رواية تائهة بين اروقة الماضي الفصل الخامس 5 - بقلم الكاتبة نهى

تائهة بين اروقة الماضي
بقلمي nuha-d-h

🌷🌷مساء الانوار والسرور والمحبة عليكم يا اجمل قراء
🌷🌷
انتبهت على بلال اقترب من عدنا هو ومثنى
مثني: هيام عندي موضوع خاص اريد احجي وياج
احرجني بطلبه : باوعت للجين وريتا
لجين بتشجيع: روحي شوفي شنو يريد من عندج
لتسويها قضية قابل راح ياكلج
ريتا: اني من رأي لجين ترة مابيها شي لو سمعتي شنو يريد منج
رحت لعند مثني واخذني للنادي وكعدنا على صفحة
مثني: ما مصدك نفسي كدرت الفت انتباهج وتوافقين تحجين وياي على انفراد
هيام: استحيت اردك كدام البنات
كول اتفضل شنو جنت تريد تحجي
مثني: ما اعرف منين ابدي وياج
بس راح ادخل بالموضوع مباشرتاً بدون لف ودوران
يا بنت الناس اني اريد اتقدملج
رفع ايدة بأشارة حتى اسكت
: لا ترديلي جوابج هسة
اريدج تاخذين كل وقتج وانطيني الرد بعد اسبوع
سكتت ما ردت افشله
: ولو اني متأكدة هو جوابي نفسه ما راح يتغير بس ميخالف انتظر
: عالعموم هسة خليني احتفل وياج بمناسبة قبولج تكعدين وياي
راح اطلب عصاير
كمت من مكاني بارتباك ما اريد اطول احس بيها هاي خيانة بحق نبراس : لا ما يحتاج اني رايحة لان المحاضرة بدت هسة
كمت وتركتة واكف يباوع علية والتهيت اني والبنات
من محاضرة لمحاضرة وبعدين بنهاية الدوام
اجى نبراس وركبنا وهالمرة ركبت ورة يم لجين
التفت علينا
وباوعلي: شنو عيني ليش كعدتي ورة السايق مال بابا
حتى حضرتج تكعدين ورة
جرحني بهاي كلمته وحسسني بأن اني مو من مستوى لجين
لجين: نبراس كلامك هذا جرحني الي
ترة اني ابد ما اعتبرك السايق مالت بابا بالعكس انت
مكانتك تختلف وزميلي قبل لا تصير سايق بابا
نبراس : لا والله ما جان قصدي اعتذر بس اني مقهور من الست الي كاعدة بصفج اتعينت حتى ما كلفت نفسها
تتصل علية وتبارك لي
هيام : اي غير بالاول يكون عندي علم بتعينك حتى اباركلك
اشو اني اخر من يعلم
لجين: اي صحيح اليوم عرفت عن طريقي محد منطيها خبر قابل تشم ايدها
هيام : صحيح اني عرفت من لجين اليوم

نبراس: عفية هيام رحمة على والديج سكتي
انتي اكبر فاهية ومطفية انتي لو بس مكلفة نفسج وسائلة على اخباري جان عرفتي بخبر الوظيفة عالعموم
اني اتعودت على اهمالج وبرودج وياي مو بس بهذا الموضوع بكلشي انتي مالج اي دور بحياتي مجرد متفرج من احتاجج ما اشوفج يمي

