رواية تائهة بين اروقة الماضي الفصل السادس 6 - بقلم الكاتبة نهى

تائهة بين اورقة الماضي
للكاتبة nuha-d-h

🌷🌷مساء الخير والصحة العافية عليكم يا قرائي الاعزاء 🌷🌷

جنت احس بروحي مثل الي داخلة بدوامة بوسط بحر
وكاعدة تسحبني عميق نحو ظلام البحر
جنت افتح عيوني بس ما اعرف ليش احس اكو ثكل على جفوني ليش شنو ديصير بية
حسيت على ايد دافية لزمت راسي وسمعت صوت امي
يهمس يم راسي بأيات قرأنية وهي تبجي
شكو ليش امي تبجي
شوية ركزت وعقجت وجهي من شميت ريحة ديتول
نفاثة لعبت نفسي منها
ليش هو اني وين اصلا
بديت احاول اجبر نفسي افتح عيوني
بس كان ضوة الغرفة كلش قوي على عيوني كمت كل ساعة ارمش وهمست بصوت تعبان اريد احجي بس احس بحنجرتي متجرحة
حركت ايدي سمعت صوت امي تبجي
ام هيام: يا يمة فدوة رحتلك ربي
هيام كعدت الف الحمدلله ابو هيام شوف هيام بدت تسترد الوعي

ليش هو شكو شصاير اني شبية حتى امي هيج خايفة علية
انتبهت على بابا مسح دمعة خاينة نزلت من عينة
ابو هيام: لج هيومة بابا الف الحمدلله على سلامتج
والله وكعتي كلبنا ودخلتينا بالانذار
شنو سالفتج
ام هيام : اركان مو وكتة هذا الحجي لتتعبها بالكلام اتركها براحتها
هيام بصوت تعبان: اني شلون وصلت هنا
ابو هيام: اهووو بابا هاي سالفة طويلة بس ملخص الموضوع خربتي مهر الولد وصارت كلها تركض
عبالك عندهم سباق بالمارثون اني وعمج ونبراس
خطية الولد ترك حفلة المهر واجة ويانة
بس انذكر اسم نبراس
حسيت عبالك اجتني ضربة مباشرة على راسي
حجيت بصوت تعبان ماما اريد ارتاح ودرت وجهي عنهم للجهة الثانية ونزلت دموعي وبدة شريط
الذكريات ينعاد براسي وكأنه فلم دينعرض كبال عيني

((((((((())))))))))
من سمعت من بابا ان عمو احمد حاجي وياه علمود خطوبة نبراس
اني من يمي استنتجت ان الخطوبة تخصني الي
وبابا جاي ياخذ رأي امي بالموضوع
واني استحيت وكمت من يمهم
دخلت للغرفة وكلبي يدك طبول
وبسرعة اتوجهت على نقالي واتصلت على نبراس
حتى اكعد شوية اتدلع عليه واعبرله عن مدى فرحتي ومفاجئتي وتلهفي للموضوع
اتصلت وجاوبني نبراس
نبراس بتعجب: الو هيام ؟؟؟؟!!
هيام بفرحة: لا خيالها يا بذات هيج تفاجئني بدون ما تكلي بس تدري هاي احلى مفاجئة بحياتي يالله هالمرة سماح راح اعديها
نبراس بأرتباك : شنو ما افتهمت قصدج
هيام : اخ منك ومن دلاختك يعني داز ابوك يحجي وية بابا بموضوعنا واني اخر من يعلم يا اخي عالاقل مهدلي للموضوع حتى الحك اجهز نفسي عالخطوبة
يعني هسة اكعد اركض حتى الحك اجهز روحي
ابتسمت
بس هَـا خلي ببالك ماكو حبيات ومقبلات الا من نعقد سيد مو عبالك تخطب وتاخذ راحتك وياي
نبراس: احم هيام بس لحظة خليني افهمج ترة انتي فاهمة الموضوع غلط
هيام ببتسامة خجولة: لا تكول راح تسوي المهر والخطوبة بيوم واحد والله اخنكك ما الحك عفيا نانو عفيااا
انتبهت عليه ما اتفاعل وياي مثل كل مرة من ادلعه
سمعتة جر حسرة وكأنه جاي يعاني
نبراس: شوفي هيام اني لازم اجي اشوفج واحجي وياج حتى افهمج
كان لازم اجي اني بنفسي وافاتحج بالموضوع قبل لا ينفتح الموضوع حتى لا يصير التباس وارتباك واحراج الي والج
عقدت حاجبي : نبراس هاي شنو من شوكت صاير
حساس وعاطفي يا اخي ترة الموضوع كلة ما يستاهل
كلنا ندري انت الي واني الك وهاي هي من هسة ابلغك
قبل لا بابا يبلغكم بموافقتي
اني هيام اركان اوافق بكامل قواي العقلية على نبراس احمد ان يكون زوجي وابو جهالي وصاحب بيتي والمسؤل عني والامر الناهي على قلب حضرتنا
ها شلوني
: ااااااخ لج هيام ولا تحجين هيج انتي جاي تصعبين علية الامور وتعقدين السالفة
وراح تخليني اعاني فوك ما اني جاي اعاني
: هههههه يا حبيبي ادري بيك مرتبك واعرف ان هاي الخطوة صعبة عليك ان تنتقل من حياة العزوبية الى الارتباط بس هَـا ولا يهمك اني هيومة صدكني ما راح اخليك تتندم على الزواج واخلي حياتك كلها عسل ودلع

