رواية تائهة بين اروقة الماضي الفصل الرابع 4 - بقلم الكاتبة نهى

تائهة بين اروقة الماضي
بقلم الكاتبة nuha-d-h

((جمعة مباركة عليكم يا احبتي الاعزاء
هذا بارت هدية مني الكم قراءة ممتعة ))

رجعنا للبيت وبابا راح وية عمو احمد لمركز الشرطة حتى يشوفون ليش موقفين نبراس
دخلت وسلمت على ماما
وريام حجتلها الصار
تركتهم يحجون ودخلت للغرفة وكلبي معصور على نبراس
ما اعرف ليش حسيت بالذنب ما رديت على اتصاله
يمكن طلع عصبي وسوة مشكلة من وراي
اوووف هسة لو مكلفة نفسي ومتنازلة
ومهدئة الموقف شلون يا ربي اريد اعرف ليش وقفوه
بدلت ملابسي وغسلت وجهي ورحت يم امي. انتظر
بابا بلكي اسمع اخبار نبراس
ام هيام : راح تبقين طول عمرج تترقبين اخبار
هذا الولد.
باوعتلها وسويت نفسي ما افتهمت شنو حجت
: نعم ماما وياي تحجين ؟؟
: اي انتي احجي وياج لتسوين نفسج ماتعرفين شنو قصدي
اقصد نبراس ترة عيونج فاضحتج لا عبالج ما منتبهة عليكم وعلى نظرات عيونكم كلشي واضح بينكم
: لا ماما متوهمة مابيني وبين نبراس اي شي
استحيت احجيلها واصارحها
ما اعرف يمكن شخصية امي ما تنفع تصير صديقتي
واحجيلها الي بكلبي صرت اتهرب منها
اعرف بيها ما راح يصرفلها علاقتي مع نبراس
مو اعتراضاً على شخص نبراس وانما
راح ترفض مماطلة نبراس وتأخيره للزواج
ويطلب مني اصبر عليه وانتظره واي ام ما راح تقبل تسكت على هيج شي
ان تشوف بنتها مثل الوردة كدامها سنين عمرها تعدي بنتظار شخص يريد يبني مستقبله ويأجل الزواج
امي واقعية تريد شي ملموس
واعرف طبعها هي تحاول تضغط علية حتى احجيلها
عن علاقتنا وتالي تنتقل الى المرحلة القادمة وهي
الالحاح للطلب من نبراس يتقدملي
ومتأكدة اذا عرفت كلام نبراس الي بذاك اليوم
اكيد راح ترفض رفض قاطع وتأكد علية بعدم التواصل وية نبراس واقطع وياه اي علاقة هاي من غير تبدي حربها وياي
لان هاي امي واني اعرفها كلش زين
هذا الوجه البريء الي اشوفة حالياً ماهو الا تمهيد للعاصفة
هههه مثل قبل من جنت اضم عنها درجات الرسوب
وهي تكعد تجر الساني بصورة ام طيبة حنونة مساعدة
(احجيلي حتى نلحك نتعاون عالدرس الضعيفة بي ومن انطيها الدرجات ما اعرف الضربة منين تجيني
ومايبقى نعال بالبيت ما تشمرة علية واذاناتي يصيرون حمر من ورة الشد. هاي نتيجة الي تضم على امها
ومنها عرفت امي قانون المسايسة ماهو الا نوع من انواع المراوغة لحتى تعرف عني كلشي
لكن هيهات تعرف مني شي
ان كان الكلام من فضة فالسكوت من ذهب
هاي القاعدة تنطبق مع امي
صحيت على دخول بابا للبيت
وكوة اتمالكت نفسي كدام امي حتى لا اتهور واركض لعند بابا واسمع شصار على نبراس
ظليت كاعدة بس عبالك كاعدة على نار
انتظرتها تستفسر من بابا بس شكل امي