سكتت وما نطقت اي كلمة
حيل انقهرت من كلامه
: اشكرك نبراس كل هاي العيوب بية وانت متحملني وصابر علية لحد الان ترة انت مامجبور علية
لجين: كولو يالله شكو شبيكم شجاكم
وانت نبراس كافي هواي دست زايد على هيومة
سكتنا ومحد حجة ورة فترة
التفتت علية لجين
:اي صدك اتذكرت ماكلتي شنو راد منج مثني من رحتو كعدتو بالنادي
التفت نبراس علية وعيونة تريد تطلع من مكانها
: شنو شنو عيدي شكلتي
هيام جاوبت لجين : اتقدملي يريد يطلب ايدي
وكلي لا تردين جوابج هسة انتظرج اسبوع
لجين : وانتي شنو جاوبتي
نبراس: اكيد ترفض بدون نقاش وانا من باجر راح احط حد لهذا المطي واشوف شلون يتجرأ يتمادة على شي مو
الة
هيام: نبراس هذا شي خاص بية ومالك حق تتدخل
مثل ما انت عندك خصوصيات بحياتك وما تكول عنها اني هم
وصلنا لبيتنا ونزلت وتركتة
وسمعتة يصيح علية ويطلب مني اتوقف تركتة وما اهتميت ودخلت للبيت
وشفت امي واكفة بالمطبخ جاي تطبخ
: هلو ماما هاي ليش واكفة تطبخين احنا مو كلنا اني اطبخ من ارجع
: هلو بيج لا حبيبتي اني الحمد لله غدة شري
وصحتي صارت زينة شوية من اتحرك واشتغل
احس بالنشاط خلوني براحتي
اقتربت منها وحضنتها وبستها من خدها وهي جان وجهة عالطباخ
دخلت ريام : تردين الصدك ماما هواي اشتاقينا لطبخج ونفسج بالاكل
ترة هيام موتتنا من المعكرونة والمخلمة
التفتت عليها: ايا جذابة
ام هيام : لج ريام لا تعيبين على طبخ اختج اصلاً بالعكس صارت اشطر مني بالاكل
وابوج يشهد عليها
: اي منو يحمد العروسة
رحت اركض وراها: لج اني الج اوكفي اذا ما
علمتج منو العروسة الا اتوبج
فعلا من استملت الطبخ من امي صرت
فنانة بهذا المجال واحتمال صرت سمينة من ورة الطبخ
وفيكاته
رحت دخلت لغرفتي واني افكر بكلام نبراس
يعني والله حيرني لا انطيك ولا اخلي رحمة الله تنزل عليك
(((((((())))))))

بعد موقف المشاحنة الي صار بيني وبين نبراس
بعدها بطلت اتصل عليه او اراسله
احسن لازم اسوي هيج وياه كعقاب هذا هواي مستسهلني شافني كلما يتجاوز وياي بالحجي
اني انسى الزعل بحجاية منة وارجعلة بكل سهولة

وصلتني رسالة من نبراس
: اليوم تجين لبيت اهلي انتظرج اذا ماتجين والله اجي لبيتكم
رديت: شنو شبيك نبراس صار لعقلك شي
وماما منا شنو اكللها اذا سألتني شتسوين رايحة لبيت عمج هناك والبنات محد موجودة
رد علية: والله اني ما علية هاي مشكلتج ماكو اجيج لبيت اهلج واحطج بموقف كبال امج
ارتبكت من تهديدة وانقهرت بنفس اللحظة
اتصلت عليه
وحجيت بغضب: هاي شنو نبراس لغة جديدة مالت التهديد ما اتوقعتك هشكل تسوي
شوف ترة اسلوبك جداً مستفز وما راح اجي لبيتكم
لو مدري شتسوي
ما انطيتة مجال يحجي سديت الخط بوجهة
وطلعت من الغرفة ورحت كعدت يم امي
لحظات واتصل
وانطيتة رفض خلي حتى مرة ثانية يتوب يحجي وياي هشكل وبهذا الاسلوب المستفز
امي جانت كاعدة كبالي
جانت تقرة بكتاب طبخ منال العالم رفعت راسها ونزلت نضارة القراءة على خشمها وتباوعلي من تحت
سويت نفسي ممنتبهة عليها
اتصل مرة ثانية وانطيت رفض
ام هيام: متردين ليش كل ساعة ترفضين
: هاي لجين وما لي خلك احجي وياهة
ام هيام: هاي من شوكت صايرة مالج خلك تحجين وية لجين الله يرحم الاتصالات بالساعة والساعتين بس تدكن سوالف هسة صارت ما بيج حيل
: اي ماما عوفيني اني ناصبة عليها
سويت بيها مقلب
ام هيام بشك : اهااا كلتي مقلب بنات اخر وكت ماعندكم شغل وعمل فاضيات
خرب بالحظ امي ابد ما يفوتها شي
سويت النقال بوضع صامت
وكمت من مكاني شلون بهذا نبراس معند
وطابكة عندة الخبالات
شوية سمعت صوت نقال امي
دك وردت عليه
: الو هلو خالة نبراس شلونك امك شلونها
: يا!!! سلامتها ما تشوف شر
سمعت اسم نبراس گلبي كمز من مكانه معقولةهذا اتصل على امي حتى يجيني هذا يمكن مخبل
ام هيام: يالله لعد راح اخلي ريام تحضر نفسها
حتى تجي تاخذها لعند امك
اباوع لماما عكدت حواجبها
: اهاااا تريد هيام يالله ماكو فرق راح اكللها حتى تجهز نفسها يالله مع السلامة وسلمنا على امك يمهة العافية ما تشوف شر
جنت استمع لكل حرف بس اسوي نفسي ملتهية اقرة
بالملزمة
سدت النقال وباوعت علية بنظرات كلها تخمين
ام هيام : كومي خاتون حضري نفسج
نبراس جاي عليج ياخذج لبيتهم امة اتخربطت والبنات كلهم طالعين وية ابوه ويريد ياخذها للمستشفى
و
جانت تحجي وتكلب بعيونها وكملت كلامها
والا ست هيام تروح وياهم

