رواية تائهة بين اروقة الماضي الفصل الثاني عشر 12 - بقلم الكاتبة نهى

تائهة بين اروقة الماضي
بقلم الكاتبة nuha-d-h

احبابي المتابعين تحية طيبة .. حبيت اليوم اشاركم ببارت مفاجئ لعيونكم ان شاءالله يعجبكم .. اختكم نهى

جنت ارتب بغراض ريام واحطهم بالجنطة لان اليوم
كتبلها الدكتور ع الخروج من المستشفى
ريام : شوكت راح يجون
هيام : كال بمسافة الطريق جايين
رحاب: هَـا خالة ريمة متأذية
ريام: لا خالة بس اضوج من الانتظار
عرفت اختي ريمة ليش كل ساعة تسأل عن جيتهم لان بداخلها لهفة وامل راح تتعرف على عائلة جديدة
تخصها تتمنى ان تلكة عندهم الامان والامل الي فقدتهم بعد وفاة بابا
طبعا خلال اليومين الفاتت خالة رحاب متركتنا ولا لحظة الا عند الحاجة ترجع للبيت علمود تغير ملابسهة
ويرجعها ضرغام
خطية ريمة شكد كسرت خاطري من فتحت عيونها
وشافت خالة رحاب موجودة كاعدة
يم راسها
شهكت من الصدمة وصارت تهز براسها ونزلت دموعها مامصدكة الي تشوفة كدامها
وهمست : ماما يوم ؟؟؟!!!!
رحاب : بابعد عمري ان شاء الله ماكو فرق انا هم مثل امج
هيام: ريمة هاي خالتي اخت امي
اسمها خالة رحاب
باوعت لاختي استردت لون وجها بعدما استوعبت الصدمة
ريام: خالة انتي هواي تشبهين امي
رحاب: قبل كلهم يكولون انتو كلش هواي بينكم شبه قوي يشرفني اصيرلكم ام وتصيرولي
مثل بناتي وجرت حسرة
ومن هذا اليوم صارت ريام اول ما تكعد من النوم تسأل عن خالة رحاب وين راحت وبدت تتعلق بيها

اما ضرغام فحاولت اتجنبه من بعد المشاحنة الي صارت بينا باول يوم
اني لازم الزم حدودي بعدني جديد
لان ما يصير اول ما ادخل لبيتهم واني عندي عداوة وية ابنهم الجبير
شي اكيد راح يصعب علية حياتي وياهم ويعرقلها (((())
كملت تحضير الجنطة وانتبهت عالوصفةً مالت العلاج
محد راح جاب العلاج من الصيدلية
لزمتها
هيام: خالة اني رايحة اجيب الدوة من صيدلية المستشفى الجوة بين ما تنتظرونهم هنا
علما يجون
رحاب: خوش بس مو تتأخرين
اخذت الوصفة ونزلت للطابق الارضي وسألت الفراش عن مكان الصيدلية واشرلي على نهاية الممر تصير قريبة على باب الخروخ
جنت امشي وصار الدكتور بوجهي
ردت اغلس واكمل طريقي بس هو شكلة ما ناوي يجيبها لبر ويستغل كل صدفة
الدكتور: صباح النور يا وردة
هيام : صباح النور دكتور
الدكتور : سمعت اليوم راح يطلعون اختج من المستشفى
باوعت عالوصفة بيدي اريدة يحس ويختصر بالكلام واروح بسرعة
هيام: اي نعم
الدكتور: حرامات ترحون اتعودنا عليكم
اهووو هذا الاخ ناوي يطول بالحجي
هيام: عن اذنك دكتور اني لازم اروح
الدكتور: اخذي راحتج وردة
بس لحظة قبل لا ترحين اذا تحبين انطيج
رقم نقالي اخاف يصير شي او تحتاجين استشارة طبية علمود اختج انا بالخدمة

