رواية تائهة بين اروقة الماضي الفصل السادس عشر 16 - بقلم الكاتبة نهى

السلام عليكم احبيتي القراء هذا بارت مفاجئة لعيونكم الحلوة مثلما وعدتكم
مع تحيات كاتبتكم المخلصة نهى

🌷🌷🌷🌷🌷
تائهة بين اروقة الماضي
بقلم الكاتبة nuha-d-h

كانت الحجية خاجية كاعدة يم راس ريمة وتقرة عليهة ايات وتنفخ بوجها
الحجية خاجية: ميسة روحي جيبي طاسة الخلاص
انتبهت لميس جابت طاسة من النحاس
بيها ماي وجان منقوش عليها ايات قرآنية
انتبهت للحجية خاچية قرت عليها الايات وكالت كعدنها عدل خلي اشربها
تكيت لريمة الي كانت ترجف مثل المفزوعة
وقربت الطاسة من شفايفها خطية انهبطت
((((())))))
من سمعت صرخة ريمة رحت اركض على صوتها
شفتها واكعة بالكاع وانتبهت لواحد كان قريب عليها ويضرب على خدها شكلة كان يريد يوعيها كانت اضوية البيت مطفية ما انتبهت منو سمع صوتي وابتعد وانطاني ظهرة
: اكلج هاي اختج بس شافتني اخترعت
حسبالهة شايفة جني
بس والله ما جان قصدي اخرعها هي طلعت بوجهي
فجاءة
بالله شوفيها شبيها
عرفتة هذا ضرار خطية منطيني ظهرة عبالة راح اخاف منه
كعدت اضرب على وجهة واجتي بيبي عالصوت
ووياهة ميس الي جانت تفرك بعيونها
رشيت مي على وجهة وصحصحت شوية واخذناهة للغرفة
الحجية خاچية : شمالج فزيتي بوجه المسكين على الاساس هو ناقص قهر وانتي چلمتيه (زدتي عليه)
ريام: بيبي والله خفت هو طلع بوجهي فجاءة وخرعني

هيام : بيبي (جدتي) ترة ريمة اكبر خوافة
كمت من مكاني
اني رايحة اعتذر من عنده واسلم عليه اشكد عيب
هاي بدل ما نتحمدله عالسلامة
سبقتنا ست ريمة واستقبلته خوش استقبال
الحجية خاچية: اي جدة روحيله الله يكملج بعقلج
طلعتي صاحبة واجب وتعرفين الاصول
هيام: بيبي انا تربية هناء
شفتها جمدت حركة ايدها الي جانت تمسح بيها على راس ريمة
عبالك ذكرتها بوضعها
الحچية خاجية: جدة ميسة تعاي اخذي الطاسة

طلعت وتركتها عرفتها تتهرب من هذا الموضوع بس ما علينا شنو ورانة نصبر عليج ونشوف
طلعت برة ادور على ضرار
شفت ضوة الاستقبال مفتوح رحت بتجاهه
ودكيت الباب
ودخلت ما انتظرته ينطيني الاذن بالدخول
انتبهت عليه ارتبك وراد يدور وجهه
هيام: لالا ضرار لا تدور وجهك
ضرار : اخاف انتي هم تطلعين مثل اختج
خوافة

