رواية تائهة بين اروقة الماضي الفصل الرابع عشر 14 - بقلم الكاتبة نهى

🌷🌷🌷مساء الانوار والسرور عليكم يا اجمل قراء🌷🌷🌷

تائهة بين اروقة الماضي
بقلم nuha-d-h

جنت نايمة متمددة عالفراش بالگاع قرب سرير ريام
ما قبلت انام يم ميس بغرفتها واترك ريمة لوحدها خاف تحتاجني بالليل
خطية ميس جابت فراشها وفرشت يمي بالكاع بغرفة الحجية خاچية
الكل نام واني ما كدرت انام
كلة من ورة كلام زوجة خالو راضي
قهرتتي من سألت الحجية خاجية عن وجودنا بالبيت
عبالك احنا عار وتستحي تطلعنا للناس
بس والله ارتاح گلبي من ردها خالو راضي
((((()))))
راضي: خير ام ضرغام شنو هالسؤال الغريب
ام ضرغام: لا مو الكل يدري بهناء من نهبت ااا قصد شردت وية واحد ابوك الحجي كال بوقتها هناء ماتت
يعني هسة اذا اجوي حمويني وزوجاهم وحمواتي
وازواجهم شراح نكللهم هذني منو
راضي : نكللهم هذني بنات اختي هناء
وخلي واحد بتجرء ويفتح حلكة بالموضوع الا اخلي يحرم يعتب باب البيت سامعين
وخلي حاضركم يعلم غايبكم موضوع هناء منتهي
وما اريد واحد يجيب سيرتها بالشينة
وانتي حليمة تسمعيني زين هاي كدام الكل خلي
اسمعج تكولين هناء شردت
قسماً بذات الله اكسرج تكسر وادز ورقة طلاكج وراج لبيت اهلج وما يرفلي جفن
زمخ بيها بصوت خشن
: فااااهمة
ام ضراغام بأرتباك : اي اي يابو ضرغام
تم ماراح تسمعلي صوت بس انت لا تضوج وتقهر
بروحك ترة گلبك مو زين عليك تتنرفز
انتبهت لخالي عاف الاكل وكام متنرفز
راضي: حتى زقنبوت ما اريد طفحي انتي لوحدج
كام نفض ايده من الاكل وكام
ما اعرف ليش حسيت بالذنب
يعني لوما احنا موجودات جان ما صارت عركة بين
خالو وزجتة
ام ضرغام: سودة بوجهي كلة من وراي كام
الحجية خاجية: ما دامج تعرفين بروحج غمة ورعنة
شعندج فتحتي حلكج
شوفي ترة انا اكتفيت برزالة راضي الج
ولو ما حاجي ومطيح حظج جان انا بنفسي مسحت بيج الكاع
وما اسوي حساب لا لعمرج ولا اكول خطية ولدها بطولها وكدامهم اهينج فاهمة ولج
احنا نحجي عن هناء اي
بس انتن الچناين اشك حلكها الي تجيب طاري بتي
حتى لو بحرف سامعة ولج
باوعت لحليمة زوجة خالو راضي
هزت راسها بموافقة : صار يمة الحجية اهم شي رضاكم عني
انتبهت عالحجية خاجية صاحت : ميسة تعاي يابعد جدتج اريد اكوم
كامت ميس من مكانها بسرعة وراحت لعند الحجية
خاجية وساعدتها حتى تكوم وانطتها عصتها
وراحت وميس لازمة ايدها
الحجية خاجية: رجعي يمة كملي غداج انا اروح اغسل لوحدي
ميس : لا حبوبة اروح انطيج المنشفة
الحجية خاجية: لا ما يحتاج ردي سالمة لمكانج
رجعت وكملنا اكل واباوع لرحاب وحليمة ظلت تنافخ
ادري بيها مخنوكة من عدنا
حمدت الله وشكرتة ريام موهنا
جان كامت تبجي لان هي مو مثلي
ريمة كلش حساسة
بس والله اتمنيت اكوم اخنكها من جابت طاري ابوي و امي وسوتهم عبالك ناس جايين من المنزول (بيوت الدعارة)
بس الله نطق خالو راضي وبرد كلبي
بس لحظة هو ليش هشكل يتعامل وياهة
ولا بعد خاجية همين مثله اتصرفت وياهة
بتجبر
وهي شعندها ويانا اني واختي وليش تضوج من عدنا
هي حتى ما لحكت تشوفنا وتتعرف علينا
بس الظاهر اكو سبب يخليها هشكل تضوج من عدنا
كملنا الغدة وصرت اساعد البنات
جنت مترددة اساعدهم اخاف زعلن علية لان كامو يحجون على امهن والسبب امي
بس هنة ابد ما حسسني بشي عادي
بس جانن ضايجات علمود امهن
جنت انقل بالمواعين من الصالة للمطبخ
سمعت مها وميس واكفات عالسنك ويغسلن الصحون
مها: والله انقهرت على امي هي صحيح جرحت ابوي بالكلام باعتبارها اهانت اخته بس ابوي ما قصر وزاد عليها
بالاهانة بقاطات والله كسرت خاطر شكلة ابوي ما راح ينسى
ميس: مها عفية سكتي احنا مالنة شغل هي امج غلطت
وكدام منو كدام الحجية خاجية وراضي شلون ثنين
هي حتى ما سوت حساب للبنية اليتيمة الي كاعدة ويانة عالاكل اذا سمعت راح تنقهر على امها
تركتهم ورجعت للهول ما ردت اتسمع لكلامهم
عيب مو من طبعي
صارت خالة رحاب بوجهي
رحاب : تعالي شربي ويانة جاي انا والحجية واخوي راضي
هيام: بالعافية ما اريد اني اريد اروح اشوف ريام اخاف كعدت وتحتاج شي مني
ما ردت اكعد وياهم احس اكو بالجو توتر والكل مشدودة اعصابة
حقهم اكو جرح قديم راح ينفتح بين العوائل
وسمعتهم راح تصير على كل لسان
من ورة امي