اجيت ارد عليه بالرفض
بس كمزت من مكاني من سمعت صوت مجرم الحرب
جاي من وراي جان صوتة خشن يرعد رعد عزة العزاج يا هيام جانت عايزة والتمت يالله اتلكي وعدج
ضرغام: دكتور خير سالمين شكو
جان يحجي ويتقدم بخطوات بطيئة هادئة
عبالك جاي يسوي احماء قبل لا يهجم
التفت علية
ضرغام: شتسوين هنا نازلة ليش مو يم اختج
مديت ايدي حتى اراوي الوصفة مالت الدوة
هيام: ردت اجيب العلاج من الصيدلية
مد ايدة وخزرني
ضرغام: بالله شو جيبي انطيني الوصفة
سلمتها الة
: شوفي خلال ثانية ادور وجهي الكاج صاعدة فوك يم اختج فاهمة
ماكدرت اعارضة كدام الدكتور
خفت منة شكلة وعيونة مال واحد يريد بس حجة حتى يتعارك
تركتة ورحت بس خايفة
من النظرات الي وجهة للدكتور النية جانت واضحة بعيونة راح يسوي شي بالدكتور خطية الله يرحمة
جان خوش ولد
رحت لنهاية الممر وسويت نفسي اريد اصعد
جان يراقبني من غبت عن عيونة رجع التفت عالدكتور
اني كبل رجعت وصرت ورة الحايط اراقبة شراح يسوي
خفت لا يسوي مشكلة هنا بالمستشفى عالاقل اتلاحك للموقف واتصل على خالو راضي يجي يلحك
هذا الثور الهائج ويربطة
شهكت بخوف من شفت ضرغام لزم الدكتور من
المانتو الابيض من يم ركبتة
ضرغام : انت شلون تتجرء وتعرض على الاهل
رقم نقالك
اباوع عالدكتور انخطف لون وجهة ولزم ايد ضرغام يريد يبعدها عن ملابسة
الدكتور: اخي لاتفهمني غلط جان قصدي شريف بس
حبيت اقدملها خدمة انسانية
ضراغام وبصوت عالي : دنجب عار
شنو خضرتك مخلي رقم نقالك للثواب
شنو انا كدامك زعطوط وتريد تعبرهم علية
خايب ولك انا عشرة منك الفهم لف واحطهم بجيبي
بالله شو دتعال خلي اعلمك شلون تتعدة على حرمتنا
واعلمك عالاصول

حطيت ايدي على حلكي يمة صخام راح الولد
دفعة عالحايط
وانتبهت على كم رجال اتدخل بسرعة
ولزمو ضرغام وواحد بيهم صار حاجوز
بين ضرغام والدكتور
اسمعهم يحجون
صلو على محمد كولو يالله
وضرغام يتدافع وياهم يريد يوصل للدكتور والنار
تريد تطلع من عيونة من الغضب
يمة يخوف ماكدرت اكمل الموقف
رجلية كامت ترجف رحت ركض بسرعة صعدت فوك ودخلت لغرفة اختي

رحاب : يمة اسم الله شبي وجهج مخطوف لونة
هيام: ااا هَـا لا ماكو شي
رحت اتقدمت وكعدت يم خالة رحاب عبالك جاي انشد منها الامان حتى تحميني من غضب هولاكو
كعدت عاقلة عبالك ما مسوية شي
دقايق يمة وانفتح الباب عبالك عاصفة دخلت علينا
ضرغام والعيون حمر
بلعت ريكي
واتشاهدت الله يرحمني والله خطية اني
رحاب: يمة خير شصاير شبيك عمة
داخل علينا هدادة
ضرغام : هو منين يجي الخير وانا الله بلاني ببنت خالة مثل هاي
التفتت علية خالة رحاب
رحاب : عزة بعيني احجي شمسوية ولج
هيام: ما سويت شي رحت اجيب الدوة من الصيدلية
وشفت الدكتور طلع بوجهي وكعد يسألني عن صحة اختي
ضرغام : اي وينطيج رقم نقالة شكد حنين
ااااخ بوية
عمة انتي شلون تخليها تنزل لوحدها تجيب الدوة
شنو احنا وين رحنا
اباوع عليه كل ساعة ياخذ نفس عبالك جاي يدور الصبر حتى ما يسويلي شي يتندم عليه بعدين
هيام : ترة ماصار شي واني اصلا بدون ما تحجي اني راح ارفض رقمة
لكزتني خالة رحاب بخاصرتي وهمست بصوت ناصي
رحاب: سدي حلكج وبلعي السانج
لا يكوم عليج مو جاي تشوفينة شلون صاير نار
لاتكعدين تجربين حضج
ضرغام: شوفي ولج قسماً بذات الله اذا ما انعدلتي
وانتبهتي لتصرافاتج بالقران
الزمج ووين اليوجع بالحزام
هيام اتسعت عيوني من الصدمة: حزام شنو
سويت نفسي استغبي حتى ما يبين علية الخوف
غمض عيونة
ضرغام: اللهم صبرج يا روح شكلي اليوم كاتلي واحد وداخل للسجن من ورة هاي الكاعدة كدامي