بس فجاءة كمزت على صوت شي اتكسر وصار صياح قريب على نبراس
سمعت صوت عمة عتاب تعيط عليه
: يبوووو عزة بعينك نبراس لك هاي شسويت اتخبلت تكسر المرايا بيدك شبيك شجاك

نبراس: لج يوم عوفيني رحمة على والديج
عكدت حواجبي بخوف : الو الو نبراس تسمعني ظل بالي شكو ياستار
انقطع الاتصال ورجعت اتصلت عليهم بس محد رد
اكثر من عشر مرات
اجيت اتخبل اتمنيت ابدل ملابسي واروح لبيتهم اشوف شكو شصاير
بس شلون وامي شي اكيد ما راح توافق وراح تنطيني محاضرة شكدها وشكبرها
مثل : ثكلي شوية وعيب شيكولون عليج مامصدكة
وغيره من الكلمات المعروفة من نصائح امي
ظليت اروح وارجع بالغرفة دخلت علية ريام وعيونها حمر
نسيت سالفتي والتفتت عليها
هيام : تعاي انتي شنو سالفتج اليوم من الصبح تبجين لحد هسة شكو صاير شي واني ما ادري
صفنت بوجها شفتها متخلي عيونها بعيوني
ريام: هيج مابية شي لتخافين
هيام بتفكير: لج تعاي عوبة لايكون عندج حبيب من ورانا والله اشلع اذاناتج يالله احجي بسرعة شبيج ومنو وياج وليش تبجين هي وحدة من الثنين لو امي وياج لو اكو مشكلة عندج بالدوام
ريام: اهوو هيام شكد تلحين كتلج مابية شي
: شنو ما بيج شي وانتي كاضيتها بس تبجين
ولج بس لا صديقة من صديقاتج لاعبة عليج احجي ترة والله ازعل عليج اني هيومة اختج الجبيرة
رحت اتقدمت منها وكعدت بصفها عالسرير واخذتها لحضني ومسحت دموعها بس اشو هاي زادت بالبجي وحضنتني حيل : هيام ماكو شي عفية لا تضغطين علية
ما راح اكدر احجيلج
هيام : هذا هو براحتج بس خلي ببالج شوكت ما تحسين بروحج تردين تحجين اني موجودة واسمعج
وكمت من يمها
وطلعت ردت اعرف اخبار عن نبراس
اخذت نقالي وطلعت بالطارمة برة يم باب المطبخ
اتصل عليه بس هالمرة يطلع الجهاز مغلق او خارج منطقة التغطية
شنو ديصير ليش جهازة مغلق
اوف منك يا نبراس راح تموتني ناقصة عمر يعني حتى بيوم فرحتي لازم تكلبها علية وتضوجني مو بيدك
عبالك انت مخلوق مخصوص بس علمود تشلع كلبي
دخلت للمطبخ وصارت امي بوجهي
باوعتلي بنظرات كلها غضب وملامة
ام هيام: شعندج واكفة برة
: هَـا جنت اتصل على صديقتي لجين
ام هيام : يعني وتاليتها وياج
راح تظلين تضمين عن امج وتمثلين دور الغبية
لج ماما هيام اصحي اني ما مقهورة على شي بس مقهورة على تربيتي الي ضاعت
ما فاد بيكم النصايح والتوعية وكلامي وياكم
جان كلة عالفاضي
: شنو ماما شبيج نازلة علية رزايل وعتاب شكو شصاير
: يعني حضرتج متدرين شنو صاير
قررت احجي لامي يمكن هي زعلانة لان ما صارحتها بحبنا اني ونبراس ومن اجة يخطبني يمكن اتحسست لان هي اخر من يعلم
: شوفي ماما اني جداً اعتذر منج لان خليتج بهيج موقف
وحقج اي ام تحب تعرف كلشي عن بنتها
بس والله جنت استحي احجيلج عن حٍٍِْــًبٌٍـــِٓنا اني ونبراس
وبنفس الوقت خايفة اخاف ماتقبلين نشوف بعضنا
الا من نرتبط ماكدرت احجي لان جانت ضروف نبراس ووضعة المادي ما يسمحله
يجي يخطبني بس هسة بعد ما ربي رزقه اتقدملي
يعني كل الي اتمناه منج ما تزعلين من عدنا اني ونبراس وتباركين بخطوبتنا وزواجنا
وترضين عني
شفتها شلون ايدها كامت ترجف وسحبت كرسي ميز الطعام وكعدت عليه وجرت نفس عميق وكررت اكثر من مرة تاخذ شهيق وزفير وتغمض عيونها عبالك جاي تواجه صعوبة بطلب الصبر بس بالاخير صدمتني امي من انهارت وحطت ايدها على وجهة وكامت تبجي
معقولة لهالدرجة متحسسة من موضوع خطبتنا وهيج مأثر بيها
رحت لعندها وكعدت يم رجليها ولزمت ايدها ودنكت وبستها
: اسفة يوم والله اسفة ما جنت متوقعة راح تكون ردت فعلج بتجاه حبنا هيج راح تكون
رفعت راسها وباوعتلي
ام هيام: لج يمة هيومة حظج وين نايم بيامكان
ليش حظج مثل حظ امج من تحبين متعرفين شنو راح تكون عواقب هذا الحب
عقدت حاجبي بستغراب
: شنو ماما ما افتهمت قصدج
شهكت بقهر: ما اعرف منين ابدي وياج وشكلي ما عرفت احميجن من القهر ووجع الكلب ولا عرفت شلون اجنبكم الالم
: ماما ترة بديت اخاف ليش تحجين بالالغاز

