رواية تائهة بين اروقة الماضي الفصل الحادي عشر 11 - بقلم الكاتبة نهى

تائهة بين اروقة الماضي
بقلمي الكاتبة nuha-d-h
مساء الورد والخير والصحة والعافية 🌷🌷🌷

ظليت انتظر خالو بس اشو اتأخر
شنو السالفة عدت ساعتين وهو ماكو
دخلت على ريمة جانت نايمة وتهمس بكلمات غير مفهومة باوعت لشكلها جنها حورية ناعمة وترفة
فجاءة سمعت صوت الباب انفتح
التفتت ووكفت جامدة بمكاني من الصدمة وحطيت ايدي
على حلكي ما جاي اصدك عيوني
هيام : ماما !!!!!
مرية لابسة عباية راس
للوهلة الاولى عبالي امي لكن اتفاجئت من اقتربت مني
واخذتني لحضنها وشمتني وبجت مفتهمت منها شي منو هاي
راضي ببتسامة: تعاي هيومة سلمي على
خالتج رحاب اخت امج الوسطانية
باوعت عليها جانت هواي بيها شبه من امي
كلبي كام يرجف من اللهفة ولنفس الوكت التردد جان
رابط الساني
رحاب: يمة سودة علية بنات هناء موجودات وتعبانات
وانا ما ادري
تعاي ياريحة الغالية خلي اخذج لحضني
يمة بيج هواي من امج
جانت وية كل كلمة الثانية تبجي وترجع تحضني اما اني ردت فعلي جنت مصدومة
خاني التعبير ماعرفت شنو احجي
صعبة اتقبل دخول شخص فجاءة لحياتي او بالاحرى اني الي دخلت لحياتهم
هي حست على ترددي الواضح
ولزمت ايدي وابتسمت تطمني وكعدتني بصفها على القنفة الوحيدة الموجودة داخل الغرفة
طبعا خالو حجز غرفة خاصة لريام مو جناح مشترك
فجانت كلش مرتبة وبيها كل وسائل الراحة متوفرة ومرتبة
كعدت وعين على اختي وعين على خالتي اخت امي
رحاب: انتي هيام الجبير ؟؟
شي اكيد لان من ساعة اخوي راضي جان يحجي عنكم لامي الحجية وكعد يوصفكم النة
هيام: اي اني هيام
واشرت عالسرير
وهاي ريام اختي الاصغر مني
باوعت لريمة وكامت من مكانها
رحاب: يمة سودة علية خطية شلون تكسر الخاطر
شصاير بيها
دنكت عليها وباستها
: ياربي هاي البنية مبين عليها شكد ترفة وما تتحمل المرض
باوعت على ريمة وجريت حسرة: اي كلش رقيقة
بحيث جانت من تتمرض امي تدخل بالانذار
التفتت علية ورجعت تبجي:
والله من عرفت بهناء اتوفت حسيت عبالك واحد لزم گلبي وعصره
صحيح هي بعيدة عنة وما نشوفها بس كان يجبر خاطري انها بعدها عايشة و بخير
راضي: رحاب يابعد اخوج انا طالع اجيب العلاج
ما راح اتأخر شوية وارجع
انتو كملو حجيكم
رحاب: اخذ راحتك خوية
رجعت كملت كلامها

ما احجيلج شلون كلبي احترك على من سمعت بوفاة
اختي وبعدين انجبر خاطري من كال راضي
بنات هناء موجودات هنا بالبصرة
هيام : يعني خالو حجالكم عن سبب وجود امي وبناتها
بالبصرة
رحاب : اي البارحة اجة هو وضرغام وحجة كلشي
بس بعدما احترك البيت حرك من ورة ضرغام وراضي
ك
هيام :اريد اعرف ضرغام ليش هشكل عدائي يعني بعدة ما يعرفني ولا سأل ابوه
كبل اتهجم علينا اني وابوه بدون ما ينتظر واحد يشرحلة الموقف او يفهمة
رحاب : اني اكلج ليش ضرغام هشكل اتصرف
وية ابوه