عرفت بي دبرلة حجة
هيام: يا خطية خالة عتاب ما تستاهل
يالله راح اجهز نفسي عالسريع
التفتت ردت اطلع من يمها واروح لغرفتي
ام هيام : لحظة هيام قبل لا تطلعين
لا عبالج عبر علية الفلم
مو تشوفيني سكتت وعبرت الموضوع هذا كلة لان هو ابن عمج وادري بي ما راح يأذيج
باوعلتها واتصنعت الغباء: شنو قصدج ماما على شنو دتلمحين ترة هاي ثاني مرة تذبين كلام
: لاتسوين روحج غبية ترة اني امج وانتي عجينتي واعرفج زين
ترة عيونج تحجي قبل لا ينطق السانج
بس حابة اكلج شي لاترخصين من نفسج
وخليج غالية وعزيزة نفس
وانتي جبيرة وتربية ايدي واعرفج كلش زين ما راح تخيبين املي بيج
سمعنا صوت جرس الباب وطلعت من يمها كالعادة اتهرب استحيت من كلام امي
وحسيت بالذنب لان ضامة عليها حبنا اني ونبراس
بدلت وطلعت لنبراس اتفاجئت من شفتة راكب سيارة حديثة
فتحت الباب وركبت بصفه
التفت علية : وتاليها وياج يا هيام راح تموتيني
شغل السيارة وطلع وعدة على بيتهم وراح عالشارع العام
هيام باستغراب: وين ماخذني اوكف لحظة
انت مو كلت لبيت اهلك
باوعلي: هاي حجة دبرتها لامج حتى تقبل تطلعين وياي
هيام: زين ما لكيت غير هاي الحجة يعني ماخليت ببالك اذا امي سئلت امك عن صحتها
وامك تنكر سالفة مرضها ليش تخليني بهيج موقف ولا
والاقوى حضرتك واثق حتى ما اخذتني على بيتكم
شبيك نبراس اشو انت كلش متغير
التفت علية انطاني نظرة ورجع بياوع كدام يسوق
نبراس وهو ينفخ : هيام اني اتفقت وية الوالدة بالسالفة وهي تعرف
ضربت على وجهي : عزة بعينك نبراس شكد عيب هسة خالة عتاب تدري بموضوعنا والله استحيت
: ما بيها شي قريباً الكل يدري انتي حلالي
وراح تصيرين ملكي وام بيتي بعد شكو مسوية من الحبة كبة
: اوف منك عالعموم اكدر اعرف ليش حضرتك هيج معصب اليوم