اتسعت عيوني بصدمة باوعتلة معقولة يسويها
ارتعد جسمي وانتبه على حركتي
ضرغام : نزلي عيونج ولا تباوعيلي هيج
ترة افكسهم
تلقائيا رمشت عيوني هاي الحركة اسويها من اريد
استعطف بابا او اريد اطلب منة شي
هيام: احم اني اسفة بعد ما راح انزل
ولو اني ما سويت شي غلط حتى اعتذر
بس شفتك عصبي كلت اعتذر منك حتى بلكت
تبطل عصبية
ضرغام: لاااااا هاي ابد مو طبيعية
انتي السانج شنو سالفتة ما خايفة عليه ينكص
حطيت ايدي. على حلكي وهزيت راسي بالرفض
صارت الحركة تلقائيا
انتبهت عليه حصرتة الضحكة على شكلي
واتدخلت خالة رحاب تهدي الوضع
رحاب: يالله عمة ضرغام كول يالله ترة البنية بعدها
جديدة عالوضع وما تعرف طبعنا
انتبهت لريام متضايقة
ريام- ترة احنا بابا ما يصيح علينا وابد ما يمد ايدة علينا
التفت عليها ضرغام
وباوعت عليه شلون تغيرت نظراته من الغضب
للرحمة والعطف بتجاه ريمة ارتبك منها وشاف الدموع متجمعة بعيونها
ضرغام: احم ترة انا ما جنت ناوي اسوي شي لاختج
لاتخافين مني مستحيل ااذيكم
انا ابن خالج وان شاء الله مثل اخوج
وماكو اخ يأذي اختة
الا اللهم جانت اختة التفت على هيام
وحدة عوجة تحتاج واحد يعدلها ويعلمها شلون تصير مرة معدلة
انتبهت على ريام ابتسمت على كلامه

اتنرفزت واحترك كلبي من يمي ما اعرف ليش
ريام: شكراً ضرغام جنت طول عمري اتمنى امي تجيبلنا اخ ردت اعرف شعور وجود الاخ شلون يكون
وان شاء الله ربي يمكني واصيرلك اخت تفتخر بيها
واعيش وياكم و اعرف شعور الاخوان

اتعجبت من كلام ريام وية ضرغام عزة هذا شكلة
سوة سحر لاختي واكل عقلها اباوع عليها شلون تباوعلة
عبالك بطلها الخارق
ضرغام: الي الشرف تصير عندي اخت ثالثة صغيرة
مثلج
ريام: عفية مو تضوج من هيام ترة هي والله حبابة
وتتصرف على طبيعتها لا تفهمها غلط

ما ادري ليش حسيت للحظة عبالك ريام اختي الجبيرة واني الصغيرة المشاغبة طالعة شاذة عن القاعدة

شنو جاي يصير حسيت البساط انسحب من جواي
هيام: ريام ما يحتاج تبررلية موقفي اني مسويت شي
واصلا اني راح اسحب اعتذاري لان راجعت الموقف وشفت نفسي ما ارتكبت خطاء حتى اتعاقب عليه مو ذنبي الدكتور لزكة ولا ذنبي عندي ابن خال هولاكو

قطع حديثنا دخول خالو راضي
راضي: السلام عليكم
الكل : وعليكم السلام والرحمة
راضي: هَـا جاهزين
رحاب: اي خوية جاهزين ما عدنا شي
انتبهت لضرغام مد ايدة بيها علاكة بيضة
ضرغام: هاج اخذي لزمي هذا دوة اختج والصيدلاني
كتب عليه اوقات تناول العلاج
مديت ايدي اخذ العلاكة وبالصدفة ايدي لامست ايده
ووكعت علاكة الدوة من الارتباك بالكاع
ما اعرف ليش رجفت ايدي
رفعت عيني شفتة صاير احمر شكلة هو هم ارتبك
محرج من الموقف
جان موقف بسيط بس احنا انخبصنا اثنينا ما ادري ليش
راضي: يالله انا نازل قبلكم
اسلم على الدكتور صديقي واتشكر منة
انتظركم جوة وضرغام يوديكم للكراج
طلع واحنا كمنا وعدلت لريمة وكومتها من السرير على كيف
اتقدمت خالة رحاب من عندها ولزمت ايدها تسندها
خطية بعدها تتحرك بصعوبة تكول كلما تتحرك ينغزها الجرح
اني شلت الجنطة واتوجهت للباب اريد اطلع
ضرغام : انتي هي ساااالمين وين مولية
باوعت عليه بعدم فهم
هيام: اي غير ننزل لخالو ينتظرنا جوة
ضرغام: انتي شلون بيج ما ناوية تنعدلين الا تاخذيلج رزالة مد ايدة وجرني من عباتي بصفحة الكتف
عبالك ساحلة مجرم من طرف ياختة رجعني جوة للغرفة
ضرغام: ترجعين جوة وتلبسين عباتج على راسج عدل
لا والعباس
شايفة هاي العطوب (الشعر ) الي كل ساعة مطلعتهم مفتخرة بيهم لنتفهم الج وحدة وحدة واخليج صدك تعوين