رحاب: شوفي يا حلوة انتي ما تعرفين شلون البارحة البيت احترك حرك من ورة راضي وابنة ضرغام
هيام: قصدج مجرم الحرب
ضحكت عاللقب
رحاب: والله جبتيها فيت صدك يلوكله الوصف
بس هَـا ديري بالج لا يسمعج والله يلعب بيج طوبة
هيام: لا لا تخافين هو سمعها
رحاب: عزة وشكال
هيام: ما كال شي بس شميت ريحة شعواط وعطاب بالجو
رحاب: ههههه فدوة لحلكج شلون تصنفين
جنج امج هيج جانت بس تقلد وتعيب وتتشاقة
هيام : اي الله يرحمها
رحاب: الله يرحمها ويطيب روحها الجنة
تدرين من دخل ضرغام وصاير نار كبرة للبيت وسألني عن ابوه عرفت اكو شي جبير صاير بين ضرغام واخوي راضي الي خلت ضرغام يترك حلاله وشغلة يرجع من السفر فجاءة بدون سابق انذار كلت بس الله اليستر والشغلة مو هينة
لان ضرغام نادرا ما يعصب وما ينفعل بسهولة. الا اكو مصيبة صايرة
بعدين عرفت ان ضرغام وصلة خبر عن ابوه
ناس شايفينة وية بنات شابات وحلوات
ومجهزلهن بيت خاص بس الهن وكعدهن بي
بالمناوي باشا يعني مو بعيد علينا
والمصيبة الجبيرة خلة سايق ابوه حمزة يشتغل مثل العين السرية على راضي وينقل اخباره
والاخبار الي وصلت تخوف
وما ينسكت عليها
راضي صار كل يوم يروح لهذا البيت ومحمل بالمسواك والغراض وبعدها
ضرغام دز تهديد الكمزحتى تبتعدون عن حياة ابوه
هيام: ليش هشكل لو بس سائل ابوه بدال هذا اللف والدوران جان خالو فهمة الموضوع
رحاب: مو انتي ما تعرفين اخوي راضي
قبل خمس سنين اتزوج بالسر بنية شابة
يتيمة بس طلعت مو خوش بنية حشاج
باكت من اخوي راضي وخلتة يسجللها قطعة ارض
باسمها باعتها وشردت وين والمن محد يدري بيها ومن
هذا الموقف صار ضرغام متشدد وية ابوه
لان هي البنية بيوم باكت الحلال وتعب راضي
هو مو بس تعبة لوحدة هذا تعب وحلال ضرغام وياه
فحقة يصير قاسي ومتشدد وية ابوه
ومن هذا الموقف كام اي بنية يشوفها تقترب من ابوه وتدخل لحياته هو كبل
يبعدها عنة اما ينطيها كم فلس ويصرفها
او يهددها باخوها او باهلها ويخافن ويبتعدن
بس انتي غير لان داخ من سأل عنج ما كدر يتوصل
لأي معلومة عنج او عن اهلج
وبعدها استخدم وياج اسلوب التهديد المباشر
حتى تنسحبين من حياة ابوه بهدوء
والي خبل ضرغام بالزايد ان ابوه مستكعد وحدة بالبيت
وما متزوجها يعني الشغلة حرام بحرام
وهو يتخبل من هاي الشغلة
وصار ملما يطلع ابوه ويسألة انت وين
راضي يجاوبة عند صديقي بالوقت الي هو عندكم
ضرغام كانت ردت فعله طبيعية
هيام: زين شنو الي خلة الجو يحترك البارحة
رحاب : اني اكلج مو البارحة بالليل
اجتي ام ضرغام وكعدت ابنها من النوم وكالتلة
كوم شوف ابوك وين راح بهالليل
لان هي سمعتة يحجي بالنقال وية بنية ويكللها
حبيبتي لا تخافين جايكم بالطريق
وضرغام كبل سحب نقاله واتصل على ابوه وسأله عن مكانه وكلة صاحبي متخربط ورحت اطمن عليه

جان يحجي بالنقال وية ابوه ويكلة بوية مو عبالك انا ما اعرف انت طلعت علمودها بنص الليل وخلتك تعوف بيت اهلك ومرتك وتطلع بسرعة ركض
جان يحجي ويتعارك بصوت عالي وية اخوي
ودخلت عليه امي الحجية تهدي ضرغام الي جان يروح ويرجع والنقال بيدة ويحجي وية ابوه وسمعت الكلام الي بينهم
وباثناء المكالمة راضي اتخربط وبانقطع الاتصال رجع اتصل مرة ثانية عليه واجة يجن جنونه من سمع صوت بنية ردة عليه من نقال ابوه وكلتلة ابوك ما يريد يسمع صوتك
وبعدها سألها عن مكان المستشفى
ما شفتي شلون طلع من البيت شايط ويتوعد وحلف دين قسم كون يلزم هاي الردت على نقال ابوه
الا يثرمها ثرم بسنونه
وبساعتها البيت كلة دخل بالانذار
وصرنا كلما منتظرين ضرغام يرجع واخوي
ونفتهم منهم السالفة
بس يمة من رجع راضي حرك البيت حرك
على ضرغام
وكلة
(((((((())))))))