خبثت ماكدرت اسكت بس حاولت احجي ببرود وكأنه شي عابر يعني وكأن اسئل من باب الفضول
هيج شي
: هلو بابا ها شنو صارعلى سالفة نبراس

: نبراس موقفينة الشرطة بثناء ما كان يشتغل بالكوفي
لان واصل بلاغ للشرطة عن الكوفي
على اساس ان هذا الكوفي بي ممنوعات
ونبراس يشتغل عامل بالكوفي
ماخذينة هو و الكادر كلة
والله يستر بس لا تتلبس السالفة براسه لان هو ما وراه ظهر وسند اخاف يستضعفوه
حسيت كلبي انخمط من مكانه
كوة كدرت اسيطر على نفسي وما ابين شي
كدام امي : الله يكون بعون امة وخواته خطية نبراس ما يستاهل
ام هيام : اي والله صدك ما يستاهل يصير بي هيج ويضيع مستقبله حرامات هو خريج وتعبان على نفسه
زين وهسة شنو صفت السالفة
: ننتظر الباجر ونشوف صاحب الكوفي شنو راح يسوي
بلكي يبري ذمة العمال ويطلعونهم خطية همة مالهم ذنب على باب الله
: اووف خطية هاي وين جانتلة
بعد ما كدرت اتحمل اكعد اسمع اكثر لان حسيت دموعي راح تخوني : يالله تصبحون على خير اني كلش نعست وراسي صاير طبل من ورة الحنة
دخلت للغرفة واحس دموعي نزلت وية غلق الباب
اتكأت عليه
والله ما اسامح نفسي اذا صار على نبراس شي
لان لو ما اني الح عليه حتى يشتغل جان ما راح
للكوفي يشتغل هناك
صبحت يوم ثاني مريضة بالفراش
المشكلة ما اشتكي من الم جسدي لا المشكلة الالم نفسي
وتعال شلون راح اتصنع كدام الكل ما بية شي
واتصرف طبيعي كلش
كمزت من مكاني واتذكرت
لجين صديقتي وابوها اي صدك هو مسؤل بلكي
يكدر يفيدنا ويتوسطلنا
اتصلت عليها وحجيتلها كلشي وهي وعدتني
راح تحجي وية ابوها
والله ورة ثلاث ساعات اتصلت علية لجين وطلبت اسم نبراس الثلاثي وبأي مركز
والله لليل طلعو نبراس
بس يمة اني اجيت اطير من الفرحة
(((((((((())))))))
اتصلت عليه ومجاوب ردت اتحمدله ع السلامة
يالله شكله ملتهي
ومر اربعة ايام و كل يوم اتصل عليه وهو نفس الشي ما يرد
اخر شي دبرت عذر حتى اروح لبيت عمو
واخذني بابا هناك لبيتهم وكعدت مثل كل مرة وية البنات وصادف كانت سيرين جاية لبيت اهلها والتهينا نتبادل الاخبار وعيوني على الباب منتظرة نبراس
سئلت عليه بصورة عابرة
امة كالت طالع عندة شغل وكعدت شوية شوية
مثل الحرامي ابوك معلومات عنه
حتى اعرف اخر اخباره

هيام : ليش هو بعدة يشتغل بالكوفي
ام نبراس : لا عيني بطل منها ابوه ما يقبل يرجع لهناك
كافي الي صار بينا من وراها
: لعد شنو الشغل الي رايح عليه
: نسيت اكلج هذا المسؤل ابن منطقتنا الي جان ساكن قبل يمنا اتدخل بموضوع نبراس وكدر يطلعه من السجن
كانت تقصد ابو لجين
: اهااا الله يرضى عليه
: اي فعلا الله يرضى عليه ومو بس طلعه من السجن وبعد عرض عليه عمل يشتغل عندة
: هاا!!! هاي شوكت
: يوم ثاني من طلع من السجن
استغربت لعد شعجب لجين ما حجتلي عنة