هيام: هههههه هي ريمة اكبر خوافة لدرجة تخاف من خيالهة
ابتسمت والتفت علية وسلم
باوعت لوجهة جان نص وجهة محروك والنص الثاني مجرح انكسر خاطري عليه
ضرار: هلة شلونج خوية والله مستحي منكم
هاي بدل ما اسلم عليكم واعرفكم بنفسي
كمت خرعت البنية كليلي شلون صارت
هيام: هلة بيك خوية والحمد لله على سلامتك
ما عليك بريمة لتضوج من تصرفها
ضرار: لا يابة شضوج منها
ههههه اصلاً هي هم حقها تخترع اذا انا بكبري اذا اشوف نفسي بالمرايا اخترع
مو نوب هي
اكلج سؤال هاي انتو كلكم هشكل حلوين من الله
جمال رباني
ابتسمت على كلامه رغم الي هو بي بس ما مهتم
شكل شخصيته قوية والتشوه ما مشكل عنده اي مشكلة
هيام: يالله اني اترخص اخذ راحتك
تحتاج شي قبل لا اروح
ضرار ببتسامة: لا سلامتج وفرصة سعيدة خيتي
هيام: انا الاسعد بسلامتك
طلعت وسديت باب الاستقبال
ورحت لغرفة بيبي شفتهم مطفين الضوة
اتوجهت على فراشي ونمت واني افكر بضرار وشكلة
وبضرغام وموقف اليوم المحرج
ونمت على هاي الافكار
(((((((()))))))))
عدة اسبوع وخلال هذا الاسبوع
صرت اتجنب ضرغام احاول ما اشوفه
وهو كذلك ساعدني
لان جان دائماً مشغول وطالع برة البيت مو مثل ضاري
وضرار
وبهاي الايام ضرار جماعتة ما عافوه كل يوم عنده يبقون لنص الليل يالله طلعون
وكل يوم يجي المضمد يضمد ساقة وكم جرح يعقمهم ويضمدهن
انتبهت لريام سوت كيكة
وزينتها
هيام: هاي المن الكيكة
ريام: هاي عربون صداقة واعتذار لضرار
على موقف ذاك اليوم
وفعلاً راحت ريام اخذتلة الكيكة
وصعدت بيها فوك لضرار
جنت اعزل بالمطبخ وراهة لان مسويتة هوسة
ورة عشر دقايق نزلت ريمة ووجهة احمر
مرتبكة
هيام: هَـا ريمة شنو شكلج عالكيكة
ريام: هَـا كلي شكرا يا جبانة
وووووو
رفعت حاجبي بشك : شنو كملي ووو شنو
ريام: استحي اكلج محرجة والله
هيام: هسة غير تحجي مو موتيني والله
ريام: انطيتة الكيكة وسلمت عليه واتحمدتله على السلامة
وهو شكرني وكال سبحان الي خلقج اشكد ابدع بيج من صورج
هيام باستدراج : اي وانتي شنو جاوبتي
ريام: كتله شكرا انتى الاحلى
هيام وكعت من الضحك على حجايتها خرب يومج يا ريمة ما لكيتي غير هذا الرد تجاوبين الولد بي

ريام: لج دسمعي هو شنو كال
هيام: اي وشكلح ولج احجي
ريام: كال هاي شنو جاي تجامليني لو جاي تقصفين جبهتي
عاد اني من الفشلة حبيت اصلح الموقف بس شكل اختج جابت العيد
هيام: ههههه ولج كملي شسويتي
ريام: كلتله لا والله شبيك انت والله حلو
هو جاوبني كلي
وانتي من زود جمالي اخترعتي وكمتي تصرخين واغمى عليج
عاد هنا اختج لعبت طوبة ونسيت نفسي
كلتله : لا عفية اسكت غير اجة يوكف كلبي من شفتك عبالي وحش والله اخترعت
هو خرب من الضحك واني انتبهت على زلة لساني
حطيت ايدي على حلكي وطلعت ركض من يمة
هيام : ههههه الله يلعن بليسج
لو ما رايحة تعتذرين وباقية عالموقف القديم احسنلج
شكلج اجيتي تكحليها كمتي وعميتيهة