راضي: انت بأي حق جاي تحاسبني ولك ضرغااااام انا ابوك مو انت ابوي فاهم
ضرغام: حجي تصرفاتك فرضت علية اشوفك شجاي تسوي
راضي: انجب ولا كلمة الظاهر انا هواي انطيتك مجال ضرغام بصياح: يعني ترديني اشوفك تطلع بالليل كل يوم لوحدة ما نعرف اصلها من فصلها
التفت على امي الحجية
: يمة خاجية لوتشوفين البنية الي جان طالع علمودها
شلون مفرعة وصاحبة طول وجسم بارز وفوك هذا كلة
تتباهة بشعرها العسلي الطويل مفرعة الرايح والجاي يباوع عليها
ومو بس هيج لا وابوي كل ساعة ماخذها لحضنة
هذا كلة يصير كبال عيني ويريدني اسكت
((((())))))
رحاب : تدرين كلام ضرغام بساعة العركة صدمنا كلنا
هيام : اي حقكم تنصدمون اذا هو الله يحفظة فاهم الموقف كلة غلط وعقلة التعبان نقل الصورة بشكل
فاضح
رحاب: لا ما مو هذا الموقف الي صدمنا
الي خلانة ننصدم طريقة وصف ضرغام للبنية
اول مرة بحياتة يوصف شكل نبية بهاي الدقة
هو حتى من يريد يخطب ما ينطي مواصفات البنية
الي يردها تكون زوجته كلما نسألة يكول وين اعرف انتو اختارو انا اروح اشوفها
ومن ناخذة ابد ما يوصف اشكالهم للبنات
هيام : زين خالو راضي شنو كللهم
رحاب : يبوووو كام يغلط على ضرغام
وكلة
((((((()))))))
راضي: ضرغام احترم نفسك ترة انت اتعديت الحدود وما اسمحلك تكول عنها مفرعة وتجيب طاريها بالشينة
والله اكسر راسك اذا اتجرأت وحجيت عنها
اباوع على ضرغام جمد بمكانه من اهانة ابوه
ضرغام: انعم الله عليك بوية توصل بيك اتهيني علمود وحدة ما اعرف منين جايبها
راضي بزمخة: انجب واكل تبن بعد
اول مرة اشوف اخوي راضي يغلط على ضرغام
ويهينة كدام الكل وهاي شانت بخاطر ضرغام وسكت وما حجة اي كلمة وية ابوه
هذا الصار كلة
وامي الحجية خاجية ما حجت اي حرف
بس من سمعت الاهانة صاحت براضي
الحجية راضي: عفية عليك يابن بطني
مو هيج العشم بيك علمود بنية تنزل مقدار ابنك
وتخليك تصيح وتغلط
ان جان كدرت تسكت ضرغام وتكلة ما لك حق تحاسب
ابوك
تعال لية. وعلمني شراح تجاوب امك
كلي يمة راضي منين هاي الفرخة
وين طحت بيها چا يمة انت ما تـُـــوب
راضي: عفو عليج حجية حتى انتي تتهميني
الحجية خاجية: يايمة كلة من ورة عمايلك
وهسة هذا ضرغام شافك وانت تحضن بنية
ما ينرادلها روحة للقاضي حتى افتهم
راضي باوع لضرغام : هَـا هسة ارتاحيت
هاك يالله استلم بعد شيفكني
ضرغام بغضب : محد يخلصك من غضب الحجية خاجية الا قول الحقيقة وعاد انت تعرف
الحجية خاجية اذا غضبت على واحد بعد
ماتكومله راية
باوعت لاخوي راضي جر نفس عميق وكال
راضي : ما اعرف منين ابديلكم بالسالفة
بس البنية الي شافهة ضرغام وياي بالمستشفى
يا يمة هاي تصير بنت هناء اختي
باوعت بساعتها لامي شلون جمد وجها
وشدة قبضتها على العصة وصارت ايدها ترجف

