رواية تائهة بين اروقة الماضي الفصل الثاني والخمسون 52 - بقلم الكاتبة نهى

#تائهة_بين_اروقة_الماضي
#بقلم _الكاتبة_nuha-d-h
صباح الخير عليكم يا احبتي عدت لكم لاكمل لكم
الاحداث فتعاولووتجمعوا من حولي لكي احكيها لكم
اتمنى لكم قراءة ممتعة
اختكم نهى
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀

ضرغام
جنا كاعدين انا وضرغام وضاري ننتظر
خالى فاضل يجي لان اتصلت عليه
اجتي رفاه مبدلة ملابسها ولابسة شال كعدت يمنا
وهي مدنكة راسها وما رفعت عينها بعين ضاري جانت عيونها حمر وبس تبجي مفتحت حلكها بأي كلمة
كسرت خاطري
عكس اختها رنا فهاي بحثاً اخر من عرفت بينا فشلنا خطتها هي وحنين وعرفنا كلشي عنها ظلت تحوم فوك راسي
وكل ساعة تتوسل علمود ما اجيب سيرة بالصار لابوها
باوعت عليها بقهر تركتها تحجي لوحدها بدون ما ارد عليها
ما تستحق الواحد يسويلها احترام ويحجي وياها لان زمن الحجي والتفاهم ولة وما يفيد بيها
مثل هيج بشر ما ينفع وياهم بس ضرب السوط
رنا.. عفية ضرغام لخاطر بابا لتفتح الموضوع
واوعدك ما اعتب باب البيت وشنو تحكم اني راضية بس كون بابا ميعرف والله يروح بيها
ضرار.. ما دام انتي هشكل حريصة على ابوج جان فكرتي بيه قبل لا تسوين سوايتج والله انتي لو اختي جان
جرمت بيج اكسر رجليج واكرمج واكعدج عالعربانة
اباوع عليها بلعت السانها وسكتت وبلعت ريكها بخوف جان ضرار نار يحجي بصوت عالي
ضاري كل ساعة ينافخ احس بي الهدوء الذي يسبق
العاصفة
دخل خالي فاضل وهو يباوع بالوجوه
فاضل.. ضرغام شكو شصاير ليش دزيت علية وانا ببيتكم ورجعتني لهنا وانت شعجب مو يم ابنك تحظر طهوره
رفعت راسي وباوعت عليه كسر خاطري والله ما يهون علية احجيله الصار واقهره بس الموضوع مو هين وما ينسكت عليه لازم يكون عنده علم
بنته مرافقة وحدة مو زينة واهلها ناس سمعتهم زفت والكل يعرف بيهم مو راحة وفوك هذا كلة
سوايتها وخطتها على ضاري
.. خالي ان شاء الله ماكو شي بس انت تعال اكعد
وانا احجيلك الي صار
اباوع لرنا كامت من مكانها وحجت بخوف
.. بابا اني اكلك هذولي ولد اختك جايين يتبلون علية
انتبهت لضرار عاط بيها
رفعت ايدي واشرتله يسكت وجوابتها بهدوء قبل لتكمل كلامها
.. رنا ستري على نفسج
ترة اي كلمة منج كبل اتصل على حمزة ويجيب حنين وامها واخوها فخلي يكون الموضوع مستور بس بينا
مو علمود لا علمود انتي مهما صار ومهما سويتي تبقين بنت خالي وعرضي راح اكتفي بس احجي لخالي حتى يكون عنده علم بسوايتج
رجعت كعدت وعيونها تتنقل مني لأبوها
جان الخوف واضح عليها
فاضل.. شنو بوية ضرغام فهمنا شكاعد تحجون ترة والله دخت
التفتت عليه وصرت احجيله عن الصار وعن سواية رنا وختمتها بموقفها وية اختها وضاري
جنت احجي وخالي فاتح حلكه مصدوم
اخر شي حجة.. بوية ضرغام انت منتبه شكاعد تحجي
ولك هذا حجي تنكسر عليه ركاب ويهجم بيوت معقولة انا بناتي يطلع منهن هيج فعل
اعذرني هواي علية اصدك عقلي ما جاي يستوعب
زين هذا كلة يصير من ورانا انا وامها وبدون ما نحس عليهن
جان يحجي ويرجف
التفت على رنا باوع على مطفاية جكاير جانت بصفه
حجة بصوت مهزوز.. ولج ليش بوية هشكل تكسريني
ولج سوايتج ما تسويها بس بنت الحرام
رنا تبجي.. بابا عفية بس خليني افهمك
همس بحدة .. ما يحتاج تفهميني الله سترنا ببأبن عمتج
رنا.. هو كلة منة الصًو......