))()))
وصار بمرور الايام ضرار ينزل جوة ويكعد ويانة ويحجي
ويانة وشوية شوية اتعودنا عليه وصارت علاقتي بي اخوية لان هو كلش محترم
بس انتبهت عليه تصرفاته تختلف وية ريام كان دائما يصفن بوجه ريمة
من تحجي واحيانا يكون يسولف ومن تمر هي من يمة يقطع كلامه ويظل سرحان يباوع عليها
والمشكلة اختي مو يمهة ولا منتبهة عليه
وملتهية وية ميس وهي تتصرف وياه مثل ميس تتصرف وية اخوانها
ادري بأختي ريمة تحب تعيش وتجرب حياة الاخوان
لذلك هي من تقترب منه بصفته اخوها
تحجي وياه وتتشاقة بس شكل ضرار
ضاعت علومة وية اختي الصغيرة
كان مبين من اعجابه بيها وعيونه فاضحاته
من يباوع عليها
صارت الايام تمر وصرت شاهدة على حب من طرف واحد

جنت بغرفة ميس ارتب بالملابس
دخلت ريام : وين ميس

هيام: ما ادري وينها
ريمة اوكفي لحظة اريد احجي وياج لا تروحين
ريام: شنو كولي شكو
هيام: تعاي كعدي
اجتي كعدت يمي وهي تباوع علية بتسائل
هيام: ريمة حبيبتي اريدج منا ورايح تنتبهين على تصرفاتج وية ضرار
ريام: ليش شكو سامعة شي ترة اني احسبة مثل اخوية
واتصرف وياه حالي حال ميس
هيام: لا حبيبتي بس انتي مو اختة
وانتي بنية جبيرة واخاف يفتهمج غلط
ريام: لا بالعكس اصلا ضرار كلش حباب
هيام: ادري بي حباب بس انتي منا ورايح خلي بينج وبينة حدود فاهمة
ريام: صار تدللين بعد تأمرين على شي
هيام: الله يكملج بعقلج
ريام: هههه صايرة تحجين مثل الحجية خاچية
هيام :بعد من عاشر القوم
اتعودنا على البيت وعائلة خالو راضي كدرنا نتوالم وياهم
بس ما عدا ضرغام
طبعاً طول هاي الايام الي عدت
ما شفت بيها ضرغام احس ناقصني شي بحياتي
بس ما اعرفة شنو هذا الشي
ابتسمت
اتذكر بذاك اليوم جنت شايلة السلة مالت الملابس
ونازلة من السطح بهاي الاثناء سمعت صوت ضرار
يصيح ميس رحت عليه للغرفة اشوفه شيريد لان خطية بعده هواي يحتاج للمساعدة حتى يرتب اموره
دكيت الباب ودخلت خطية لكيتة يريد يوصل للعكازة
مالتة جانت واگعة بعيدة عنة مد جسمه حتى يوصل دخلت جوة حتى اروح اجيبها
بس هو فقد التوازن ووكع على وجهه بالكاع
صدك انقهرت عليه رحت لعنده تلقائيا وصرت اسنده
وحتى يكوم بس الله يحفظه هو جسمه كلش ثقيل
ضرار: استغفرالله ما اعرف هاي وين جانتلي
والله ما متعود هشكل يصير بحالي
جان يحجي ولازم كتفي ومستند عليه ويباوع على رجله والايد الثانية ساندها على ميز السرير
خطية يتحرك بصعوبة وينافخ
ضرار: والله احس بروحي مشلول متقيد صدك طفرت روحي احس بروحي عالة على اهلي