: لج يمة هيام نبراس ماخطبج الج لج راح يخطب وحدة ثانية ولج مو انتي العروسة
جنت كاعدة مكرفصة بس من سمعت كلام امي حسيت عبالك هبت علية مثل العصفة القوية ورجعتني للخلف ووكعتني بالكاع انخطف لون وجهي وهمست
: شنوو !!!!!مستحيل ماكو هيج شي
يوم اخاف فاهمة الموضوع غلط هسة جنت احجي وية نبرااااا.......
وقطعت كلامي مكملت شهكت وحطيت ايدي على حلكي ورجع شريط اتصالي مع نبراس والكلام الي دار بيني وبينه
وردت فعله الغريبة وادركت بلحظتها اني اكبر مغفلة وغبية على وجه الارض
الكل جان يعرف ويردون يحذروني واني العمية الغبية العقلها قافل على قاعدة وحدة هي لنبراس ونبراس الهة
اجيت اموت من اتذكرت كلامي وياه اتمنيت الكاع تنشك وتبلعني واموت بساعتها من ورة الذل والاشمئزاز الي دا احسها بتجاه نفسي
يعني اني فعلا تافهة وهواي رخصت من نفسي في نفس الوقت الي كانت امي تلح علية اكون ما استعجل باختيار الشخص الغلط وودائما تكول ماما لاترخصون من نفسكم ترة النفس عزيزة لاتخسرون ماي وجهكم لاي شخص ترة محد يستاهل
كمت من يمها وتركت امي لوحدها بالمطبخ تبجي ورحت دخلت لغرفتي مصدومة من الخبر جان جسمي كلة يرجف
والدموع عاندت وياي وما ترضى تنزل اول ما دخلت صارت عيني بعين ريام وسألتها : ريام انتي هم جنتي تعرفين بموضوع خطوبة نبراس
شفتها كامت من سريرها : هَـا وصلج الخبر؟؟
: هعهههه طلعت كلها تدري الا انتي ياهيام اخر من يعلم الله ياخذني شنو من عقل وغباء شايلة
حجيت بصوت هامس
: ريام تكدرين تطلعين من الغرفة وتركيني لوحدي
ريام : بس لحظة اانتظري شراح تسوين
قاطعتها هيام: تكدرين تطلعين لو اطلع اني
ريام : لا لا هذا هو راح اطلع
بس الله عليج لاتنقهرين
كلمة قهر ما تعبر عن حالتي احس بيها شي تافه بالنسبة للي جاي احس بي نار جهنم تفور بصدري : ريام يعني شلون ما راح تطلعين خلاص راح اطلع اني
كمت واني ارجف اريد اطلع
ريام: يالله يالله هذا هو طالعة رجعي انتي
شفتها طلعت وسدت الباب وراها
اتجهت للباب وقفلتة واستندت عليه وخليت كصتي
عالباب احس صار عندي خدر على برود من اثر الصدمة
اريد اعصب اريد اكسر اريد اصرخ
المفروض هذولي كلهم اسويهم لوكنت انسان طبيعي
بس ما اعرف ليش احس اكو شي جاي يكتم على صدري حابس الالم جوة ومدا يخليه يطلع شنو جاي يصير بية معقولة هاي احد علامات الجنون يعني هشكل راح يكون احساس المجانين
دخلت بحالة سكون عجيبة وعلى اثره صرت اسمع صوت الصمت الغريب اجتناحني
معقولة هذا هو الهدوء الذي يسبق العاصفة
ظليت على نفس وضعي