ما لحكت تكمل كلامها
لان انتبهت لخالي فاضل كام على حيله
ومد ايده عالنفاضة وشالها وركعها براسها
وكبت العيطة
لاول مرة بحياتي ما افزع لمرية تنضرب كدامي
ضربها وهي بس تصرخ لزمه ضرار وبعده عنها
ضرار.. خالي اتركها خليها تولي عنك لانوب يصير بيك شي

والتفت على رفاه
.. وانتي بوية رفاه العاقلة الي جنت اكول هاي وردتي
الخام شجاج وخربتي على ابوج ليش بوية جا ما كسرت خاطرجن وكلتن هذا ابونا ما يستاهل يتبهذل وننزل راسه
جان يحجي ورفاه بس تبجي
.. بابا حقك علية عساني كون ميتة ولا اشوف القهرة بعيونك وانا سببها
هد عليها يريد يضربها مقهور
وصار ضاري كدامه
ضاري .. خالي عوفها علية رفاه عقابها عندي بس مو بالضرب
ضرغام.. خالي رفاه مالهة دخل البنية ضحية اختها
انتبهت لخالي كعد عالقنفة مهدود حيله من الصار
دنك وحط راسه بين ايديه
لزمته من كتفه
.. خالي كول يالله والحمدلله احنا لحكنا نلحم السالفة
ومحد عرف بيها بس احنا لا تاكل هم واعتبر الي صار جوة نعالك ومحد راح يجيب سيرة البنات بالشينة
واحنا ان شاء الله اهل وانا ابنك يعني لاتكعد تاكل بكلبك
فاضل.. جم دوب تلحم يضرغام موكثرت زلاتنا
وياك حتى صرت استحي ارفع عيني واحجي وياك
.. عفو عليك خالي جا شنو جنت احجي قبل شوية
موكلتلك انا مثل ابنك والي يمسك يمسني
لا تخلي الصار يفرق بينا وداعتك ما هزني ولا اثر علية الصار نكدر نعتبره درس والفات مات
وكلشي يرجع لمكانه ورفاه بتنا وتبقى مرت اخوي
ورنا بنتك عندك وانت اعرف شلون تتعامل وياها
حجة ضاري .. من بعد اذنك ضرغام لحظة ولو اقاطعك انا رغم كل الي صار راح اسكت عنه وما احجي اي شي بس شغلة
وحدة بعد ما اكدر اتحملها واسكت عنها ولا اكدر اتعداها
باوعت على رفاه شلون جانت تباوع علية وتبجي منهارة وجان جسمها كلة يرجف
خاني كلبي للحظة واتمنيت اخذها لحضني
بس فعلتها قضت على اخر قطرة رحمة بكلبي بأتجاهها

فاضل.. شنو بوية ضاري كول
ضاري.. رفاه بنتك تبقى عندك وورقة طلاكها تجيها
سمعنا صرخت رفاه وصر جسمها كلة يرجف
صحت بضاري الي صدمني
.. ضااااااري احترم نفسك اشو انت ما تحشمني تحجي بدون ما تسوي حسابي
ضاري.. محشوم يابوعلي بس الي صار يخصني ويخص رفاه ومحد الة حق يتدخل ويقرر عني
وانا قررت اطلك رفاه واظن بهاي محد يحقني بعد الصار او يكدر يلومني
رفاه .. ضاري عفية لا لا تكولها والله اموت بدونك
لا تطلكني وتكسرني بيك
جانت تحجي وتعيط منهارة
عاط خالي فاضل برفاه.. رفاااااه كافي بوية صيري عزيزة نفس وطلعي من الهول كافي الي صار كلبي بعد ما يتحمل
مشت من كدامنا وطلعت جانت مدنكة مكسورة
رجع التفت على ضاري وحجة
.. ماكول بس حسبي الله ونعم الوكيل
براحتك بوية ضاري ما اجبرك تاخذ بنتي عندك وترجعها بس احب اكلك رفاه بنتي واعرفها فقيرة ومالهة يد بالصار صحيح هي غلطت بس جلة من لا يخطيء عالعموم انت حر واسأل الله يعوضها
طلعنا من بيت خالي بوكت متأخر بعد ما طيبنا خاطر
خالي صحيح جنت معترض على قرار ضاري
بس يبقى هو رجال وصاحب قرار وهاي حياته مالي حق اتدخل وامنعه كان على عيني اشوف دموع رفاه
تبجي والله صارت دموع ميس اختي كبال عيوني
ما ردت توصل الامور لهاي المرحلة
بالطريق واتصل ابوي
.. هلا حجي احنا وصلنا قريب عالبيت
.. شنو السالفة وين صرتو والله اعصابي تلفت
.............