الحجية خاجية بصوت قاسي: ماعندي بنية بهذا الاسم
غير بس وحدة وماتت من زمان
انت منو سمحلك تشوف هناء بدون علمي
شلون تتصرف هيج تصرف من ورانا
وانت تدري احنا متبرين منها ليوم الدين
وتعرف كلش زين واذا لفت النة راح الكل يعرف بيها عايشة ويظهر عارها من جديد للناس
راضي: غصب عني مو بيدي
لو جنتي بمكاني واختج تتصل عليج وتنخاج حتى تساعدينا لان واكعة بشدة
الحجية خاجية : وشني هاي الشدة الي لفتها علينا
وخلتها تفكر تجي تدك بابنا بعد كل هاي السنين
راضي: يمة هناء جانت مريضة بمرض خبيث
وظلت تتوسل تريد تشوفج
وانا اعرف كلش زين ردت فعلج راح تكون الرفض
وموبس هيج راح تكعدين حتى تحاربيني علمود اتركها
ترجع للمكان الي اجت منة
جابت بناتها واجت هنا للبصرة وكالت خوية رجلي توفى وانا مريضة وما دايمة لبناتي وعمهم فقير على كد حاله وماعندهن اخ يعيلهن وردتك تاخذهن لتحت جناحك وبحمايتك
وانا ما سويت شي غير الي يفرضه علية حق الاخوة الي بيني وبينها
الحجية خاجية: اختك الله جازاها بالدنيا قبل الاخرة
على عملتها بأبوها وبية وبأخوانها
راضي: ليش يمة شكد گلبج قاسي واسود ماجنت متوقعج ظالمة اكلج شي
تدرين هناء جانت تتصارع وية الموت قبل فترة طويلة
واجت البصرة علمود تشوفج
وصارت تتوسل كل يوم حتى اخليها تشوفج حتى لو من بعيد
تدرين انا شسويت بوكتها
الحجية خاجية : اي شسويت يابن بطني ؟؟
راضي: خليتها تجي وتشوفج وتكعد يمج وتشم عطرج
وتسمع صوتج اخذتها للحسينية مالتج بيوم حفظ القران وهناك هي كدرت تشوفج وتكحل عينها بيج
الحجية خاجية: ما مرجية منك يراضي ما مبري الذمة
لان ما عندي علم بيها ولو عندي علم جان طردتها
من الحسينية
راضي: ما يحتاج تطردينها من الحسينية هي عافتلج
الدنيا بكبرها وطلعت منها
كلنا دخلنا بحالة سكون من الصدمة
كمل
راضي: وكأنما كانت تتصارع وية الموت كل هاي الفترة علمود
تنتظر بس شوفتج وتروح لدار حقها
وفعلا يوم ثاني سلمت الروح
جان كلام راضي ضربة قوية بالنسبة النة جنا كلنا مصدومين بس محد يلحك صدمة امي
كامت من مكانها وهي ترجف واتوكأت عالعصا مالتها
وطلعت من الهول ووصلت يم الباب وجان ظهرها
علينا وقبل لا تطلع حجت بصوت هاديء غريب
الحجية خاجية : اريدك تجيب بنات هناء هنا يسكنن يمنا
بالبيت اريد اشوفهن كم يوم بس هَـا من هسة اكلك
بس اشوفهن واذا ما عجبني تصرفهن او شفت عليهن شي ما ارتاحلة كبل ترجعهن بيدك لبيت عمهن
وما يكعدن ببيتي يوم واحد فاهم
وتجريلهن راتب وهنا هناك بعيد عني
راحت
وصاحتلي وكالت : رحاب انا رايحة لغرفتي اريد
انام مو احد يدخل علية
اعرف طبع امي حتى بالحزن متريد اخد يتورج عليها