نزلت ونمت عالكاع وصار خدي يلامس
الارضية الباردة بقيت صافنة بالفراغ
وما يصدر مني غير بس النفس
لا بجيت ولا انفعلت ولا غضبت
ظليت اعاتب النفس شنو البدر مني
وخلة نبراس يتصرف هيج تصرف وياي
منو الخطاءومنوالصح
ليش الظلم الي اتعرضتله على ايد اعز واقرب انسان على گلبي
سحبت نفس عميق وغمضت عيوني
ليش يا ربي اني ما اذنبت ولا اجرمت من حبيت ابن عمي ما جنت متوقعة ولو واحد بالمية ان هو راح يكون اول من يطعني بظهري ويخذلني
يعني شبقى لاولاد الحرام من افعال
ورة فترة كلش طويلة من السكون البارد احس البرودة وصلت لحد كلبي واتوغلت بي
فزيت على صوت امي تدك بالباب
ام هيام : هيومة ماما فتحي الباب اريد احجي وياج
قبل لا ابوج يجي ويشوفج بهالمنظر ويشك بالسالفة
بديت اتمالك نفسي
الظاهر حتى النفس مالهة حق بالانفراد والحزن لوحدها
لان روحي مو بس فقط ملكي وانما ملك الجميع امي وابوي واختي كلهم اذا اذيت روحي راح همة يتأذون قبلي وان حاولت انهار همة ما راح يسمحولي
خطية شنو ذنبهم الله انطاهم ورطهم ببنية غبية وعمية
فتحت الباب لأمي باوعتلي مستغربة
يمكن جانت تتوقع راح تشوفني منهارة ومتحطمة من البجي جنت اتمنى اسوي هيج عالاقل
يمكن ابرد غليلي بس مو بيدي
ام هيام : هيام سمعيني زين اني ما راح احجي كلمات المواسات الي لا تودي ولا تجيب ولا راح تداوي جرحج
اجيت افتح حلكي واحجي رفعت ايدها وسكتتني باشارة منها
:لتبررين اني ما جاي اعاتبج واحجي عليج
لان هذا مو ذنبج حبيتي شخص ناقص مثل نبراس لان الحب مو بيدنا
لو جنا نكدر نتحكم بكلبنا جان ما ظلت كراهية علىً وجه الارض
باوعت لامي متفاجئة بيها جنت متخيلة امي انسانة حدية
ومتعصبة ومتتفاهم بس اليوم موقفها وياي
خلاني اراجع حساباتي واتندمت على كل لحظة ضيعتها وما صارحتها باسراري
يمكن لو حاجية لامي جان مصار بية هيج يمكن جان كدرت تنصحني وتعرف شخصية نبراس بحكم هي جبيرة وتفتهم عالبشر واطباعهم اكثر مني
لان مهما كان اني ساذجة وغبية
باوعتلها بتوسل
وهي افتهمت علية فتحتلي ايديها واخذتني لحظنها
شميت حضنها وشهكت بقهر بس ما بجيت
همست يم اذني : اني ما ربيت بنات ضعيفات ينهارون من اول عثرة بالحياة
خليني افتخر بيج صيري قوية وكومي وكولي للعالم اني بنت امي وابوي اهلي ربوني وعلموني مو لاجل يجي واحد مثل نبراس يكسرني
مستحيل تخليه يطلع من الموقف بسهولة
كان كلام امي الة اثر المهدء بس ابقى مجروحة
رفعت راسي وحجيت
: اني بنت هناء
ابتسمت امي : تدرين هاي الكلمة جانت كلمتي المفضلة
من جان اي واحد يزعلني من اهلي احجيها وهمة يضحكون
(((((((((((()))))))))
عدت هاي الليلة
وبابا ما حس علية ولا درة بالموقف
بس كنت تحت المراقبة من قبل امي وريام
كل ساعة وحدة تطل علية وتشوفني شسوي
خايفين علية اسوي بنفسي شي

