رواية تائهة بين اروقة الماضي الفصل الخامس عشر 15 - بقلم الكاتبة نهى

تائهة بين اروقة الماضي
ا
بقلم الكاتبة Nuha_d_h

مساء الانوار والخير والعافية عليكم يا احبي القراء
🌷🌷🌷🌷🌷🌷🌷😘😘😘

صوت ام ضرغام انقذني من ورطتي اول مرة من يوم الي دخلت هذا البيت ام ضرغام تسويلي شغلة زينه من دون ماتعرف طبعا
ام ضرغام : يله بنات استعجلو خلصو بسرعه عدنا كومة شغل اليوم
اني راسا كمت واخذت تلفوني داروح لغرفة ميس احطه واخلص من هذا الاحراج
من كمت صارت عيني بعين ضرغام وشفته رافع حاجبه وبعينه نظرة تساؤل
بعد متركت تلفوني بغرفة ميس طلعت وبلشت شغل وياهم وكعدنا نلف دولمة اني وخالة رحاب وهي تريدني الف ورق العنب على طريقتها بشكل مثلث

هيام : خالة رحاب هشكل اسويها لو بعد
رحاب : اي هسة لفيتيهة صح
ميس: يماااااااي يماااااا

ام ضرغام: وغمااااا ولج ثولة نصي صوتج
منا خطار

ميس: يمة صيحي على ابنج جاي امسح وهو يدوس
بحذائة انا مو خدامة عدكم وكل ساعة اعيد المسح
ام ضرغام: شوفي ولج هذا السانج اذا ما بلعتي الا اكول لاخوج ضرغام يكصة الج
ميس: شلون بيكم يعني هاي بدل ما تجين تحاسبين ابنج
تكومين تحجين علية والله انتو ناس ما عدكم رحمة
وراح اشتكي عليكم عند منظمة حقوق الانسان
واخليهم ياخذوني منكم ويتبنوني عائلة ثانية
ام ضرغام: روحة بلا ردة
والله يرجعوج علية يوم ثاني وفوكاج فلوس بعد
رحاب تضحك: خطية على كيفج وياهة
ام ضرغام : ما تشوفيها شلون صوتها عالي والسانهة طويل خية ولا جنها بنية الله عليج شوفي ملابسها تلبس مثل اخوانها كلة مرقط ومشكك وبجايم ولادية عبالك ولد مو بنية
ميس: ترة عادي اذا ما عاجبتج رجعيني ترة انا ميت الف عائلة تتمناني
ام ضرغام : ولج توخرين منا لا ابتلي بيج
ميس: والله الا اكل لبيبتي خاجية عليج بس بيج تضربيني
ام ضرغام: هو شخربج غير جدتج مطلعة عينج وما ترضة احد يدوسلج على طرف

جنت اباوع عليهم واشوف نقاش الام وية بنتها وحنيت لايامي وية امي
مها: ياحلوة وين صفنتي يالله خفي ايدج ترة ورانة كومة شغل
هيام : هاي هي خلصت لف الدولمة وخالة رحاب راح تطبخهة مابقة شي
ريام: انطوني شي اسوي وياكم الهي نفسي والله تعبت من الكعدة
ام ضرغام: والله كلشي سامعة بس مال تعبت من الكعدة هاي جديدة
رحاب: ريمة يمة ترة جرحج بعدة ما طاب
ريمة: اي مو البارحة خالو راضي اخذني للدكتور وشال الخيوط وشاف العملية كال كلش زينة ونظيفة والجرح ملتئم
عفية خلي اني اسوي الزلاطة عالاقل
رحاب: يالله ماشي بس زلاطة مو اكثر
مها: هيام عفية تعاي شوية
رحت وراهة شوفي انتي عليج تنظيف الفوك غرف الولد وعمة رحاب والممر وياج همين وانا علية الاستقبال والصالة والكراج وغرفة بيبيتي (جدتي)
وميس الحمامات والصالة
ميس: راح اخلص ما بقة شي مو تدوسون الكاع
مها: اللهم صبرج يا روح
ادري شلون بالله انعزل ما ننظف والله علمود حظرتج مسحتي
ميس: والله انا هذا العندي اذا وصختي انتي وجهالج الكاع انتي تمسحينا هَـا وجهالج تلكيهم معلكتهم بالبنكة (المروحة)