هيام
اليوم اطول يوم بحياتي من كد الانتظار والتوتر
اني اليوم ماخذة دور ريام صرت اتسمع لكل اثنين
يحجون لوحدهم وخصوصاً خالو راضي
سمعته اتصل على ضرغام يسأل عليه بقلق
ظليت احوم عليه سويت نفسي جاي انظف بالهول بس علمود اسمعه شنو يحجي
الحجية خاجية.. هَـا يمة راضي بشر وين الاولاد
راضي.. حجية جايين بالطريق
علاوي كام يبجي رحت يمه
حليمة.. خليه هذا كام يتدلع سمع ابوه راح يجي
جانو يحجون وانا النار تفور بكلبي اتمنى اشوفه
بس الغريب بالامر محد يحجي بس خالو راضي
الحجية خاجية.. يمة راضي شبيك تلوب
شني صاير شي عالاولاد وما تقبل تحجي
راضي.. لا يمة ماكو شي
جان يحجي واندك الجرس
راضي.. هذولي همة وصلوا

لكزتني ريام وهمست .. اكول يا حلوة اشم ريحة مشاكل بالجو وحدسي عمره ما خذلني
باوعت عليها .. اي ومثل كل مرة ابو المشاكل ضرغام
هوصاحب المشكلة
جنا نحجي وميس اجتي وحشرت راسها بيني وبين ريام
وتكلب بعيونها بيني وبين ريمة مثل الكارتون وهمست بصوت ناصي
.. شنو شنو شنو احجو احس اكو شي صاير بالبيت
وهذا الشي يخص ثلاثي الضاد اخواني ضرغام وضرار وضاري
جانت تحجي
ودخل ضرغام وراه ضرار واتفاجئت بدخول ضاري
معصبين راسه
حليمة شهكت ولطمت على صدرها
.. عزززة بعيني يمة وليدي
حطت علاوي عالقنفة وراحت على ضاري
.. يمة منو سوة بيك هيج شنو شصاير
اباوع لضاري ضايج ومخنوك دنك على راس امه وباسه .. ماكو شي يالغالية لاتخافين
الحجية خاجية.. شنو يمة ضرغام اخوك شبي شنو مسوي حادث
ضرغام
دخلت للبيت واتلكتني امي بخوفها وجدتي بأسألتها
وعيوني تدور على علاوي ابني جان كلبي طاك عليه
اريد اشوفه واطمن عليه
وكعت عيني على هيام جانت تحوم يم باب الهول تباوع علية خزرتها ودرت وجهي وصرت اجاوب جدتي
ضاري.. بوية انا ترخص راح اصعد فوك اريد شوية ارتاح راسي راح ينفجر من الصداع
التفت وصاح ميس حتى تجيبله بندول
صعد ضاري وتركنا انا وضرار نشرح الصار لجدتي وامي وابوي
حجينالهم كل الي صار وختمناها بقرار ضاري
جنت احجي ومنتبه على حركات هيام الي تحوم علينا بدون ما نحس عليها جانت تنظف وتعدل بالهول
وتجمع بالنفاخ والزينة ادري بيها راح يموتها الفضول حتى تعرف شصاير
سمعت شهكة امي.. يمة صخام الصخمني هذا كلة يصير وضاري يريد يطلك مرته وانا ماعندي علم
سودة علية خوية فاضل هسة بس الله يعلم بحاله شنو
الحجية خاجية.. جا جدة ليش ما دزيتو علينا هناك لبيت خالك ترة الموضوع مايصير ينحل هيج
ولو احنا هناك جان ما اتجرء ضاري يحجي وية خاله على الاقل جان سكتناه
راضي.. سالفة ضاري سهلة محلولة هو حجة بساعة عصبية لان الي صار وياه مو شوية كلها فترة ويكت العضب عنها ويرجع يفكر من جديد
حليمة.. الله ياخذج يا رنا لعبتي بالوادم لعب
سودة علية اخوي ما يستاهل الي صار بيه
الحجية خاجية.. شوفي حليمة هو اخوج اغبر مدللها مطلع عينه بالادلال وعايفها على حل شعرها
حليمة.. لا حجية والله فاضل حازم وية بناته
بس هي هاي رنا شيطانة هسة مو هاي رفاه وياها
ما سمعنا اي شي وشحلاتها حالها حال بناتنا

.. ولج حليمة اخوج مو زلمة حوك والدليل
رنا من سوت سوايتها وية ضرغام واتطلكت
ما حسينا الا اخوج مرجعها تداوم بالكلية
انا لو بمكانه اخليها تحلم تشوف عتبة باب البيت
واشوفها النجوم بعز الظهر حتى تبطل ما تعيدها
ما تشوفين بنت اخوج استهانت بالمصيبة
وسوت الاكبر منها
هيام