بعدين عرفت الاستاذ خاطب وحدة اهلها من طبقة راقية ومعروفين
ما اعرف ليش ما استغربت فعل نبراس واختياره لزوجة المستقبل
جنت كاعدة كبال التلفزيون واباوع بس عقلي مو يم الفلم
بغير عالم
ام هيام : هيومة
: نعم ماما
:

: نبراس بالاستقبال اتصل عليه واتوسل وطلب مني يجي يشوفج ويحجي وياج . واني وافقت استغليت عدم وجود ابوج بالبيت
هسة اريدج تدخلين عليه وتحجين وياه وتواجهينة
وشكو شي بكلبج احجي حتى بعدها ما تبقى حسرة بكلبج لان ما واجهتي
وافقت يجي ويشوفج لان اعرف كلش زين هاي المواجهة راح تخليج تشفين غليلج بي وتوكفين من جديد وتستمرين بحياتج
بستها من خدها : ربي ما يحرمني منج ومن مساندتج الي

وورحت للاستقبال واني احس بجسمي كلة يرجف ودخلت واول ما شافني كام من مكانه
نبراس: هيام !!!
رفعت ايدي حتى يسكت
: اي هيام او تكدر تكول بقايا هيام شتسوي جاي
لعند هيام جاي حتى تتأكد من تحطيم الباقي من حياتي
لو جاي تطمن علية
يقتل القتيل ويمشي بجنازته
رفعت راسي وحطيت عيني بعينة وسألت بصوت هامس
: اريد اعرف شغلة وحدة ليش علقتني بيك اذا كانت نيتك تتركني وتروح تتزوج وحدة غيري
زين ليش جنت تحاربني من يجوني خطابة وتخليني ارفضهم وليش خليتني انتظرك كل هاي السنين
ما خفت من الله حوبتي تطلع بيك
بس تدري شنو ابد ما راح اكعد ادعي عليك
لان اصلاً انت انسان نكرة متستحق حتى مشاعر الاحتقار اشوفها هواي عليك
روح واتزوج وفتحلك بيت وعائلة
بعيد عني
بس ثق بالله مراح تلكة وحدة راح تحبك مثلما اني احبك

بس احب اكلك اني من هاللحضة حبك مات بكلبي
وبتصرفك الخاين هدرتة ودفنتة
درت وجهي اريد اطلع
: اوكفي هيام بس لحظة اترجاج تسمعيني اني بعدني احبج واعشق التراب الي تمشين عليها بس غصب عني اختاريت هذا الزواج
التفتت عليه : اشششش ولا كلمة شنو انت بنية وغصب عنك تتزوج روح الكة غير هالحجة
: لا هيام انتي متعرفين اني شكد عانيت من اتخذت هذا القرار بس تكدرين تكولين الظروف جبرتني وحطتني امام خيارين
لو اختار حلم عمري المشروع والموافقة عليه
لو اختار كلبي وحبي الج
: شنو الربط بالموضوع
: هيام ترة البنية الي خطبتها راح يكون زواجي منها زواج مصلحة لان عن طريقها راح يسهل علية
الموافقة تحقيق المشروع حلمي وتدرين هذا المشروع شكد اشتغلت عليه وشلون جان حلم عمري ارجوج فهميني

غمضت عيوني : اي افتهمتك ادري بيك المشروع حلم عمرك واني هامش بحياتك مركونة عالرف
مو ذنبك اذا اني غبية وعمية هذا ذنبي اني ما كدرت اشوف انانيتك وطمعك جنت عمية عنك
ورضيت اصير بيدك
مثل الطوبة اتعودت علية تضربني وارجعلك بس هالمرة
ما راح اسمحلك بعد تدوس على كرامتي