هيام: هسة شلون بالله راح نكضيها سوالف والناس راح تجيً واخوج ضرار على جية يالله بنات شدو الهمة
ترة ما ضل عدنا وكت
سمعت صوت
الحجية خاجية : رحاااب
انتبهتت لخالة رحاب راحتلها للغرفة
لبست الشال الي اخذتة من ميس وسويتة على شكل ربطة حتى ما يضايقني بالشغل
واخذت سطل وصلة مسح ومعطر ارضيات ومكناسة وصعدت فوك والبنات كلمن راحت على شغلهة
الحلو بهذا البيت الكل يشتغل عبالك خلية نحل
بس همة بيتهم ما يتعب نظيف لان ماعدهم اطفال والاطفال الوحيدين همة اطفال مها يوسف وسيف

بديت بغرفة خالة رحاب وجانت نظيفة بس كنستها ومسحتها وعطرتها وطلعت وبعدها غرفة ضاري
يا يمة مفجرين بيها عبوة ناسفة ابن اللذين شنو السالفة غرفة فارة
الكنتور هوسة ومفتوح ونص الملابس طالعة والمجرات مهوسة والسرير حدث ولا حرج
اول شي فتحت الشبابيك وكعدت انظف والعن بي
خلصت التنظيف وطلعت السطل والمكناسة وسديت الباب واتوجهت لغرفة ضرار جانت كلش نظيفة وما تجتاج شي بس تنظيف بسيط ومسح اخشاب
خلصتها ورحت على اخر غرفة اخذني الفضول حتى ادخلها واشوف شنو بيها
غرفة ضرغام دخلت جانت غرفة رجالية بسيطة
جان بس السرير مخربط وانتبهت لمنشفة مشمورة على حافة السرير
باوعت لابتوب موجود عالميز قرب السرير
كعدت انظف واباوع على غراضه والعطور والمعطرات الي موجودات على ميز المرايا عبالك عدهم ازمة مال
عطور ابن اللذين هذا مخلص فلوسه عالمعطرات والعطور بس اوكفي لحظة بالله هذا شنو
لفت انتباهي عصارات وكريمات
صرت اقرة بيهن مال شنو
مرطب ما بعد الحلاقة سنفرة قبل الاستحمام
هله هلة خرب حظي حتى الولد احسن من عندج ياهيومة
شوفي شلون معتني بنفسه وبقيافته واني
يحظي رجيم ما اعرف شلون اسوي
فتحت المجر شفت كومة ساعات رجالية ماركة
خرب هذا شوكت لحك يجيبهم
اوف بس الصدك يعني هو يلوكله
اصلا ما استغربت هشكل تكون غرفته
كعدت انظف بيها ودخلت للحمام وصرت انظف والتهيت شفت ملابسه الداخلية معلكات استحيت
اقترب منهن
ههههه ما ادري شبية صرت حمرة
خجلت
رحت للكنتور وفتحته وصرت اشوف ملابسه شلون معلكات ومرتبات اوف حتى ملابسه تشبهه غامضة مثله شعجب اشو مابيهم الوان شبابية
جنت احجي وكمزت من سمعت صوت الباب انفتح
ضرغام: شتسوين هنا
هيام: اااا جنت انظف
ضرغام: وليش انتي الي تنظفين غرفنا
هيام: شنو قصدك من هذا السؤال
يعني حضرتك تستنكف مني او تخاف امد ايدي على شي من خصوصياتكم
ضرغام: انتي شنو سالفتج عقلج شنو بي بس ابيض واسود
لج هيام شكلي راح ابتلي بيج
هيام : ماعندك كلام بس التهديد
اجيت اطلع زمخ بية بصوت عالي
ضرغام: هيااااام لحظة
اتقدم علية ووكف كدامي
اول شي انا من احجي انتي تنتظرين اخلص كلامي يالله ترحين
وثانيا انا من رفضت انتي تنظفين الغرف مالتنا علمودج انتي اخاف نسببلج احراجات
بس قسماً بذات الله اذا هسة سألتيني شنو الاحراجات الزمج واخنكج
لان اكثر من هيج ما اكدر اشرحلج يا فهيمة
هيام: لا اني اسمي هيام مو فهيمة
ضرغام: لج تطلعين من كدامي لا والله ابتلي بيج