نبراس: هيام اسألج سؤال انتي ليش ما رفضتي
مثنى من اتقدملج
هيام : اني راح ارفضة بدون ما انت تحجي وتكلي
بس استحيت منة وكال اسبوع فكري فعادي ترة هذا الاسبوع مراح يغير جوابي
نبراس: زين اكدر اعرف ليش بعدج تحجين وياه وبعدكم زملاء
هيام : يعني شنو نبراس تردني اطردة من الكلية
الولد يجي ويوكف يمنا اني والبنات ويكعد يسولف
عيب زحمة خطية

: اها يعني انتي خايفة على مشاعره
ومتخافين اذا اني عرفت بيج بعدج على تواصل وية مثنى
هيام ترة اشوفها صعبة تبقين مستمرة بعلاقتج مع شخص رادج للزواج ترة هاي واكفة
بعد مينفع ينظرلج كصديقة او اخت بعدما كان يتخيلج زوجته هيام اني رجال واعرف بالشباب بشنو يفكرون
هيام: ما اعرف ليش مكبر الموضوع ترة السالفة متستاهل
نبراس: مو شفتج مصممة على التواصل وياه وما يعدي يوم اذا ما يحجي وياج
عكدت حاجبي باستغراب
:اوكف لحظة هذا منو الي جاي ينقلك حركاتي
وشنو جاي اسوي بالكلية
: شخص ما تعرفينة هو الي خبرني
: يعني شنو حضرتك حاط علية جواسيس نبراس صدك صدمتي
نبراس: لا مو لهلدرجة عاد سويتيها جواسيس وفلم اكشن بس كلما بالموضوع لجين حجت بحديث عابر
وانذكر مثني

غمضت عيني
اوف منها يا لجين السانها. الفلات مو بيدها
اني الهة بسيطة بس اشوفها الا امسح بيها الكاع
هيام: حتى لو كان المفروض انت تنتظر تستفسر مني
واني شي اكيد راح اكلك مو تسوي الموقف البايخ الي سويتة قبل شوية مال مرض امك
والله بعد من وراك ما اراوي وجهي لخالةً
نبراس يضحك : يابة شدعو لعد اذا اتزوجنا وصرتي
ملكي
ونصة صوته وهمس
وانام بحضنج واخذ منج بوسة وعضة وشمة ووو
هيام : عزة لا لا عفية كافي نبراس لاتحجي هشكل ترة انزل من السيارة
نبراس: شلون بيج راح تكضيها علية يابسة ماكو مقبلات شوية تصبيرة منا منا ترة انا مو ملاك
نزيه هم اريدج
هيام استغربت من كلامه المفروض نبراس يكون حريص علية ويرفض ان ياخذ مني هاي الاشياء بالحرام يعني اليحب يخاف على محبوبه وعلى سمعته
و قبل كلشي يحرص عليه
هيام: تكدر تسوي هذولي كلهم بس بشرط
نبراس: شنو كولي الله وايدج ترة طفح بيا الكيل وما عاد بية صبر
هيام: اخطبني من اهلي واعقد علية عالاقل نسكت السان الناس الي احس بدو يوم عن يوم يفطنون علينا
نبراس: يا ستار شكو يا ناس هذولي الي حجون عليج
وشلون عرفو بينا