طلعت من يمه وصاحني
: هيام اوكفي لحظة بس احجي وياج
اتوقف عن الكلام من شاف امي الي جانت واكفة اول ما فتحت الباب صارت بوجهي جانت تريد تدك الباب
باوعتلهة ونقلت نظرتي عليه وتركتهم وطلعت وبقت ماما يمه واتوقع امي راح تنطيه كم كلمة بالعظم
راح يظلن ياكلن ويشربن وياه وما راح ينسى عاره
((((((()))))))
ورة اسبوع اجة
بابا وبلغنا بخطوبة نبراس اني بسرعة كمت بس سمعت باسمه
رحت لغرفتي
ورة فترة دخلت ريام : هيام بابا يكول الباجر مهر نبراس راح يسون حفلة بالنادي وكال لامي جهزو نفسكم اخذكم ووووو
: شنو كملي شكو بعد
: هَـا لا هيج بس شراح تكولين لبابا اذا سألج ليش ما ترحين ويانا
: ومنو كلج اني ما راح اروح وياكم
ريام بصدمة: هَـا !!!!
يعني شنو راح تحضرين مهر نبراس معقولة
: ليش شكو بيها اريد اشوف الي فضلها علية هل يا ترى تستحق يتركني علمودها
ريام: هيام اني لو منج ما اروح وانتي بكيفج
لان احس راح تكونين بموقف كلش حرج
: لا لاتخافين علية اني اقوى من هيج
صار يوم ثاني وكعدت
الصبح ودخلت للمطبخ وسمعت امي تحجي وية ريام
: والله ما جاي اصدك الي سمعتة من ابوج جان صدمة حياتي
هيام: صباح الخير شنو الي سمعتي من بابا
وانصدمتي منة
ام هيام: صباح النور لج انتي شنو جني تجين وتدخلين على غفلة علينا
هيام : لا تضيعين السالفة كولي شنو
ام هيام: هيج شي ما يخصج عالعموم اني سمعت من ريام انتي تردين تروحين ويانة للحفلة
: اي ماما
: بس اني افضل ما تحضرين الحفلة
: لاماما لاتخافين علية بنتج قوية
شفتها غمضت عيونها وجرت حسرة
: ادري بيج قوية بس لكل انسان والة طاقة تحمل
عندة حد يوصلها وينفجر
: حتى لو ورغم هذا كلة اني اريد احضر حفلة المهر حتى اطلعة من حياتي نهائيا وما التفتت
عليه ابداً
شفتها اتبادلت بالنظرات هي وريام
والله وللعصر وجان نحضر نفسنا ونبدل
وعدلت ولبست احلى فستان عندي
وسويت شعري كيرلي
ومكيجت وية كل تعديل وحركة اسويها
احس مثل الي يعزف على جروحه

دخلت للنادي واني احس بجسمي صار كلة يرجف مااعرف شنو جنت احس من صممت ان اروح وياهم كان جواب امي الرفض لكن اني اصريت
اروح وياهم حتى ما اثير الشكوك والفت انتباه اقاربنا
لعدم حضوري لحفلتة واريد اشوفة بعيني حتى كلبي الخاين يتيقن بغدره
ام هيام :هَـا ماما هيومة مستعدة
سحبت نفس عميق : اي ماما يالله
وصلنا بابا لقاعة حفلة المهر مالت نبراس
وشفت عمة سولاف وبناتها نزلو من السيارة
نزلنا وسلمنا عليها ودخلنا سوية للنادي
وبوجهنا دخلنا لغرفة التعديل تصير يم الباب
نزعنا العبايات وعدلت نفسي وشافتني عمة سولاف
: كمر والله كمر ماشاء الله يوم الالج اشوفج عروسة
دخلت للقاعة وعيوني تريد تشوف البنية
الي راح يرتبط بيها نبراس وفضلها علية
اتقدمت وصارت عيني عالكوشة
وهناااااا جمدت بمكاني من الصدمة
حسيت انقطع النفس اختنكت وصرت اهز براسي برفض مامصدكة الي جاي تشوفة عيوني
: لا يالله دخيلك هاي هواي علية امتحانك صعب
حسيت على ايد لزمتني من كتفي التفتت شفت لجين
صار جسمي كلة يرجف من الصدمة
باوعتلها وصارت عيني بعيونها
وجانت نظرات عيونها تحجي بالحزن على حالي وتشعر بتأنيب الضمير شكلها جانت تعرف بخطوبة نبراس
رجعت اباوع عالكوشة لنبراس وخطيبتة
رغم بذيج الايام اتيقنت ان نبراس راح يصير لغيري لكن الان بعدما شفتة كدام عيني شلون كاعد هو وخطيبتة وشلون يضحكلها ويهمسلها ايقنت ان نبراس صار من نصيب وحدة غيري حلم عمري صار لغيري
اباوعلها
جانت بنية اصغر مني يجي عمرها بعمر ال ١٨سنة واحلى مني بس لحظة اني هاي البنية مو غريبة علية
مدري وين شايفتها صرت كلي ارجف
لجين : هيام والله ما جنت ادري بنبراس راح توصل بي النذالة والحقارة ويطعنج صدكي اني مثلج انصدمت من
سمعت من اسراء بنت خالو اتقدمولها خطابة
لكن من عرفت بنبراس هو العريس اتخبلت
التفتت عليها مصدومة
وبلحظتها عرفت وين شايفة هاي البنية جانت مرات تطلع وية لجين للمول ونبراس مرات يوصلهم
مشاوير لهواي اماكن
التفتت على لجين وباوعتلها بنظرة اتهام
وابتسمت بأحتقار : احيج على روح الصداقة والامانة الي شايلتها بتجاه صديقة العمر
لجين : لحظة والله عرفت راح تتهمني بالغدر وتذبين الصوج كلة بية بس احلفلج بداعت بابا ماكان عندي علم بعلاقتهم قسماً بذات الله اني اتفاجئت مثلج من عرفت ومتدرين اني شسويت من عرفت بيهم على علاقة
رفعت ايدي وسككتها : رجاءاً وفري الحجج والاعذار لنفسج اني بعد ما عندي ثقة بَـــأي شخص لا حبيب ولا صديقة والدليل وجودج هنا اكبر خيانة الي ويثبت عدم حرصج علية
تركتها ورحت اتقدمت
ووكفت كدامهم والتفت نبراس يبتسم ورفع راسه واجتي عيونة بعيوني
وبسرعة اختفت الابتسامة من على وجهه وانخطف لونه مصدوم
نبراس: هيام شجابج
هيام بصوت يرجف وكوة لازمة روحها
: اجيت حتى اباركلك جانت امنيتي اشوفك وانت عريس
جنت راسمة الابتسامة على وجهي التفتت على العروسة جانت حلوة وصغيرة وكل المواصفات المطلوبة بالزوجة المناسبة تنطبق عليها
همست: الف مبروك عليج نبراس
باوعت علية والشرر يتطاير من عيونها شكلها تعرفني اني منو وشنو علاقتي بنبراس
اسراء: ليش اجيتي لحفلتي ترة وجودج هنا غير مرحب بي وتدرين موقفج حساس
ترة نبراس حجالي عنج كلشي وعرفت انتي شلون كاتلة روحج عليه وتردينة الج وما حصلتي
رجعت للخلف مصدمة
كان كلامها الي مثل الضربة على الوجه