طلعت اركض وشهك بصوت متفاجيء
ضرغام: ولج غضب تعاي وين رايحة
التفتت عليه : هَـا شكو
ضرغام: ووجعا نزلي الدشداشة وعدلي شالج
نزلت باوعت لنفسي يبوووي طالعة نص سيقاني
عزة بعيني اي والله جنت مشكلة دشداشتي
ورافعتهة بوضعية التنظيف

هيام: يبووووو
ضرغام: اي يبوووو استغفر الله دروحي روحي وسدي وراج الباب
طلعت ونزلت جوة شفت البيت يلمع ومعطر وام ضرغام لازمة المبخرة وتفتر بالبيت شميت ريحة بخور العود تجنن
رحاب: هَـا هيومة خلصتي
هيام: اي خالة
رحاب: لعد يالله روحي بدلي ملابسج وجهزي نفسج علمود الخطار وضرار على وصول دخلت لغرفة ميس لان خطية فرغتلي خانة بكنتورها الي
وريمة ملابسها صارت وية كنتور بيبي خاجية
دخلت
رحت اطلعلي ملابس عدلت وجهي ومشطت شعري ورفعتة بالقراصة ولبست دشداشة كلش حلوة ومرتبة
باوعت بالمرايا
يبوووو صايرة ضيقة علية شلون اريد اضعف
اهيء
دخلت ميس : هَـا شبيج عافسة الوجه
هيام: اريد اضعف
ميس: اي صدك شعجب هشكل هاملة جسمج
هيام: والله مو بيدي عندي خلل بالهرمونات
ومن وفاة امي بعد تركت العلاج وما. راجعت
ميس: لعد ليش ما تحجين وية خالة رحاب تاخذج للدكتورة
هيام: استحي شكول يعني
ميس: ما عليج عوفيها علية انا احجي وياهة
هيام: تدرين اني جان جسمي كلش حلو بس بهاي السنتين الاخيرات زدت ١٥ كيلو فوك وزني
ميس: هو لو تردين الصدك يعني هو جسمج مو كلش اوفر بس تحتاجين الترشيق لان بعدج شابة ووراج زواج وولادة هذولي كلهم احتمال يزيدون وزن