لفيت ذراعي على خصره بصورة جانبية
وذراعة حاطهة على كتفي
هيام: كول يالله واحمد ربك واشكره على كل حال وانت
احسن من غيرك
اذا انت عندك رجلين بعدهن موجودات
غيرك اطرافه فقدهن بالحرب
ضرار: الف الحمد لله والشكر
على كل حال ابتسمت بوجهه
وهو ابتسم
ضرار: انتو دائما هشكل طيبات وية الناس لو بس وياي لان كاسر خاطركم
هيام ببتسامة : لا والله وية الكل احنا هشكل اريحيات
نتصرف على طبيعتنا
سمعنا صوت الباب انفتح التفتت
باوعت لضرغام واكف بالباب مصدوم
جمد بمكانه ما ادري شبي
رحت كملت طريقي واني ساندة ضرار وكعدته على السرير
ضرار: الف رحمة الله والديج نقذتيني
رحت شلت العكازات من الكاع وانطيتها لضرار
هيام: هاك الزم هذني خليهن يمك وبعد منا ورايح
من تكون بهيج موقف لا تجازف بروحك عندك نقال رمش الي لميس لاي واحد بالبيت واحنا نصعدلك
ضرغام : احم شكو شصاير
هيام: شلونك ضرغام
باوعلي رافع حاجبه
ضرغام: زين الحمد لله بس ماكلتو شنو شصاير
ضرار: وكعت واجتي هيام لحكتني وكعدت تساعدني حتى اكوم
ضرغام . اهااا وهسة شلون صرت انت مو كلت راح
تسجل جلسات علاج فيزيائي حتى يساعدونك على تحريك عضلة الساق
اي هو سجلت جلسات وبديت بيهم صارلي يومين
هيام: اني رايحة ضرار محتاج شي من جوة او مشتهي شي اجيبلك اياه
ضرار: لا تسلمين ما قصرتي وياي
طلعت ومشيت لنهاية الممر سمعت صوت ضرغام
ضرغام: هيام لحظة اريد احجي وياج
وكفت بمكاني جامدة
هيام: اتفضل اسمعك
ضرغام: هيام بعد منا ورايح من يصير هيج موقف تتصلين على اي واحد انا ضاري ميس امي اي واحد
ترة ما يصير المنظر الي شفته قبل شوية
كان جداً واكف
هيام حسيت اختنكت من الضوابط الي حاطهم علية
ما عرف شبية مدري اختنكت من بعده وتهربه مني
هيام: انت شنو قصتك وياي ماعندك غير هيام بالبيت
تعلق على تصرفاتها ترة والله مليت
عكد حواجبه وجرني ودفعني لداخل غرفته وسد الباب
ضرغام: اشو صايرة تعلين صوتج بوجهي وما تحترمين
هيام: لا معليت صوتي بس جنت اطلب منك ان تخفف عني الضغط الي دتمارسه علية بتصرفاتك
درت وجهي اجيت اطلع
ضرغام: لحظة ما تطلعين اكمل كلامي يالله
هيام: ماعلية اطلع
ضرغام: وحق الحق اذا اتجرئتي واتقدمتي خطوة ما تلومين الانفسج
هيام بقيت واكفة بمكاني
ضرغام: يعني حظرتج متونسة اخوي حاضنج وانتي حاضنته
شهكت وضربت على صدري مصدومة وااتسعت
عيوني : لك ضرغام شلون تحجي وياي بهذا الاسلوب
ضرار بنفسة حجالك الموقف وكدامك شفت العكازات بعيدة عنه شلون تتهمني هشكل