باوعت لنبراس
بنظرة عتاب وقهر شلون وليش هيج سوة بية
الله يعلم شنو حاجيلها عن علاقتنا
همست بصوت خاوي: روح الله لا يوفقك
ذنبي وخطيتي بركبتك
جان كلبي يدك حيل وسرعة النبض احس بيها تضرب
بركبتي
درت وجهي اريد اطلع ووصلت يم باب القاعة وصارت لجين بوجهي تتوسل تريد تشرحلي
شفت الدموع بعيونها
حسيت بالغدر والخيانة تركتها وكملت طريقي اريد بس اطلع برة اشم هوى راح اختنك
حسيت صار صوت وشة قوية بأذاني
صرت اترنح مثل السكران واسمع صوت امي يوصلني من بعيد وريام تصيح علية من وراي بعدها صارت الدنيا ظلمة بعيوني
ومحسيت على نفسي
(((((((())))))))
ام هيام : اركان مو وكتة هذا الحجي عوفها ترتاح احنا ماصدكنا استردت الوعي
جنت ناطيتهم ظهري ما اريدهم يشاهدون دموع الانكسار الي صارت تنزل بدون ما اسيطر عليها
بس الحمد لله على الاقل كدرت احافظ على اخر ذرة كرامة عندي وما بجيت كدامهم
ما راح ادعي وما اكول غير حسبي الله ونعم الوكيل بيهم كسرو زهرة شبابي وخسرت اعز شي عندي بعد ما عندي ثقة بأحد
ام هيام: هيومة اكو زميل اجة يسأل عنج واتحمدلج السلامة اسمة بلال
غمضت عيوني وانعصر كلبي
اتذكرت مرة بلال كال شنو قصة نبراس هاي مرتين
اشوفة وية بنية
ضحكت بأستهزاء: ههههه والله عليك سوالف
لك نبراس يشتغل سايق عند ابو لجين فشي اعتيادي راح تشوفة وية لجين وخواتها بكل مشوار ترة ان بعض الظن اثم
جنت شكد جنت ساذجة
زين لجين شلون هانت عليها صداقتنا وترضى تشوفة وية غيري وما تنبهني ليش معقولة هي متدري ببنت خالها على علاقة وية نبراس
ولو هي مو صوجها صوجي اني الي ما عرفت اختار
وحبيت واحد ناقص
بكل الاحوال جان مقرر يتزوج غيري
سواء كانت قريبة لجين او غيرها