ودك نقالي وجانت ميس اقرب الة مدت ايدهة وانطتني النقال
ميس: هاج اخذي نقالج يدك
منو هذا نبراس
جمدت بمكاني وسكتت
هيام: اااا
ميس: اذا شي خاص بيج ما تردين تحجين بي براحتج
ما اجبرج بس كل الي اريد اكولة الج لا تخافين مني
ما راح احجي بأي حرف ترة اني اعتبرج مثل اختي وان شاء الله الايام تثبتلج ما راح اكعد احجيلج بطولاتي واخلاقي شنو
هيام: لا مو قصدي اضم عليج
بس هذا ابن عمي
ميس: لعد ليش ما تردين عليه
هيام : احجيلج وما تكولين
ميس: اي كولي اسمعج
هيام: هذا نبراس واحد مسؤل بالدولة
من اتوفى بابا صار يتدخل بحياتنا وسوة روحة هو المسؤل عنا بس بمرور الايام صار يضغط علية اني وامي يريد يتزوجني بالغصب
ميس: شنو سبب رفضج للزواج منه
هيام: اولا هو متزوج وثانياً اني ما احبه
ميس: زين ليش ما تردين على اتصاله
هيام: مو هو وعمو احمد ما يدرون بخبر وفاة امي
اني ما كلتلهم اخاف يجون ياخذوني اني واختي منكم
لان ماما اجتي للبصرة علمودي خافت علية من عنده خاف يسويلي شي
لان هو باخر مرة هددني اذا ما اوافق ياخذني بالغصب
ميس: عزة بعينه ياكل تبن هي الدنيا سايبة لو على كيفه
والله بس احطه بحلك ابو وضرغام يسود عيشته
هيام: هو اني ليش ما احجيلهم لان اخاف تصير عركة
وتصير هوسة من وراي والولد يتأذون
سمعت صوت نغمة الرسايل
فتحت النقال وجانت رسالة من نبراس
(((لج هيام اذا ما تردين على اتصالي
اطلعج واوصلج لو جنتي بسابع ارض
ومن اشوفج اقري على روحج الفاتحة ))
ميس: عمة بعينه والله لو منج اودي هاي الرسالة وانطيها لابوي. وهو يشوف شغله وياه
هيام: لا ميس امانة عليج ما تحجين شي خلي هسة هو يمل من الاتصال ويكعد ويسكت ما يكدر يسوي شي
سمعنا اصوات
ميس: الظاهر وصلو الجماعة تعاي خلي اعرفج عليهم

طلعنا ورحت كعدت يم ريمة اختي بالصالة استحيت اوكف اسلم انتظرت خالة رحاب هي تعرفنا عليهم واني اباوع مجموعة نسوان وبنات اجوي لابسات عبي خليجية فاخرة وشالاتهم سود نفس دزاين العباية
ريام : حييييييل !!! وحدتهن تكول طاووس من القيافة والنزاكة
همست بصوت ناصي
هيام: لج عيب نصي صوتج لا يسمعونا شيكولون علينا ما شايفات
ريام: يبووووو ارييييييد
هيام: شكو شتردين
ريام: لج شوفي هاي جنطتها ماركة گوتشي
هيام: اذا ما سكتي اضربج على راسج راح تفضحينا
ريام: لااااا عاد لهنا وكافي ما اتحمل
خرب هاي منو الغزالة تكول للكمر كوم واني بمكانك
ريام بهمس: ميس ميس تعاي
اقتربت ميس من عدنا
ميس: هَـا شكو جنج حرامي تهمسين
ريام: هاي منو الرشيقة البيضة الي لابسة عباية مغربية
ميس: هاي بنت خالو فاضل رنا
سمعنا صوت خالة رحاب صاحتنا
بنات تعالو سلمو
رحنا اتقدمنا واني احس بالارتباك ما ادري ليش
رحاب : تعاي خالة هيومة سلمي على ام سجاد زوجة ابن عمي فاضل وهاي بنتها رنا وهاي بنتها الثانية رفاه
سلمت على ام سجاد وسلمت علية من ورة خشمها
واقتربت من رنا اجيت اباوسها اشو هاي بعدت راسها ومدت ايدهة وسلمت علية من ورة خشمها بتعالي وعافسة الوجه عبالك شامة ريحة مجاري
رحت على بنتهم الثانية رفاه جانت بعمر ريام
مديت ايدي اسلم عليها جنت مترددة
اشو هاي جرتني واخذتني بالاحضان والسلام الحار
هذولي شنو من عائلة غريبة. ( دنتو عيلة واطية اؤي )
ميس: مو عبالج خلصتي بعد وراج جيش كامل تسلمين عليهم
هيام : منو بعد
ميس: بيت عمة حمدية خالتج الجبيرة وعمة هيفاء
تصير اكبر من امج بسنة
يعني بختصار ترتيب عماتي يكون
حمدية ورحاب وهيفاء وهناء