سمعت كلامهم وعرف الي صار ولطمت على خدي
عزة بعينج ياهيام الله ياخذني هذا كله صاير وانا
حايرة بروحي وبعلاوي واتهمت ضرغام لا موبس هيج
يبوووووي صخام وسديت النقال بوجهه
الله لا يرضى على ابليسج يا رنا تبقين وراي وراي ما يطول غطاي من وراج راح اتخبل وصرتي علة بحياتي وشكلي ما راح اتوب من جناني ولا راح اعقل
اوف شفته كام من يمهم وراح على لاوي الي كام يبجي
ومد ايده يريد ابوه
باسه من راسه وحجة .. الحمدلله على سلامتك يابطل
والله وصرت رجال
التفت وباوع علية كمزت من مكاني ورجعت انظف بالهول ما اريد اباوع بعيونه
يمة عيونه تجدح نار مبين معصب مني
هسة اني شجاني واتخبلت عليه وسديت النقال بوجهه
خرب تعال هذا شيقنعه
التهة وية علاوي و جان مبين عليه الخوف
اجتي خالة حليمة وبيدها
عصارة دهن
حليمة.. يمة ضرغام ادهن الشداد المضمد كال
كل شوية دهنو المنطقة حتى باجر يوكع الشداد
اخذ العصارة منها وركع على ركبته وصار يدهن بحذر وخوف حتى ما يأذي علاوي
علاوي يبجي ويصيح بابا دوم لوح ديد
خطية يريد يطلع بالسيارة
كام من مكانه حتى يغسل ايديه من المرهم
.. هسة يابعد ابوك اصيرلك سيارة بس خلي اروح اغسل واجي اخذك بالسيارة واشتريلك
الحجية خاجية.. يايمة وين تاخذه بهالليل
حتى ماكو دكان مفتح
ميس.. ههههه جدة هسة ديرة دكاكين كولي سوبر ماركت
الحجية خاجية.. وهذا شنو نوب سوبر شني سيارة لو شنو
.. لا جدة انا مو اقصد سيارة السوبر
انا قصدي سوبر ماركت هذا هم دكان بس جبير
دارت وجها على ضرغام
ميس.. ضرغومي حبيبي الله يخليك اشتريلي وياك
حلويات وجبس مثل علاوي عفية والله طاك كلبي عالكاكاو ومحد يقبل يشتريلي
الحجية خاجية.. يا خايبة ميسة عاباج الله شوكت تكبرين
لاحكة الولد عالجبسات والعصير
ميس.. جدة هاي ما بيها صغير وجبير
هاي حلويات تردين اخلي ضرغام يشتريلج جبس وكاكاو ترة عادي لا تستحين كولي اذا مشتهية اخلي يجيبلج وياه
ضربتني بالعصا.. خايبة العوبة ميسة انا الج تضحكين علي
ميس تحك رجلها بمنطة الضربة
.. بسيطة حجية خاجية انا الج اردتها حرباً فلتكن
ابتسمت على شكلها
دنكت اشيل التكيات مالت القنفات الي جانت واكعة بالكاع شلت اثنين منهم
وجاي ارفع ظهري اتأذيت مررت كف ايدي على ظهري موجوعة اليوم صدك تعبت بس مع الاسف مثدر راحتي زعلان علية وشي اكيد راح يبخل علية بحضنه

جنت واكفه ولازمة بأيدي الكوشات
دخل ضرغام جاي ينشف بيده وحجة
.. تركي الشغل من ايديج كافي صارلج ساعة تفترين جنج ناعور روحي صعدي فوك ارتاحي
ابتسمت بأمل فرحت من شفت خوفه علية
.. لاتفرحين موخوفاً عليج اكلج صعدي وانما
خايف على ابني الي ببطنج لايصير عليه شي
برطمت بزعل
.. لتخاف ما يصير عليه شي
ودرت وجهي وصرت انظف بالصالة بالعناد وانتقل من لمكان كدامه
ما حسيت الا لزمني من زندي وسحبني عليه وهمس بغضب رفعت عيوني اباوعله عروكه باينة من ركبته
حجة وهو يرص على اسنانه من الغضب
.. هيام اتقي شري راح احسبلج للعشرة اذا ما تركتي
الي بيدج وصعدتي كدامي فوك
لاسوي شي ما يعجبج
.. هاي شبيك ضرغام ليش هشكل معصب علية

ضرغام.. ولج هيام انا ما ناسي سالفة النقال
ولج انا تسدين النقال بوجهي
غمضت عيوني وعضيت شفتي بفشلة
.. اسفة والله ما ادري شبية اليوم
.. بسيطة انا اعلمج الما تدرين شلون شكلج نسيتي
ضرغام
يالله تحركي كدامي وحسابي وياج بعدين
التفتت عليه ورفعت راسي وحطيت ايدي على صدره بتوسل