ضرغام: اهاااا يعني عندج الموقف عادي وكدرتي تتعايشين وياه ولا بعد عادي عندج ترجعين مرة ثانية
تساعدين ضرار
هيام: اي طبعا عادي وما بالي اي شي
شفتة اقترب مني وهمس قريب علية
ضرغام: چا ليش انا من يوم الموقف مالت البرص
احس بيج صرتي تتهربين مني وتتجنبيني
معقولة لهاي الدرجة ما تكدرين تتعايشين وياي
بلعت ريكي وحسيت ضربات كلبي زادت من ورة كلامه التفتت عليه وباوعتله
هيام : ااااا جان الموقف كلش محرج
ضرغام: وين الاحراج ليش تتهربين مني حتى خليتي الكل ينتبه على تصرفاتج ومن وراج صرت اكره ادخل البيت
اتسعت عيوني بصدمة وبرطمت
هيام: ضرغام معقولة اني هيج ثقيلة عليك
غمض عيونة وسحب نفس عميق
ضرغام: مو مثل ما انتي ترجمتي للموقف قصدي اضوج ادخل للبيت وانا اعرف اكو من ينزعج من وجودي هسة افتهمتي
فتح الباب وهسة تكدرين تطلعين
بس قبل لاتطلعين اريدج توعديني ترجعين مثل الاول هيام الي تتصرف وياي بطبيعية فاهمة ما اريد ادخل للبيت بعد مرة ثانية وتشردين مني اريد مثل كل مرة من ادخل اسمع صوتج تكللي الله يساعدك ضرغام
ابتسمت بخجل ودنكت وهمست
هيام: اوك
ضرغام: بس رحمة على والديج بطلي مال تعوجين حلكج وتلمين الشفايف وتطلعين الكلمة عبالك جاي تاكلين حلقوم وتخلين الكل يباوع بتركيز على شفايفج
رمشت بغباء وحسيت كلبي كمز من مكانه ظليت فاتحة حلكي على كلامه
هيام : هاااااا
ضرغام: رحمة على والديج طلعي ترة كمت اخبص بالكلام هيام: اي راح اطلع
بس شنو احس بخدودي صارت نار
طلعت من عنده واني
اتلمس بخدودي يمة نبرة صوته كلامه
هذا الرجل ليش عنده كل هذا التأثير علية
بكلمة يرفعني للسما وبكلمة ينزلني بسابع ارض
: شنو جنتي تسوين بغرفة ضرغام
شهكت بصدمة يمة دخيلك ربي هاي وين كانت لابدة خرعتني بنت اللذين جنهة جني
ام ضرغام: شنو طرشة ما تسمعين
شعندج بغرفة ضرغام
هيام : ما عندي شي
سحبتني من زندي واخذتني بغرفة ضاري وسدت الباب ودارت وجهة علية
ام ضرغام : شوفي ولج ديري بالج تحطين عينج على ضرغام تحلمين اخليه يتزوجج
اولادي مستحيل اخليهم يتزوجون وحدة من بنات هناء العار
هيام بغضب: اولادج خليهم على كلبج ما ميتة عليهم وامي اياني وياج اسمعج تجيبين طاريهة مرة ثانية والله اگول لخالو راضي والحجية خاجية وهمة يشوفون شغلهم وياج
تركتها وطلعت من الغرفة واني ميتة قهر من عندها
جنت مسطورة ودايخة من ورة كلام ضرغام
بس اجة كلام امه حسيت عبالك وحدة رشو بوجها سطل ماي بارد وصحوها من النوم