هيام : طبعاً يعرفون لان انت الله يخفظك
ما تداري تصرفاتك يعني ابسط شي هسة اني طلعتي وياك بهيج وقت بالليل بصفتي شنو افرض هسة
شافوني من طلعت وياك شراح يستنتجون
نبراس: ما يهمني كلام الناس واكص السانه الي يمس سمعتج بكلمة
هيام : زين انت بدال ما تكعد تكص السان الناس خو حطلهم حد واخطبني وكان الله يحب المحسنين
نبراس: بعدني ما مجهز نفسي وما مستعد هسة
اريد كون اكمل اموري واسيطر على وضعي وساعتها اوعدج اسويلج احلى واكبر عرس الا اخلي الناس نفسها الي جانت تحجي عليج يكولون هنيالها على هيج قسمة
هيام :اوف منك يا نبراس خلصتها علية كلة وعود واني انتظر
وانت لانطيك ولا اخلي رحمة الله تنزل عليك
نبراس : هانت مبقى شي عندي مشروع قدمتة على سيادة الوزير ومحتاجلة بس دفعة الله يا هيام اذا ينجح تنفيذ هذا المشروع
وسوى حركة طيران بيدة
: حالي يصير تمام واطك واصير فوك بالعالي وانقلكم وياي
هيام: تصدك اني هذا كلة مو ببالي وكل احلامي تدور حولك
اسألني على نجاحي
راح اكلك فرحت نجاحي وياك
اسألني شنو اجمل شي بحياتج
اجاوبك واكلك انت اجمل شي بحياتي
نبراس وهو دايخ وذايب بكلامها ويباوع لشفايفها
وعض شفتة: ااااااخ يابة تعال الحك على ابنك ضاع وداخ بشفايف نبت اخوك
ادري شلون بيج ما تحنين علية وتنطيني عضة
اي مو راح اموت
كاعدة تتموعين وتحجين بكلمات تثيريني وتكولين ممنوع اللمس
ابتسمت على كلامه المجنون
: كلة بيدك انت عاجبك ينشلع كلبك كتلك اخطبني تكول بعدني ما مستعد
عض شفتة : اااخ منج ما ظل عندي صبر وداعتج
بس اقدم المشروع وينقبل اني كبل بوجهي اروح لعمي
اطلبج من عندة حتى بدون ما انتظر اخذ الوالد وياي
لان حيل مستعجل
هيام بفرحة : ياااااارب وفق نبراس ابن عتاب ونجح مشروعه حتى نتزوج
نبراس بسعادة : اللهم امين
(((((((())))))))))

بالكلية
وصلنا للكلية وقررت اليوم احجي وية مثنى وابلغه بقراري
هيام : مثني اني اسفة انت شاب محترم وخلوق والف وحدة تتمنى تصير من نصيبها بس اني محجوزة لابن عمي نبراس
مثنى: يعني نبراس يصير خطيبج
: لا هو مو خطيبي بعدنا بس اكمل هاي السنة متفقين يتقدملي
: يالله مبروك وشايفة الف خير واني لو مكان نبراس
ما اتأخر ولا ثانية وحدة لحتى احط الخاتم بيدج واخلي الكل يعرف انتي ملكي
اتمنى نبقى زملاء وهذا الموضوع ما يأثر على
صداقتنا
: اشكر تفهمك الي وانت صديق واخ عزيز ويارب
يرزقك ببنت الحلال
((((((((()))))))))((

صحيت على ايد تنده بية فتحت عيوني
ريام : هيومة كعدي ترة وصلنا لمحطة تعبئة الوقد والسايق كال هنا اكو حمامات ومصلى للي يريد يصلي
كعدت وباوعت من الجامة شفت السيارة واكفة والعبرية نصهم نازلين ونصهم مطلعين اكل وياكلون
عدلت عباتي ونزلت اني وريام
وتوجهنا للحمامات وقضينا حاجتنا واتوضينا
وبعدها رحت للكشك اشتريت كيك وعصاير
ورحنا صلينا صلاة الظهر قصر
وخلصنا وطلعنا اني وريام وكبل رحنا لمكان الكيا وصعدنا بالسيارة
واول ما كعدنا بداخل السيارة ريام اخذت مني علاكة الكيك والعصاير وصارت تاكل وانطتني كيكة وعلبة عصير
ريام: هاج لزمي اكليلج شوية
هيام: اني ما اريد اكلي انتي
ريام: هيام صحتج معاجبتتي
هيام: لا تخافين علية بس كل ما بالموضوع لعبانة نفسي من السفر وما اشتهي اكل
يمكن بس اكل اتقيء
رجعت راسي وسندتة للخلف وغمضت عيوني اخذلي غفوة كلش دايخة ما اعرف هذا يمكن اثر دوار السفر