(((((((()))))))))
ما تدرين شلون انمرد گلبي عليها من سمعت بيها جاية هنا للبصرة حتى تشوفنا
هيام: وين جنتي عنها اذا انتي تحبينها مثلما تكولين
ليش ما حاولتي تتواصلين وياهة
امي قبل لتموت حاولت توصللكم بس انتو محد قبل
يتواصل وياهة ليش هالظلم هذا
رحاب: شكلج شايلة بكلبج علينا
بس سؤال انتي شلون عرفتي احنا منقبل نتواصل وية اختنا منو كلج
هيام: ماما هي الي كالت حاولت اوصللهم بكل الطرق بس جانو يصدوني
رحاب: احلف لج بالله ما واصلتني اي رسالة او اي خبر من امج من يوم الي شردت بي من البيت وية اركان واني بعد انكطعت اخبارها عني
ووبوكتها ابوي اعلن وفاتها بين العشيرة والاقارب
وبعدها صحتة اتدهورت وسلم الشيخة لابن عمه وسلمة مسؤلية الديوان والعشاير والفصول كلها
وانتقلنا من منطقتنا واشترينا بيت بمنطقة
ثانية تصير بوسط المدينة
حسب كلام ابوي الحجي عالاساس انه
تعبان وبعد مابي حيل لسوالف العشاير والفصول والمشاكل لهذا اتنازل عنها لابن عمه
بس امي خاجية تكول
ابوكم من ورة عملت اختكم يستحي يرفع راسه بين الشيوخ
كانت تحجي واني احس جسمي قشعر
وكبرت مخاوفي بتجاهم
رحاب: اي لا تتفاجئين صحيح هي اختي واني احبها
بس طلعتها كانت مو منصفة بحق ابوي الحجي واخواني نزلت راسه وراس اخوتي
كلامها زاد خوفي منهم
هيام : بس سؤال خالو راضي حجة لامة عن هناء وبناتها
رحاب ببتسامة : اولا اسمها بيبي مو امة
او اذا تردين تصيحينها امي الحجية مثلما اني واخوتي نصيحلها لو مثل اولادنا وبناتنا
بيبي خاجية انتي بكيفج
اني احجي هيج وياج حتى يرتاح كلبج من ناحيتنا انا عاذرتج وحقج تتخوفين من عدنا
لان بعدج ما تعرفينا نعتبر بالنسبة الج ناس غربة
وحسب كلام راضي انتو ما عندكم علم بوجود اهل امكم
الا قبل فترة قليلة امكم خبرتكم بوجودنا
ما اضم عليج وانكر احنا هم متفاجئين مثلكم
بس حبنا لهناء خلانا نجتاز حاجز التردد
وناخذكم لحضنا مثلما ما سويت اني وخالج راضي
وان شاء الله تشوفين بقية خوالج وخالاتج
وراح تحبينهم

انقهرت على خالو راضي كلة من ورانا
وجودنا بحياته عرضه للمشاكل وية عائلتة والله العالم ردة فعل البقية شنو راح يكون بتجاهنا

((((((((())))))))
رحاب انتي ما تدرين صرغام شكد يحب ابوه
وما يقبل احد يجيب طارية بالشينة

اجة ينجن من سمع وحدة ردت من نقال ابوه
هيام: قصدج علية اني
رحاب: هَـا يعني انتي الي رديتي على اتصاله
هيام : اي خالو كال انتي ردي وما قبل يحجي وياه

رحاب : اخوي واعرفة راسة يابس وما يحب احد يكلة انت غلط
والله سلط عليه ابنة العنودي سبحان الله صار مراية لابوه يعكس افعال ابوه ويواجهة بيها
وكل مرة بتواجهون تكب بينهم العيطة وبعدين يرجعون يتصالحون

((((()))))
جانت خالة رحاب تسولف عن امها واني دمي يفور
عليها هاي شنو من ام قاسية ما تسامح بنتها
هيام : امكم والله صعبة وقاسية
رحاب: هيام مرة ثانية من تحجين بأمي الحجية اطالبج
تحجين بأحترام
ترة طاعة واحترام الحجية خاجية
فرض وواجب عالكل كبار وصغار فاهمة
اني انبهج حتى تسوين حسابج بالكلام وما تتعرضين للاهانة وتالي يكولون هناء ما عرفت تربي بناتها عالاحترام
هيام : اسفة خالة بس امي هواي اتعرضت للظلم من اهلها يعني اريد الناس ترحم امي واهلها اقرب الناس الهة ما يحنون عليها ويرحمونها
وترديني ما احجي وانتفض لاجل امي
رحاب: حقج بس مرات الدنيا ما تمشي عالمرام
وية الشخص هنا بهاي الحالة لازم هو الي
يمشي وياها ويتكيف ويشوف الصح من الغلط
وانتي قبلتي او ما قبلتي اختي غلطت فشي عادي
تكون ردت فعلهم بتحاه بتهم الغضب والصد بتجاهة
بعدج يهيام صغيرة عالدنيا ما تفتهمين للحجي