دخلت على ريام وبيدي العلاج
والماي
هيام: هَـا ريمة صحي النوم
ريام بكسل : اوووف شكلي اتعودت عالراحة
قدمتلها الدوة والماي
هيام: يالله هاج سمي بالاول وشربي دواج
اخذت علاجها وشربت وراه الماي
ريام: الحمد لله
هيومة شنو صاير برة سمعت صوت صياح
هيام: ماكو شي الولد بينهم يحجون احنا ما علينا
ريام : اوووف والله احس بالضوجة
اريد اكوم واتحرك براحتي واشوف البيت الي راح نعيش بي واحجي وية البنات واولادهم
احس فايتني شي
هيام: اهووو على فضولج المايخلص
تلحكين يطيب جرحج وتشفين وتكومين تفترين بالبيت مثل الناعور
ريام: على طاري الفضول يعني تخيلي لو اني موجود
هناك بوقت الصياح الي صار بين الولد جان عرفت شنو سبب العركة وجان كدرت اجيب اخبار كل واحد انذكر اسمه بالعركة هَـا شلوني مو انفع اصير المحقق كونان
هيام: انجبي ريمة ديري بالج الكفج واشوفج تتسمعين لاي واحد بهذا البيت صدكيني اطيح حظج بطليها لهاي
العادة عيب شنو تردينهم يكولون بنات هناء مو مؤدبات وامهن ما عرفت تربيهن عدل
تقبلين واحد يجيب سيرة امي بالشين
ريام: لا والله مو قصدي بس والله تدرين بية عندي هذا الشي مثل الهواية فضول البحث والتنقيب عن الاسرار وغيرهن احس روحي بمهمة بس هذا كل ما بالموضوع
هيام: بس تدرين غيرج راح يفسرها غير شي وراح يكول عليج فتانة وجاسوسة
ريام: يمة منج اكلتيني اكل بكشوري
حسستيني بالاستخبارات كاعدة
هيام: لا والله ريمة احجي صدك مو شقة
ترة الناس انعم الله عليهم استقبلونا ببيتهم رغم الماضي
الاسود قررو يتغاضون عنة وياخذونة نعيش عندهم
على حساب راحتهم وحريتهم بداخل البيت
ريام: شنو ليش قابل احنة راح نربطهم بحبال ونمنع عنهم الحركة
هيام : ريمة انتي مو صغيرة وتعرفين كلش زين ان لكل بيت خصوصيتة وتعرفين شنو معنا الخصوصية
معناها اسرارهم ما تطلع برة البيت
اولادهم الشباب الي جانو ماخذين راحتهم بالبيت وبالكلامً والضحك واللبس بداخل البيت
بحرية محد يتحكم بيهم لكن هسة بوجودنا هنا اني وياج وجودنا راح يقلق حياتهم ويسلب راحتهم
راح يتقيدون من يكعدون يدارون كلامهم
وكعدتهم وحتى بملاسهم راح نقيدهم
ريمة : ملابسهم شنو ما افتهمت
هيام: اي مو جاي احجي وية حمار
لج عوبة بابا الله يرحمة مو جان بالبيت مرات يفتر بس بالبجامة والفانيلة الحفر ومرات من يرجع من الدوام مو ينزع ملابسه بالهول وامي تجيبلة الكلابية
يعني اني اقصد مساحة الحرية
همة هم شي اكيد مثل بابا كلهم الرياجيل هشكل
ريام: اي والله صدك
هيام: يعني شفتي شلون من اكلج انتبهي لا تسترقين السمع كافي همة خطية راح يتحملونا وفوكاهم انتي
ريام: لا هاي هي بعد اكعد واصير عاقلة وحبابة
هيام : وعد
ريام: وعد علية ماكو تجسس
دخلت الحجية خاجية هيً وميس
جانت ميس لازمة ايدها وتمشيها
ووصلت للسرير
اني تلقائيا رحت ركض لسريرها وشلت الغطة على جانب حتى تكعد على الشرشف
باوعتلي
الحجية خاجية : الله يبارك بيج
والتفتت لميس
: جدة ميسة جيبي دواي لا انساه خليني اشربه
قبل لا اخذلي غفوة الظهر
راحت ميس للميز جان موجود عليه علبة مثل الصينية