.. ضرغام بس لحظة افهمك
.. ماكو ولا لحظة هسة تصعدين لغرفتج والعد راح يبدي
.. انت ليش هشكل عنيد وما تقبل واحد يفهمك
رفع حاجبه
.. شوف اسمع منو يحجي عالتفاهم ليش عقلج مساعة وين جان من طلبت منج تصبرين علية وافهمج من ارجع هسة عالعموم بعد ما يهمني الفهمتي والمافهمتي صار عندي نفس الشي
يالله العد راح يخلص تحركي صعدي لغرفتج
خمسة .. ستة .. سبعة
حصرتني البجية يالله شكد عنودي
.. عفية ضرغام لتصير عنودي ما اكدر اصعد واترك علاوي لوحده
.. ما عليج بعلاوي امي كالت اليوم ينام يمها حتى تدير بالهة عليه هي تعرفله اكثر منج
رفع ايده ورفع اصابعه
.. ثمانية .. تسعة
حجة بتحذير
راح اوصل للعشرة قسماً بذات الله اذا ما اتحركتي من كدامي
احرك البيت على راسج
ضربت رجلي عالكاع بغيض
واتحركت من كدامه متوجهة للدرج اريد اصعد
واني ادردم عليه
.. ليش احس يعاملني مثل الطفلة
اجاني صوته من وراي
.. لان اليوم ثبتي بموقفج هذا انتي بعدج طفلة وتحتاجين اب يعلمج ويروضج وان شاء الله راح اكونلج نعمة الاب
دنكت بخذلان وقهر وصعدت فوك
جنت بين المقهورة وبين الفشلانة من ضرغام
اليوم صدك اني استعجلت مثل كل مرة وصدرت الحكم
ضده بس ياناس والله مو بيدي غصب عني احبه واغار عليه وخصوصا اذا اسمع بالموضوع سيرة رنا اني اتخبل وعقلي يقفل واصير اشوف كلة بالابيض والاسود
دخلت لغرفتنا اليوم كلبت دقلة وعدلتها وبخرتها
وزينتها بأيضاءة مثل الكرستال الفضي حطيته عالسرير
اوف حرامات تعبي كلة راح عالفاضي
وكعت عيني على الفستان الاحمر القصير
وفجاءة اجتني الفكرة وابتسمت بمكر
وليش يروح تعبي عالفاضي
راح اخلي هو يجي ويراضيني بنفسه
دخلت للحمام اسبح واني ابتسم على افكاري
.....................
صعدتها وانا اصحك على عنادها صحيح اليوم موقفها
عصبني بس بعدين من سمعت المشاكل وشفت الي صار وية ضاري ورفاه
حسيت هانت علية مشكلتي وصرت اتخذلها العذر واكول هي هم حقها تغار وتتسرع بالحكم لان مجان عندها علم بالصار هي حكمت عالسمعته
رحت يم علاوي وهذا خطية ما يقبل اتحرك من يمه وبعدها كام يبجي وحرك الدنيا الا يطلع ما ينسى ابن الاوادم
ضراغام.. ميس كومي لبسي عباتج حتى تلزمين علاوي بين ما اسوق بلكي اشوف محل او اي سوبر ماركت مفتح ونشتريله حلويات
جان الوقت ب١بالليل
ميس.. هسة طلقة اروح البس عباتي واجيك
لحظات والكة ميس طايرة تركض وعبايتها وراها
ابتسمت على شكلها
ميس.. عليك الله مو جني بات مان رجل الوطواط
من اركض وعباتي وراي
ضرغام.. الله ياخذج على هاي التشبيهات
صعدنا بالسيارة وبحضنها علاوي
.. امانة ميس هاي حركاتج وسوالفج لا تطلعيها كدام جهالي على الاقل من تحجي حطي ايديج على اذاناتهم
حتى لا يتأثرون بيج
ميس.. ياخوي شفايتلك لو يطلعون جهالك علية
والله امهم داعيتلهم يااخي كل اصبع مني زلمة اعجبك بالفزعة بس انخاني تلكاني عند يمناك
ضرغام.. انا سامع البنية تكول كل اصبع مرة اشو انتي عكس الناس
.. يا اخي امك خلت بية خوفة
صرت اخاف اكول كل اصبع مرة
كبل تلكة امي تطلعلنا وتكعد تعدد عيوبي الانثوية
وتطلعني صفر عالشمال
هاي من غير قصف الجبهة
ضرغام يضحك على كلامي وعلاوي التهة يباوع من الجامة الشارع وسكت
ضرغام.. خرب ولا محل مفتح
طلع نقاله واتصل على غسان ما ادري ليش
من سمعته نطق اسم غسان كلبي كام يرف قوي نا اعرف شبية
.. اكول غسان بالله ماتشوف يمكم محلات مفتحة
