عليه تلوب ماگعدت ولا غفت لحظة لابسة ازار الصلاة وكل شويه تطلع بره تباوع اذا رجعوا او لا

للصبح يلا رجعوا فتحتلهم حكمة الباب دخلوا متبهذلين وحالتهم حالة

حكمة: يبستوا گلبي ولكم شلايتية وين جنتوا اخيكم كون بي شي

اباوع اليمان گعد على التخم شمر روحه بتعب ودائب گال

دائب: يمه هي كل المصايب من ورا اخينا فررنا مراكز البصرة كلها من البارحة لليوم

حكمة: شسوه ولكم

كعد يمان يسولف الخاله الي فهمته ان داخلة بضاعة عن طريق الرصيف مالتهم وهاي البضاعة تالفة وأكثر من مره وكل التواقيع بأسمهم محد يعرف منو سوه هيچ رغم هم موقفين الشغل راح يصيرلهم سنة رغم ماكو ادلة تثبت بس كل اصابع الاتهام تشير الباتر

وهيج استمر الوضع يوميا مطلعلهم سالفة واركض وانا اركض وراك مللهم

وانا خلال هاي الفترة رجعت فتحت المكتب مالتي ورميم توصلني بالسيارة على مااتعلم اسوق وموضوع الطلاق اجلته لان انشغلت بقضية

جديدة چانت عائلة كلش كبيرة ومعروفة بينهم خلاف على قضية ورث وانشغلت بيها كلش

وبيوم جنت هسه داخله للمكتب من وكت بعدها الفجر تعودت اجي هيج وقت واگعد اشتغل بالقضية اول ما دخلت اجتني بنوته تشتغل وياي حچت ببتسامة

طيبة: صباح الخير ست خيال

خيال: صباح الورد حبيبتي ، اليوم جايه من وكت

طيبة: شفتچ صايره تجين قبلي گلت انا هم اصير اجي من وكت حتى الحگ عليچ

ابتسمت كرصتها من خدها ابتسمت وكالت

طيبة: اكو شخص خلالچ ظرف يمي خليته على المكتب

خيال: ماكال شنو اسمه

طيبة: لا

خيال: ولا انتي تعرفتي عليه شنو مواصفاته

طبية: طويل ضخم شويه ماقبل يعرف عن نفسه انطاني الظروف وراح بسرعة

دخلت للمكتب قلقة خليت غراضي على صفحة وگعدت على مكتبي انتبهت على الظرف موجود على المكتب استغربته ترددت اخذه شكلة غريب كلش سحبته بتردد فتحته جان بي طلقة وبعد شي ثاني ردت اتخربط من شفته حسيت الدم وگف بجسمي من هول الموقف والرعب ...

يتبع ...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

ياترى برأكم باتر وين ناوي يوصل وهو الي جاي يلعب عليهم لو مو هو ؟

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

TikTok: zeinab_.ali1
Insta: zainab__.ali1

متابعة ممتعة🦋