وتصير بيها مجموعة ادوية شالتها وراحت يمها
احس بيها بعدها باردة ويانة وتتعامل بتحفظ
عبالك خطار
بس يالله ما يهم بعدنا بأولها
والايام الجاية ان شاء الله راح تعاشرنا وتحبنا وتحن علينا
اندكت الباب ودخلت مها
مها: هيومة عمة رحاب تريدج بغرفتها
هيام : هَـا وينها غرفتها
مها : تعالي وياي اني ادليج كمت من مكاني
اجيت اطلع وسمعت صوت
الحجية خاجية : هنوة
جمدت بمكاني وباوعتلها
انتبهت لمعالم وجهة جمدت
عرفت بيها فلت لسانها
: لبسيلج شي على راسج لا تطلعين هيج مفرعة
البيت بي رياجيل حشمي نفسج بالاول يالله تطلعين انتي جبيرة مو صغيرة واعلمج
هيام: اي بيبي صار بس ما عندي شال حتى البسة
اشرت على كنتورها
الحجية خاجية: روحي فتحي كنتوري تلكين بي هواي
شيلات اخذيلج وحدة ولبسيها وطلعي شوفي خالتج شتريد منج
رحت فتحت الكنتور وشفت سرة من الشالات
السود سحبت وحدة منهم ووكفت كبال المرايا ولبستها
عدل جانت شيلة مال نسوان كبار بيها قرنصة بالطرف
اباوع لروحي
ميس : صرتي جنج ام صبيح ام السمج هاي الي تجينا تبيعلنا سمج (السمك)
ريام: هههههههه صدك قوية
الحجية خاجية : هاي الشيلة الما عاجبتجن هاي خيوطها من البريسم(خيوط الحرير) شيلة بريسم غالية مو رخيصة
التفتت عليها وحجيت
هيام: هَـا بيبي شلوني
باوعتلي : اعووع تخوفين يلا دروحي تحركي لعبتي نفسي خفت لهل العيون وبلة
دنكت بخيبة
ميس: بوية راضي... والله عليج بياض خرب عبالك كيمر
الحجية خاجية : ولج العوبة كولي ما شاء الله تبارك الرحمن عمة بعينج ان شاء الله
كولي امين
ميس: يمة على كيفج خاجية اكلتينا بكشورنا
لا تخافين ترة احنا ما نحسد ادري بيج صارلج ساعة تعيبين عليها كدامنة حتى تطردين عيون خاف نحسدها
وهاي سوالفج ما تعبر علية
انتي حبوبتي وانا اعرفج زين عاجنتج وخابزتج على ايدي
باوعت للحجية خاجية لزمت العصا وشمرتها على ميس
ووالاخت طكتها ركضة وما نشوف الا غبارها
الحجية: الله يلعن بليسها مو لسان بنت حليمة الملعونة كون اكسر رجليها اليوم ما اطلع خاجية
طلعت ورة مها واني اضحك على خاجية
وتجبرها الممزوج بالقسوة والغموض المحكوم
هي لوحدها عالم كامل متكامل صعب الدخول الة
وما تنحزر بشنو تفكر وما تعرف هل يا ترى هي تحبك
او تكرهك
رحت لغرفة خالة رحاب
فوك بالقاط الثاني جانت مها تمشي
وتأشر عالغرف
اول غرفة عاليمن كانت لضرار
والثانية لضاري
اما الي بنهاية المرر فكانت لضرغام وبصفها غرفة خالة رحاب
بس لحظة رحاب شنو عايشة هنا ليش هي مو متزوجة
دكيت الباب
رحاب: اتفضل
هيام: زاد الله فضلج
دخلت شفت عمة رحاب صدقت وسدت كتاب القران وباستة وحطتة على كصتها وخلتة عالميز الي بصف السرير جان وجها بي نوع من الحنية والدفو
مو لان تشبه امي لا بس الواحد من يباوع عليها يحس بالاطمئنان
مها: يالله عمة تأمرين على شي ثاني قبل لا اروح
رحاب: لا يابعد عمتج عساج سالمة
طلعت مها وسدت الباب
رحاب: تعالي خالة هيومة شعندج واكفة يم الباب جنج طالبة غايبة من الصف
اتقدمت منها وكعدت يمها عالسرير
باوعتلي ولزمت ايدي ومسحت عليها
رحاب: تدرين انا ليش دزيت عليج
هيام: لا والله ما اعرف