جنت اسمع كلام خالة رحاب وعرفت بساعتها
ان خالة رحاب هي بطاقة دخولنا لأهل امي
وراح تكون مثل الشمعة الي تضويلنا الطريق لحتى ندخل ونتوغل بينهم
اهل امي واهل ابوي
صارو بالنسبة النة مثل الطرق والدرابين المتشابكة
ثنينهم من الماضي
واحنة لازم نتوغل لداخل هاي الطرق ونقطعها حتى نعيش مستقبلنا عبالك نجاح حياتنا راح تكون مبني حول الماضي
رحاب: وين صفنتي شكلج صرتي تفكرين بكلامي
هيام: اي خالة صيح جنت اكول كلامج صحيح
بس مو كلة
رحاب: شكد حلوة كلمة خالة بحلكج
يالله ما علينا اقتنعتي بكلامي كلة او نصه اهم شي بديتي
تتقبلين الوضع
فجاءة سمعنا باب الغرفة اندك
رحاب: اتفضل
انتفتح الباب ودخل مجرم الحرب جان شكلة
عبالك محارب جاي ستوة من ارض المعركة ويريد يجرد ويحصد الغنائم
ضرغام: هاج خالة هذا اكل
جان يحجي وية خالة رحاب وانطاهة علاكة بيضة
مبين بيها اكل لان ريحة المشويات الطيبة بخرت الغرفة
حسيت على بطني صارت تطلع اصوات موسيقية سعيدة مرحبة بقدوم الاكل اووي كلش جوعانة
باوعت عليه جان صاحب جسم مرتب عبالك مكابل
الجيم وكاعد خرب بالحظ هذا ولد وهشكل
مرتب لعد انا وين نايم حظي
اشو جسمي عبالك سفنجة حتى لو بس اشرب ماي كبل اسمن
نسيت نفسي واني اباوع عليه وادرس حركاته وتفاصيله
بس غريب امره ما اعرف شنو بي ملفت للنظر ويخلي الواحد ينشد الة حتى يظل يراقب تصرفاته
انتهبهت على خالة رحاب تكلة
رحاب: ضرغام ما سلمت على بنت عمتك هناء
ضرغام: لا عمة اتعرفت عليها قبلج
هيام: هي ما كالت ما اتعرفت علية هي كالت ما سلمت
يعني اكو فرق بين السلام والتعرف
باوع علية واتسعت عيونة من حجيت
عبالك ارتكبت ذنب من حجيت
ضرغام: انتي شنو هذا السانج لسان لو منشار
الظاهر ينرادله كص
هيام : تكص شنو قصدك ما افتهمت
اتعمدت استغبى حتى ما اخليه
يلاحظ خوفي منة اي كلامه يخوفني والله مو بس كلامه
حتى عكدت الحواحب والصوت الخشن هم يخوف
يعني الله يحفظة ديحجي وهذا هو يحجي وية عمتة بهدوء وهشكل يكون صوتة خشن ومرعب
زين هذا لو يتعارك ويزمخ شلون راح يكون
الله لا يبلانا ونشوفة وهو عصبي ويتعارك
اي هسة عرفت ليش مامتزوج لحد الان
لان يمكن ما لاكي البنية الي بايعتها امها حتى تكون من نصيبة والله مو بس بايعتها امها لا وهم بعد داعية
عليها بساعة مغربية
همست بصوت ناصي : اوف الله يكفينا الشر
ضرغام : اشو ما عاجبج الوضع وكاعدة تتنافخين
هيام: وانت شنو حضرتك كاعدلي الزلة منتظرني
اغلط حتى تهجم شكو
طبعا اباوع لخالة رحاب تباوع علينا منا ومنا خطية داخت
رحاب: كولو يالله اسم الله ماجنكم ستوكم عرفتو بعض
عبالك عدكم عدواة صارلهة سنين وجاي تتصافون
هيام: لا خالة عداوة شنو الله لايكولها
لا اعرفة ولايعرفني
ضرغام: عمة رحاب علمي بنت اختج عالاصول وفهميها تراقب السانها وتنتبه على نفسها وقبل لا تحجي وياي بَـــأي كلمة تكون مسوية الف حساب يالله تنطقها
عزة هذا شنو قصدة
هيام : قصدك يعني جاي تحاسبني
ضرغام: لا بعدني ما محاسبج هذا مجرد تحذير الج