احتمال عبالها اني اعرف بالموضوع لان ما تعرف
اني ونبراس متزاعلين عالعموم انعم الله عليهم وكفو ويانة خوش وكفة
: الحمد لله ربي يبعد البلاء عنه ويسهل اموره

سيرين : امين يا رب. ومو بس هيج سمعت نبراس يكول هاي الوظيفة مؤقتة منا علما يعييني بوظيفة بشهادتي ضمن اختصاصي
اجيت ابجي من الفرحة يارب فرجها عليه
وظليت احوم اريد اشوفة واباركله
وفعلاً وصل نبراس ودخل واتفاجيء بوجودي
وسوة نفسه يبيع ثكل وبعدة زعلان علية
هيام : الحمدلله على سلامتك نبراس
: الله يسلمج
كان يحجي وما يحط عينه بعيني مثل كل مرة
ادري بي يضعف كدامي وما يكدر يبقى مخشن خاطره بتجاهي
: مبروك سمعت بيك اتوظفت يارب يوم للتعيين وتصير بارقى المراتب
رفع راسه وصارت عيني بعينه
رفع ايدة ورجع شعره للخلف
حسيت بعيونة اشتياق مفضوح بتجاهي
: الله يبارك بيج هيومة اااا اقصد هيام
سيرين: شي اكيدك حقك تخربط باسمها صايرة دبدوب
صار وجهي احمر استحيت
رفعت عيني وباوعت عليه كان يباوع لجسمي بنظرات عيونه
: بعيوني تبقى حلوة نفسها هيومة متتغير
يبووو عليك نبراس شلون بيك وبكلامك الي
ياكل عقلي ونساني حتى كلام العتاب الي جنت محضرتة
اشرلي بعيونة وعرفت يريد يحجي وياي
بس اهلة موجودين
نبراس : احم يالله اني اترخص عندي مشوار
كمت من مكاني : نبراس عفية اخذني وياك بطريقك لبيت اهلي اريد ارجع
سيرين : وين بعد وكت عفية ابقي ويانا صارلنا هواي ممتجمعين
: غير مرة حبيبتي والله امي مالهة خلك
: يالله معذورة سلمي على عمة هناء وياج
انتبهت عليه طلع كدامي واني سلمت على سيرين ووعمة عتاب ام نبراس وطلعت من باب المطبخ
ادور عليه ما حسيت الا ايد سحبتني واخذني ورة البيت مالتهم يصير ترك اظلم تقريباً بي اضاءة خفيفة مالت شباك الخلفي للمطبخ مالتهم
انفاسناالسريعة اختلطت مع بعض
قرب على اذني : لج هيااام مييييت عليج ومشتاقلج بكد رحمة الله
صرت كلي ارجف خوف على لهفةعلى اشتياق
ارتبكت : اة اة حتى اني مشتاقتلك بس اني زعلانة عليك
: ليش
كان يحجي بهمس قرب شفايفي
ارتكبت وصار نبض كلبي كلة يرجف
دفعته على كيف من صدره حتى يبعد عني لان
قربه اربكني وجرئته خوفتني
: ليش اتصل عليك مترد على اتصالي
: جنت هواي مشغول بهاي الايام ومفرغت حتى احك راسي
: هذا مو عذر انت جنت ما يعدي عليك يوم اذا ما
تتصل علية وتسمع صوتي
: رجع اقترب مني وحاصرني بين ايديه والحايط
: يعني شلون بيج راح تخلصين هاي اللحظات الحلوة بالعتاب
واني ما مصدك انتي هسة بين ادية
قرب شفايفه علية
ارتبكت مكدرت اخليه يقترب مني
دفعتة وشردت رحت وكفت انتظره يم باب البيت مالتهم واني كلي ارجف صرت اتلفت اخاف احد يشوفني
طلع وراي ووهو يرجع شعره ويبتسم
فتح باب البيت ومد ايدة حتى اتقدم واطلع قبله عبرت من يمه وهمسلي : جبانة