رحاب: انتي واختج جديدات على هذا البيت
ولازم واحد بينا يفهمكم ويعلمكم شلون ماشي نظام هالبيت طبعا لكل بيت له قوانين و جبير يحكمة تفتهميني شنو اقصد
هيام: اي خالة افهم عليج
رحاب : شوفي هيومة انتي جبيرة هذا البيت بيت امي خاجية الله يطولنا بعمرها
وهي الامر الناهي بهذا البيت وكلامها يمشي عالكل
شكد تشوفينها قاسية بس هي عمرها ما ظلمت احد
انا اعرف كلش زين هناء عرفت تربيكم تربية زينة واخلاقكم حميدة وشي اكيد علمتكم عالاصول والي يصير والما يصير
هيام: اي نعم
رحاب : يمة هيومة اريدج منا ورايح تلبسين شال من اولاد خالج راضي ومو بس همة كل واحد مومحرم عليج تلبسين منة الحجاب
يعني عمامج خوالج هذولي حلال تكعدين يمهم بدون حجاب اما اولاد هم واجب عليج تلبسين منهم الشال على راسج وكون ملابسج محتشمة
تدرين البنية كلما زاد سترها زادة منزلتها وقدرها عند الله وعند الناس
جانت خالة رحاب تحجي وتوصي بكلام هادي يدخل النفس ويطمنها
فعلاً ارتاحلها كلبي
رحاب تكمل كلامها : اليوم خو ما ضجتي من حليمة مرت خالج
هيام : اجذب عليج اذا اكلج ما انقهرت من كلامها
بس ما يصير احجي وخالو بنفس الوكت ما قصر
اي صدك عمة اتذكرت هي ليش هشكل تعاملنا مع العلم هاي اول شوفتها النة يعني مجانت تعرفنا
رحاب : هاي سالفة طويلة
راح اكلج هي ليش هشكل تتصرف وياكم انتو بالذات
هيام : ليش
رحاب: لان امج قبل لا تروح وية ابوج وتتزوجه
كانت مخطوبة لابن عمها فاضل بالغصب
وهناء تركتة وراحت اتزوجت غيره وهو بيومها
اتخبل وحرك الدنيا حرك لان مو شوية
خطيبتة تهجرة هاي تعتبر عار وجرحة كرامتة وكبريائه ورجولتة
هيام: اي ما افتهمت حليمة شنو دخلها بالموضوع
رحاب: اسمها عمة مو حليمة هنا بهذا البيت الجبير
لازم يحترم حتى لو هي قللت احترامها وياكم
ممنوع الصغير يرد ويجاوب واذا حاولتي تقللين من احترامها راح تثبتين نقطة سودة على هناء ما عرفت تربي
هسة افتهمتي
هيام: اسفة اعتذر بعد ما اعيدها بس بشرط
من تتحاوز على امي او على بابا اريد احد ياخذلي بحق اهلي بالله اني ما يهمني تحجي علية او لا اني اهم شي عندي ما تحيب طاري اهلي
رحاب: بدون ما تكولين احنا هنا ما نسمح لكائن من كان يجيب سيرة الموتة بالشين
ونحاول نذكر محاسن الموتى
هيام: بس صدك ما كلتي زوجة خالو شنو دخلها بالموضوع هذا كلة
رحاب: مو لان حليمة تصير اخت فاضل الي هجرتة امج
هيام: يا عزة اشوفها تريد تموتنا
رحاب: اي مو انتي حقج ماشفتي شنو صارت من مشاكل بينا وبين بيت عمي
وابوية الحجي اتنازل عن الشيخة لعمي ابو فاضل
وصارت مشاكل هواي غير قصة هناء
بس انتي الي يهمج تعرفين ليش حليمة معاديتكم
اما المشاكل البقية الي صارت بينا وبين بيت عمي
ما تخصج مو ضروري تعرفين عنها
بس هية كل الي اطلبة منج ان تتحملين
السانها وتسكتين عنها حتى لو تستفزج ما عليج منها
لان هي راح تحاول منا ورايح تجركم باللسان
حتى توكعكم بالحجي وتصيحكم كدام امي الحجية
فاريدج تصيرين سباعية وسمعي منا وطلعي مناك
جانت اتأشر على اذاناتها الثنين
هسة ما راح ادوخج بالكلام خلينا كل يوم ناخذلنا جلسة نتبادل بيها المعلومات واذا عندج اي سؤال او اي استفسار يخص البيت او يخصكم انتي واختج
كولي سألي لا تستحين انا مثل امج
هيام : لا خالة شكرا ما قصرتي
رحاب اخذي راحتج تكدرين ترحين تسبحين وتناميلج شوية تذبين عنج تعب المستشفى
هيام: اي والله صدك عمة جبتيها بوكتها
رحاب: كلي لميس هي تدليج عالحمام وتنطيج الغراض
الغسول والمناشف
هيام: اوك خالتو
رحاب: ههه هاي اول درس لازم تكولين صار
مو اوك والاحسن تكولين ان شاء الله
هيام: ان شاء الله
رحاب: على فكرة الشيلة طالعة عليج تخبل