وخلال هاي الايام ام ضرغام قسمت شغل البيت بيني وبين ريمة وميس
الحجية خاچية: لا قسمي الشغل بس بين هيام وميسة
بس ريمة خليهة بعدها مريضة
ريام: لا بيبي والله صرت زينة
الحجية خاچية : انتي انجبي وسكتي انا كلت انتي مريضة معناهة انتي بعدج مريضة
ابتسمت على شكل ريمة والحجية خاچية ههههه

(((((((())))))))))
جنا كلنا كاعدين عالغدة
بس ما عدا الولد ضرغام وضرار وضاري ماكو
بالله ضرار كاعد فوك بغرفتة
وضرغام وضاري بالصيرفة
فجاءة دخل علينا ضاري مثل الاعصار ما سلم
دخل جوة يركض

انتبهت لخالو شمر الخاشوكة من ايده ودفع الكرسي
وكام
ام ضرغام: هذا شبي دخل بدون لا سلام ولا كلام
اتوجه خالو يريد يروح وراه
بس رجع ضاري وصار بوجهه

يمةةةةةة عزة هذا شايل رشاشة بيده
راضي: هاي شنو الرشاشة
انتبهت لضاري اتعده من يم خالو مستعجل
وهو يحجي
ضاري: بوية ماعندي وكت هدو علينا بالصيرفة
وركض
انتبهت لخالو ركض جوة للبيت
كمت اني وراه واسمع وراي ام ضرغام
كامت تدك تلطم : يمة ولدي راحووو يمة ولدي
باوعت لخالو راضي طلع مسدس واخذ السويج وطلع يهرول ورة ابنه
واني وراه كلبي خايفة عليهم
شفته شغل سيارته وطلع
ما ادري ليش ظل بالي يم ضرغام هو موجود بالصيرفة لوحده
يارب رجعهم للبيت سالمين ولا تفجعنا بيهم
سديت باب الشارع
فجاءة سمعت صرخة ام ضرغام
رحت اركض ورجلية صارن خيوط من الخوف
دخلت جوة للمطبخ
شفت ام ضرغام مغمى عليها
وخالة رحاب توعي بيها وميس تصيح وتضرب على وجها وريمة تبجي
دخل ضرار يركض
ضرار: يمة خاجية وين سلاحي
خاجية: يبوووووووووي يمة انهبنا يمة انولينا
هيام ظليت افر بعيوني مصدومة شنو الصاير اريد احد يفهمني شكو
سمعت صوت باب الشارع انفتح
وواحد دخل ولد غريب
صرت بوجهه
؟؟؟؟: بسرعة صيحي ضرار
هيام: خوية عفية فهمنا شصاير
؟؟؟؟:عفية اختي روحي صحيلي ضرار ما عدنا وكت
جاي اروح اصيح ضرار
شفتة طلع بوجهي وبيدة رشاشتين انطه وحدة للولد وهو بيدة وحدة وطلعو يركضون
دخلت جوة
بصوت يرجف
هيام: عمة رحاب واحد بيكم يفهمني شنو صاير
رحاب: سودة علية ضرغام متصوب وما نعرف وضعه شنو ومنو الي صوبه بعدنا ما مفتهين شنو السالفة
اتصل على اخوتي محد يرد على اتصالي
بادت رجلية وكعدت بالكاع من الهبطة والخوف
حسيت بگلبي كام يخفق بسرعة
وايدية ترجف لا يا ربي مو ضرغام مو ضرغام
كلشي ولا ضرغاااام
الدموع كامت تنزل من وحدها
عرفت بلحظتها اني غركانة بحب ضرغام وهذا خوفي نابع من حٍٍِْــًبٌٍـــِٓېٍٓ
كعدنا كلنا ننتظر نسمع الاخبار
وخالة رحاب: كل ساعة تتصل على اخوانها مؤيد
وراضي وحسن ومحد يرد عليها واجتي خالة حمدية وهيفاء وجهم لونة مخطوف
ورة ساعتين سمعنا صوت سيارات بالباب
كامت ام ضرغام ولبست عبايتها وركضت للباب
الحجية خاجية: ياحافظ يامانع يالله
ربي استرنا بسترك
دخلو الولد وخالو راضي وخالو حسن ومؤيد
والوجوه مظلمة
ووياهم ضرغام لافين ايدة ومعليكيها بحمالة ايد
جنت واكفة يم باب المطبخ الي تطل على الصالة
الحجية خاچية: شنو يمة فهمونا شصاير
ام ضرغام: يمة وليدي شلونك يمة
باوعت لضرغام حوط امة بذراعه السالمة
ودنك عليها وباسها من راسهة
ضرغام: لا تخافين يمة ما بية شي الطلقة اجت شطح
على ذراعي
ام ضرغام: يبوووووو رامين عليك يمة شيريدون منك
بيمن طالبيك
الحجية خاجية: سدي حلكج خلينا نفتهم منهم شي
التفتت على راضي : يمة راضي فهمنا بهداي
شكو شصاير
التفت علينا اني والبنات
راضي: بنات طلعو برة نريد نحجي
رحاب : يالله بنات خلنا نطلع الظاهر الموضوع عميق مو مال احنا نسمعه
طعلنا والكل كعد بالمطبخ ووحدة تسأل الثانية شكو ليش طلعونا
افتقدت ريمة ماكو وين اشو ماهي يمنا
ظليت ادور بعيني بالمطبخ ماكو
هاي وين راحت

يتبع