: افضل اعيش جبانة احسن من ما اخسر احترامي لنفسي
وصلني لبيتنا وكال : خلي ببالج الدوام راح يبدي
واني صرت السايق مال لجين وكلت اوصلج انتي وياهة بطريقي لان مستحيل اخليج لوحدج
تركبين عبرية نفرات
دنكت : اذا هذا الشي ما يأثر على وظيفتك فبراحتك الي تشوفة سوي
: شنو لهلدرجة تهمج راحتي اشو ما اشوفج
تهتمين لراحتي من اقترب منج واريد خضنة منج
دنكت راسي خجلت من كلامه
سمعت ضحكته وراح وتركني : تبقين جبانة
دخلت جوة لبيتنا
اوووف منك يا نبراس بعادك يعذبني
وقربك يخوفني
ما اعرف شنو ديصير بية
منو الغلط بينا ومنو الصح
((((((((()))))))))))
عدت الايام
وصار موعد عملية امي
والتهيت بيها ورجعت اتصالاتنا اني ونبراس
بس مو بكثرة مثل الاول لان هو مشغول واني
التهيت وية امي
وخضعت للعملية والكل عرف بمرضها
بالصدفة الدكتورة الي تعالج عندها امي سألت عليها ام نبراس تستفسر عن صحتها ومن عدها
وبوقتها نبراس عتب علية وكال
: ليش اني اخر واحد يعرف بالموضوع لهلدرجة عندج مو مهم ولا بكد المسؤلية وتشاركيني بمشاكلكم
: لا نبراس مو هيج الحجي بس الموضوع ما يخصني بس الي هذا خاص بأمي وهي طلبت ما نحجي
لاي واحد
: بس اني مو اي واحد لج هيام اني نبراس حبيبج
ليش احس بيج متغيرة علية ودائماً تبعديني عنج
: لا مامتغيرة عليك بس والله مرض امي اخذ كل وقتي
وتفكيري ترة هاي امي مو شوية الي جاي امر بي
شعور كلش صعب
حجة وهو مغنتب : عالعموم براحتج ما اجبرج
: عفية نبراس لاتصير انت والوكت ضدي
(((((((((())))))))
مرت هاي الفترة وزاد انشغالي من بعد عملية امي
بين فترة نقاهة امي وبين الخطار من الاهل والجوارين
كلش انشغلت بحيث بدة الدوام واحنا ما اشترينا زي للدوام لحد الان
ريام صارت رابع اعدادي
واني مرحلة ثانية كلية
وبقينا على نفس ملابسنا لهاي السنة ننتظر بابا شوية يفرغ النة وياخذنا
اتصل علية نبراس وكال حضري نفسج الباجر اجي عليج الصبح اخذج للكلية
وفعلا صار الصبح واجة نبراس بعدما انطيت خبر لبابا
وطلعت وياه وركبت بالسيارة كدام جانت سيارة
عالية مظللة حكومية
كان نبراس كاشخ لابس بدي ابيض حاضن عضلات جسمه وبنطلون كابوي ولابس نضارت شمسية
طالع عبالك مودل هارب من غلاف مجلة ايطالية
جريت حسرة وابتسمت : صباح النور
: هلو كبد شلونج كان يحجي ويباوع على ملابسي
: هاي ليش باقية على ملابس العام القديمات
: التهينا وية امي وبابا ما فرغ حتى يطلع ويانة ويشتري
: اهااا لعد اليوم بنهاية الدوام اخذج وتشترين
: لا ميحتاج لاتكلف نفسك ما اريدك تصرف
كمل كلامي : تصرف فلوسك وتبذر ولازم تلزم نفسك
حفظت كلامج على ظهر قلب من كد ما تعيدين وتصقلين بي
ابتسمت : اي غير احرص على جيبك