هيام : الله يحفظهن لعد وينهم
ميس: بالطريق جايين
هيام : اي بس صدك ميس سؤال هاي رنا بنت خالج شبيها مريضة شي
ميس: لا ما بيها شي لا تخافين هاي ما يطكها عرج جنهة حصان بيت لاوي
هيام: هَـا شنو منو حصان بيت لاوي
ميس: لا تسأليني ما اعرفة منو بس جدتي خاجية دائماً تذكره كدامي اذا جانت تريد تذم احد كدامي
كالت جنة حصان بيت لاوي
تكول هاي قصة طويلة عودك من تكعدين. يمها خليها تحجيها الج
هيام: بس والله شايفة روحها شوفة
ميس: خلي تطير على نفسها والله لو تشوفيها شلون تسحل روحها سحل بس علمود ضرغام يعبرها بحجاية بس وين هذا اخوي تربات خاجية ما يگول للفلك ولك
هيام: هااا شنو
ميس: انتي شنو سالفتج كل حجاية والثانية جنج حمار بس هااا وهااا
هيام: انجبي انتي حمارة عيب انا اكبر منج
ميس: يا صلوات شعجب هاي عرفتيها
هيام: انجبي عاد مو كلش سويتيني كلشي ماافتهم بس والله المصطلحات مالتج غريبة حتى اهلج الي همة مربينح ما يستخدمونها
ميس: اي مو انا اهلي ما ربوني انا ربات الحجية خاجية مو ياهو الجان
هيام: يمة منج
سمعنا اصوات زلم وهلاهل
كمنا من مكانة وركضنا عالمطبخ
نباوع
ميس : يا يمة سودة علية ضرار اخوي طلعوه من المستشفى
رحنا التمينة يم باب المطبخ واباوع الزلم هوسة سمعت صوت خرفان باوعت مدو الخروف وذبحوه يم رجل ضرار حقيقتا ما كدرت اشوفة لان جانت هوسة وخبصة
انتبهت على الحجية خاجية شلون تطش الجكليت وام ضرغام تهلهل
جانو رجال هواية وكل شوية واحد يروح عالحجية خاچية ويسلم عليها ويبوسهة من راسها وهي تهلي وتصلي وتبارك
جنت واكفة وية البنات يم باب المطبخ
اباوع على ميس تبجي ومها تبجي التفتت باوعت لريم تبجي
همست
هيام : هَـا خير ليش تبجين
ريام: انقهرت على البنات يبجون
هيام: خرب حظي انتي عندج التضامن بكلشي حتى بالبجي
سمعت صوت خشن عاط عالبنات
كمزنا كلنا
ضرغام: هيييي دخلن جوة
يمة عيونة تجدح
ميس بصوت ناصي: يبوووووي عليك ضرغام هادم اللذات ومفرق الجماعات
اي خلينا نعيش اللحظة يعني لازم تجي تخربها علينا
دخلن البنات ودخلنا وياهم وخلينا باب المطبخ مفتوح ورحنا اتوزعنا بالمطبخ
بصورة عشوائية
شوية سمعنا صوت ضرغام دخل للمطبخ
ضرغام: شوفن سمعني زين هذا الباب اذا انفتح احرك البيت على روسجن مو تكولن ضرغام ماكال منا زلم وصوت ما اريد اسمع
رحاب: صار يا بعد عمتك انت روح وما عليك انا اتكفل الشغلة
ضرغام: تسلمين يالغالية
ام سجاد : شلونك خالة ضرغام
ضرغام اقترب منها وباسها من راسها : هلة خالة كواج الله
ام سجاد: كوة حيلك خالة وينك اشو ما تسأل علينا بعد ما كمنا نشوفك ونسمع اخبارك بس من امك
ضرغام: والله مشغول وما فارغ احك راسي وشوفت عينج صواب ضرار ما انطانة مجال نشوف دربنا
ام سجاد: تعالن يمة رنا رفاه تعالن سلمن على ابن عمتجن ضرغام
انتبهت لرنا كمزت من مكانها وراحت ركض لعند ضرغام تباوع عليه تريد تاكلة بعيونها اكل .. عابت هالعيون جبح
رنا : هلاو ضرغام شلونك بذات متكول بنت خالي واسأل عليها واباركلها اتخرجت من الكلية حتى ما كلفت نفسك تتصل وتهنيني او تشتريلي هدية
ضرغام : حقج علية لا تزعلين هديتج. تجيج ومن دبي بعد شتردين
رنا: تسلملي ضرغومي الوردة كلك ذوق
يمة هي تحجي وانا احس نار كامت تطلع من اذاناتي ما اعرف شجاني