بلعت ريكي يمة هذا وهو يحذرني هيج انكلب شكلة
لعد لو يحاسبني شلون

باوعت عليه والتقت عيوني بعيونة ارتعدت مفاصلي
عبالك صعقة كهربائية عبرت بجسمي من اثر النظرة الي شفتها بعيونة دخت انثولت انسطرت هذولي كلهم
اتجمعو داخل عقلي وضاع مني الكلام الي جنت محضرتة حتى اجاوبه

رحاب: على كيفك عمة وية البنية
ترة بعدها ما تعرف طبعنا فلا تكعد تطبق عليها القوانين
الصارمة من هسة
ضرغام: عمة بعدني ما مطبق القوانين وياهة لحد الان
انا محترم وجودها وما مسويلها شي
هيام: شكو شصاير تحسسوني عبالك جندي عدكم وراح
تمسحون بي الكاع
ضرغام : هاج يالله استلمي حشة مو السان
رشاشة ما تفوت ولا كلمة اذا ما تعلق وراهة
هيام: طبعاً اعلق اذا جنت اني المعنية بالكلام
ضرغام : لا انا شكلي اذا طولت هنا بعد دقيقة وحدة
احتمال اطلع منا مرتكب جريمة
وخانكلي وحدة ام السان بهاي الغرفة

فتحت عيوني على وسعهن من الصدمة
وصرت ارمش بعيوني مامصدكة الي ديحجي يعني هو صدك مجرم حرب يخوف اشو كل حجاية والثانية
بيها ذبح قتل كص السان تكسير راس على رجلين
شكو يا ستار
رجعت اباوع عليه شفتة فاتح حلكة وسهة
ضرغام عاكد حواجبة: هذني عيونج لو لابسة عدسات

سؤالة صدمني لان مجنت متوقعتة راح يسأل هيج سؤال بعيد كل البعد عن الموضوع
هيام: هاا هذا لون عيوني الحقيقي ما لابسة عدسات
حسيت بي للحظة ضيع الكلام ورجع اتلاحك لروحة
قطع كلامنا دخول الدكتور ووياه ممرضة
باوعت اهووو هذا شنو سالفة الدكتور اليوم وين اروح الكاه بوجهي
شكلة الاخ يريد ينسق واني مو بحالة اي هسة مو
صديتة من اول مرة يعني ما وصلتة الرسالة

الدكتور : هاي شنو وردتنا هنا يامحاسن الصدف
بشريني شلون صار خالج
هيام بصوت هاديء: الحمدلله صار زين
التفت عالمنر يحجي وياهة ولازم بيدة بطاقة ويكتب عليها
واشر عالجدول الموجود
بالبطاقة وكللها علكيها مغذي ثاني هذا راح يخلص
كمل كلامة وية الممرضة اتبادلو مسطلحات طبية
ما افتهمت عليهم اي شي
رجع كمل كلامه وياي
وهو يباوع على اختي
: يعني هاي اختج هم طلعت حلوة مثلج
وابتسم
اجيت اشكرة عالمجاملة
ما حسيت الا واحد وكف بيني وبين الدكتور
ضرغام: دكتور ماكلت حالت المريضة شلون صارت
الدكتور : انا كلت قبل قليل هي جاي تتحسن وعمليتها نظيفة وكتب للمرضة الباجر تغيرلها الضماد
ضرغام : لا والله ما سمعناك كلت
لان حضرتك التهيت تتغزل وناسي تأدي وظيفتك

انتبهت عالدكتور انقصفت جبهتة والله اني من يمي
استحيت خرب يومك هذا مجرم بكل المواقف حتى بالقصف ماعندة يمة ارحميني
الدكتور : وهسة انت عرفت بصحة المريضة
انا اترخص عن اذنكم
التفتت علية
فرصة سعيدة ست هيام
وطلع وتركنا
اتمنيت اطلع وراه واشرد من هذا الواكف كدامي
الي عيونة شرارة تريد تحركني بنارهة