هيام : ما يحتاج تتوعد لو بس كايلي عدلي عباتج
جان عدلتها بدون ما تكعد تشرحلي المقتل
ضرغام : عمة انا طالع كدامكم وانتبهي على هاي
لان السانها ما ناوي يجيبها لبر واليوم يا قاتل يا مقتول
والاكيد مقتولة
بلعت ريكي وجمدت بمكاني وصرت اسكت نفسي
هيام كافي استحملي شوية عبري لتحجين
حسبت بكلبي من الواحد للعشرة وسحبت نفس عميق
يا رب الهمني الصبر حتى ما احط التحفية براسة
عدلت عباتي على راسي
واباوع عليه كل ساعة يباوعلي بطرف عينة
عبالك يراقب حركاتي
سمعت خالة رحاب تمشي بصفة وتحجي وياه بصوت ناصي بس اني سمعتها
رحاب: عمة ضرغام شجاك عالبنية خطية على كيفك وياهة ونزل عيونك عنها كل ساعة تباوع عليها عبالك مجرمة ما يصير هشكل راح تخوفها من عندك
ضراغام بغضب مكتوم : ما ادري ليش من امشي وية هاي البنية احس عبالك جاي امشي بحقل الغام
وما ادري شوكت ينفجر بوجي اللغم
نسيت نفسي وهمسيت: اللهم امين
التفتو اثنينهم علية بتسائل
عزة سمعوني
اتلاحكت لروحي والتفتت على ريام
: اللهم امين ان شاء الله تتشافين وتصير سوالف
رحاب: ها خالة ريمة موجوعة
ريام : لا ما موجوعة
ضرغام : تردين اجيبلج كرسي متحرك
خاف ما بيج حيل تمشين
ريام: لا ما يحتاج مشكور
كملنا مشي
وصلنا للكراج وصعدنا بسيارة بيضة عالية
نوع كزس
اباوع عليها من الداخل تجنن والكراسي مالتهة مريحة بشكل وشغلو التكييف جانت كلش فخمة
كعد خالو كدام وضرغام بصفة يسوق واني وخالة رحاب وريام ورة
اتحركت السيارة وصار كلبي كلة يرجف وكأن اقترب موعد اللقاء مع الناس الي جانت امي عايشة وياهم في مامضى وبينهم ذكريات وماضي مشترك
كان شعوري يجمع بين الخوف والترقب
(((((()))))
ورة عشر دقايق اتوقفت السيارة التفتت وباوعت من الجامة وسحبت نفس عميق وشفت البيت الفخم الي وكفت كدامة السيارة
حسيت بالخوف ما اعرف ليش
وجسمي كلة يرجف عبالك اني المريضة مو ريام
انفتح باب الكراج ودخلت السيارة جوة بالكراج نزلت خالة رحاب ومدت ايدها لريام حتى تساعدها عالنزول
واني شلت الجنطة ونزلت ورة ريام من نفس الصفحة
جانت السيارة عالية وما انتبهت لعباتي صارت جوة رجلي دست عليها واجيت اوكع على وجهي
مديت ايدي كدام لا اراديا وبنفس اللحضة
حسيت بثنين ايدين قوية منعتني من السقوط
استندنت عليه جان
جسم صلب مشدود العضلة
رفعت عيوني شفت نفسي محصور بين باب السيارة المفتوح وبين ايدين ضرغام
انتبه على نفسة وبسرعة ابتعد
ضرغام : احم احم انتبهي زين ما وكعتي على وجهج
وبسرعة البرق اختفة من كدامي عبالك بية مرض معدي ويخاف اعديه
سديت باب السيارة وراي واخذت نفس عميق والتفتت بتجاه البيت
وهمست لروحي

هَـا هيام مستعدة للمواجهة

يتبع