ريام شبيج على كيفج وية الخضرة هلستيها هلس
هيام: لج سكتي شكلي راح ارتكب جريمة هنا بنص المطبخ
ريام : شكو يا ستار ليش
هيام: لج سمعيها شلون تتنعوص وتتدلع اعوع دقتني
ريام: وانتي شكو تدلع تتنعوص منو يمج
هيام: اتخبل من وحدة تسوي روحها مايعة واخر دلع احس بيها فالتة ما عندها اخلاق
وهذا الاستاذ فاتح الحلك من الاذن للاذن شبي جنة ما شايف بنات
ريام: وانتي شلج غرض اشوفها زايدة منج ابن عمتها وتدلع عليه وهي بنت خالة ويدللها انتي شكو بينهم
ضحكتيني والله اكو مثل يكول يالداخل بين البصلة وكشرتها ما ينوبك الا ريحتها
هيام: اووووف اي صدك اني شبية دايخة بيهم نارهم تاكل حطبهم
جنت اشتغل وادردم رفعت ردن الدشداشة للكوع وسويت شالي بوضعية الربطة
وصرت اشتغل
انطيتهم ظهري ما اريد اشوفهم كدامي يسولفون
سمعته طلع وسد باب المطبخ وراه
وراهة بربع ساعة اجوي بيت خالة حمدية وبناتها وخالة هيفاء وبناتها
رحت سلمت عليهن واخذني بالاحضان وكامن يبجن
حمدية: يايمة سودة علية بنات هنوة
وخالة هيفاء وكذلك
ما يشبهون ماما اتعرفت على بناتهم جانن حبابات
خلصنا تبادل السلام والاخبار وكعدو الكل يوم بيبي خاچية والتهو يحجون الظاهر صارلهم فترة ما ملتقين
ورة ساعة دخل ضاري وصاح : بنااااات وينكم خلي وحدة منجن تجي تنطيني طشت جبير نريد نقطع الذبيحة ووياكم
الجدورة الكبار مالت الطبخ والمشاعل همين
ام ضرغام: ميس كومي وية اخوج صعدي فوك تلكيهم بالمخزن
ميس: ما ما ماعلية ما اكوم اني اخر مرة حلفت بعد مااصعد
ام ضرغام: ولج كومي لا اجيج اطيح حظج
اعرف ميس من تعند خفت عليها لا تترزل
هيام: ضلي كاعدة انا كايمة اجيبهن
صعدت فوك للمخزن ودخلت وشغلت الضوة جان كلش ضعيف
انتبهت للمخزن متروس
فرش وسجاد وبطانيات وغراض هواي شفت المشاعل والجدورة الي كالو عليهن
رحت باتجاهن جانن كلش كبار ما اتوقعت هشكل كبار
قررت اول شي اطلع المشاعل وبعدين الجدورة ملتهية
اطلع وصلتهم يم الباب صادف جنت مندمجة
بس حسيت اكو شي ديمشي على جتفي جوة دشداشتي
عاااااااا اعرف هذا الملمس موغريب علية
يمةةةةةةةةةة عززززززةةة برص يبوووووو
صرت اصرخ وافتح بدكم الثوب اريد انزعة لان جاي يمشي على جلدي اتخبلت
ما حسيت الا على ايد جرتني
حيل
ضرغام: صوتج ووجع ليش هالصياح منا زلم
بس انا وين يا زلم يا بطيخ ياروح ما بعدج روح
هيام: برص برص جوة دشداشتي
ضرغام : ثبتي لحضة زاح طرف الثوب عن كتفي
اعععيع لزمة بيدة وشمرة بالكاع راد يكتله ملحگ عليه
اجيت اتقيء من الاحساس لما كان يمشي
على جسمي وبلحظتها اجتني حالة من الرعشة من التقزز من ورة ابو بريص
وكل ساعة احرك بكتفي ويكزبر جسمي
كعدت اتلمس بحسمي مثل المهووسة
مجنت منتبهة على حالي
ضرغام : كافي ولج خرب هذا اللسان الطويل يخاف من ابو بريص خرب بالح........
قطع كلامه جنت اتلمس بجسمي واباوع منا ومنا مثل المخبلة ما منتبهة عليه بس لفت انتباهي هدوء ضرغام رفعت راسي شفتة واكف كبالي متصنم
بمكانه رفع ايدة ومسح العرك من كصتة من ورة الارتباك وعيونة تريد تطلع انتبهت على مكان نظرتة دنكت
ياااا يمة عزة بعيني شكد غبية شفتة بسرعة دنك ودار وجهة بس بهاي الاثناء اجتي
ام ضرغام : هيام وين صرتي شنو نمت........