سمعت صوتة الامر
ضرغام: يالله عمة ابوي كال راح يبات اليوم وية بنت عمة هناء
فانتو جهزو حالكم حتى ارجعكم وياي عالبيت
اباوع لخالة رحاب التفتت علية وابتسمت
رحاب: يالله هيومة كومي لبسي عباتج عدل
خلي نروح هم يالله وانتي شكلج تعبانة ولازم ترتاحين
هيام: لا خالة انتو روحو ما عليكم بية اني ابقة يم ريمة
ضرغام: لا ما تباتين بالمستشفى
مايمشي عدنا هذا الكلام
هيام : مو بكيفك
ضرغام : چا بكيف منو تردين
رحاب: سمو بالرحمن وكولو يالله
ضرغام عمة على كيفك وية البنية
ضرغام: عمة شتحجين تريد تبات هنا الظاهر الاخت متونسة وعاجبها الدكتور يتغزل بيها
الا احنا كرونة ونخليها تبات هنا

هيام : ما اتحرك منا اني مستحيل اعوف اختي لوحدها وتكعد وما تلكاني
رحاب: عادي عمة خليها تبات هم صدك اخاف ريمة تكعد وما تلكة اختها وتنتكس صحتها
ضرغام: مستحيل عمة لا تحاولين اخليها تبات هنا لوحدها
هيام: لاتكلي خايف علية
ضرغام: لا مو خايف عليج بس خايف
على سمعتنا
كلامه صدمني جمدت بمكاني وصرت اباوع عليه
بغضب

رحاب: لا تخاف ما راح اخليها تبات لوحدها انا ابات وياهم
التفتت علية
: هيومة ترة ضرغام حريص على عرضة وانتي بمثابة
اختة وعرضه
هيام: وصلت الرسالة وعرفت المضمون ما يحتاج تبررين تصرفه الجارح

دنكت ورحت كعدت يم ريمة وانطيتهم ظهري
ما اريد يشوف تأثير كلامه علية
جرحني وعرفت على شنو يلمح وشنو المقصود منة
جريت حصرة وصرت اصبر نفسي
بعدج هيام ببداية الطريق لاتسمحيلهم
يهزوج بكلامهم
انتي بنت هناء وهناء ما ربت بنية ضعيفة
سمعتة يحجي وية خالة رحاب
: جا خوش اذا انتي تباتين وياهن خلاص
راح انطي خبر لابوي حتى يرجع للبيت
وانا ابات بمكانه
رحاب: اي هم صدك زين تسوي خطية راضي هواي تعب اليوم وهو كلبه تعبان
ضرغام: يالله انا طالع نا تأمرون على شي
علة صوتة بالكلمة الاخيرة كان يشملني بالسؤال
ما رديت وغلست عليه
مو مال واحد ينطي وجه
رحاب: لا عمة سلامتك ما يأمر عليك ظالم
سمعتة كرر كلامه
ضرغام : يا حايط ما محتاج شي انا طالع
ابتسمت عرفت اني الحايط وهم ما رديت
رحاب: يالله عمة روح لاتتأخر على ابوك
ضرغام: عمة شكل الحايط ينرادلة تفليش
طلع وتركنا لوحدنا
عجيب هالبني ادم
خلاني خلال لحظات اتكلب اتكلب من حال الى حال
من الغضب الى البرود وبعدها انكلب حالي للمرح
عبالك شايل ريمونت كونترول ويتحكم بتغيير بمشاعر
الناس بضغطة زر
عجيب امره شنو يملك هذا الشخص لحتى اني هشكل
اكون متأثرة بي
اوووف
رحاب: لا تضوجين منة ترة والله هو كلبة طيب
وحنين ومعاملتة هاي ترة حتى وية خواتة هيج حريص عليهن اتخيلي خواتة واخوانة
يسولة الف حساب ويهابونة اكثر من ابوهم نفسة
هيام: لا خالة لا تشغلين بالج بية اصلا ما اهتميت لكلامه اني مالي علاقة بي مجرد بنت عمتة وهو ابن خالي
((((((())))))
بعد مرور ثلاث ايام
جنت اجمع بغراض اختي بالمستشفى
لان الدكتور كتبلنا على خروج
واليوم خالو راح يجي هو وضرغام
وهسة اني وريام ننتظرهم يجون علينا وياخذونا
لبيت اهل امي
جنا كاعدات ومنتظرات بحالة ترقب
وخوف
حسب كلام خالة رحاب
كالت الكل متلهف يريد يشوف ويتعرف على بنات هناء

يتبع