(((((((())))))))))

خلصنا الامتحانات للمرحلة الثالثة بالكلية وباخر يوم
هيام
جنت كلش مغثوثة وجسمي كلة يرجف
: ريتا احترمي نفسج وما اسمحلج تتجاوزين حدودج لا تشوفيني سكتتلج ذيج المرة لكن هالمرة ما راح اعديها فاهمة
ريتا : مو بكيفج ما راح اسكت واجب الصداقة وياج يحتم علية ويجبرني انبهج على افعال لجين انتبهي ولا تصيرين غبية ترة الماي جاي يمشي من جواج
هيام عطت بيها : لا انتي كلش زودتيها ريتا
اذا ما بطلتي هذا الكلام ثقي بذات الله راح تخسرين صداقتنا
ريتا : اسفة هيام ما اكدر اجاملج واوكف متفرجة واجاملج واشوف الخيانة كبال عيني واسكت مستحيل اسمح بحدوث هيج شي
هيام : لا انتي الظاهر الكلام وياج ضايع وانتي انسانة مريضة
اباوعلها غمضت عيونها مثل الي اتعرضت لطعنة بسبب كلامي وياهة تستاهل
ريتا: اشكرج هيام على ضنج بية ما كنت متخيلة ان راح يكون هذا ردج علية بالتهجم وابصياح اتوقعت اني صديقتج
هيام: كلشي اتوقعي انتي انسانة صايعة وتافهة وتشوفين الناس كلها مثلج خداع بخداع
ريتا: تدرين اني هسة على شنو مقهورة
مقهورة على الثلاث شنوات كضيتها بصداقة وحدة مغفلة وناكرة مثلج بس اشكرج لان بسرعة طلعتي وجهج الحقيقي وياي
هيام : اني الي اشكرج لان بينتي معدنح المصدي
ريتا: تدرين شنو انتي فعلاً تستاهلين كل الي راح يصير وياج ومنا ورايح انسي شي صديقة اسمها ريتا
هيام : يكون احسن ما يشرفني اصادق وحدة مثلج
خاينة ومنافقة
لا وبعد فوكاها زعلانة
اني الي اكلج مسحي رقمي من نقالج وانسي صديقة اسمها هيام
اجتي لجين تركض بتجاهنا
: شكو بنات شصاير صوتكم واصل لحد غرفة العمادة
نصو صوتكم عيب انتو صديقات
هيام : ماكو شي اسمة صديقات والصداقة مهدورة بحق هيج انسانة
ريتا: اشكرج اني استاهل اسمع منج هيج رزالة انتي مال واحد يضربج راشدي يوعيج على حالج يا غبية
هيام: غبية ما غيرج لان متعرفين حق الصداقة
التفتت لجين لريتا: ريتا حٍٍِْــًبٌٍـــِٓېٍٓ كولي يالله ميصير هذا الكلام
وباوعتلي
شنو شصاير بينكم يا ستار شجاكم قبل شوية جنتو حبايب وتسولفون اشو فجاءة كبيتو مثل النار
اباوع. على ريتا رفعت تك حاجب وتباوع بستهزاء للجين وما جاوبتها احسها مغرورة والناس عندها كلهم حشرات وحقراء
صدك استفزني اسلوبها : لجين الحجي ضايع وية هيج
بشر عوفيها
اخذت لجين وسحبتها من ايدها وراي ومشيت وتركت ريتا واكفة بنص حديقة الكلية
بس قبل لا ابتعد سمعتها كالت
: انصحج لا تمسحين رقمي من نقالج اخاف يجيج يوم تحتاجيني بي وبوقتها احاول افكر ارد عليج لو اخليج تنكوين بنارج لوحدج ياحقيرة
: لو اعرف اموت واخر يوم بحياتي ما اتصل عليج
يا نذلة
كانت لجين تمشي وراي وتحجي
: شكو شصاير محد بيكم ترضى تكلي شنو السالفة
احس بروحي طرطور بينكم
: ماعليج بيها هاي وحدة تافهة والله حسافة بيها سنين الصداقة
اباوع على لجين خطية كل ساعة تلتتفت وتباوع على مكان الواكفة بي ريتا
: لج خطية ليش هشكل جرحتيها بالكلام لج باوعي كامت تبجي
: خليها تستاهل تدري بية اتخبل من النفاق والطعن
وهذولي كلهم بيها