وكفت بمكانه مصدومة شافتنا واكفين سوية يم باب المخزن
الي يشوفنا راح يفهم منظرنا غلط
جان ضرغام واكف قريب علية ودكم ثوبي الي على صدري كلها مفتوحة وجان صدري واضح
اثنينا واكفين بموقف الشبهة
انتبهت على روحي ولميت ثوبي على صدري وعيوني مفتوحات على وسعهن اتمنيت الكاع تنشك وتبلعني
باوعلي وشافني اجيت ابجي لان دموعي اعلنت عن النزول
رجع للخلف بارتباك
ضرغام: احم لا تسويها فلم ترة مصار شي
هو ابو بريص
حسيت بي ما يريد يحرجني بس بعديش بعد خراب مالطة
التفت على امة
ضرغام: احم يمة صيحي ضاري خلي ينزل الجدورة الكبار وياي
راح شال واحد من الجدورة الكبار ونزل بي جوة
وبقيت اني وام ضرغام
جانت تباوع علية وعبونها تريد تطلع من مكانها من اثر الخزرة
يمة تخوف حيزبونة الشريرة
اقتربت مني وحجت بصوت ناصي
ام ضرغام : شوفي ولج وسمعيني زين يا بنت هناء ديري بالج تفكرين تحطين عينج على ضرغام والله اطين عيشتج
ما يشرفني ابني ياخذ وحدة امها نهبت وشردت فاهمة
ارتديت للخلف خفت منها ومن تهديدها وكلامها القذر
هيام: ما يحتاج تحجين هشكل ترة انتي فاهمة الموضوع غلط
ام ضرغام: شنوحبوبة يعني تجذبين عيوني
كارصة بأبني وفاتحة ثوبج وكاعدة تغرين بالولد
ضرغام : ام ضرغااااااااام شنو هذا الحجي
ام ضرغام: شعندك صعدت مرة ثانية جاي تكمل الي قطعتة عليكم لو.......
ضرغام: يمةةةةة شنو هذا الحجي عيب عليج انتي مرية حبيرة والمفروض متحجين هشكل بحقي وبحق هيام
ام ضرغام: خير يمة ضرغام تقشمر عليمن
ضرغام: ام ضرغام ترة صدك راح تزعليني منج وتعرفين زعلي ثكيل
جاي تشككين بغيرتي على اهل بيتي
ترة انا مو لهلدرجة قليل اصل وما عندي غيرة وناموس
انتبهت عليها ارتدت وحست على غلطها من شافت غضب ضرغام
ضرغام: يمة ترة هيام عرضي ما مقبولة منج تشكين بية وبالبنية
راح اكلج الصار لان انتي عقلج تعبان ويحتاج افهمج الموقف
حجالهة الموقف كلة وظلت ساكة ما حجت شي
هيام حجيت بصوت ناصي: اني راح انزل طلعت المشاعل والجدورة
صرغام: نزلي وانا راح انزل الغراض لان استاذ ضاري ما ادري وين اختفى
نزلت ورجلية ترجف والموقف ظل معلك بتفكيري
وصرت اتحرك واشتغل واساعد البنات واحجي وية خالاتي وانطيت ريام علاجها واني عقلي بغير مكان