هيام : اهوو لو تسمعين الحجية خاجية شكد عيبت علية
يمة وشسوت بميس من كالت وجهي شكد ابيض
كامت تصيح عليها وتزرل بيها
رحاب: ههههههه امي ولا تبطل سوالفها والمشكلة كلنا
نعرف فلمها بس ما يفيد وياهة الي تخاف عليه من العين تكعد تكسر جناحاتة كبال الناس حتى ينشغلون عنة بمساوءه ويتركون محاسنه
هيام: يبوووو هاي شنو حجية خاجية طلعت داهية

رحاب: يالله روحي لا تدوخيني خليني اخذلي قيلولة الظهر روحي وسدي وراج الباب
طلعت واني ابتسم
جنت امشي بالممر
وسمعت صوت واحد جاي يصعد الدرج ويصفر بحلكه
كمل صعود الدرج وصار بوجهي
ضاري: ههههه خرب هاي شنو حسنة ام اللبن
شجابج علينا
هيام: اهوووو انت تكول حسنة ام اللبن
اختك ميس تكول ام صبيح ام السمج يا اخي وحدو ارائكم ترة دخت اني منو بيهم
ضاري: هههههه خرب بالحظ انتي صدك فلم
يعني ما ضايجة من التشبيه طلعتي ضايجة من التعدد
يابة ولا يهمج جنج غزالة
وعلي بهاي الشيلة طالعة جنج كيمر السدة
جنت اضحك بصوت عالي على كلامه
ضاري: بيوووو ابجي طين على هالضحكة
ضحكت
هيام: مخبل والله انت مو عاقل
ضاري: اهووو من زمان فاقد عقل
صرت اضحك كلامة يجنن

كمزنا من مكانة على صوت زمخة
: ضاااري
انتبهت على ضاري طفر من مكانه
ضاري بهمس: انا خوك اكلنا تبن. وحق الكعبة
رحنا بداهية