هذا علاوي طهرناه وطلعنا بهالليل يريد يشتري
جان بيت غسان يبعد عنا بكم شارع لذلك ضرغام اتصل عليه
.. انا انتظرك بالله شوف وردلي خبر
سد النقال وباوع لعلاوي
.. شلون بيك يا بعد ابوك اليوم حجة للصبح وياك
ميس.. خطية خليه يدلل بجاهك
.. انتي شعليج اشو مسيطرة وردة انتي المستفادة الوحيدة من هاي الطلعة
قاطع كلامنا اتصال غسان
وكله تعال لكيت محل مفتح يمنا براس الشارع
دكات كلبي كامت تزيد بالتدريج كلما اتقدمنا على بيت غسان
اندعيت من الله كون غسان ما يجي ما ادري ليش
صارت بية خوفة من عنده لان كلما اشوفه لازم يصير موقف محرج يفشلني كدامه
وصلنا للمحل وضرغام اخذ مني علاوي ونزل
.. يالله نزلي
نزلت وراهم واتلفت ادور على غسان خاف موجود
بس الحمدلله ماكو ماموجود
ضرغام.. اخذيلج سلة ورحي انطلقي اشتري الي تحتاجينه بس بسرعة اخاف الولد يريد يعزل
باوعت عليه بتردد
ميس.. يعني اشتري كل الي بنفسي بي
ضحك على شكلي
.. اي روحي اشتري كلشي يعجبج ما يغلى عليج
بس فكيني وفضيها

جان سوبر ماركت اخذت السلة وعيوني تلمع بفرحة
باوعت على اخوي بفرحة
.. ضرغومي حبيبي ما تقصر والله صرت اشوفك بعيوني مثل نعمان بس عايز تغنيلي افتح ياسمسم
ابوابك نحن الاطفال افتح واستقبل احبابك نحن الاطفال
فديت اخوي ابو الطيبة
جان يضحك على كلامي
.. دروحي فضيها مخبلة
رحت ركض هجمت على الرفوف خرب
حملت الكاكاو والنساتل والبيبسي والعصاير
والجبس ماخليت شي يعتب علية
مو مل مرة احصل على هيج عرض مجاني
رجعت محملة بالغراض والسلة مقبطة جمدت بمكاني

لكيت ضرغام واكف يم المحاسب ويمه غسان
جاي يسولفون انتظرت غسان يخلص كلامه ويروح
بلكي يطلع وما ينتبه علية
بس مع الاسف علاوي اعلن عن وجودي
بصياحه مد ايديه ويحجي
.. مي .. ميي تعا تعا
همست بصوت ناصي
.. الله ياخذ ميمي على هالدكة
دارو علية وشافوني
ضرغام.. هَـا ميس خلصتي اخذتي الاشياء التردينها
اتمنيت الكاع تنشك وتبلعني من الفشلة
اقتربت منهم وهمست بصوت ناصي..
اي اخذت الاشياء اليحتاجهم علاوي
ضرغام.. لا ماعليج بعلاوي ترة اخذتله
ورفع علاكة سودة بيها شغلات لعلاوي
يبووووووي عليك ضرغام احيت اضيعها كام صخمها
انتبهت لغسان اقترب علية واخذ السلة من ايدي
وحطها على كاونتر المحاسب
وحجة.. حييييييل هاي كلها الغراض الج لوحدج
ضرغام .. يمكن جاي تحضر مؤنة للحرب
حصرتني البجية ياربي ليش انا من دون الناس اوكع بمواقف تفشل كدام غسان
انتبهت عليه طلع محفظته وحاب الولد وصار هو
وضرغام يتحاجون عالحساب
هذا يكله واصل والثاني يكله لا والله مايصير
بالاخير غسان كدر يسكت ضرغام ويدفع الحساب
انطه الفلوس للرجال وشال العلاليك
الله ياخذني شكد ماخذه عبالك عندنا حصار وبعد ماكو حلويات راح تنقرض من كوكب الارض
شكد فشلة والله حسيت كصتي عركت
من الاحراج
ركبنا بالسيارة وانطاني العلاليك وهو يباوعلي بنظرات
غريبة اول مرة اشوفها وكاتم ضحكته بالكوة
اخذت علاوي من ضرغام وخليته بحضني
وشغل السيارة والتفت يسلم على غسان
.. مشكور غسوني سوينا عليك زحمة
غسان .. لا يابة رحمة هسة انا شمسوي هم كم شغلة
للجهال نفرحهم بيها
جان يقصدني يبوووووووووو والله هذا علية يحجي
والله لوما اخوي ضرغام موجود واخاف منه
جان نزلت الغراض من السيارة وشمرتهم بوجهه
انا ميس بنت راضي يكول علية جاهلة
بسيطة خلي يصبرلي
....................