: لتخافين على جيبي اني اعرف شوكت اصرف وشوكت الزم روحي
فرحت بيني وبين نفسي لان نبراس هواي حريص على اسعادي
: اتصلي على لجين كليلها احنا بالطريق
: اوك
اتصلت عليها وكالت اوك انتظركم
وصلنا لبيتهم ما شاء الله مو بيت قصر كان بمنطقة كلش راقية طلعت لجين من الباب وهي تبتسم
وركبت بالسيارة
: صباح الخير والسرور عليكم
: التفتت عليها صباح النور عليج حبي مشتاقتلج كومة
شهكت لجين: عززززة لج هاي شنو شصايرة
فيل
: سكتي لتحجين والله ضايجة من نفسي
: عابتلج لزمي نفسج من الاكل شي اكيد حاضنة الثلاجة ومكابلتهة
عيني اتلاحكي لنفسج لا يشرد الولد من عندج
ابتسم نبراس: عمي راضين بكلشي ومقتنعين
: هلو هلو منو كدج حلوة القاضي راضي
ههه يعني كلام الناس راح كلة عالفاضي
وصلنا للكلية ودخل نبراس السيارة جوة الكلية لان جان شايل باج
ونزلنا والتقينة بريتا وكانت مغيرة لوك شعرها كاصتة
موديل كلش حلو وصاير عليها يجنن
اما لجين كانت مسوية عملية تجميل لخشمها واني اكول شنو متغير بوجها
اما اني فالتغيير سمنانة
ريتا: حٍٍِْــًبٌٍـــِٓېٍٓ هيومة طمنيني على الوالدة شلون صارت
: لازينة الحمدلله د تاخذ علاجها
لجين : يارب دوم بخير
وخلص اليوم ببداية توزيع المحاضرات
وصادف التقيت بمثنى وسلم علينا اني والبنات
واتبادلنا الاخبار
وبعدة مثنى يلمحلي ويباوعلي بنظرات كلها اعجاب
فاجئني من كال: هاي شنو حليانة على كعدت البيت
احس بخدودي صارت طماطة
لجين بتصنيف: منين ياحسرة دشوف شلون سمنانة
اباوع لنظرات مثنى شلون سافرت على انحاء جسمي اتمنيت الزم لجين واخنكها على شقاها الماصخ
مثنى: لا بالعكس اني اشوفة زايدها جمال فوك ماهي جميلة
يبووو احتاريت وين اودي وجهي من المستحة
بية صفة اني حيل خجولة البنات يكولن شخصيتج ضعيفة ووعديمة الثقة بالنفس
بس اني اسميها خجل
ما اعرف يمكن كلمن وله وجهة نظر بالحياة
خلص اليوم ومر علينا نبراس للكلية واخذنا
ركبت بالسيارة كدام وركبت لجين ورة
نبراس: هاي شنو صايرة طماطة حمرة من الشمس
هاج لزمي اخذي شربي ماي
انطاني بطل ماي
اخذتة من عندة وشربت منة شوية وانطيت للجين
اخذتة مني
لجين : يمة متنا من الحر اليوم الشمس ماخذة ويانة سلفي
ما اعرف نازلة بينا صكع بالراس
هيام : اي والله متنا حر
نبراس: يالله ولا يهمكم راح اشتريلكم ايس كريم تبردون كلبكم بيها
التفتت عليه وخزرته
: لا ما يحتاج تكلف نفسك هواي تصرف الزم ايدك شوية من الصرف

لجين : ليش تحجين عليه فوك ما يفكر بيج خطية
: اي عفية فهميها ترة اني الرجال واني المسؤل عالمصرف حصرة علية اريد اشتري شي
اذا ما الست ظلت تبجي بوجه الله
: اني شنو داخل بجيبي ترة هذا كلامي كلة لمصلحتك
عادي براحتك هنة فلوسك عسى ما تحركهم اني شلي غرض
انقهرت من كلامه ودرت وجهي