التفت ضاري وباوعت على ضرغام جان واكف ورة ضاري ومكتف ايديه ويباوع علينا الظاهر صارلة هواي واكف يسمعنا
ضرغام: ضااااري
ضاري: لا مو ضاري خياله
ضرغام: ولك شعندك لازم الدرج عن البنية وكاعد تدك سوالف وتتغزل ادبسز انت ما عندك ناموس
جان يحجي وية ضاري ويخزرني بعيونة
ضرغام : يالله انت كبل كدامي على غرفتك
وحسابي وياك بعدين
انتبهت على ضاري ما فتح حلكة بَـــأي حرف
مشة من يمنا وراح على غرفتة
اجيت اعبر من يمه وانزل
ضرغام: لحظة احجي وياج قبل لا ترحين
هيام اهووو : اتفضل
ضرغام : هيام ما يصير البنية تضحك بصوت عالي وية الرياجيل عيب وانتي صوت ضحكتج رنانة وملفتة للانتباه
هيام : هاي شوكت شفتني اضحك يم الرياجيل
ضرغام بنفاذ صبر: يعني بالنسبة للخروف الي جنتي قبل شوية واكفة وياه وتضحكين على كلامه مو رجال بعينج لو ما محسوب عالرياجيل بنظرج فهميني ترة ما جاي افتهم
اتصنمت بمكاني عززززةة
سكتت ماجاوبتة
ضرغام: هيام انا ادري بيج جاي تتصرفين على طبيعتج وبدون قيود ومالج قصد بيها
وعاذرج لان بعدج جديدة بس كل الي اطلبة منج ان تكونين حريصة على تصرفاتج منا ورايح
لان ضاري شاب وحالة حال اي شاب خاف يفهمج خطأ
وتصيرين بموقف محرج انتي في غنى عنه
هيام: اسفة
باوعلي بنظرة غريبة بحيث ما كدرت ابعد عيني عنة
ضرغام : هسة على كلٍ تكدرين تنزلين

نزلت واني الساني معقود من ورة كلامه واسلوبه
حسسني عبالك اكبر مني بقرن عايز بس يكلي باباتي
صيري حبابة عابت هو كلة على بعضه يمكن اكبر مني ب٨ سنوات
نزلت وتركت ضرغام راح دخل على غرفة ضاري والله العالم شراح يحجي وياه بس احتمال راح ياكل ضاري رزالة ناشفة وياخذ المقسوم