صرت ابجي على حالي لان خسرت كلشي بحياتي
وصرت اعاتب الروح اني على شنو عايشة
احس بالحياة بعد ما بيها شي يستحق حتى استمر بالعيش
ومن عهدها كضيت اسبوع بالمستشفى وخلال هذا الاسبوع انطوني مرتين ابر مهدئة لان مرتين انتكست حالتي
وبعدها مريت بمرحلة الصمت والهدوء
صرت الي يحجي وياي ما يحصل مني اي اجابة ولا ابادلهم الكلام
انتبهت على امي الي اجت تتخبل على حالي وبابا الي اخذ اجازة من شغله وكابل المستشفى وكعد
خطية ما يعرف شنو العلة غير ان عندي هبوط حاد بالسكر
وصرت اخذ علاج للسكر
وبنهاية الاسبوع سمحلي الدكتور بالخروج
ووقع وكال بس خلو ببالكم لازم تغير جو ترة بتكم مرضها نفسي اكثر من جسدي
ابو هيام : شكو يا ستار دكتور بنتي ما تشتكي من شي احنا عايشين احسن عيشة واني وامها ما مقصرين عليهم بشي
لزمتة ماما من ايدة وكالت للطبيب
ام هيام: هذا هو دكتور راح اسفرها لبيت عمتها
اخليها تغير جو هناك عندهم ما دام عطلة
الدكتور- يكون افضل
ووقع على الورقة وسلمها لبابا
وكنت اشاهدهم شلون محتارين بية شلون يرضوني
جنت معدومة من الاحاسيس وما عندي اي استجابة
وية الاشخاص الي حولي
ومعالم وجهي باردة ما تعبر عن اي ردة فعل
وفعلا مرت يومين واخذني بابا لبيت عمة سوسن اخت بابا الجبيرة بالموصل عندها بنات بنفس عمري ريتاج
واريج
وعمتي ما قصرت جان ابنها مسافر بعثة دراسية للخارج على حساب الدولة انطوه منحة دراسية
وابوهم كلش خوش انسان ومحترم صار يعاملني مثل بناته ولا يفرق بينا
وعمتي وما ادراك ما عمتي رغم حالتهم البسيطة
بس عايشين حياتهم وما عندهم للنكد بحياتهم مكان ريتاج تجنن بتصرفاتها واريج شحرورة
متت عليهم وكدرو يطلعوني من جو الكئابة الي جان يحيط بية
ورة فترة افتقدت نقالي صدك وينة
واتذكرت امي اخذتة مني واني بالمستشفى
تخاف يجيني اتصال من نبراس او خطيبته او لجين رادت تبعدني عنهم نهائيا

استمريت ببيت عمتي سوسن شهرين
وية البنات وبهاي الفترة هملت حالي
وما كمت اهتم لشكلي لان ما عندي حافز بالحياة
يشجعني لحتى اهتم بروحي
وصرت صدك اشبه الدب كلش سمنت
ومحد من بنات عمتي نبهتني على السمن المفرط
لان همة مثل حالي هم دبدوبات
فضعت بينهم او بالاحرى من الكئابة الي عشت بيها
صرت شرهة وذبيت حركتي كلها بالاكل
ما اعرف ليش يمكن يمكن احس بالمواساة
وبالشهر الثاني قربت العطلة تنتهي اجة بابا علية واخذني جانت نفسيتي متحسنة
واستسلمت للامر الواقع واصبح نبراس ورقة انطوت من حياتي فصل وانتهى
ابوهيام: هاي شنو سوسن شنو مسوية ببنتي وينها هيام
سوسن: ههههه شفت شلون سمنتها الك
ابوهيام : شنو القضية مسمنة بنتي قابل اريد اذبحها للثواب
اقتربت من عندة وباسني ما راسي
ابو هيام: لج هيام بابا البيت ما يسوى فلسين بدونج
تعاي رجعي وياي امج واختج ظال وجهم فاهي بدونج
حضنتة وحسيت بالامان من شميت عطره
هيام: والله حتى اني مشتاقتلكم كومة
ابو هيام : لعد يالله بابا جهزي حالج حتى نرجع الباجر الفجر نطلع باذن الله من وقت
وبيومها نمت الليل
واني افكر بحياتي بعد رجوعي لبغداد
شلون راح اكدر استمر بحياتي واتصرف عادي ونبراس وزوجتة على مقربة مني
هل يا ترى طرقنا راح تلتقي
سحبت نفس عميق وزاد الدنيا ظلام بعيوني من اتذكرت
وضعي حسيت باليأس
شلون راح ارجع اداوم بالكلية والكل هناك يعرف
بقصتي اني ونبراس شلون راح اكدر اوجههم
زين ريتا ولجين معقولة راح اكدر انهض من جديد واستمر بحياتي بدونهم واشوفهم كبال عيني بعدما خسرتهم
حسيت رجعت حالتي وصار النفس ثكيل على صدري
لزمت صدري وسحبت نفس عميق وصرت ارددت
سورة الشرح
(الم نشرح لك صدرك )
صرت كل ساعة ارددها مثل المجنونة
ربي الطف بحال عبدك الضعيف

يتبع