ولا تسأليني شكو شنو صاير سدي الموضوع
: لج ما اتعودت عليج هيج قاسية لج هاي انت الحنونة الطيبة خطية ريتا تدرين بيها حتى ما عندها صديقات بس احنا شلون هانت عليج
: عفية لجين كافي ما تستاهل تدافعين عنها هاي شيطانة
وسواس خناس
وهسة عرفت ليش ما عندها صديقات
لان محد يتحملها من افعلها الناس تتركها
وراح تبقى طول عمرها لوحدها
: اوف منج شكد راسج يابس هسة مابيج مجال
هيام : اني مو كلت الموضوع ينسد
عفية ترة والله ما ناقصة الي بية مكفيني
لجين : هَـا هسة نوب شكو بعد غير مشكلتج وية ريتا
:راح اموت من القهر من وراه
لجين: منو
: اكو غيره نبراس
: اهووووو نبراس شبي وياج
: لج نبراس جاي يبتعد عن حياتي
: شلون عرفتي الجائز مشغول
: اي حقة مشغول الاخ كاضيها كلة سفر وايفادات
وهسة هو منتظر تطلع موافقة الوزارة على المشروع الي قدمه قبل سنة وهسة هاي الايام منتظر اذا طلعت الموافقة راح يوقعون الكتاب ويتعاقدون ويسافر لايطاليا ايفاد حتى يرسم المخطط ويخلون سياق
ويبدون ينفذون ويصير هو المسؤل عن هذا المشروع
لجين : يعني وين القهر بالموضوع بالعكس المفروض تفرحين لان نبراس جاي يشق طريق النجاح
هيام : شلون افرح واني جاي اشوف بعيني شلون نجاحه جاي ياخذة مني ويشغلة عني
يعني من كان ماعندة كنت اني كل حياتة
هسة من اصبح ناجح صرت اني على هامش دنياه
وصاير لا ابالي
: لا حٍٍِْــًبٌٍـــِٓېٍٓ يتخيلج بس انتي بيج طبع
مو حلو نكدية ودائماً تبجين بوجه الله
والرجال ميحب المرة الي كل ساعة تطلع بسالفة
وتنك وتتسأل
هيام: لا يا نكدية لج تصرفاتة واضحة اني مو غبية
احس بي صاير يستعر مني عبالك اني مو كد المستوى
: لا والله اخاف ما يرضى خلي يطير عاد لهنا وكافي الا كرامتج من يروح فدة الج هو يطول هيج وحدة تحبة
هيام : لج لجونة راح اتخبل نبراس تصرفاته حيرتني
لانطيك ولا اخلي رحمة الله تنزل عليك
يعني اتخيلي لحد الان هو يتدخل بحياتي ولحد ذاك اليوم من سمع اجوني بيت عمتي سولاف من الموصل خطبوني من بابا حرك النقال حرك علية بالاتصالات
لجين باستغراب : هاااا!!!!!
: شفتي شلون انصدمتي يا اختي مخليني معلكة والعمر جاي يمشي وهو حضرتة بعدة ما مفكر يجي يخطبني الا المشروع يتنفذ
يعني فرضا المشروع مصار اني شنو واح يكون مصيري هم راح ابقى انتظر كذا سنة والخطابة يجون وارفضهم كلة بسببه
لجين:لا عيني انتظار شنو حٍٍِْــًبٌٍـــِٓېٍٓ وحدتنا بخيتة الي تحصل الهة رجل (زوج)
اشو جاي ينقرضون
: والله حتى كمت استحي من كد ما لحيت بسالفة الزواج وكل مرة اكول بعد راح ابتعد عن حياته واكطع علاقتي وياه واذا يريدني يجي يتقدملي مثل الخلك والعالم من بابا
وبعدها هو حر من اصير حلاله
بس من الله تجمعنا المواقف وينطيني كم حجاية واني بسرعة انسى الاول والتالي والوعود الي اقسمت بيها
ما ارجع له الا والحلقة بيدي
لكن بكلمة ارجع كما كنت الى نقطة الصفر عذبني وياه
لجين: انتي صوجج علمتي انتي متوفرة ودائما يصدج وشوكت ما يريدج يلكاج متوفرة بعد على شنو مكلف حاله ويستعجل بالخطوبة