لبست الفستان الاحمر القصير
وعدلت شعري وحطيت اخر لمسات للميك اب خرب
هاي مو اني صارلي شكد ما شايفة نفسي اي خلصت ايام الحمل تعب وعلاوي وبيت وهواي انشغلت
حتى نسيت نفسي
بس هسة احس رجعت هيام البطة
هههه وكفت كدام مراية العرض
العامودية وصرت اسوي حركات خرب هذا وين صار
كلش اتأخر
خلصت كلشي لبست وعدلت وهو ماكو حتى صرت اخذ صور لروحي بالمريا وهو ماكو ما بين
ابتسمت بمكر واخذتلي صورة كدام المرايا
ورسلتها لضرغام عالواتس اب
لحظات وتمت رؤية الصورة
اباوع عليه جاري الكتابة
اضحك واراقب الشاشة منتظرة جوابه
جان شكلي تحفة بالصورة
ضرغام
نزلنا الغراض واخذت علاوي لأمي لكيت حدتي نايمة
وابوي كاعد يم امي وضرار يمهم كاعد
حليمة .. يمة من فدوة رحت لعلاوي تعال جيبه
خلي اشوف شنو اشتريلتله
كعد بحضن امي اجيت اكوم بجة ما يقبل اتحرك من يمه
انطيته السويج خطية ما انطاني كلبي اعوفه يبجي
وانا من غير كلشي احس بالذنب بأتجاهه لان تركته
لوحده يطهرونه
كعدت يمه وانتظرته لحد ما ينام
جنت لازم النقال واكلب بي وهو كاعد بصفي ياكل
جبس وعيونه تغفي وكل شوية يغمض عيونه
ويميل راسه ويفز يفتح عيونه
وميس القردة لازمة النقال وتصوير بي
صدك جان منظره تحفة
جنت اضحك واكل من الفاكهة اليمنا عالميز
وصلتني رسالة عالواتس اب
من هيام عقدت حاجبي هاي شبيها دازة رسالة عالواتساب وهي فوك شتحس
فتحت الرسالة وانا اكل وفجاءة غصيت بالتفاحة
وظليت اكح
باوعلي ضرار وانطاني كلاص الماي
ردت اكتب الهة بس غيرت رأيي

من احتركو نار ونفط بنت الاوادم هاي شلون تتجرء ترسلي هيج صورة رجعت اباوع عالصورة
حسيت جسمي عرك وصرت امسح كصتي
هاي شمسوية بروحها ناوية تجلطني
خرب ونوب لابسة الاحمر اباوع عالسيقان تموت
التفتت اباوع لعلاوي شفته نايم
اشرت لأمي واجتي سمت بسم الله وشالته من يمي
واخذته لغرفتها هي وابوي
باوعت لأبوي مستحي منة
افتهمني وضحك
.. لا تنحرج ترة اتعودت يابوي مو جديدة علية كلها عندها احسن مني
عرفت شنو جان قصد ابوي
بس ما ناقشته ما اعرف ليش من يكون هيج موضوع حساس يخص امي وابوي استحي احجي وياهم بي وانحرج منهم بس ابوي يشوفني صاحبه مو ابنه لذلك يحجي وياي بحرية
اترخصت منة وصعدت فوك لغرفتي وانا اتوعد لهيام
دخلت لكيت الاضوية مطفية ومبقية بس ضوة الضعيف
شميت العطر وانسطرت اي هذا عطرها المفضل
هسة شي اكيد راشة بكل مسامة بجسمها من هذا العطر
ادور عليها بعيوني ماكو حسيت بأيدين التفت على خصري وراسها سندته على ظهري وهمست
ضرغام حبيبي محتاجتك
رجف جسمي جوة ايدها وضاعت علومي وعقلي عزل
وسد الباب وخلة الكلب هو الامر الناهي
واذا صار الكلب هو اليقرر اذن انا رحت بيها وصعت بين ايديها
التفتت بين ايديها وحجيت
.. شمحتاجة من ضرغامج وهو واكع بلاحول ولاقوة بين ايديج
.. تعبانة ومحتاجة حضنك عفية لاتبخل علية بي
ابتسمت .. ما عاش الي يحرمج من حضني حتى لوجان
ضرغامج بنفسه
حجيت وياه بدلع.. لعد شلون من ساعة جنت تحجي علية وتعيط بوجهي
.. ماعليج مني مساعة هذا مو انا الي جنت احجي
هذاك مجرم الحرب هو الي جان يحجي وياج
شفتها ضحكت على كلامي واقتربت مني وصارت
تتدلع بحضني مثل البزونة غاضتني بحركاتها
وشعلت اعصابي شعل
.. ولج دتعاي لعبتي بأعصابي
اباوع عليه شلون دايخ
همس يم اذني .. بالله شو امشي كدامي خليني اشوف
البدلة شلون تتمايل على جسمج
مشيت كدامه بدلع واتمايل كدام عيونه الي اكلتني بالنظرات بعدها ما لحكت اوصل للسرير
حسيت بي هجم علية مثل المحتل اخذ شفايفي بدون
استأذان
ونكلبت الادوار وصرت اني الاسيرة بين ايديه
يا الله شكد مشتاقة لحضنه ولهمساته وهو هالمرة كان كريم وياي وماقصر بحضنه علي
.......................................