نبراس : هيومة على طاري حرك الفلوس
ذكرتيني يالله اليوم سوي حسابج اخذج اشتريلج زي
للكلية
لجين : هَـا بعد شنو تردين احلى من هيج رومانسية ماكو يالله عاد فرديها لتظلين عاقجة الوجه
ابتسمت على كلامها
: عابتلج
: تعاي هسة راح يدوخ نبراس وين يلكة ملابس بقياسج
نبراس: ههههه لا عاد مو لهدرجة سمنانة
لجين : يا اخي عوفني خلي انصب عليها شوية وابجيها مو بس هي تحرك بكلبنا صارلها ساعة تبيع ثكل
((((((((((((((())))))))))))))

ومرت اربع اشهر
وخلال هاي الفترة استلمت مسؤلية البيت والطبخ عن امي لان جانت صحتها على كدها
وهسة حاليا الف الحمد لله بدت تستعيد صحتها لكن
بهاي الفترة نبراس صار يوم عن يوم تتغير احواله
ووضعه المادي صار زين واشترالة سيارة
بس بنفس الوقت بدة يبتعد عني والاتصالات اصبحت شبه معدومة يعني لو اني اتصل لو ماكو ميتصل
كان يوصلني اني ولجين للكلية وصار يجيب لجين بالاول وبعدين يمرون علية وياخذوني للكلية
وبالرجعة يوصلني اني بالاول وبعدين لجين
لذلك ما تصيرلي فرصة احجي وياه ما اعرف ليش احس بي يتهرب مني

لجين : هيومة شبيج صافنة نحجي وياج وبالج مو ويانة
ريتا: عوفيها تلكينها تفكر بامها اي صدك شلون صارت
هيام :الحمد لله صارت زينة اتحسنت
لجين : يارب دوم بخير
ريتا: لعد شبيج دايخة
نزلت دموعي كدامهن غصب عني
لجين: لا لا لا هَـاي شنو ليش تبجين
سحبتني لحضنها وحوطتني بثنين ايديها
وصارت تمسح دموعي
ريتا لزمت كتفي: ااوي حٍٍِْــًبٌٍـــِٓېٍٓ هذا كلة مخزون بكلبج وانفجرتي احجيلنا منو وياج
جنت ابجي واحجي : نبراس
لجين وريتا: شبي نبراس
: كلش متغير علية ومايهتم لاتصالاتي ويتهرب مني
وما يحب يلتقي وياي حتى سئلي لجين ياخذني من بيتنا بحضور لجين ويرجعني اول وحدة
لجين : اي والله صحيح
هيام: هذا كلة حتى ما استفرد بي واكعد اسئلة
متأكدة عندة شي بحياته يخلي يتهرب مني
ريتا : اهووو هاي انتي دائما تكولين هيج
لجين: يا اختي على كيفج وية الولد ولاتنسين
ترة هسة هو ستوة تعين موظف جديد بالوزارة خطية
فتشوفينا غركان
انصدمت من سمعت بنبراس متعين
وزادت الدموع بالنزول : هاج شوفي وهذا هو متعين واني اخر من يعلم
شفت لجين ارتبكت : اهووو اجيت اكحلها عميتها يا اختي انتي مو تحبين نبراس شي اكيد راح تفرحيلة من يتعين بعد شكو تبجين لان ماكلج يا اختي عبريها هالمرة
ريتا: اي صدك ترة الولد مو مثل البنية ما يهتم بسرد التفاصيل ويناقش اعمالة وية حبيبتة
هيام: اني اختلف اني مو بس حبيبتة اني اعتبر خطيبتة
لجين : يعني شلون راح تكعدين تبجين جنج عجوز
وتالي يطفش الولد من عندج
انتي لازم تكونين صبورة وياه
هاي لان مو وياج بالكلية بهاي السنة تحسين بعيد عنج بس صدكي هو يحبج
((((((((((()))))))

يتبع