: رجعت لبيتنا بسيارة السايق مال لجين
لان نبراس هاي الايام مشغول مرات هو ياخذنا اذا فارغ واذا مايكدر ياخذنا السايق بداله للكلية
(((((((((((())؛)))))))))

دخلت للبيت تعبانة
ومتحلفة انام نومة اخت الميت من ورة الامتحانات
طكت روحي خلصنا وفكة
دخلت لبيتنا وانتبهت على عمو احمد اليوم عدنا
ام هيام: يالله همزين وصلتي روحي بدلي ملابسج وتعاي ساعديني عمج ابو نبراس اليوم غداه عدنا
: صدك شعجب مو من عوايده
ام هيام: ما اعرف بس الظاهر عندة موضوع وية ابوج وصارلهم ساعة بالاستقبال لوحدهم يحجون
هيام: ماكلج بابا شنو الموضوع
ام هيام : هو ابوج يحجي شي بعدين من يطلع عمج اسأله
دخلت علينا ريام وجهة اصفر مخطوف لونه
: هَـا خير شكلج وحدة مسوية جريمة
ريام : هاا لا ماكو شي بس اجيت اكل لماما بابا يكول صبي غدة
عافتنا وطلعت رحت وراها ودخلت لغرفتنا المشتركة اني وياهة حتى اغير ملابسي
دخلت وشفتها كاعدة تبدل ومغنتبة

هيام: اوكفي وين شاردة تعاي احجي شبيج
ريام: اريد اروح اساعد ماما لاتحجي علينا
وراحت وعافتني
اختي اعرفها كلش زين اكو شي صاير وما تقبل تحجي
ابتسمت
ما راح تكدر تصبر متحجيلي متعودة كلشي يصير تجي تحجي الي متكدر تضم عني شي
بدلت ورحت للمطبخ وشفت امي كاعدة تصب وبابا وعمو كاعدين على ميز الطعام
دخلت وسلمت على عمو احمد وبستة من خده وباسمي من راسي
: هلة بهيومة لج شنو صايرة عروسة
دنكت بخجل: اشكرك عمو
: الله شوكت اشوفج عروسة وازفج بيدي لزوجج
حجيت بكلبي اووف عمو غير ابنك شوية يستعجل
بس شكلة مثل الجمل اذا برك تعال منو الي يكدر يقنعة ينهض ويكوم من مكانه
بالليل وبعد ما طلع عمو واخذ بابا وياه
من رجع جنت كاعدة يم ماما بالهول
اباوع للمسلسل
ام هيام : شنو السالفة يا رجال ما شفناك اليوم كضيتها كلة وية اخوك شنو الموضوع ان شاء الله خير
ابو هيام: اي ان شاء الله خير والله يامحفوظة السلامة اليوم ابو نبراس اجاني يريد يخطب لابنه نبراس
ويفرح بي وباوع علية وعلى ريام وابتسم

يمة اني سمعت بخطوبة نبراس
واني كلبي كلب دقلة كمت من يمهم خجلانة ورحت ركض لغرفتي

يتبع