يوم ثاني بوم من الطهور
ريام
واكفة يم خالة حليمة بالمطبخ اساعدها
وحنا نسولف ونحجي عالبارحة والطهور وعلاوي
ماظلت سالفة ما حجيناها الحلو بالموضوع اكتشفت انو انا وخالة حليمة نشترك بخصلة وحدة متشابهات بيها
اني وياها حشريات ونحب نعرف كلشي ونتبادل الاخبار عن الاقارب بدون ما ننتبه على نفسنا
وهذا الشي الي مقوي علاقتي بيها حتى مرات احس بروحي اقرب عليها من ميس ومها
مرات خطية حتى تأمني اسرارها وتشتكيلي على خالو راضي شيسوي بيها ومن كلامها اتخذت قرار بيني وبين نفسي انفذه وياها خلال الايام الجاية بس خلي اخلص امتحانات جنا نحجي وعبرت من يمنا خالة رحاب وكفنا انا وخالة حليمة مصدومات من الي جاي نشوفه كدامنا جانت خالة رحاب لابسة ثوب لونه وردي مطفي ومنزلة شعرها جانت كلة تسويه كباية
اليوم طالعة غير شكل
اتبادلنا النظرات انا وخالة حليمة وضحكنا
ما انتبهت علينا اخذت صينية الجاي وطلعت
بس جانت خدودها حمر الظاهر جاي تعاني من التغيير الي طراء عليها وبنفس الوقت مستحية من عدنا
ريام.. اكول خالة شفتي الي انا شفته
حليمة تضحك.. اي ولج شكل خطتنا ماشية صحيح
ريام.. اي خالة انا من البارحة انتبهت عليهم شلون انشغلو بالحجي بيناتهم
حليمة.. ولج اي ما سمعتي اخوي مازن شلون انطلق وياها ونسى نفسه ههه وصار يذكرها بأيام زمان من جانت تفتر وراه وتكله انت زوجي وهو يكللها هاي زوجتي ويجرها من ضفايرها
ريام.. اي خالة وهو ما قصر شلون كعد يتغزل بيها ويكللها ماشاء الله عليج جنج زولية كاشان شما تكبرين
ما يبين عليج العمر عبالك العمر وياج يمشي بالمكلوب
حليمة.. ههههه اي ولج سمعته يكللها بعدج ريانة
وبعز شبابج والي يشوفج يكول عليج بنت العشرين
وخطية رحاب صارت طماطة من الخجل
بس احسن خليهم يحتاجون من يجمعهم سوية حتى يتعرفون على بعضهم
دخلت ميس.. يماااااا جدتي تكول خلي امج تسولينا
كهوة
.. هسة اسوي
بس اكلج ابوج واخوانج وين
ميس.. بالهول يم جدتي
بس ضرغام طالع مو بالبيت
حليمة.. شنو جاي يحجون
ميس.. ما اعرف بس جاي يحجون عن عاشو والطبخ بعشرة عاشور
حليمة.. اي صدك ما ظل شي على محرم
اندك الجرس وشوية سمعنا صياح خالو راضي
وبعدها سمعنا صوت ضرغام
انتبهت لخالة حليمة شمرت منشفة الصحون من ايدها وراحت للهول تشوف شنو صاير
رحت وراها شفت خالو راضي وصرغام واحد واكف بوجه الثاني
راضي.. ضرغام مو عبالك انت كبرت وتكعد تتجاوز حدودك وياي ترة انا ابوك واكسر راسك فاهم
ضرغام .. النعم منك يا ابو ضرغام كلشي مقبول منك
بس اهم شي سويت الي يمليه علية ضميري
ما حسينا الا على خالو راضي ضرب ضرغام راشدي كدام الكل سمعت شهكة خالة حليمة وهيام
اول مرة يصير هيج شي ضرغام وخالو راضي
يتعاركون
ضرغام بغضب .. ماشي يابوضرغام ما دام هيج صار الحجي انا من تالي عمري انهان خلاص راح اطلع من البيت وتحلم تشوف وجهي

انتبهت عليه اخذ سويج السيارة وطلع من البيت
والولد ضرار وضاري ركضو روة ضرغام

يتبع