نزلت ودخلت على غرفة الحجية خاجية
جان خالو راضي كاعد يمها
ويحجي وياهة
راضي: يمة الدكتور اجل طلعة ضرار من المستشفى كال بعد يومين يالله اوقعله على خروج لان بعدها حالته ما تسمح لازم يبقى تحت الملاحظة
الحجية خاجية: يايمة ضرور وين جانتلك هاي
كون بية ولا بيك
راضي: اسم الله عليج يالغالية جعل يومي كبل يومج
لاتخافين عليه ضرار سبع
الحجية خاجية : اكلك يمة راضي هو شاف وجهة لو بعده
راضي: اي يمة شاف وجهه وكعد يسأل الدكتور هواي عن وجهة تعرفين مو شوية الواحد يشوف نفسة مشوه بليلة ويوم
الحجية خاجية : كول يالله هو زلمة والزلمة ما ينعاب
ولا يهزة هذا الجانب قابل هو بنية ويهتم بجماله
راضي: اي صحيح كلامج
ميس: يعني اروح اكل لامي تتصل على عماتي وعمامي وتكللهم ماكو عزيمة باجر
الحجية خاجية: جا اخوج باجر ما راح يطلعونة بعد عليمن مسوين غير علمودة
((((((((((((())))))))
كعدت من الصبح متكسرة من نومت الكاع والبارحة الليل كلة اتكلب ما اعرف انام عالكاع
انتظرت احد يكعد
اني متعودة اكعد من الصبح ببيت اهلي
صرت اتكلب بالفراش اريد ميس النايمة بصفي تحس وتكعد ماكو
استحي اطلع من الغرفة لوحدي
كعدتها بصوت ناصي
هايم: ميس ميس
هييي انتي ميس
ميس بكسل : همممم
هيام: عوبة كعدي اريد اكوم اروح للحمام محصورة
واريد اكوم اسوي ريوك لاختي ريمة علمود انطيها علاجها هم يالله
لان راح يفوتها وقت العلاج
ميس: اهوووو يبوي عليج شنو انتي ذبانة من الصبح لزكتي اكو وحدة تكعد من الصبح
هيام: ولج الساعة ب٨ هم يالله ترة
ليش انتو شوكت تكعدون
ميس: البيت يكعد من وكت بس انا اكعد متأخرة ما علية بيهم لا تعبين روحج وياي ما اكعد لو مو تحجين لو تفجرين صاروخ يم راسي ما تحرك من مكاني فلا تعبين نفسج وياي حطت المخدة على راسها وانطتني ظهرها ..عابتلج
رفعت راسي من الفراش صدك شفت بيبي خاجية ما موجودة بالفراش
كمت وبدلت دشداشتي بدشداشة مستورة لان اني من انام البس دشداشة ميدي قصيرة ولبست شيلة بيبي
رحت طلعت من الغرفة
على كيف مترددة باوعت كان هناك باب البارحة ودتني له ميس من ردت اغسل جان باب يدخلني على ملحق بي الحمامات ولوندري وغسالة ومناك مغسلة عليها مراية كلش حلوة باوعت منا منا ماكو احد
نزعت الشيلة وعلكتها عالتعلاكة غسلت وجهي وفتحت شعري من القراصة حتى اعدله جنت امشط واباوع عليه ماشاءالله صاير طويل واصل لحد وركي
سمعت صوت الباب انفتح فجاءة التفتت صار بوحهي ضرغام : اتصنم بمكانه
كملت لف شعري بالقراصة ورفعت حاجبي شكو على شنو يباوع
انتبه لنفسة ودار وجهه
ضرغام: اسف ما عبالي واحد هنا دنك راسة
بحركة تدل على غض البصر
وفات من يمي وراح عالمغسلة يغسل
جانت الشيلة بصفه
رحت بصور طبيعية اخذها من يمه التفت علية وخزرني
ضرغام بشك : خير شكو
ما افتهمت عليه اتقدمت عليه ومديت ايدي ابتعد عني
وهو فاتح عيونة على وسعهن ما مصدك الي جاي اسويه
هذا شبي
سحبت الشيلة من التعلاكة الي صايرة وراه
ولبستها كدامه
رمش بعيونة
ضرغام: الله يلعن بليسج
ولج انتي راح تجيبين اجلي قبل يومة
هيام: هسة اني شسويت
ضرغام : هالمرة ما سيوتي شي يالله لا تكعدين تحققينً وياي
راح وعافني
رحت دخلت للمطبخ شفت الحجية خاجية وراضي وام ضرغام وخالة رحاب وضاري كاعدين يتريكون على ميز الطعام
صبحت عليهم وكعدت يم خالو راضي وضاري
همست يم ضاري
هيام: البارحة شلون تعوفني بروحي اواجه مجرم الحرب لوحدي طلعت امير بوخة
ضاري: يا روح ما بعدج روح
شنو بايع روحي هذا ضرغام مو حي الله ياهو الجان
خرب البارحه اكلت طن رزالة
بس تعاي حبيت هاي مال مجرم حرب
سمعنا صوت ضرغام
عدلنا كعدتنا اني وضاري عبالك محد يعرف الثاني
ههههه خرب صدك الخوف يعدل الشوف
كعد يسولف وية الحجية وابوه
جان نقالي يمي على ميز الطعام
دك باوعت شفتة نبراس يتصل بك
انقبض كلبي وانخطف لون وجهي
ما رديت عليه وانطيتة رفض
رجع مرة ثانية اتصل
هم ما رديت وانطيتة رفض وحطيت النقال عالصامت
رفعت راسي واجتي عيني بعيون ضرغام
يباوع علية بتمعن عبالك يريد يدخل لعقلي ويقرة افكاري
طبعا محد انتبه علية من سويت النقال صامت
بس الاستاذ ضرغام ما عبرت عليه الحركة
خايفة ارد على اتصال نبراس شي اكيد راح يكعد يسألني على امي وموعد الرجوع
(((((((())))))))

انقطع علية حبل الذكريات سمعت نقالي يدك
جان المتصل لجين رديت
هيام : الو هلو لجين
لجين: حٍٍِْــًبٌٍـــِٓېٍٓ هيومة بس توصلين رمشيلي
لان اني وريتا وبلال راح نتتظرج بكراج بغداد
ننتظر هناك
هيام: ان شاء الله لجونة راح اتعبكم وياي
لجين: شلونج خو ما تعبكم الطريق
هيام : لا والله زين بس اني لزمني دوار السفر
لجين : يالله حياتي اخذي راحتج
توصلين بالسلامة

يتبع