ما اعرف شنو ديصير بية خليط من المشاعر المتضاربة ارتباك خوف غرابة ما ادري اني يمكن من بعد هذا الموقف المحرج راح اوكع مريضة ياربي ليش دائما اكون بموقف محرج كدامه
صار وقت الغدة والكل اتحزم
الشباب صارو ينقلون الاكل عالاستقبال
رحاب: بنات انتن طلعن من المطبخ خلن بس احنا الكبار نصب حتى الولد يكدرون يدخلون عالمطبخ وينقلون الاكل
كلنا انسحبنا وكعدنا بالصالة
(((((((((()))))))
جنت نايمة بفراشي يم سرير ريمة
وجانت الساعة ١١بالليل احس بعظامي متكسرة تكسر من الشغل ولو مو بس اني اباوع على الشهيدة ميس النايمة بصفي
فاتحة حلكها وتشخر خرب فضحتنا اين الانوثة
حقها اليوم طاح حظها بالشغل الكل تعبان
خطية حتى مها تعبت اجة عليها زوجها اخذها هي واولادها كالت بعد شهر ما اجيكم من ورة هالكراب
الشفتة اليوم انام اسبوع
كل ساعة يرجع صورة الموقف المحرج الي صار بيني وبين ضرغام حلفت بعد ما اراويه وجهي
وفعلا من الظهر لحد ما صار الليل ما شفتة
والطاهر هو همين مثلي ضايج من الموقف لان اليوم من دون الايام ما اجة سلم على الحجية خاجية ولا كللها تصبحين على خير مثل كل يوم
او يمكن بعده مشغول بالخطار لان همة لحد هسة جماعة ضرار ماكو ما انقطعو عن الزيارة جانو على توافد مستمر
حتى الولد ما كدرنا نشوفه ولا نسلم عليه اصلا خطية نزلو سرير ابو النفر وخلوه بالاستقبال علمود يتمدد عليه ويستقبل الخطار الي جايين يتحمدوله السلامة بنفس الوقت
شفت ريمة كامت ونزلت من السرير
هيام: هَـا ريمة وين
ريام: اريد اروح للحمام
هيام: روحي وجيبيلي وياج ماي بطريقج
تمددت على ظهري وجتني ضربة من الاخت الي بصفي بس اريد اعرف هاي اللزكة ليش عايفة غرفتها
ومهجولة روحة ولاحكتني على هالفراش
ابتسمت على شكلها ميس كلش عفوية وطيبة وحبوبة
بس امهم اليوم كلة صارت بس تخزر بية يعني كلام ضرغام كلة ما كدر يقنعها ببرائة موقفنا
ما اعرف شنًو اسوي سبق وان خالة رحاب حذرتني منها ما اكدر احجي اي شي ولازم اسكت
لان اذا فتحت حلكي بحرف راح تكلب علية السالفة
كلها براسي احسن شي اسوي مثلما كالت خالة رحاب اسمع منها واسكت عليها ما تكدر تسويلي شي ومنا ورايح اتجنب ضرغام واحاول بقدر الامكان ما اخلي طرقنا تلتقي
عدلت المخدة وفجاءة سمعت صرخة مفجوعة

: يمة عزة بعيني هذا صوت ريمة

يتبع